“Juan 14–17,” Mga Tabang sa Kasulatan: Bag-ong Tugon (2024)

Mga Tabang sa Kasulatan

Juan 14–17

Human sa Kataposang Panihapon, gitudloan ug gihupay ni Jesukristo ang Iyang Apostoles. Siya mitudlo kanila nga Siya mao ang “dalan, ang kamatuoran, ug ang kinabuhi.” Siya misulti kanila nga sila makapakita sa ilang gugma alang Kaniya pinaagi sa pagsunod sa Iyang mga sugo. Ang Manluluwas midapit sa Iyang Apostoles sa pagpabilin diha Kaniya ug mitudlo kanila mahitungod sa tahas sa Espiritu Santo. Sa wala pa mosulod sa Tanaman sa Getsemani, mihalad ang Manluluwas og Pagpangamuyo nga Pag-ampo. Giampo Niya ang Iyang Apostoles ug ang tanan kinsa nagtuo diha Kaniya.

Mga Kapanguhaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Kaagi ug Kinatibuk-ang Kahulogan

Juan 14:1–3

Unsa ang mga dagkong balay sa Amahan?

Gitudlo ni Propeta Joseph Smith nga ang “daghang puy-anan” nga gihisgotan ni Jesus kinahanglan nga sabton isip mga gingharian—sa lain nga pagkasulti: “‘Sa gingharian sa akong Amahan may daghan nga gingharian,’ aron nga kamo mahimong manununod sa Dios ug isigka-manununod kanako. … Adunay mga mansyon alang niadtong nagsunod sa celestial nga balaod, ug adunay lain nga mga mansyon alang niadtong wala makatuman sa balaod, ang matag tawo mahiadto asa siya angay.”

Gitudlo ni Presidente Dallin H. Oaks: “Gikan sa moderno nga pagpadayag atong nahibaloan nga ang kataposan nga padulngan sa tanan kinsa magpuyo sa yuta dili ang kulang nga ideya sa langit alang sa mga matarong ug sa mahangtoron nga mga pag-antos sa impyerno alang sa nahibilin. Ang mahigugmaon nga plano sa Dios alang sa Iyang mga anak naglakip niini nga reyalidad nga gitudlo sa atong Manluluwas, si Jesukristo: ‘Sa balay sa akong Amahan anaay daghang puy-anan’[Juan 14:2]. Ang gipadayag nga doktrina sa gipahiuli nga Simbahan ni Jesukristo sa mga Santos sa Ulahing mga Adlaw nagtudlo nga ang tanang anak sa Dios—nga adunay mga eksepsiyon nga limitado kaayo nga ikonsiderar dinhi—sa kataposan makapanunod og usa sa tulo ka gingharian sa himaya, bisan ang labing menos niini ‘nga walay usa nga makasabot niini’ [Doktrina ug mga Pakigsaad 76:89].”

Juan 14:5–6

Sa unsa nga paagi si Jesukristo mao “ang dalan”?

Si Apostol Tomas buot mahibalo kon unsaon pag-adto didto diin si Jesus miadto. Agi og tubag, miingon si Jesus, “ Ako mao ang dalan.” Ang pulong nga “dalan” gihubad gikan sa Gresyanhon nga pulong hodos. Kini mahimong magkahulogan og dalan, ganghaan, direksiyon, panaw, o mga lihok nga pagabuhaton. Gitudlo ni Elder Dieter F. Uchtdorf: “Ang Manluluwas mao ang makapadasig nga gahom luyo sa tanan nga atong buhaton. Dili lang kita mohimo sa espirituwal nga butang sa panahon nga kita walay buhaton. Dili lang buhaton panagsa apan mao ang tanan sa atong kinabuhi. Siya mao ‘ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi ni [Jesukristo]’ [Juan 14:6]. Kana mao ang Dalan ug ang atong kataposang destinasyon. … Ako … mopamatuod nga si Jesukristo mao ang atong Agalon, ang atong Manunubos, ug ang atong usa ug bugtong nga Dalan balik ngadto sa atong minahal nga Amahan sa Langit.”

Alang sa dugang nga mga panabot, tan-awa sa “Mga Buhat 24:14, 22. Unsa ‘ang dalan’?”

Juan 14:7–11; 16:25

Unsa ang atong makat-onan mahitungod sa Langitnong Amahan gikan ni Jesukristo?

