“Mga Taga-Filipos ug Mga Taga-Colosas,” Mga Tabang sa Kasulatan: Bag-ong Tugon (2024)

Mga Tabang sa Kasulatan

Mga Taga-Filipos ug Mga Taga-Colosas

Ang mga taga-Filipos ug mga taga-Colosas malagmit gisulat samtang sa Pablo gi-aresto didto sa Roma. Sa talagsaong paagi, kini atol niining malisod nga panahon nga gisulat ni Pablo ang kabahin “sa kalinaw sa Dios, nga lapaw sa tanang panabot.” Kining duha ka sulat makanunayon nga positibo ug malaumon. Kini naglakip sa pipila nga labing tataw ug labing kinasingkasing nga mga pagtulon-an ni Pablo mahitungod ni Jesukristo. Mipamatuod si Pablo nga ang tanang dila sa pipila ka adlaw mokumpisal nga si Jesus mao ang Kristo ug nga kita makahimo sa tanang mga butang pinaagi Kaniya. Mipamatuod siya sa pagkalabaw ni Jesukristo sa tanang mga nilalang sa Dios. Mitudlo siya nga pinaagi sa pagtukod diha sa pundasyon ni Jesukristo, makalikay kita nga madala sa pagkahisalaag pinaagi sa kalibutanong mga pilosopiya ug mga tradisyon.

Mga Kapangohaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Kaagi ug Kinatibuk-ang Kahulogan

Ngadto kang kinsa ang mga taga-Filipos ug mga taga-Colosas gisulat ug ngano?

Misulat si Pablo og mga sulat ngadto sa mga taga-Filipos ug sa mga taga-Colosas samtang siya diha sa bilanggoan ba o ubos sa pagpabilin sulod sa balay nga walay paggula-gula. Bisan pa niini nga mga sitwasyon, kini nga mga sulat naglangkob og pipila sa labing pagkamalaumon ug maawhagon nga mga sinulat.

Ang Filipos usa ka importanting siyudad sa Macedonia. Kini mao ang labing una nga branch sa Simbahan nga natukod dinhi niini nga rehiyon. Human sa iyang unang pagbisita sa mga AD 50, mibalik og bisita si Pablo sa mga Santos nga taga-Filipos atol sa iyang ikatulong misyonaryong panaw sa mga AD 56. Diha sa iyang epistola [sulat], mipahayag si Pablo og pasalamat alang sa pagbati ug pinansyal nga tabang nga gihatag sa mga Santos sa Filipos atol sa iyang ikaduhang misyonaryong panaw ug sa iyang pagkabilanggo.

Misulat si Pablo nga ang mga taga-Filipos sa “kanunay nagamasinugtanon” sa panahon sa iyang pagkaana ug sa iyang pagkawala diha kanila. Usa ka iskolar mi-obserbar: “Unsay laing sulat ngadto sa usa ka simbahan ang mihimo sa ingon nga pahayag? Si Pablo dili makasulti og bisan unsa sama niana ngadto sa mga taga-Corinto o sa mga taga-Galacia, busa ang mga taga-Filipos nagbarug diha sa labing tumoy nga ang-ang sa pagkamatinud-anon. Unsa ang itudlo ni Pablo kanila hilabihan nga nakapadayag kabahin sa hilisgotan kon sa unsang paagi maangkon ang kahimayaan.”

Ang Colosas (usahay gi-spelling og “Colosse”) nahimutang mga 160 ka kilometro silangan sa Efeso. Ang siyudad kaniadto nahimong usa sa labing inila diha sa dapit. Sa panahon ni Pablo kini “nahimong usa ka gamay nga lungsod sa negosyante sa rota sa pamatigayon gikan sa Roma ngadto sa silangan.” Malagmit si Pablo wala pa makabisita sa mga Santos sa Colosas sa wala pa niya masulat ang iyang epistola ngadto kanila.

“Ang mensahe ngadto sa mga taga-Colosas ma-summarize sa tulo ka dagkong mga hilisgotan: ang pagkalabaw ni Kristo, sayop nga mga doktrina nga naninguha sa pagguba sa doktrina ni Kristo, ug ang mga baroganan nga motabang kanato nga mahisama ni Kristo.”

