Mateo 11–12; Lucas 11

Gidayeg sa Manluluwas ang pagkabantogan ni Juan nga Bautista. Siya misaaad sa paghatag og kapahulayan niadtong kinsa moadto Kaniya uban sa ilang bug-at nga mga palas-anon. Giayo ni Jesukristo ang usa ka tawo sa Igpapahulay, ug giakusahan sa mga Pariseo nga mipapahawa sa mga yawa pinaagi sa gahom ni Satanas. Ang Manluluwas mipahimangno mahitungod sa pagpasipala batok sa Espiritu Santo. Siya mihatag og giya sa pag-ampo ug mipamatuod sa Iyang gahom aron sa pagpapahawa sa mga daotang espiritu. Iyang gibuyag ang mga Pariseo ug mga abogado sa pagpakaaron-ingnon.

Mga Kapanguhaan

Background ug Konteksto

Mateo 11:2–6

Nagduha-duha ba si Juan Bautista nga si Jesus mao ang Mesiyas?

Samtang anaa sa prisohanan si Juan Bautista, iyang gipadala ang iyang duha ka disipulo aron mangutana ni Jesus kon Siya ba ang Mesiyas. Si Jesus misulti niini nga mga disipulo nga mobalik ngadto ni Juan ug mopamatuod sa mga milagro nga ilang nasaksihan nga gibuhat sa Manluluwas. Tingali gipadala ni Juan ang iyang mga disipulo aron sila makat-on sa ilang kaugalingon nga si Jesus tinuod nga mao ang Mesiyas. Apan posible usab nga si Juan, bisan pa man sa mga saksi nga iyang nadawat, nagkinahanglan usab og kasegurohan. Bisan paman, gidayeg ni Jesus si Juan nga labaw pa sa propeta.

Mateo 11:7–15

Unsay nakahimo ni Juan Bautista nga usa ka bantogan nga propeta?

Si Propeta Joseph Smith mipasabot nganong gikonsiderar ni Jesus si Juan Bautista nga usa sa labing bantogan nga mga propeta:

“Una. Gisaligan siya sa balaan nga misyon sa pag-andam sa dalan sa Ginoo. Kinsa ang gihatagan sa mao nga pagsalig kaniadto o [ma]sukad? Walay [si bisan kinsa nga] tawo.

“Ikaduha. Gisalig kaniya ang importante nga misyon, ug gikinahanglan gikan kaniya, ang pagbunyag sa Anak sa Tawo. Kinsa ang nakabaton sa dungog sa pagbuhat niana? Kinsa ang nakaangkon og dako nga pribilehiyo ug himaya? …

“Ikatulo. Si Juan, nianang higayona, mao lamang ang legal nga tigdumala sa mga kalihokan sa gingharian diha sa yuta, ug naghupot sa mga yawe sa gahum. … Niining tulo ka mga rason maoy nakapahimo kaniya nga labing bantogan nga propeta nga natawo.”

Mateo 11:14

Sa unsang paagi si Juan Bautista nga usa ka Elias?

Ang mosunod nga mga entry motubag niini nga pangutana: “Lucas 1:17. Unsa ang gipasabot sa ‘espiritu og gahom ni Elias’?” ug “Juan 1:19–28. ‘Si Elias ka ba’?” Ang Hubad ni Joseph Smith sa Mateo 11:15 naghatag usab og dugang nga panabot: “Ug kon imo kining dawaton, sa pagkatinuod, siya mao ang Elias, kinsa mao ang moabot ug moandam sa tanang butang.”

Mateo 11:16–19

Unsa ang gipasabot sa hugpong sa mga pulong nga “mga bata nga naglingkod sa mga baligyaanan, ug nanagsinggit ngadto sa ilang mga kauban”?

