Mga Tabang sa Kasulatan
1 ug 2 Pedro

“1 ug 2 Pedro,” Mga Tabang sa Kasulatan: Bag-ong Tugon (2024)

Mga Tabang sa Kasulatan

1 ug 2 Pedro

Si Apostol Pedro ang nangunang saksi ni Jesukristo sa sayo nga sa Simbahang Kristiyano. Ang iyang duha ka epistola [sulat] gisulat ngadto sa mga kinabig atol sa usa ka panahon sa dakong pagpanggukod ug apostasiya. Misaad siya niini nga mga Santos nga kon molahutay sila pag-ayo sa pagpanggukod, madawat nila ang kaluwasan ug mahangturong himaya. Gipahinumdoman ni Pedro kini nga mga Santos nga sila usa ka “kaliwatan nga pinili, ang kahugpongan sa mga harianong sacerdote, ang nasod nga balaan, ang katawhan nga iyang kaugalingon sa Dios.” Sila kinahanglan nga mahimong balaan gani sama nga si Jesukristo balaan. Misulat si Pedro mahitungod sa pangalagad ni Jesukristo didto sa kalibotan sa espiritu human sa Iyang Paglansang sa Krus. Giawhag niya ang mga Santos sa pagpalambo og Kristohanong mga hiyas ug sa ingon niana mahimong mga tig-ambit sa diosnong kinaiya. Mipasidaan usab siya kabahin sa mini nga mga propeta ug mini nga mga magtutudlo.

Mga Kapangohaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Kaagi ug Kinatibuk-ang Kahulogan

Ngadto kang kinsa ang mga sulat ni Pedro gisulat ug ngano?

Si Pedro mao ang pangulong Apostol ngadto kang kinsa gihatag ni Jesukristo ang mga yawe sa pagkapari. Gihuptan ni Pedro ang posisyon nga sama ngadto niana nga Presidente sa Simbahan ni Jesukristo sa mga Santos sa Ulahing mga Adlaw.

Gisulat ni Pedro ang iyang unang epistola didto sa Babelonia, diin tingali simbolikanhon nga pagpasabot ngadto sa Roma. Gipatunong niya ang iyang unang epistola ngadto sa mga miyembro sa Simbahan nga nagkatibulaag sa tibuok Ponto, Galacia, Capadocia, Asia, ug Bitinia”—ang lima ka mga probinsiya sa Roma nga nahimutang sa karong bag-o nga panahon sa Turkey. Misulat si Pedro sa paglig-on ug pag-awhag sa mga Santos diha sa “pagsulay sa [ilang] hugot nga pagtuo” ug sa pag-andam kanila alang sa usa ka umaabot nga “magasilaob nga kalisdanan.”

Ang tambag ni Pedro tukma sa panahon tungod kay ang mga miyembro sa Simbahan nagpadulong sa usa ka panahon nga nagkagrabe ang pagpanggukod. Niadtong AD 64 usa ka sunog ang miguba sa kadaghanan sa Roma. “Daghang magka-edad nga mga Romano mituo nga gituyo ni Emperador Nero ang pagsunog aron sa pagpadali sa usa sa iyang mga proyekto nga gambalay. Aron sa pagpalayo sa wala kinahanglanang atensiyon nganha sa iyang kaugalingon, gipasanginlan ni Nero ug gisunod ang pagpasakit sa mga Kristiyanos sa siyudad, nagbasol kanila atubangan sa publiko alang sa buhat nga pagpangguba.” Kini kinatibuk-ang gituohan nga si Pedro gi-martir atol niini nga panahon sa pagpanggukod. Kalagmitan iyang gisulat ang iyang ikaduhang epistola sa hapit na ang iyang kamatayon.

Usa ka nagpaibabaw nga tema diha sa 2 Pedro mao ang importansya sa pag-angkon og kahibalo kabahin ni Jesukristo. Misaad si Pedro sa iyang mga mambabasa nga kon sila maningkamot og diosnong mga hiyas ug magpalambo og usa ka balaanong kinaiya, maangkon nila og siguro ang ilang “pagkatinawag ug pagkapinili.” Gitandi ni Pedro ang tinuod nga kahibalo ni Jesukristo ngadto sa sayop nga mga pagtulon-an ug sa mga erehes nga gipakaylap pinaagi sa mga mi-apostasiya.

