“Mga Propeta,” Mga Hilisgotan ug mga Pangutana (2023)
Giya sa Pagtuon sa Ebanghelyo
Mga Propeta
Balaanong gitawag nga mga saksi ni Jesukristo
Sa karaang mga panahon, ang Dios mitawag og ordinaryo, matinud-anon nga kalalakin-an isip mga propeta ug mihatag nila og katungod sa pagrepresentar Kaniya. Siya midasig niadto nga mga sulugoon, nakigsulti nila, ug mihatag nila sa Iyang gahom sa pagtuman sa Iyang buhat. Usa sa mahinungdanong mga mensahe sa gipahiuli nga ebanghelyo ni Jesukristo mao nga kita adunay buhi nga mga propeta sa yuta karon.
Tungod kay ang mga propeta sa Ginoo gitugyanan sa pagtudlo ug paggiya sa iyang buhat, mahinungdanon kini nga kita maminaw sa ilang mga pulong. Ang pagkat-on mahitungod sa tahas sa mga propeta makapalambo sa inyong pagsalig sa ilang balaanong tawag isip mga sulugoon sa Ginoo ug makapalawom sa inyong tinguha sa pagsalig sa ilang tambag ug giya. Ngadto niadtong nagsunod sa buhi nga propeta, ang Dios nagsaad og kahilwasan, proteksyon, ug gani kaluwasan ug kinabuhing dayon.
Kinsa ang mga Propeta?
Ang propeta mao ang tawo nga gitawag sa Dios nga mamulong para Kaniya (tan-awa sa Jeremias 1:4–5; Amos 3:7; Juan 15:16; Doktrina ug mga Pakigsaad 1:37–38). Ang mga propeta nagpamatuod kabahin ni Jesukristo ug nagtudlo sa Iyang ebanghelyo. Ilang ipahibalo ang kabubut-on ug tinuod nga kinaiya sa Dios. Ilang sawayon ang pagpakasala, mopasidaan sa mga sangpotanan niini, ug motabang nga malikay kita sa pagkalingla (tana-wa sa Ezequiel 3:16–17; Mga Taga-Efeso 4:11–14). Usahay, sila managna sa umaabot nga mga hitabo. Ang mga propeta makahimo niini nga mga responsibilidad tungod kay nadawat nila ang awtoridad, mga yawe ug pagpadayag gikan sa Dios.
Kinatibuk-ang pagpasabot sa hilisgotan: Mga Propeta
May kalabotan nga mga giya sa pagtuon sa ebanghelyo: Pagpadayag, Joseph Smith, Mga Yawe sa Pagkapari, Church of Jesus Christ [Simbahan ni Jesukristo]
Seksiyon 1
Si Jesukristo nagtawag og mga Propeta ug mga Apostoles sa Atong Panahon
Sukad sa mga panahon ni Adan, ang Dios nagpadala og mga propeta taliwala sa Iyang katawhan. Atol sa Iyang mortal nga pagpangalagad, si Ginoong Jesukristo miorganisar sa Iyang Simbahan nga may pundasyon nga mga propeta ug mga apostoles (tan-awa sa Mga Taga-Efeso 2:19–20). Gisunod sa Dios kini nga sundanan sa ulahing mga adlaw sa dihang gitawag Niya si Propeta Joseph Smith, gipahiuli ang Iyang Simbahan, ug giestablisar ang Unang Kapangulohan ug Korum sa Napulog Duha ka Apostoles.
Ang Presidente sa Ang Simbahan ni Jesukristo sa mga Santos sa Ulahing mga Adlaw karon mao ang propeta sa Dios ngadto sa tanang katawhan sa kalibotan. Kita nagpaluyo sa Presidente sa Simbahan isip propeta, manalagna, ug tigpadayag ug maoy bugtong tawo sa yuta nga adunay awtoridad sa Dios sa paggamit sa tanang yawe sa pagkapari. Kita usab nagpaluyo sa mga magtatambag sa Unang Kapangulohan ug sa mga sakop sa Korum sa Napulog Duha ka mga Apostoles isip mga propeta, mga manalagna, ug mga tigpadayag.
Kalabot sa kaimportante sa mga apostoles ug mga propeta, si Propeta Joseph Smith miobserbar: “Ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon mga sumpay lamang niini.”
