“Juan 7–10,” Mga Tabang sa Kasulatan: Bag-ong Tugon (2024)
Mga Tabang sa Kasulatan
Juan 7–10
Misulod si Jesus sa kataposang hugna sa Iyang mortal nga pangalagad. Mitambong Siya sa Pista sa mga Tabernakulo. Gitudlo Niya kon unsaon nga makahibalo ang tanang mga tawo sa kamatuoran sa Iyang mga pagtulun-an. Gigamit Niya ang mga simbolo sa tubig ug kahayag diha sa Pista sa mga Tabernakulo sa pagpamatuod nga Siya mao ang Mesiyas. Gitubag usab Niya ang mga escriba ug mga Pariseo kinsa nagtinguha sa pagbitik kaniya sa usa ka kaso sa usa ka babaye nga nasakpan sa pagpanapaw. Si Jesus mihatag og panan-aw ngadto sa usa ka lalaki nga natawo nga buta. Ang mga lider nga Judeo nagtinguha nga dili katuohan ang Iyang gahom sa pagbuhat og mga milagro. Gipahayag Niya nga Siya ang Maayong Magbalantay. Siya adunay gahom sa pagtugyan sa Iyang kinabuhi ug sa pagbawi niini pag-usab.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Kaagi ug Kinatibuk-ang Kahulogan
Juan 7:1
Unsa nga klase sa Judeo ang gustong mopatay ni Jesus?
Si Jesus kanunay nga nagpabilin sa lugar sa Galilea, diin Siya nakabaton og kalamposan diha sa Iyang pangalagad. Gilikayan Niya ang mga dapit nga naglibot sa Jerusalem tungod kay sila dako kaayo ang pagka-impluwensiya sa mga lider nga Judeo kinsa buot mopatay Kaniya. Ang mga Judeo nga gipasabot dinhi niini nga bersikulo mao ang mga lider nga Judeo, dili ang publiko nga Judeo sa kinatibuk-an.
Juan 7:2, 10, 14
Unsa ang Pista sa mga Tabernakulo?
Ang Pista sa mga Tabernakulo mao ang usa ka pista nga puno sa simbolismo ug milakip sa daghang seremonya. Kini mokabat og pito ka adlaw ug mahitabo atol sa panahon sa ting-ani. Kini mao ang kataposang fiesta sa tuig ug ang labing malipayon tungod sa mensahe niini sa pagluwas.
Ang mga tawo mipuyo sa temporaryong mga puy-anan atol sa pista. Kini mao ang pagpahinumdom kanila sa 40 ka tuig nga gigahin sa Israel diha sa kamingawan human maluwas gikan sa mga Ehiptohanon nga pagkaulipon.
Ang Pista sa mga Tabernakulo usa usab ka kasaulogan sa kataposan sa panahon sa mga pista ug ang kataposan sa ting-ani. Ang pagpundok diha sa ting-ani mitabang sa Israel sa paghinumdom kon giunsa sa Dios pagpundok ang Israel gikan sa Ehipto. Ang ting-ani simbolikanhon usab sa panahon nga ang Dios mopundok sa tanang nasod ngadto Kaniya.
Juan 7:14–15
Ngano nga ang mga Judeo nahibulong sa dihang si Jesus mitudlo kanila?
Si Jesukristo wala makabaton og pagbansay ug mga kalig-onan nga kadaghanan sa mga escriba ug mga magtutudlo aduna atol sa Iyang panahon. Bisan pa niana, ang mga tawo magpanon sa pagpaminaw Kaniya nga magtudlo. Mitawag sila Kaniya og “rabbi,” nga “usa ka pasidungog nga titulo sa pagtahod alang sa usa ka instruktor o magtutudlo.” Niini nga higayon, bisan ang tigdakop nga mga opisyal sa templo nakadayeg pag-ayo sa tinudloan ni Jesus nga wala nila dad-a Siya ngadto sa mga lider nga Judeo. “Kon hunahunaon man ang Iyang mga kalig-onan o ang Iyang pamatasan, kini tataw nga si Jesus lahi gyod kaayo gikan sa ubang mga magtutudlo.”
Juan 7:19–24
Giunsa sa pipila ka mga tawo paggamit ang balaod ni Moises sa pagsalikway ni Jesus?
