1 Manje kwenteka kutsi emvakwekufa kwaKorihori, Alma asatfole tindzaba kutsi emaZoramu abesaguculele tindlela teNkhosi, nekutsi Zoramu, lobekangumholi wabo, abeholela tinhlitiyo tebantfu kutsi tikhotsamele tithico letingakhoni kungakhuluma, inhlitiyo yakhe yaba buhlungu ngenca yebubi bebantfu.

2 Ngoba bekuyimbangela yelusizi lolukhulu ku-Alma kwati ngebubi emkhatsini webantfu bakhe; ngako-ke inhlitiyo yakhe yababuhlungu kakhulu ngenca yekuhlukana kwemaZoramu nemaNefi.

3 Manje emaZoramu besekagcogcene ndzawonye eveni lebekalibita ngekutsi yi-Antiyonumi, lelalisemphumalanga yelive laseZarahemla, lebelisedvute kwemncele welugu lwelwandle, lelaliseningizimu yelive iJeshoni, futsi lebeligudla lihlane eningizimu, lelo hlane lelaligcwele emaLamani.

4 Manje emaNefi abesaba kakhulu kutsi emaZoramu abetawungena esivumelwaneni nemaLamani, nekwekutsi loko kwakutawuba yimbangela yekulahlekelwa lokukhulu kwemaNefi.

5 Manje, ngoba kushunyayelwa kwelivi bekunemkhuba lomkhulu wekuholela bantfu ekwenteni loko lokwakulungile—yebo, kwakunemphumela lonemandla lamakhulu emicondvweni yebantfu kunenkemba, noma ngayini lenye, leyayenteke kubo—ngako-ke Alma wacabanga kutsi bekufanele kutsi bawetame emandla elivi laNkulunkulu.

6 Ngako-ke watsatsa Amoni, na-Aroni, kanye na-Omneri; kwatsi Himni yena wamshiya ebandleni eZarahemla; kodvwa laba bekucala labatsatfu wabatsatsa bahamba naye, ngalokunjalo na-Amuleki kanye naZezromu, labebaseMeleki; waphindze watsatsa emadvodzana akhe lamabili.

7 Manje lomdzala kumadvodzana akhe akatange amtsatse ahambe naye, libito lakhe bekunguHelamani; kodvwa emabito alabo labatsatsa wahamba nabo bekubo Shibloni naKhoriyantoni; lawa ngemabito alabo labahamba naye emkhatsini wemaZoramu, kuyawushumayela kuwo livi.

8 Manje emaZoramu abengemahlubuka asuka kumaNefi, ngako-ke bekake aba nalo livi laNkulunkulu lashunyayelwa kubo.

9 Kodvwa abesawele etiphosisweni letinkhulu, ngoba abengasafuni kwetama kugcina imiyaleto yaNkulunkulu, kanye nemitsetfo yakhe, ngekwemtsetfo waMosi.

10 Angafuni nekugcina tento telibandla, kutsi bachubeke ekuthandazeni kanye nasekuncuseni Nkulunkulu malanga onkhe, kutsi bangangeni ekulingweni

11 Yebo, kwephetsa, atiguculele tindlela teNkhosi etikhatsini letinyenti kakhulu; ngako-ke, ngalesi sizatfu, Alma kanye nabomnakabo bahamba baya eveni kuyawushumayela livi kubo.

12 Manje, ngesikhatsi sebafikile eveni, buka, ngekumangala lokukhulu batfola kutsi emaZoramu abesakhe emasinagoge, nekutsi abebutsana ndzawonye kanye ngelilanga evikini, lokwakulilanga abelibita ngekutsi lilanga leNkhosi; futsi abekhonta ngendlela Alma nabomnakabo labebangatange nanini bayibone;

13 Ngoba abenendzawo lebeyakhiwe ekhatsi nekhatsi nelisinagoge labo, indzawo yekuma, leyayiphakeme ngetulu kwenhloko; futsi sicongo sayo sasingema umuntfu munye kuphela.

14 Ngako-ke, noma ngubani lobekanesifiso sekudvumisa bekufanele ahambe aye ngaphambili bese uma etulu esicongweni lapho, bese welula tandla takhe atibhekise ngasezulwini, bese ukhala ngelivi lelikhulu, utsi:

15 UNgcwele, Nkulunkulu longcwele; siyakholwa kutsi wena unguNkulunkulu, futsi siyakholwa kutsi wena ungcwele, nekutsi wena wawungumoya, futsi nekutsi ungumoya, nekutsi utawuhlala ungumoya ingunaphakadze.

16 Nkulunkulu loNgcwele, siyakholwa kutsi wena usehlukanisile kubomnaketfu; futsi tsine asikholelwa esikweni labomnaketfu, lelendluliselwa kubo ngenca yebuntfwana babokhokho babo; kodvwa siyakholwa kutsi usikhetsile tsine kutsi sibe bantfwana bakho labangcwele; ngetulu kwaloko usembulele kutsi angeke abekhona Khristu.

17 Kodvwa usafana nayitolo, lamuhla, naphakadze; futsi usikhetsile kutsi siyawusindziswa, kutsi bonkhe labasitungeletile bakhetselwe kutsi baphonswe ngentfukutselo yakho phansi esihogweni; ngalokuphatselene nalobu bungcwele, O Nkulunkulu, siyakubonga; futsi siyaphindza siyakubonga kutsi usikhetsile, kute singaholelwa khashane ngekulandzela bulima bemasiko abomnaketfu, lababophela phansi ekukholweni kuKhristu, lokuholela tinhlitiyo tabo kutsi tizulazule khashane nawe, Nkulunkulu wetfu.

