“Lucas 12–17; Juan 11,” Mga Tabang sa Kasulatan: Bag-ong Tugon (2024)

Mga Tabang sa Kasulatan

Lucas 12–17; Juan 11

Mipanaw si Jesus gikan sa Galilea paingon sa Jerusalem duol sa kataposan sa Iyang mortal nga pangalagad. Mitudlo Siya og daghang mga sambingay, lakip ang mga sambingay sa karnero nga nawala, ang salapi nga nawala, ug ang anak nga mausikon. Mipasidaan Siya batok sa pagpakaaron-ingnon ug pagkamaibugon, ug Siya mihatag og gibug-aton sa panginahanglan sa pagkamabinantayon ug sa pag-andam alang sa Iyang Ikaduhang Pag-anhi. Mitudlo Siya nga ang tanan kinahanglan gayod nga maghinulsol o mamatay. Nang-ayo Siya atol sa Igpapahulay ug mihisgot kon kinsa ang maluwas. Gitagna Niya ang Iyang kamatayon ug Pagkabanhaw ug nagbangutan tungod sa Jerusalem. Mitudlo Siya sa mga panginahanglan alang sa pagkadisipulo. Giayo ni Jesus ang napulo ka sanlahon ug gipakita ang Iyang gahom batok sa kamatayon pinaagi sa pagbanhaw ni Lazaro gikan sa mga patay.

Mga Kapanguhaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Kaagi ug Kinatibuk-ang Kahulogan

Lucas 12:35–40

Unsa ang kahulogan sa “baksi ang inyong mga hawak” agi og pagpangandam alang sa Ikaduhang Pag-anhi?

Sa biblikanhong mga panahon, ang mga lalaki nagsul-ob og tag-as nga mga kupo. Kon magtrabaho, isuksok sa lalaki ang tumoy sa iyang tunika (kupo) sa sulod sa iyang girdle (bakos) aron ang iyang mga bitiis makalihok og maayo. Mao kini ang kahulogan sa hugpong sa mga pulong nga “baksi ang inyong mga hawak.” Kini usa ka simbolo nga “nagpaila sa pagkaandam alang sa paglihok.” Dinhi niini nga sambingay, ang pagbakos sa imong hawak ug sa pagpasiga sa imong mga suga nagpasabot sa pagbantay ug pagkaandam alang sa pagbalik sa Ginoo.

Lucas 13:6–9

Unsa ang kahulogan sa sambingay sa kahoy nga igira?

Human itudlo nga ang tanang tawo kinahanglan gayod nga maghinulsol o mamatay, ang Manluluwas nakigbahin og sambingay mahitungod sa usa ka wala mamunga nga kahoy nga igira. Alang sa mga Judeo, ang usa ka kahoy nga igira usa ka sagad nga simbolo alang sa Israel, ang mga tawo sa pakigsaad sa Dios.

Dinhi niini nga sambingay, ang “usa ka tawo” nagrepresentar sa Dios. Ang parrasan nagrepresentar sa kalibotan, ug ang “mag-atiman sa parrasan” nagrepresentar sa Manluluwas. Human mahatag kini nga sambingay, nagpadayon ang Manluluwas sa paghatag og gibug-aton nga ang Israel napakyas sa pagpatunhay og pagkamatarung sulod sa panahon sa oportunidad niini.

Lucas 13:18–19

Unsa ang kahulogan sa sambingay sa liso sa mustasa?

Tan-awa sa “Mateo 13:31–32. Unsa ang liso sa mustasa?”

Lucas 13:20–21

Unsa ang kahulogan sa sambingay sa igpapatubo sa pan [tinapay]?

Tan-awa sa “Mateo 13:3–9, 18–33, 43–50. Unsa ang atong makat-onan gikan sa mga sambingay sa pagpundok?”

Lucas 13:23–30

Unsa ang usa ka “pultahan nga masigpit”?