Ang mga escriba ug mga Pariseo misunod sa balaod ni Moises, nga narekord diha sa Torah (ang unang lima ka basahon sa Daang Tugon). Gisunod usab nila ang bina-ba nga balaod, o “ang tradisyon sa mga elder.” Ang bina-ba nga balaod usa ka komentaryo nga hinatag sa mga rabbi kabahin sa Torah ug milakip og dugang nga mga lagda sa pagtabang sa mga tawo sa pagsunod sa balaod ni Moises. Kining bina-ba nga mga pagtulun-an nahimong nagkadako ang importante sa dihang wala nay propetikanhong tingog nga madungog human ni Malachi. Daghang mga Judeo ang midumili sa pagpaminaw ngadto ni Jesus tungod kay sila mituo nga Siya wala motahod sa bina-ba nga balaod. Sa usa ka higayon, gilapas Niya ang bina-ba nga balaod pinaagi sa pag-ayo sa usa ka lalaki sa adlaw sa Igpapahulay. Mitubag si Jesus ngadto sa Iyang mga kritiko pinaagi sa pag-ingon, “Ayaw na kamo pagpanghukom pinasikad sa panagway, hinonoa pagpanghukom kamo sa matarong nga paghukom.”
Juan 7:37–39
Giunsa paggamit ni Jesus ang Pista sa mga Tabernakulo sa pagtudlo sa kahulogan sa “buhing tubig”?
Usa sa labing gipaabot nga mga seremonya sa Pista sa mga Tabernakulo mao ang inadlaw nga prosesyon. Usa ka tinudlo nga pari mokuha og tubig gikan sa Tubod sa Siloe nga may bulawanong pitsel. Dayon iyang gibubu ang tubig diha o libot sa altar sa templo. Kini nga tubig gihunahuna nga “buhing tubig” tungod kay ang Tubod sa Siloe nagagikan sa usa ka natural nga tubod. Ang ritwal sa pagkuha og tubig gikan sa Siloe mahimong nagrepresentar sa gahom sa Dios sa paglimpyo ug pagputli sa Iyang mga tawo.
Ang kahulagwayan sa “buhing tubig” nagagikan diha sa dugay na nga tradisyon sa Israelita. Diha sa uga nga klima sa karaan nga Duol sa Silangan, ang agianan sa pagkuha og tubig hilabihan ka importante alang sa pagpakabuhi. Ang kanihit sa tubig mihimo niini og usa ka bililhong kapanguhaan ug usa ka gamhanang simbolo sa kinabuhi.
Sa katapusang adlaw sa Pista sa mga Tabernakulo, human ang mga pundok sa katawhan misaulog sa kataposang pagbu-bu sa tubig, si Jesus mitindog ug misinggit, “Kon adunay tawo nga giuhaw, umari siya kanako ug uminom.” Miingon si Jesus nga ang “buhing tubig” modagayday gikan niadtong kinsa nagatuo Kaniya. Gipasabot ni Juan nga si Jesus mipasabot ngadto sa gasa sa Espiritu Santo. Kini nga gasa ihatag pa diha niana nga dispensasyon.
Juan 8:1–6
Unsa nga lit-ag ang gipaningkamotan nga ibitik sa mga escriba ug mga Pariseo alang ni Jesus pinaagi sa pagdala Kaniya og usa ka hamtong nga babaye nga nasakpan sa pagpanapaw?
Pinaagi sa pagdala sa hamtong nga babaye nga nasakpan sa pagpanapaw ngadto sa Manluluwas, ang mga Pariseo milaom sa pagbitik Kaniya sa unsay ilang gihunahuna nga mahimong imposible nga sitwasyon. Ubos sa balaod ni Moises, ang pagpanapaw usa ka dakong sala, pagasilotan pinaagi sa pagbato. Busa, kon si Jesus wala pa misugot sa pagpabato kaniya, mahimo Siya nga akusahan sa pagsupak sa balaod ni Moises. Sa laing bahin, kon si Jesus miuyon sa pagpabato kaniya, makapapukaw Siya sa kasuko sa mga tawo pinaagi sa pagpasiugda og wala kagustohi nga silot. Mahimo usab siya nga akusahan sa atubangan sa mga opisyal nga Romano sa pagpasiugda og usa ka silot nga walay awtoridad sa Roma.
Juan 8:11
Unsay gitudlo kanato sa mga lihok ni Jesus mahitungod sa balaod ug sa gugma?
