Librarya
Kamatuoran

“Kamatuoran,” Mga Hilisgotan ug mga Pangutana (2023)

pagsubang sa adlaw

Giya sa Pagtuon sa Ebanghelyo

Kamatuoran

Ang kahibalo nga mogiya nato balik ngadto sa Dios

Ang atong kalibotan napuno sa nagkalainlaing mga panglantaw ug mga opinyon. Usahay lisod nga mahibalo kon kinsa ug unsa ang tuohan. Si Presidente Dieter F. Uchtdorf, samtang nagserbisyo sa Unang Kapangulohan, miingon: “Wala pa sukad sa kasaysayan sa kalibotan nga aduna kitay mas sayon nga paggamit sa daghang impormasyon—ang uban niini tinuod, ang uban dili tinuod, ug ang kadaghanan tinuod sa ubang bahin. Agi og sangpotanan, wala pa sukad sa kasaysayan sa kalibotan nga mas importante ang pagkat-on unsaon nga hustong makaila tali sa kamatuoran ug sayop.” Pinaagi sa pagpangita sa kasaligan nga mga tinubdan ug sa pagsalig sa giya sa Espiritu, makaila kita kon unsay tinuod ug kon unsay dili tinuod.

Unsa ang Kamatuoran?

Ang mga kasulatan naghulagway isip ang “kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabot” (Doktrina ug mga Pakigsaad 93:24). Ang kamatuoran gitandi diha sa mga kasulatan ngadto sa kahayag ug pagpadayag gikan sa langit (tan-awa sa Doktrina ug mga Pakigsaad 84:45; 88:66–67; Giya ngadto sa mga Kasulatan, “Kamatuoran,” Librarya sa Ebanghelyo). Ang tinubdan sa kamatuoran mao ang Dios mismo. Ang balaanong kamatuoran gipadayag sa atong panahon pinaagi ni Propeta Joseph Smith ug ubang mga propeta sa ulahing mga adlaw. Ang mga kamatuoran nga makita diha ebanghelyo ni Jesukristo mahinungdanon sa pag-andam nato alang sa kaluwasan ug kahimayaan (tan-awa sa 2 Nephi 31:19–21; Doktrina ug mga Pakigsaad 33:10–12).

May kalabotan nga mga giya sa pagtuon sa ebanghelyo: Conversion [Pagkakabig], Pagkat-on ug Pagtudlo sa Ebanghelyo ni Jesukristo

Seksiyon 1

Ang Dios mao ang Tinubdan sa Mahangtorong Kamatuoran

batang babaye nga nagbasa sa mga kasulatan daplin sa dagat

Ang Dios nga Amahan “puno sa grasya ug kamatuoran.” (Doktrina ug mga Pakigsaad 66:12). Si Jesukristo miingon, “Ako mao ang dalan, ang kamatuoran, ug ang kinabuhi” (Juan 14:6). Siya namahayag sa kamatuoran—sa kanunay pinaagi sa gahom sa Balaang Espiritu ug pinaagi sa iyang mga propeta—ug dili mamakak (tan-awa sa Jacob 4:13; Ether 3:12; Doktrina ug mga Pakigsaad 1:37–38).

Ang gipahiuli nga ebanghelyo ni Jesukristo naglakip sa kahingpitan sa balaanong kamatuoran nga gipahiuli sa atong panahon. Ang balaanong kamatuoran dili mausab ug mahangtoron (tan-awa sa Doktrina ug mga Pakigsaad 1:39; 88:66).

Ang Dios nagdapit nato sa pagkat-on sa balaanong mga kamatuoran mahitungod ni Jesukristo, sa Iyang mga pagtulun-an, ug sa Iyang maulaong sakripisyo. Mao kini ang pipila sa labing importante nga mga kamatuoran nga gipadayag (tan-awa sa 2 Nephi 2:6–7; 31:15, 21; 3 Nephi 21:6).

