Librarya
Panalangin sa Pagkapari

“Panalangin sa Pagkapari,” Mga Hilisgotan ug mga Pangutana (2023)

Batang babaye nga nagdawat og panalangin sa pagkapari

Giya sa Pagtuon sa Ebanghelyo

Panalangin sa Pagkapari

Pagdapit sa gahom sa pagkapari sa Dios ngari sa atong kinabuhi

Bisan unsa pa ang atong edad o ang-ang sa kinabuhi, matag usa nato mobati og dinalian nga panginahanglan usahay nga mapahinumdoman sa gugma sa Dios ug makadawat og balaanong giya. Ang atong Langitnong Amahan mopakigbahin sa Iyang gugma, kaalam, ug gahom ngari nato pinaagi sa importante nga mga kapanguhaan. Ang pipila ka paagi nga mahimo kitang makadawat og personal nga giya ug tabang gikan sa Dios maglakip sa mga kasulatan, mga pulong sa buhi nga mga propeta, atong patriyarkal nga panalangin, ug panag-uban sa Espiritu Santo.

Ang laing paagi nga atong bation nga ang Dios nangalagad sa atong mga panginahanglan mao ang pagdawat sa panalangin sa pagkapari. Mahimo kita nga makahangyo og espesyal nga panalangin sa pagkapari bisan kanus-a nga kita makasinati og walay kaseguroan o nasakit o sa higayon nga magtinguha kita og dugang nga espirituhanong tabang. Si Presidente Henry B. Eyring mitudlo, “Ang katuyoan sa atong pagkadawat sa pagkapari mao ang pagtugot nga kita makapanalangin sa katawhan sa Ginoo, maghimo niini diha sa Iyang ngalan.” Ang pagpangalagad sa mga panalangin pinaagi sa pagpandong sa mga kamot nahimo nang sundanan nga gisunod sa mga naghupot sa Melchizedek nga Pagkapari sa tanang kasaysayan (tan-awa sa Genesis 48:14–15; Mga Buhat 8:14–17; Alma 6:1).

Unsa ang Panalangin sa Pagkapari?

Ang panalangin sa pagkapari usa ka ordinansa diin ang usa ka gi-orden nga naghupot og Melchizedek nga Pagkapari mobutang sa iyang kamot sa ibabaw sa ulo sa usa ka tawo (tan-awa sa Numeros 27:18; Mga Hebreo 6:1–2; Mormon 9:24) ug mosulti og mga pulong sa pagtambag, paghupay, o pag-ayo ingon nga gigiyahan sa Espiritu. Ang katumanan niini nga mga panalangin moabot sumala sa kabubut-on sa Dios ug sa hugot nga pagtuo sa tawo diha kang Jesukristo. Ang panalangin sa pagkapari kasagaran ihatag pinaagi sa usa ka sakop sa pamilya, tigpangalagad nga igsoong lalaki, o lokal nga lider sa Simbahan, apan mahimo kining ihatag pinaagi ni bisan kinsa nga naghupot sa Melchizedek nga Pagkapari. Ang panalangin sa pagkapari nga ihatag pinaagi sa pagpandong sa mga kamot usa ka importante nga paagi sa pagpadangat sa Dios sa Iyang inspirasyon, paghupay, ug gani gahom sa pag-ayo ngari sa atong kinabuhi.

Kinatibuk-ang pagpasabot sa hilisgotan: Pagpandong sa mga Kamot, Panalangin sa Pagkapari

May kalabotan nga mga giya sa pagtuon sa ebanghelyo: Melchizedek nga Pagkapari, Mga Pakigsaad ug mga Ordinansa, Mga Milagro

Seksiyon 1

Ang mga Naghupot sa Pagkapari Nagsunod sa Ehemplo ni Jesukristo Kon Sila Mopanalangin sa Uban

tawo nga buta nga giayo

Si Jesukristo nangalagad niadtong nanginahanglan og talagsaong balaanon nga gahom (tan-awa, pananglitan sa Mateo 4:23–24; 3 Nephi 17:6–9). Sa panahon sa Bag-ong Tugon, Siya mipanalangin sa uban og kapasayloan (tan-awa sa Lucas 7:47–50), kalinaw ug proteksyon (tan-awa sa Marcos 4:38–39), ug pagkaayo (tan-awa sa Juan 9:1–7). Ug tungod kay nasayod Siya nga dili magdugay ang Iyang pagpakig-uban sa mga tawo, gihatagan usab Niya og awtoridad ang Iyang napulog duha ka apotoles aron sa pagpanalangin sa uban (tan-awa sa Mateo 10:1, 8; Moroni 2:1–3).

