INcwadzi ya-Alma
Indvodzana ya-Alma
Indzaba ya-Alma, lobekayindvodzana ya-Alma, umehluleli lomkhulu newekucala kubantfu baNefi, ngalokunjalo nemphristi lomkhulu eBandleni. Indzaba ngekubusa kwebehluleli, kanye netimphi kanye netincabano emkhatsini webantfu. Ngetulu kwaloko indzaba ngemphi emkhatsini wemaNefi nemaLamani, ngekwembhalo wa-Alma, umehluleli lomkhulu newekucala.
Sehluko 1
Nehori ufundzisa timfundziso letingemanga, usungula libandla, ucalisa buphristimbumbulu, futsi ubulala Gideyoni—Nehori ubulawela emacala akhe—Buphristimbumbulu kanye nekuhlushwa kuyandza emkhatsini webantfu—Baphristi batondla bona, bantfu banakekela labamphofu, liBandla liyaphumelela. Cishe ngemnyaka wema-91–88 ngaphambi kwekutalwa kwaKhristu.
1 Manje kwenteka kutsi ngemnyaka wekucala wekubusa kwebehluleli ngetulu kwebantfu baNefi, kusukela ngalesi sikhatsi kuya phambili, inkhosi Mosiya seyiyihambile indlela yemhlaba wonkhe, seyikulwile kulwa lokuhle, seyihambe ngebucotfo phambi kwaNkulunkulu, ingashiyanga namunye kutsi abuse esikhundleni sayo; noko beyiyimisile imitsetfo, futsi yayemukelekile kubantfu; ngako-ke bebaphocelelekile kutsi bayigcine imitsetfo lebeyiyibekile.
2 Futsi kwenteka kutsi ngemnyaka wekucala wekubusa kwa-Alma esihlalweni sekwehlulela, kwaba khona indvodza leyaletfwa phambi kwakhe kutsi yehlulelwe, indvodza lebeyiyinkhulu, futsi lebeyatiwa ngemandla ayo lamakhulu.
3 Futsi beseyihambile emkhatsini webantfu, ishumayela kubo ngaloko beyikubita ngekutsi livi laNkulunkulu, ihudvulela phansi libandla; imemetela kubantfu kutsi wonkhe umphristi kanye nemfundzisi kumele batsandvwe; futsi akukameli basebente ngetandla tabo, kodvwa kumele bondliwe bantfu.
4 Ngetulu kwaloko yafakaza kubantfu kutsi lonkhe luntfu kumele lusindziswe ngelilanga lekugcina, nekutsi akukafaneli besabe noma batfutfumele, kodvwa kutsi baphakamise tinhloko tabo batfokote, ngoba inkhosi yabadala bonkhe bantfu, ngetulu kwaloko yahlenga wonkhe umuntfu; futsi, ekugcineni, bonkhe bantfu kumele batfole kuphila lokuphakadze.
5 Futsi kwenteka kutsi yatifundzisa leti tintfo kangangekutsi labanyenti bakholelwa emavini ayo, baba banyenti ngendlela yekutsi bacala kuyondla futsi bayinika imali.
6 Yacala kutiphakamisa ngekutichayisa enhlitiyweni yayo, yagcoka tingubo letibitako, yebo, yacala kusungula libandla ngekweluhlobo lwenshumayelo yayo.
7 Futsi kwenteka kutsi ngesikhatsi isahamba, iyawushumayela kulabo labebakholelwa emavini ayo, yahlangana nendvodza lebeyiyelibandla laNkulunkulu, yebo, lomunye webafundzisi babo; yacala kuphikisana nayo kamatima, kute iholele khashane bantfu belibandla; kodvwa lendvodza yamelana nayo, iyecwayisa ngemavi aNkulunkulu.
8 Manje libito lalendvodza bekunguGideyoni; futsi kwakunguye loyo lobekasikhali etandleni taNkulunkulu ekukhululeni bantfu baLimhi kubakhipha ebugcilini.