1 Pedro 1:17–19

Unsay gitudlo ni Pedro mahitungod sa tahas ni Jesukristo sa pagtubos kanato?

Ang pulong pagtubos nagkahulogan og “sa pagluwas, sa pagpalit, o sa paglukat, ingon sa pagpalingkawas sa usa ka tawo gikan sa pagkaulipon pinaagi sa pagbayad.” Tanan kita nanginahanglan og katubsanan gikan sa pisikal ug espirituhanong kamatayon. Gitudlo ni Pedro nga ang atong espirituhanong katubsanan gibayran dili sa pilak o bulawan kon dili “uban sa bililhong dugo ni Kristo.”

Alang sa dugang nga impormasyon mahitungod sa kahulogan sa pagtubos, tan-awa sa “Mga Taga-Roma 3:24. Unsa ang katubsanan?”

1 Pedro 1:20

Unsay kahulogan nga ang Manluluwas “gitagana nang daan alang niini bisan wala pa ang pagkabuhat sa kalibotan”?

Gitudlo ni Presidente Russell M. Nelson: “Sa wala pa ang pundasyon [katukuran] sa yuta, ang plano sa kaluwasan giandam na. Naglakip kini sa mahimayaong posibilidad sa usa ka balaanong panulundon diha sa gingharian sa Dios.

“Labing importante niana nga plano mao ang Pag-ula ni Jesukristo. Sa premortal nga mga konseho, Siya gi-orden nang daan sa Iyang Amahan sa pag-ula alang sa atong mga sala ug bugtoon ang mga higot sa pisikal ug espirituhanong kamatayon. Mipahayag si Jesus: ‘Ako … giandam gikan sa katukuran sa kalibotan sa pagtubos sa akong mga katawhan. … Ngari kanako mahimo nga ang mga katawhan adunay kinabuhi, ug nga sa kahangturan, sila kinsa motuo sa akong ngalan’ [Ether 3:14].”

1 Pedro 1:23–25

Nganong gitandi ni Pedro ang mga tawo ngadto sa balili?

Ang hugpong sa mga pulong nga “tanang unod balili man” nagagikan sa Isaias 40:6–8, diin nagtandi sa tawhanong mga kahuyang ngadto sa katanoman nga malaya diha sa hangin. Dili sama sa nagkalaya nga balili, ang pulong sa Dios “buhi ug nagapadayon sa kahangturan”; kini naghatag og kinabuhi ug kalig-on ngadto sa tanan kinsa modawat niini ug matawo pag-usab.

1 Pedro 2:4–8

Unsa ang kahulogan sa usa ka batong buhi, ulohang tukoran nga bato, ug batong kapandulan?

Gitudlo ni Pedro nga ang Pagkabanhaw ni Jesukristo naghatag og usa ka “buhing paglaom” diha sa mga tumutuo. Ang mga Santos gikinahanglang maninguha nga mahimong “balaan sa tanang paagi sa pagpakigsultihanay.” Kini nga paglaom ug pagkabalaan, mitudlo si Pedro, nahimong posible pinaagi sa Pag-ula ni Jesukristo. Napuno sa paglaom ug pagkabalaan ni Kristo, ang mga Kristiyanos mga sama sa buhing mga bato nga gidugang ngadto sa “usa ka espirituhanong balay.”

Gitagawag usab ni Pedro si Kristo ang ulohang tukoran nga bato, naghatag og gibug-aton nga ang espiritwal nga balay gitukod diha sa nabanhaw nga si Jesukristo. Agi og kalahi sa tahas ni Kristo isip ang ulohang tukoran nga bato, gitawag usab ni Pedro si Jesukristo og “usa ka batong kapandulan, ug batong makapukan.” Sa laing pagkasulti, ang Manluluwas mahimong usa ka babag diha sa dalan niadtong kinsa dili masulundon.

1 Pedro 2:9–10

Unsa ang kahulogan nga mahimong usa ka “kaliwatan nga pinili” ug “katawhan nga iyang kaugalingon”?

Gitudlo ni Pedro nga kon ang mga kinabig mihimo og pakigsaad uban sa Dios, sila mahimong “usa ka piniling kaliwatan, usa ka harianong sacerdote, usa ka balaang nasod, usa ka katawhan nga iyang kaugalingon.” Gipatin-aw ni Elder Bruce R. McConkie ang usa ka piniling kaliwatan isip ang balay sa Israel, ang karaan ug bag-o. Kini naglakip sa “matinud-anong mga miyembro sa Simbahan kinsa gidala diha sa ilang mga kaugalingon ang ngalan ni Kristo ug gisagop ngadto sa iyang pamilya.”

