Librarya
Pagkakabig ngadto kang Jesukristo

“Hugot nga Pagtuo diha ni Jesukristo,” Mga Hilisgotan ug Mga Pangutana (2023)

babaye nga nagtindog duol sa tubig

Giya sa Pagtuon sa Ebanghelyo

Pagkakabig ngadto kang Jesukristo

Usa ka kausaban sa kasingkasing nga moabot tungod sa pagsunod ni Jesukristo

Nakakita na ba kamo og ulod nga migawas sa kinaiyahan? Paghunahuna og kadiyot kon unsa ka milagro nga pinaagi sa gahom sa metamorposis, ang usa ka ordinaryo nga ulod mausab man ngadto sa usa ka matahom nga kabakaba. Sa hinayhinay, ang ulod motubo ug mausab, mahimong butang nga hingpit nga bag-o.

Ang pagkakabig nagtanyag nianang samang matang sa matahom nga kausaban alang nato. Sa atong pagtutok sa atong mga kasingkasing ngadto ni Jesukristo, makigsaad sa pagtuman sa Iyang mga sugo, ug magtinguha sa pagbuhat sa Iyang kabubut-on, ang atong mga kinabuhi mausab. Sa hinayhinay, mahimo kitang “bag-o na nga [mga] binuhat” (2 Mga Taga-Corinto 5:17), mas sama sa dios ug mas nakaandam sa pagdawat og kinabuhing dayon.

Unsa ang Pagkakabig?

Ang pagkakabig mao ang proseso diin si Jesukristo nagtabang nato nga mausab ang atong mga pagtuo, kasingkasing, ug kinabuhi aron mahimong sama Kaniya ug sa atong Langitnong Amahan. Naglakip kini sa paggamit sa hugot nga pagtuo diha ni Jesukristo, paghinulsol, bunyag, pagtuman sa mga sugo, pagdawat sa makabalaan nga impluwensya sa Espiritu Santo, ug paglahutay sa kataposan. Pinaagi sa Pag-ula ni Jesukristo, ug pagsunod sa giya sa Espiritu, mausab kita ug mabuntog ang negatibo nga mga impluwensya sa kalibotan. Kini nga kausaban maghatag nato og kalinaw ug kalipay niini nga kinabuhi ug kinabuhing dayon sa kalibotan nga moabot.

Kinatibuk-ang pagpasabot sa hilisgotan: Pagkakabig

May kalabotan sa mga giya sa pagkat-on sa ebanghelyo: Hugot nga Pagtuo diha ni Jesukristo, Paghinulsol, Paglahutay hangtod sa Kataposan

Seksiyon 1

Ang pagkakabig ngadto kang Jesukristo Magkinahanglan og Panahon, Paningkamot, ug Pailob

Si Kristo nga nagtimbaya sa mga tawo

Si Jesukristo nagdapit kanatong tanan sa pagduol ngadto Kaniya. Samtang kita mosunod sa Manluluwas, mausab kita ug mahimong mas sama Kaniya. Alang sa kadaghanan, ang pagkakabig usa ka hinayhinay nga proseso kaysa sa resulta sa usa ka gamhanan o madramahon nga hitabo. Nagkinahanglan kini sa panahon ug padayon nga paningkamot.

Aron mahitabo ang pagkakabig, kinahanglan nga molihok kita inubanan sa hugot nga pagtuo ug kahibalo nga atong madawat pinaagi sa Espiritu Santo. Sa diha nga kita makabig “pinaagi sa gahom sa Espiritu … ang [atong] mga kasingkasing mausab.” Ang atong mga tinguha mosubay sa mga tinguha sa Langitnong Amahan ug ni Jesukristo. Si Elder David A. Bednar mitudlo: “Tinuod nga pagkakabig nagdala og kausaban sa gituohan, kasingkasing, ug kinabuhi sa tawo, sa pagdawat ug pagsunod sa kabubut-on sa Dios. … Resulta kini sa pagpadayag gikan sa Dios, uban sa indibidwal nga paghinulsol, pagsunod, ug kakugi.”