Mga Taga-Filipos 1:1–14

Giunsa sa pagkabilanggo ni Pablo pagtabang nga molambo ang ebanghelyo?

Gipasabot ni Pablo nga ang iyang pagkabilanggo naghimo sa ebanghelyo nga molambo. Ang iyang paghisgot kabahin sa palasyo diha sa bersikulo 13 malagmit usa ka pakisayran ngadto sa gwardya sa palasyo ug sa ubang mga bisita nga nakadungog ni Pablo nga nagsangyaw sa ebanghelyo gikan sa bilanggoan. Agig dugang, ang ubang mga miyembro sa Simbahan mikuha og kaisog gikan sa ehemplo ni Pablo ug nahimong “misamot pa sa pagkamaisugon sa pagsulti sa pulong.”

Mga Taga-Filipos 2:6–11

Nganong si Jesukristo migamit sa “dagway sa usa ka ulipon”?

Naggamit sa mga pulong sa usa ka himno nga Kristiyano, giawhag ni Pablo ang mga taga-Filipos nga mga santos sa pagsunod sa mga ehemplo sa Manluluwas kabahin sa pagkamasulundon ug pagkamapainubsanon. Ang himno nagtudlo nga didto sa premortal nga gingharian, si Jesukristo diha sa “dagway sa Dios.” Siya dihay balaang kinaiyahan, sama sa Dios. Pinaagi sa pag-angkon sa Iyang pagkasama sa Dios, “wala ilogi ang Dios sa Iyang pagkabalaan” ni Jesukristo.

Mapainubsanong nanaog si Jesukristo gikan sa Iyang premortal nga Pagka-Dios ug gisagop ang “porma sa ulipon.” Sa laing pagkasulti, andam si Jesukristo nga mipaubos gikan sa Iyang premortal nga himaya sa pagdawat sa mga kahimtang sa mortalidad. Gitudlo ni Pablo nga ang pagkasama ni Jesukristo sa Dios sa talagsaong paagi mipasarang Kaniya nga mahimo nga atong Manluluwas. Human mag-antos sa kamatayon diha sa krus, ang Dios mobayaw ni Jesukristo ug mohatag Kaniya og “usa ka ngalan nga labaw sa tanang ngalan.”

Ang mensahe ni Pablo susama ngadto sa mga pagtulon-an ni Nephi mahitungod sa “pagpakig-angay sa Dios.”

Mga Taga-Filipos 2:11

Unsa ang kahulogan “nga ang matag dila magasugid nga si Jesukristo Ginoo”?

“Nagasugid” dinhi niini nga bersikulo gihubad gikan sa Gresyanhon nga pulong nga nagkahulogan og uyon, pahayag, o dayeg. Sa kadugayan ang tanang tawo moila nga si Jesus mao ang Kristo, bisan kon sila mipili sa pagsunod Kaniya o dili sulod sa ilang mga kinabuhi. Ang Basahon ni Mormon ug Doktrina ug mga Pakigsaad nagtudlo nga kining nagkaylap nga pag-ila moabot sa Adlaw sa Paghukom.

Mga Taga-Filipos 2:12–13

Unsa ang kahulogan sa “panglimbasogi ninyo ang inyong … kaugalingong kaluwasan uban ang kahadlok ug pagkurog”?

Sa Mga Taga- Filipos 2:4–12, gitudlo ni Pablo nga si Jesukristo “nagpaubos sa iyang kaugalingon” ug giantos ang “kamatayon [diha] sa krus” aron Siya mahimong atong Manluluwas. Naghunahuna sa gugma ug pagkamasulundon nga gipakita ni Jesukristo, nag-awhag si Pablo kanato nga “panlimbasogi ang [atong] kaluwasan uban ang kahadlok ug pagkurog.”