Kabahin sa hugpong sa mga pulong “katawhan nga iyang kaugalingon,” si Presidente Russell M. Nelson mitudlo: “Diha sa Daang Tugon, ang Hebreohanon nga pulong gikan diin ang kaugalingon gihubad nga segullah, nga nagkahulogan og ‘bililhon nga kabtangan,’ o ‘bahandi.’ Sa Bag-ong Tugon, ang termino nga Griyego gikan diin ang kaugalingon gihubad nga peripoiesis, nga nagkahulogan og ‘kabtangan,’ o ‘gipanag-iya ’

“Sa ingon, atong makita nga ang termino sa kasulatan nga kaugalingon nagpasabut og ‘gimahal nga bahandi,’ ‘gihimo’ o ‘gipili sa Dios.’ Aron kita mailhan sa mga sulugoon sa Ginoo isip iyang kaugalingon nga mga katawhan usa ka labing taas nga pagdayeg.”

Usa ka eskolar gitan-aw ang Hebreohanon nga pulong segullah: “Ang pagpangita sa gigikanan sa mga pulong nga Hebreohanon nagtabang kanato pagkab-ot sa tinuod nga kahulogan sa unsay gisulti sa Dios ngadto sa Iyang mga tawo sa pakigsaad. Sila linain nga bahandi ngadto Kaniya tungod kay sila lahi gikan sa tanang uban nga mga bahandi. … Ang mga tawo sa pakigsaad mga linain nga bahandi ngadto sa Dios tungod kay dili sila sama sa uban; sa pagkatinuod, sila mga mas sama Kaniya. Kini nga konsepto importante kaayo nga ang Dios balik-balik nga nagsulti sa Israel nga sila kinahanglan gayod nga magbalaan.”

1 Pedro 2:25

Sa unsang paagi si Jesukristo “ang Magbalantay ug Bishop sa [atong] mga kalag”?

Ang pulong nga bishop gigamit diha sa King James Version of the Bible nagagikan sa Gresyanhong pulong nga nagkahulogan usab og “tigtan-aw” o “magbalantay.” Atol sa Iyang mortal nga pangalagad, mipahayag ang Manluluwas, “Ako mao ang maayong magbalantay sa mga karnero: ang maayong magbalantay sa karnero magahalad sa iyang kinabuhi sa pagpakamatay alang sa mga karnero.” Isip ang Maayong Magbalantay ug Tigtan-aw sa atong mga kalag, “pangitaon ni Jesukristo kadtong nawala, ug pabalikon pag-usab kadtong nahisalaag sa halayo, ug bugkosan kadtong nabonggoan sa bukog, ug palig-unon kadtong nagmasakiton.”

1 Pedro 3:1–7

Nganong gitambagan ni Pedro ang mga asawa nga “magpasakop nga masinugtanon ” ngadto sa ilang mga bana?

Giawhag ni Pedro ang mga asawa nga Kristiyano nga “magpasakop nga masinugtanon” ngadto sa ilang dili motuo nga mga bana kinsa “dili masulundon sa pulong.” Siya mipasabot nga ang matarong nga pamatasan sa mga asawa mahimong usa ka panig-ingnan ngadto sa ilang mga bana sa pagtuo diha ni Jesukristo. Ang mga pulong magpasakop ug masinugtanon kasagarang gigamit diha sa mga kasulatan nga nakahulogan og dili unahon paghunahuna ang kaugalingon, pagpaubos ug gugma sulod sa mga relasyon. Sa kinatibuk-ang kahulogan sa kaminyoon, ang mga bana ug mga asawa kinahanglang mapainubsanon, manunuton, ug dili unahon paghunahuna ang kaugalingon diha sa ilang mga pagbinayloay og istorya ngadto sa usag usa.

Mipakigbahin si Elder Ulisses Soares og importanting tambag mahitungod sa relasyon tali sa mga bana ug mga asawa sa atong panahon: “Mga managtiayon … dili mobutang sa ilang mga kaugalingon isip presidente o bise presidente sa ilang pamilya. Walay labaw o ubos diha sa relasyon sa kaminyoon, ug ni maglakaw nga mag-una o maulahi sa usa. Sila tupad nga maglakaw, isip parehas, ang balaanong mga anak sa Dios. Sila mahimong usa sa hunahuna, tinguha, ug katuyoan uban sa atong Langitnong Amahan ug ni Jesukristo, manag-uban sa pagdumala ug paggiya sa yunit sa pamilya.”