Mga butang nga angayang hunahunaon

  • Dili tanang kamatuoran nga parehas ang kaimportante. Si Propeta Joseph Smith miila sa labing importante nga mga kamatuoran sa ebanghelyo: “Ang sukaranan nga mga baroganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabotan sa atong relihiyon sumpay lamang niini.” Mahimo kamo nga magdrowing og usa ka kahoy ug isulat ang “si Jesukristo nabanhaw” sa punoan niini. Dayon diha sa mga sanga, o “mga sumpay,” mahimo ninyong sulatan sa mga kamatuoran nga inyong nahibaloan nga motubo gikan niining mahinungdanong kamatuoran. Unsa ang mahitabo kon kining uban nga mga kamatuoran mabulag gikan niining mahinungdanong kamatuoran? Ngano nga ang pagpamatuod sa mga propeta ug apostoles mahitungod kang Jesus ug sa Iyang Pagkabanhaw importante kaayo sa atong pagtuo diha sa ubang mga kamatuoran? Pamalandongi kon unsaon ninyo sa pagpalig-on ang inyong pagtuo diha sa Manluluwas ug sa Iyang Pagkabanhaw, ug hunahunaa kon sa unsang paagi nga kana makaamuma sa inyong pagtuo sa ubang mga kamatuoran sa ebanghelyo.

  • Gusto sa Dios nga ang Iyang tanang anak magkat-on sa balaanong kamatuoran. Diha sa pamahayag sa Pagpahiuli, ang Unang Kapangulohan ug ang Korum sa Napulog Duha mitudlo: “Kami isip Apostoles ni [Kristo] modapit sa tanan nga masayod—sama kanamo—nga ang kalangitan bukas. Kami momatuod nga ang Dios mipahibalo sa Iyang kabubut-on alang sa Iyang pinalanggang mga anak nga lalaki ug mga anak nga babaye. Kami mopamatuod nga kadtong mainampoong magtuon sa mensahe sa Pagpahiuli ug molihok uban sa pagtuo mapanalanginan nga makaangkon og ilang kaugalingong pagsaksi sa kabalaan niini ug sa katuyoan niini sa pag-andam sa kalibotan alang sa gisaad nga Ikaduhang Pag-anhi sa atong Ginoo ug Manluluwas, si Jesukristo.” Mahimo kamo nga mangita sa pamahayag sa Pagpahiuli og mga kamatuoran nga nakapatandog ninyo. Dayon pamalandongi kon ngano nga ang matag kamatuoran importante nga mahibaloan ug kon sa unsang paagi nga makaapekto kini sa mga pagpili nga inyong gihimo.

Kalihokan alang sa pagkat-on uban sa laing mga tawo

  • Basaha og dungan kini nga pamahayag ni Presidente Russell M. Nelson:

    “Sukwahi sa mga pagduhaduha sa uban, kini aduna gayoy sama sa butang nga husto ug sayop. Aduna gayoy hingpit nga kamatuoran—mahangtorong kamatuoran. Usa sa mga katalagman sa atong panahon mao ang kagamay sa mga tawo nga nahibalo asa mangita alang sa kamatuoran [tan-awa sa Doktrina ug mga Pakigsaad 123:12]. …

    “Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi.”

    Mahimo kamo nga magtinabangay sa paghimo og listahan sa mga kamatuoran nga hingpit gayod ug mahangtoron (sama sa “Ang Dios mao ang atong Langitnong Amahan”) ug mga kamatuoran nga temporaryo (sama sa “Ang t-shirt nga akong gisul-ob kay pula” o “Nag-ulan sa gawas”). Ngano nga importante nga makaila sa kalainan tali sa mahangtorong mga kamatuoran ug temporaryong mga kamatuoran? Mahimo usab ninyong hisgotan kon asa kamo “modangop alang sa kamatuoran”—ilabi na alang sa mahangtorong kamatuoran.

Pagkat-on pa og dugang

Seksiyon 2

Gusto sa Dios nga Kita Magkat-on ug Mopakigbahin sa Balaanong Kamatuoran

batan-ong lalaki ug babaye nga nagbasa sa mga kasulatan

Gusto sa atong Langitnong Amahan nga kita masayod ug motuo sa balaanong mga kamatuoran sa ebanghelyo. Ang atong panabot sa kamatuoran nagagikan sa Dios pinaagi sa Espiritu Santo. Ang Espiritu Santo mogiya nato ngadto sa kamatuoran (tan-awa sa 1 Mga Taga-Corinto 2:9–10, 14; Moroni 10:4–5; Doktrina ug mga Pakigsaad 84:44–47). Kon kita mopili nga molihok base sa kamatuoran nga atong nadawat, makadawat kita og dugang nga kamatuoran gikan sa Dios (tan-awa sa 2 Nephi 28:30; Doktrina ug mga Pakigsaad 93:26–28).

