Mahinungdanong mga Termino sa Bag-ong Tugon

Ang sukaranang panabot sa mosunod nga mga termino makatabang sa inyong pagtuon sa Bag-ong Tugon:

Mesiyas.“Usa ka matang sa Aramaic ug Hebreohanon nga pulong nga nangahulogan og ‘ang dinihogan.” Sa karaang Israel, ang mga propeta, mga hari, ug mga pari gidihogan og lana aron ipakita nga gipili sila ug gigahin [set apart] sa Dios. Ang pulong nga Mesiyas nagpasabot nga dinihogan nga Propeta, Pari, ug Hari nga lakip sa kaliwatan ni David ug moanhi sa pagluwas sa Iyang katawhan. Sa kapanahonan sa Bag-ong Tugon, ang katawhan mahinamong nagpaabot sa pag-anhi sa Mesiyas. Ang Gresyanhon nga katugbang sa Mesiyas, mao ang Christos, diin naggikan kini sa titulo nga Kristo.

Mga Pariseo.Tan-awa sa “Kinsa ang mga Pariseo?” diha sa seksiyon nga “Tunga-tungang Panahon sa Daan ug Bag-ong mga Tugon”

Saduceo.Tan-awa sa “Kinsa ang mga Saduceo?” sa seksiyon nga “Tunga-tungang Panahon sa Daan ug Bag-ong mga Tugon”

Sanhedrin.Kining Gresyanhon nga termino posibleng nagpasabot og “tupad nga paglingkod,” “panagtigom,” o “konseho.” Dihay daghang mga Sanhedrin sa lain-laing mga dapit sa kinabuhi sa mga Judeo. Sa dihang ang termino nga Sanhedrin (o ang Iningles nga katugbang niini, “konseho”) gigamit nga walay dugang nga deskripsyon diha sa Bag-ong Tugon, sa kinatibuk-an nagpasabot kini sa Talagsaong Sanhedrin sa Jerusalem. Kining konseho sa mga Judeo maoy nagkontrolar sa lokal nga mga kalihokan sa nasod sa mga Judeo. Naglangkob kini og 70 ka miyembro ug usa ka labaw nga pari nga nagdumala sa konseho. Ang mga miyembro niini gikuha gikan sa elitistang mga Judeo—punoang mga pari, mga eskriba, ug mga elder. Bisan og ang Roma padayong naghupot sa politikal nga gahom, ang Sanhedrin gihatagan og awtoridad sa relihiyuso, politikanhon, ug opisyal nga mga pamalaod sa Judea.

Mga Eskriba.Tan-awa sa “Sa unsang paagi ang mga eskriba misulbong ngadto sa impluwensiya ug gahom?” sa seksiyon nga “Tunga-tungang Panahon sa Daan ug Bag-ong mga Tugon”

Mga kasulatan.Ang mga Judeo sa kapanahonan ni Jesus naghisgot og duha ka kategoriya sa kasulatan: ang Balaod ug ang mga Propeta. Agig sumpay niini, gihisgotan usab ni Lucas ang Mga Salmo, nga sa ngadto-ngadto malakip sa ikatulong kategoriya nga nailhan karon isip ang Mga Sinulat. Ang Balaod, nga nailhan usab isip ang Torah, naglangkob sa lima ka basahon ni Moises. Ang Mga Propeta mao ang koleksyon sa mga basahon nga sinulat sa mga propeta ug mahitungod sa mga propeta. Kini nga mga koleksyon naglakip sa mga basahon gikan sa Josue hangtod sa Mga Hari ug sa Isaias, Jeremias, Ezequiel, ug sa 12 ka “Minor nga mga Propeta” (Oseas hangtod sa Malaquias). Ang Mga Sinulat naglakip sa mga buhat sa literatura sama sa Mga Salmo, Mga Proverbio, ug Job. Naglakip usab kini ‘sa lima ka linukot” (Awit ni Solomon, Ruth, Mga Pagbangotan, Ecclesiastes, ug Ester), sa basahon ni Daniel, ug sa makasaysayanong mga basahon sa 1 ug 2 Mga Cronicas.