Alang sa dugang nga impormasyon kabahin niini nga hilisgotan, tan-awa sa “Mga Taga-Efeso 5:21–33. Unsa ang mensahe ni Pablo mahitungod sa pagkamasinugtanon diha sa kaminyoon?”

1 Pedro 3:15

Nganong kini importante nga maandam sa paghatag og tubag ngadto ni bisan kinsa nga mangutana kon nganong kita adunay paglaom diha ni Jesukristo?

Dinhi niini nga bersikulo, ang pulong tubag gihubad gikan sa Gresyanhon nga pulong apologia, diin mahimo usab nga hubaron og “depensa.” Kining pulong nga Gresyanhon mao ang gigikanan sa apologetics, usa ka termino nga gigamit sa paghulagway sa depensa sa relihiyosong mga tinuohan. Gitudlo ni Elder Neal A. Maxwell nga ang mga Santos adunay responsibilidad sa pagdepensa sa kamatuoran:

“Ang klaro nga pagdapig sa pagkatinuod gikinahanglan karon sa pagtubag sa pipila ka hiwi nga kalibutanong pangatarungan nga atong makita ug madungog sa kalibotan. …

“Mipasidaan si Austin Farrer, ‘Bisan og ang pangatarungan dili mohimo og lig-on nga pagtuo, ang pagkakulang niini nagguba sa pagtuo. Unsa ang ingon og mapamatud-an mahimong dili pagadawaton, apan kon walay usa nga magpakita og abilidad sa pagdepensa dali kini nga talikdan.’”

Gipasabot ni Presidente Russell M. Nelson: “Himoa nga ang inyong tubag mainiton ug puno sa kalipay. Ug himoa nga ang inyong tubag may kapuslanan ngadto niana nga indibidwal. Hinumdomi, siya anak usab sa Dios, niana gayod nga Dios kinsa gusto gayod nga kanang tawhana nga mahimong sarang alang sa kinabuhing dayon ug mobalik ngadto Kaniya usa ka adlaw. Basin kamo gayod ang moabli sa pultahan sa kaluwasan nianang tawhana ug sa ilang panabot sa doktrina ni Kristo.”

1 Pedro 3:18–20; 4:6

Unsay gitudlo ni Pedro mahitungod sa kalibotan sa espiritu?

Ang mga Ebanghelyo wala mohatag og asoy sa mga kasinatian ni Jesukristo tali sa panahon sa Iyang Paglansang sa Krus ug sa Iyang Pagkabanhaw. Si Pedro kadto kinsa mihatag sa bililhong mga panudlo nga si Jesus “miadto ug miwali sa mga espiritu nga didto sulod sa bilanggoan” ug nga “ang ebanghelyo giwali hangtod ngadto sa mga patay.” Kining mubo nga mga pakisayran ngadto sa pagwali sa Manluluwas didto sa mga espiritu sa bilanggoan sa espiritu dili hingpit ang pagpasabot diha sa Biblia ug mibiya og daghang mga teologo ug mga eskolar nga naglibog sulod sa mga siglo.

Ang gipahiuli nga ebanghelyo ni Jesukristo nagpanalangin kanato og dugang nga pagsabot sa pagpangalagad sa Manluluwas ngadto niadtong diha sa kalibotan sa espiritu. Mipadayag ang Ginoo ngadto ni Presidente Joseph F. Smith nga Siya dili sa personal nga nangalagad ngadto niadtong diha sa bilanggoan sa espiritu; hinoon, Siya mi-organizar og mga mensahero sa pagsangyaw ngadto niadto kinsa anaa sa bilanggoan sa espiritu.

2 Pedro 1:4

Unsa ang mga “bililhon ug dagko nga mga saad” nga gipamulong ni Pedro?

