Mga Tabang sa Kasulatan
Pinadayag 6–14

“Pinadayag 6–14,” Mga Tabang sa Kasulatan: Bag-ong Tugon (2024)

Mga Tabang sa Kasulatan

Pinadayag 6–14

Isip kabahin sa iyang pinadayag, nakita ni Juan ang usa ka panan-awon sa Kordero sa Dios nga nag-abli sa unang unom ka mga timri sa usa ka sinilyohan nga basahon. Girekord niya ang mga panagna mahitungod sa importante ug makahasol nga mga panghitabo nga mahitabo sa hapit na ang Ikaduhang Pag-anhi ni Jesukristo. Nakita niya ang duha ka propeta kinsa pagapatyon didto sa Jerusalem ug nabanhaw tulo ka adlaw og tunga human niana. Gihulagway ni Juan ang Gubat sa Langit ug ang mga paningkamot ni Satanas sa paglaglag sa mga sumusunod ni Jesukristo dinhi sa yuta. Gipanagna usab niya ang Pagpahiuli sa Simbahan sa Manluluwas ug ang pagbulag sa mga matarong gikan sa mga daotan.

Mga Kapanguhaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Background ug Konteksto

Pinadayag 6

Unsa ang atong nahibaloan mahitungod sa unang unom ka selyo?

Ang basahon, o ang linukot nga basahon, uban sa pito ka selyo nga nagrepresentar sa 7,000 ka tuig sa tawhanong kasaysayan. Ang matag selyo nagrepresentar og 1,000 ka tuig. Si Jesukristo mao lamang ang takos nga moabli sa matag selyo. Human ang matag selyo maabli, nakita ni Juan ang mga panan-awon sa mga panghitabo sa tawhanong kasaysayan. Na-obserbahan sa usa ka iskolar: “Ang mga selyo [timri]’ nga mga imahe mga simbolo nga nagpakita og usa ka kinatibuk-ang latid kon sa unsang paagi modagayday ang kasaysayan, apan ang mga imahe kinahanglan nga dili isipon sa literal kaayo nga paagi. Gitingob sa pagkuha, kini nagpakita sa kinatibuk-ang padulngan sa katawhan nagresulta diha sa dakong gubat sa kataposang mga adlaw.”

Ang mosunod nga tsart nag-ila sa unang 6,000 ka tuig nga panahon. Kini nagtanyag usab og posible nga mga paghubad sa mga simbolo nga nakita ni Juan.

Timri

Posible nga mga Hubad

Unang selyo [timri] (Pinadayag 6:1–2)

Ang kolor nga puti kasagaran nagsimbolo og kaputli. Ang bayanan sa pana, isip usa ka hinagiban, makasimbolo og gubat. Ang usa ka korona makasimbolo og kadaogan. Ang unang timri mahimong nagpasabot sa usa ka panahon nga mao “ang labing dako nga kadaogan alang sa pagkamatarong nga sukad natuman. Atol niini nga panahon si Enoch ug ang iyang katawhan mipahimutang sa pundasyon sa Zion, ug ang pagkamatarung sa tinuod anaa sa opensiba.”

Ikaduhang selyo (Pinadayag 6:3–4)

Ang kolor nga pula “nagsugyot nga ang nagsakay nagdala sa kamatayon pinaagi sa kapintas ug pagpaagas sa dugo.” Diha sa kamot sa nagsakay mao ang usa ka espada, nagsimbolo og “mapintas nga kamatayon inubanan sa tanang kasuko sa gubat. Kini usab nagdala og ideya sa awtoridad sa pagsilot sa daotang buhat.” Ang ikaduhang selyo mahimong nagpasabut ngadto sa nagkaylap nga kadaotan ug kapintas diha sa mga panahon ni Noe. Hilabihan ang kadako sa pagkadaotan niini nga panahon nga ang katawhan naningkamot sa pagpatay ni propeta Noe.

Ikatulong selyo (Pinadayag 6:5–6)

Ang kolor nga itom nagsimbolo og “ panghingutas ug kamatayon tungod sa kamatay, kagutom, sakit, ug huwaw.” Ang “nagpares nga mga timbangan,”o mga sukdanan, gigamit sa mga panahon sa grabeng kagutom sa pagtimbang og pan. Ang usa ka litrong trigo mopakaon og usa ka hamtong nga tawo sulod sa usa ka adlaw ug usa ka denario ang bili. Ang usa ka denario mao ang usa ka adlaw nga sweldo, busa kini mokabat og tibuok adlaw nga trabaho sa pagbayad og usa ka adlaw nga pagkaon. Ang ikatulong selyo nagpasabot ngadto sa mga adlaw ni Abraham, Isaac, ug Jacob, diin nagkahulogan og kagutom.

