1 Futsi kwenteka ekucaleni kwemnyaka wesihlanu wekubusa kwabo kwacala kwabakhona incabano emkhatsini webantfu; ngoba indvodza letsite, lebeyibitwa ngekutsi ngu-Amlisi, iyindvodza lenebucili lobukhulu, yebo, indvodza lehlakaniphile ngekuhlakanipha kwaseveni, ingulomunye weluhlelo lwaleyo ndvodza leyabulala Gideyoni ngenkemba, leyabulawa ngekwemtsetfo—

2 Manje lo-Amlisi, ngebucili bakhe, wadvonsela khashane bantfu labanyenti kutsi bamlandzele; labanyenti kangangekutsi bacala kuba nemandla lamakhulu; bacala kwetama kubeka Amlisi kutsi abe yinkhosi ngetulu kwebantfu.

3 Manje loku bekwetfusa ebantfwini belibandla, nakubo bonkhe labo labebangakadvonswa ngemuva kwekuhehwa ngu-Amlisi; ngoba bebati kutsi ngekwemtsetfo wabo leyontfo lenjalo bekufanele imiswe ngelivi lebantfu.

4 Ngako-ke, uma ngabe bekungenteka kutsi Amlisi akwati kuzuza livi lebantfu, njengemuntfu lobekagcwele inkhohlakalo, bekangabamuka emalungelo abo kanye netibusiso telibandla; ngoba bekuyinhloso yakhe kulicedza libandla laNkulunkulu.

5 Futsi kwenteka kutsi bantfu babutsana ndzawonye kulo lonkhe live, wonkhe muntfu ngekwemcondvo wakhe, noma ngabe bebavumelana na-Amlisi noma bebaphikisana naye, ngekwemacembu lahlukene, banemphikiswano lenkhulu kanye naletimangalisako tincabano lomunye nalomunye.

6 Futsi ngaleyo ndlela babutsana ndzawonye batovakalisa emavi abo mayelana naleyo ndzaba; babekwa phambi kwebehluleli.

7 Futsi kwenteka kutsi livi lebantfu laphikisana na-Amlisi, ngaloko-ke akabekwanga kutsi abe yinkhosi ngetulu kwebantfu.

8 Manje loku kwadala injabulo lenkhulu etinhlitiyweni talabo labebaphikisana naye; kodvwa Amlisi wabaphehla labo labebamtsandza kutsi babatfukutselele labo labebangamtsandzi.

9 Futsi kwenteka kutsi babutsana ndzawonye, bambeka Amlisi kutsi abe yinkhosi yabo.

10 Manje ngesikhatsi Amlisi sekabekwe kutsi abe yinkhosi ngetulu kwabo wabayaleta kutsi batsatsele bomnakabo tikhali; futsi loku wakwenta kute abente babe ngaphansi kwakhe.

11 Manje bantfu ba-Amlisi bebahlukaniswa ngelibito la-Amlisi, babitwa ngema-Amlisi; kutsi labasalako bese babitwa ngemaNefi, noma bantfu baNkulunkulu.

12 Ngako-ke bantfu bemaNefi bebati ngenhloso yema-Amlisi, ngako-ke batilungiselela kuhlangabetana nabo; yebo batihlomisa ngetinkemba, nangabocelemba, nangebutjoki, nangemicibisholo, nangematje, nangetilingi, kanye nangato tonkhe tinhlobo tetikhali temphi, talo lonkhe luhlobo.

13 Ngaleyo ndlela bebatilungiselele kuhlangabetana nema-Amlisi ngesikhatsi eta. Bekukhona tindvuna letikhetsiwe, kanye netindvuna letiphakeme, kanye netindvuna letinkhulu, ngekwesibalo sabo.

14 Futsi kwenteka kutsi Amlisi wabahlomisa bantfu bakhe ngato tonkhe tinhlobo tetikhali temphi talo lonkhe luhlobo; waphindze wabeka babusi kanye nebaholi ngetulu kwebantfu bakhe, kutsi babahole kute bayawukulwa nabomnakabo.

15 Futsi kwenteka kutsi ema-Amlisi aya etikwentsaba i-Amnihu, lebeyingasemphumalanga yemfula iSidoni, lebewugijima edvute nelive iZarahemla, futsi lapho bacala kulwa nemaNefi.

16 Manje Alma, angumehluleli lomkhulu kanye nembusi webantfu baNefi, ngako-ke wahamba wakhuphuka nebantfu bakhe, yebo, kanye netindvuna takhe, kanye netindvuna letinkhulu, yebo, ahola emabutfo akhe, kuyobukana nema-Amlisi emphini.

17 Bacala kuwabulala ema-Amlisi egcumeni lelisemphumalanga yeSidoni. Nema-Amlisi alwa nemaNefi ngemandla lamakhulu, kangangekutsi labanyenti bemaNefi bafa phambi kwema-Amlisi.

18 Noko inkhosi yasicinisa sandla semaNefi, kangangekutsi awabulala ema-Amlisi ngekubulawa lokukhulu, kangangekutsi acala awabalekela.

19 Futsi kwenteka kutsi emaNefi awacosha ema-Amlisi lilanga lonkhe, awabulala ngekubulawa lokukhulu, kangangekutsi lababulawa bema-Amlisi bekuyimiphefumulo letinkhulungwane letilishumi nakubili nemakhulu lasihlanu nemashumi lamatsatfu nakubili; futsi kumaNefi bekubulewe imiphefumulo letinkhulungwane letisitfupha nemakhulu lasihlanu nemashumi lasitfupha nakubili.

