1 Futsi ngalokunjalo, bomnaketfu, ngiyawubhekisa tingcondvo tenu phambili ngesikhatsi iNkhosi Nkulunkulu inika lemiyaleto kubantfwana bayo; futsi ngifuna kutsi nikhumbule kutsi iNkhosi Nkulunkulu yabeka baphristi, ngekweluhlelo lwayo lolungcwele, lolwalungekweluhlelo lweNdvodzana yayo, kutsi bafundzise leti tintfo kubantfu.

2 Futsi labo baphristi babekwa ngekweluhlelo lweNdvodzana yayo, ngendlela yekutsi bantfu bati kutsi nguyiphi indlela labangabuka ngayo phambili kuyo iNdvodzana yayo kute bahlengwe.

3 Futsi lena yindlela lababekwa ngayo—babitwa futsi balungiselelwa kusukela ekusekelweni kwemhlaba ngelwati lwangaphambilini ngaNkulunkulu, ngenca yelukholo lwabo lolukhulu kanye nemisebenti yabo lemihle; kwekucala bavunyelwa kutsi batikhetsele lokuhle noma lokubi; ngako-ke bona bakhetsa lokuhle, futsi baba nelukholo lolukhulu kakhulu, babitwa ngelubito lolungcwele, yebo, ngalolo bito lolungcwele lolwalulungisiwe, kanye nangekuhlengwa lokulungiselelwe labanjalo.

4 Futsi ngaleyo ndlela babitelwe kulolubito lolungcwele ngenca yelukholo lwabo, babe labanye bamlahla Moya waNkulunkulu ngenca yebulukhuni betinhlitiyo tabo kanye nekuphumphutsekiswa kwetingcondvo tabo, kantsi, kube bekungesiko kutsi kwakungenca yaloku bebangaba nelilungelo lelikhulu njengabomnakabo.

5 Noma-ke kwephetsa, kwekucala bebasesimeni lesifanako nabomnakabo; ngaleyo ndlela lolubito lolungcwele lwalungiswa kusukela ekusekelweni kwemhlaba lulungiselwe labo labangeke batente lukhuni tinhlitiyo tabo, lukuyo futsi lungayo inhlawulo yeNdvodzana leTelwe Yodvwa, leyayilungisiwe—

6 Futsi ngaleyo ndlela babitwa ngalolubito lolungcwele, babekwa kubo buphristi lobukhulu beluhlelo lolungcwele lwaNkulunkulu, kutsi bafundzise imiyaleto yakhe kubantfwana bebantfu, kute nabo ngalokunjalo bangene ekuphumuleni kwakhe—

7 Lobuphristi lobukhulu bungekweluhlelo lweNdvodzana yakhe, luhlelo loluseloku lwabakhona kusukela ekusekelweni kwemhlaba; noma ngalamanye emagama, lute emalanga nesiphetfo seminyaka, lulungiswe kusukela phakadze kute kube phakadze, ngekwati kwakhe ngaphambili kwentintfo tonkhe—

8 Manje babekwa ngalendlela—babitwa ngelubito lolungcwele, futsi babekwa ngesimiso lesingcwele, batsatsa buphristi lobukhulu beluhlelo lolungcwele, lolo bito, nesimiso, kanye nebuphristi lobukhulu, lokungenasicalo nesiphetfo—

9 Ngaleyo ndlela baba baphristi labakhulu ingunaphakadze, ngekweluhlelo lweNdvodzana, leTelwe Yodvwa kuBabe, lengenasicalo semalanga nesiphetfo seminyaka, legcwele umusa, kulunga, kanye neliciniso. Futsi kunjalo. Amen.

10 Manje, njengobe ngishito mayelana neluhlelo lolungcwele, noma ngalobu buphristi lobukhulu, bebabanyenti lababekwa baba baphristi labakhulu baNkulunkulu; futsi kwakungenca yelukholo lwabo lolukhulu kanye nekuphendvuka kwabo, kanye nekulunga kwabo phambi kwaNkulunkulu, ngenca yekutsi bakhetse kuphendvuka nekwenta kulunga kunekutsi balahleke;

11 Ngako-ke babitwa ngekwalolu luhlelo lolungcwele, bangcweliswa, netembatfo tabo tahlantwa taba mhlophe ngengati yeliWundlu.

12 Manje bona, emvakwekutsi sebangcwelisiwe ngaMoya loNgcwele, tembatfo tabo tentiwa taba mhlophe, bamsulwa futsi bangenabala phambi kwaNkulunkulu, bebangakhoni kubuka sono ngaphandle kwekwenyanya; futsi bebabanyenti, babanyenti kakhulu, labebentiwe baba msulwa futsi bangeniswa ekuphumuleni kweNkhosi Nkulunkulu wabo.

13 Manje, bomnaketfu, ngifuna kutsi nititfobe phambi kwaNkulunkulu, niletse titselo letinhle tekuphendvuka, kute nani ningene kuloko kuphumula.

14 Yebo, titfobeni njengalabantfu ngemalanga aMelkhisedeki, naye lobekangumphristi lomkhulu ngekweluhlelo lengikhulume ngalo, naye lowabutsatsa buphristi lobukhulu ingunaphakadze.

15 Futsi bekunguye kanye loMelkhisedeki Abrahama lobekakhokha kuye kwelishumi; yebo, nababe wetfu Abrahama bekakhokha kwelishumi lokuyincenye yinye eshumini kwako konkhe labekanako.