Ang Gresyanhon nga pulong gihubad isip “panlimbasogi” wala magpasabot sa “pagtrabaho alang sa [inyong] kaluwasan” sa pagsabot nga atong nadawat ang atong kaluwasan pinaagi sa maayong mga buhat. Hinoon, kini nagpasabot og nagpadayon nga mga paningkamot sa pagkadisipulo. Nagpasabot ngadto sa bersikulo 12, si Presidente Dallin H. Oaks nangutana, “Mahimo ba [kining] nagpasabot nga ang kinatibuk-an sa atong kaugalingong pagkamatarong mopadaog kanato og kaluwasan ug kahimayaan?” Dili, mipasabot siya, tungod kay “human sa tanan natong pagkamasulundon ug maayong mga buhat, dili kita maluwas gikan sa epekto sa atong mga sala kon wala ang grasya nga gilugway pinaagi sa pag-ula ni Jesukristo.”

“Ang “kahadlok” gihubad gikan sa Gresyanhon nga pulong phobos, nga makahatag og negatibo nga mga kahulogan (makahadlok, makalisang, o makuyawan) ug positibo nga mga kahulogan (tahod, balaang pagtahod, o nahingangha). Niini nga sitwasyon, ang pagsabot mao nga ang balaang pagtahod alang sa Ginoo. Sa bersikulo 13, si Pablo nagtudlo nga ang “Dios mao ang nagapalihok sa inyong pagtinguha ug pagpaningkamot … alang sa iyang kaugalingong kahimuot.”

Mga Taga-Filipos 3:2–3

Mahitungod ni kinsa ang pagpasidaan ni Pablo sa mga taga-Filipos?

Ang pulong nga iro diha sa mga kasulatan kasagaran nagpasabot ngadto sa usa ka dili takos nga tawo. Ang “mga iro” nga gihisgotan ni Pablo mipasabot ngadto sa mga Judaizer—mga tawo kinsa mitudlo nga ang mga kinabig ngadto sa Kristiyanismo kinahanglan gayod mosunod sa pipila ka mga kustombre sa mga Judeo, lakip ang pagsirkunsisyon. Sa pagbiaybiay, si Pablo mipasabot ngadto sa mga Judaizer ingon nga kadtong kinsa nanagpamutol ug unod, o “ang pagtuli.” Sa laing bahin, si Pablo mipasabot ngadto sa mga tawo sa pakigsaad sa Dios isip kadtong “ang nasirkunsisyon.” Gitudlo ni Pablo nga kadtong kinsa nagsimba sa Dios ug nagmaya diha ni Kristo mao ang mga tinuod nga “sirkunsisyon,” o mga tawo sa pakigsaad.

Mga Taga-Filipos 3:4–14, 20–21

Ngano nga si Pablo nagsakripisyo og maayo sa pagsunod ni Jesukristo?

Daghang butang ang gitalikdan ni Pablo sa dihang siya nahimong usa ka manununod ni Jesukristo, lakip ang iyang halangdong katungdanan isip usa ka Judeo nga Pariseo. Kay sa mopunting sa iyang mga sakripisyo ug sa nangaging mga kasinatian, naghisgot si Pablo sa pagpadayon “paingon sa dauganan ngadto sa ganti sa langitnong pagtawag sa Dios.”

Nakaplagan ni Pablo ang kahupayan diha ni Jesukristo, ug naglantaw sa unahan nga maapil taliwala “sa pag-ambit sa iyang mga kasakit.” Gitudlo ni Elder Neal A. Maxwell: “Kon atong isangon ang yugo ni Jesus diha kanato, kini magdawat kanato sa kadugayan ngadto sa unsay gitawag ni Pablo og pag-ambit sa kang [Kristo] nga mga kasakit’ [Mga Taga-Filipos 3:10]. Sakit o pag-inusara, walay hustisya o pagsalikway, ug uban pa, ang atong ingon og gamay nga mga pag-antos, kon kita maaghop, kini mahimong importante nga bahin sa atong kinaiyahan. Kita niana mas modayeg og maayo dili lamang sa mga kasakit ni Jesus alang kanato, apan usab sa Iyang dili katupngan nga kinaiya, nagpalihok kanato ngadto sa mas dako nga pagsimba Kaniya sa mas makahuloganong paagi ug sa pagpaningkamot nga ganahan Kaniya.”

