Librarya
Pagkat-on ug Pagtudlo sa Ebanghelyo ni Jesukristo

“Pagkat-on ug Pagtudlo sa Ebanghelyo ni Jesukristo,” Mga Hilisgotan ug mga Pangutana (2023)

Si Jesukristo nga nagtudlo sa usa ka gamay nga grupo

Giya sa Pagtuon sa Ebanghelyo

Pagkat-on ug Pagtudlo sa Ebanghelyo ni Jesukristo

Pagpaduol ngadto kang Kristo pinaagi sa Iyang doktrina

Ang pagkat-on gamhanan. Ang kahibalo moabli sa atong mga hunahuna ngadto sa bag-ong mga ideya ug mohimong posible sa daghang kasinatian. Apan ang pagkat-on sa mga kamatuoran sa ebanghelyo ni Jesukristo mas labing importante. Ang pagkat-on ug paglambo mao ang pipila sa labing importante nga mga rason nga mianhi kita dinhi sa yuta. Ang pagkat-on mao ang unsay makapahimo nato kon si kinsa gayod kita sa umaabot ug makahimo nga atong makab-ot ang atong potensyal isip mga anak sa Dios ug manununod sa Iyang gingharian. Usa sa labing mahinungdanong katuyoan sa pag-anhi sa yuta mao ang pagkat-on sa mga butang nga dili nato mahihibaloan sa laing paagi.

Isip mga sumusunod ni Jesukristo, kita usab adunay daghang oportunidad sa pagtudlo sa Iyang ebanghelyo ug sa pagpakigbahin sa Iyang kalinaw ug kalipay ngadto sa uban. Ang Ginoo misulti ngadto sa nahaunang mga Santos, “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigayonan.” (Doktrina ug mga Pakigsaad 88:122). Kitang tanan mapanalanginan samtang maminaw ug mopakita kita og hugot nga pagtuo sa mensahe sa ebanghelyo ingon nga kini gitudlo sa atong mga lider sa Simbahan, mga magtutudlo, mga ginikanan, mga anak, ug uban pa. Kitang tanan makakat-on ug makatudlo sa ebanghelyo diha sa simbahan, sa panimalay, ug bisan asa kita.

Nganong Importante ang Pagkat-on sa Ebanghelyo ni Jesukristo ug ang Pagtudlo Niini ngadto sa Uban?

Kita nagtuon ug nagtudlo sa ebanghelyo aron sa pagpalig-on sa atong pagtuo sa Langitnong Amahan ug ni Jesukristo ug sa pagtuo niadtong anaa sa atong palibot. Makatabang usab kini kanato nga mas mahisama Kanila ug sa kataposan makabalik ngadto sa atong langitnong panimalay sa pagpuyo uban Kanila. Kon kita motudlo sa ebanghelyo, atong sundon ang ehemplo ni Jesukristo, kinsa mao ang labing banggiitan nga magtutudlo. Samtang kita magkat-on ug mosunod sa ebanghelyo ug dayon motudlo niini ngadto sa uban, kitang tanan makapadayon diha sa dalan pauli ngadto sa Dios.

Kinatibuk-ang pagpasabot sa hilisgotan: Pagtudlo sa Ebanghelyo

May kalabotan nga mga giya sa pagtuon sa ebanghelyo: Conversion to Jesus Christ [Pagkakabig ngadto ni Jesukristo], Prophets [Mga Propeta], Mga Kasulatan, Truth [Kamatuoran]

Seksiyon 1

Kita Nagtinguha sa Pagkat-on pinaagi sa Pagtuon ug sa Hugot nga Pagtuo

babaye nga nagtuon sa mga kasulatan

Pinaagi sa ebanghelyo ni Jesukristo, kita mahimong molambo sa espirituhanong paagi. Atong makat-onan ang mga pagtulun-an sa Iyang ebanghelyo kon magbasa kita sa mga kasulatan pinaagi sa pagtuon ug sa hugot nga pagtuo ug kon mosunod kita sa “tingog sa [Iyang] mga sulugoon” (Doktrina ug mga Pakigsaad 1:38; tan-awa usab sa Doktrina ug mga Pakigsaad 88:118). Ang mga kamatuoran sa ebanghelyo mahimong pamatud-an ngari kanato pinaagi sa Espiritu Santo kon kita magtuon ug mobuhat sa unsay atong nakat-onan, magtabang nato nga molambo ug mas mahisama sa Dios (tan-awa sa Doktrina ug mga Pakigsaad 19:23).