Si Jesus mikompara sa mga tawo nga Judeo sa iyang panahon ngadto sa mga bata nga nagdula sa lugar sa merkado. Sa dihang nagpakaaron-ingnon nga nagsaulog sa kasal, ang mga bata mireklamo sa dihang ang ilang kadula dili mosayaw. Sa dihang nagpakaarong-ingnon nga nagpahigayon og lubong, sila mireklamo kon ang mga kadula dili magbangutan. Ang pagkompara nagsugyot nga ang mga tawo sa panahon ni Jesukristo nagtamod sa relihiyon sama sa binata nga dula: Nangita silag sala kang Juan Bautista ug ni Jesukristo sa dili pagsunod sa ilang gihimo nga mga lagda ug mga ekspektasyon. Sila mireklamo nga si Juan estrikto kaayo sa pagpanginabuhi sa iyang relihiyon. Sa dihang si Jesus miabot ug gawasnon nga nakigsandurot sa uban, sila mireklamo nga Siya dili estrikto o balaan.

Mateo 11:28–30

Unsa ang girepresenta sa yugo?

Sa panahon sa Biblia, kasagaran ang mga tawo nagdala og bug-at nga mga butang sa ilang mga abaga. Kini nga mga butang naglakip sa mga tadyaw, mga sinina, mga bato, ug mga karnero. Ang mga tawo mobutang og bug-at kaayo nga mga butang sa mga abaga sa dagkong mga hayop, sama sa baka. Niini nga konteksto, “ang mga abaga nahimong simbolo sa pag-ugmad, mga palas-anon, ug mga responsibilidad.”

Ang yugo sama sa usa ka sandayanan diha sa abaga sa baka. Kini nagbugkos og nagtinabangay aron sila dungang magtrabaho sa pagbira sa mga karga nga dili nila mabira kon mag-inusara. Niini nga konteksto, ang usa ka yugo mao ang simbolo sa relasyon sa pakigsaad nga nagbugkos kanato sa Manluluwas. Ang pagkanayugohan ni Kristo naghimo kanato nga makagamit sa Iyang gahom aron kita dili magsagubang sa mga palas-anon sa kinabuhi nga mag-inusara.

Mateo 12:1–13

Unsa ang gipasabot sa “uyon sa kasugoan ang pagbuhat og maayo sa adlaw nga igpapahulay”?

Tan-awa sa “Marcos 2:23–28. Nganong ang mga escriba ug mga Pariseo misupak ngadto sa mga gibuhat sa mga disipulo diha sa Igpapahulay?”

Mateo 12:24

Kinsa si Beelzebo?

Sa kasulatan, si Beelzebo mao ang gigamit nga titulo alang sa punoan sa mga yawa, o si Satanas.

Mateo 12:29

Unsa ang mensahe nga “usa ka tawong kusgan” nga gigapos?

Niini nga bersikulo, “usa ka tawong kusgan” nagrepresentar sa yawa, ug ang tawo nga naggapos sa tawong kusgan nagrepresentar ni Jesuskristo. Kon ang Manluluwas mopapahawa sa mga yawa, kini nagpakita nga Siya adunay gahom labaw kang Satanas. Si Elder James E. Talmage mipasabot: “Gisulong ni Kristo ang lig-ong kuta ni Satanas, gipalayas ang daotang mga espiritu gikan sa [lawas] sa tawo nga dili niya angayang sudlan; mahimo kaha ni Kristo kini kon wala pa Niya unaha sa pagkontrol ang ‘tawong kusgan,’ ang agalon sa mga yawa, nga si Satanas mismo?”

Mateo 12:31–32, 43–45

Unsa ang “pasipala batok sa Espiritu Santo”?

Ang sala nga “pasipala batok sa Espiritu Santo” nailhan usab ngadto sa mga kasulatan nga “paglimod sa Espiritu Santo” o “sala nga dili mapasaylo.”

