Librarya
Walay Kataposan nga Pakigsaad

“Walay Kataposan nga Pakigsaad,” Mga Hilisgotan ug mga Pangutana (2023)

Si Abraham nagluhod nga nag-ampo

Giya sa Pagtuon sa Ebanghelyo

Walay Kataposan nga Pakigsaad

Ang atong bag-o ug dili gayod matapos nga pakigsaad ngadto sa Dios

Aduna bay usa ka minahal nga misaad ninyo nga mobuhat og usa ka butang nga makapanalangin gayod sa inyong kinabuhi? Unsay inyong gibati sa dihang gituman nila kana nga saad?

Ang Langitnong Amahan naghimo usab og nindot nga mga saad ngari nato. Nahitabo kini sa dihang naghimo kita og sagrado nga mga saad, o mga pakigsaad, ngadto Kaniya samtang atong gidawat ang makaluwas ug makahimaya nga mga ordinansa sa Iyang ebanghelyo. Gani sukad pa niadtong wala pa malalang ang kalibotan, ang Dios misaad nga kita makabalik ug makapuyo uban Kaniya kon kita mosunod sa Iyang Anak, si Jesukristo. Kining walay kataposan nga pakigsaad unang gihimo ngadto kang Adan ug dayon gibag-o sa mosunod nga mga dispensasyon.

Si Presidente Russell M. Nelson mitudlo kon sa unsang paagi nga kita mapanalanginan kon kita mopili sa pagsulod sa usa ka relasyon sa pakigsaad uban sa Dios: “Sa higayon nga kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. … Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maloloy-on nga pailob ngari kanato.”

Unsa ang Walay Kataposan nga Pakigsaad?

Ang walay kataposan nga pakigsaad, nga nailhan usab nga pakigsaad ni Abraham, mao ang kahingpitan sa ebanghelyo ni Jesukristo ug naglakip sa tanang ordinansa ug mga pakigsaad nga atong gikinahanglan aron makaangkon og kaluwasan ug kahimayaan (tan-awa sa Doktrina ug mga Pakigsaad 66:2). “Kini ‘bag-o’ sa higayon nga ang Ginoo mobag-o o mopahiuli niini, ug kini ‘walay kataposan’ tungod kay kini dili mausab.” Ang walay kataposan nga pakigsaad naestablisar sa yuta ngadto kang Adan ug bag-ohay lang nga gibag-o sa Dios pinaagi ni Propeta Joseph Smith isip kabahin sa Pagpahiuli sa ebanghelyo sa ulahing mga adlaw (tan-awa sa Doktrina ug mga Pakigsaad 1:17–23).

Katibuk-ang pagpasabot sa hilisgotan: Pakigsaad ni Abraham

May kalabotan nga mga giya sa pagtuon sa ebanghelyo: Pagpahiuli sa Ebanghelyo, Mga Pakigsaad ug mga Ordinansa, Temples [Mga Templo], Marriage [Kaminyoon], Patriyarkal nga mga Panalangin, Gathering of Israel [Pagpundok sa Israel]

Seksiyon 1

Ang Pagtuman sa Bag-o ug Walay Kataposan nga Pakigsaad Moandam Nato alang sa Kinabuhing Dayon

mga batan-on sa gawas sa templo

Ang Ginoo mipahiuli sa walay kataposan nga pakigsaad, nga mao ang kahingpitan sa ebanghelyo ni Jesukristo, “aron mahimong kahayag sa kalibotan” ug “sa pag-andam sa agianan” alang sa Iyang pag-anhi (Doktrina ug mga Pakigsaad 45:9). Aron madawat ang walay kataposan nga pakigsaad, unahon nato ang Dios ug maghimo ug motuman sa mga pakigsaad sa ebanghelyo uban Kaniya. Si Presidente Nelson mitudlo nga ang atong mga pakigsaad, sugod sa pakigsaad nga atong gihimo atol sa bunyag, “modala kanato nga mas mapaduol pa gayod ngadto [sa Dios]” ug nga kini makabugkos kanato ngadto Kaniya og “walay kataposan nga pagkabugkos.”

