1 Buka, manje kwenteka kutsi inkhosi yemaLamani yatfumela simemetelo emkhatsini wabo bonkhe bantfu bayo, kutsi bangatibeki tandla tabo ku-Amoni, Aroni, Omneri, noma Himni, noma lomunye wabomnakabo labayohamba bashumayela livi laNkulunkulu, kunoma nguyiphi indzawo labayokuba kuyo, kunoma nguyiphi incenye yelive labo.

2 Yebo, yatfumela simemetelo emkhatsini wabo, sekutsi bangatibeki tandla tabo kubo bababophe, noma babaphonse ejele; noma babakhafulele ngematse, noma babashaye, noma babacoshe babakhiphe emasinagogeni abo, noma bababhacabule; noma babajikijele ngematje, kodvwa bakhululeke kungena etindlini tabo, kanjalo nasemathempelini abo, kanye nasetindzaweni tabo letingcwele.

3 Ngaleyo ndlela kute bahambe bashumayele livi ngekwetifiso tabo, ngoba inkhosi yaseyiphendvukele eNkhosini, kanye nabo bonkhe bendlu yayo; ngako-ke yatfumela simemetelo sayo kulo lonkhe live ebantfwini bayo, kute livi laNkulunkulu lingabi nekuvimbeleka, kodvwa lihambe liye kulo lonkhe live, kute bantfu bayo bakholwiswe mayelana nemasiko lamabi abokhokho babo, futsi bakholwiswe kutsi bonkhe bebabomnakabo, nekutsi akukameli babulale, baphange, bebe, baphinge, noma bente nanoma nguluphi luhlobo lwebubi.

4 Manje kwenteka kutsi ngesikhatsi inkhosi seyisitfumele lesi simemetelo, Aroni kanye nabomnakabo bahamba lidolobha ngelidolobha, bahamba indlu ngendlu yekukhonta, basungula emabandla, bagcoba baphristi kanye nebafundzisi kulo lonkhe live emkhatsini wemaLamani, kutsi bashumayele baphindze bafundzise livi laNkulunkulu emkhatsini wabo; futsi ngaleyo ndlela bacala kutsi babe nemphumelelo lenkhulu.

5 Tinkhulungwane taletfwa ekuyatini iNkhosi, yebo, tinkhulungwane taletfwa kutsi tikholelwe emasikweni emaNefi; tafundziswa imibhalo kanye netiphrofetho letatindluliselwe kutsi tehle kute kube ngulesi sikhatsi sanyalo.

6 Futsi njengobe kunesiciniseko kutsi iNkhosi iyaphila, kusiciniseko futsi kutsi njengobe labanyenti bakholwa, noma njengobe labanyenti baletfwa ekulatini liciniso, ngekushumayela kwa-Amoni kanye nabomnakabo, ngekwemoya wekwembulelwa kanye newekuphrofetha, emandla aNkulunkulu asebenta timangaliso kubo—yebo, ngitsi kini, njengobe iNkhosi iphila, njengobe labanyenti bemaLamani bakholwa enshumayelweni yabo, futsi baphendvukela eNkhosini, abatange basahlubuka.

7 Ngoba baba bantfu labalungile; batibeka phansi tikhali tekuhlubuka, kangangekutsi abatange basalwa ngekumelana naNkulunkulu nanini, nanoma ngubaphi kubomnakabo.

8 Manje, ngulaba labaphendvukela eNkhosini;

9 Bantfu bemaLamani labebaseveni la-Ishmayeli;

10 Nebantfu bemaLamani labebaseveni laseMidoni;

11 Nebantfu bemaLamani labebasedolobheni laNefi;

12 Nebantfu bemaLamani labebaseveni laseShilomu, nalabo labebaseveni laseShemloni, kanye nasedolobheni laLemuweli, kanye nasedolobheni laseShimnilomu.

13 Lawa ngemagama emadolobha emaLamani labekaphendvukele eNkhosini; laba ngibo labo lababeka phansi tikhali tekuhlubuka, yebo, tonkhe tikhali tabo temphi; futsi bonkhe bebangemaLamani.

14 Futsi ema-Amaleki akaphendvukanga, ngaphandle kwamunye kuphela; kanjalo ngisho namunye wema-Amuloni; kodvwa batenta lukhuni tinhlitiyo tabo, kanjalo netinhlitiyo temaLamani kuleyo ncenye yelive lapho bebahlala khona, yebo, futsi nato tonkhe tigodzi tabo kanye nemadolobha.

15 Ngako-ke, sesiwashito onkhe emadolobha emaLamani lapho aphendvuka khona eta ekwatini liciniso, futsi aphendvuka.

16 Manje kwenteka kutsi inkhosi kanye nalabo labebaphendvukile baba nesifiso sekutsi babe nelibito, kute behlukaniswe kubomnakabo; ngako-ke inkhosi yabonisana na-Aroni kanye nebaphristi babo labanyenti, mayelana nelibito labebatawubitwa ngalo, kute behlukaniswe.

17 Futsi kwenteka kutsi batibita ngelibito lelitsi ngema-Anti Nefi Lehi; futsi babitwa ngalelibito bangasabitwa ngekutsi ngemaLamani.

18 Bacala kutsi babe bantfu labakhutsele; yebo, futsi baba nebungani nemaNefi; ngako-ke, bacala budlelwane nabo, futsi sicalekiso saNkulunkulu asitange sisabalandzela.