Mga butang nga angayang hunahunaon

  • Si Presidente Russell M. Nelson mitudlo: “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo. Pagkat-on pa og dugang bahin sa Iyang Pag-ula, sa Iyang gugma, sa Iyang kaluoy, sa Iyang doktrina, ug sa Iyang gipahiuli nga ebanghelyo sa pagkaayo ug paglambo. Dangop ngadto Kaniya! Sunod Kaniya!” Sa unsang paagi nga ang inyong mga pangutana ug mga problema natubag samtang nagtuon kamo sa kinabuhi ug mga pagtulun-an sa Manluluwas? Sa unsang paagi nga ang inyong hugot nga pagtuo nakatabang ninyo nga masayod sa mga tubag nga inyong gikinahanglan atol niadto nga mga panahon? Hunahunaa kon unsay mahimo ninyong kat-onan mahitungod sa Manluluwas karong semanaha pinaagi sa pagtuon ug sa hugot nga pagtuo nga makatabang ninyo sa pangutana o kabalaka nga inyong giatubang karon. Mahimo kamo nga magsulat og plano ug dayon motakda og mga pahinumdom sa pag-follow up.

Kalihokan alang sa pagkat-on uban sa laing mga tawo

  • Basaha ug pamalandongi ang tambag sa Ginoo diha sa Doktrina ug mga Pakigsaad 88:118. Unsa ang kalainan tali sa pagkat-on pinaagi sa pagtuon ug sa pagkat-on pinaagi sa hugot nga pagtuo? Sa unsang paagi nga ang duha ka baroganan magkatambayayong? Ang atong paagi sa pagtuon sa ebanghelyo lahi ba kaysa pagtuon sa eskwelahan o sa pagtuon sa usa ka butang sa online? Ngano man? Ug unsa man ang ipasabot sa Ginoo sa “labing maayo nga mga basahon”? Matag usa ninyo mahimong magtuon sa seksiyon gikan sa “Ang Kamatuoran Mohimo Kaninyo nga Gawasnon” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ug dayon maghisgot sa mga butang nga inyong nakat-onan nga may kalabotan sa mga panalangin sa pag-angkon og kahibalo. Ikonsiderar ang pagtakda og tumong nga may kalabotan sa usa ka butang nga inyong nakat-onan.

Pagkat-on pa og dugang

Seksiyon 2

Atong Sundon ang Ehemplo ni Jesukristo samtang Magtudlo Kita sa Iyang Ebanghelyo

babaye nga nagtudlo gikan sa kasulatan

Kitang tanan nagkinahanglan nga “maamumahan pinaagi sa maayo nga pulong sa Dios” (Moroni 6:4) aron matabangan kita nga makab-ot ang atong mahangtorong potensiyal. Ang pagpakigbahin sa ebanghelyo ni Jesukristo makatabang natong tanan nga mouswag sa espirituhanong paagi subay sa dalan sa pakigsaad. Kon kita motudlo inubanan sa gugma ingon nga gigiyahan sa Espiritu, ang tanan mobati sa kamatuoran sa mga mensahe nga atong gipakigbahin ug magtinguha nga mag-usab ug mosunod ni Jesukristo (tan-awa sa Doktrina ug mga Pakigsaad 42:12–14).

