“Kaluwasan,” Mga Hilisgotan ug mga Pangutana (2023)
Giya sa Pagtuon sa Ebanghelyo
Kaluwasan
Ang gasa nga mabanhaw gikan sa pagkamatay ug malimpyohan sa sala pinaagi ni Jesukristo
Kitang tanan nagkinahanglan ni Jesukristo. Usa sa Iyang labing importante nga mga ngalan mao ang “Manluluwas,” nagpasabot “usa nga nagluwas.” Nganong kinahanglan man kita nga maluwas? Ang propeta sa Basahon ni Mormon nga si Abinadi mipasabot nga ang “tanan nga katawhan … wala untay kataposan ang ilang pagkahisalaag kon wala pa ang Dios motubos sa iyang katawhan gikan sa ilang kahimtang sa pagkahisalaag ug pagkapukan” (Mosiah 16:4). Kon pasagdan nga walay tabang sa Dios, kita mag-antos unta sa kahangtoran gumikan sa mga sangpotanan sa sala. Dugang pa, ang kamatayon permanente unta sa tanan.
Ang maayong balita sa ebanghelyo ni Jesukristo mao nga ang matag tawo nga natawo dinhi sa yuta—dili igsapayan sa iyang mga pagpili—mabanhaw ug makadawat og hingpit, imortal nga lawas (tan-awa sa Alma 40:23). Ug tungod ni Jesukristo, makaangkon kita og kapasayloan ug mahugasan gikan sa sala (tan-awa sa Mosiah 4:1–3; Helaman 3:35; Doktrina ug mga Pakigsaad 20:37).
Unsa ang Kaluwasan?
Ang kaluwasan mao ang gasa nga maluwas gikan sa pisikal ug sa espirituwal nga kamatayon. Moabot kini pinaagi sa grasya sa Dios ug sa gahom ni Jesukristo, ang Manluluwas sa kalibotan (tan-awa sa Doktrina ug mga Pakigsaad 43:34). Naglakip kini sa pagkabanhaw gikan sa pagkamatay ug pag-angkon og imortalidad. Ang ubang mga kasulatan naggamit sa mga pulong nga kaluwasan o maluwas nga nagpasabot sa kinabuhing dayon. Ang pagdawat og kinabuhing dayon mao ang pagkaila sa Langitnong Amahan ug ni Jesukristo ug pagdawat og usa ka luna uban Kanila sa kahangtoran. Kini mao “ang labing mahinungdanon sa tanan nga mga gasa sa Dios” (Doktrina ug mga Pakigsaad 6:13; 14:7).
Kinatibuk-ang pagpasabot sa hilisgotan: Kaluwasan
May kalabotan nga mga giya sa pagtuon sa ebanghelyo: Plano sa Kaluwasan [Plan of Salvation], Pag-ula ni Jesukristo, Grasya, Kinabuhing Dayon, Vicarious Ordinances for the Dead [Puli nga mga Ordinansa alang sa mga Patay]
Seksiyon 1
Si Jesukristo mao ang Manluluwas sa Kalibotan
Usa sa labing mahinungdanong mga katuyoan sa kinabuhi dinhi sa yuta mao ang pagkat-on ug pagtuo nga ang Langitnong Amahan mipadala sa Iyang Anak, si Jesukristo, aron sa pagluwas nato (tan-awa sa Juan 3:16–17; 2 Nephi 25:26). Kana nga mensahe gipahayag sa mga propeta sulod sa liboan ka tuig sa wala pa Siya matawo (tan-awa sa Mosiah 13:33–35; Helaman 8:13–20; 3 Nephi 20:23–24; Moises 4:1–2; 5:7–9). Sa ulahing mga adlaw, si Propeta Joseph Smith mipahayag sa iyang pagsaksi ug pagpamatuod bahin sa Nabanhaw nga si Kristo (tan-awa sa Doktrina ug mga Pakigsaad 76:22–24; 110:1–4).
Si Propeta Joseph Smith mitudlo, “Ang sukaranan nga mga baroganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabotan sa atong relihiyon mga sumpay lamang niini.”
Mga butang nga angayang hunahunaon
-
Basaha ang 2 Nephi 9:6–13 ug Doktrina ug mga Pakigsaad 76:40–42, nga naghulagway sa atong panginahanglan sa usa ka Manluluwas. Sa unsang paagi nga ang Pag-ula ni Jesukristo motabang nato nga mabuntog ang mga epekto sa pisikal nga kamatayon ug sa espirituwal nga kamatayon?