Si Jesus wala mouyon sa sala sa hamtong nga babaye; ni Siya mihukom kaniya. Hinoon, gitugotan Niya siya sa paghinulsol. Kabahin niini nga asoy miingon si Presidente Dallin H. Oaks: “Sa dihang ang naulaw nga panon sa katawhan mibiya, gigamit sa Manluluwas ang gahom sa gugma. Sa manggiloy-ong paagi wala niya hukmi ang hamtong nga babaye, ug kana nga mahigugmaong buhat mibayaw kaniya ngadto sa usa ka bag-ong kinabuhi. Ang paggamit sa balaod moabot sa kadugayan, kon siya unya pagahukman sa tibuok niyang kinabuhi, lakip ang paghinulsol. Apan nianang nag-una nga higayon, ang Manluluwas mihatag og gugma ug kalooy pinaagi sa paglikay sa paghukom, ug dayon gipamatud-an ang balaod sa pag-ingon, ‘Lumakaw ka, ug ayaw na pagpakasala’ [Juan 8:11].”
Juan 8:12
Unsa ang importante mahitungod sa nahinaboan sa dihang si Jesus miingon, “Ako mao ang kahayag alang sa kalibotan”?
Sa gabii sa unang adlaw sa Pista sa mga Tabernakulo, ang publiko magpundok diha sa Nataran sa Kababayen-an (gawas sa gawas nga nataran sa templo). Dinhi ang mga pari mopasiga og upat ka dagko kaayong mga tindoganan sa mga lampara. Kini giingon nga ang kahayag niini nga 70-ka pye (21 ka metros) nga mga lampara makita sa tibuok Jerusalem.
Human sa kataposang adlaw sa Pista sa mga Tabernakulo, mibalik si Jesus ngadto sa templo. Samtang Siya nagtudlo, mibarog Siya duol sa dako, napalong nga mga lampara. Mipahayag Siya, “Ako mao ang kahayag alang sa kalibotan.”
Si Presidente Dallin H. Oaks miila og tulo ka mga paagi nga si Jesukristo mao ang kahayag alang sa kalibotan:
“Si Jesukristo mao ang kahayag sa kalibotan tungod kay siya ang tinubdan sa kahayag nga ‘nagpadayon gikan sa atubangan sa Dios aron sa pagpuno sa walay kataposan nga kawanangan’ (D&P 88:12). …
“Si Jesukristo mao ang kahayag sa kalibotan tungod kay ang iyang ehemplo ug mga pagtulun-an nagdan-ag sa dalan nga atong kinahanglan nga laktan sa pagbalik ngadto sa presensya sa atong Amahan sa Langit. …
“Si Jesukristo mao usab ang kahayag sa kalibotan tungod kay ang iyang gahom nagdani kanato sa pagbuhat og maayo.”
Juan 8:37–52
Nganog ang mga lider nga Judeo nanghambog mahitungod sa pagkakaliwat ni Abraham?
Ang mga lider nga Judeo mituo nga ang pagkakaliwat ni Abraham mihatag kanila og espesyal nga mga pribilehiyo diha sa panan-aw sa Dios. Agi og tubag, gibadlong sila ni Jesus sa wala paghimo sa mga buhat ni Abraham. Ang basahon sa Genesis nagrekord og pipila sa mga buhat ni Abraham nga mga sukwahi ngadto sa pamatasan sa mga lider nga Judeo: nakabig ni Abraham ang uban ngadto sa ebanghelyo. Siya usa ka tigpasiugda sa kalinaw. Siya masulundon sa Dios. Siya miabi-abi og langitnong mga mensahero. Siya mibansay og hugot nga pagtuo sa Dios. Kay sa maghimo sa mga buhat ni Abraham, kini nga mga lider naninguha sa pagpatay ni Jesus, ang mao gayod nga Dios ni Abraham.
Juan 8:58–59
Nganong gusto sa mga Judeo nga batoon si Jesus sa dihang Siya miingon, “Sa wala pa si Abraham, mao na Ako”?
