“Mga Hebreohanon 7–13,” Mga Tabang sa Kasulatan: Bag-ong Tugon (2024)
Mga Tabang sa Kasulatan
Mga Hebreohanon 7–13
Sama sa Mga Hebreohanon 1–6, kini nga mga kapitulo naghatag og gibug-aton sa nag-unang tahas ni Jesukristo diha sa plano sa kaluwasan. Ang mga kapitulo nagtunong sa pagkalabing labaw sa pagkapari sa Manluluwas, sa maulaong sakripisyo, ug sa pangalagad. Gitudlo ni Pablo nga ang karaang tabernakulo, mga ordinansa sa balaod ni Moises, ug ang mga pagsakripisyo og hayop nagpunting ngadto ni Jesukristo ug sa Iyang Pag-ula. Sa pag-awhag sa mga Santos sa pagpabilin nga matinud-anon, milakip si Pablo og mga ehemplo sa mga lalaki ug mga babaye kinsa mipakita og dakong hugot nga pagtuo. Mitudlo usab Siya nga ang Dios mao ang Amahan sa atong mga espiritu ug nagpanton kanato aron kita makahimo nga balaan. Mihatag si Pablo og tambag kabahin sa mga relasyon sa kaminyoon ug sa pagpaluyo niadtong gitawag sa pagpangulo.
Mga Kapangohaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Kaagi ug Kinatibuk-ang Kahulogan
Mga Hebreohanon 7:1–2
Kinsa si Melchizedek?
Si Melchizedek usa ka bantugan nga halangdon nga pari, propeta, ug hari diha sa Daang Tugon. Buhi siya sa panahon ni propeta Abraham. Siya gipasabot isip “ang hari sa Salem … , hari sa kadaitan, hari sa katarungan … , ug pari sa labing halangdong Dios.” Midawat usab si Melchizedek og mga ikapulo gikan ni Abraham. Sa usa ka pagpadayag nga gihatag ngadto ni Jodeph Smith, mipadayag ang Ginoo nga gitugyan ni Melchizedek ang pagkapari diha ni Abraham.
Mga Hebreohanon 7:3
Si Melchizedek ba imortal ug walay mga ginikanan?
Giklaro ni Propeta Joseph Smith nga ang mga paghulagway sa imortalidad ug sa pagkawalay ginikanan dili magamit ngadto sa kaugalingon mismo ni Melchizedek. Kining Melchizedek nga Pagkapari mao ang “walay amahan [ug] walay inahan.” Gitudlo usab ni Joseph Smith nga ang Melchizedek nga Pagkapari mao ang “diha uban sa Dios gikan sa kahangturan, ug hangtod sa kahangturan, nga walay sinugdanan sa mga panahon o kataposan sa mga katuigan.”
Mga Hebreohanon 7:20–21
Unsa ang kahulogan nga ang Melcizedek nga Pagkapari itugyan uban ang panumpa?
“Ang Melchizedek nga Pagkapari mao ang mas taas o mas halangdon nga pagkapari.” Gipasabot ni Pablo nga ang Aaronic nga Pagkapari itugyan nga walay panumpa, apan ang Melchizedek nga Pagkapari itugyan uban ang panumpa. Gitudlo ni Elder Dale G. Renlund: “Sa matag tawo kinsa nakadawat sa Melchizedek nga Pagkapari, ang Dios nanghimatuod sa Iyang pakigsaad nga mga saad uban sa usa ka panumpa. Kini nga panumpa may kalabotan lamang sa Melchizedek nga Pagkapari, ug ang Dios mao ang mihimo sa panumpa, dili ang tighupot sa pagkapari. Tungod kay kining talagsaon nga sitwasyon naglakip sa Iyang balaang gahom ug awtoridad, ang Dios migamit og usa ka panumpa, migamit sa labing kusganong pinulongan nga Siya makahimo, aron sa pagpasalig kanato sa mahinungdanon ug walay kausabang kinaiya sa Iyang mga saad.”
