Mateo 3; Marcos 1; Lucas 3

Ang pagsangyaw ug pagbunyag ni Juan Bautista natuman nga panagna. Sa dihang si Jesukristo gibunyagan, ang Espiritu Santo mikunsad ug nagpabilin diha Kaniya. Ang Amahan miproklamar ni Jesus nga Iyang Hinigugmang Anak. Si Jesus mitawag ni Simon (Pedro), Andres, Santiago, ug Juan nga mosunod Niya. Nagsugod Siya sa pagtudlo ug sa pagbuhat og mga milagro pinaagi sa balaan nga gahom ug awtoridad.

Mga Kapanguhaan

Background ug Konteksto

Mateo 3:2

Unsa “ang gingharian sa langit”?

Ang Simbahan sa Manluluwas usahay gitawag og ang gingharian sa langit. Ang pagsulti nga “ang gingharian sa langit haduol na” nagpasabot nga moabot na sa dili madugay. Sa dihang si Jesukristo mitawag sa Iyang Apostoles, Siya mihatag kanila “sa mga yawe sa gingharian sa langit” aron sila makagiya sa Iyang Simbahan sa yuta. Sa Mateo 13 kita makakita og dugang nga mga kamatuoran nga gitudlo sa Manluluwas mahitungod sa gingharian sa langit.

Mateo 3:7

Unsa ang gipasabot sa usa ka “anak sa mga bitin”?

(Ikompara sa Lucas 3:7.)

Ang Palistino nga bitin mao ang labing komon nga makahilong bitin sa Israel. Ang malala nga bitin aktibo sa gabii. Sila kasagarang mangita og pagkaon pinaagi sa pag-ukoy ug dayon pagtukob sa ilang biktima. Kon bation niini nga nameligro, ang mga bitin molikos sa lawas niini, mohishis, ug moatake sa mga kaaway niini. Ang Griyego nga hugpong sa mga pulong nga gihubad nga “anak sa mga bitin” mahimo usab nga hubarong “kaliwat sa mga bitin” (o ang grupo sa mga itlog nga giitlog sa inahan nga bitin) nagpasabot nga maot ug pagkadaotan sa mga Saduceo ug mga Pariseo.

usa ka itom ug puti nga Palistino nga bitin

Mateo 3:12

Unsa ang gipasabot sa hugpong sa mga pulong nga “[Iyang] paliran anaa sa iyang kamot”?

Ang “paliran” mao ang usa ka taphanan nga gigamit sa pagpapha sa trigo ngadto sa hangin. Molain kini sa trigo gikan sa walay labot nga panit sa liso. Kining wala kinahanglanan nga materyal nailhan usab nga isip tahop. Ang mga lugas sa trigo mahulog balik sa yuta samtang ang hangin mohuyop sa mas gaan nga uhot. Ang trigo dayon pundokon ngadto sa anihan, o balay tipiganan. Ang nahibilin nga tahop sunogon sa kalayo. Si Juan nga Magbubunyag nagtudlo nga ang Manluluwas, nga moabot sunod kaniya, molain sa mga tumutuo gikan sa mga dili tumutuo sa samang paagi sa paglain sa trigo gikan sa uhot.

Mateo 3:16

Nahimo ba nga salampati ang Espiritu Santo?

(Ikompara sa Lucas 3:22.)

Si Propeta Joseph Smith mipasabot nga ang Espiritu Santo wala mopakita isip usa ka salampati human sa bunyag ni Jesukristo. Hinoon, ang mikunsad nga salampati nagpakita nga ang Espiritu Santo anaa nianang higayona: “Ang timailhan sa salampati gipasiugdahan sa wala pa malalang ang kalibotan, usa ka saksi sa Espiritu Santo, ug ang yawa dili moabot pinaagi sa timailhan sa salampati. Ang Espiritu Santo usa ka personahe ug … dili mahimong usa ka salampati; pero ang timailhan sa usa ka salampati gihatag ngadto ni Juan aron sa pagmatuod sa kamaturoan sa gibuhat, ingon nga ang salampati usa ka timailhan o timaan sa kamatuoran ug pagkainosente.”

Marcos 1:21–22

Sa unsang paagi ang mga pagtulun-an ni Jesus lahi sa mga pagtulun-an sa escriba?

