“Kaminyoon,” Mga Hilisgotan ug mga Pangutana (2023)
Giya sa Pagtuon sa Ebanghelyo
Kaminyoon
Ang potensyal alang sa asawa ug bana nga magkahiusa alang sa kahangtoran
Daghang tawo ang nagpaabot sa kaminyoon uban ang dakong kalipay ug pagpaabot. Adunay butang nga talagsaon nga maanindot ug malaomon mahitungod sa kaminyoon. Kadtong kinsa nagkasabot nga magminyo madasigon nga magsugod og bag-ong kinabuhi uban sa tawo nga ilang gihigugma labaw kay ni bisan kinsa.
Human kita maminyo, kinahanglan nga maningkamot ta sa paghimo niana nga kaminyoon nga himsog ug lig-on. Nagkinahanglan kini og paningkamot, pailob, pagpaubos, pagpasaylo, ug pahinungod nga molungtad og dugay human sa adlaw sa kasal aron makahimo og malipayon, malahutayon nga kaminyoon. Ang paningkamot takos kaayo sa ganti. Pinaagi sa sagrado nga mga ordinansa ug mga pakigsaad nga gihimo sa balay sa Ginoo, ang relasyon sa kaminyoon mahimong molungtad sa kahangtoran. Ang kaminyoon sa templo gitawag usab og celestial nga kaminyoon. Mitudlo si Presidente Russell M. Nelson nga “ang celestial nga kaminyoon maghatag og dakong kalagmitan alang sa kalipay kay sa ubang mga pakigrelasyon.”
Unsa ang Kaminyoon?
Ang Simbahan ni Jesukristo sa mga Santos sa Ulahing mga Adlaw nagtudlo nga ang kaminyoon tali sa usa ka babaye ug lalaki giorden sa Dios (tan-awa sa Doktrina ug mga Pakigsaad 49:15; “Ang Pamilya: Usa ka Pamahayag ngadto sa Kalbotan,” Librarya sa Eanghelyo). Ang mga magtiayon nga naselyo sa templo mohimo og pakigsaad uban sa Dios ug sa usag usa. Kon matinud-anon sila sa ilang mga pakigsaad, ang ilang kaminyoon mahimong molungtad sa kahangtoran.
Kinatibuk-ang pagpasabot sa hilisgotan: Kaminyoon
May kalabotan nga mga giya sa pagtuon sa ebanghelyo: Everlasting Covenant, Family, Endowment and Sealing Ordinances
Seksiyon 1
Ang Kaminyoon Mao ang Sentro sa Plano sa Dios
Kabahin kita sa mahangtorong pamilya sa Dios, ug sa wala pa moanhi sa yuta nagpuyo kita sa langit kauban sa atong Langitnong Amahan ug sa Langitnong Inahan. Didto, gitudloan kita mahitungod sa plano nga makapakat-on nato ug makapalambo. Isip kabahin niana nga plano, mianhi kita sa yuta isip mga pamilya, kini nga mga pamilya makatabang nato nga mouswag ug mahimong mas sama sa Dios.
Ang kaminyoon mao ang sentro sa plano sa Dios alang sa Iyang mga anak. Si Propeta Joseph Smith mitudlo nga ang kaminyoon “usa ka institusyon sa langit nga unang gipahigayon didto sa tanaman sa Eden pinaagi sa Dios mismo, pinaagi sa awtoridad sa walay kataposan nga pagkapari.” Kon ang atong mga pamilya naselyo sa kahangtoran pinaagi sa samang gahom sa pagkapari diha sa balay sa Ginoo, gisunod nato ang mahangtoron, hinatag sa Dios nga sundanan nga naestablisar sa kinabuhi nga wala pa dinhi sa yuta.
