Librarya
Pagpundok sa Israel

“Pagpundok sa Israel,” Mga Hilisgotan ug mga Pangutana (2023)

kongregasyon sa simbahan nanganta

Giya sa Pagtuon sa Ebanghelyo

Pagpundok sa Israel

Ang labing dakong kawsa sa yuta karon

Nakahuyop na ba kamo og usa ka tanom sama sa dandelion ug nakakita nga nagkatag ang mga liso? Unsa ang mahimo sa pagpundok pag-usab sa mga liso? Morag imposible kini. Ang tanang butang posible sa Dios.

Ang Daang tugon nagsulti sa laing matang sa pagkatibulaag—sa dihang ang katawhan sa Dios sa pakigsaad “sama sa usa ka alimpulos gipatibulaag ko sila ngadto sa ubang mga nasod” (Zacarias 7:14). Apan pinaagi sa Iyang mga propeta, ang Ginoo misaad nga sila sa umaabot nga adlaw pagapundokon pag-usab (tan-awa sa Deuteronomio 4:27–31).

Gitawag nato kini og “ang pagpundok sa Israel,” ug nagsugod kini sa dihang ang Simbahan ni Jesukristo gipahiuli sa ulahing mga adlaw ug ang Iyang ebanghelyo nagsugod sa pagkatap sa tibuok kalibotan. Kining paningkamot sa pagpundok nagpadayon nga makaangkon og kalamposan samtang ang Pagpahiuli sa ebanghelyo nagpadayon.

Unsa ang Pagpundok sa Israel?

Kon maghisgot sa pagpundok sa Israel, ang Israel nagpasabot sa literal nga kaliwatan ni Abraham, Isaac, ug Jacob. Nagpasabot usab kini niadtong kinsa gisagop ngadto sa ilang pamilya pinaagi sa pakigsaad sa bunyag. Sa karaang panahon, ang Dios mitibulaag sa mga anak sa Israel tungod sa ilang pagkadaotan ug rebelyon. Ang Israel pundokon sa dihang ang mga anak sa Dios modawat sa ebanghelyo ni Jesukristo, modawat sa mga ordinansa sa kaluwasan ug kahimayaan, mohimo og mga pakigsaad uban sa Dios, ug maningkamot sa pagtuman niadto nga mga pakigsaad.

May kalabotan nga mga giya sa pagtuon sa ebanghelyo: Everlasting Covenant, Inviting All to Receive the Gospel, Patriyarkal nga mga Panalangin, Second Coming of Jesus Christ

Seksiyon 1

Ang mga miyembro sa Simbahan ni Jesukristo kabahin sa Balay sa Israel

pamilya nga naa sa kongregasyon

Ang Ginoo miestablisar sa Iyang walay kataposan nga pakigsaad uban ni Adan. Gibag-o niya kini uban ni Abraham ug Sara, uban sa ilang anak nga lalaki nga si Isaac, ug sa ilang apo nga lalaki nga si Jacob, kansang ngalan giusab ngadto sa Israel. Ang mga kaliwatan ni Israel nailhan nga ang “balay ni Israel.” Apan sa atong panahon, ang termino magamit pa sa mas lapad nga paagi.

Si bisan kinsa nga nagtuo ni Jesukristo ug mosulod sa dalan sa Iyang pakigsaad pinaagi sa pag-apil sa Iyang gipahiuli nga Simbahan—bisan pa sa ilang kaliwatan—pundokon ngadto sa balay ni Israel ug mahimong kabahin sa katawhan sa Pakigsaad sa Ginoo (tan-awa sa Exodo 6:7; 1 Nephi 14:14; 3 Nephi 21:6; Abraham 2:10). Kini nga mga sumusunod ni Kristo mga anak sa pakigsaad (tan-awa sa 3 Nephi 20:25–27). Samtang tumanon nila ang ilang mga pakigsaad, madawat nila ang sama nga mga panalangin nga gisaad ngadto ni Abraham, Isaac, ug Jacob (tan-awa sa Doktrina ug mga Pakigsaad 38:17–20; 132:30–31; Abraham 2:9–11).