Ikaupat nga selyo (Pinadayag 6:7–8)

Ang Gresyanhong pulong nga gihubad isip luspad kasagaran nga gigamit sa paghulagway og usa ka tawo kinsa nagdaot o namatay. Ang impiyerno, nga malagmit nagpasabot og bilanggoan sa espiritu, nagsimbolo og dapit sa mga patay. Ang ikaupat nga selyo ingon og nagpasabot ngadto sa panahon sa naggubat nga mga imperyo sa Asiria, Ehipto, Babilonya, Persia, Gresya ug Roma. Ingon nga gisalikway ang mga pasidaan sa mga propeta, ang mga gingharian sa Israel ug Juda kasagaran nga mabiktima ang ilang mga kaugalingon niining mabuntugon nga mga imperyo. Ang Israel ug Juda nakig-away usab batok sa usag usa, nagresulta sa pagkamatay sa daghang mga tawo.

Ikalimang selyo (Pinadayag 6:9–11)

Sa iyang panan-awon, nakita ni Juan ang mga tawo nga gipamatay ilawom sa altar tungod sa ilang mga pagpamatuod kabahin sa Dios. Sa mga panahon sa Daang Tugon, ang mga altar diha sa balay sa Ginoo gigamit alang sa pagsakripisyo sa mga hayop. Ang dugo niini nga mga hayop nga mga sakripisyo gigamit sa daghang mga paagi. Usa ka iskolar mitimaan: “Sa ubang mga ritwal ang dugo gibutang diha sa panaksan ug gibu-bu diha sa tiilan sa altar sa sakripisyo. (Tan-awa sa Levitico 4 alang sa mga ehemplo.) Ang pagbu-bu sa dugo nagsugyot og usa ka gawasnong kabubut-on, hingpit nga pasalig sa kinabuhi ngadto sa Ginoo. … Ang mga kalag nga nakita ni Juan ilawom sa altar gawasnong nahatag sa Ginoo ang ilang tanan. … Gihatag nila ang ilang mga kinabuhi diha sa altar sa Dios.” Daghan sa nag-unang mga Kristiyano, lakip ang hapit tanan sa orihinal nga Apostoles, mihatag sa ilang mga kinabuhi alang sa ebanghelyo ni Jesukristo. Gihatagan sila og puti nga mga kupo, nagsimbolo og kaputli ug “nagsignal sa ilang moral nga kadaugan ug usab ang gisaad [sa Ginoo] nga umaabot nga kahimayaan sa kahangturan.

Ikaunom nga selyo (Pinadayag 6:12–17; 7:1–17)

Ang ikaunom nga selyo nagrepresentar sa panahon sa dili pa ang Ikaduhang Pag-anhi ni Kristo. Gitiman-an ni Juan ang pito ka panghitabo nga mahitabo atol niini nga panahon: linog, ang adlaw magka-itom, ang bulan mahimong daw dugo, mga bitoon mangatagak, ang langit maabli maingon sa usa ka basahon nga linukot, mga kabukiran ug mga kapuloan mangabalhin gikan sa ilang mga dapit, ug mga tawo maninguha sa pagtago. Susama nga mga panghitabo girekord sa laing dapit sa kasulatan. Mitudlo usab si Juan ngadto sa pito ka matang sa natural nga mga katalagman ug sa pito ka klase sa mga tawo kinsa motago. Ang numero nga pito kasagaran nagsugyot og pagkahingpit o mahimong magpaila nga walay mga kaaway sa Dios ang makaikyas sa Iyang kasuko sa kataposang mga adlaw.

Pinadayag 7:1–2

Unsay atong nahibaloan mahitungod sa upat ka anghel ug ang anghel nga mikayab gikan sa silangan?

