Librarya
Pag-atiman Niadtong Nanginahanglan

“Pag-atiman Niadtong Nanginahanglan,” Mga Hilisgotan ug mga Pangutana (2023)

batan-ong babaye nga nagtabang sa tigulang nga babaye sa paglabang sa dalan

Giya sa Pagtuon sa Ebanghelyo

Pag-atiman Niadtong Nanginahanglan

Kita mahimong gamiton sa Dios sa pagtabang sa uban

Nakahunahuna ba kamo mahitungod sa mga kalisdanan ug pag-antos sa mga tawo sa inyong palibot ug nag-ingon, “Usa lamang ko; unsa nga kaayohan ang akong mahimo?” Tingali usa lang kamo ka tawo, apan makahimo gihapon kamo og dakong kontribusyon pinaagi sa paghimo ug ginagmay ug yano nga mga butang sa pagtabang niadtong nanginahanglan. Ug ubay-ubay nga kaayohan ang mahimo sa matag adlaw kon daghang tawo ang motabang kon asa ug kon unsaon nga sila makatabang.

Makaatiman kamo niadtong nanginahanglan sa inyong palibot kon mopakigbahin kamo sa inyong panahon ug mga talento ug “mopakigbahin sa inyong kabtangan ngadto sa mga kabos, … sumala sa unsay [anaa kaninyo], sama sa pagpakaon sa gigutom, pagsinina sa hubo, [ug] pagduaw sa mga masakiton ug pagpangalagad alang sa ilang kahupayan, sa espirituwal ug temporal” (Mosiah 4:26).

Unsa man ang Pag-atiman Niadtong Nanginahanglan?

Ang pag-atiman niadtong nanginahanglan nagpasabot nga pagtabang sa uban sa temporal, sa espirituwal, ug sa emosyonal nga paagi. Naglakip kini sa “pagserbisyo ug pagpangalagad sa mga indibidwal, mga pamilya, ug mga komunidad; pagpakigbahin sa mga kapanguhaan … ngadto niadtong nanginahanglan; [ug] pagtabang sa uban nga mahimong makabarog pinaagi sa kinaugalingong paningkamot.” Ang pag-atiman alang sa pisikal nga mga panginahanglan mahimong nagpasabot sa pagtubag sa dinalian nga mga panginahanglan, apan mahimo usab nga nagpasabot kini sa pagtabang sa mga tawo nga mahimong makabarog pinaagi sa kinaugalingong paningkamot aron ilang matubag ang ilang kaugalingong mga panginahanglan sa umaabot. Ang pag-atiman alang sa emosyonal ug sa espirituwal nga mga panginahanglan naglakip sa pagpaminaw, pagsabot, ug pagtabang sa uban nga mahibalo nga sila gihigugma sa Langitnong Amahan ug ni Jesukristo. Isip mga miyembro sa Simbahan ni Jesukristo, kita nakigsaad sa pagpangalagad ug sa pagtabang sa pag-atiman niadtong anaa sa atong palibot.

May kalabotan nga mga giya sa pagtuon sa ebanghelyo: Gugma nga Putli, Pagpuasa

mga babaye nga nag-impake og mga kinarton

Seksiyon 1

Ang Dios Nagsugo Nato sa Paghigugma ug sa Pagserbisyo sa Uban

Ang Dios nahigugma sa Iyang tanang anak, ug gusto Siya nga mopanalangin nila. Kasagaran, ang paagi nga ang Dios mopanalangin sa Iyang mga anak mao ang serbisyo nga atong mahatag sa uban. Gani, usa sa duha ka dagkong mga sugo sa Dios mao ang paghigugma sa atong isigkatawo sama sa atong kaugalingon (tan-awa sa Marcos 12:28–34). Usa sa mga paagi nga masunod nato kini nga sugo mao ang “pag-alagad sa usag usa. … [ug] motabang niadtong nagkinahanglan sa … tabang” (Mosiah 4:15–16).