Agi og tubag sa pangamuyo ni Felipe “Ipakita kanamo ang Amahan,” si Jesus mipasabot nga ang nakaila Kaniya nakaila usab sa Langitnong Amahan. Gitudlo ni Presidente Dallin H. Oaks: “Unsay atong nasayran sa kinaiyahan sa Dios nga Amahan kadaghanan maoy atong nakat-onan gikan sa pangalagad ug mga pagtulun-an sa Iyang Bugtong Anak, si Jesukristo. … Ang Biblia naglangkob og apostolikanhong saksi nga si Jesus mao ang ‘tukma nga hulad’ sa kinaiya sa Iyang Amahan (Mga Hebreohanon 1:3), nga nagpasabot lamang sa kaugalingong pagtulun-an ni Jesus nga ‘ang nakakita kanako nakakita sa Amahan’ (Juan 14:9).”

Juan 14:16–23, 26; 15:26; 16:7

Kinsa ang laing Maghuhupay?

Diha sa King James Version sa Biblia, ang Gresyanhon nga pulong paraklētos gihubad isip “Manlalaban” diha sa Juan 14 ug 15. Ang paraklētos usa ka tigtabang, tighangyo, o manlalaban. Kini usa usab kinsa naghupay ug nag-awhag. Ang Manluluwas misaad sa Iyang mga disipulo nga human Siya mobiya, dili sila biyaan nga mag-inusara. Siya mopadala kanila og “laing Tighupay.” Kining lain nga Tighupay mao ang Espiritu Santo. Ang saad sa Manluluwas nga Siya mohatag sa Iyang mga disipulo og laing Tighupay nagpasabot nga ang Manluluwas Mismo usa usab ka Tighupay. Si Propeta Joseph Smith miingon: “Adunay duha ka Tighupay nga gipamulong. Usa ang Espiritu Santo. … Karon [kinsa] kining lain nga Tighupay? Kini walay lain kon dili ang Ginoong Jesukristo Mismo.”

Juan 14:30

Kinsa “ang punoan niini nga kalibotan”?

Ang hugpong sa mga pulong nga “ang punoan niini nga kalibotan” nagpasabot ngadto sa yawa. Aduna siyay dakong gahom ug impluwensya dinhi niining makasasala nga kalibotan. Apan gitudlo ni Jesukristo nga ang yawa “palagputon” niini nga kalibotan sa panahon sa paghukom.

Juan 15:1–8

Unsa ang atong makat-onan gikan sa pasumbingay sa “tinuod nga tanom nga parras”?

Ang mga propeta sa Daang Tugon kasagaran migamit sa kahulagwayan sa tanom nga parras sa paghulagway sa Israel, ang mga tawo sa pakigsaad sa Dios. Ang Israel adunay potensyal nga magmabungahon apan sa kasagaran wala matuman ug namunga og pait nga bunga. Niini nga asoy, ang Dios mao ang hardenero, o ang mag-uuma, sa parrasan. Si Jesukristo mao ang “tinuod nga tanom nga parras.” Ang hardenero naglaom alang sa tinuod nga tanom nga paras nga mamunga og maayong bunga. Aron mamunga og maayong bunga, ang sanga kinahanglan gayod nga “magpabilin kini sa tanom.” Gitudlo ni Elder David A. Bednar: “Ang Ginoong Jesukristo mihatag ngadto sa matag usa kanato og pagdapit sa pagpabilin diha Kaniya [tan-awa sa Juan 15:4–9]. Apan unsaon kanato sa tinuoray pagkat-on ug pagduol ug pagpabilin diha Kaniya?

“Ang pulong nga pagpabalin nagpasabot nga dili matarog o lig-on ug molahutay nga dili magpadaog. Si Elder Jeffrey R. Holland mipasabot nga ang ‘pagpabilin’ isip usa ka aksiyon nagkahulogan ‘“[sa] pagpuyo—apan [sa] pagpuyo sa kahangtoran.” Kana mao ang tawag sa mensahe sa ebanghelyo ngadto sa … tanan … sa kalibotan. Duol, apan moduol sa pagpabilin. Duol uban sa lig-on nga pagtuo ug paglahutay. Duol hangtod sa hangtod, alang sa imong kaayohan ug alang sa kaayohan sa tanang kaliwatan nga mosunod kanimo.’ Sa ingon, kita magpabilin diha ni Kristo ingon nga kita lig-on ug makanunayon sa atong debosyon ngadto sa Manunubos ug sa Iyang balaan nga mga katuyoan, sa mga panahon nga maayo ug dili maayo [tan-awa sa Juan 15:10].”