16 Manje leti timiso betiniketwe ngayo lendlela, kute ngaloko bantfu babuke phambili kuyo iNdvodzana yaNkulunkulu, loko lokwakuluphawu lweluhlelo lwayo, noma lokwakuluhlelo lwayo, futsi ngaloku kute babuke phambili kuyo kute batfole kutsetselelwa kwetono tabo, kute bangene ekuphumuleni kweNkhosi.

17 Manje lo Melkhisedeki bekayinkhosi eveni laseSalema; futsi bantfu bakhe besebakhule bacina ebubini kanye nasesinengisweni; yebo, bonkhe bebadukile, bebagcwele lonkhe luhlobo lwebubi;

18 Kodvwa Melkhisedeki asebentise lukholo lolukhulu, futsi emukele sikhundla sebuphristi lobukhulu ngekweluhlelo lolungcwele lwaNkulunkulu, wakushumayela kuphendvuka kubantfu bakhe. Futsi buka, baphendvuka; Melkhisedeki wacinisekisa kuthula kulelo live emalangeni akhe; ngako-ke wabitwa ngenkhosi yekuthula, ngoba bekayinkhosi yaseSalema; futsi wabusa ngaphansi kweyise.

19 Manje, bebabanyenti ngaphambi kwakhe, ngetulu kwaloko bebabanyenti nasemuva kwaloko, kodvwa kwakute namunye lobekamendlula ngebukhulu; ngako-ke, babhala lokukhetsekile ngaye.

20 Manje akudzingeki ngiluphindzaphindze loludzaba; loko lesengikushito sekwanele. Bukani, imibhalo lengcwele iphambi kwenu; uma niyihlanekela loko kuyawubangela kubhujiswa kwenu.

21 Manje kwenteka kutsi ngesikhatsi Alma sekawashito lamavi kubo, welulela sandla sakhe kubo wamemeta ngelivi lelikhulu, watsi: Manje sesikhatsi sekuphendvuka, ngoba lilanga lekusindziswa selisondzele.

22 Yebo, futsi livi leNkhosi, ngemlomo wetingilosi, liyakumemetela loku kuto tonkhe tive; yebo liyakumemetela, kute tive tindzaba letimnandzi tekujabula lokukhulu; yebo, futsi iyatimemetela leti tindzaba letimnandzi emkhatsini webantfu bonkhe, yebo, nakubo labo labasakatwe ndzawo tonkhe etikwebuso bemhlaba, ngaloko-ke setifikile kitsi.

23 Futsi tatiswa kitsi ngalokucacile, kute siticondze, kute singaphambuki; futsi loku kwentiwa ngenca yekutsi singulabazulazulako eveni lelingatiwa; ngako-ke, ngaleyo ndlela sitsandvwe kakhulu, ngoba sitivile leti tindzaba letimnandzi timenyetelwa kitsi kuto tonkhe tincenye tesivini setfu.

24 Ngoba bukani, tingilosi tiyatimemetela kulabanyenti ngalesi sikhatsi eveni letfu; futsi loku kungesizatfu sekulungiselela tinhlitiyo tebantfwana bebantfu kutsi bemukele livi layo ngesikhatsi sekuta kwayo enkhatimulweni yayo.

25 Manje sesilindzele kuphela kuva tindzaba letijabulisako timenyetelwa kitsi ngemlomo wetingilosi, ngekuta kwayo; ngoba sikhatsi siyeta, asati kutsi sidvutane kangakanani. Ngiyacela kuNkulunkulu kutsi kube ngelilanga lami; kodvwa kube madvutane noma emvakwesikhashana, kuko nitawutfokota.

26 Futsi kuyawukwatiswa kubantfu labalungile nalabangcwele, ngemlomo wetingilosi, ngesikhatsi sekuta kwayo, kute emavi abokhokho betfu agcwaliseke, ngekwaloko labakukhulumile mayelana nayo, lokwakungesiphrofetho semoya lowawukubo.

27 Manje, bomnaketfu, nginesifiso ekujuleni kwenhlitiyo yami, yebo, ngenshisekelo lenkhulu nangebuhlungu, kutsi niweve emavi ami, nitilahle tono tenu, futsi ningalihlehlisi lilanga lekuphendvuka kwenu.

28 Kodvwa nititfobe phambi kweNkhosi, nibite libito layo lelingcwele, nilindze futsi nithandaze njalonjalo, kute ningalingwa ngetulu kwaloko leningakubeketelela, futsi ngaleyo ndlela niholwe nguMoya loNgcwele, nititfobe, nibe mnene, nitehlise, nibeketele, nigcwale lutsandvo kanye nako konkhe kumela bulukhuni.

29 Nibe nelukholo eNkhosini; nibe neletsemba lekutsi niyawuzuza kuphila lokuphakadze; nibe nelutsandvo lwaNkulunkulu njalo etinhlitiyweni tenu, kute niphakanyiswe ngelilanga lekugcina futsi ningene ekuphumuleni kwakhe.

30 Futsi shangatsi iNkhosi inganinika kuphendvuka, kute ningayehliseli intfukutselo yayo etikwenu, kute ningaboshelwa phansi ngetinketane tesihogo, kute ningakuva kufa kwesibili.

31 Futsi Alma wakhuluma emavi lamanyenti kakhulu kulabantfu, langakabhalwa kulencwadzi.