Ang gipahiuli nga kasulatan nagtudlo nga ang Aaronic nga Pagkapari maoy “usa ka sumpay sa mas labaw, o sa Melchizedek nga Pagkapari.” Ang Ginoo mipahayag nga “kadtong tanan kinsa modawat sa [Melchizedek] nga pagkapari, makadawat niini nga panumpa ug pakigsaad sa akong [Langitnong] Amahan.” Pinaagi sa mga ordinansa sa Melchizedek nga Pagkapari, si Jesukristo naghimo sa mga panalangin sa kahimayaan nga posible ngadto sa mga anak sa Dios.
Mga Hebreohanon 9
Unsa ang gibuhat sa halangdong pari sa Adlaw sa Pagtabon sa Sala [Adlaw sa Pag-ula]?
Ang tabernakulo usa ka gamay nga templo nga madaladala nga gigamit sa karaang Israel hangtod ilang natukod ang templo ni Solomon. Ang tabernakulo usa ka gamay nga templo nga madaladala nga gigamit sa karaang Israel hangtod ilang natukod ang templo ni Solomon. Kausa sa usa ka tuig, sa Adlaw sa Pagtabon sa Sala (Yom Kippur), ang halangdong pari moagi sa tabil sa templo ug mosulod sa Labing Balaan nga Dapit, nga gitawag usab og Balaan sa Tanang Balaan, nga nagrepresentar sa presensya sa Dios.
Ang Tabernakulo sa Daang Tugon
Sa dili pa mosulod sa Balaan sa Tanang Balaan, ang pari mipahigayon og pipila ka mga sakripisyo sa hayop. Isablig niya ang dugo sa mga hayop sa linain nga mga dapit diha sa Balaan sa Tanang Balaan isip usa ka halad sa pagtabon sa mga sala sa Israel. Niana sa simbolikanhong paagi iyang gibalhin ang mga sala sa katawhan ngadto sa usa ka laki nga kanding, nga gitawag og dakdakanan sa sala. Kini nga kanding ipadala ngadto sa kamingawan. Sa kataposan, ihalad sa pari ang sinunog nga mga halad nga duha ka laking karnero, usab alang sa iyang kaugalingon ug sa iyang katawhan. Kini nga mga sakripisyo ug mga seremonyas diha sa Adlaw sa Pagtabon sa Sala gituyo sa pagsimbolo ug pagtagna daan sa Pag-ula sa Manluluwas.
Mga Hebreohanon 9–10
Sa unsang paagi ang paghalad ni Jesukristo lahi gikan sa uban nga mga paghalad sa halangdong mga pari?
Ang karaang halangdong mga pari mihalad og mga kanding o mga karnero isip usa ka sakripisyo; ang Kordero sa Dios boluntaryo nga mihalad sa Iyang Kaugalingon isip usa ka sakripisyo. Ang halangdong mga pari mihalad og mga sakripisyo matag tuig diha sa Adlaw sa Pagtabon sa Sala; si Jesukristo mihimo sa Iyang sakripisyo og kausa lamang. Si Jesus mao ang atong Halangdong Pari sa paghimo sa sakripisyo ug ang halad gayod mismo sa kaugalingon. Ang karaan nga halangdong mga pari misulod sa Balaan sa Tanang Balaan sa yuta ug gisablig ang dugo sa kanding diha sa halaran sa pagpasig-uli alang sa mga sala sa Israel. Tungod sa Iyang maulaong sakripisyo, si Jesukristo isip ang Tigpataliwala nagsulod sa santuwaryo sa langit sa presensya sa Langitnong Amahan alang sa tanan niadtong kinsa naghinulsol.
Gitudlo ni Presidente Russell M. Nelson nga ang kang “[Jesukristo] nga Pag-ula walay kinutoban—walay kataposan. Kadto usab walay kinutoban tungod nga ang tanang katawhan maluwas gikan sa walay kataposan nga kamatayon. Kadto walay kinutoban kon hisgotan ang Iyang hilabihan nga pag-antos. Kadto walay kinutoban sa panahon, nagbutang og kataposan ngadto sa nag-unang sundanan sa pagsakripisyo og hayop. Kadto walay kinutoban sa gidak-on—kinahanglan kadtong pagahimoon sa kataposan ug wala na.”
Mga Hebreohanon 10:19–20
Sa unsang paagi ang tabil simbolikanhon ni Jesukristo?