Ang Dios naghimo og daghang “bililhon ug dagko nga mga saad” ngadto niadtong kinsa naghimo ug nagsunod sa mga pakigsaad uban Kaniya. Mitudlo si Elder David A. Bednar mahitungod sa labing halangdon niini nga mga saad: “Ang Dios misaad sa Iyang mga anak nga kon sila mosunod sa mga lagda sa Iyang plano ug sa ehemplo sa Iyang Hinigugmang Anak, mosunod sa mga sugo, ug molahutay uban sa pagtuo hangtod sa katapusan, nan pinaagi sa Katubsanan sa Manluluwas, sila ‘makaangkon og kinabuhi nga dayon, diin nga gasa mao ang labing mahinungdanon sa tanan nga mga gasa sa Dios’[Doktrina ug mga Pakigsaad 14:7]. Ang kinabuhing dayon mao ang pinakataas nga bililhon ug dagko uyamot nga saad.”

Mipasabot si Pedro nga ang “bililhon ug dagko nga mga saad” sa Dios nagtugot sa mga Santos nga mahimong “mag-aambit sa diosnong kinaiya.” Kini nagpasabot nga kita “mahimong ingon nga ang Dios mao, magpahimulos sa hingpit sa matag kinaiya, kahingpitan, ug hiyas nga siya nag-angkon.”

2 Pedro 1:10–11, 19

Unsa ang kahulogan sa “paghimo sa imong pagkatinawag ug pagkapinili nga siguro”?

“Ang matarong nga mga sumusunod ni Kristo malakip sa mga pinili kinsa makabaton sa kasiguroan sa kahimayaan. Kini nga pagkatinawag ug pagkapinili magsugod sa paghinulsol ug bunyag. Makompleto kini kon sila ‘mopadayon sa unahan, magbusog sa pulong ni Kristo, ug molahutay hangtod sa kataposan’ [2 Nephi 31:19–20]. Ang mga kasulatan mitawag niini nga proseso og paghimo sa atong pagkatinawag ug pagkapinili nga siguro.”

Si Pedro, nahibalo nga dili siya mabuhi og dugay, misulat nga nadawat niya ang unsay iyang gitawag og “labi pa nga nahimatud-an ang pulong sa profesiya.” Diha sa Doktrina ug mga Pakigsaad, gitin-aw ni Propeta Joseph Smith kining mahinungdanon nga panalangin: “Ang labing kasiguroan nga pulong sa panagna nagkahulogan nga ang tawo nasayod nga siya nabugkos ngadto sa kinabuhi nga dayon, pinaagi sa pagpadayag ug sa espiritu sa panagna, pinaagi sa gahom sa Balaan nga Pagkapari.”

Pagkat-on pa og Dugang

Diosnong Kinaiya

Katawhan sa Dios

  • Russell M. Nelson, “Children of the Covenant,” Ensign, May 1995, 32–35

Ang Kalibotan sa Espiritu

Media

Mga Imahe

usa ka nati nga karnero nag-inom og tubig gikan sa duha ka gisumpay nga mga kamot ni Jesukristo nga naghayang ug ang mga tudlo gibaliko [cupped hands] aron masudlan og tubig

Gentle Shepherd [Maaghop nga Magbalantay], ni Yongsung Kim

Jesus nakaputi og kupo giliyokan sa mga espiritu didto sa kalibotan sa espiritu

Christ Preaching in the Spirit World [Kristo Nagsangyaw didto sa Kalibotan sa Espiritu], ni Robert T. Barrett

Mubo nga mga Sulat

  1. 1 Pedro 2:9.

  2. Tan-awa sa Mateo 16:18–19.

  3. Alang sa mga ehemplo ni Pedro nga naggiya sa Simbahan human sa kamatayon ni Jesukristo, tan-awa sa Mga Buhat 1:15–22; Mga Taga-Galacia 2:7–9.

  4. Tan-awa sa 1 Pedro 5:13.

  5. Tan-awa sa Andrew C. Skinner, “Peter—the Chief Apostle,” sa Go Ye into All the World: Messages of the New Testament Apostles, eds. Ray L. Huntington and others (2002), 215.

  6. 1 Pedro 1:1.

  7. 1 Pedro 1:7.

  8. 1 Pedro 4:12.

  9. Luke Drake, “Christianity in the Second Century,” sa New Testament History, Culture, and Society: A Background to the Texts of the New Testament, ed. Lincoln H. Blumell (2019), 761.

  10. Tan-awa sa Giya ngadto sa mga Kasulatan, “Pedro.”

  11. Tan-awa sa Andrew C. Skinner, “Peter—the Chief Apostle,” sa Go Ye into All the World: Messages of the New Testament Apostles, eds. Ray L. Huntington and others (2002), 215–16.