Gusto usab sa Dios nga kadtong kinsa nakabaton sa kamatuoran nga ipakigbahin kini ngadto sa uban (tan-awa sa Enos 1:26; Doktrina ug mga Pakigsaad 58:47; 75:3–5). Pananglitan, ang mga ginikanan gitambagan sa pag-amuma sa ilang mga anak diha sa kahayag ug kamatuoran (tan-awa sa Doktrina ug mga Pakigsaad 93:40, 42). Ug kita makapakigbahin usab sa ebanghelyo ngadto sa uban nga natago gikan sa kamatuoran tungod kay wala sila masayod kon asa kini pangitaon (tan-awa sa Doktrina ug mga Pakigsaad 123:12).

Mga butang nga angayang hunahunaon

  • Si Elder John C. Pingree Jr. mitudlo:

    “Ang Dios nagpadayag og mga kamatuoran [sa doktrina] pinaagi sa mga propeta, ug ang Espiritu Santo mokompirmar niadto nga mga kamatuoran ngari kanato ug motabang nato sa paggamit niini. Kita kinahanglan gayod nga mahimong andam sa pagdawat niining espirituhanong mga pag-aghat kon kini moabot. Kita labing dali nga modawat sa pagsaksi sa Espiritu kon kita mapainubsanon, sinserong mag-ampo ug magtuon sa mga pulong sa Dios, ug motuman sa Iyang mga sugo.

    “Sa higayon nga ang Espiritu Santo mokompirmar og usa ka piho nga kamatuoran ngari kanato, ang atong pagsabot mapalawman kon atong ibutang kana nga baroganan ngadto sa buhat. Kon kita magmakanunayon sa pagsunod niana nga baroganan, kita makaangkon og segurado nga kahibalo kabahin niana nga kamatuoran.”

    Ikonsiderar ang pagsulat sa pipila ka kamatuoran nga gipadayag sa Dios nganha ninyo pinaagi sa mga propeta. Kanus-a ninyo gibati ang Espiritu Santo nga nagmatuod niini nga mga kamatuoran nganha ninyo? Sa unsang paagi nga kamo mas tinuoray nga makaandam sa pagdawat og espirituwal nga mga pagbati mahitungod sa mga kamatuoran sa doktrina? Sa unsang paagi nga inyong magamit ang inyong kahibalo niini nga mga kamatuoran?

Kalihokan alang sa pagkat-on uban sa laing mga tawo

  • Basaha ang 2 Nephi 28:26–30 ug Doktrina ug mga Pakigsaad 93:11–13. Hisgoti kon unsa ang gitudlo niini nga mga bersikulo mahitungod sa pagkat-on ug pagdawat niining balaanong kamatuoran. Tingali mahimo ninyong hisgotan ang ubang mga ehemplo sa mga butang nga mahitabo o molambo “pagtulun-an human sa usa ka pagtulun-an” o “diyutay dinhi ug diyutay didto.” Unsa ang gisugyot niini nga mga ehemplo mahitungod sa pagpalambo sa atong kahibalo sa kamatuoran? Dayon basaha ang tambag ni Presidente Nelson: “Ako miawhag kanila—ug ako mangamuyo kaninyo karon—sa pag-ako sa responsibilidad sa inyong pagpamatuod ni Jesukristo ug sa Iyang ebanghelyo. Trabahoa kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye. Samtang inyong himoon ang inyong pagpamatuod ni Jesukristo nga inyong kinatas-an nga prayoridad, bantayi ang mga milagro nga mahitabo sa inyong kinabuhi.” Mopakigbahin sa usag usa kon sa unsang paagi nga ang inyong pagpamatuod milambo “grasya ug dugang pa nga grasya;” ug “pagtulon-an human sa usa ka pagtulon-an.” Sa inyong pamati unsa ang ipasabot sa “sa pag-ako sa responsibilidad sa inyong pagpamatuod ni Jesukristo”? Mahimo kamo nga magtanom ug amumahan kini nga mag-uban ug bantayan kini sa pagtubo. Mahimo dayon ninyong hisgotan ang mga pagkasusama tali sa pag-amuma sa tanom ug pag-amuma sa atong mga pagpamatuod ug sa “mga bunga” nga atong maani gikan sa matag usa niini.

