“Santiago,” Mga Tabang sa Kasulatan: Bag-ong Tugon (2024)

Mga Tabang sa Kasulatan

Santiago

Human magtimbaya sa iyang mga mambabasa, gipaila ni Santiago ang pipila ka dagkong mga tema sa iyang sulat, lakip ingon sa paglahutay sa mga pagsulay, pagtinguha og kaalam, ug sa pagpuyo nga nahiuyon sa mga pagtuo sa usa ka tawo. Gihubit ni Santiago ang “putli nga relihiyon” isip nag-amuma alang sa walay amahan ug mga biyuda ug sa pagmatngon sa kaugalingon nga walay lama gikan sa kalibotan. Miingon siya nga ang mga Santos kinahanglang mohigugma sa ilang mga silingan ug mopakita sa ilang hugot nga pagtuo pinaagi sa ilang mga buhat. Gipakita ni Santiago ang makadaot nga kinaiya sa dili kapugngan nga sinultihan. Gipasidan-an niya ang iyang mga mambabasa sa dili pagpakighigala sa kalibotan apan sa pagsukol sa yawa ug sa pagpaduol ngadto sa Dios. Gipasidan-an ni Santiago ang adunahan kinsa nagdaug-daog sa uban. Gitambagan niya ang mga Santos nga sa mapailubong paagi molahutay hangtod sa pag-anhi sa Ginoo. Giawhag ni Santiago ang mga masakiton sa paghangyo og tabang sa mga anciano [elder] sa pagdihog kanila og lana.

Mga Kapangohaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Kaagi ug Kinatibuk-ang Kahulogan

Ngadto kang kinsa ang sulat ni Santiago gisulat ug ngano?

Kini sa kinatibuk-an gidawat nga ang manunulat sa sulat ni Santiago mao si Santiago, ang igsoong lalaki sa Ginoo. Si Santiago ug ang iyang mga igsoong lalaki sa sinugdanan wala motuo sa mensahe ni Jesus. Wala madugay, si Santiago nahimong usa ka disipulo sa Manluluwas ug lider sa Iyang Simbahan. Nahimo si Santiago nga usa ka saksi sa nabanhaw nga Kristo.

Ang Santiago mao ang una sa pito ka kinatibuk-ang mga sulat nga gilakip diha sa Bag-ong Tugon. Gitawag kini sila og kinatibuk-ang mga sulat tungod kay gituyo kini sa ilang mga manunulat alang sa mas malukpanong mga mambabasa kay sa usa lamang ka kongregasyon o dapit. Gitumong ni Santiago ang iyang sulat “nganha sa napulog duha ka mga banay nga nanghitibulaag”. Kini tingali nahimong napadala ngadto sa Kristiyano nga mga tumutuo kinsa mibiya sa Judea ug namuyo sa Phoenicia, Cipro, ug Siria Antoquia.

Kini nga sulat naglangkob og mugbo nga mga pagpasabot sa mga baroganan alang sa Kristiyano nga pagpuyo. Kini nga mga pagtulon-an naghatgag og gibug-aton sa mas matarong nga mga lihok kay sa yanong pagpahayag sa tinuohan. Si Santiago mitudlo nga ang tinuod nga pagtuo makita diha sa binuhatan o sa mga lihok sa usa ka tawo.

Adunay hapit susama nga pagkapareha tali sa Wali sa Manluluwas diha sa Bukid nga girekord sa Mateo 5–7 ug ang mga pulong ni Santiago. Ang panagway sa mga pagtulon-an dinhi niini nga sulat nagpakita nga kini nabantog pag-ayo taliwala sa mga sumusunod sa Ginoo, bisan sa wala pa kini gilakip diha sa ebanghelyo ni Mateo.

Ang pipila ka mga eskolar nagtuo nga si Santiago gimartir kaniadtong AD 62. Tingali nakasulat na siya niini nga sulat tali sa mga AD 40 ug 60. Kon nahisulat sa wala pa ang AD 50, ang Epistola ni Santiago mahimong usa sa labing una nga mga dokumento diha sa Bag-ong Tugon.