Ang Ginoo mipadayag ngadto ni Propeta Joseph Smith nga ang upat ka anghel nga nakita ni Juan sa iyang panan-awon mga pinadala sa Dios. Kining upat ka anghel “gihatagan og gahom diha sa upat ka bahin sa yuta, sa pagluwas og kinabuhi ug sa paglaglag; kini mao sila kinsa nagbaton sa walay kataposan nga ebanghelyo sa pagtugyan ngadto sa matag nasod, kaliwatan, pinulongan, ug katawhan; adunay gahom sa pagtak-op sa kalangitan, sa pagselyo ngadto sa kinabuhi, o sa paghulog ngadto sa yuta sa kangitngit.” Ang anghel nga mikayab gikan sa silangan mao siya kinsa gihatagan sa timri sa buhi nga Dios ibabaw sa napulog duha ka tribo sa Israel.”

Pinadayag 7:2–3

Unsa ang ipasabot sa pagbutang og usa ka timri diha sa mga agtang sa mga sulugoon sa Dios?

(Ikompara ngadto sa Pinadayag 9:4.)

Sa karaang mga panahon, ang usa ka timri gigamit “sa pagpakita og panag-iya ug sa paghatag og proteksiyon.” Niini nga tudling, ang timri nga gibutang diha sa mga agtang sa mga sulugoon sa Dios ”simbolikanhon sa balaang proteksiyon nga mobantay sa matarong nga luwas atol sa umaabot nga panahon sa panagbangi ug panaglaglag. Kini nga selyo naglakip sa pisikal ug espirituhanon nga proteksiyon. Gisugyot sa usa ka iskolar, “Ang pagtimri naghimo sa [mga sulugoon sa Dios] sa pagtubag uban sa hugot nga pagtuo ngadto sa mga pagsulay nga sila nagsinati, aron kini nga mga pagsulay mahimo nga mao gayod nga mga instrumento pinaagi diin sila mapalig-on sa ilang hugot nga pagtuo.”

Si Propeta Joseph Smith mipasabot nga ang pagbutang og usa ka timri diha sa mga agtang sa mga sulugoon sa Dios “nagpaila sa pagtimri sa mga panalangin diha sa ilang mga ulo, nagpasabot sa walay kataposan nga pakigsaad, sa ingon naghimo sa ilang balaan nga tawag ug pagkapinili nga segurado.” (Alang sa dugang nga impormasyon mahitungod niini nga pagtimri, tan-awa sa “Pinadayag 22:4. Unsa ang kahulogan sa pagbaton sa mga sulugoon sa Dios sa Iyang ngalan diha sa ilang mga agtang?”)

Pinadayag 7:4–8

Kinsa ang 144,000?

(Itandi ngadto sa Pinadayag 14:1–5.)

Ang Ginoo mipasabot ngadto ni Joseph Smith nga ang 144,000 “ka halangdong mga pari, gi-orden ngadto sa balaan nga kapunongan sa Dios, sa pagpangalagad sa walay kataposan nga ebanghelyo; kay sila mao sila kinsa gi-orden gikan sa matag nasod, mga kaliwatan, mga pinulongan, ug mga katawhan, pinaagi sa mga anghel kinsa gihatagan og gahom ibabaw sa mga nasod sa yuta, sa pagdala og daghan kutob sa mouban ngadto sa simbahan sa Unang Natawo.” Ang buhat sa 144,000 ka halangdong mga pari makabaton og simbolikanhong pakisayran ngadto sa buhat nga gipahigayon ubos sa mga yawe sa pagkapari diha sa mga templo sa ulahing mga adlaw. Ang Simbahan sa Unang Natawo nagpasabot ngadto niadtong kinsa mga matinud-anon ngadto sa ilang mga pakigsaad uban ni Jesukristo ug nahimong mga tig-ambit sa Iyang himaya. (Tan-awa diha sa “Mga Hebreohanon 12:22–23. Unsa ang mga Bukid sa Zion ug ang Simbahan sa Unang Natawo?”)

Pinadayag 7:9, 13–14

Kinsa ang mga tawo nga nagsul-ob og puti nga mga kupo?

Ang mga tawo nga nagsul-ob og puti nga mga kupo nga nagbarog sa trono mao ang matarong nga mga tawo nga gipundok sa 144,000 gikan sa matag nasod. Sila nagbarug diha sa presensiya sa Amahan ug sa Anak, ingon nga nakadawat sa ilang kahimayaan Ang imahe sa matarong nga mga tawo nga may mga sanga sa palma diha sa ilang mga kamot susama sa madaugong pagsulod sa Manluluwas ngadto sa Jerusalem. Ang mga sanga sa palma makasimbolo og kadaugan ug hingpit nga kalipay. Ang mga kupo gilabhan ug gihimong “puti diha sa dugo sa Kordero” nagsimbolo sa matarong nga mga tawo kinsa giputli pinaagi sa Pag-ula ni Jesukristo.