Kita nagsunod sa ehemplo sa Manluluwas sa pagtudlo sa uban (tan-awa sa Juan 7:14–18) kon kita nahigugma niadtong atong gitudloan, nagtudlo pinaagi sa Espiritu, nagtudlo sa tinuod nga doktrina ni Kristo, ug nagdapit og makugihon nga pagkat-on. Ang pagdapit og makugihong pagkat-on naglakip sa pag-awhag sa mga tigkat-on sa paglihok. “Gikan sa sinugdanan sa Iyang pagpangalagad, gidapit sa Manluluwas ang Iyang mga sumusunod sa pagsinati alang sa ilang mga kaugalingon sa mga kamatuoran, gahom, ug gugma nga Iyang gitanyag. Siya mibuhat niini tungod kay kini mao ang tinuoray nga pagkat-on. Kini dili lamang ang pagpaminaw o pagbasa; kini mao usab ang pag-usab, paghinulsol, ug pag-uswag.”

Mga butang nga angayang hunahunaon

  • Ang pasiuna sa Dali, Sunod Kanako nagtabang nato nga makasabot kon ngano nga ang pagtudlo usa ka sagrado nga responsibilidad. Nag-ingon kini: “Ang katuyoan sa tanang pagkat-on ug pagtudlo sa ebanghelyo mao ang pagpalig-on sa atong pagkakabig ug sa pagtabang kanato nga mas mahisama ni Jesukristo.” Mahimo kamo nga mopili og usa ka seksiyon diha sa Pagtudlo sumala sa Pamaagi sa Manluluwas aron matabangan kamo sa pagkat-on sa pagtudlo nga mas sama sa Manluluwas. Sa unsang paagi nga mas matudlo ninyo ang ebanghelyo sa paagi nga kini mogiya kaninyo ug sa uban nga mas mahisama Kaniya? Unsa ang gagmay nga mga butang nga inyong mahimo aron mas maayo ang pagtudlo sa ebanghelyo diha sa panimalay, sa simbahan, o sa ubang mga dapit? Unsaon ninyo sa pagtinguha sa pagkat-on sa ebanghelyo sa mas makugihong paagi aron mas maayong matudlo ninyo ang ebanghelyo ngadto sa uban?

Mga kalihokan alang sa pagkat-on kauban ang laing mga tawo

  • Sa iyang mensahe sa kinatibuk-ang komperensiya nga “Mahangtoron nga Kamatuoran,” si Elder John C. Pingree Jr. mitudlo: “Ang atong tumong mao ang pagtudlo sa kamatuoran sa paagi nga magdapit og makapakabig nga gahom sa Espiritu Santo.” Dayon mipakigbahin siya og pito ka yano nga mga pagdapit gikan sa Ginoo ug sa Iyang mga propeta nga makatabang nato sa pagdapit sa Espiritu samtang magtudlo kita. Inyong hisgotan kining pito ka baroganan ug kon sa unsang paagi nga makatabang kini nato sa pagtudlo sa ebanghelyo pinaagi sa gahom sa Espiritu. Tingali mahimo kamo nga maghunahuna og makalingaw nga paagi sa pagtabang sa usag usa nga mahinumdoman ang pito ka baroganan aron magamit ninyo kini, sama sa paghunahuna og acronym o ubang yano nga sundanan nga mga letra sa pagsag-ulo.

  • Diha sa Pagtudlo sumala sa Pamaagi sa Manluluwas, ang Unang Kapangulohan midapit: “Pagkat-on pa mahitungod ni Jesukristo ug giunsa Niya pagtudlo ang ebanghelyo. Pagtuon sa Iyang mga pulong, sa Iyang mga lihok, ug sa Iyang mga hiyas sa mainampoong paagi, ug paninguha sa pagsunod Kaniya sa mas mabinantayong paagi.” Hisgoti ang pipila sa mga pulong, mga binuhatan, ug mga kinaiya sa Manluluwas. Sa unsang paagi nga kini makatabang ninyo sa pagdapit sa Espiritu kon kamo magtudlo sa ebanghelyo? Ang Pagtudlo sumala sa Pamaagi sa Manluluwas nagpakigbahin usab niining upat ka baroganan sa pagtudlo sama kang Kristo: higugmaa kadtong imong gitudloan, motudlo pinaagi sa Espiritu, itudlo ang doktrina, ug modapit og makugihon nga pagkat-on. Paghisgot og mga paagi nga magamit ninyo kini nga mga baroganan samtang magtudlo kamo sa mga kamatuoran sa ebanghelyo diha sa panimalay, sa simbahan, ug bisan asa. Mahimo usab ninyong kompletohon ang personal nga ebalwasyon sa pahina 37 sa Pagtudlo sumala sa Pamaagi sa Manluluwas. Mahimo ninyong hisgotan ang mga ideya nga inyong nakab-ot ug dayon mainampoong ikonsiderar kon kamo aduna bay gustong usbon sa paagi sa inyong pagpangandam ug pagtudlo sa ebanghelyo ni Kristo.