Mga butang nga angayang hunahunaon

  • Aron makat-on pa og dugang sa unsang paagi nga ang mga miyembro sa Simbahan kabahin sa balay ni Israel, mahimo ninyong tun-an ang pakigpulong ni Presidente Russell M. Nelson“Ipatigbabaw ang Dios Labaw sa Tanan.” Unsay ipasabot niini diha kaninyo nga mahimong kabahin sa “Israel”? Mahimo usab ninyong basahon o paminawon ang mga pulong sa himno nga naghisgot mahitungod sa Israel, sama sa “Manunubos sa Israel,” “Israel, Israel, Dios Nagtawag,” ug “Paglaom sa Israel,” mopuli sa pulong nga “Israel” sa “mga tighupot sa pakigsaad” aron makita unsa nga mga panabot ang imong maangkon.

  • Si Elder David A. Bednar mitudlo mahitungod sa kaimportante sa pagpili nga mahimong kabahin sa katawhan sa pakigsaad sa Dios pinaagi sa pagsunod sa Iyang mga balaod: “Kita adunay tawag gikan sa Dios ug atong indibidwal nga tubag ngadto niana nga tawag, ug daghan ang mahimong matawag apan diyutay ra ang mapili. Ang pagkamahimo o mahimo nga pinili dili limitado nga kahimtang nga gitugyan ngari kanato. Hinuon, kamo ug ako sa kataposan makapili nga mahimong mapili pinaagi sa matarong nga paggamit sa atong moral nga kabubut-on.” Unsa nga mga panalangin ang moabot kanato kon kita “mopili nga mahimong mapili” isip kabahin sa balay ni Israel? Unsa pa ang inyong mahimo aton mopili nga mahimong mapili?

Mga kalihokan alang sa pagkat-on kauban ang laing mga tawo

  • Mahimong basahon ninyo pagdungan ang kabahin sa pakigpulong ni Presidente Nelson “Mga Pagpili alang sa Kahangtoran” diin iyang gihisgotan ang mga label. Dayon tan-awa ang mga label sa pagkaon o ubang mga sudlanan ug hisgoti sa unsang paagi nga ang mga label niini nga mga aytem makaimpluwensya unsay atong gihunahuna mahitungod niini. Unsa ang tulo ka label nga alang kanato nga gisulti ni Presidente Nelson nga kinahanglan maoy unahon kay sa tanang ubang label? Sa unsa nga paagi nga ang label nga “anak sa pakigsaad” makatabang nato nga makasabot sa mga panalangin nga moabot tungod sa pagkamiyembro diha sa balay ni Israel? Basaha ang 3 Nephi 20:25–27, ug hisgoti unsa ang gitudlo niini nga mga bersikulo kanato mahitungod sa unsay gipaabot sa Ginoo gikan nato isip Iyang mga anak sa pakigsaad.

  • Pinaagi sa walay kataposan nga pakigsaad sa Dios nga nahimo ngadto sa piho nga katawhan sa tibuok siglo, ang tanan mahimong kabahin niini. Si Elder Quentin L. Cook mitudlo, “Kadto kinsa modawat sa ebanghelyo ni Jesukristo, dili igsapayan sa kaliwat, mahimong bahin sa napundok nga Israel.” Mahimo ninyong rebyohon ang mensahe sa “Luwas nga Pagapundokon Pauli sa Panimalay” aron makat-onan pa ang mahitungod sa kaimportante nga mahimong kabahin sa pagpundok sa Israel. Hisgoti kon unsay inyong nakat-onan.

Pagkat-on pa og dugang

Seksiyon 2

Ang Pagpundok sa Israel Mao ang Labing Importanteng Kawsa sa Yuta Karon

sister nga mga misyonaryo

Ang karaang mga Israelites gitibulaag tungod kay gisalikway nila si Jehova ug dili matinud-anong sa ilang mga pakigsaad ngadto Kaniya (tan-awa sa Levitico 26:33; Deuteronomio 4:23–27). Kini nga pagkatibulaag nahitabo sa usa ka yugto sa panahon, sa dihang ang mga Israelita nabuntog sa ubang nasod ug gidala ngadto sa pagkabihag (tan-awa sa 2 Mga Hari 17:6–23; 25:1–12; 1 Nephi 22:3–5). Gani mas masulob-on pa, daghan kanila nawad-an sa ilang pag-ila sa kaugalingon isip katawhan sa pakigsaad sa Dios (tan-awa sa 2 Nephi 6:8–11).