18 Futsi ngetulu kwaloko siyakubonga, O Nkulunkulu, kutsi sikhetsiwe futsi sibantfu labangcwele. Amen.

19 Manje kwenteka kutsi emvakwekutsi Alma nabomnakabo kanye nemadvodzana akhe sebayivile lemithandazo, bamangala kakhulu.

20 Ngoba buka, wonkhe muntfu waya ngaphambili washo yona leyo mithandazo lefanako.

21 Manje lendzawo bebayibita ngekutsi yiRamewumtomi, letsi, uma ihunyushwa, yindzawo yekuma lengcwele.

22 Manje, kulendzawo yekuma bebenta, wonkhe muntfu, umthandazo lofanako kuNkulunkulu, bambonga Nkulunkulu wabo kutsi bona bakhetfwa nguye, nekutsi akabaholelanga khashane balandzela lisiko labomnakabo, nekutsi tinhlitiyo tabo atikhohliswanga kutsi tikholelwe etintfweni letitawufika, labebangati lutfo ngato.

23 Manje, emvakwekutsi bonkhe bantfu sebakwentile kubonga ngalendlela, bebabuyela emakhaya abo, bangaphindzi nanini bakhulume ngaNkulunkulu wabo bate baphindze babutsane ndzawonye kuleyo ndzawo yekuma lengcwele, kutawubonga ngalendlela yabo.

24 Manje ngesikhatsi Alma akubona loku inhlitiyo yakhe yadzabuka; ngoba wabona kutsi bebabantfu lababi futsi labaphambene; yebo, wabona kutsi tinhlitiyo tabo bebatibeke etikweligolide, etikwesiliva, kanye nasetikwato tonkhe tinhlobo temphahla yabo lenhle.

25 Yebo, futsi waphindze wabona kutsi tinhlitiyo tabo tase tiphakeme ekutikhukhumeteni lokukhulu, ekutichenyeni kwabo.

26 Waphakamisela livi lakhe ezulwini, wakhala, watsi: O, kuyawute kube nini, O Nkhosi, uvumela tinceku takho kutsi tihlale lapha ngaphansi enyameni, kutsi tibone lobubi lobungaka emkhatsini webantfwana bebantfu na?

27 Buka, O Nkulunkulu, bakhala kuwe, kodvwa tibe tinhlitiyo tabo tenganywe kutikhukhumeta kwabo. Buka, O Nkulunkulu, bakhala kuwe ngemilomo yabo, babe bakhukhumele, bativa babakhulu, ngetintfo letilite temhlaba.

28 Buka, O Nkulunkulu wami, tingubo tabo letibitako, kanye netindandatho tabo letincane, kanye nemabhengela abo, kanye netintfo tabo tekuhlobisa teligolide, kanye nato tonkhe tintfo tabo letiligugu labahlotjiswe ngato; buka, tinhlitiyo tabo batibeke kuto, kodvwa babe bakhala kuwe batsi—Siyakubonga, O Nkulunkulu, ngoba sibantfu labakhetsiwe kuwe, babe labanye batawushabalala.

29 Yebo, batsi ubambulele kutsi angeke abekhona Khristu.

30 O Nkhosi Nkulunkulu, kutawute kube nini uvumela kutsi bubi lobunjena kanye nekungakholwa kube semkhatsini walabantfu na? O Nkhosi, ngicela unginike emandla, kute ngikwati kutsi ngibubeketelele butsakatsaka bami. Ngoba ngibutsakatsaka, futsi bubi lobunje emkhatsini walabantfu bungivisa buhlungu emphefumulweni wami.

31 O Nkhosi, inhlitiyo yami iyadzabuka kakhulu; ngicela udvudvute umphefumulo wami kuKhristu. O Nkhosi ngicela unginike kutsi ngibe nemandla, kute ngititfwale ngekubeketela letinhlupheko letitawuta kimi, ngenca yebubi balabantfu.

32 O Nkhosi, ngicela udvudvute umphefumulo wami, futsi ungiphe imphumelelo, ngalokunjalo nalaba lengisebenta nabo labanami—yebo, Amoni, na-Aroni, na-Omneri, kanjalo na-Amuleki naZezromu, kanjalo nemadvodzana ami lamabili—yebo, nabo bonkhe laba ngicela ubadvudvute, O Nkhosi. Yebo, ngicela uyidvudvute imiphefumulo yabo kuKhristu.

33 Ngicela kutsi ubavumele kutsi babe nemandla, kute batetfwale tinhlupheko tabo letiyawufika kubo ngenca yebubi balabantfu.

34 O Nkhosi, sicela kutsi usiphe imphumelelo ekubaletseni futsi kuwe kuKhristu.

35 Buka, O Nkhosi, imiphefumulo yabo iligugu, futsi labanyenti babo babomnaketfu; ngako-ke, sinike, O Nkhosi, emandla kanye nenhlakanipho kute siphindze siletse laba, bomnaketfu, kuwe.

36 Manje kwenteka kutsi ngesikhatsi Alma asawashito lamavi, wabeka tandla takhe etikwabo bonkhe labo labebanaye. Buka, ngesikhatsi abeka tandla takhe etikwabo, bagcwaliswa ngaMoya loNgcwele.

37 Emvakwaloko batehlukanisa lomunye kulomunye, bangakhatsateki kutsi batodlani, noma batonatsani, noma batogcokani

38 Futsi iNkhosi yabaniketa kutsi bangalambi, nekutsi bangomi; yaphindze yabanika emandla, kute bangabi nanoma nguluphi luhlobo lwetinhlupheko, ngaphandle kwekutsi tenganywe enjabulweni yaKhristu. Manje loku kwaba ngekwemthandazo wa-Alma; futsi loku kungenca yekutsi wathandaza ngelukholo.