9 Manje, ngoba Gideyoni wamelana nayo ngemavi aNkulunkulu yamtfukutselela Gideyoni, yahoshula inkemba yayo yacala kumshaya. Manje Gideyoni ekubeni sekakhulile ngeminyaka leminyenti, ngako-ke akakhonanga kumelelana nemagalelo ayo, ngako-ke wabulawa ngenkemba.
10 Lendvodza leyambulala yatsatfwa bantfu belibandla, yaletfwa phambi kwa-Alma, kutsi yehlulelwe ngekwemacala leyayiwentile.
11 Futsi kwenteka kutsi yema phambi kwa-Alma yatincengela ngesibindzi lesikhulu.
12 Kodvwa Alma watsi kuyo: Buka, loku kwekucala kutsi buphristimbumbulu bucaliswe emkhatsini webantfu. Buka, ute licala lebuphristimbumbulu kuphela, kodvwa utame kubuphocelela ngenkemba; futsi kube buphristimbumbulu bebuyophocelelwa emkhatsini walabantfu loko bekuyokusho kubhujiswa kwabo nya.
13 Ucitse ingati yemuntfu lolungile, yebo, indvodza leyente lokunyenti lokuhle emkhatsini walabantfu; futsi uma singakusindzisa ingati yakhe ingeta etikwetfu kutiphindziselela.
14 Ngako-ke ujeziswa ngekutsi ufe, ngekwemtsetfo lesawunikwa nguMosiya, inkhosi yetfu yekugcina; futsi uvunywe ngulaba bantfu; ngako-ke labantfu kufanele bawugcine umtsetfo.
15 Futsi kwenteka kutsi bayitsatsa; libito layo bekunguNehori; bamtfwala bamyisa esicongweni seligcuma iManti, lapho wentiwa, noma-ke ngalenye indlela wavuma, emkhatsini wemazulu nemhlaba, kutsi loko lebekakufundzisa kubantfu kwakuphikisana nelivi laNkulunkulu; futsi lapho weva kufa lokulihlazo.
16 Noko loko akutange kucedze kwandza kwebuphristimbumbulu eveni lonkhe; ngoba bebabanyenti labebatsandza tintfo letilite temhlaba, futsi bahamba bashumayela timfundziso letingemanga; loko bakwenta ngesizatfu sekufuna ingcebo kanye neludvumo.
17 Noko, abatange balinge kucala emanga, uma bekungatiwa, ngekwesaba umtsetfo, ngoba bakhohlisi bebajeziswa; ngako-ke bebenta shangatsi bashumayela ngekwenkholelo yabo; manje umtsetfo wawute emandla kunoma ngumuphi umuntfu ngekwenkholelo yakhe.
18 Abatange balinge bebe, ngenca yekwesaba umtsetfo, ngoba labanjalo bebajeziswa; futsi bebangeke balinge baphange, noma babulale, ngoba lobekabulala bekajeziswa ngekufa.
19 Kodvwa kwenteka kutsi loyo lobekangasiye welibandla laNkulunkulu wacala kuhlupha labo labebabelibandla laNkulunkulu, futsi labebamukele kubitwa ngelibito laKhristu.
20 Yebo, babahlupha, babavisa buhlungu ngalo lonkhe luhlobo lwemavi, futsi loku kwenteka ngenca yekutfobeka kwabo; ngenca yekutsi bebangatikhukhumeti emehlweni abo, nangenca yekutsi bebabelana ngelivi laNkulunkulu, lomunye nalomunye, ngaphandle kwemali nangaphandle kwentsengo.
21 Manje bekukhona umtsetfo locinile emkhatsini webantfu belibandla, wekutsi kube bete namunye umuntfu, longuwelibandla, lotawuvukela aphindze ahluphe labo labebangasibo belibandla, nekutsi kubebete kuhluphana emkhatsini wabo.
22 Noko, bekukhona labanyenti emkhatsini wabo labacala kutikhukhumeta, bacala kubanga kamatima netitsa tabo, nangekugadla, yebo, bebashayana ngetibhakela.
23 Manje lona bekungumnyaka wesibili wekubusa kwa-Alma, futsi kwabangela kuhlupheka lokukhulu kulo libandla; yebo, kwabayimbangela yekulingwa lokukhulu kulo libandla.