Apan ang Ginoo wala makalimot kanila. Misaad Siya nga pundokon Niya ang Iyang katawhan human sila magkatibulaag sulod sa usa ka panahon (tan-awa sa 2 Nephi 10:6–8; Doktrina ug mga Pakigsaad 33:6). Ang katawhan sa Dios gipundok sa higayon nga sila makahibalo sa ebanghelyo ni Jesukristo ug moduol ngadto Kaniya (tan-awa sa 1 Nephi 19:16).

Si Propeta Joseph Smith mitudlo nga ang unang tumong sa pagpundok sa katawhan sa Dios mao ang pagtabang kanila nga modawat sa mga ordinansa sa templo ug moandam nila alang sa kaluwasan. Ang pagpundok sa nagkatibulaag nga Israel importante sama sa panahon ni Propeta Joseph. Si Presidente Russell M. Nelson mitawag niini nga “ang labing dako nga kawsa, ug ang labing dako nga buhat sa yuta.” Mao kini ang paagi nga ang mga anak sa Dios makahibalo ug sa kataposan mobalik ngadto Kaniya.

Mga butang nga angayang hunahunaon

  • Si Presidente Nelson namulong kanunay mahitungod sa kaimportante sa pagpundok sa Israel. Siya mipahayag: “Ang Ginoo nagpundok niadtong mopili nga tugotan ang Dios nga maoy labing importante nga impluwensya diha sa ilang mga kinabuhi. Sulod sa daghang mga siglo, ang mga propeta nanagna niini nga pagpundok, ug nahitabo na kini karon! Isip usa ka gikinahanglang mag-una nga panghitabo sa dili pa ang Ikaduhang Pag-anhi sa Ginoo, kini ang labing importante nga buhat sa kalibotan!” Hunahunaa unsay gipasabot nga kini nga buhat mao ang “labing importante nga buhat” sa yuta. Sa unsang paagi nga kini nga kahibalo motabang ninyo sa paghukom unsaon ninyo sa paggahin sa inyong panahon, mga talento, kalagsik, ug mga kapanguhaan?

Mga kalihokan alang sa pagkat-on kauban ang laing mga tawo

himongaan nga nagpundok sa mga piso

  • Mahimo ninyong tun-an ang 3 Nephi 10:5–6 ug Doktrina ug mga Pakigsaad 29:1–8 ug maghisgot sa unsa nga paagi ang Ginoo magpundok sa Iyang katawhan sa kataposang mga adlaw. Sa unsang paagi nga ang pagpundok sa Israel sama sa usa ka himongaan nga nagpundok sa iyang mga piso? Samtang mamalandong kamo niini nga mga tudling sa kasulatan ug niini nga pangutana, tan-awa ang gisukip nga imahe sa usa ka himongaan ug mga piso. Pakigbahin sa usag usa sa ubang detalye gikan sa litrato nga ingon og importante. Sa unsang paagi nga kini nga mga detalye motabang ninyo nga makasabot unsa ang gusto sa Ginoo nga itudlo kanato mahitungod sa pagpundok? Sa unsang paagi kita gipanalipdan sa pisikal ug espirituwal nga paagi samtang kita magpundok kauban sa ubang mga Santos?

  • Mahimo ninyong tan-awon ang bidyo “Jesus Christ Prophesies of the Gathering of Israel” aron makat-on pa mahitungod sa pagpundok sa atong panahon. Unsa ang gitudlo sa Manluluwas niini nga asoy mahitungod sa unsang paagi ang pagpundok sa Israel matuman? Hisgoti ang mahitungod sa unsay inyong nakat-onan ug unsa kini ka importante kanato karon.