Pagkat-on pa og dugang

Seksiyon 3

Pagpangita sa Kamatuoran pinaagi sa Pagtuon ug pinaagi sa Hugot nga Pagtuo Mogiya Kanato ngato sa Espirituwal nga Kaseguroan

tawo nga nagbasa sa mga kasulatan

Ang Ginoo nagdapit kanato sa “pagpangita sa pagtulun-an, gani pinaagi sa pagtuon ug usab pinaagi sa hugot nga pagtuo.” (Doktrina ug mga Pakigsaad 88:118). Kana nagpasabot, uban sa lain pang mga butang, nga kon kita adunay mga pangutana mahitungod sa kasaysayan, doktrina, ug mga kalihokan sa Simbahan, kita magtuon sa kasaligan nga mga tinubdan ug mopakita og hugot nga pagtuo ug pagsalig kang Jesukristo samtang mangita sa mga tubag. Ang kaaway nagtinguha sa pagpalayo sa atong mga kasingkasing gikan sa mahangtorong kamatuoran (tan-awa sa Doktrina ug mga Pakigsaad 78:10; 93:39). Ang paghangop sa balaanong kamatuoran makatabang nato sa pagsalikway sa daotan ug paglikay sa sala, sayop, ug paglingla (tan-awa sa Doktrina ug mga Pakigsaad 50:23–25; 93:37).

Mga butang nga angayang hunahunaon

  • Isip usa ka batan-on, si Joseph Smith mibati og kalibog samtang nangita siya sa mga tubag sa iyang espirituhanong mga pangutana. Basaha ang Joseph Smith—Kasaysayan 1:5–6, 10–13 aron masayran kon giunsa sa Ginoo pagtabang kaniya. Sa unsang paagi nga ang iyang pagpangita sa kamatuoran migiya niya ngadto sa espirituwal nga kaseguroan? Unsa ang inyong nakat-onan gikan sa kasinatian ni Joseph Smith nga makatabang ninyo sa inyong pagpangita sa kamatuoran?

Kalihokan alang sa pagkat-on uban sa laing mga tawo

  • Sa pagsugod og usa ka panaghisgotan mahitungod sa espirituwal nga kaluwasan nga moabot gumikan sa lig-ong pagpamatuod sa kamatuoran, mahimo kamo nga maghisgot mahitungod sa mga butang nga inyong gibuhat aron mahimong luwas gikan sa mga aksidente, sakit, o mga kalamidad. Unsay atong isulti ngadto sa usa ka tawo nga naghunahuna nga kini nga mga pag-amping dili mahinungdanon o dili takos sa paningkamot? Dayon mahimo ninyong basahon og dungan kini nga mga pulong ni Presidente Thomas S. Monson: “Nagpuyo kita sa usa ka panahon sa daghang kagubot ug kadaotan. Unsay makapanalipod nato gikan sa sala ug dautan nga ania sa kalibutan karon? Moingon ko nga ang lig-ong pagpamatuod sa atong Manluluwas, nga si Jesukristo, ug sa Iyang ebanghelyo makatabang sa paggiya kanato padulong sa kaluwasan. … Mahinungdanon alang kaninyo nga adunay inyong kaugalingon nga pagpamatuod niining malisud nga mga panahon, kay ang mga pagpamatuod sa uban igo lang nga moabag kaninyo.” Mopakigbahin sa usag usa kon sa unsang paagi nga ang inyong personal nga pagpamatuod bahin sa mahangtorong kamatuoran nakapanalipod kaninyo sa espirituhanong paagi.

Pagkat-on pa og dugang