Ang tabil sa templo nagrepresentar sa “panagbulag tali sa Dios ug sa tawo.” Sa karaan, ang halangdong pari moagi sa tabil diha sa Adlaw sa Pagtabon sa Sala (tan-awa sa “Mga Hebreohanon 9. Unsa ang gibuhat sa halangdong pari sa Adlaw sa Pagtabon sa Sala [Adlaw sa Pag-ula]?”). Kini nga nagsimbolo sa pagsulod sa presensya sa Dios. Gitudlo ni Pablo nga ang tabil nagrepresentar sa lawas ni Jesukristo. Kini pinaagi sa sakripisyo ni Kristo nga kita makahimo sa pagsulod ngadto sa presensya sa Dios.
Ingon lamang nga ang tabil sa templo mihatag sa halangdong pari og agianan ngadto sa Balaan sa Tanang Balaan, ang Pag-ula ni Jesukristo naghatag kanato og agianan ngadto sa presensya sa Dios.
Mga Hebreohanon 12:2
Unsa nga kaulaw ang gilahutay ni Jesukristo nga mahimong mag-uugmad ug maghihingpit sa atong hugot nga pagtuo?
Usa ka eskolar misulat, “Ang Paglansang sa Krus usa ka walay kalooy ug masakit nga matang sa pagpatay nga gigamit sa karaan, ug diha sa kultura sa Bag-ong Tugon nga kalibotan kini makauulaw ug makapaubos sa dungog nga paagi sa pagkamatay.” Pipila sa unang mga Kristiyanos ingon og nakigbisog uban sa ideya nga si Jesukristo, ang anak sa Dios, namatay sa ingon nga makauulaw nga paagi. Dugang pa, gisaway ug gibiaybiay sa mga pagano ang mga Kristiyanos tungod sa pagsimba sa usa ka Dios kinsa namatay pinaagi sa paglansang sa krus. Gipasabot ni Pablo nga gilahutay ni Jesukristo ang kaulaw sa Paglansang diha sa Krus aron mahimong mag-uugmad ug maghihingpit sa atong hugot nga pagtuo.
Gitudlo usab ni Pablo nga ang Manluluwas milahutay sa kaulaw sa krus “alang ug tungod sa … hingpit nga kalipay.” Gitudlo ni Presidente Russell M. Nelson: “Si Jesukristo mao ang atong labing halangdon nga ehemplo, ‘kinsa tungod sa hingpit nga kalipay nga gibutang sa iyang atubangan miantos sa krus’ [Mga Hebreohanon 12:2]. Hunahunaa kana! Aron Iyang malahutay ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa hingpit nga kalipay!
“Ug unsa man ang hingpit nga kalipay nga gibutang diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug takus—aron nga mopuyo uban sa atong Langitnong mga Ginikanan ug mga pamilya.”
Mga Hebreohanon 12:5
Unsay ang kahulogan sa pagpanton?
Ang Gresyanhon nga pulong paideia gihubad isip “pagpanton” diha sa King James Version of the Bible ug “disiplina” sa ubang mga paghubad. Paideia nagpasabot og “pagbansay, pag-amuma sa mga bata, pagpadako, edukasyon.” Ang sukaranang ideya mao “ang tibuok nga pagbansay ug edukasyon sa mga bata … panudlo nga nagtumong diha sa pagtubo sa mga hiyas.”
Mga Hebreohanon 12:22–23
Unsa ang mga Bukid sa Zion ug ang Simbahan sa Unang Natawo?
Ang pakisayran sa kalayo, bagyo, ug sa usa ka trumpeta diha sa Mga Hebreohanon 12:18–19 usa ka pasumbingay ngadto sa presensya sa Dios diha sa Bukid sa Sinai sa dihang ang Dios mipaila sa balaod ni Moises. Kining makapatingala nga makadasig nga kasinatian mao ang pasiuna. Ang mga tumutuo gikinahanglang motan-aw ngadto sa ubang bukid, Bukid sa Zion, alang sa mas dako nga himaya. Diha sa basahon sa mga Hebreohanon, ang Bukid sa Zion nagpasabot ngadto sa langitnong siyudad sa Dios. Dinhi niini nga siyudad nagpuyo “ang kinatibuk-ang katinguban ug simbahan sa unang natawo.”