  12. 2 Pedro 1:10.

  13. Giya ngadto sa mga Kasulatan, “Tubos, Gitubos, Katubsanan,” Librarya sa Ebanghelyo.

  14. Tan-awa sa 2 Nephi 9:4–10; Alma 34:7–9.

  15. 1 Pedro 1:19.

  16. Russell M. Nelson, “How Firm Our Foundation,” Ensign, May 2002, 75.

  17. Tan-awa usab sa Salmo 103:15–16.

  18. 1 Pedro 1:23.

  19. Tan-awa sa 1 Pedro 1:3–4.

  20. 1 Pedro 1:15.

  21. Tan-awa sa 1 Pedro 1:18–19.

  22. 1 Pedro 2:5.

  23. Tan-awa sa 1 Pedro 2:6. Tan-awa usab sa Isaias 28:16; Mga Buhat 4:10–12; Mga Taga-Efeso 2:20–21; Helaman 5:12.

  24. 1 Pedro 2:8.

  25. Tan-awa sa Isaias 8:14–15.

  26. 1 Pedro 2:9.

  27. Bruce R. McConkie, Doctrinal New Testament Commentary (1973), 3:294.

  28. Russell M. Nelson, “Children of the Covenant,” Ensign, May 1995, 34.

  29. Kerry Muhlestein, God Will Prevail (2021), 77.

  30. Tan-awa sa Tremper Longman III and Mark L. Strauss, The Baker Expository Dictionary of Biblical Words (2023), 568.

  31. Juan 10:11.

  32. Ezequiel 34:16.

  33. 1 Pedro 3:1.

  34. Tan-awa sa 1 Pedro 3:1.

  35. Tan-awa sa Mga Hebreohanon 12:9; Mosiah 3:19; Alma 7:23. Importante usab ang paghinumdom nga ang tambag ni Pedro gipakigbahin diha sa kinatibuk-ang kahulogan sa kultural nga palibot sa iyang gipuy-an (tan-awa sa Mark D. Ellison, “Family, Marriage, and Celibacy in the New Testament,” sa New Testament History, Culture, and Society: A Background to the Texts of the New Testament, ed. Lincoln H. Blumell [2019], 533–34).

  36. Tan-awa sa Mga Taga-Efeso 5:22–23.

  37. Ulisses Soares, “Diha sa Panag-uban sa Ginoo,” Liahona, Nob. 2022, 42.

  38. Tan-awa sa 1 Pedro 3:15, footnote b.

  39. Neal A. Maxwell, Notwithstanding My Weakness (1981), 90.

  40. Russell M. Nelson, “Pagkinabuhi Ingon nga Panig-ingnan sa mga Magtutuo,” Liahona, Nob. 2010, 48.

  41. 1 Pedro 3:19.

  42. 1 Peter 4:6.

  43. Tan-awa sa Scott C. Esplin, “Wondering at His Words: Peter’s Influence on the Knowledge of Salvation for the Dead,” sa The Ministry of Peter, the Chief Apostle, eds. Frank F. Judd Jr. and others (2014), 300–302.

  44. Tan-awa sa Doktrina ug mga Pakigsaad 138:29–30.

  45. 2 Pedro 1:4.

  46. Si Elder David A. Bednar mitudlo, “Masabot lang, ang tanang bililhon ug dagko nga mga saad nga gitanyag sa Langitnong Amahan sa Iyang mga anak dili maihap o hingpit nga mahulagway” (“Bililhon ug Dagko Uyamot nga mga Saad,” Liahona, Nob. 2017, 91).

  47. David A. Bednar, “Bililhon ug Dagko Uyamot nga mga Saad,” 91.

  48. 2 Pedro 1:4.

  49. Bruce R. McConkie, Doctrinal New Testament Commentary (1973), 3:352.

  50. Giya ngadto sa mga Kasulatan, “Pagkatinawag ug Pagkapinili,” Librarya sa Ebanghelyo. Sa pagkat-on pa og dugang mahitungod sa pagbaton sa pagkatinawag ug pagkapinili nga mahimong siguro, tan-awa sa Robert L. Millet, “Make Your Calling and Election Sure,” sa Judd and others, The Ministry of Peter, the Chief Apostle, 267–82.

  51. Tan-awa sa 2 Pedro 1:14.

  52. 2 Pedro 1:19.

  53. Doktrina ug mga Pakigsaad 131:5.