Pinadayag 8–11

Unsay atong nahibaloan mahitungod sa pito ka anghel nga may mga trumpeta?

Ang pag-abli sa ikapito nga timri [selyo] diha sa panan-awon ni Juan giubanan pinaagi sa makahahadlok nga mga hulagway sa kalaglagan. Gipadayag sa Ginoo nga ang pito ka anghel nga naghuyop sa ilang mga trumpeta nagrepresentar sa panahon sa dihang ang “Ginoong Dios [mo] balaan sa yuta, ug mohuman sa kaluwasan sa tawo … ; ug ang pagpatingog sa mga trumpeta sa pito ka mga anghel mao ang pagpangandam ug pagtuman sa iyang buhat, diha sa sinugdanan sa ikapito ka libo ka mga tuig—ang pagpangandam sa dalan sa dili pa ang panahon sa iyang pag-anhi.” Ang numero nga pito kasagaran nagrepresentar sa pagkakompleto.

Pinadayag 8–11

Unsa ang panyawan?

Ang panyawan usa ka tanom nga adunay pait og lami. Ang panyawan mahimong magsimbolo og “mapait nga mga kasamok, kalamidad, ug mga katalagman nga mahitabo sa kataposang mga adlaw.

Pinadayag 9:1–3

Unsa ang bung-aw sa kahiladman nga walay kataposan?

Ang Gresyanhon nga pulong alang sa kahiladman mga walay kataposan mahubad ngadto “sa bung-aw sa kahiladman.” Ang Gresyanhon nga pulong alang sa abyss nagkahulogan og “kalawom” o “kahiladman.” Sa mga panahon sa Bag-ong Tugon, daghan unta ang makasabot sa bung-aw sa kahiladman nga walay kataposan nga usa ka halapad nga rehiyon sa ilawom sa yuta nga mao ang panimalay sa mga patay.”

Giklaro ni Propeta Joseph Smith nga ang yawe ngadto sa bung-aw sa kahiladman nga walay kataposan wala ihatag ngadto ni Satanan apan ngadto “sa anghel.” Kini nga pagbasa naghatag og gibug-aton nga ang Dios ang nagbaton og pagpugong ug nga si Satanas may gahom lamang kutob nga ang Dios nagtugot.

Pinadayag 9:1–3

Unsay kahulogan sa mga dulon ug mga tanga [scorpions]?

Ang mga dulon, o mga apan, diin makalilisang nga hampak sa karaang pang-uma nga mga katilingban tungod kay sila dali nga mopatay sa maga tanom ug hinungdan sa kagutom. Sama pananglit, Exodo 10:12–15 ug Joel 1:2–7 naghatag og asoy kabahin sa makadaot nga gahom sa mga dulon. “Ang paghiusa sa imahe sa mga dulon uban nianang mga tanga naghatag og usa ka kalidad sa dakong kadaot ug sa ingon nagpataas sa pagbati sa kalisang nga namugna sa talan-awon.”

Pinadayag 9:4

Kinsa ang mapanalipdan gikan sa mga kalamidad sa kataposang mga adlaw?

Si Apostol Juan nakakita diha sa iyang panan-awon nga pipila ka mga kalamidad sa dili pa ang Ikaduhang Pag-anhi moapekto “lamang niadto … kinsa walay timri sa Dios diha sa ilang mga agtang.” Katumbas kini sa ubang mga saad diha sa kasulatan nga sa kataposang mga adlaw kadtong kinsa mga matinud-anon sa kataposan mapanalipdan.

Bisan og ang Ginoo nagsaad og espirituhanong panalipod ngadto sa mga matarong sa kataposang mga adlaw, giklaro ni Propeta Joseph Smith nga ang pipila kinsa mahimong dili mapanalipdan gikan sa kadaot: “[Akong] gipasabot ang mahitungod sa [pag-anhi] sa Anak sa Tawo; nga usab [kana] usa ka sayop nga pagtuo nga ang mga Santos makalingkawas sa tanang mga paghukom, samtang ang daotan mag-antos; kay ang tanang tawo ubos sa pag-antos, ug, ‘ang matarong maglisod sa pag-ikyas’ ’ [tan-awa sa Doktrina ug mga Pakigsaad 63:34];bisan pa man daghang mga Santos makaikyas, kay ang matarong mabuhi pinaagi sa hugot nga pagtuo Habacuc 2:4]; unya daghang mga matarong mabiktima sa sakit, sa katalagman, ug uban pa, nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios.”