Diha sa mga templo sa Ginoo, kita nakigsaad sa pagsakripisyo ug sa pagpahinungod sa tanan nga anaa kanato ngadto Kaniya. Usa ka paagi nga mahimo nato kana mao ang madagayaon nga paghatag sa atong panahon ug mga paningkamot sa pagtabang sa mga tawo sa atong palibot. Kon buhaton nato, kita makaugmad og mas lawom nga relasyon ngadto sa atong Langitnong Amahan ug ni Jesukristo ug mas mahimong sama Kanila.

Ang pagserbisyo dili kanunay nga komportable o sayon. Apan mahimo kitang makahatag og kahupayan ug kalipay ngadto sa uban samtang kita nahigugma ug nagserbisyo kanila. Ug pinaagi sa pagserbisyo sa uban makasinati kita og tinuod nga kalipay ug mobati nga mapuslanon sa paghimo og butang nga mahinungdanon gayod.

Mga butang nga angayang hunahunaon

  • Kon gusto ka nga motabang niadtong nanginahanglan apan dili segurado kon unsaon, ang mensahe ni Elder David A. Bednar nga “Anaa sa Dalan sa Ilang Katungdanan” mahimong makatabang. Si Elder Bednar mitudlo: “[Ang] masinaboton nga igsoong mga lalaki ug mga babaye … nangita ug naglingkod tapad sa mga tawo nga nag-inusara diha sa mga miting sa simbahan ug diha sa lainlaing mga kahimtang. Kanunay silang naningkamot sa ‘paghupay niadtong nanginahanglan sa kahupayan’ [Mosiah 18:9], walay gipaabot nga pagtagad o pagdayeg.” Mahimo ninyong rebyohon ang iyang mensahe ug pangitaa ang ginagmay ug yano nga mga paagi sa pagserbisyo sa usa ka tawo nga nanginahanglan. Isulat ang inyong mga ideya, ug lihoka ang mga pagbati nga inyong madawat.

  • Si Propeta Joseph Smith mitambag: “Ang usa ka tawo nga puno sa gugma sa Dios, dili matagbaw sa pagpanalangin sa iyang pamilya lamang, apan mokaylap ngadto sa tibuok kalibotan, matinguhaon sa pagpanalangin sa tibuok katawhan.” Sa inyong hunahuna ngano nga ang usa ka tawo nga puno sa gugma sa Dios gusto nga mopanalangin sa tanang katawhan? Sa unsang mga paagi nga makapakigbahin kamo sa gugma sa Dios ngadto sa uban? Sa unsang paagi nga ang inyong mga buhat sa gugma ug kamabination makatabang ingon man sa inyong kausaban?

Kalihokan alang sa pagkat-on kauban ang laing mga tawo

  • Basaha og dungan ang Lucas 10:25–37. Mahimo usab ninyong tan-awon ang bidyo nga “Parable of the Good Samaritan” (4:55). Kon nagkat-on kamo kauban sa mga bata, tingali malingaw sila nga idrama-drama ang sambingay. Dayon mahimong ninyong hisgotan kon sa unsang paagi nga ang Samaryanhon misunod sa sugo nga higugmaon ang iyang isigkatawo. Mahimo usab ninyong hisgotan ang mga gibuhat sa pari ug sa Levita. Unsa ang pipila ka rason nga kita usahay dili moserbisyo niadtong nanginahanglan? Unsaon nato pagbuntog kadto nga mga babag? Mahimo kamo nga mopakigbahin sa usag-usa og pipila ka kasinatian sa higayon nga miserbisyo kamo sa usa ka tawo nga nanginahanglan—o sa higayon nga ang usa ka tawo miserbisyo ninyo—ug kon unsa ang inyong gibati. Ang matag usa ninyo mahimong magtakda og tumong sa pagserbisyo sa usa ka tawo matag adlaw sulod sa usa ka semana ug dayon moreport sa inyong mga kasinatian.