Karon, ang takos nga mga naghupot sa Melchizedek nga Pagkapari naggamit sa sama nga awtoridad aron sa pagpanalangin sa uban. Pinaagi sa pagpandong sa mga kamot, ang mga naghupot sa pagkapari mohatag og panalangin sumala sa mga pagbati ug inspirasyon nga ilang nadawat gikan sa Espiritu (tan-awa sa 2 Nephi 4:12). Ang panalangin sa pagkapari kasagaran ihatag sumala sa hangyo sa tawo nga nanginahanglan. Ang mga panalangin mahimong ipangalagad sa paghatag og kalinaw, kahupayan, pagkaayo, o tambag. Usahay ang mga panalangin sa pagkapari pagaubanan og ordinansa sa pagkapari, sama sa paghatag og ngalan ug panalangin sa mga bata, kompirmasyon aron madawat ang gasa sa Espiritu Santo, o pag-orden ngadto sa pagkapari.

Ang mga naghupot sa Melchizedek nga Pagkapari nga naghatag sa mga panalangin pinaagi sa pagpandong sa mga kamot nagbarog isip mga representante ni Jesukristo sa pagpangalagad ngadto sa uban. Ang gahom sa pagkapari gisaad niadtong nagsunod sa mga baroganan sa pagkamatarong ug nagpaduol ngadto sa Dios pinaagi sa paghinulsol ug pagkamasulundon sa Iyang mga sugo (tan-awa sa Doktrina ug mga Pakigsaad 121:36).

Mga butang nga angayang hunahunaon

  • Kon ang usa ka naghupot sa Melchizedek nga Pagkapari mohatag sa tawo og panalangin, siya naglihok pinaagi sa ngalan sa Ginoo ug uban sa Iyang gahom. Basaha ang Doktrina ug mga Pakigsaad 36:2, nga maghatag og pagtagad sa mga implikasyon sa mga pulong sa Manluluwas niini nga bersikulo. Dayon basaha ang pamahayag ni Presidente Harold B. Lee:

    “Ang Ginoo dinhi [sa Doktrina ug mga Pakigsaad 36:2] nag-ingon nga kon usa sa iyang awtorisado nga mga sulugoon mopandong sa iyang mga kamot pinaagi sa awtoridad diha sa ulo sa usa ka tawo nga panalanginan, ingon og siya mismo ang nagpandong sa iyang kamot uban kanila aron mapahigayon kana nga ordinansa. Mao nga atong makita kon giunsa niya pagpakita sa iyang gahom taliwala sa mga tawo pinaagi sa iyang mga sulugoon nga Iyang gitugyanan sa mga yawe sa awtoridad.”

    Sa unsang paagi nga kini nga tudling sa kasulatan nakaimpluwensya sa inyong panglantaw mahitungod sa mga panalangin sa pagkapari? Unsa ang inyong mga kasinatian uban sa Espiritu samtang inyong gidawat o gihatag ang panalangin sa pagkapari?

Kalihokan alang sa pagkat-on kauban ang laing mga tawo

  • Samtang adunay kalagmitan nga kita molambigit sa mga panalangin sa pagkapari ngadto sa mga tawo nga naghatag niini—kalalakin-an nga naghupot sa Melchizedek nga Pagkapari—mahinungdanon nga atong hinumdoman nga ang gahom sa pagkapari moabot lamang pinaagi ni Jesukristo. Basaha ang Doktrina ug mga Pakigsaad 121:36–37, 41–46 isip usa ka grupo. Unsa ang inyong nakat-onan gikan niini nga mga bersikulo mahitungod sa unsay gilaoman sa Dios ni bisan kinsa nga nagtinguha og mas dakong espirituhanong gahom? Sa unsang paagi nga ang matag usa nato mas makaugmad niini nga mga kinaiya sa atong kinabuhi?

  • Tan-awa ang bidyo nga “Sanctify Yourselves” (4:37) isip usa ka grupo. Sa dili pa kamo magsugod sa bidyo, dapita ang mga sakop sa grupo sa paghunahuna sa ilang kaugalingon nga anaa sa gihulagway nga sitwasyon samtang magtan-aw sila. Human sa pagtan-aw sa bidyo, dapita ang mga miyembro sa grupo sa pagpakigbahin sa ilang mga hunahuna. Ngano nga ang pagtinguha nga mahimong limpyo mahinungdanon sa matag tawo nga nagkinahanglan sa gahom sa langit?