Pinadayag 9:11

Unsa ang kahulogan sa Abaddon ug Apollyon?

Abaddon usa ka Hebreohanong pulong nga nangahulogan og “dapit sa kalaglagan.” Apollyon usa ka Gresyanhon nga pulong nga nangahulogan og “aron sa paglaglag.” Kini nga mga pulong nagpakita nga ang katuyoan sa hari sa bung-aw sa kahiladman nga walay kataposan mao ang paggamit sa iyang kasundalohan aron sa paglaglag.

Pinadayag 9:15–16

Pila ang mamatay sa gubat?

Ang mga mensahero sa Dios magpagawas og makalilisang nga kalaglagan sa panahon sa kataposang mga adlaw sa dili pa ang Ikaduhang Pag-anhi sa Manluluwas. Mipahayag si Juan nga usa ka kasundalohan nga “duha ka gatos ka libo ka libo” (200,000,000) ka tawo moaway sa gubat. Wala kita mahibalo kon kana nga gidaghanon simbolikanhon ba o literal. Gi-rekord usab ni Juan nga “ikatulo nga bahin sa mga tawo” mamatay. Kabahin niini nga panagna, si Elder Bruce R. McConkie mipahayag, “Ang gipamatay mao ang ikatulong bahin sa mga lumulupyo mismo sa yuta, hinoon mga binilyon sa katawhan ang mahimong manunga.”

Pinadayag 10:1–2, 9–10

Unsa ang gisimbolo sa gamay nga basahon nga gikaon ni Juan?

Mipadayag ang Ginoo sa mosunod mahitungod sa gamay nga basahon nga gikaon ni Juan: “Kita gikinahanglan sa pagsabot nga kini usa ka misyon, ug usa ka ordinansa, alang kaniya sa pagpundok sa mga tribo ni Israel, tan-awa, kini si Elias, kinsa, ingon sa nahisulat, kinahanglang moanhi ug mopahiuli sa tanan nga mga butang.” Ang pagkaon sa basahon malagmit nagpakita nga si Juan midawat sa iyang misyon sa pagpundok sa mga tribo ni israel. Nga ang basahon “tam-is sama sa dugos” diha sa ba-ba ni Juan apan “pait” diha sa iyang tiyan mahimong nagsugyot nga ang iyang misyon molakip og malipayon ug masakit nga mga kasinatian.

Pinadayag 11:2–3, 9–11

Unsa ang kamahinungdanon sa mga yugto sa panahon sa panan-awon ni Juan?

Ang balaang siyudad “pagayatakyatakan” sulod sa 42 ka bulan o tulo ug tunga ka tuig. Ingon usab, ang duha ka saksi nga gihisgotan managna ug magpamatuod kabahin ni Jesukristo sulod sa 1,260 ka adlaw, o mga tulo ug tunga ka tuig. Ang duha ka saksi pagapatyon, ug ang ilang mga lawas anha managhay-ad sa kadalanan sulod sa tulo ka adlaw ug tunga. Diha sa mga kasulatan, ilabi na sa Pinadayag, ang numero tres ug tunga kasagaran naghulagway og usa ka panahon sa kasakit atol diin si Satanas gitugotan sa pagbuhat sa iyang trabaho. Tungod kay ang tulo ug tunga mao ang katunga sa pito, nga nagsimbolo og kahingpitan ug pagkompleto, kini mahimong magrepresentar og usa ka butang nga nabalda o wala makompleto. Kini mahimo usab nga nagsugyot nga ang Dios wala mahuman sa pagtuman sa Iyang buhat ug nga ang trabaho sa yawa dili molungtad.

Pinadayag 12:1–6

Unsa ang atong makat-onan gikan sa Hubad ni Joseph Smith mahitungod sa babaye, sa batang gamay sa babaye, ug sa dragon?