  • Basaha ang Mosiah 2:17, ug hisgoti kon sa unsang paagi nga kamo nagserbisyo sa Dios kon kamo nagserbisyo sa uban. Mahimo dayon ninyong tan-awon ang bidyo nga “Day of Service” (5:08). Sa unsang paagi nga ang mga tawo nga anaa sa bidyo napanalanginan samtang nagserbisyo sila? Sa unsang paagi nga ang komunidad napanalanginan? Ikonsiderar kon sa unsang paagi nga kamo makaapil isip usa ka grupo diha sa usa ka adlaw sa pagserbisyo. Mahimo kang mousisa sa JustServe.org alang sa mga ideya.

Pagkat-on pa og dugang

lalaki nga nagtabang sa babaye sa pagdala sa mga kinompra

Seksiyon 2

Kita nagsunod sa Ehemplo ni Jesukristo Kon Kita Nag-atiman Niadtong Nanginahanglan

Si Jesukristo mao ang atong mahinungdanong ehemplo sa pagserbisyo ug pagtabang sa uban; Siya sa pagkatinuod “miadto siya sa tanang dapit ug naghimog mga maayong butang” (Mga Buhat 10:38). Isip mga miyembro sa Iyang Simbahan, kita gidapit sa pagtabang sa pag-atiman niadtong anaa sa atong palibot (tan-awa sa Mosiah 18:8–10).

Isip mga sumusunod ni Kristo, naningkamot kita sa pagtan-aw sa uban sama sa pagtan-aw sa Manluluwas kanila—isip adunay walay kinutoban nga bili ug balaanong potensiyal. Kita motabang nila sa temporal, espirituwal, ug emosyonal nga mga panginahanglan. Ang Manluluwas mipakaon sa mga gigutom ug mihupay niadtong nasakitan (tan-awa, pananglitan sa Mateo 14:14–21; Lucas 7:11–15). Makabuhat usab kita niini. Pananglitan, kana mahimong nagpasabot sa pagdala og pagkaon ngadto sa usa ka silingan nga nanginahanglan, paglingkod ug pagpaminaw sa usa ka higala nga nawad-an sa usa ka minahal, o pagtabang sa pag-atiman sa usa ka tawo nga nasakit. Kita mangalagad sa uban nga wala magpaabot nga makadawat og butang agi og balos.

Mga butang nga angayang hunahunaon

  • Sa Abril 2010 nga kinatibuk-ang komperensiya, si Presidente Dieter F. Uchtdorf mitudlo, “Samtang kita mosunod sa hingpit nga ehemplo [ni Jesukristo], ang atong mga kamot mamahimong Iyang mga kamot; ang atong mga mata, Iyang mga mata; ang atong kasingkasing, Iyang kasingkasing.” Unsa ang ipasabot nga ang inyong mga kamot, mga mata, ug kasingkasing mahimong mga kamot, mga mata, ug kasingkasing sa Manluluwas? Sa unsang paagi nga kini nga panghunahuna makaapekto sa paagi sa inyong pagserbisyo sa uban? Basaha ang 1 Juan 3:17–19, ug pamalandongi kon unsay gitudlo niini mahitungod sa pag-atiman niadtong nanginahanglan. Sa unsang paagi nga kini nga mga bersikulo nakadasig ninyo sa pagsunod ni Jesukristo samtang nagserbisyo kamo niadtong anaa sa inyong palibot? Mahimo kamo nga maghunahuna og usa ka tawo nga nagkinahanglan og tabang o pagdasig ug mohimo og buhat sa pagserbisyo niana nga tawo nga dili magpahibalo. O mahimo kamo nga moserbisyo sa usa ka tawo pinaagi sa pagpaminaw sa iyang mga kabalaka o pinaagi sa pagkahimong tinuod nga higala. Mahimo dayon ninyong irekord ang inyong mga hunahuna mahitungod sa kasinatian.