Pagkat-on pa og dugang

Seksiyon 3

Ang mga Santos sa Ulahing mga Adlaw Adunay Responsibilidad sa Pagtabang sa Ginoo sa Pagpundok sa Israel

mga batan-ong lalaki nga nagpakigbahin og kasulatan

Ang pagpundok sa Israel espirituwal ug pisikal (tan-awa sa 1 Nephi 22:3; Mga Baroganan sa Ebanghelyo [2011], 375). Wala madugay human gipahiuli ang Simbahan ni Jesukristo, ang Ginoo mimando sa mga Santos nga pisikal nga magpundok sa Kirtland, Ohio; Independence, Missouri; Nauvoo, Illinois; ug sa kataposan sa Walog sa Salt Lake. Karon, imbes nga magpundok sa usa ka dapit, ang mga miyembro sa Simbahan nagtukod sa Simbahan sa Ginoo sa mga dapit diin sila nagpuyo samtang sila magpundok ngadto sa Manluluwas—ngadto sa Iyang doktrina ug sa Iyang mga pakigsaad (tan-awa sa 2 Nephi 10:2).

Ang mga miyembro sa Simbahan adunay katungdanan sa pagtabang sa pagpundok (tan-awa sa Doktrina ug mga Pakigsaad 29:2, 7; 88:81; Abraham 2:10–11). Ang pagpakigbahin sa ebanghelyo usa ka importante nga bahin niana nga paningkamot. Mao usab ang buhat sa templo ug sa family history, samtang magtinguha ta sa pagtabang sa pagpundok sa Israel diha sa mga buhi ug sa mga patay.

Mga butang nga angayang hunahunaon

  • Si Elder Ronald A. Rasband mihatag og gibug-aton sa kaimportante sa misyonaryo nga buhat sa pagtabang sa pagpundok sa Israel. Miingon siya: “Kita nagpundok sa mga anak sa Dios niining kataposan nga mga adlaw nga sila unta adunay ‘mga panalangin nga gibubo ngadto sa ilang mga ulo’ [3Nephi 10:18] ug sa mga saad ‘sa mga katigayonan sa kahangtoran’ [Doktrina ug mga Pakigsaad 78:18]. Busa aron mapundok ang Israel kita nagkinahanglan og mga misyonaryo—mas daghan pa kaysa [kasamtangan] nga nagserbisyo. … Isip usa ka Apostol ni Ginoong Jesukristo, ako mohangyo kaninyo nga moserbisyo isip usa ka misyonaryo diha sa pagpundok sa Israel.” Hunahunaa unsaon ninyo sa pagtabang ang Ginoo sa pagpundok sa Iyang katawhan—pormal o dili pormal nga gitawag isip usa ka misyonaryo. Irekord ang mga impresyon nga inyong nadawat, ug buhata kini.

Mga kalihokan alang sa pagkat-on kauban ang laing mga tawo

  • Basaha pagdungan ang Doktrina ug mga Pakigsaad 18:10–16, ug ipakigbahin sa usag usa ang inyong mga impresyon mahitungod kon unsay gibati sa Dios mahitungod sa Iyang mga anak. Ngano nga ang buhat sa pagpundok sa Iyang mga anak importante kaayo ngadto Kaniya? Unsa ang atong makaplagan niini nga mga bersikulo nga nagdasig kanato sa pagtabang sa pagpundok sa Israel?

  • Unsaon nato sa pagtabang sa pagpundok sa Israel? Hunahunaa kining gamhanan nga pagpasabot gikan ni Presidente Russell M. Nelson: “Bisan kanus-a nga mobuhat kamo og bisan unsa sa pagtabang ni bisan kinsa sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, kamo nagtabang sa pagpundok sa Israel. Ingon lang niana ka yano.” Tingali makalingaw sa paghimo og lista sa mga kalihokan nga kabahin sa pagpundok sa israel. Tan-awa kinsa ang makahimo sa labing taas nga lista! Mahimo kamong mopakigbahin sa usag usa sa samang mga butang nga inyong nahimo niining semanaha—o nga inyong giplano nga himoon sa umaabot nga semana—sa pagtabang sa importante nga buhat sa pagpundok sa Israel. (Ang mga ehemplo maglakip sa pagtudlo og klase sa Primary o Sunday School, paghimo og family history, pagtambong sa templo, pagpakigbahin og kasulatan sa social media, o sa pagtabang og usa ka tawo nga nanginahanglan.) Unsa nga mga panalangin ang inyong nakita samtang mitabang kamo sa Dios sa Iyang buhat sa pagpundok sa Iyang katawhan ngadto Kaniya?

Pagkat-on pa og dugang