Mga butang nga angayang hunahunaon
-
Si Propeta Joseph Smith gitawag sa Dios aron sa pagsangyaw sa gipahiuli nga ebanghelyo ni Jesukristo ug sa pagtabang sa mga anak sa Dios nga makadawat sa mga ordinansa sa pagkapari nga gikinahanglan alang sa kaluwasan ug kahimayaan. Ang iyang mga sumusunod, lakip na ang Presidente sa Simbahan karon, nakadawat sa samang awtoridad ug responsibilidad sa pagpadayon isip mga representante sa Ginoo. Basaha ang Doktrina ug mga Pakigsaad 107:91–92. Unsay ipasabot niini nga tudling nganha ninyo mahitungod sa kamahinungdanon sa tahas sa propeta sa Ginoo diha sa Ang Simbahan ni Jesukristo sa mga Santos sa Ulahing mga Adlaw?
Kalihokan alang sa pagkat-on uban sa laing mga tawo
-
Ang mga miyembro sa Simbahan nga nagtinguha sa pagsunod sa pinili nga mga sulugoon sa Ginoo napanalanginan. Dapita ang mga sakop sa inyong grupo sa pagtandi sa mga kamatuoran nga gitudlo diha sa Helaman 13:24–28 ug diha sa 3 Nephi 12:1–2. Ngano nga ang pipila ka indibidwal nagtahod sa karaang mga propeta apan nagsalikway sa buhi nga mga propeta? Unsa nga mga panalangin nga inyong nailhan tungod kay kita adunay buhi nga mga propeta ug mga apostoles dinhi sa yuta karon?
Pagkat-on pa og dugang
-
Ezequiel 2:7; Lucas 1:70; 6:12–13; 1 Nephi 22:2; 3 Nephi 20:24; Doktrina ug mga Pakigsaad 107:23
-
Russell M. Nelson, “Pagpaluyo sa mga Propeta,” Liahona, Nob. 2014, 74–76
Seksiyon 2
Kita Nagsunod ni Jesukristo Kon Kita Mopatalinghog sa Iyang mga Propeta
Si Ginoong Jesukristo mihatag og gibug-aton kon unsa ka importante ang pagdawat sa Iyang buhi nga mga propeta ug mga apostoles. Kita naghimo sa ingon kon kita maminaw ug mopatalinghog sa ilang tambag. “Kay siya nga modawat sa akong mga sulugoon modawat kanako; ug siya nga modawat kanako modawat sa akong Amahan; ug siya nga modawat sa akong Amahan makadawat sa gingharian sa akong Amahan; busa ang tanan nga iya sa akong Amahan ihatag ngadto kaniya (Doktrina ug mga Pakigsaad 84:36–38).
Ang Dios nagsugo nato sa pagkonsiderar sa mga pulong sa Iyang mga sulugoon nga ingon og Iyang kaugalingong mga pulong. Siya namahayag, “bisan pinaagi man sa akong kaugalingong tingog o pinaagi sa tingog sa akong mga sulugoon, managsama ra kini” (Doktrina ug mga Pakigsaad 1:38). Tungod kay ang Dios mipadala sa Iyang mga propeta aron sa pagtudlo ug sa paggiya sa Iyang mga anak ug sa pag-andam nila alang sa kinabuhing dayon ug kahimayaan, kita mapanalipdan ug mapanalanginan kon kita mopatalinghog ni Jesukristo ug sa Iyang pinili nga mga sulugoon (tan-awa sa Doktrina ug mga Pakigsaad 124:45–46).
Mga butang nga angayang hunahunaon
-
Si Presidente Russell M. Nelson mipasabot: “Kini eksakto tungod kay [ang mga lider sa Simbahan sa Ginoo] nagpakabana gayod mahitungod sa mga anak sa Dios nga kita mosangyaw sa Iyang kamatuoran. Mahimong dili kami mosulti kanunay sa mga tawo kon unsay ilang gusto nga paminawon. Ang mga propeta panagsa ra nga mailado. Apan kami sa kanunay nagtudlo sa kamatuoran!” Kanus-a nga ang inyong kaandam sa pagsalig sa propeta sa Ginoo nakatabang ninyo sa pag-ila sa kamatuoran sa iyang mensahe?