Sa dihang ang Ginoo mipakita ngadto ni Moises didto sa nagdilaab nga sagbot, migamit Siya sa ngalan nga “AKO MAN.” Ang ngalan nga Ako Man nangahulogan og “Siya mao” o “Siya anaa” ug direkta nga kalabot ngadto sa Hebreohanon nga ngalan nga Yaweh, o Jehova. Ang ngalan nga Jehova “nagpasabot og ang ‘Dili Mausab nga Tawo.’” Pinaagi sa paggamit niini nga ngalan, mipahayag si Jesus nga Siya mao si Jehova, ang sama nga Binuhat kinsa namulong ngadto ni Moises ug kinsa nakigsulti sa mga propeta sa tanang kapanahonan. Ang mga lider nga Judeo mituo nga kini usa ka mapasipad-ong pangangkon, ug sila andam sa pagpatay ni Jesus tungod niini.
Juan 9:1–7
Unsay gituohan sa mga tawo sa panahon ni Jesus mahitungod sa mga hinungdan sa pag-antos?
Ang pangutana sa mga disipulo mahitungod sa hinungdan sa pagkabuta sa tawo mipakita og usa ka kasagaran nga pagtuo nga ang pag-antos mao ang resulta sa sala. Gilakip niini nga pagtuo “nga ang pag-antos sa tawo tingali direkta nga sangputanan sa usa ka piho nila o sa ilang mga ginikanan nga sala.” Gisalikway ni Jesus kini nga pagtuo. Gitudlo Niya nga ang himaya sa Dios mapakita pinaagi sa tawhanong pag-antos.
Juan 9:22–23, 34–35
Unsa ang mga sangpotanan sa pagkagisalikway gikan sa sinagoga?
Ang mga ginikanan sa lalaki nga natawo nga buta nahadlok nga kon sila moingon nga si Kristo mao kinsa miayo sa ilang anak nga lalaki, sila isalikway gikan sa sinagoga. Ang mga sinagoga mao ang relihiyoso ug sosyal nga mga sentro sa kinabuhing Judeo. Sila nagtanyag og agianan ngadto sa espiritwal nga panudlo, pagsimba, edukasyon, ug sosyal nga mga oportunidad. Ang pagkagisalikway gikan sa sinagoga mas mipasabot pa og labaw kay sa walay usa ka dapit sa pagsimba; kini mipasabot sa pagkawala sa tanang mga koneksiyon nga kulrural og sosyal.
Juan 10:1–18
Sama sa unsa ang mga magbalantay sa karnero sa panahon ni Jesukristo?
Ang mga magbalantay mipanalipod ug migiya sa ilang mga panon sa karnero. Kasagaran sila adunay ngalan alang sa matag usa ka karnero. Kon tawgon sa magbalantay ang ilang karnero, makaila ang karnero sa ilang tingog ug moduol ngadto kanila. Kon usa ka manunukob moatake sa karnero, ang mga magbalantay morisgo sa ilang kaugalingong kinabuhi sa pagpanalipod kanila. Ang mga magbalantay lahi gikan sa mga sinuholan sa pagbantay. Ang mga sinuholan mag-amuma sa mga karnero alang sa usa ka suhol. Wala sila kaila sa karnero ug sa pagkatinuod dili morisgo og personal nga kadaot sa pagpanalipod kanila.
Ang Daang Tugon nagtudlo nga si Jehova mao ang Magbalantay sa Israel, ang balaang tig-atiman sa Iyang katawhan. Pinaagi sa pagdeklarar sa Iyang kaugalingon nga mao ang Maayo nga Magbalantay, si Jesus mipamatuod pag-usab nga Siya mao si Jehova—ang katumanan sa mesiyanikanhong mga panagna.
Juan 10:7, 9
Unsa ang gipasabot ni Jesus sa dihang Siya miingon, “Ako mao ang pultahan”?
“Sa gabii ang mga magbalantay modala sa ilang mga karnero ngadto sa kinoral nga dapit nga gitawag og toril sa karnero.” Ang magbalantay mosusi sa matag karnero kon may kadaot samtang kini misulod. Sa higayon nga ang tanang karnero luwas na sa sulod sa koral, ang mga magbalantay matulog diha sa ganghaan sa pagpugong sa manunukob ug mga kawatan sa pagsulod ug pagpasakit sa karnero. Pinaagi sa pagdeklarar nga Siya mao ang pultahan, ang Manluluwas mipakita sa Iyang kaandam sa “paghalad sa [Iyang] kinabuhi sa pagpakamatay alang sa karnero.” Siya usab sa kataposan mohukom kinsa ang pasudlon sa gingharian sa langit. Ang propeta sa Basahon ni Mormon nga si Jacob mipahayag nga “ang magbalantay sa ganghaan mao ang Usa nga Balaan sa Israel” ug nga “wala siya mogamit og sulugoon didto.”