Juan 16:7

Nganong kinahanglang mobiya si Jesus sa wala pa makadawat ang Iyang mga disipulo sa Espiritu Santo?

“Tungod sa pipila ka mga rason nga wala mapasabot sa hingpit diha sa mga kasulatan, ang Espiritu Santo wala motrabaho sa hingpit taliwala sa mga Judeo sa mga katuigan sa mortal nga panaw ni Jesus (Juan 7:39; 16:7). Mga pamahayag nga ang Espiritu Santo wala moanha hangtod human sa pagkabanhaw ni Jesus kinahanglan gayod nga ipasabot ngadto niana nga dispensasyon lamang, kay kini tataw kaayo nga ang Espiritu Santo nagtrabaho sa mas unang mga dispensasyon.”

Juan 17

Unsa ang Pakilooy nga Pag-ampo?

Sa wala pa mosulod ngadto sa Tanaman sa Getsemani, ang Manluluwas nag-ampo ngadto sa Iyang Amahan alang sa Iyang Apostoles ug sa tanan kinsa nagtuo diha Kaniya. Kini nailhan isip ang Pakilooy nga Pag-ampo. Kini sa kinatibuk-an gidawat nga ang pakilooy nga pag-ampo mao ang usa ka hangyo “gitanyag alang sa” usa ka tawo ug nagdapit sa “Dios sa paglihok agi og tubag.”

Niini nga pag-ampo, gipakita sa Manluluwas ang Iyang tahas isip atong Tigpataliwala, o Manlalaban ngadto sa Langitnong Amahan. Gitudlo ni Presidente Russell M. Nelson: “Ang pulong nga advocate nagagikan sa Latin nga pulong nga nagpasabot og ‘tingog alang,’ o ‘usa kinsa mangamuyo alang sa lain.’ Ang ubang may kalabotan nga mga pulong gigamit diha sa kasulatan, sama sa tighangyo o tigpataliwala (tan-awa sa 1 Timoteo 2:5; 2 Nephi 2:28; D&P 76:69). Gikan sa Basahon ni Mormon kita nagkat-on nga kini nga responsibilidad nakita nang daan sa wala pa ang Iyang pagkatawo: ‘si [Jesus] mohimo og pakilooy alang sa tanang mga tawo; ug sila kinsa nagtuo diha kaniya pagaluwason’ (2 Nephi 2:9). Kini nga misyon tataw nga klaro diha sa maloloy-ong pakilooy nga pag-ampo ni Jesus.”

Juan 17:3

Unsay kahulogan sa pag-ila sa Dios?

Dinhi niini nga bersikulo, ang Gresyanhon nga verbo ginōskō gihubad isip “aron mahibalo.” Ang pulong nga ginōskō nagsugyot og kahibalo nga nadawat pinaagi sa kasinatian ug pagkamasulundon. Gitudlo ni Jesus, “Ang buot magbuhat sa gisugo sa [Dios], mahibalo siya sa doktrina, kon ang akong gitudlo gikan ba sa Dios, o nagsulti ba lamang ako sa kaugalingon kong pagbuot.” Magbaton niining matang sa pagkat-on “nagpakita og tinguha sa pagkat-on, hunahuna nga aktibo, mga dunggan nga naminaw kanunay og mga tubag, ug nagpakita sa tinuoray og paningkamot sa pagsunod og usa ka butang.” Sa pagkomentaryo kabahin niini nga matang sa pagkat-on, misulat si Elder David A. Bednar, “Isip mga disipulo sa Manluluwas, dili lamang puro paningkamot ang atong gihimo aron modaghan ang nahibaloan; hinoon, kanunay kitang mohimo og dugang pa kon unsa man ang atong nahibaloan nga matarong ug mas momaayo pa.”

Juan 17:11, 20–23

Unsaon nato pagkahiusa uban sa Amahan, sa Anak, ug sa ubang mga disipulo ni Jesukristo?

Si Elder D. Todd Christofferson mitudlo:

“Ang pagkahiusa maoy usa sa gibalik-balik nga tema sa ebanghelyo ni Jesukristo ug ang pagpakiglabot sa Dios sa Iyang mga anak. Ang mahitungod sa siyudad sa Zion sa panahon ni Enoch, giingon nga ‘sila usa sa kasingkasing ug usa sa hunahuna’ [Moises 7:18]. Kabahin sa unang mga Santos sa karaang Simbahan ni Jesukristo, ang Bag-ong Tugon nagrekord, ‘Ug sa katilingban nga nanagpanoo usa ra ang kasingkasing ug usa ra ang balatian’ [Mga Buhat 4:32].