Ang walay kataposan nga pakigsaad nga atong gihimo uban sa Dios mohangtod sa kahangtoran kon kita motuman niini. Kon kita magpabiling matinud-anon niini nga pakigsaad sa atong tibuok nga kinabuhi, kita mahimaya ug makabalik sa pagpuyo didto sa presensya sa Langitnong Amahan uban sa atong mga pamilya.

Mga butang nga angayang hunahunaon

  • Tun-i ang Doktrina ug mga Pakigsaad 133:57–62, mahitungod sa Ginoo nga nagpahiuli sa kahingpitan sa ebanghelyo ni Jesukristo. Unsa kaha ang ipasabot niini nga kini gihatag “diha sa katin-aw ug kayano”? Ikonsiderar kon sa unsang paagi nga kining yano apan matahom nga walay kataposang pakigsaad moandam ninyo aron makaangkon og kinabuhing dayon. Sa unsang paagi nga ang pagsabot niini nga potensiyal makaawhag ninyo sa pagtabang sa Ginoo sa Iyang buhat sa kaluwasan ug kahimayaan?

Kalihokan alang sa pagkat-on kauban ang laing mga tawo

  • Diha sa Doktrina ug mga Pakigsaad 22:1–4, ang Ginoo namahayag nga Siya mibag-o sa Iyang walay kataposan nga pakigsaad ngadto sa nahaunang mga Santos. Basaha og dungan ang ulohan sa seksiyon ug kini nga mga bersikulo, ug hisgoti kon unsay inyong nakat-onan mahitungod sa kamahinungdanon sa “bag-o” nga pakigsaad. Unsay ipasabot sa “mga buhat nga walay hinungdan”? Hisgoti kon unsay inyong nakat-onan sa bersikulo 3 mahitungod sa kaimportante sa Pagpahiuli sa ebanghelyo ug sa walay kataposan nga pakigsaad.

  • Tungod ni Jesukristo ug sa Iyang Pag-ula, makaangkon kita og kinabuhing dayon kon kita motuman sa atong mga pakigsaad ngadto Kaniya. Si Presidente Nelson mitudlo: “Kadtong mohimo og sagradong mga pakigsaad ug motuman niini gisaaran og kinabuhing dayon ug kahimayaan, ‘ang labing mahinungdanon sa tanan nga mga gasa sa Dios’ (Doktrina ug mga Pakigsaad 14:7). Si Jesukristo mao ang migarantiya niadtong mga pakigsaad (tan-awa sa Mga Hebreo 7:22; 8:6). Ang mga tigtuman sa pakigsaad kinsa nahigugma sa Dios ug nagtugot Kaniya nga mao ang ipatigbabaw labaw sa tanang butang sa ilang mga kinabuhi mohimo Kaniya nga labing gamhanang impluwensiya diha sa ilang mga kinabuhi.” Hisgoti kon unsaon ninyo nga ang Dios mao ang “ipatigbabaw labaw sa tanang butang” sa inyong kinabuhi. Sa unsang paagi nga kana makatabang ninyo nga makadawat og kinabuhing dayon, ug ngano nga ang pagdawat og kahimayaan angay nga paningkamotan?

Pagkat-on pa og dugang

Seksiyon 2

Ang Dios Mipahiuli sa mga Saad sa Pakigkasaad ni Abraham sa Atong Panahon Karon

Helena Montana Temple

Ang pakigsaad ni Abraham mao ang laing ngalan sa walay kataposan nga pakigsaad. Naestablisar kini sa wala pa ang katukuran sa kalibotan ug nagpasabot sa mga pakigsaad nga gihimo sa Dios ngadto sa Iyang mga anak. Ang ngalan niini nagagikan sa pakigsaad nga gihimo ni Jehova ngadto kang Abraham (tan-awa sa Genesis 17:1–8; Abraham 2:6–11). Niana nga pakigsaad, ang Dios misaad kang Abraham og mahinungdanong mga panalangin alang sa matarong nga pagpakabuhi. Kadto nga mga panalagin naglakip sa mahangtorong pag-uswag, sa katungod sa pagkapari, ug sa yuta nga panulundon sa tibuok kahangtoran (tan-awa sa Genesis 13:14–17; Abraham 2:8–11).