Apan ang pagkakabig ngadto ni Jesukristo wala magpasabot nga kita hingpit. Sa dalan sa pagkakabig, kitang tanan makahimo gihapon og mga sayop. Apan, pinaagi sa padayon nga hugot nga pagtuo diha ni Jesukristo ug sa inadlaw nga paghinulsol, ang atong pag-akses sa gahom ni Jesukristo makatubo ug madugangan ang atong pagkakabig ngadto Kaniya isip Iyang mga disipulo.

Mga butang nga angayang hunahunaon

  • Basaha kining duha ka tudling sa kasulatan mahitungod ni Apostol Pablo: Mateo 16:13–17 ug Lucas 22:31–32. Ngano nga ang hingpit nga pagkakabig ngadto ni Kristo usa ka importante nga lakang human makaangkon og pagpamatuod bahin Kaniya? Sa unsa nga paagi kita napanalanginan pinaagi sa tinuod nga pagkakabig ngadto ni Kristo?

  • Hunahunaa ang imbitasyon ug gahom sa Manluluwas sa pagtabang nato nga mausab ug mahimong sama Kaniya. Si Elder Eduardo Gavarret mitudlo: “Midapit kanato ang Ginoo gamit ang lain-laing mga berbo: ‘Umari kanako,’ ‘Sumunod ka kanako,” “Lakaw uban kanako.’ Sa matag sitwasyon usa kini ka pagdapit sa paglihok. Para kini sa tanang katawhan.” Hunahunaa kon sa unsang paagi nga ang kinabuhi ug mga pagtulun-an sa Manluluwas nagdapit nato nga mag-usab. Mahimo ninyong basahon ang Lucas 22:39–44; Juan 6:51; Mga Hebreo 5:9; 10:1–10; 2 Nephi 2:3–10; 9:5–24; ug Mga Artikulo sa Hugot nga Pagtuo 1:3 alang sa mga panabot. Ikonsiderar unsay mahimo ninyong buhaton karon o niini nga semana sa pagpakita sa Manluluwas nga inyong gidawat ang Iyang imbitasyon ug tabang sa pag-usab sa inyong kinabuhi.

Kalihokan alang sa pagkat-on kauban ang laing mga tawo

  • Mahimo kamong motan-aw og bidyo o motan-aw og mga litrato sa usa ka hayop nga moagi og metamorposis, sama sa pitopito nga mahimong usa ka baki o usa ka ulod nga mahimong usa ka kabakaba. Kon anaa, mahimo kamong motan-aw sa bidyo “Si Elder Neil L. Andersen Mipakigbahin og mga Leksiyon nga Nakat-onan gikan sa usa ka Kabakaba,” diin iyang gipakigbahin ang time-lapse nga bidyo nga nagpakita sa metamorposis sa usa ka ulod nga naghabi [weave] og chrysalis ug sa kataposan miguho nga nahimong usa ka matahom nga kabakaba. Hisgoti ang bahin sa talagsaong kausaban nga naagian niini nga mga hayop. Dayon basaha unsa ang gitudlo ni Apostol Pablo mahitungod sa pagkahimong “usa ka bag-o na siyang binuhat” diha ni Kristo (2 Mga Taga-Corinto 5:17). Sa unsang paagi nga ang pagkakabig ngadto ni Jesukristo sama sa mahimong bag-o nga binuhat? Si Presidente Dallin H. Oaks mitudlo nga ang “mga tawo nga nagpadulong sa gikinahanglan nga pagkakabig magsugod sa pagkakita og mga butang sama pagkakita sa atong Langitnong Amahan ug sa Iyang anak, si Jesukristo kanila. Nakadungog sila sa Iyang tingog imbes sa tingog sa kalibotan, ug sila naghimo sa mga butang sa Iyang pamaagi imbes sa mga pamaagi sa kalibotan.” Sa unsa nga paagi kamo mitubo ug nausab samtang inyong gibase ang inyong mga aksyon sa inyong pagkakabig ngadto sa ebanghelyo ni Jesukristo? Ikonsiderar ang pagsulat sa inyong mga hunahuna ingon man sa inyong pasalamat kon unsa ang nahitabo sa inyong kinabuhi.

