“Mga Hebreohanon 1–6,” Mga Tabang sa Kasulatan: Bag-ong Tugon (2024)
Mga Tabang sa Kasulatan
Mga Hebreohanon 1–6
Si Jesukristo Anak sa Dios, ang “manununod sa tanang butang.” Siya ang Tiglalang ug naglingkod sa tuo nga kamot sa Dios. Si Jesukristo mas labaw kay sa mga anghel ug sa tanang mga propeta, lakip ni Moises Ang karaang Israel napakyas sa pagsulod ngadto sa kapahulayan sa Ginoo tungod kay gipagahi nila ang ilang mga kasingkasing batok ni Jesuklristo. Isip ang gamhanang Halangdon nga Pari, si Jesus labaw sa tanang Mosaic nga halangdong mga pari. Siya ang tuboran sa dayong kaluwasan ngadto sa tanan kinsa mosunod Kaniya. Giawhag ang mga Santos sa paglahutay diha sa hugot nga pagtuo sama ni Abraham pinaagi sa pagbaton og paglaom sa gisaad nga mga panalangin.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Kaagi ug Kinatibuk-ang Kahulogan
Ngadto kang kinsa ang mga Hebreohanon nga basahon gisulat ug ngano?
Nagsinati og nagkalainlaing mga kasakit, daghang Judeo nga mga Kristiyanos ang mibiya sa Simbahan ug mibalik ngadto sa kanhing Judeo nga pagsimba diha sa sinagoga. Ang mga Hebreohanong basahon nag-awhag sa mga kinabig nga Judeo sa pagpabilin nga matinud-anon ngadto ni Jesukristo ug sa dili pagbalik ngadto sa ilang kanhi nga paagi sa kinabuhi.
Ang mga Hebreohanon nga basahon sama sa usa ka gilugway nga sermon nga nagpunting ngadto ni Jesukristo pinaagi sa pagbalik-balik nga mga paghangyo sa mga pagtulon-an sa Daang Tugon. Ang basahon adunay tulo ka dagko nga mga seksiyon sa pag-awhag sa mga kinabig sa paglahutay diha ni Jesukristo:
Kini nga sulat nanghimatuod nga si Jesukristo ug ang Iyang ebanghelyo nagpuli sa balaod ni Moises. Kini nagpasabot usab nga ang balaod ni Moises natuman ni Jesukristo.
Ang pipila ka mga eskolar nakapangutana kon gisulat ba ni Pablo ang mga Hebreohanon, tungod kay walay tigsulat nga ginganlan diha sa basahon ug ang istilo sa pagsulat lahi gikan sa ubang mga sulat ni Pablo. Hinoon, tungod kay ang mga ideya nga gipahayag diha sa mga Hebreohanon mauyunon sa ubang mga pagtulon-an ni Pablo, ang mga Santos sa Ulahing mga Adlaw, sa pagpadayon sa tradisyong Kristiyano, sa kinatibuk-an midawat nga si Pablo sa labing minos apil sa pagsulat niini nga [epistola].”
Dili klaro kon kanus-a ang mga Hebreohanong basahon nasulat. Sukad kaniadto ang basahon kanunay nga nagpasabot ngadto sa templo diha sa panahon sa berbo [present tense], kini gipakaingon nga gisulat sa wala pa ang AD 70, sa dihang ang templo giguba sa mga Romano. Ang dapit diin ang mga Hebreohanon gisulat wala mahibaloi.
Mga Hebreohanon 1:3
Unsa ang buot ipasabot nga si Jesukristo mao ang tukma nga hulad sa kinaiya sa Iyang Amahan?
Ang pulong nga “tukma nga hulad” nagagikan sa paghubad sa usa ka Gresyanhon nga pulong nga nagkahulogan og usa ka butang nga “takdo nga panig-ingnan o pahayag.” Gitudlo ni Presidente Dallin H. Oaks, “Ang Biblia naglangkob og apostolikanhong saksi nga si Jesus “tukma nga hulad” sa kinaiya sa Iyang Amahan (Mga Hebreohanon 1:3), nga nagpatin-aw lamang sa kaugalingong pagtulon-an ni Jesus nga ‘ang nakakita kanako nakakita sa Amahan’ (Juan 14:9).”
Mga Hebreohanon 1:4–14; 2:1–10
Nganong si Jesukristo gitandi ngadto sa mga anghel?