Si Propeta Joseph Smith mitudlo: “Unsay buhaton sa tawo aron makahimo og dili mapasaylo nga sala? Kinahanglan gayod nga siya modawat sa Espiritu Santo, mopaabli sa kalangitan ngadto kaniya, ug moila sa Dios, ug dayon nakasala batok Kaniya.” Ang Propeta mipadayon: “Ang tanan nga mga sala mapasaylo, gawas sa sala batok sa Espiritu Santo. Human ang tawo nakasala batok sa Espiritu Santo, walay paghinulsol alang kaniya. Siya kinahanglang mosulti nga ang adlaw wala mosidlak samtang nakita niya kini; siya kinahanglan nga molimod ni Jesukristo bisan og ang kalangitan naabli ngadto kaniya. Ug gikan niaana nga panahon nagsugod sila sa pagkakaaway.”

Ang Hubad ni Joseph Smith nagklaro nga sa mga bersikulo 43–45, ang Manluluwas nagtudlo mahitungod sa sala sa pagpasipala batok sa Espiritu Santo.

Mateo 12:39–40

Unsay sayop sa pagpangita og timailhan?

Sa usa ka okasyon, ang Propeta Joseph Smith mitudlo, “Ang hugot nga pagtuo moabot dili pinaagi sa mga timailhan, apan pinaagi sa pagpaminaw sa pulong sa Dios.”

Ang Ginoo naghatag kanato og pagkompirmar nga ebidensiya sa tanang mga kamatuoran sa ebanghelyo samtang kita molihok uban sa hugot nga pagtuo. Apan kadtong kansang hugot nga pagtuo nakabase sa makita nga ebidensiya sa gahom sa Dios nagtinguha sa pagkawalay pagtuo. Nangita silag ebidensiya nga walay paglihok. Sila nagtinguha sa mga resulta nga mibaliwala sa responsibilidad.

Mateo 12:41–42

Unsay ipasabot sa “mga tawo sa Ninive” ug ang “reyna sa habagatan”?

Ang hugpong sa mga pulong nga “mga tawo sa Ninive” nagpasabot ngadto sa karaang namuyo sa Ninive, kinsa kaaway sa Israel. Si Jonah, usa ka Israelita, mao ang gitawag sa pagsangyaw og paghinulsol ngadto kanila. Ang mga tawo sa Ninive naminaw sa iyang pasidaan ug naghinulsol. Ang “reyna sa habagatan” nagpasabot ngadto sa reyna sa Sheba. Bisan tuod dili siya Israelita, siya adunay dakong respeto alang kang Solomon, ang hari sa Israelita.

Maoy gipasabot sa Manluluwas ang mga tawo sa Nineve ug ang rayna sa Sheba samtang nagbadlong sa mga Pariseo sa pagkapakyas sa pagtuo Kaniya. Si Jesukristo “labaw pa kang Jonas,” o Jonas, ug “labaw pa kang Solomon.” Apan ang mga lider sa Judeo, kinsa kaliwat sa Israelita ug nagtinguha nga masayod pa, midumili sa pagpasidungog ug pagsunod ni Jesukristo.

Lucas 11:5–10

Unsa ang mensahe sa sambingay sa usa ka higala kinsa miabot sa tungang gabii?

Sa una, ang higala sa sambingay midumili sa paghatag sa tawo og tinapay tungod kay lawom nang gabii. Siya ug ang iyang mga anak nangatulog na. Ang dili paghunong sa usa ka tawo sa pagpangayo kaysa ilang pagkahigala ang nakakombinse sa higala nga sa kataposan mibangon ug mihatag kaniya og tinapay.

Ang higala nga giadtoan aron pangayoan og tinapay nagrepresentar sa atong Amahan sa Langit. Ang sambingay nagtudlo nga samtang ang Langitnong Amahan nahigugma kanato, ang atong dili paghunong, matarong, ug matinud-anon nga mga pag-ampo mao nga nag-abli sa pultahan sa langit. Ang Hubad ni Joseph Smith midugang og pasiuna sa sambingay nga nagtabang sa pagpatin-aw niini nga mensahe “Ang imong Langitnong Amahan dili mapakyas sa paghatag nganha kanimo bisan unsa ang imong ipangayo kaniya.”