Ang mga escriba gikonsiderar nga eksperto sa legal nga mga aspeto sa balaod ni Moises. Kon magsangyaw ug maghubad sa balaod, sa kasagaran dugangan nila og gibug-aton ug awtoridad ang ilang pagtudlo pinaagi sa paghisgot o sa pagkutlo sa kanhing mga awtoridad ug mga eksperto. Sa sukwahi, mamulong si Jesus gamit ang awtoridad sa Tighatag sa Balaod, kay Siya man ang tighatag sa balaod ni Moises.

Marcos 1:23–27, 34

Unsay buot ipasabot sa pagbaton og “mahugaw nga espiritu”?

Ang Griyegong termino gihubad nga “hugaw nga espiritu” nga mahimong hubaron nga “daotang espiritu.” Ang daotang mga espiritu nga nagtinguha sa pagsulod sa pisikal nga mga lawas mao ang mga sumusunod ni Lucifer. Nagpuyo sila didto sa presensya sa Langitnong Amahan ug ni Jesukristo sa wala pa sila gipapahawa gikan sa langit tungod sa pagsupak. Kita nasayod sa espirituhanong mga asoy nga ang daotang mga espiritu mahimong temporaryong mopuyo sa mga lawas sa mga lalaki ug mga babaye. Pero, ang Propeta Joseph Smith mitudlo nga kita adunay gahom nga makasukol sa daotan ug ang mga espiritu nga misunod kaniya.

Marcos 1:40–45

Unsa ang sangla?

Sa Biblia, ang sangla nagpasabot sa lainlain nga mga kahimtang sa panit. Sa pagkakaron, ang sangla kasagaran gitawag og Hansen nga sakit. Ang sangla mahimong makadaot sa panit, mga ugat, mga mata, ilong, tutunlan, ug mga bukog. Kon dili matambalan, hinayhinay kining moresulta ngadto sa usa ka masakit nga kamatayon.

Ang sanglahon sa panahon sa biblia gilain gikan sa katilingban. Sila gisugo nga mosinggit og “Hugaw!” aron mapasidan-an ang uban nga nagpadulong kanila. Gituohan kini nga ang ilang kahugaw modagsang ngadto ni bisan kinsa nga nakigharong kanila. Tungod kay ang mga biktima sa sangla ilain ug mag-inusara, ang mga Judeo mikonsiderar niini nga usa ka buhing patay.

Pinaagi sa pag-ayo niining tawo nga sanglahon, wala lamang giayo sa Manluluwas ang pisikal niya nga lawas apan usab gibalik siya sa katilingban. Human giayo sa Manluluwas ang usa ka tawo, Siya misugo sa tawo nga sundon ang kasugoan ni Moises alang sa mga naayo nga sanglahon. Ang sanglahon mopakita ngadto sa usa ka pari, mohalad og sakripisyo, ug moagi sa ritwal sa pagputli .

Lucas 3:2

Nganong ang pulong sa Dios miabot ngadto ni Juan Bautista ug wala ngadto sa halangdong pari?

Ubos sa balaod ni Moises, ang halangdong pari mao ang nangulong opisyal sa Aaronic nga Pagkapari. Siya nangulo sa tanang uban nga mga pari. Bisan si Ana ug Caifas nga mga halangdong pari atol sa pagpangalagad ni Juan Bautista, ang pulong sa Dios wala kanila. Hinoon, didto kang Juan. Kini nagpakita nga ang mga lider sa Israel nianang panahona dili takos.

Ang tigdumalang buhatan sa labaw nga sacerdote nahimong daotan. Sulod sa mga katuigan, si Herodes ug ang ubang mga opisyal sa Roma mitudlo og mga labaw nga sacerdote base sa nabatonan nga politikanhong bentaha o panuburno [bribery]. Ang mga Judeo nagkulang og lider sa pagkapari nga dunay balaanong awtoridad ug nagkinahanglan sila sa espirituhanong pagkatawo pag-usab.

Si Juan Bautista gipili sa Dios ug saktong giordinahan nga mahimong representante sa Dios. Siya nagtudlo og paghinulsol ug mopahigayon sa ordinansa sa bunyag.

Si Propeta Joseph Smith mipasabot: “Si Juan, nianang higayona, mao lamang ang legal nga tigdumala sa mga kalihokan sa gingharian diha sa yuta, ug naghupot sa mga yawe sa gahom. Ang mga Judeo kinahanglang mosunod sa iyang mga instruksyon o panghimaraoton, sa ilang kaugalingong balaod. … Ang anak nga lalaki ni Zacarias nakigbisog sa mga yawe, sa gingharian, sa gahom, sa himaya gikan sa mga Judeo, pinaagi sa balaan nga pagdihog ug mando sa langit.”

Lucas 3:23–38