Sa iyang panan-awon, si Juan nakakita og usa ka babaye, batang gamay sa babaye, ug usa ka dragon. Si Propeta Joseph Smith mihatag sa mosunod nga mga panabot:

Simbolo

Unsa ang Girepresentar

Simbolo

Usa ka babaye (Pinadayag 12:1)

Unsa ang Girepresentar

“Ang simbahan sa Dios” (tHubad ni Joseph Smith, Pinadayag 12:7 [Librarya sa Ebanghelyo])

Simbolo

Ang batang gamay sa babaye (Pinadayag 12:2)

Unsa ang Girepresentar

“Ang gingharian sa atong Dios ug sa iyang Kristo” (Ang Hubad ni Joseph Smith, Pinadayag 12:7 [Librarya sa Ebanghelyo])

Simbolo

Usa ka dragon (Pinadayag 12:3)

Unsa ang Girepresentar

“Ang yawa, … gitawag usab og Satanas” (Hubad ni Joseph Smith, Pinadayag 12:8 [Librarya sa Ebanghelyo])

Ang Hubad ni Joseph Smith naghimo niini og klaro nga si Satanas dili makapatigbabaw sa iyang pakigbatok sa gingharian sa Dios dinhi sa yuta.

Sa karon, ang simbahan sa Dios usa ka eklesiastikal nga organisasyon. Apan kon ang Manluluwas mobalik pag-usab ug maghimo “og usa ka bug-os nga kataposan sa tanang nasod,” ang gingharian sa Dios usab adunay politikal nga katungod ibabaw sa tanang tawo sa yuta.

Pinadayag 12:7–11

Unsay atong nahibaloan mahitungod sa Gubat sa Langit?

Si Satanas naningkamot sa paglaglag sa atong kabubut-on ug mitinguha sa himaya sa Dios alang sa iyang kaugalingon. Sa dihang ang Langitnong Amahan mipili ni Jesukristo nga mahimo natong Manluluwas, misukol si Satanas ug misugod sa Gubat sa Langit. Dinhi niini nga gubat, “si Satanas ug ang iyang mga sumusunod nakig-away ni Jesukristo ug sa Iyang mga sumusunod.” Tungod sa ilang pagsukol, si Satanas ug ang iyang mga sumusunod gisalikway gikan sa langit ug wala hatagi sa katungod sa pagdawat og mortal nga mga lawas.

Si Presidente Russell M. Nelson mitudlo, “Kini nga gubat sa langit dili usa ka gubat sa pagpaagas sa dugo. Gubat kadto sa nagsungi nga mga ideya—ang sinugdanan sa panagbingkil.” Iya usab nga natiman-an nga ang motibo ni Satanas mao ang “pag-angkon og personal nga pagdayeg gani labaw sa Dios Mismo.”

Kabahin sa mipadayon nga paningkamot sa paglaglag kan ato, miingon si Elder Dale G. renlund: “Si Lucifer usa ka tig-akusar o tigsumbong. … Namulong siya batok kanato didto sa premortal nga kinabuhi, ug nagpadayon siya sa pagpanghimaraot kanato dinhi niini nga kinabuhi. Tinguha niya ang pagbira kanato paubos. Gusto niya nga makasinati kita og walay kataposang kaalaotan. Siya ang nagasulti kanato nga dili kita makasarang, ang nagsulti kanato nga dili igo ang atong kamaayo, ang nagsulti kanato nga dili na kita makabawi gikan sa sayop. Siya ang pinakagrabe nga tigdaug-daog, ang motiwas kanato kon anaa na kita sa kalisod.”

Pagkat-on pa og Dugang

Basahon sa Pinadayag

Pagbuntog sa Tig-akusar

Ang Gubat sa Langit

  • Gordon B. Hinckley, “Usa ka Walay Katapusan nga Panagbangi, usa ka Siguradong Kadaugan,” Liahona, Hunyo 2007, 2-7

  • Larry R. Lawrence, “Ang Gubat Nagpadayon,” Liahona. Abr. 2017, 31–37

  • Dieter F. Uchtdorf, “Ang Inyong Mahinungdanong Pagpanimpalad,” Liahona, Nob. 2019, 88–90

  • Topics and Questions, “War in Heaven,” Gospel Library

Media

Bidyo

“War in Heaven” (2:05)