Ang pakigsaad ni Abraham gipasa ngadto sa anak ni Abraham nga si Isaac (tan-awa sa Genesis 26:1–4) ug dayon ngadto sa anak ni Isaac nga si Jacob (tan-awa sa Genesis 28:1, 13–14). Ang Ginoo miusab sa ngalan ni Jacob ngadto sa Israel (tan-awa sa Genesis 32:28) isip timaan sa Iyang padayon nga pagpakigsaad ngadto ni Jacob ug sa iyang kaliwatan. Ang Dios mipahiuli sa mga saad sa pakigsaad ni Abraham sa atong panahon karon (tan-awa sa Doktrina ug mga Pakigsaad 38:17–20; 86:8–11; 132:29–33).

Mga butang nga angayang hunahunaon

  • Unsa ang ipasabot niini nganha ninyo nga mahimong kabahin sa pakigsaad ni Abraham? Ikonsiderar kini nga mga kamatuoran: Naghimo kamo og pakigsaad ngadto sa Dios sa dihang gibunyagan kamo. Kamo nagbag-o niana nga pakigsaad ug naghimo og bag-o nga pakigsaad sa matag higayon nga kamo moambit sa sakramento. Sa unsang paagi nga inyong himoon nga ang templo maoy tutokan sa inyong kinabuhi aron mas makaapil kamo sa kahingpitan sa ebanghelyo?

  • Basaha ang Abraham 1:2, ug ikonsiderar unsay inyong nakat-onan mahitungod sa kinaiya ni Abraham. Unsa kaha ang ipasabot sa mahimong usa ka “labaw nga sumusunod sa pagkamatarong” sa atong panahon karon? Sa inyong hunahuna ngano nga si Abraham “mitinguha sa mga panalangin sa mga amahan”? Sa unsang paagi nga kamo napanalanginan pinaagi sa pakigsaad ni Abraham? Unsa ang inyong mahimong buhaton aron madawat ang mga panalangin niini nga pakigsaad?

Kalihokan alang sa pagkat-on uban sa laing mga tawo

  • Tun-i ang matinud-anong mga ehemplo sa pagsunod sa ebanghelyo gikan ni Abraham ug ni Sara ug sa ilang matarong nga pamilya (pananglitan, mahimo ninyong basahon og dungan ang pipila sa mosunod nga mga tudling: Genesis 17:1–19; 18:1–19; 22:1–18; 24; 32:1–28; 33; 46:1–7; Isaias 51:1–3; Mga Taga-Galacia 3:27–29; 2 Nephi 8:1–3). Dayon basaha ang Juan 8:39. Ang matag usa ninyo mahimong magdrowing o magdibuho og usa ka hulagway o mosulat og balak nga nagpahayag sa inyong pasalamat alang sa mga panalangin nga miabot kaninyo o nianang mahimong moabot gumikan sa pagtuman sa pakigsaad sa walay kataposang ebanghelyo sama sa gihimo ni Abraham ug ni Sara. Dayon mahimo ninyong ipakigbahin ang inyong hulagway o balak ngadto sa usag usa.

Pagkat-on pa og dugang

Seksiyon 3

Kadtong Nabunyagan Mahimo nga mga Anak sa Pakigsaad

mga miyembro nga nanganta sa mga himno

Tanan niadtong nabunyagan sa Ang Simbahan ni Jesukristo sa mga Santos sa Ulahing mga Adlaw mahimo nga mga anak ni Abraham, o “mga anak sa pakigsaad” (tan-awa sa 3 Nephi 20:25–26). Kini nga mga miyembro sa Simbahan makapanunod sa sama nga mga saad nga gihimo ngadto nila ni Abraham, Isaac, ug Jacob (Israel) samtang nagtinguha sila sa paghimo ug pagtuman sa mga pakigsaad diha sa balay sa Ginoo (tan-awa sa Doktrina ug mga Pakigsaad 132:29–32).

Ang kaliwatan ni Abraham nagdala og responsibilidad sa pagpangalagad ngadto sa mga anak sa Dios aron ang tanang katawhan makapahimulos sa mga panalangin sa kaluwasan ug kinabuhing dayon (tan-awa sa Abraham 2:9–11). Sa higayon nga motabang kita sa pagpundok sa Israel sa bisan asa nga habig sa tabil, kita nagtabang sa mga indibidwal nga makadawat sa mga panalangin sa walay kataposan nga pakigsaad ug nagtabang nga matuman ang saad nga gihimo sa Dios ngadto ni Abraham (tan-awa sa 1 Nephi 22:8–12; 3 Nephi 20:29–31).