  • Adunay daghang gamhanan nga mga istorya sa pagkakabig diha sa mga kasulatan. Makapili kamo og usa o daghan niini nga mga istorya, magtuon o motan-aw niini, ug tingali bisan himoan og drama. Ang mga ehemplo naglakip sa mga istorya ni Ruth (tan-awa sa Ruth 1), Enos (tan-awa sa Enos 1, o motan-aw sa “Enos Prays Mightily [Enos Nag-ampo Pag-ayo]”), Alma ang Batan-on (tan-awa sa Mosiah 27, o motan-aw sa “Alma the Younger Is Converted unto the Lord [Alma ang Batan-on Nakabig ngadto sa Ginoo]”), ug Hari Lamoni (tan-awa sa Alma 17–19, o motan-aw sa “Ammon Serves and Teaches King Lamoni [Ammon Miserbisyo ug Mitudlo sa Hari]”). Hisgoti unsa ang inyong nakat-onan gikan sa ehemplo sa indibidwal sa istorya. Bisan og ang pagkakabig sa kasagaran usa ka hinayhinay nga proseso kaysa sa unsay nahitabo niini nga mga indibidwal, makakat-on kita og daghan gikan sa mga kasinatian. Sa unsa nga paagi nga ang ilang mga kasinatian naglig-on sa inyong kaugalingon nga tinguha sa pagsunod sa imbitasyon ni Kristo nga mag-usab?

Pagkat-on pa og dugang

Seksiyon 2

Ang pagkakabig ngadto ni Jesukristo usa ka Tibuok Kinabuhi nga Panglimbasog

pamilya nga nag-ampo

Usa ka lahi nga butang ang makabig ngadto ni Jesukristo ug mopasalig sa pagsunod Kaniya. Lahi ang pagtuman niana nga pasalig sa imong tibuok nga kinabuhi. Sama sa gisulti ni Presidente Dieter F. Uchtdorf: “Ang pagkadisipulo ni Jesukristo dili usa ka paningkamot nga kausa lang sa usa ka semana o kausa sa usa ka adlaw. Usa kini ka paningkamot nga kinahanglang kanunay natong buhaton.”

Hinuon, kana wala magpasabot, nga kita kinahanglan nga mosalig sa atong kaugalingon nga gahom sa paglahutay hangtod sa kataposan. Ang Dios naghatag kanato og balaan nga tabang sa tanang higayon—Siya naggiya ug naghupay kanato uban sa Iyang Espiritu, kanunay Siyang nagtudlo kanato pinaagi sa Iyang mga propeta, ug gipadala Niya ang Iyang Anak aron mamatay alang kanato aron nga pinaagi sa hugot nga pagtuo diha Kaniya kita malig-on kon kita madagma.