2:6

Mga Imahe

karaang linukot nga papyrus nga may pito ka timri
dayagram nga nagpasabot sa pito ka selyo sa panan-awon ni Juan
upat ka mangangabayo sa apokalipsis nagrepresentar sa pagkabihag, gubat, kagutom, ug kamatayon

Four Horsemen of the Apocalypse [Upat ka Mangangabayo sa Apokalipsis], ni Victor Vasnetsov

katawhan mipundok alang sa Konseho sa Langit uban sa Langitnong Amahan ug ni Jesukristo

The Grand Council [Ang Dakong Konseho], ni Robert T. Barrett

Mubo nga mga Sulat

  1. Tan-awa sa Doktrina ug mga Pakigsaad 77:6–7.

  2. Tan-awa sa Pinadayag 5:8–9.

  3. Richard D. Draper, “Teaching the Book of Revelation: Five Considerations,” Religious Educator, vol. 14, no. 1 (2013), 100.

  4. Richard D. Draper and Michael D. Rhodes, The Revelation of John the Apostle (2016), 250; Tan-awa usab Bruce R. McConkie, Doctrinal New Testament Commentary (1973), 3:477; Moises 7:13–21.

  5. Draper and Rhodes, The Revelation of John the Apostle, 252.

  6. Draper and Rhodes, The Revelation of John the Apostle, 254.

  7. Tan-awa sa Genesis 6:5–13; Moises 7:43; 8:15–30.

  8. Tan-awa sa Genesis 6:11–13; Moises 7:33; 8:18.

  9. Draper and Rhodes, The Revelation of John the Apostle, 255.

  10. Draper and Rhodes, The Revelation of John the Apostle, 255.

  11. Ang pulong nga penny gihubad gikan sa Gresyanhon nga pulong dēnarion, nga nagpasabut ngadto sa usa ka Romanong sensilyo nga ang pipila nagbanabana nga nagbili og usa ka adlaw nga sweldo (tan-awa sa Tremper Longman III and Mark L. Strauss, The Baker Expository Dictionary of Biblical Words [2023], 221).

  12. Tan-awa sa Genesis 41; Abraham 1:29–30; 2:1, 17, 21.

  13. Draper and Rhodes, The Revelation of John the Apostle, 259.

  14. Tan-awa sa Isaias 5:14. Tan-awa usab sa Mga Hilisgotan ug mga Pangutana, “Kalibotan sa Espiritu,” Librarya sa Ebanghelyo.

  15. Draper and Rhodes, The Revelation of John the Apostle, 260–61.

  16. S. Michael Wilcox, Who Shall Be Able to Stand? Finding Personal Meaning in the Book of Revelation (2003), 76.

  17. Draper and Rhodes, The Revelation of John the Apostle, 265. Tan-awa usab sa Pinadayag 7:13–14; 3 Nephi 27:19.

  18. Tan-awa sa Joseph Smith Translation, Revelation 6:14 (sa Pinadayag 6:14, footnote a).

  19. Tan-awa sa Joel 2:10, 30–31; Hageo 2:6–7; Doktrina ug mga Pakigsaad 29:14; 43:25; 88:87–91.

  20. Tan-awa sa Corbin Volluz, “A Study in Seven: Hebrew Numerology in the Book of Mormon,” BYU Studies, vol. 53, no. 2 (2014), 60–62.

  21. Doktrina ug mga Pakigsaad 77:8.

  22. Doktrina ug mga Pakigsaad 77:9.

  23. Harold W. Attridge and others, eds., The HarperCollins Study Bible: New Revised Standard Version, Including the Apocryphal/Deuterocanonical Books (2006), 2096, pahinumdom alang sa Pinadayag 7:2.

  24. Draper and Rhodes, The Revelation of John the Apostle, 287. Tan-awa usab sa Pinadayag 9:4.

  25. G. K. Beale, ingon nga gikutlosa Draper and Rhodes, The Revelation of John the Apostle, 287.

  26. Joseph Smith, in History, 1838–1856 (Manuscript History of the Church), volume E-1, 1690, josephsmithpapers.org; punctuation gimoderno.