Sinagoga.Ang mga sinagoga mao ang mga gambalay diin ang mga Judeo magpundok alang sa pagsimba ug sa instruksiyon. Ang gigikanan sa mga sinagoga wala mahibaloi. Ang paghisgot sa mga sinagoga diha sa Basahon ni Mormon nagsugyot nga posibleng diha na kini sa Israel sa wala pa si Lehi mobiya sa Jerusalem. Ang pagsimba sulod sa sinagoga tingali mas nagkadaghan human sa pagkabihag sa Babelonia samtang ang mga Judeo nangita og mga paagi sa pagsimba sa Ginoo samtang nahimulag gikan sa Iyang templo.

Ang usa ka sinagoga gidumala sa lokal nga tigmando, o escriba. Ang matag sinagoga aduna sa “mga linukot nga balaod ug uban pang sagradong mga sinulat, usa ka lamesa para sa pagbasa, ug mga lingkoranan alang sa mga tigsimba.” Atol sa pagsimba sa Igpapahulay, ang mga Judeo magpundok sa mga sinagoga aron maminaw sa mga pagbasa gikan sa sagradong mga teksto sa kasulatan sa Judeo.

Si Jesus nga anaa sa Sinagoga sa Nazaret ni Greg K. Olsen

Magkat-on pa og Dugang

• Henry B. Eyring, “Ang Gisaad nga Mesiyas,”Liahona, Dis. 2022, 4–7

• Trevan G. Hatch, “Messianism and Jewish Messiahs in the New Testament Period,” sa Lincoln H. Blumell, ed., New Testament History, Culture, and Society: A Background to the Texts of the New Testament (2019), 71–85

• “Lesson 6: New Testament Customs—Worship in the Synagogue” (0:42)

Mubo nga mga Sulat

1. Giya ngadto sa mga Kasulatan, “Mesiyas,” Librarya sa Ebanghelyo; tan-awa usab sa Tremper Longman III and Mark L. Strauss, The Baker Expository Dictionary of Biblical Words (2023), 987.

2. Tan-awa sa Giya ngadto sa mga Kasulatan, “Mesiyas,” Librarya sa Ebanghelyo.

3. Longman and Strauss, The Baker Expository Dictionary of Biblical Words, 703; tan-awa usab sa Bible Dictionary, “Sanhedrin,” Librarya sa Ebanghelyo.

4. Tan-awa sa Longman and Strauss, The Baker Expository Dictionary of Biblical Words, 703–4. Tan-awa usab sa Giya ngadto sa mga Kasulatan, “Sanhedrin,” Librarya sa Ebanghelyo.

5. Tan-awa sa Mat. 7:12; 22:40; Lucas 16:16; Juan 1:45; Mga Buhat 13:15; Mga Taga-Roma 3:21.

6. Tan-awa sa Lucas 24:44.

7. Holzapfel and others, Jehovah and the World of the Old Testament, 10, 276; Holzapfel and others, Jesus Christ and the World of the New Testament, 9. Samtang aduna diha sa kapanahonan sa Bag-ong Tugon nga usa ka dili kaayo tukmang paggrupo sa mga teksto sa kasulatan ngadto sa Balaod, sa mga Propeta, ug sa mga Sinulat, “ang mga utlanan niadto nga mga kategoriya wala makita nga klaro ang pagkalatid” (Daniel O. McClellan, “The Use of the Old Testament in the New Testament,” in Blumell, New Testament History, Culture, and Society, 498).

8. Tan-awa sa 2 Nephi 26:26; Alma 16:13; 32:1.

9. Giya ngadto sa mga Kasulatan, “Sinagoga,” Librarya sa Ebanghelyo.