-
Ang kinatibuk-ang pagpasabot sa Mga Hilisgotan sa Ebanghelyo bahin sa “Kaluwasan” diha sa Librarya sa Ebanghelyo nagtudlo nga adunay pipila ka importante nga mga aspeto sa kaluwasan. Rebyoha ang mga deskripsiyon sa kaluwasan nga gilatid niana nga artikulo, ug pamalandongi kon hain ang labing makahuloganon kaninyo. Ngano nga kana nga deskripsiyon mahinungdanon kaninyo? Ikonsiderar ang pagrekord sa inyong mga pagbati diha sa inyong journal.
Kalihokan alang sa pagkat-on kauban ang laing mga tawo
-
Tan-awa ang bidyo nga “Because of Him” (2:44). Human niana, dapita ang mga sakop sa grupo nga mopakigbahin sa unsay ilang gibati samtang nagtan-aw sila sa bidyo. Unsay ilang nakat-onan mahitungod sa misyon ni Jesukristo? Unsa ang mga epekto niana nga kahibalo diha sa ilang mga kinabuhi? Mahimo ninyong dapiton ang mga sakop sa grupo sa paghimo og ilang kaugalingon lista sa “Tungod Kaniya” nga mga pamahayag aron ipakigbahin ngadto sa grupo kon gikinahanglan.
-
Ang kaluwasan gikan sa kamatayon usa ka gasa alang sa tanang anak sa Dios nga nahimong posible pinaagi ni Jesukristo. Basaha og dungan ang 2 Nephi 2:4 ug 2 Nephi 25:23–24. Ngano nga mahinungdanon man nga ang kaluwasan gikan sa sala dili mapalit kondili kinahanglan nakasentro diha sa hugot nga pagtuo kang Jesukristo? Unsa ang pipila ka paagi nga kita makadangop Kaniya uban sa mas dakong pagtuo?
Pagkat-on pa og dugang
-
Russell M. Nelson, “Kaluwasan ug Kahimayaan,” Liahona, Mayo 2008, 7–10
-
Dallin H. Oaks, “Balaanong Gugma diha sa Plano sa Amahan,” Liahona, Mayo 2022, 101–4
Seksiyon 2
Kita Kinahanglang Mobarog isip mga Saksi ni Jesukristo
Daghang buotan nga mga tawo sa kalibotan ang nagtinguha nga makasabot sa Dios ug kon sa unsang paagi nga Siya makahimo sa ilang kinabuhi nga mas maayo. Ang tanang miyembro sa Simbahan karon mahimong mga saksi ni Jesukristo kon sila nabunyagan ug nakadawat og pagpamatuod pinaagi sa Espiritu Santo (tan-awa sa 2 Nephi 31:13, 18; Mosiah 18:8–9; 3 Nephi 28:11). Kon kita maningkamot nga mahimong tinuod nga mga sumusunod ni Jesukristo, masinati nato ang Iyang grasya, nga molig-on kanato. Ug sa kataposan pinaagi kini sa Iyang grasya nga kita maluwas (tan-awa sa 2 Nephi 25:23). Atong gipakita ang atong pasalamat sa tanang gihimo ni Kristo alang nato kon kita naghimo ug nagtuman sa mga pakigsaad ngadto sa Dios. Isip mga tigdawat sa Iyang gugma, sa Iyang kapasayloan, ug sa gisaad nga mga panalangin sa kaluwasan, kita adunay responsibilidad sa pagpakigbahin sa atong pagsaksi ngadto sa tanan nga atong mahimamat (tan-awa sa Lucas 22:32; Mosiah 18:8–9; Doktrina ug mga Pakigsaad 84:61).
Mga butang nga angayang hunahunaon
-
Unsa ang nabuhat sa Manluluwas alang kaninyo? Samtang naghunahuna kamo niini nga pangutana, basaha o paminawa ang pakigpulong ni Presidente Dallin H. Oaks “Unsa ang Nabuhat sa Manluluwas alang Kanato?” Unsa ang inyong nakat-onan gikan niini nga pakigpulong mahitungod sa gahom sa misyon ni Jesukristo diha sa inyong kinabuhi? Unsa nga personal nga mga kasinatian ang inyong nasinati uban ni Jesukristo nga inyong idugang ngadto sa lista ni Presidente Oaks?
-
Diha sa 2 Nephi 25:23, atong nakat-onan nga “pinaagi sa grasya kami maluwas, human sa tanan nga among mabuhat.” Niini nga konteksto, ang “maluwas” nagpasabot nga malimpyohan sa sala aron makapuyo kita pag-usab sa presensya sa Dios. Mahimo ninyong rebyohon ang subseksiyon “Tanan nga Atong Mahimo” diha sa mensahe ni Presidente Dieter F. Uchtdorf nga “Ang Gasa sa Grasya.” Unsa ang kahulogan sa “human sa tanan nga among mabuhat” sa inyong kinabuhi? Unsa ang relasyon tali sa “tanan nga among mabuhat” ug sa misyon ni Jesukristo?
