Mga Tabang sa Kasulatan
Juan 1

“Juan 1,” Mga Tabang sa Kasulatan: Bag-ong Tugon (2024)

Mga Tabang sa Kasulatan

Juan 1

Sa sinugdanan, si Jesukristo kauban sa Amahan. Usa sa mga titulo ni Jesus mao “ang Pulong.” Siya ang kinabuhi ug kahayag sa tanang butang. Pinaagi Kaniya, ang kalibotan ug ang tanang butang gilalang. Ang kaluwasan moabot pinaagi lamang kang Kristo. Si Juan Bautista mibunyag ni Jesus ug sa uban. Ang uban mituo kang Jesukristo ug mipamatuod mahitungod Kaniya.

Mga Kapanguhaan

Background ug Konteksto

Juan 1:1

Ngano nga si Jesukristo gitawag og “ang Pulong”?

Si Apostol Juan mitawag kang Jesukristo og “ang Pulong” sa daghang higayon diha sa Bag-ong Tugon. Ang “Pulong” mao ang Ingles nga hubad sa Griyego nga pulong nga logos. Ang logos nagrepresentar sa gisulti nga mga pulong ug ang mga ideya luyo sa maong mga pulong. Ang logos mao “ang paagi diin ang usa ka tawo makapahayag sa iyang mga hunahuna ngadto sa lain o makagamit sa iyang mga ideya.”

Si Presidente Russell M. Nelson misulat: “[‘Ang Pulong’] mao ang laing ngalan sa Agalon. Kana nga terminolohiya daw katingad-an, pero haom. Mogamit kita og mga pulong sa pagpahayag sa atong ekspresyon ngadto sa uban. Mao nga si Jesus mao ang Pulong, o ekspresyon, sa Iyang Amahan ngadto sa kalibotan.”

Ang Ebanghelyo ni Juan nagpasabot og maayo nga si Jesukristo mao ang sinugo sa Amahan ngadto sa kalibotan. Iyang gipahayag ang mga pulong sa Amahan. Gikan sa ulahing mga adlaw nga pagpadayag atong mabasa, “Sa sinugdanan mao ang Pulong, kay siya mao ang Pulong, gani ang sinugo sa kaluwasan.”

Juan 1:1–2

Ngano nga mahinungdanon nga si Jesukristo “anaa sa sinugdanan uban sa Dios”?

Sa upat ka Ebanghelyo, ang Ebanghelyo ni Juan lang ang nagtudlo bahin sa kinabuhi ni Jesukristo sa wala pa dinhi sa yuta. Ang mga kasulatan sa ulahing mga adlaw nagpamatuod sa kinabuhi ni Jesus sa wala pa dinhi sa yuta. Ang Manluluwas mipadayag ngadto ni Propeta Joseph Smith, “Ako diha na sa sinugdanan uban sa Amahan, ug Ako mao ang Unang Natawo.” Ang basahon ni Abraham naghulagway sa kinabuhi ni Kristo sa wala pa sa yuta isip “sama sa Dios.” Ang basahon ni Moises nagtudlo nga si Jesukristo ang “Hinigugmang Anak, … Hinigugma ug Pinili sukad sa sinugdanan” sa Langitnong Amahan.

Juan 1:3, 10

Unsa ang gipasabot nga ang “tanan nga mga butang gihimo pinaagi kaniya”?

Gikan sa “Ang Buhi nga Kristo: Ang Pagpamatuod sa mga Apostoles” atong nakat-onan nga si Jesus mao “ang Halangdong Jehova sa Daang Tugon, ang Mesiyas sa Bag-ong Tugon. “Ubos sa pagdumala sa Iyang Amahan, Siya mao ang tiglalang sa yuta” (Librarya sa Ebanghelyo). Gikan sa basahon ni Moises atong nakat-onan nga si Jesukristo milalang og “mga kalibotan nga dili maihap,” gani “minilyon nga mga yuta sama niini.”

Juan 1:14, 16–17

Unsa ang buot ipasabot nga si Jesukristo “puno sa grasya ug kamatuoran”?

Ang Griyego nga pulong alang sa “grasya” mao ang charis, nga nagpasabot usab og mahigugmaong-kaayo, maayong kabubut-on, o pabor. Ang grasya mao ang “diosnon nga panabang o kalig-on … gihatag pinaagi sa kalooy ug gugma sa Dios.”

Ang Griyego nga pulong sa “kamatuoran” mao ang alētheia, nga nagpasabot sa pagkakasaligan ug pagkaligdong sa hunahuna ug buhat. Ang Ginoo naghatag og kahulogan sa kamatuoran isip “ang kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabot.” Ang kamatuoran hingpit ug dili maimpluwensyahan sa mga sirkumstansiya. Ang kamatuoran dili mausab, sama nga ang Ginoo dili mausab.

Ang mosunod nga mga tudling sa kasulatan makatabang kanato nga mas masabtan kon sa unsang paagi ang Manluluwas “puno sa grasya ug kamatuoran”: 2 Nephi 2:6–10; Alma 9:26–27; ug Doktrina ug mga Pakigsaad 93:8–17.