Pagkat-on pa og dugang

Seksiyon 3

Pagkat-on ug Pagtudlo sa Ebanghelyo Labing Epektibo kon Nakasentro sa Panimalay

pamilya nga nagbasa sa mga kasulatan

Aron mahimong kinabig ngadto ni Ginoong Jesukristo, kinahanglan nga kita magkat-on sa ebanghelyo sa atong kaugalingon. Agi og dugang, ang mga ginikanan mao ang responsable sa pagtudlo sa ebanghelyo ngadto sa ilang mga anak (tan-awa sa Doktrina ug mga Pakigsaad 68:25–28). Kon posible, ang panimalay mao ang labing maayo nga dapit sa pagkat-on sa mga kamatuoran sa ebanghelyo. Ang tanan napanalanginan kon ang mga lider ug mga magtutudlo sa Simbahan nag-awhag ug nagsuporta sa nakasentro sa panimalay nga pagtudlo ug pagkat-on sa ebanghelyo. Kon kita mainampoon nga magtuon sa ebanghelyo diha sa atong mga panimalay, makagahin kita og dugang nga panahon ug makabaton og mas nindot nga mga kasinatian sa pagkat-on sa ebanghelyo. Mahimo usab natong ipakigbahin kana nga kahibalo nga atong naangkon sa simbahan sa pagpanalangin ug sa pagtudlo sa uban.

Si Brother Devin G. Durrant mihatag niining maalamon nga tambag: “Alang ninyong tanan nga naningkamot sa paghimo sa pinakamaayo aron sa pagtudlo diha sa inyong mga panimalay, hinaot makakaplag kamo og kalinaw ug kalipay sa inyong mga paningkamot. Ug kon gibati ninyo nga kinahanglan pa ninyong molambo o nagkinahanglan og mas dakong pagpangandam, palihug pagmapainubsanong motubag samtang ang Espiritu modasig kaninyo ug ipasalig ang inyong kaugalingon sa paglihok.”

Mga butang nga angayang hunahunaon

liso ug kahoy

  • Hunahunaa ang milagro sa usa ka gamayng liso nga nahimong usa ka dakong kahoy samtang inyong basahon ug pamalandongan ang Alma 32:28–31. Dayon basaha kini nga tambag gikan ni Brother Jan E. Newman: “Ang kabataan makapanunod sa daghang butang gikan sa ilang mga ginikanan, apan ang pagpamatuod dili usa niini. Dili kita makahatag sa atong mga anak og pagpamatuod sama nga dili kita makapugos nga motubo ang liso. Apan makahatag kita og maalimahon nga kahimtang, nga adunay maayo nga yuta, walay mga sampinit nga ‘magtuok sa pulong.’ Makapaningkamot kita sa paghimo og maayo nga mga kondisyon aron nga ang atong mga anak—ug ang uban nga atong gimahal—makakita og dapit alang sa binhi, ‘[maminaw] sa pulong, ug [makasabot] niini’ [tan-awa sa Mateo 13:18–23] ug makadiskobre alang sa ilang kaugalingon ‘nga ang binhi maayo’ [Alma 32:30].” Unsa ang makatabang sa inyong panimalay nga mahimong mas maalimahon nga dapit alang ninyo o sa inyong pamilya sa pagkat-on sa mahangtorong mga kamatuoran? Unsaon ninyo sa pagtabang sa usag usa sa pagkat-on sa kamaayo sa ebanghelyo? Unsa ang inyong mahimo aron maalimahan ug mapalig-on ang matag mga pagpamatuod kang Jesukristo?