Mga butang nga angayang hunahunaon

  • Diha sa Mosiah 5:1–8, atong nakat-onan kon sa unsang paagi nga ang katawhan ni Hari Benjamin midawat sa iyang mga pagtulun-an mahitungod sa ebanghelyo ni Jesukristo. Unsa ang andam nilang buhaton nianang puntoha? Unsa ang ipasabot niini nganha ninyo nga mahimong usa sa “mga anak ni Kristo”? Unsa kaha ang ipasabot niini nga si Kristo “sa espirituhanong paagi kamo iyang gipanganak”? Sa unsang paagi nga ang inyong kasingkasing “nausab pinaagi sa pagtuo sa iyang ngalan”?

  • Si Presidente Emily Belle Freeman mihisgot bahin sa kaimportante sa paglakaw diha sa relasyon sa pakigsaad uban ni Kristo ug giminubo ang saad nga gihimo sa Dios ngadto ni Jacob: “Ako nag-uban kanimo. Panalipdan ko ikaw. Dad-on ko ikaw pagbalik niining yutaa. Dili ko ikaw biyaan. Matuman ang gisaad ko kanimo.” Dayon iyang gipasabot: “Si Jacob kinahanglan nga mopili. Makapili siya nga mopuyo sa iyang kinabuhi nga makaila lang sa Dios sa iyang amahan, o siya makapili nga mopuyo sa kinabuhi sa mapasaligon nga relasyon sa pakigsaad uban Niya.” Pamalandongi kon unsay ipasabot nganha ninyo sa pagpuyo sa inyong kinabuhi diha sa usa ka mapasaligon nga relasyon sa pakigsaad uban ni Kristo. Unsa ang andam ninyo nga sugdan sa pagbuhat o ihunong sa pagbuhat aron mapalig-on ninyo ang inyong relasyon sa pakigsaad uban Kaniya?

Mga kalihokan alang sa pagkat-on og dungan

  • Basaha ang Helaman 5:12 ug kini nga mga pulong gikan ni Brother Jan E. Newman: “Tudloan nato ang atong mga anak sa pagbugkos sa ilang mga kaugalingon ngadto [ni Kristo] pinaagi sa sagrado nga mga ordinansa ug mga pakigsaad aron kon ang kaatbang nga mga unos ug mga baha moabot, kay segurado nga moabot gayod kini, dili kini kaayo makaapekto kanila ‘tungod sa lig-on nga sukaranan diin [sila] natukod.’” Unsa ang pipila sa “kaatbang nga mga unos ug mga baha” nga moabot kanato? Hisgoti kon sa unsang paagi nga ang inyong mga pakigsaad makatabang sa pagpanalipod ninyo ug sa inyong pamilya gikan sa “mapintas nga unos” sa kaaway.

  • Basaha ang pamahayag ni Elder Neil L. Andersen: “Kitang tanan ‘mga anak sa pakigsaad’ nga nagkatap sa yuta diha sa kanasoran ug mga kultura sa matag kontinente, minilyon ang gidaghanon, samtang naghulat kita sa mahimayaong pagbalik sa atong Ginoo ug Manluluwas. Nagdan-ag isip usa ka kahayag niadtong naglibot kanato, kita mahunahunaon gayod nga nag-umol sa atong mga tinguha, mga hunahuna, mga pagpili, ug mga binuhatan. Nagtinguha sa tibuok natong kasingkasing nga makaila ug mohigugma sa Manluluwas, atong gilahi ang atong kaugalingon gikan sa kalibotan pinaagi sa mga pakigsaad uban sa Dios, pinaagi sa pagkalahi, pagkadili komon, ug pagka-espesyal, samtang kita nagtahod Kaniya ug sa Iyang mga pagtulun-an nga dili mopalayo sa atong kaugalingon gikan sa uban nga lahi og gituohan.” Hisgoti kon sa unsang paagi nga kita makahimo sa “[pagtinguha] sa tibuok natong kasingkasing nga makaila ug mohigugma sa Manluluwas” ug motuman sa atong mga pakigsaad ngadto sa Dios.

Pagkat-on pa og dugang