Usa sa mga rason nga giestablisar sa Dios ang kaminyoon aron kita mas makakat-on ug sa pag-atiman sa usag usa. Ang lig-on na mga kaminyoon mosangpot ngadto sa mas lig-on nga mga pamilya, nga makatabang nato sa pagtuman sa atong mahangtorong katuyoan. Ang mas lig-on nga mga pamilya mosangpot usab ngadto sa mas lig-on nga mga komunidad dinhi sa yuta. Ang mga kaminyoon nga natukod sa mga baroganan sa ebanghelyo ni Jesukristo makatabang nato nga motubo ug makasinati sa pipila sa atong labing importante nga mga kalipay niining kinabuhia. Makatabang usab sila sa pag-andam nato alang sa kinabuhing dayon kauban sa atong Langitnong Amahan ug ni Jesukristo.
Mga butang nga angayang hunahunaon
-
Si Elder Ulisses Soares miingon: “Walay taas o ubos diha sa relasyon sa kaminyoon, ug walay [kapikas] nga maglakaw nga mag-una o maulahi sa usa. Sila tupad nga maglakaw, isip parehas, ang balaanong mga anak sa Dios. Sila mahimong usa sa hunahuna, tinguha, ug katuyoan uban sa atong Langitnong Amahan ug ni Jesukristo, manag-uban sa pagdumala ug paggiya sa yunit sa pamilya. … Ang [mao nga mga magtiayon] [m]aglakaw og dungan uban sa pagtahod, pagpasalamat, ug paghigugma, gikalimtan ang ilang kaugalingon ug nagtinguha sa kaayohan sa usag usa sa ilang panaw ngadto sa kahangtoran.” Hunahunaa ang inyong kaugalingong “panaw ngadto sa kahangtoran” isip kabahin sa plano sa Dios. Sa unsa nga paagi nga ang “tupad nga maglakaw, isip parehas,” kauban sa kapikas motabang ninyo niana nga panaw? Kon kamo naminyo, unsa ang inyong mahimo sa pagpakakita og mas dako nga pagtahod, pagpasalamat, ug paghigugma samtang inyong himoon kini nga panaw kauban sa inyong kapikas? Mahimo usab nga magplano kamo og piho nga butang nga inyong himoon alang sa inyong kapikas. Irekord ang inyong mga impresyon, ug dayon buhata kini.
-
Si Elder D. Todd Christofferson namulong niadtong kansang kaminyoon ug sa pipila ka panalangin kalabot niini nga dili mao ang kasamtangan nga nahitabo:
“Ang uban ninyo nahikawan sa panalangin sa kaminyoon sa mga rason nga naglakip sa kakulang sa takos nga kaminyoan, pagkaibog sa sama nga sekso, pisikal o mental nga kakulangan, o kahadlok nga mapakyas nga, sa pagkakaron, nakababag sa pagtuo. O tingali naminyo mo, apan kana nga kaminyoon natapos, ug nahabilin mong nagdumala nga nag-inusara sa unsay lisod ipatunhay sa duha. Ang uban ninyo nga naminyo dili makaanak bisan pa sa dakong tinguha ug sa mga pangamuyo sa pag-ampo.
“… Uban sa pagsalig kami mopamatuod nga ang Pag-ula ni Jesukristo nagpaabot ug, sa kataposan, mobayad sa tanang paghikaw ug nawala alang niadtong modangop ngadto Kaniya. Walay usa nga gitakda nang daan nga makadawat og minus pa kay sa tanan nga aduna ang Amahan alang sa Iyang mga anak.”
Unsay inyong nakit-an sa mga pulong ni Elder Christofferson nga basin makatabang ninyo o sa usa ka tawo nga inyong nailhan nga wala makadawat sa mga panalangin sa kaminyoon o kinsa wala makasinati niadtong nga mga panalangin karon? Sa unsa nga paagi ang Dios mopanalangin “niadtong moduol ngadto Kaniya” sa ilang panahon sa “kakulang ug pagkawala”?