  27. Doktrina ug mga Pakigsaad 77:11.

  28. Ang gidaghanon niadtong gitawag sa pagserbisyo diha sa kataposang mga adlaw,144,000, usa ka matulon-anon. Ingon nga gisulat, sila halangdon nga mga pari gitawag isip mga misyonaryo sa kataposang mga adlaw. Ang mensahe, hinoon, dili diha sa gidaghanon, kay usab ang gidaghanon dili kinahanglang hunahunaon sa literal nga paagi, apan diha sa kalidad. Ang napulog duha nagrepresentar sa pagkapari. Ang pagpilopilo sa numero sa iyang kaugalingon makadugang sa pagkahingpit (sama sa pagpilopilo niini og kapito). Busa, ang gidaghanon nagpasabut sa kalidad sa pagkapari nga gihuptan niadtong kinsa mga sulugoon sa Dios diha sa kataposang mga adlaw” (Richard D. Draper, “Understanding Images and Symbols in the Book of Revelation,” sa Shedding Light on the New Testament: Acts–Revelation, ed. Ray L. Huntington and others [2009], 275–76).

  29. Tan-awa sa Robert L. Millet, “The Second Coming of Christ: Questions and Answers,” sa Sperry Symposium Classics: The Doctrine and Covenants, ed. Craig K. Manscill (2004), 214–15).

  30. Tan-awa sa Doktrina ug mga Pakigsaad 76:54–70; 93:20–22.

  31. Tan-awa sa Joseph Smith, “Discourse, 12 May 1844, as Reported by Thomas Bullock,” 2, josephsmithpapers.org.

  32. Tan-awa sa Pinadayag 7:15–17. Tan-awa usab sa Ronald A. Rasband, “Hosanna ngadto sa Labing Halangdon nga Dios,” Liahona, Mayo 2023, 111.

  33. Tan-awa sa Mateo 21:8–9; Juan 12:12–13.

  34. Tan-awa sa Levitico 23:40; Doktrina ug mga Pakigsaad 109:76.

  35. Pinadayag 7:14. Tan-awa usab sa Alma 5:21; 13:11–12; 3 Nephi 27:19.

  36. Tan-awa sa Doktrina ug mga Pakigsaad 88:89–95.

  37. Doktrina ug mga Pakigsaad 77:12. Tan-awa usab sa Doktrina ug mga Pakigsaad 88:94, 99–106.

  38. Tan-awa sa Alonzo L. Gaskill, The Lost Language of Symbolism: An Essential Guide for Recognizing and Interpreting Symbols of the Gospel (2003), 124.

  39. Terry B. Ball, “Plants in the New Testament,” sa New Testament History, Culture, and Society: A Background to the Texts of the New Testament, ed. Lincoln H. Blumell (2019), 636.

  40. Draper and Rhodes, The Revelation of John the Apostle, 334.

  41. Joseph Smith Translation, Revelation 9:1 (sa Pinadayag 9:1, footnote a).

  42. Tan-awa sa Pinadayag 20:1–3; Doktrina ug mga Pakigsaad 43:29–33.

  43. Draper and Rhodes, The Revelation of John the Apostle, 338.

  44. Pinadayag 9:4.

  45. Tan-awa usab sa 1 Nephi 22:17–19; Doktrina ug mga Pakigsaad 115:5–6.

  46. Mga Pagtulun-an sa mga Presidente sa Simbahan: Joseph Smith (2007), 304.

  47. Draper and Rhodes, The Revelation of John the Apostle, 252.

  48. Bruce R. McConkie, The Millennial Messiah: The Second Coming of the Son of Man (1982), 453.

  49. Doktrina ug mga Pakigsaad 77:14.

  50. Tan-awa sa Attridge and others, The HarperCollins Study Bible, 2100, mubong sulat alang sa Pinadayag 10:9–10.

  51. Pinadayag 10:10.

  52. Pinadayag 11:2.

  53. Pinadayag 11:3.

  54. Pinadayag 11:9.

  55. Tan-awa sa Daniel 7:24–25; 12:7; Lucas 4:25; Pinadayag 12:14; 13:5.

  56. Tan-awa sa Gaskill, “The Lost Language of Symbolism,” 117–19.

  57. Doktrina ug mga Pakigsaad 87:6.

  58. Tan-awa sa Giya ngadto sa mga Kasulatan, “Gingharian sa Dios o Gingharian sa Langit,”Librarya sa Ebanghelyo.

  59. Topics and Questions, “War in Heaven,”War in Heaven.

  60. Russell M. Nelson, “The Canker of Contention,” Ensign, Mayo 1989, 69.

  61. Dale G. Renlund, “Magpili Kamo Niining Adlawa,” Liahona, Nob. 2018, 105.