Mga butang nga angayang hunahunaon

  • Unsa ang gikinahanglan aron magpabilin nga lig-ong nakabig sa ebanghelyo ug molahutay hangtod sa kataposan? Si Elder Dale G. Renlund mitudlo: “Kini nagpasabot nga mopadayon sa atong hugot nga pagtuo kang Jesukristo pinaagi sa pag-ampo, pagtuon sa mga kasulatan, pag-ambit sa sakramento kada semana, ug pagbaton sa Espiritu Santo isip atong makanunayon nga kauban. Kinahanglan kita nga aktibong motabang ug moalagad sa uban ug mopakigbahin sa ebanghelyo diha kanila. Kinahanglan kita nga hingpit nga matarong ug matinuoron sa tanang mga butang. … Kinahanglan kita moila sa mga tentasyon nga sayon nga mohasmag kanato ug ipalayo kini—layo gayod kaayo.” Mahimo ninyong basahon ang mensahe ni Elder Renlund “Pagpatunhay sa Dako og Kausaban nga Kasingkasing” ug maghunahuna unsay inyong gihimo aron magpabilin nga lig-ong nakabig ngadto ni Kristo. Gipadayon ba ninyo ang yanong inadlaw ug senimana nga mga kinaiya nga motabang ninyo nga magpadayon sa hugot nga pagtuo? Gilikayan ba ninyo ang tentasyon sa tanang posible nga paagi? Pamalandongi ug isulat ang mga bahin diin kamo gusto nga mohimo og mga kausaban sa inyong kinabuhi aron sa pagtabang ninyo nga magpabilin diha sa dalan sa pakigsaad.

Kalihokan alang sa pagkat-on kauban ang laing mga tawo

  • Ang Basahon ni Mormon nagsulti og usa ka gamhanan nga istorya sa usa ka grupo sa mga tawo nga gitawag og mga Anti-Nephi-Lehi kinsa “nakabig ngadto sa Ginoo, [ug] wala gayod mobiya” (Alma 23:6). Tun-i ang Alma 23–25, ug paghimo og lista sa mga butang nga inyong nakat-onan mahitungod niini nga grupo. Giunsa sila pagtabang sa Manluluwas nga mahimong hilabihan ka lig-on sa ilang hugot nga pagtuo? Dayon mahimo kamong magsulat matag usa sa usa ka piraso sa papel og usa ka butang nga inyong “ilubong … sa ilawom” (tan-awa sa Alma 24:16–17) nga makatabang ninyo nga magpabilin nga lig-ong mopasalig ngadto ni Jesukristo. O mahimo kamong molubong og pisikal nga butang aron mosimbolo sa inyong pasalig nga magpabilin nga matinud-anon.

  • Ang tibuok kinabuhi nga pagkakabig ngadto ni Jesukristo moabot gikan sa pagsunod sa Iyang ebanghelyo—kada adlaw. Si Sister Bonnie L. Oscarson mipakigbahin og importante nga mga kinaiya nga makapadasig og maluntarong pagkakabig: “Ang tinuod nga pagkakabig mahitabo samtang kamo magpadayon sa pagtuman sa mga doktrina nga inyong nahibaloan nga tinuod ug sa pagsunod sa mga sugo, matag adlaw, matag bulan. … Ang pagkakabig mahitabo kon kita magkugi sa pag-ampo, pagtuon sa atong mga kasulatan, pagsimba, ug pagpakatakos sa pag-apil sa mga ordinansa sa templo. Ang pagkakabig mahitabo samtang kita nagsunod sa matarong nga mga baroganan nga atong nakat-onan sa atong panimalay ug sa klase.”

    Aron sa pagtabang ninyo nga magpadayon diha sa dalan sa pagkakabig, mahimo ninyong dawaton kini nga hagit isip usa ka grupo: Kada adlaw sulod sa 30 ka adlaw, kon mag-atubang og mga pagpili, pangutan-a ang inyong kaugalingon, “Unsa ang buhaton sa usa ka tinuod nga nakabig nga Santos sa Ulahing mga Adlaw?” Ikonsiderar ang paghimo sa inyong kaugalingon nga may tulubagon ngadto sa usa ka tawo nga maoy magsunod niini nga tumong. Human makompleto ninyo ang hagit, mahimo ninyong hisgotan ang inyong mga kasinatian isip usa ka grupo. Giunsa sa Manluluwas sa pagtabang ninyo nga mausab samtang naningkamot kamo sa paghimo og mga pagpili nga nagsubay sa Iyang mga pagtulun-an?

Pagkat-on pa og dugang