-
Ang mga kasulatan nagpasidaan bahin sa dili tinuod nga mga propeta nga motungha sa ulahing mga adlaw ug mosulay sa paglingla sa mga anak sa Dios (tan-awa sa Mateo 24:24). Ang Ginoo mipasabot nga Siya sa kanunay mopatungha sa Iyang mga propeta pinaagi sa naestablisar nga sundanan nga giila sa Simbahan. Basaha ang Juan 10:1–2 ug Doktrina ug mga Pakigsaad 43:7. Unsay buot ipasabot nga ang sulugoon sa Ginoo mosulod agi sa ganghaan? Sa unsang paagi nga ang pagkasayod nga ang pagpadayag gikan sa Dios kanunay nga moabot pinaagi sa giila nga awtoridad sa pagkapari makatabang kaninyo sa paglikay nga malingla?
Kalihokan alang sa pagkat-on uban sa laing mga tawo
-
Basaha ang mosunod nga pamahayag ni Presidente Russell M. Nelson uban sa mga sakop sa inyong grupo: “Ang atong pagpaluyo sa mga propeta usa ka personal nga pasalig nga atong himoon ang atong labing maayo sa pagsuporta sa ilang propetikanhong prayoridad. Ang atong pagpaluyo nagpakita nga atong giila ang ilang tawag isip propeta nga balido ug mahinungdanon kanato.” Basaha ang Doktrina ug mga Pakigsaad 107:22. Sa unsang mga paagi nga kita makasuporta sa Unang Kapangulohan pinaagi sa atong “pagsalig, hugot nga pagtuo, ug [mga] pag-ampo”?
Pagkat-on pa og dugang
-
Mateo 10:40; 3 Nephi 28:34; Doktrina ug mga Pakigsaad 1:14; 112:20, 30–32
-
“Kapitulo 11: Sunda ang Buhing Propeta,” Mga Pagtulun-an sa mga Presidente sa Simbahan: Ezra Taft Benson (2014), 175–86
Seksiyon 3
Ang Tahas sa Unang Kapangulohan ug Korum sa Napulog Duha ka Apostoles
Ang mga sakop sa Unang Kapangulohan ug Korum sa Napulog Duha ka Apostoles naghupot sa mga yawe sa pagkapari nga kinahanglanon sa pag-organisar ug sa paggiya sa mga kalihokan sa Ang Simbahan ni Jesukristo sa mga Santos sa Ulahing mga Adlaw (tan-awa sa Mateo 16:16–19; Doktrina ug mga Pakigsaad 81:1–2). Ang Ginoo nagsaad nga ang Iyang gahom magauban sa mga desisyon nga pagahimoon sa nagkahiusang tingog sa Unang Kapangulohan ug sa Korum sa Napulog Duha ka Apostoles. Ang Kinatibuk-ang Tamdanan nga Basahon namahayag: “Ang tanang sakop sa Unang Kapangulohan ug Korum sa Napulog Duha ka Apostoles mga propeta, mga manalagna, ug mga tigpadayag. Silang tanan mao ang Konseho sa Unang Kapangulohan ug Korum sa Napulog Duha ka Apostoles. Ubos sa direksyon sa Ginoo ug pinaagi sa nagkahiusa nga tingog, kini nga konseho adunay awtoridad sa pagpahayag ug paghubad sa doktrina ug pag-establisar sa palisiya alang sa Simbahan (tan-awa sa Doktrina ug mga Pakigsaad 1:38; 107:27–31).”
Naghisgot bahin sa Unang Kapangulohan, si Propeta Joseph Smith mitudlo: “Ang mga Presidente o [Unang] Kapangulohan mao ang mga pangulo sa Simbahan; ug ang mga pagpadayag sa hunahuna ug kabubut-on sa Dios ngadto sa Simbahan, kinahanglan nga moabot gikan sa Kapangulohan. Kini mao ang mando sa langit, ug ang gahom ug katungod sa [Melchizedek] nga Pagkapari.”
Samtang ang Dios mohatag og pagpadayag pinaagi sa mga propeta ug mga apostoles aron sa paggiya sa Iyang mga anak, ang mga indibidwal makadawat og pagpadayag aron matabangan sila sa piho nilang panginahanglan, responsibilidad, ug mga pangutana ug matabangan nga malig-on ang ilang mga pagpamatuod. Ang personal nga inspirasyon gikan sa Ginoo nahisubay kanunay sa pagpadayag nga ihatag sa Dios pinaagi sa Iyang mga propeta.