Santiago 1:5

Unsa ang bation sa Dios mahitungod sa atong pagpangutana Kaniya?

Dinhi niini nga tudling, si Santiago nagdapit sa mga mambabasa sa pagpangayo sa Dios og kaalam. Ang Dios, siya nagpasabot, motubag “sa madagayaon gayod ug sa walay pamoyboy.” Dili kita kasab-an o badlungon sa pagpangutana. Ni ang Dios mangita og sayop sa atong pagpangutana.” Human sa pagbasa ug sa pagpamalandong niini nga pagdapit sa “pagpangutana sa Dios,” ang batan-ong Joseph Smith miingon: “Ako miabot sa paghukom nga ako kinahanglan nga magpabilin sa kangitngit ug sa kalibog, o ako kinahanglan mobuhat ingon sa gisugo ni Santiago, nga mao, ang pagpangutana sa Dios. Ako sa kadugayan miabut sa hugot nga tinguha sa ‘pagpangutana sa Dios,’ sa pagtuo nga kon siya mohatag og kaalam ngadto kanila nga nagkulang og kaalam, ug mohatag sa walay pagdumili, ug dili masuko, ako tingali mosulay.” Ang resulta sa determinasyon ni Joseph sa pagpangutana usa ka mahimayaong panan-awon. Ang Dios nga Amahan ug si Jesukristo mipakita ngadto ni Joseph ug mitubag sa iyang mga pangutana.

Santiago 1:6–8

Nganong gitandi ni Santiago kadtong kinsa nagkulang og hugot nga pagtuo ngadto sa “usa ka balod sa dagat”?

Gitandi ni Santiago ang tawo kinsa nagkulang og hugot nga pagtuo ngadto sa usa ka balod nga gikusokuso ug gihandos. Kini nga pasumbingay nagpakita sa espirituhanong walay kalig-on nga mahitabo kon ang hugot nga pagtuo huyang. Gihulagway usab ni Santiago ang usa ka tawo kinsa nagkulang og hugot nga pagtuo isip usa ka tawo nga “tagurhag panghunahuna.” Kini nga paghulagway gikan sa usa ka Gresyanhon nga pulong nga nagkahulogan og “duha ka kalag.” Ang usa ka “tagurhag panghunahuna” nga tawo adunay usa ka bahin kanila nga nagtuo sa Dios ug ang lain nga bahin madudahon o dili motuo. Gawas kon kini nga tawo magpili sa hugot nga pagtuo, dili sila “makadawat og bisan unsa sa Ginoo.”

Santiago 2:1–10

Unsay gisulti ni Santiago mahitungod sa paboritismo?

Ang Hubad ni Joseph Smith sa Santiago 2:1 naghatag sa mosunod nga katin-awan: “Akong mga kaigsoonan, kamo dili makabaton og hugot nga pagtuo sa atong Ginoong Jesukristo, ang Ginoo sa himaya, ug gani adunay pagtahod ngadto sa mga tawo.” Ang pagbaton og “pagtahod sa mga tawo” nagkahulogan og pagpakita og paboritismo. Gipanghimaraut ni Santiago ang ingon nga mapihigong pagtagad sa uban, ilabi na ang diskriminasyon batok sa mga kabos agig pagdapig sa mga adunahan.

Santiago 2:14–26

Unsay gitudlo ni Santiago mahitungod sa hugot nga pagtuo ug mga buhat?

Dinhi niini nga mga bersikulo, gitubag ni Santiago kadtong kinsa namulong kabahin sa hugot nga pagtuo isip usa ka butang nga bulag gikan sa mga buhat. Kini mahimo nga ang mga pagtulon-an ni Apostol Pablo mahitungod sa hugot nga pagtuo ug sa mga buhat wala masabti sa mga miyembro sa Simbahan. Gihatagan og gibug-aton ni Pablo nga ang kaluwasan moabot pinaagi sa hugot nga pagtuo diha ni Jesukristo ug dili pinaagi sa mga buhat sa balaod ni Moises. Kon maghisgot kabahin sa mga buhat, wala magpasabot si Santiago ngadto sa mga ritwal sa balaod ni Moises. Hinoon, siya nagpasabot ngadto sa mga buhat sa pagkamatarong nga mga makanunayon uban sa mga pagtuo sa usa ka tawo.