24 Ngoba tinhlitiyo talabanyenti taba lukhuni, futsi emabito abo esulwa, kangangekutsi abatange basakhunjulwa nanini emkhatsini webantfu baNkulunkulu. Ngetulu kwaloko labanyenti batikhipha emkhatsini wabo.
25 Manje loku bekukulingwa lokukhulu kulabo labebeme bacina elukholweni, noko, bebasimile futsi banganyakatiseki ekugcineni imiyaleto yaNkulunkulu, batitfwala ngekubeketela tinhlupheko letatibutsiswe etikwabo.
26 Futsi ngesikhatsi baphristi bashiya imisebenti yabo kutsi bayokwabelana ngelivi laNkulunkulu kubantfu, labantfu nabo ngalokunjalo bashiya imisebenti yabo kutsi bayoliva livi laNkulunkulu. Ngesikhatsi umphristi asabelene nabo ngelivi laNkulunkulu bonkhe bebabuyela futsi ngekukhutsala emisebentini yabo; umphristi, angatiphakamisi ngetulu kwalabo labebalalele, ngoba umshumayeli bekangasiko ncono kunemlaleli, noma umfundzisi bekangasiko ncono kunemfundzi; ngaleyo ndlela bonkhe bebalingana, futsi bonkhe basebenta, wonkhe umuntfu ngekwemandla akhe.
27 Babelana ngalabebanako, wonkhe umuntfu ngaloko abenako, kulabamphofu, nalabeswele, nalabagulako, kanye nalabahluphekile; futsi abatange bagcoke tingubo letibitako, kodvwa bebangemanono baphindze babukeka.
28 Batihlela ngaleyo ndlela tindzaba telibandla; bacala kuba nekuthula njalo futsi, nanoma bebahlushwa.
29 Manje, ngenca yekucina kwelibandla bacala kuceba kakhulu, banenala yato tonkhe tintfo labebatidzinga—inala yemihlambi yetimvu, nemihlambi yetinkhomo, nalokukhuluphalisiwe kwalo lonkhe luhlobo, futsi ngalokunjalo nenala yalokuyinhlavu, neligolide, nesiliva, netintfo letiligugu, nenala yesilika nelineni leyephotselwe ngalokucolisakele, kanye nayo yonkhe inhlobo yendvwangu lenhle leyayijwayelekile.
30 Ngaleyo ndlela, esimeni sabo sekuphumelela, abacoshanga namunye lobekangcunu, noma lobekalambile, noma lobekomile, noma lobekagula, noma loyo lobekangakondleki; futsi abatibekanga tinhlitiyo tabo etikwemcebo, ngako-ke bebanesisa kubo bonkhe, labadzala nalabancane, lababoshiwe nalabakhululekile, besilisa nebesifazane, noma bangaphandle kwelibandla noma bangekhatsi ebandleni, bangakhetsi bala lamuntfu kulabo bebadzinga.
31 Ngaleyo ndlela baphumelela banotsa kakhulu ngetulu kwalabo labebangasibo belibandla labo.
32 Ngoba labo labebangasibo belibandla labo bebatitika ebutsakatsini, kanye nangekukhonta tithico noma buvila, nekukhuluma lokulite, kanye nemona nencabano; bagcoka tingubo letibitako; batiphakamisa ngekutichenya emehlweni abo; bahlupha, bakhuluma emanga, beba, baphanga, benta bugwadla, babulala, kanye nayo yonkhe inhlobo yenkhohlakalo, noko, umtsetfo wacina kubo bonkhe labo bebawephula, ngendlela lebekungenteka ngayo.
33 Futsi kwenteka kutsi ngaloko kusetjentiswa kwemtsetfo kubo, wonkhe umuntfu ajeziswa ngaloko labekakwentile, baba nekuthula lokukhulu, futsi bangalinge bayenta inkhohlakalo uma ngabe bekwatiwa; ngako-ke, kwaba khona kuthula lokukhulu emkhatsini webantfu baNefi kwate kwaba ngumnyaka wesihlanu wekubusa kwebehluleli.