Kalihokan alang sa pagkat-on uban sa laing mga tawo
-
Basaha ang Doktrina ug mga Pakigsaad 121:36–42 uban sa inyong kapikas o sa uban, ug hisgoti sa unsang paagi nga kini nga tudling may kalabotan sa kaminyoon. Si Presidente Gordon B. Hinckley mitambag: “Nagtuo ko nga kon kita motan-aw sa mga hiyas sa usag usa ug dili ang mga kasaypanan, adunay mas daghang kalipay sa mga panimalay sa atong katawhan. Adunay mas gamay ra nga diborsyo, mas gamay ra nga pagbudhi, mas gamay ra nga kasuko ug mas gamay nga kasilag ug panag-away. Adunay mas daghan nga pagpasaylo, mas dako nga gugma, mas daghan nga kalinaw, mas daghan nga kalipay. Mao kini ang gusto sa Ginoo.” Hisgoti sa unsang paagi nga ang paghinumdom niana nga kaminyoon mao ang sentro nga bahin sa plano sa kalipay nga makatabang nato sa pagsunod sa tambag ni Presidente Hinckley. Dayon mahimong mopakigbahin kamo og mga ideya alang sa pagpangita og dugang nga kalipay diha sa kaminyoon.
Pagkat-on pa og dugang
-
Genesis 1:27–28; 2:18, 21–24; 1 Mga Taga-Corinto 11:11–12; Doktrina ug mga Pakigsaad 42:22; 49:15–17
-
Ang Pamilya: Usa ka Pamahayag ngadto sa Kalibotan, Librarya sa Ebanghelyo
-
Gordon B. Hinckley, “Living Worthy of the Girl You Will Someday Marry,” Ensign, May 1998, 49–51
Seksiyon 2
Tungod sa mga Ordinansa ug mga Pakigsaad diha sa Templo, ang Kaminyoon Mahimong Mahangtoron
Niadtong 1843 ang Propeta midiktar sa pagpadayag nga karon narekord sa Doktrina ug mga Pakigsaad 132, nga naglakip sa doktrina sa mahangtorong kaminyoon. Kini nga doktrina mao kanang kaminyoon, kon naselyo pinaagi sa awtoridad sa pagkapari ug sa Balaan nga Espiritu sa Saad, balido dinhi sa yuta ug sa mga kahangtoran. Ang mahangtorong kaminyoon gitawag usab og celestial nga kaminyoon o “ang bag-o ug walay kataposan nga pakigsaad sa kaminyoon” (tDoktrina ug mga Pakigsaad 131:2). Nahimo kini nga posible pinaagi sa usa ka ordinansa sa pagkapari nga gitawag og pagselyo diha sa templo. Kining sagrado nga seremonya mahitabo sa balay sa Ginoo.
Ang mahangtorong kaminyoon naghimo og relasyon sa pakigsaad tali sa bana ug asawa ug sa Ginoo. Ang pakigsaad sa mahangtorong kaminyoon gikinahanglan alang sa kahimayaan (tan-awa sa Doktrina ug mga Pakigsaad 131:1–4). Kon matinud-anon kita niini nga pakigsaad, ang atong mga relasyon sa kaminyoon ug sa pamilya mahimong molungtad sa kahangtoran.
Mga butang nga angayang hunahunaon
-
Basaha pagdungan ang Doktrina ug mga Pakigsaad 132:19–20, ug pamalandongi unsa ang gitudlo niini nga mga bersikulo mahitungod sa pakigsaad sa kaminyoon. Si Sister Julie B. Beck mitudlo: “Ang lalaki ug babaye kinsa mosulod sa hingpit nga panag-uban sa pakigsaad diha sa kaminyoon sa templo managsamang mag-ambit sa mga panalangin niana nga pakigsaad kon sila matinud-anon [tan-awa sa Doktrina ug mga Pakigsaad 131:1–2]. Ang Ginoo miingon nga ang ilang pakigsaad magpadayon human niini nga kinabuhi, ug silang duha gisaaran og gahom ug kahimayaan [tan-awa sa Doktrina ug mga Pakigsaad 132:19–20].” Sa unsang paagi nga ang gisaad nga mga panalangin sa usa ka kaminyoon sa pakigsaad motabang sa minyo nga magtiayon nga magpabilin nga mapasaligon sa usag usa kon lisod ang sitwasyon?