Si Santiago mihisgot og usa ka porma sa hugot nga pagtuo nga pauyon-uyon ug wala mogiya ngadto sa matarong nga lihok.

Sama pananglit, diha sa Santiago 2:15–17, si Santiago midumili sa pagdawat og “mabaw … nga hugot nga pagtuo nga wala maghimo og kalainan sa kinaiya sa usa ka tawo.”

Si Presidente Jeffrey R. Holland misulat:

“Alang kanato, ang mga buhat sa pagkamatarong, nga atong gitawag og ‘mapahinunguron nga pagkadisipulo,’ usa ka siguradong sukdanan sa pagkatinuod sa among hugot nga pagtuo; kami nagtuo sama ni Santiago, ang igsoon ni Jesus, nga ang tinuod nga hugot nga pagtuo makita sa pagkamatinud-anon (tan-awa sa Santiago 2, ilabi na ang mga bersikulo 14, 17–18, 20–26). …

“… Alang kanamo ang mga bunga nianang hugot nga pagtuo naglakip sa paghinulsol, ang pagdawat sa mga pakigsaad ug mga ordinansa sa ebanghelyo (lakip ang bunyag), ug mapasalamatong kasingkasing nga nagdasig kanato nga mopalayo sa tanang dautan, sa pagpas-an sa atong krus sa matag adlaw (tan-awa sa Lucas 9:23), ug sa pagsunod sa Iyang mga sugo—tanan Niyang mga sugo.”

Santiago 2:21–25

Unsa ang mga binuhatan ni Abraham ug Rahab?

Si Santiago ug Pablo mihisgot sa propeta sa Daang Tugon nga si Abraham isip usa ka importante nga ehemplo sa hugot nga pagtuo ug sa maayong binuhatan. Ang kaandam ni Abraham sa pagtuman sa mando nga ihalad si Isaac usa ka ebidensya sa iyang hugot nga pagtuo sa Dios.

Si Rahab usa ka babaye nga nagbaligya sa iyang dungog kinsa mipuyo sa Jerico sa panahon nga ang kasundalohan sa Israel nagkaduol sa gisaad nga yuta. Nahibalo siya nga ang Ginoo mibahin sa Pulang Dagat alang sa mga Israelita. Mituo siya nga ang Ginoo motabang sa mga Israelita sa pakig-away batok sa iyang siyudad. Si Josue, ang lider sa Israel, mipadala og mga espiya ngadto sa Jerico. Apan ang mga espiya nadiskobrehan, ug ang hari sa Jericho mipadala og mga gwardiya sa pagdakop kanila. Gitago ni Rahab ang mga espiya didto sa iyang panimalay ug unya mitabang kanila sa pag-eskapo. Tungod sa iyang gibuhat, siya ug ang iyang pamilya naluwas sa dihang ang nahibilin sa Jerico gilaglag. Mipuyo siya uban sa mga Israelita sulod sa nahibilin sa iyang kinabuhi.

Santiago 3:1–12

Unsay gitudlo ni Santiago mahitungod sa ba-ba ug sa dila?