Juan 1:18

Ngano nga kini nga bersikulo nag-ingon nga “walay tawo nga nakakita sa Ginoo sa bisan unsa nga higayon”?

Mabasa sa Hubad ni Joseph Smith, “Ug walay tawo nga nakakita sa Ginoo sa bisan unsa nga higayon, gawas kon siya nagpamatuod sa Anak; kay gawas kon kini pinaagi kaniya walay tawo nga maluwas.” Kining importante nga pagdugang nga gipakita pinaagi sa mga italiko nagpatin-aw nga ang Amahan nakigsulti ngadto sa Iyang mga anak dinhi sa yuta aron sa pagpamatuod sa Iyang Anak, si Jesukristo. Ang mga kasulatan nagrekord sa pipila ka mga higayon sa dihang ang Amahan mipaila ni Jesukristo.

Juan 1:19

Unsa ang kahulogan sa termino nga “mga Judeo” niini ug sa ubang bersikulo sa basahon ni Juan?

Gigamit ni Juan ang termino nga “mga Judeo” 71 ka higayon sa iyang Ebanghelyo. Sa matag higayon, kinahanglan natong hubaron ang kahulogan sa termino sulod sa piho nga konteksto niini. Sama pananglit, sa Juan 2:6 ang “mga Judeo” nagpasabot sa mga tawo nga Judeo isip usa ka kaliwat o nasod. Sa Juan 1:19; 5:10; 9:22; ug 18:12, ang “mga Judeo” nagtumong sa mga awtoridad nga Judeo, lakip ang punoang mga saserdote, mga eskriba, ug mga ansiyano. Sa Juan 9:18, ang “mga Judeo” nagpasabot sa mga dili magtutuo.

Juan 1:19–28

Kinsa si Elias?

Sa Juan 1:19–28, ang mga lider nga mga Judeo nangutana kang Juan Bautista kon siya ba si Elias. Si Elias mao ang Griyego nga matang sa Hebreohanong ngalan nga Elijah, nga mao ang ngalan sa propeta kinsa gipanagna sa umaabot nga pagbalik.

Si Juan nakasabot, samtang ang mga pari ug ang mga Levita tataw nga wala makasabot, nga dunay lainlain og kahulogan sa ngalan o titulo nga Elias. Si Juan Bautista usa ka Elias, nga nagpasabot nga usa ka mag-uuna, ug siya gipadala aron sa pag-andam sa dalan alang sa Mesiyas.

Ang Hubad ni Joseph Smith nagklaro nga si Juan Bautista mianhi aron sa pag-andam sa dalan alang ni Jesukristo. Kini nagpaila nga si Juan Bautista “wala molimud nga siya mao si Elias; apan mikompisal, nag-ingon; ako dili mao ang Kristo.”

Juan 1:29, 36

Nganong si Jesukristo gitawag nga “ang Kordero sa Diyos”?

Si Apostol Juan mao lamang ang tigsulat sa Bag-ong Tugon nga migamit sa “ang Kordero” o “ang Kordero sa Dios” isip ang titulo alang sa Manluluwas. Ang propeta sa Basahon ni Mormon nga si Nephi kanunay usab nga mipasabot sa Manluluwas isip “ang Kordero sa Dios.”

Si Presidente Russell M. Nelson mitudlo nga isip ang Kordero sa Dios, si Jesukristo mituman sa balaod sa sakripisyo pinaagi sa Iyang Pag-ula: “Ang Daang Tugon adunay daghang mga pakisayran sa pag-ula, nga gitawag og sakripisyo alang sa mananap. Dili pwede ang bisan unsa lamang nga mananap. Ang espesyal nga mga konsiderasyon naglakip sa:

  • Pagpili sa panganay nga mananap sa panon, nga walay tatsa [tan-awa sa Levitico 5:18; 27:26].

  • Pagsakripisyo sa kinabuhi sa mananap pinaagi sa pagpaagas sa dugo niini [tan-awa sa Levitico 9:18].

  • Pagpatay sa mananap nga walay nabali nga bukog [tan-awa sa Exodo 12:46; Numeros 9:12].

  • Ug usa ka mananap mahimong isakripisyo isip puli nga buhat para sa lain [tan-awa sa Levitico 16:10].

“Ang Pag-ula ni Kristo mituman niini nga mga sundanan sa Daang Tugon. Siya ang unang natawo nga Kordero sa Dios, nga walay ikasaway. Ang Iyang sakripisyo nahitabo pinaagi sa pagpaagas og dugo. Walay nabali nga bukog sa Iyang lawas—makapaikag nga ang duha ka kriminal nga gilansang sa krus uban sa Ginoo gibalian sa ilang mga bitiis [tan-awa sa Juan 19:31–33]. Ug ang Iya mao ang usa ka sakripisyo nga puli alang sa uban.”

Juan 1:31, 33

Wala ba mahibalo si Juan Bautista nga si Jesus mao ang Mesiyas?