Naghisgot sa Simbahan sa Unang Natawo, mipadayag si Jesukristo, “Ako diha na sa sinugdanan uban sa Amahan, ug ako mao ang Unang Natawo; ug kadtong tanan kinsa gipanamkon pinaagi kanako mga mag-aambit sa sama nga himaya, ug mao ang simbahan sa Unang Natawo.” Kadtong kinsa nakadawat sa himaya sa Unang Natawo nagpahimulos sa kahingpitan sa Amahan.” Kini nga kahingpitan mao ang saad “sa kinabuhi nga dayon, gani ang himaya sa celestial nga gingharian, diin nga himaya mao kanang simbahan sa Unang Natawo, gani sa Dios, ang labing balaan sa tanan, pinaagi ni Jesukristo iyang Anak.”
Mga Hebreohanon 12:29
Sa unsang paagi ang Dios usa ka kalayo nga nagaut-ot?
Usa ka eskolar misulat: “Ngadto sa karaang Israel, usa sa importante nga mga bahin sa Dios mao ang Iyang abilidad sa pagpakita sa Iyang gahom pinaagi sa pagpakita sa nagdilaab nga kalayo. Sa tinuod, mibarog ang Israel nga natingala sa pagpakita sa usa ka kahayag sama sa usa ka lumalamoy nga impyerno diha sa tumoy sa Sinai (tan-awa sa Exodo 24:17). Si Moises mipahayag, ‘Ang Ginoong imong Dios mao ang kalayo nga nagaut-ot’ (Deuteronomio 4:24).” Kini nga pagpakita sa presensya ug gahom sa Dios nagpukaw og “sagradong pagtahod ug katingala.”
Gipauswag ni Propeta Joseph Smith ang kahulogan niining kalayo nga nagaut-ot ingon sa mosunod: “Ang Dios nga Makagagahum sa iyang kaugalingon nagpuyo sa mahangturong kalayo; unod ug dugo dili makaadto didto, tungod kay ang tanang pagkadaotan pagalamyon sa kalayo. Ang atong Dios maoy usa ka kalayo nga nagaut-ot. Kon ang atong mga lawas buhion pinaagi sa Espiritu, walay dugo diha niini nga tabernakulo. Ang uban nagpuyo diha sa mas taas nga kahimayaan kay sa uban. … Ang pagka-imortal nagpuyo sa walay kataposan nga mga pagsunog.”
Pagkat-on pa og Dugang
Kristo isip ang Gamhanan nga Halangdong Pari
-
David Rolph Seely and Jo Ann H. Seely, “Sacrifice: In Similitude of the Savior” (digital-only article), Liahona, Sept. 2022, Gospel Library
-
Jeffrey R. Holland, “An High Priest of Good Things to Come,” Ensign, Nov. 1999, 36–38
Ang Pagkapari subay sa Laray sa Melchizedek
-
Dale G. Renlund, “Ang Pagkapari ug ang Matubsanong Gahom sa Manluluwas,” Liahona, Nob. 2017, 64–67
Pagsalig
-
Jeffrey R. Holland, “Cast Not Away Therefore Your Confidence,” Ensign, Mar. 2000, 6–11
Hugot nga Pagtuo diha ni Jesukristo
-
Mga Hilisgotan ug mga Pangutana, “Hugot nga Pagtuo diha ni Jesukristo,” Librarya sa Ebanghelyo
Jesukristo: Ang Mag-uugmad ug Maghihingpit sa Atong Hugot nga Pagtuo
-
Camille N. Johnson, “Dapita si Jesus nga Mosulat sa Inyong Sugilanon,” Liahona, Nob. 2021, 80–82
Media
Bidyo
“Substance of Faith” (6:24)
Mga Imahe
Melchizedek Blesses Abraham [Melchizedek Nagpanalangin ni Abraham], ni Walter Rane
The Restoration of the Melchizedek Priesthood [Ang Pagpahiuli sa Melchizedek nga Pagkapari, ni Walter Rane
Sacrifice of a Lamb [Pagsakripisyo sa usa ka Nati nga Karnero], ni Robert T. Barrett
High Priest [Halangdong Pari], ni Phil McKay
Paghulagway sa tabil sa templo nga nagisi diha sa pagkamatay ni Kristo