-
Ang Dios gusto nga kita makabaton dili lamang bisan unsa nga kaminyoon apan usa ka mahangtorong, kaminyoon sa pakigsaad. Si Elder Bruce C. Hafen mitudlo: “Kon ang mga problema moabot ngadto sa kaminyoon sa pakigsaad ang bana ug ang asawa magtinabangay sa pagsulbad. Nagminyo sila aron mohatag ug mouswag, nabugkos pinaagi sa mga pakigsaad ngadto sa usag usa, ngadto sa komunidad, ug ngadto sa Dios.” Si Presidente Dieter F. Uchtdorf, samtang nagserbisyo sa Unang Kapangulohan, miingon, “Ang talagsaong kaminyoon gitukod sa hinay-hinay, matag adlaw, sa tibuok kinabuhi.” Tan-awa ang nag-uban nga imahe sa bika nga balay, ug hunahunaa ang mahitungod sa “mga bika” nga makapalig-on sa kaminyoon. Mahimong basahon ninyo ang mensahe sa komperensiya ni Presidente Uchtdorf “Agig Pagdayeg Niadtong Miluwas” ug mamalandong sa tambag nga iyang gihatag ngadto sa mga bana ug mga asawa. Unsa nga mga “bika” ang inyong ipahimutang sa mosunod nga pipila ka semana aron malig-on ang inyong kaminyoon o sa pag-andam alang sa usa ka lig-on nga kaminyoon?
Mga kalihokan alang sa pagkat-on kauban ang laing mga tawo
-
Ang atong mga paningkamot sa pagpalig-on sa atong kaminyoon adunay malungtarong mga epekto. Ang atong kaminyoon makaapekto dili lamang nato ug sa atong kapikas apan usab sa atong mga anak ug sa ilang mga anak, sa tibuok kahangtoran. Sa iyang mensahe “Bunga Nga Molungtad,” si Elder Matthew L. Carpenter namulong sa kaimportante sa pagpreserbar sa “bunga” sa atong pakigsaad sa kaminyoon ug gitandi kini ngadto sa mabinantayong pagpreserbar sa bunga diha sa mga botelya. Siya mitudlo, “Kon kita mohimo ug motuman sa mga pakigsaad sa Dios, ang mga panalangin nga may kalabotan sa atong mga pakigsaad mahimong molungtad lapas niini nga kinabuhi ug maselyo dinhi kanato, o mapreserbar, sa kahangtoran, mamahimong ang bunga nga molungtad alang sa tanang kahangtoran.” Mahimo nimong ikonsiderar ang pagbasa o pagpaminaw niini nga mensahe samtang magdungan nga malingaw sa gipreserbar nga bunga. Paghisgot mahitungod unsaon sa pag-amuma og usa ka kaminyoon aron mohatag og “bunga nga molungtad” lapas niining kinabuhia ug sa tibuok kahangtoran.
-
Kadaghanan sa minyo nga mga magtiayon adunay mga kalisod matag karon ug unya, ug usahay ang mahangtorong kaminyoon dili makab-ot. Apan si Presidente Hinckley mitambag: “Ang tambal sa kadaghanan nga mga problema sa magtiayon wala sa diborsyo. Anaa kini sa paghinulsol ug pagpasaylo, sa pagpadayag og kamabination ug kabalaka. Kini makaplagan pinaagi sa paggamit sa Golden Rule.” Kon kamo nakasinati og mga hagit sa inyong kaminyoon, hisgoti ang mahitungod sa unsang paagi nga ang paghinumdom sa inyong mga pakigsaad mahimong makatabang kaninyo sa paghimo og mga kausabanan nga gusto ninyong makita. Pagpili og butang nga nahimong lisod sa inyong kaminyoon, ug pagtambayayong sa pagsulbad niini (ang Strengthening Marriage sa Simbahan nga giya adunay daghang ideya nga makatabang). Pangayo og tabang sa gisaligan nga indibidwal (sama sa usa ka lider sa Simbahan, therapist, o magtatambag sa kaminyoon) kon gikinahanglan.
Pagkat-on pa og dugang
-
Russell M. Nelson, “Celestial nga Kaminyoon,” Liahona, Nob. 2008, 92–94
-
Marcus B. Nash, “Ang Bag-o ug Walay Kataposang Pakigsaad,” Liahona, Dis. 2015, 40–47