Mga kalihokan alang sa pagkat-on kauban ang laing mga tawo

  • Si Elder David A. Bednar mitudlo: “Kon ang tanan nga inyo o akong nahibaloan mahitungod ni Jesukristo ug sa Iyang gipahiuli nga ebanghelyo mao lamang ang gitudlo o gisulti kanato sa ubang mga tawo, niana ang pundasyon sa atong pagpamatuod Kaniya ug sa Iyang mahimayaon nga buhat sa ulahing mga adlaw natukod diha sa balas [tan-awa sa Mateo 7:24–27]. Dili kita angay nga mosalig lang o manghulam og kahayag sa ebanghelyo ug kahibalo gikan sa ubang tawo—bisan niadtong atong gihigugma ug gisaligan.” Hunahunaa ang mga pulong ni Elder Bednar samtang basahon ninyo og dungan ang Helaman 5:12. Mahimo ninyong pamalandongan ug hisgotan kini nga kinutlo ug bersikulo samtang magtan-aw sa hulagway sa usa ka dagat o baybayon (o samtang maglakaw kamo sa daplin sa lim-aw, sapa, o lanaw). Hunahunaa kon ngano nga ang mga tawo dili motukod sa ilang mga panimalay ibabaw sa balas. Unsa nga mga matang sa mga pundasyon sila motukod? Unsa ang inyong mahimo sa pagtukod sa inyong pagpamatuod diha sa lig-ong pundasyon? Unsa ang mga pamatasan sa pagkat-on sa ebanghelyo nga inyong sugdan o mopasalig pag-usab sa pagsunod karon? Mahimo ninyong kantahon og dungan ang kanta sama sa “Ang Tawong Maalam ug ang Tawong Walay Kaalam” o “Unsa Kalig-on ang Tukuranan” samtang naghunahuna kamo sa pagtukod sa inyong kinabuhi diha sa lig-ong tukuranan sa ebanghelyo ni Jesukristo.

  • Hisgoti og kadali kon ngano nga ang tawo mopili sa pagbag-o sa ilang mga panimalay. Mahimo kamong motan-aw sa pipila ka hulagway sa dagkong mga pag-usab sa panimalay. Unsa ang resulta sa epektibong pagbag-o sa panimalay? Si Presidente Nelson mitudlo nga ang pagkat-on sa ebanghelyo “adunay potensyal sa pagpakita sa kalig-on sa mga pamilya, samtang ang matag pamilya mosunod sa pagbuhat nga mahunahunaon ug mainampingon nga mousab sa ilang panimalay ngadto sa usa ka santuwaryo sa hugot nga pagtuo. Ako mosaad nga samtang makugihon kamo nga molihok aron sa pagbag-o sa inyong panimalay ngadto sa usa ka sentro sa pagkat-on sa ebanghelyo … ang inyong mga anak maghinam-hinam sa pagkat-on ug pagsunod sa mga panudlo sa Manluluwas. … Ang mga kausaban sa inyong pamilya dako ug magpadayon.” Pakig-istorya sa inyong pamilya o sa lain nga nagpuyo uban ninyo mahitungod sa mga kausaban nga gusto ninyong tanan nga makita. Unsaon ninyo sa “pagbag-o” sa inyong panimalay aron mahimong mas maayo nga sentro sa pagkat-on sa ebanghelyo? Sa unsang paagi nga ang gipalambo, nakasentro sa panimalay nga pagtuon sa ebanghelyo makapalig-on ninyong tanan? Unsa ang inyong buhaton aron mahimo ang mga kausaban nga inyong gitinguha, ug unsaon ninyo sa pagsukod ang inyong kalamboan?

Pagkat-on pa og dugang