20 Futsi kwenteka kutsi ngesikhatsi Alma angasakhoni kuwacosha ema-Amlisi wenta kutsi bantfu bakhe bamise emathende abo esigodzini saGideyoni, sigodzi lesasibitwa ngaGideyoni lowabulawa ngesandla saNehori ngenkemba; futsi kulesigodzi emaNefi amisa emathende awo ngalobo busuku.

21 Futsi Alma watfumela tinhloli kutsi tiyilandzele insali yema-Amlisi, kute ati ngemasu kanye nangemachinga awo, kute ngaloko akwati kutsi ativikele ngekumelana nawo, kute aphephise bantfu bakhe ekubhujisweni.

22 Manje labo labekabatfumele kutsi bayogadza inkambu yema-Amlisi bebabitwa ngekutsi boZeramu, na-Amnori, naManti, naLimheri; laba bekungibo labebahamba nebantfu babo kuyawugadza inkambu yema-Amlisi.

23 Futsi kwenteka kutsi ngakusasa babuyela enkambu yemaNefi ngekushesha lokukhulu, bamangele kakhulu, futsi banekwesaba lokukhulu, batsi:

24 Bukani, sililandzele libutfo lema-Amlisi, futsi ngekumangala kwetfu lokukhulu, eveni laseMinoni, ngetulu kwelive laseZarahemla, endleleni leya eveni laNefi, sibone imphi lenkhulu kakhulu yemaLamani; bukani, ema-Amlisi sekahlangene nawo.

25 Sebasetikwabomnaketfu kulelo live; futsi bayababalekela nemihlambi yabo, nebafati babo, kanye nebantfwana babo, beta ngasedolobheni letfu; futsi ngaphandle kwekutsi sente masinyane bayalitsatsa lelidolobha letfu, futsi bobabe betfu, nebafati betfu, kanye nebantfwana betfu batawubulawa.

26 Futsi kwenteka kutsi bantfu baNefi batsatsa emathende abo, besuka baphuma esigodzini sakaGideyoni baya ngasedolobheni labo, lebekulidolobha laseZarahemla.

27 Buka, ngesikhatsi bewela umfula iSidoni, emaLamani kanye nema-Amlisi, bekamanyenti kangangekutsi bekacishe abe ngangesihlabatsi saselwandle, atseleka etikwabo kutsi ababulale.

28 Noko, emaNefi ngekuciniswa sandla seNkhosi, athandazile kakhulu kuyo kutsi ibakhulule etandleni tetitsa tawo, ngako-ke iNkhosi yakuva kukhala kwawo, yawacinisa, futsi emaLamani kanye nema-Amlisi abulawa phambi kwawo.

29 Futsi kwenteka kutsi Alma walwa na-Amlisi ngenkemba, buso nebuso; balwa kakhulu, lomunye nalomunye.

30 Futsi kwenteka kutsi Alma, angumuntfu waNkulunkulu, anelukholo lolukhulu, wakhala, watsi: O Nkhosi, bani nebubele futsi usindzise imphilo yami, kute ngibe sikhali etandleni takho kute ngisindzise futsi ngilondvolote laba bantfu.

31 Manje ngesikhatsi Alma sekawashito lamavi waphindze walwa na-Amlisi; waciniswa, kangangekutsi wambulala Amlisi ngenkemba.

32 Ngetulu kwaloko walwa nenkhosi yemaLamani; kodvwa inkhosi yemaLamani yabaleka yabuyela emuva phambi kwa-Alma yatfumela bogadzi bayo kutsi balwe na-Alma.

33 Kodvwa Alma, nabogadzi bakhe, walwa nabogadzi benkhosi yemaLamani wate wababulala wababuyisela emuva.

34 Ngaleyo ndlela wawutsanyela umhlabatsi, noma indvundvuma, lebeyisenshonalanga yemfula iSidoni, alahla tidvumbu temaLamani labekabulewe emantini aseSidoni, kute ngaloko bantfu bakhe babe nendzawo yekuwela bayawukulwa nemaLamani kanye nema-Amlisi enshonalanga yemfula iSidoni.

35 Futsi kwenteka kutsi ngesikhatsi bonkhe sebawuwelile umfula iSidoni emaLamani kanye nema-Amlisi acala kubaleka phambi kwabo, nanoma bekamanyenti kangangekutsi bekangabaleki.

36 Abaleka ngaphambi kwemaNefi aya ngasehlane lebelingasenshonalanga kanye nasenyakatfo, aya khashane ngale kwemincele yelive; futsi emaNefi awacosha ngemandla awo onkhe, awabulala.

37 Yebo, ahlangabetwa ngakuto tonkhe tinhlangotsi, abulawa ahlehliswa, ate ahlakateka enshonalanga, kanye nasenyakatfo, ate efika ehlane, lebelibitwa ngekutsi yiHemowunthi; futsi bekunguleyo ncenye yelihlane lebeyigcwele tilwane tesiganga kanye netilwane letibukhali.

38 Futsi kwenteka kutsi lamanyenti afela ehlane ngenca yemanceba awo, futsi ashwabudzelwa ngito leto tilwane kanye nemangce asemoyeni; nematsambo awo atfolakele, futsi angcwatjelwe ndzawonye emhlabatsini.