Kasagaran sa mga Judeo mituo nga ang “mga anghel mga gihimaya nga mga binuhat.” Pipila sa mga lider nga Judeo gani mitan-aw sa mga anghel uban ang mas dako nga sagradong pagtahod kay sa Mesiyas. Usa ka eskolar sa Biblia nakamatikod, “Uban sa ilang hugot nga pagtuo diha ni Jesukristo ug sa iyang mga anghel, [mga nakabig nga Judeo] sa dayag midawat ni Kristo ngadto sa ilang sistema sa relihiyon isip usa ka bahin apan dili ang sentro.” Sa pagkorihir niining sayop nga pagsabot, gikutlo ni Pablo gikan sa Daang Tugon sa pagpakita nga si Jesukristo labaw sa tanang mga anghel.
Mga Hebreohanon 2:16
Kinsa ang gihunahuna nga kaliwat ni Abraham?
“Ang kaliwat ni Abraham” wala lamang magpasabot sa literal nga mga kaliwat ni Abraham apan usab ngadto sa tanan nga modawat sa pakigsaad sa ebanghelyo walay pagsapayan sa kagikan. Kon ang usa ka tawo nakabig ngadto sa ebanghelyo ni Jesukristo ug nabunyagan, sila mahimong usa ka miyembro sa pamilya sa pakigsaad.
Mga Hebreohanon 2:18
Unsaon ni Jesukristo paghimo nga makatabang kanato kon kita gitintal?
Ang pulong boētheō gihubad isip pagtabang sa nanginahanglan diha sa King James Version of the Bible ug nagkahulogan sa “pagtabang; pagluwas; motabang sa.” Si Presidente Dallin H. Oaks mitudlo: “Ang atong Manluluwas mibati ug nasayod sa atong mga tentasyon, sa atong mga panlimbasog, sa atong mga kasakit, ug sa atong mga pag-antos, tungod kay Siya andam nga misinati niining tanan isip kabahin sa Iyang Pag-ula. … Ang tanan kinsa nag-antos sa bisan unsa nga matang sa mortal nga kaluyahon kinahanglang mahinumdom nga nasinati sa atong Manluluwas kana nga matang sa sakit usab, ug nga pinaagi sa Iyang Pag-ula, Siya nagtanyag sa matag usa kanato sa kalig-on sa pagpas-an niini.”
Mga Hebreohanon 3:7–19; 4:1–16
Unsay kahulogan sa mosulod ngadto sa kapahulayan sa Ginoo?
Naggamit sa Salmo 95:7–11, gitubag ni Pablo ang pagkadili masulundon ug pagkawalay pagtuo sa karaang Israel. Isip tubag sa ilang rebelyon, wala mosulod ang Israel ngadto sa gisaad nga yuta sa Canaan, o ang simbolikanhong kapahulayan sa Ginoo, nga gisimbolo pinaagi sa yuta sa Canaan. Giawhag ni Pablo ang mga Santos nga Judeo sa paglikay sa pagkawalay pagtuo ug sa pagkagahi sa kasingkasing sa karaang Israel aron sila makasulod sa kapahulayan sa Ginoo.
Mitudlo si Presidente Joseph F.Smith: “Ang karaang mga propeta namulong kabahin sa ‘pagsulod ngadto sa kapahulayan sa Dios’ [tan-awa sa Alma 12:34; Doktrina ug mga Pakigsaad 84:23–24]; unsay kahulogan niini? Sa akong hunahuna, kini nagkahulogan sa pagsulod ngadto sa kahibalo ug gugma sa Dios, pagbaton og hugot nga pagtuo diha sa iyang katuyoan ug sa iyang plano, sa ingon ka gidak-on nga kita nahibalo nga kita husto, ug nga wala kita mangita alang sa lain pang butang, wala kita igaliyokliyok sa matag hangin sa tuluohan, o pinaagi sa lipatlipat sa mga tawo nga batid sa pagmugnag kasaypanan. … Ang tawo kinsa nakaabot niana nga ang-ang sa hugot nga pagtuo diha sa Dios nga ang tanang pagduhaduha ug kahadlok gipalayo gikan kaniya, siya nakasulod ngadto sa ‘kapahulayan sa Dios.’”
Busa, pinaagi ni Jesukristo kita makasinati og kapahulayan dinhi niini nga kinabuhi ug sa sunod.
Mga Hebreohanon 4:14–16
Nganong gidapit kita sa pagduol uban ang pagsalig ngadto sa trono sa grasya?
Sa biblikanhong mga panahon, ang halangdong pari moagi pinaagi sa tabil sa templo ug mosulod sa Balaan sa Tanang Balaan sa Adlaw sa Pagtabon sa Sala [Adlaw sa Pag-ula]. Ang halangdong pari usa ka pagkasama ni Jesukristo, ang atong gamhanang Halangdong Pari. Sama sa halangdong pari nga nagsulod sa Balaan sa Tanang Balaan, si Jesukristo misulod sa langit ug karon naglingkod “sa tuo sa Halangdon” nga Dios.