Kalihokan alang sa pagkat-on uban sa laing mga tawo
-
Ang Langitnong Amahan gusto nga atong ipakigbahin ang atong pagpamatuod kang Jesukristo ug ang saad sa kaluwasan. Basaha ang Doktrina ug mga Pakigsaad 18:10–17, nga naghulagway sa pipila ka rason sa pagtabang sa uban pinaagi sa mensahe sa ebanghelyo ni Jesukristo. Unsa ang pipila ka rason nga gihatag niini nga tudling kon ngano nga ang Dios nagdapit nato nga moapil Kaniya diha sa buhat sa pagtabang sa uban nga maangkon ang mga panalangin sa kaluwasan? Kanus-a nga kamo o ang usa ka tawo nga inyong kaila nakakaplag og kalipay sa pagtabang sa ubang tawo sa pagdawat sa ebanghelyo ug sa paghimo og mga pakigsaad ngadto sa Dios?
Pagkat-on pa og dugang
-
James E. Faust, “The Atonement: Our Greatest Hope,” Ensign, Nov. 2001, 18–20
-
“The Savior Understands Me” (bidyo), ChurchofJesusChrist.org
Seksiyon 3
Ang Buhat sa Kaluwasan Nagpadayon didto sa Kalibotan sa mga Espiritu
Ang mga kasulatan nagtudlo nga ang katubsanan gikan sa kamatayon, o pagkabanhaw, usa ka gasa ngadto sa tanan nga natawo dinhi sa kalibotan, dili igsayapan sa ilang mga pagpili (tan-awa sa Mga Buhat 24:15). Hinuon, ang kaluwasan gikan sa mga epekto sa sala nagkinahanglan og hugot nga pagtuo diha ni Jesukristo ug paghinulsol. Nasayran usab nato gikan sa mga kasulatan nga kinahanglan kita nga mabunyagan aron maluwas diha sa gingharian sa Dios (tan-awa sa Juan 3:5).
Apan, daghan sa mga anak sa Dios ang namatay nga wala mabunyagi o gani makadungog mahitungod ni Jesukristo. Sa unsang paagi nga kini nga mga tawo makadawat og kaluwasan? Ang mga kasulatan nagtudlo nga si Jesukristo mibisita sa kalibotan sa mga espiritu human sa Iyang kamatayon (tan-awa sa 1 Pedro 3:18–20). Nag-organisar siya og mga paningkamot aron masangyaw ang ebanghelyo didto, naghatag og paagi nga ang tanan adunay kahigayonan nga mahibalo sa ebanghelyo. Ang mga miyembro sa Ang Simbahan ni Jesukristo sa mga Santos sa Ulahing mga Adlaw nagpahigayon og puli nga mga bunyag ug ubang mga ordinansa alang sa mga patay diha sa mga templo, naghatag og oportunidad sa kaluwasan pinaagi ni Kristo ngadto sa mga espiritu sa mga patay (tan-awa sa Doktrina ug mga Pakigsaad 128:5, 18).
Mga butang nga angayang hunahunaon
-
Ang mahinungdanong mga pagpadayag kalabot sa katubsanan sa mga patay nahisulat diha sa Doktrina ug mga Pakigsaad. Pananglitan, basaha ang Doktrina ug mga Pakigsaad 138:11–32. Unsa ang gitudlo niini nga tudling nganha ninyo mahitungod sa buhat sa Dios nga ang kaluwasan maanaa diha sa kalibotan sa espiritu?
-
Ang kasulatan nagtudlo nato nga ang gagmayng mga bata balaan ug gisantos pinaagi sa Pag-ula ni Jesukristo ug dili na kinahanglan nga bunyagan aron makaangkon og kaluwasan. Basaha ang Moroni 8:8–25; Doktrina ug mga Pakigsaad 74:7; 137:10. Unsa ang inyong nakat-onan mahitungod sa kinaiya sa Dios gikan niini nga mga tudling? Sa unsang paagi nga kini nga doktrina makatabang sa mga indibiduwal ug mga pamilya nga nanglimbasog kay nawad-an og anak?
Kalihokan alang sa pagkat-on uban sa laing mga tawo
-
Diha sa Doktrina ug mga Pakigsaad 128, si Propeta Joseph Smith misulat, “Sila [atong mga katigulangan] kon wala kita dili mahingpit—ni kita kon wala sila mahingpit.” (bersikulo 18). Unsa kaha ang iyang ipasabot niini? Dapita ang mga sakop sa grupo sa pagpakigbahin sa ilang mga ideya. Mahimo usab ninyong dapiton ang mga sakop sa grupo sa pagkat-on mahitungod sa katigulangan nga namatay na o, kon makahimo sila, sa pagpaeskedyul diha sa balay sa Ginoo aron mopahigayon og mga ordinansa alang sa mga patay.