  • Mahimo ninyong basahon o kantahon ang mga pulong sa usa ka himno mahitungod sa pagtabang niadtong nanginahanglan, sama sa “Sundon Ko Ikaw Ginoo” o “Kay Gihatagan Ko og Daghan.” Samtang maghunahuna kamo sa mga pulong sa kanta, ikonsiderar kon sa unsang paagi nga kamo nagsunod sa Manluluwas kon kamo nagserbisyo sa uban. Unsa nga mga panalangin nga inyong nadawat nga mahimo ninyong ipakigbahin sa pagbayaw niadtong anaa sa inyong palibot sama sa Iyang gihimo?

Kalihokan alang sa pagkat-on uban sa laing mga tawo

  • Si Elder Gerrit W. Gong mitudlo: “Mas mahisama kita ni Jesukristo kon kita mohimo ‘sa … usa sa labing ubos niini’ sama sa atong buhaton ngadto Kaniya [tan-awa sa Mateo 25:35–40], kon kita mohigugma sa atong isigkatawo sama sa atong kaugalingon [tan-awa sa Marcos 12:31], kon kita ‘maghigugmaay ingon nga ako nahigugma kaninyo’ [Juan 13:34], ug kon ‘usa kaninyo gustong ilhon nga dako kinahanglan nga mag-alagad siya sa tanan’ [Mateo 20:26].”

    “Isip mga sumusunod ni Jesukristo, tinguha nato nga makaalagad sa uban sama sa Iyang pagabuhaton kay dunay mga kinabuhi nga naghulat aron mausab.”

    Mahimo ninyong hisgotan ang mahitungod sa pipila ka paagi nga si Jesukristo miserbisyo sa uban (tan-awa sa Mateo 14:13–21; Marcos 2:1–12; Lucas 17:11–19; Juan 9:1–7; 11:1–44). Mahimo usab ninyong pangitaon ang mga hulagway sa pipila niini nga mga asoy diha sa Pakete sa mga Hulagway sa Ebanghelyo o sa koleksiyon sa “Mga Bidyo ug mga Litrato” diha sa Librarya sa Ebanghelyo. Mopakigbahin ngadto sa usag usa kon unsa ang nakapadayeg ninyo mahitungod sa paagi sa Manluluwas sa pag-atiman niadtong nanginahanglan. Mahimo dayon kamo nga mopili og usa ka butang mahitungod sa paagi sa Manluluwas sa pagserbisyo nga gusto ninyong sundon. Ikonsiderar kon sa unsang paagi nga ang inyong mga binuhatan tinuoray nga makapanalangin niadtong kansang “mga kinabuhi naghulat aron mausab.”

Pagkat-on pa og dugang

kongregasyon sa simbahan

Seksiyon 3

Kita Nag-atiman sa Uban samtang Kita Nagserbisyo sa mga Calling sa Simbahan

Atol sa Iyang mortal nga pangalagad, si Jesukristo mihatag sa Iyang mga disipulo og importante nga mga responsibilidad sa pagtabang nga matuman ang buhat sa Iyang Amahan (tan-awa, pananglitan sa Lucas 10:1–9). Ang Ginoo nagdapit usab nato nga moapil karon sa buhat sa Ginoo sa kaluwasan ug kahimayaan. Kini nga mga oportunidad sa pagserbisyo gitawag nga mga calling.

Ang mga calling mao ang mga responsibildad gikan sa Ginoo ngadto sa Iyang mga anak nga naghatag nila og oportunidad sa pagserbisyo sa Iyang Simbahan ug sa pagpaduol ngadto Kaniya ug ngadto sa ubang mga miyembro. Kini nga mga calling gihatag pinaagi sa mga lider sa Simbahan, nga nangayo og inspirasyon gikan sa Ginoo sa dili pa ihatag ang imbistasyon sa pagserbisyo. Matag calling ug buluhaton sa Simbahan importante sa pagtabang nga matuman ang buhat sa Dios ug sa pagpangandam alang sa Ikaduhang Pag-anhi sa Manluluwas.