usa ka kabayo nga may bokado ug busal — Paghulagway ni Paul Mann

Mipasidaan si Santiago sa mga Santos sa potensyal nga kadaut nga mahimong resulta sa dili mabinationg mga pulong, dili angay nga pinulongan, o kasuko. Sa pagtabang sa mga mambabasa nga makaila sa importansya sa pagpugong sa mga pulong, iyang gitandi ang ba-ba ug ang dila ngadto sa usa ka bokado sa kabayo ug sa usa ka timon sa sakayan. Ang bokado usa ka gamay nga piraso sa metal nga gibutang sa ba-ba sa kabayo nga nagsumpay ngadto sa busal. Ang bokado ug ang busal makahimo sa nagsakay sa pagdirekta asa padulong ang kabayo. Ang timon sa usa ka sakayan kalagmitan nagpasabot ngadto sa usa ka gamay nga manibela nga bugsay diha sa likod sa usa ka sakayan. Niini nga paagi ang usa ka dako nga sakayan gigiyahan ug gimaneho pinaagi sa usa ka gamay nga timon. Gigamit ni Santiago kini nga mga ehemplo sa pagpakita nga ang atong mga pulong adunay gahom. Kita nagpiho kon ang atong mga pulong pagagamiton ba alang sa maayo o sa dautan.

Santiago 5:7–8

Unsa ang “sayo ug ulahi” nga mga ulan?

Ang mga mag-uuma sa karaang Israel mipaabot nga mapailubon alang sa “sayo” nga ulan sa panahon sa pagtanom, diin mitabang sa usa ka liso sa paggitib ug sa pagtubo. Ang “ulahi nga ulan” mitabang sa mga tanom sa paggulang sa dili pa anihon. Si Santiago migamit niini nga paglarawan aron sa pagtudlo nga, sama sa mag-uuma kinsa kinahanglang mapailubong moatiman sa umahan ug maghulat sa mga ulan ug sa umaabot nga pag-ani, ang mga matarong gikinahanglan nga mapailubong mosangyaw sa ebanghelyo ug moamuma sa usag usa, nasayud nga ang kaluwasan sa kadugayan moabut.

Santiago 5:13–16

Unsa ang katuyoan sa pagdihog sa lana?

Si Presidente Dallin H. Oaks mipasabut:

“Diha sa Bag-ong Tugon atong mabasa nga ‘gihidhiran og lana sa Apostoles ni Jesus ang daghang mga masakiton, ug gipang-ayo sila’ (Marcos 6:13). Ang basahon ni Santiago nagtudlo kabahin sa tahas sa pagdihog agig koneksyon sa uban nga mga elemento sa panalangin sa pagpang-ayo pinaagi sa awtoridad sa pagkapari. …

“Kon ang usa ka tawo gidihogan pinaagi sa awtoridad sa Melchizedek nga Pagkapari, ang pagdihog isilyo pinaagi niana nga sama nga awtoridad. Ang pagsilyo sa usa ka butang nagkahulogan sa panghimatuod niini, sa paghimo niini nga mabugkos alang sa gitumong nga katuyoan niini. Kon ang mga elder nagdihog og tawo nga masakiton ug nagsilyo sa pagdihog, nag-abli sila sa mga bintana sa langit aron ibu-bu sa Ginoo ang mga panalangin nga buot Niya alang sa tawo nga masakiton. …

“Ang hugot nga pagtuo mahinungdanon alang sa pagpang-ayo pinaagi sa mga gahom sa langit. Gani ang Basahon ni Mormon nagtudlo nga ‘kon wala ang hugot nga pagtuo taliwala sa mga katawhan ang Dios dili makahimo og milagro taliwala kanila’ (Ether 12:12).”

Pagkat-on pa og Dugang

Pangutana sa Dios

David A. Bednar, “Pangayo pinaagi sa Hugot nga Pagtuo,” Liahona, Mayo 2008, 94–97

Relihiyon nga Putli

W. Christopher Waddell, “Pure Religion,” Ensign, April 2018, 45–47

Hugot nga Pagtuo ug Mga Buhat

Mga Hilisgotan ug mga Pangutana, “Hugot nga Pagtuo diha ni Jesukristo,” Librarya sa Ebanghelyo

Mga Pulong ug Pamulong

Ronald A. Rasband, “Ang mga Pulong Mahinungdanon,” Liahona, Mayo 2024, 70–77
Jeffrey R. Holland, “Ang Pinulongan sa mga Anghel,” Liahona,, Mayo 2007, 16–18

Mga Panalangin sa Pagkapari

Mga Hilisgutan ug mga Pangutana, “Priesthood Blessing,” Gospel Library