Pagkat-on pa og dugang

Seksiyon 2

Mga Panalangin sa Pagkapari alang sa Pag-ayo sa Masakiton

masakiton nga batang lalaki nagdawat og panalangin sa pagkapari

Si Jesukristo nangalagad ngadto sa mga anak sa Dios sa daghang makahuloganong paagi samtang nagpuyo Siya sa yuta. Gipakita Niya ang hingpit nga gugma sa dihang Iyang gihupay ang pag-antos sa mga masakiton ug sa mga gisakit pinaagi sa pag-ayo nila (tan-awa sa Mateo 8:16–17; Mosiah 3:5–6). Gimandoan Niya ang Iyang mga disipulo sa pagpanglakaw ug sa pag-ayo sa masakiton (tan-awa sa Mateo 10:1). Ang Bag-ong Tugon nagpakita nga kini nga sundanan sa pagpandong sa mga kamot diha sa masakiton aron sa pag-ayo nila mao ang gisunod sa karaang Simbahan ni Jesukristo (tan-awa sa Mga Buhat 3:1–8; 9:12, 17; 28:8; Santiago 5:14–15). Ang mga naghupot og Melchizedek nga Pagkapari sa moderno nga panahon nagsunod niining sama nga sundanan sa higayon nga sila modihog og gipahinungod nga lana ug mopanalangin nila pinaagi sa pagpandong sa mga kamot (tan-awa sa Doktrina ug mga Pakigsaad 42:43–44; 66:9).

Si Presidente Dallin H. Oaks mipahinumdom nato: “Samtang atong gamiton ang dili madudahan nga gahom sa pagkapari sa Dios ug samtang atong gihatagan og bili ang Iyang saad nga Siya maminaw ug motubag sa pag-ampo inubanan sa hugot nga pagtuo, hinumdoman gayod nato kanunay nga ang hugot nga pagtuo ug ang gahom sa pagpang-ayo sa pagkapari dili makahimo og resulta nga sukwahi sa Iyang kabubut-on kansang pagkapari Iyaha. Kini nga baroganan gitudlo sa pinadayag nga nagtudlo nga ang mga elder sa Simbahan mopandong sa ilang mga kamot sa mga masakiton. Ang saad sa Ginoo mao nga ‘siya nga adunay hugot nga pagtuo kanako mamaayo, ug wala ikatakda ngadto sa kamatayon, pagaayohon’ (D&P 42:48).”

Mga butang nga angayang hunahunaon

  • Unsaon ninyo pag-andam ang inyong kaugalingon sa espirituhanong paagi kon magtinguha og panalangin sa pag-ayo alang sa inyong kaugalingon o sa uban? Samtang naghunahuna kamo niini nga pangutana, basaha ang Santiago 5:15; Jacob 3:1; Alma 15:10–11; ug Ether 12:12. Unsa ang ipasabot nganha ninyo sa hugpong sa mga pulong nga “pag-ampo uban sa hugot nga pagtuo”? Unsa ang ubang importante nga mga baroganan nga makita dinhi niini nga mga tudling?

  • Ang kaandam sa pagsalig sa kabubut-on sa Dios usa ka importante nga aspeto sa bisan unsa nga pag-ampo o panalangin sa pagkapari. Basaha ang Mosiah 4:9. Sa unsang paagi nga ang baroganan nga gitudlo ni Hari Benjamin dinhi niini nga tudling makatabang ninyo nga mobati nga mas andam sa pagdawat sa kabubut-on sa Dios?

Kalihokan alang sa pagkat-on uban sa laing mga tawo

  • Kon ang usa ka tawo masakit, natural lang nga magtinguha kita sa pagbuhat kutob sa atong mahimo sa pagtabang ug sa paghupay sa iyang pag-antos. Ang mga panalangin sa pagkapari ug ang medikal nga pag-atiman parehong importante. Dapita ang mga sakop sa inyong grupo sa pagbasa sa mosunod nga pamahayag ni Presidente Dallin H. Oaks:

    “Gusto ko nga mamulong … kabahin sa pag-ayo sa masakiton—pinaagi sa medical science, pinaagi sa pagtuo, ug pinaagi sa mga panalangin sa pagkapari. … Siyempre dili kita maghulat hangtod nga ang tanang mga pamaagi magamit una pa kita mag-ampo inubanan sa pagtuo o mohatag og mga panalangin sa pagkapari alang sa pag-ayo. Atol sa emerhensya, ang mga pag-ampo ug mga panalangin mag-una. Sa kasagaran dungan natong gamiton ang tanang mga paningkamot.”

    Nganong importante man nga ang atong mga pag-ampo sa hugot nga pagtuo ug mga panalangin sa pagkapari pagaubanan og pagtinguha og medikal nga tabang?

Pagkat-on pa og dugang

Ubang mga Kapanguhaan mahitungod sa mga Panalangin sa Pagkapari