Ang Gresyanhon nga mga pulong gihubad isip “pultahan nga masigpit” diha sa King James Version sa Biblia mahimo usab nga hubaron isip “pig-ot nga pultahan.” Kining “pultahan nga masigpit” nagsimbolo sa higpit nga mga kinahanglanon sa pagkadisipulo. Ang ubang mga kasulatan naggamit sa imahe sa usa ka pultahan nga masigpit o pig-ot nga agianan sa pagtudlo kanato nga kita kinahanglan gayod modawat og mahinungdanong mga ordinansa ug motahod sa mga pakigsaad sa pagsulod sa gingharian sa langit. Miingon si Elder D. Todd Christofferson: “Sa pasumbingay nga pagkasulti, kini nga ganghaan hilabihan ka pig-ot nga usa lamang ang tugotan nga makasulod sa matag higayon. Ang matag tawo mohimo og indibidwal nga pasalig ngadto sa Dios ug agig tubag makadawat gikan Kaniya og usa ka personal nga pakigsaad, pinaagi sa ngalan, nga siya makasalig sa hingpit karon ug sa kahangtoran.”

Lucas 14:7–11

Unsa ang mga kostumbre kaniadto sa pagpasidungog sa mga dinapit atol sa pista?

“Paingon ngadto sa Jerusalem, gidawat sa Manluluwas ang pagdapit nianang Igpapahulay aron sa pagkaon diha ‘sa balay sa usa ka punoan sa mga Pariseo’ (Lucas 14:1). Samtang didto, nakaalinggat siya nga ang ubang mga dinapit ‘mipili sa halangdong mga lawak’ (Lucas 14:7), o pinasidunggang mga dapit. Sumala sa kustombre, ang labing pinasidunggan nga mga dinapit gipalingkod sa labing duol ngadto sa midapit. Ang Manluluwas migamit niini nga sitwasyon sa pagtudlo sa ‘usa ka sambingay’ (Lucas 14:7) nga mipasabot og mahangturong baroganan mahitungod sa relasyon tali sa pagkamapainubsanon ug kahimayaan.”

Lucas 14:26

Unsay kahulogan sa pulong nga “pagdumot”?

Sa kinatibuk-ang kahulogan sa Lucas 14:26, ang Gresyanhong pulong nga gihubad isip “pagdumot” makapasabot og paghatag og minos nga pagtagad ngadto sa usa kay sa uban. Ang Manluluwas wala mobakwi sa sugo sa “pagtahod sa imong amahan ug sa imong inahan.” Hinoon, nagtudlo Siya mahitungod sa mga prayoridad. Alang sa usa ka disipulo, ang debosyon ngadto ni Jesukristo kinahanglan gayod mag-una sa debosyon ngadto sa pamilya.

Lucas 14:34–35

Unsa ang kahulogan sa “kon ang asin mawad-an sa iyang lami”?

Tan-awa sa “Mateo 5:13. Unsa ang kahulogan sa mahimong ‘asin sa yuta’?”

Lucas 15:4

Giunsa pag-amuma sa magbalantay ang ilang karnero sa biblikanhong mga panahon?

Sa biblikanhong mga panahon, ang pagbantay sa karnero usa ka sagad nga panginabuhi. Ang mga magbalantay migiya sa ilang mga karnero ngadto sa pagkaon ug sa tubig, nagbantay sa ilang mga panon nga dili mahisalaag, ug mipanalipod niini gikan sa kuyaw. Dinhi niini nga paagi sa pag-amuma, ang mga magbalantay mga “maunungon, maayong motrabaho, maloloy-ong mga lider kinsa mihatag ug mipanalipod sa ilang mga panon. Ang pag-amping sa usa ka panon nga mag-uban importante sa katumanan niini nga misyon.”

Gumikan nga ang pagbantay sa karnero sagad kaayo sa biblikanhong mga panahon, nahimo kini nga tukma ug dali nga masabtan nga pasumbingay sa pagtudlo og espirituhanong mga kamatuoran. Ang mga magbalantay sa karnero gitandi ngadto sa mga lider ug gani ngadto sa Dios, kinsa nagbantay sa Iyang mga karnero—Iyang mga tawo sa pakigsaad.

Tan-awa sa “Juan 10:1–18. Sama sa unsa ang mga magbalantay sa panahon ni Jesukristo?”

Lucas 15:8

Pila ang kantidad sa usa ka buok nga pilak?