Juan 10:8
Kinsa ang gipasabot ni Jesus sa dihang Siya miingon nga ang tanan kinsa miabot og una Kaniya mga kawatan ug tulisan?
Sa dihang misulti si Jesus, “Ang tanan nga mianhi una kanako mga kawatan ug mga tulisan,” Siya mipasabot ngadto sa mini nga mga propeta. Sa ubang mga tudling, nagsulti si Jesus sa positibo nga paagi kabahin sa Iyang tinuod nga mga propeta. Ang Hubad ni Joseph Smith nagdugang, “Ang tanan nga mianhi una kanako kinsa wala mopamatuod kanako mga kawatan ug mga tulisan.”
Juan 10:16
Kinsa ang “ubang mga karnero” nga gipamulong ni Jesus?
Ingon nga gitudlo diha sa Basahon ni Mormon, ang mga Nephite mao ang “ubang mga karnero” nga gipamulong ni Jesus. Ang nabanhaw nga Kristo nangalagad ngadto sa mga Nephite ug misulti kanila, “Kamo mao sila kinsa miingon: Ako adunay lain nga karnero nga wala niini nga pundok.” Ang Manluluwas naninguha sa pagpasabot niini ngadto sa mga Judeo, apan “tungod sa pagkatikig og liog ug sa pagkawalay pagtuo,” sila wala makasabot.
Juan 10:22–23
Unsa ang “Fiesta sa Didikasyon”?
Miadto si Jesus sa templo sa Jerusalem atol sa “Fiesta sa Didikasyon,” nailhan usab ingon og Hanukkah. Ang Hanukkah nangahulogan og “dedikasyon” sa Hebreohanon. Gisaulog niini nga pista ang paghalad og usab sa templo sa Jerusalem ug ang bag-ong altar niini sa mga 165 BC. Sa 168 BC, ang mga sundalo nga Gresyanhon gisugo sa pagpasipala sa templo ug sa paglumpag sa relihiyon sa Judeo. Ang mga manggugubat nga Judeo nga gipangulohan sa usa ka pamilya sa mga pari miabog sa mga Gresyanhon ug gipalingkawas ang katawhang Judeo. Sa dihang nabawi sa mga pari ang templo, ilang “gisunog ang mga lampara sa templo sulod sa walo ka adlaw (ang panahon nga gikinahanglan sa pagpahinungod og dugang pa nga lana) uban sa usa lamang ka adlaw nga bili sa lana.” Tungod niini nga milagro, ang Fiesta sa Didikasyon gitawag usab og Pista sa mga Suga. Kini gisaulog sulod sa walo ka adlaw sa Disyembre ug naglakip sa pagpasiga sa mga ugbukanan sa mga kandila.
Pagkat-on pa og Dugang
Mga Leksiyon gikan sa Pagtagad ni Kristo sa Babaye nga Hamtong nga Nasakpan sa Pagpanapaw
-
Amy A. Wright, “Si Kristo Moayo Nianang Naguba,” Liahona, Mayo 2022, 81–84
-
Marvin J. Ashton, “Mga Leksiyon Gikan sa Agalon,” Liahona, Dis. 2011, 16–17
Sa Unsang Paagi si Jesus Mao ang Maayong Magbalantay
-
Dale G. Renlund, “Ang Atong Maayong Magbalantay,” Liahona, Mayo 2017, 29–32
-
Gerrit W. Gong, “Maayong Magbalantay, Kordero sa Dios,” Liahona, Mayo 2019, 97–101
Media
Mga Bidyo
“Go and Sin No More” (3:18)
“Jesus Declares: I Am the Light of the World; the Truth Shall Make You Free” (4:26)
“Understanding Feast of Tabernacles or Sukkot” (9:34), bookofmormoncentral.org
“Jesus Heals a Man Born Blind” (7:51)
“The Good Shepherd and Other Sheep I Have” (3:24)
Mga Imahe
Woman Taken in Adultery [Babaye nga Hamtong Nasakpan sa Pagpanapaw], ni Michael T. Malm
The Good Shepherd [Ang Maayong Magbalantay], ni J. Kirk Richards
Rivers of Living Water [Mga Suba sa Buhing Tubig], ni Eva Koleva Timothy