Isip atong gamhanang Halangdong Pari, si Jesukristo adunay kalooy alang sa atong mga kahuyang tungod kay Siya “gitintal ingon kanato, hinoon wala makasala.” Ang Gresyanhon nga hubad sa gitintal nagkahulogan usab og pagasulayan. Mitudlo si Elder Ulisses Soares: “Ako mopaniguro kaninyo nga si Kristo nakahibalo kanunay sa mga kalisod nga atong nasinati dinhi sa pagka-mortal. Siya nakasabot sa tanan nga kapait, paghingutas, ug pisikal nga kasakit ingon man usab sa emosyonal ug espirituwal nga mga hagit nga atong giatubang. Ang kasingkasing sa Manluluwas napuno sa kaluoy, ug Siya andam kanunay sa pagtabang kanato. Posible kini tungod kay Siya personal nga nakasinati ug midala sa Iyang Kaugalingon diha sa unod sa kasakit sa atong mga kahuyang ug mga kakulangan.”
Napuno sa kalooy alang kanato, si Jesukristo nagdapit kanato sa “pagduol uban ang pagsalig ngadto sa trono sa grasya.” Ang Gresyanhon nga pulong gihubad isip “duol ngadto” diha sa King James Bible mahimo usab nga hubaron isip “duol” o “paduol.” Nahibalo kon unsay nabuhat ni Jesukristo kanato, kita makadawat sa Iyang pagdapit ug moduol ngadto Kaniya uban ang pagsalig. Si Elder Dale G. Renlund mitudlo, “Dinhi sa mortalidad, kita ‘uban sa pagsalig makaduol’ sa Manluluwas ug makadawat og kalooy, pagkaayo, ug panabang … sa yano, ordinaryo, ug sa makahuloganong mga paagi.”
Mga Hebreohanon 5:1–6, 10
Sa unsa nga paagi si Aaron gitawag sa Dios?
Sa Mga Hebreohanon 5:4–6, 10, namatikdan ni Pablo nga si Jesukristo midawat sa iyang awtoridad gikan sa Dios nga Amahan, sama lamang nga si Aaron ug ang ubang karaan nga halangdong mga pari gitawag sa Dios. Nadawat nila ang ilang pagkapari pinaagi sa tukma nga awtoridad.
Si Propeta Joseph Smith mitudlo: “Kita nagtuo nga walay tawo nga makapangalagad sa kaluwasan pinaagi sa ebanghelyo, ngadto sa mga kalag sa mga tawo, sa pangalan ni Jesukristo, gawas kon siya gitugutan gikan sa Dios, pinaagi sa pagpadayag, o pinaagi sa pag-orden sa usa ka tawo nga gipadala sa Dios pinaagi sa pagpadayag. … Ug ako mangutana, giunsa pagtawag si Aaron, pinaagi sa pagpadayag?”
Ang tawag ni Aaron nagagikan sa Dios pinaagi sa pagpadayag ngadto kang Moises: “Ug dad-on mo duol kanimo si Aaron nga imong igsoon … aron siya magaalagad kanako sa katungdanan sa pagka-sacerdote.” Kining sama nga sumbanan makaplagan diha sa Daan ug sa Bag-ong mga Tugon. Sa pag-orden sa pagkapari gitudlo ni Elder David A. Bednar: “Kita nagtuo nga ang usa ka tawo kinahanglan gayud pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini” [Mga Artikulo sa Hugot nga Pagtuo 1:5]. Busa, ang usa ka batang lalaki o usa ka hamtong nga lalaki nagdawat sa awtoridad sa pagkapari ug i-orden ngadto sa usa ka piho nga katungdanan pinaagi sa usa ka tawo kinsa naghupot na sa pagkapari ug gihatagan og awtoridad sa usa ka lider uban sa gikinahanglan nga mga yawe sa pagkapari.”
Mga Hebreohanon 5:6–8
Unsay atong makat-unan mahitungod ni Jesukristo gikan sa Melchizedek?