“Ang piraso nga pilak niini nga sambingay usa ka Gresyanhon nga sensilyo nga gitawag og drachma. [Kini] may bili nga maingon og gamay kaayo, apan ang usa ka kabus nga tawo makagamit unta niini sa pagbayad og duha ka adlaw nga bili sa pagkaon. Ang inadlaw nga sweldo sa usa ka mamumuo mga usa ka drachma, apan ang usa ka hamtong nga babaye mokita og minos sa katunga niana nga kantidad alang sa usa ka adlaw nga trabaho.”

Lucas 15:11–32

Unsay kahulogan sa mausikon nga pulong?

Bisan kon ang teksto ni Lucas wala maghatag og ngalan sa sambingay, nailhan kini nga ang sambingay sa nawala nga anak. Ang pulong nga mausikon nagkahulogan og usikan ug nagpatuyang sa pagkagastador.

Lucas 15:12

Unsa ang balaod sa Judeo kalabot sa mga kabilin?

Sumala sa kustombre sa panahon sa Manluluwas, ang anak nga lalaki makadawat lamang sa iyang kabilin human mamatay ang iyang amahan. Kini mahimo unta nga “hilabihan sa ka talagsaon kaayo” alang sa usa ka anak nga lalaki sa pagpugos sa pagpangayo sa iyang kabilin sa wala pa ang kamatayon sa iyang amahan.

Lucas 15:14–19

Unsay kahulogan sa ang anak nga lalaki “nahiulian sa iyang panimuot”?

Mitudlo si Elder Robert D. Hales, “Sa mga pulong sa Manluluwas, ‘siya nahiulian sa iyang panimuot’ [Lucas 15:17]. Nahinumdoman niya kon kinsa siya, nakaamgo unsay nawala kaniya, ug misugod sa pagtinguha sa mga libreng panalangin nga anaa sa balay sa iyang amahan.” Ang mausikon nga anak nga lalaki nahigmata ngadto sa pagkaila sa makalilisang nga sitwasyon nga siya nahulog tungod sa iyang kalapasan.

Lucas 16:19–31

Unsay atong nakat-onan mahitungod sa kalibotan sa espiritu gikan sa sambingay sa adunahan nga tawo ug ni Lazaro?

Ang sambingay sa tawo nga dato ug ni Lazaro nagpasabot sa duha ka lain-laing kahimtang sa kalibotan sa espiritu human sa pagkamortal: “sabakan ni Abraham” ug “impyerno.” Kini nga mga kahimtang gitawag usab og “paraiso” ug “bilanggoan.” Ang bung-aw tali sa sabakan ni Abraham ug sa impyerno niini nga sambingay nagrepresentar sa panagbulag nga anaa tali niadtong anaa sa paraiso sa espiritu ug bilanggoan sa espiritu.

dayagram sa bilanggoan sa espiritu ug paraiso nga gibulag sa usa ka bung-aw

Pinaagi sa usa ka pagpadayag nga gihatag ngadto ni Presidente Joseph F. Smith, atong nahibaloan nga ang Manluluwas nangalagad didto sa kalibotan sa espiritu atol sa panahon tali sa Iyang Paglansang diha sa Krus ug sa Pagkabanhaw. Miorganisar siya og mga mensahero gikan sa paraiso sa mga espiritu ug mihatag kanila og gahom sa pagsangyaw sa ebanghelyo ngadto niadtong anaa sa bilanggoan sa espiritu. Ang buhat sa pagsangyaw sa ebanghelyo ngadto sa bilanggoan sa mga espiritu nagpadayon karon.

dayagram sa bilanggoan sa espiritu ug sa paraiso nga adunay tulay tali kanila

“Kon [kadtong anaa sa bilanggoan sa espiritu] modawat sa ebanghelyo ug sa mga ordinansa sila modawat sa ebanghelyo ug ang mga ordinansa ipahigayon alang kanila didto sa templo, sila mahimong mobiya sa bilanggoan sa espiritu ug mopuyo sa paraiso.”

Lucas 17:5–10

Nganong kita “mga ulipon nga walay hinungdan”?