Mga butang nga angayang hunahunaon

  • Hunahunaa ang mga calling ug mga responsibilidad nga aduna kamo diha sa Simbahan samtang magbasa sa Juan 15:16. Dayon basaha kini nga hunahuna ni Presidente Henry B. Eyring: “Ang Ginoo nakaila kaninyo. Siya nasayod kon kinsa ang Iyang paserbisyohon sa matag katungdanan diha sa Iyang Simbahan. Siya mipili kaninyo.” Hunahunaa ang “bunga” nga inyong nakita gikan sa pagserbisyo sa inyong mga calling o mga buluhaton. Ngano kaha nga ang Ginoo mipili ninyo sa inyong kasamtangan nga calling? Unsa ang inyong buhaton sa inyong calling aron ang inyong pagserbiyo adunay malungtarong epekto sa uban ug ang “inyong bunga molungtad”?

Kalihokan alang sa pagkat-on uban sa laing mga tawo

  • Mahimo ninyong idrowing ang inyong mga tiil sa pipila ka higayon aron makahimo og yano nga mga tunob dayon isulat sa sulod sa matag tunob ang usa ka paagi nga kita mas mapaduol ngadto ni Kristo samtang nagserbisyo kita diha sa atong mga calling ug mga buluhaton sa Simbahan. Mahimo ninyong basahon og dungan kini nga hunahuna ni Presidente Dieter F. Uchtdorf: “Kon atong ikonsiderar ang atong mga calling isip mga oportunidad sa pagserbisyo sa Dios ug pagpangalagad sa uban diha sa pagtuo ug kamapaubsanon, ang matag buhat sa pagserbisyo maoy usa ka lakang diha sa dalan sa pagkadisipulo.” Mahimo dayon kamo nga mopakigbahin sa usag usa sa unsay inyong gisulat. Pamalandongi kon unsay inyong mahimo aron makaserbisyo uban sa mas dakong pagtuo ug kamapainubsanon diha sa inyong mga calling. Irekord ang mga pagbati nga moabot, ug dayon lihoka kini.

Pagkat-on pa og dugang

Ubang mga Kapanguhaan mahitungod sa Pag-atiman Niadtong Nanginahanglan

Mubo nga mga Sulat

  1. Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2.2, Librarya sa Ebanghelyo.

  2. David A. Bednar, “Anaa sa Dalan sa Ilang Katungdanan,” Liahona, Nob. 2023, 7.

  3. Mga Pagtulun-an sa mga Presidente sa Simbahan: Joseph Smith (2011), 515.

  4. Usa ka paagi nga kita makatabang sa pagtubag sa temporal nga mga panginahanglan mao ang pagdonar og mga halad sa puasa.

  5. Tanang hamtong nga mga miyembro sa Simbahan ug kabatan-onan nga nag-edad og 14 o mas magulang pa makaserbisyo sa laing tawo isip tigpangalagad nga brother o sister. Niini nga paagi, ang matag miyembro makatabang sa pag-atiman ug sa pagpakigdait apan sila usab atimanon ug ipakigdait. Tan-awa sa kapitulo 21 sa Kinatibuk-ang Tamdanan nga Basahon alang sa dugang nga impormasyon.

  6. Dieter F. Uchtdorf, “Kamo ang Akong mga Kamot,” Liahona, Mayo 2010, 68.

  7. “Sundon Ko Ikaw Ginoo,” Mga Himno, nu. 133.

  8. “Kay Gihatagan Ko og Daghan,” Mga Himno, nu. 132.

  9. Gerrit W. Gong, “Pagpangalagad,” Liahona, Mayo 2023, 18–19, 16.

  10. Tan-awa sa Kinatibuk-ang Tamdanan nga Basahon, 30.0.

  11. Tan-awa sa Kinatibuk-ang Tamdanan nga Basahon, 1.2.

  12. Henry B. Eyring, “Rise to Your Call,” Liahona, Nov. 2002, 76.

  13. Dieter F. Uchtdorf, “Ang Labing Dako Kaninyo,” Liahona, Mayo 2017, 80.