Elder Bruce R. McConkie mipasabot nga ang mga bersikulo 6–8 diha sa Mga Hebreohanon 5 “naggamit ngadto sa Melchizedek ug ngadto ni Kristo, tungod kay ang Melchizedek kaniadto usa ka modelo ni Kristo ug nga kanang pagpangalagad sa propeta naghulagway ug nagpakita nang daan niana nga sa atong Ginoo sa samang paagi ang pangalagad ni Moises nahimo (Deuteronomio 18:15–19; Mga Buhat 3:22–23; 3 Nephi 20:23; [Joseph Smith—Kasaysayan] 1:40). Busa, bisan og ang mga pulong niini nga mga bersikulo, ug ilabi na niadtong diha sa bersikulo 7, may orihinal nga magamit ngadto ni Melchizedek, kini magamit usab sa sama ug tingali sa mas labaw pa nga pwersa ngadto sa kinabuhi ug pagpangalagad kaniya pinaagi kang kinsa ang tanang mga saad nga gihimo ngadto ni Melchizedek natuman”.
Mga Hebreohanon 6:1–3
Unsa nga mga baroganan ang kinahanglan nga atong huptan aron kita makakab-ot og kahingpitan?
Ang Hubad ni Joseph Smith sa Mga Hebreohanon 6:1 nagklaro sa bersikulo ingon sa mosunod: “Busa sa walay pagbiya sa mga baroganan sa doktrina ni Kristo, himoon nato ang pag-adto ngadto sa kahingpitan.” Ang mga Santos nga gihisgotan diha sa basahon sa mga Hebreohanon nakadawat na sa unang mga baroganan, mga ordinansa, ug mga doktrina sa ebanghelyo (lakip ang hugot nga pagtuo diha ni Jesukristo, paghinulsol, bunyag, ug ang pagpandong sa mga kamot alang sa gasa sa Espiritu Santo). Sila dili mobiya niadto nga mga baroganan apan kinahanglang mopadayon sa pagtubo ngadto sa espirituhanong pagkahamtong.
Mga Hebreohanon 6:4–6
Unsay kahulogan sa “paglansang … pag-usab sa Anak sa Dios”?
Mipasabot si Elder Bruce R. McConkie: “Ang pagbuhat sa dili mapasaylo nga sala naglangkob sa paglansang pag-usab sa Anak sa Dios ug sa pagpakaulaw kaniya sa dayag (Mga Hebreohanon 6:4–8; Doktrina ug mga Pakigsaad 76:34–35). Ang pagbuhat niining dili mapasaylo nga krimen kinahanglan nadawat gayod sa usa ka tawo ang ebanghelyo, miangkon gikan sa Espiritu Santo pinaagi sa pagpadayag sa hingpit nga kahibalo sa pagkabalaan ni Kristo, ug dayon milimod sa ‘bag-o ug walay kataposan nga pakigsaad pinaagi diin siya gibalaan, nagtawag niini nga dili balaan nga butang, ug nagbuhat bisan sa Espiritu sa grasya’[History of the Church, 3:232]. Sa ingon siya naghimo og pagpatay pinaagi sa pag-uyon sa kamatayon sa Ginoo, nga mao, nagbaton og hingpit nga kahibalo sa kamatuoran siya dayag nga misukol ug gibutang ang iyang kaugalingon sa kahimtang diin iya untang malansang si Kristo nahibalo sa hingpit nianang panahona nga siya mao ang Anak sa Dios. Busa si Kristo gilansang pag-usab ug gipakaulawan sa dayag (Doktrina ug mga Pakigsaad 132:27).”
Mga Hebreohanon 6:13–20
Unsay atong nahibaloan mahitungod sa mga saad sa Diios?
Mipahayag si Pablo nga sa dihang ang Dios mihimo og mga saad ngadto ni Abraham, Siya “nanumpa sa iyang kaugalingon.” Sa karaang mga panahon, ang pagpanumpa inubanan sa usa ka panumpa usa ka pormal nga bahin sa relihiyusong kinabuhi. Tungod kay imposible alang sa Dios ang pagpamakak, makabaton kita og pagsalig diha sa Iyang mga saad. Kini nagdala og paglaom ug nagsilbe isip “usa ka malig-on nga sinipit sa kalag.”
Pagkat-on pa og Dugang
Ang Pulong sa Dios
-
“A Two-Edged Sword,” Ensign, Feb. 2017, 72–73
Kapahulayan sa Ginoo
-
Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 95–98
Binhi ni Abraham
-
Russell M. Nelson, “Ang Walay Kataposan nga Pakigsaad,” Liahona, Okt. 2022, 4–11
Trono sa Grasya
-
Jeffrey R. Holland, “Bisan kon Di Mapahayag sa Dughan Mosanag,” Liahona, Mayo 2024, 7–9
-
Jörg Klebingat, “Masaligon nga Moduol sa Trono sa Dios,” Liahona, Nob. 2014, 34–37
Media
Mga Imahe
The Garden of Gethsemane [Ang Tanaman sa Getsemani], ni William Henry Margetson