Ang hugpong sa mga pulong nga “wala ako makaila kon kinsa siya” sa Juan 1:31, 33mihimo og pipila ka pangutana kon si Juan Bautista nahibalo nga si Jesus mao ang Mesiyas. Diha sa Hubad ni Joseph Smith, ang hugpong sa mga pulong nga “wala ako makaila kon kinsa siya” gikorehian og kaduha. Sa Juan 1:31 ang pulong nga wala gitangtang ug ang bersikulo giusab aron mabasa nga, “ako nakaila kaniya, ug nga siya igapadayag sa Israel.” Sa Juan 1:33 ang pulong nga wala gitangtang pag-usab aron mabasa nga, “Ako nakaila kaniya.”

Kini nga mga pagkorehir nagpamatuod nga si Juan Bautista nasayod nga si Jesus mao ang Mesiyas. Kini makataronganon nga ikonsiderar ang klaro nga pagpamatuod nga gihatag ni Juan Bautista mahitungod kang Jesus: “Tan-awa ang Kordero sa Dios, nga magakuha sa sala sa kalibotan. Mao kana siya ang gihisgotan ko sa akong pag-ingon, sunod kanako moanhi ang usa ka tawo nga gikapahimutang na unahan kanako.”

Juan 1:42

Unsay ipasabot sa “ikaw pagatawgon og Cefas”?

Sa dihang ang Manluluwas mitawag ni Pedro aron mahimo Niyang disipulo, Siya mihatagan ni Pedro og laing ngalan, nga Cefas. Ang Cephas nagpasabot nga “manalagna” o “bato.” Pinaagi sa pagtawag kang Pedro nga usa ka manalagna, si Jesus mipasabot sa pagdawat ni Pedro sa mga yawe sa pagselyo ug sa awtoridad sa pagdumala sa Simbahan human sa Iyang pagkayab.

Sa samang paagi, si Jesukristo mitawag ni Joseph Smith nga usa ka manalagna sa adlaw nga Iyang giorganisar pag-usab ang Iyang Simbahan dinhi sa yuta. Sa pinulongan nga susama sa pagdawat ni Pedro sa mga yawe sa pagselyo, si Joseph ug ang Simbahan gisultihan kon unsa ang mga panalangin sa pagsunod sa manalagna sa Ginoo.

Juan 1:45

Giunsa pagkahibalo ni Felipe nga si Jesus mao ang Mesiyas?

Sa dihang gisultihan ni Felipe si Natanael mahitungod ni Jesus, miingon siya nga nakaplagan na niya ang tawo “ang gihisgotan ni Moises sa basahon sa balaod ug gihisgotan usab sa mga propeta.” Ang Balaod mao ang unang lima ka basahon ni Moises. Ang mga Propeta mao ang mga basahon sama sa Isaias, Miqueas, Jeremias, ug Zacarias. Si Felipe ug ang ubang mga disipulo nakahimo sa pag-ila ni Jesus isip ang Mesiyas tungod kay nanagsiksik sila sa mga kasulatan alang sa mga timailhan mahitungod Kaniya.

Juan 1:46

Nganong si Natanael nangutana kon “may maayo ba gud nga gikan sa Nazaret?”

Ang Nazaret usa ka gamay nga balangay nga adunay gibana-bana nga 200 ngadto sa 400 ka residente. Wala kini gihisgotan sa Daang Tugon. Sa panahon sa kinabuhi sa Manluluwas, daghang tawo lagmit naghunahuna sa Nazaret nga dili mahinungdanon. Tungod niini nga rason, si Natanael naghunahuna kon duna bay maayong butang nga maggikan sa Nazaret. Sa ulahing bahin sa Bag-ong Tugon, ang Nazaret nailhan nga dapit diin si Jesus gipadako.

Juan 1:47

Unsay gipasabot nga mahimong usa ka tawo nga “hingpit ang iyang pagkamatinud-anon”?

Ang Manluluwas miingon nga si Natanael usa ka tawo diin “hingpit ang iyang pagkamatinud-anon.” Ang Griyego nga pulong nga gihubad dinhi isip “mangingilad” nangahulogan nga pagpangilad, panglimbong, o pagbudhi. Sumala sa Manluluwas, si Natanael usa ka tawo nga dunay putli nga motibo.

Pagkat-on pa og Dugang

Mga Titulo ni Jesukristo

Pagpakigbahin sa Ebanghelyo

Media

Bidyo

“The Baptism of Jesus” (3:10)

3:10

Mga Imahe

ang Konseho sa Langit

gilangkoban sa The Grand Council [Ang Dakong Konseho] ni Robert T. Barrett

Gilalang ni Jesus ang yuta

Christ the Creator [Si Kristo ang Tiglalang], ni Robert T. Barrett

Si Juan Bautista nagtudlo sa katawhan

John the Baptist Preaching in the Wilderness [Juan Bautista Nagsangyaw diha sa Kamingawan], ni Robert T. Barrett

Si Juan Bautista nagbunyag ni Jesus

John the Baptist Baptizing Jesus [Juan Bautista Nagbunyag ni Jesus], ni Greg K. Olsen