“Sa atong kaugalingon nga dispensasyon, ang Ginoo mipasidaan, ‘Ako moingon nganha kaninyo, paghiusa; ug kon kamo dili magkahiusa kamo dili akò’ [Doktrina ug mga Pakigsaad 38:27]. …

“Diin ang Dios nagpatigbabaw sa tanang kasingkasing ug mga hunahuna, ang katawhan gihulagway isip ‘nagkahiusa, mga anak ni Kristo’ [4 Nephi 1:17]. …

“… Pinaagi lamang sa atong indibidwal nga pag-unong ug gugma ngadto ni Jesukristo nga kita makalaom nga magkahiusa—magkahiusa sa kaugalingon, magkahiusa sa panimalay, magkahiusa sa Simbahan, sa kataposan magkahiusa sa Zion, ug labaw sa tanan, magkahiusa sa Amahan ug sa Anak ug sa Espiritu Santo.”

Juan 17:12

Kinsa “ang anak sa kalaglagan”?

Diha sa Pakilooy nga Pag-ampo, si Jesus nag-ampo alang sa Iyang Apostoles, “kadto nga ang [Dios] mihatag [Kaniya].” Ang “anak sa kalaglagan” kinsa nawala nagpasabot ngadto ni Judas Iscariote, kinsa mibudhi ni Jesus. Ang Gresyanhon nga pulong diin ang “kalaglagan” gihubad og (apōleia) nagpasabot og usa ka kahimtang nga nawala o naguba. Namulong mahitungod ni Judas Iscariote, si Presidente Jeffrey R. Holland miingon: “Apan lisud kaayong hunahunaon nga ang usa sa Iyang linain nga saksi nga naglingkod sa Iyang tiilan, nakadungog Kaniyang nag-ampo, nagtan-aw Kaniya nga nag-ayo og masakiton, ug nakabatyag sa Iyang paghikap makabudhi Kaniya ug ang tanan nagkantidad lamang og 30 ka piraso nga pilak. Wala pa gayud sa kasaysayan niini nga kalibutan nga ang gamay kaayo nga salapi gikapalit sa ingon ka ikauulaw kaayo nga dungog. Dili kita ang makahukom sa dangatan ni Judas, apan si Jesus miingon ngadto sa nagbudhi Kaniya, ‘Maayo pa [lang unta] alang niadtong tawhana nga wala siya matawo’ [Mateo 26:24].”

Juan 17:17, 19

Unsa ang pagkabalaan?

Ang pagkabalaan mao “ang paagi nga mahimo nga gawasnon sa sala, putli, limpyo, ug balaan pinaagi sa Pag-ula ni Jesukristo.” Gitudlo ni Elder D. Todd Christofferson: “Ang pagkabalaan nagkuha sa lama o mga epekto sa sala. …

“[Kini] natuman pinaagi sa grasya ni Kristo, nga ang maong grasya usa ka gasa ngari [kanato] pinasikad sa hugot nga pagtuo. Apan ang atong moral nga kabubut-on usa usab ka gikinahanglan nga elemento dinhi niini nga balaang proseso. Kita kinahanglan gayod nga mohinulsol ug molihok sa paghinulsol. Kita kinahanglan gayod nga mopili sa pagpabunyag ug modawat sa Espiritu Santo, ug kita kinahanglan gayod mopili sa pagpabilin nga maunungon sa atong mga pakigsaad human niana. Sa pagdawat sa gasa kita kinahanglan gayod molihok sa paagi nga Siya gi-orden.”

Pagkat-on pa og Dugang

Si Jesukristo Mao “ang Dalan”

Lawrence E. Corbridge, “Ang Dalan,” Liahona, Nob. 2008, 34–36

Ang Maghuhupay

Henry B. Eyring, “Ang Maghuhupay,” Liahona, Mayo 2015, 17–21

Pakilooy nga Pag-ampo

Russell M. Nelson, “Mga Leksiyon gikan sa mga Pag-ampo sa Ginoo;” Liahona, Mayo 2009, 46–49

Media

Bidyo

Imahe

Mihalad si Jesus sa Pakilooy nga Pag-ampo — For Those Who Will Believe in Me [Alang Niadtong Kinsa Motuo Kanako], ni Dan Wilson