“Aron mas maayo ang pagsabot sa konsepto sa ulipon nga walay hinungdan, kita kinahanglan gayod nga mopunting diha sa pulong nga ganansya. Ang ganansya nagkahulogan og tubo sa personal nga mga kabtangan, kahimtang, o mga kaayohan. Kana mao ang kinauyokan sa konsepto sa atong pagkaulipon nga walay hinungdan.” Dinhi niini nga sambingay, walay pagsapayan unsa ka maayo ang sulugoon naghimo sa iyang mga katungdanan, siya sa gihapon anaa sa pagka-utangan sa iyang agalon. Sa samang paagi, kon atong buhaton ang atong katungdanan atubangan sa Dios, magpanalangin Siya kanato, ug kita sa gihapon nakautang ngadto Kaniya. “Ang Dios hingpit diha sa iyang kahibalo, gahom, impluwensya, ug mga hiyas. Siya mao ang Tiglalang sa tanang mga butang! Unsay mabuhat bisan kinsa kanato—o tanan kanato sa kinatibuk-an—niana nga magdala og ganansya (nga mao ang, pagtubo sa mga kabtangan, kahimtang, o mga kaayohan) ngadto sa Dios?”

Lucas 17:20–21

Unsay kahulogan niini nga “ang gingharian sa Dios anaa sulod kanimo”?

Daghang mga paghubad sa Bag-ong Tugon naghimo sa hugpong sa mga pulong “ang gingharian sa Dios anaa sulod kanimo” sama sa “ang gingharian sa Dios anaa taliwala kaninyo.” Ang Hubad ni Joseph Smith nag-usab niini nga hugpong sa mga pulong sa pagbasa, “Ang gingharian sa Dios miabot na nganha kaninyo.” Ang duha ka mga hinimo nga hugpong sa mga pulong nagtudlo ngadto sa kamatuoran nga si Jesukristo naka-estabilisar na sa gingharian sa Dios, o sa Simbahan, niana nga panahon. Kana nga samang gingharian na-establisar pag-usab sa atong panahon.

Juan 11:17, 39

Unsa kamahinungdanon ang paghulat ni Jesus hangtod sa ikaupat nga adlaw sa pagbanhaw ni Lazaro gikan sa mga patay?

Dihay mga higayon nga ang mga propeta sa Dios nagbanhaw og mga indibidwal gikan sa mga patay sa wala pa matawo ang Manluluwas. Apan ang mga patay niadtong mga higayona gibanhaw wala madugay human dayon sila namatay. Usa ka sagad nga tinuohan taliwala sa mga Judeo mao nga ang espiritu sa usa ka patay nga tawo mipabilin duol sa lawas sulod sa tulo ka adlaw ug ang kinataposan sa kamatayon diha sa ikaupat nga adlaw. Ang pag-ayo sa Manluluwas ni Lazaro sa ikaupat nga adlaw nagpakita sa Iyang hingpit nga gahom ibabaw sa kamatayon.

Pagkat-on pa og Dugang

Mga Leksiyon gikan sa mga Sambingay ni Jesus

Melvin F. Hammond, “Parables of Jesus: The Great Supper,” Ensign, Apr. 2003, 51–53
Dieter F. Uchtdorf, “Pas-anon Ka Niya sa Iyang Abaga ug Dad-on Pauli,” Liahona, Mayo 2016, 101–4
Dieter F. Uchtdorf, “Ang Nahisalaag ug ang Dalan nga Makapabalik Kanato sa Dios,” Liahona, Nob. 2023, 86–89
Tsung-Ting Yang, “Parables of Jesus: The Unjust Steward,” Ensign, July 2003, 28–31

Media

Mga Bidyo

Mga Imahe

usa ka babaye nangita sa iyang nawala nga sinsilyo — The Lost Drachma [Ang Nawala nga Drakma], ni James Tissot

amahan nagdagan paingon sa iyang anak nga lalaki

Lazaro nga nagkagidlay, naglingkod sa tiilan sa hagdanan — The Poor Lazarus at the Rich Man’s Door [Ang Kabus nga Lazaro diha sa Pultahan sa Dato nga Tawo], ni James Tissot