Mga Taga-Colosas 1:12–20

Nganong nagsulat si Pablo sa pagkalabaw ni Jesukristo?

Usa sa sayop nga mga praktis nga gisagop sa pipila ka mga Santos nga taga-Colosas mao ang pagsimba sa mga anghel. Kini miresulta sa mga dili pagsinabtanay mahitungod sa pagkabalaan ni Jesukristo. Ang mensahe ni Pablo klaro nga naghatag og gibug-aton sa pagkalabaw ni Jesukristo, taliwala sa mga nilalang sa Langitnong Amahan ug isip pangulo sa Simbahan.

Gipamatuod ni Pablo nga “nagpuyo ang bug-os nga kinatibuk-an” diha ni Jesukristo. Buot ni Pablo nga masabtan sa mga Santos sa Colosas nga si Jesukristo ug ang Iyang ebanghelyo mas labaw sa tanang uban nga mga pilosopiya ug mga relihiyon.

Mga Taga-Colosas 1:15

Nganong si Pablo naghulagway sa Dios isip dili makita?

Pinaagi sa paghulagway sa Dios isip dili makita, mipasabot si Pablo nga Siya dili makita apan dili nga Siya dili makit-an. Ang punto sa Apostol mao nga bisan og ang Dios wala karon makit-i sa atong tawhanong mga mata, ang panagway ug kinaiya ni Jesukristo nagpakita kon sama sa unsa ang Amahan. Gitudlo ni Presidente Jeffrey R. Holland, “Sa tanan nga gianhi ni Jesus nga isulti ug buhaton, lakip ug ilabi na sa Iyang maulaong kasakit ug sakripisyo, nagpakita Siya kanato kinsa ug unsay sama ang atong Mahangturong Amahan.”

Mga Taga-Colosas 1:15

Unsay kahulogan nga si Jesukristo mao ang unang natawo sa tanang nilalang?

“Si Jesus mao ang unang natawo sa mga anak nga espiritu sa atong Langitnong Amahan, ang Bugtong Anak sa Amahan diha sa unod, ug ang unang mibangon gikan sa patay diha sa Pagkabanhaw.”

Mga Taga-Colosas 2:6

Unsay kahulogan sa paglakaw diha sa Ginoo?

Gitudlo ni Elder David A. Bednar: “Si Apostol Pablo mipasidaan sa mga tumutuo kinsa midawat sa Ginoo: ‘Busa pagkinabuhi diha kaniya’ [Mga Taga-Colosas 2:6].

Ang pagkinabuhi diha ug uban sa Manluluwas nagpatigbabaw sa duha ka importante nga mga aspeto sa pagkadisipulo: (1) pagsunod sa mga sugo sa Dios, ug (2) paghinumdom ug pagtahod sa sagrado nga mga pakigsaad nga nagkonektar kanato ngadto sa Amahan ug sa Anak.”

Mga Taga-Colosas 3:22–25; 4: 1

Ang pagkaulipon sagad bang gipraktis sa mga panahon sa Bag-ong Tugon?

Tan-awa sa “Filemon1:10–17. Unsa ang atong nahibaloan mahitungod sa pagkaulipon sa mga panahon sa Bagong Tugon?”

Pagkat-on pa og Dugang

Ang Nagpaubos ug Gibayaw nga Kristo

David L. Frischknecht, “The Condescension of Jesus Christ,” Ensign, Dec. 2011, 51–55

Panlimbasugi Ninyo ang iInyong Kaugalingong Kaluwasan

Dallin H. Oaks, “What Think Ye of Christ?,” Ensign, Nov. 1988, 65–68

Ang Tanang Dila Magasugid nga si Jesus mao ang Kristo

Bonnie H. Cordon, “Gamita Gayod ang Tanang Kahigayonan nga Makapamatuod kang Kristo,” Liahona, Mayo 2023, 10–12

Ang Pagkalabaw ni Kristo

Jeffrey R. Holland, “Ang Kahalangdon sa Dios,” Liahona, Nob. 2003, 70–73