Mga butang nga angayang hunahunaon
-
Si Apostol Pablo mipasabot nga ang mga apostoles ug mga propeta mao ang pundasyon sa Simbahan (tan-awa sa Mga Taga-Efeso 2:19–20). Basaha ang Mga Taga-Efeso 4:11–14. Sa unsang paagi ang mga apostoles ug mga propeta sa Ginoo makatabang nato nga dili kita “igatuyatuya ug igaliyokliyok sa tanang hangin sa tuloohan, pinaagi sa lipat-lipat sa mga tawo nga batid sa pagpangmugnag kasaypanan”? (bersikulo 14).
Kalihokan alang sa pagkat-on uban sa laing mga tawo
-
Basaha ang mosunod nga pamahayag ni Elder Neil L. Andersen uban sa mga sakop sa inyong grupo:
“Pipila ang magduhaduha sa ilang pagtuo kon makakaplag sila og pamahayag sa usa ka lider sa Simbahan mga dekadang milabay nga daw sukwahi [wala mahisubay] sa atong doktrina. Adunay importanteng baroganan nga nagdumala sa doktrina sa Simbahan. Ang doktrina gitudlo sa tanang 15 ka mga sakop sa Unang Kapangulohan ug Korum sa Napulog Duha. Wala kini gitago sa usa ka walay klaro nga [parapo] sa usa ka pakigpulong. Ang tinuod nga mga baroganan kanunay nga gitudlo ug sa kadaghanan. Ang atong doktrina dili lisod pangitaon.”
Dapita ang mga sakop sa grupo sa paghisgot kon sa unsang paagi nga kita makaila sa tinuod nga mga baroganan ug opisyal nga doktrina sa Simbahan.
Pagkat-on pa og dugang
-
Amos 3:7; Doktrina ug mga Pakigsaad 124:125–26
-
Dallin H. Oaks, “Ang Sigurado nga Pagsaksi sa Modernong mga Propeta,” Liahona, Okt. 2023, 5–7
-
D. Todd Christofferson, “Ang Doktrina ni Kristo,” Liahona, Mayo 2012, 86–89
Seksiyon 4
Kita Makatinguha og Espirituhanong Kompirmasyon sa Tawag ug mga Pulong sa Propeta
Diha sa Daang Tugon, ang Ginoo mipahisama sa tahas sa Iyang mga propeta ngadto nianang sa usa ka “magbalantay” kinsa adunay responsibilidad sa pagpahibalo sa mga tawo bahin sa umaabot nga kakuyaw (tan-awa sa Ezequiel 33:1–7). Atol sa Iyang mortal nga pangalagad, si Jesukristo mihatag og gibug-aton sa panginahanglan alang sa paghinulsol (tan-awa sa Mateo 4:17; 7:13–14; Lucas 5:32). Ang mga propeta adunay responsibilidad sa pagpahayag sa sama nga mensahe—pagpasidaan sa katawhan sa Dios mahitungod sa sangpotanan sa sala ug sa kadaotan ug nagtudlo sa panginahanglan alang sa paghinulsol (tan-awa sa Mga Buhat 10:43; Doktrina ug mga Pakigsaad 1:4–5).
Si Presidente Russell M. Nelson nagtudlo: “Kamo dili kanunay makasabot sa matag pahayag sa buhi nga propeta. Apan kon kamo nasayod nga ang propeta usa ka propeta, kamo makaduol sa Ginoo sa kamapainubsanon ug hugot nga pagtuo ug mangayo alang sa inyong kaugalingong saksi kabahin sa bisan unsa nga giproklamar sa Iyang propeta.”
Sa adlaw nga ang Simbahan ni Jesukristo naorganisar, ang Ginoo misugo sa Iyang katawhan sa pagdawat sa mga pulong sa Iyang propeta “ingon og gikan sa [Iyang] kaugalingon nga ba-ba, sa tanan nga pagpailob ug hugot nga pagtuo” (tan-awa sa Doktrina ug mga Pakigsaad 21:4–5). Kining balaanon nga panudlo nagsugyot nga dili sayon kanunay ang pagdawat sa mga pulong o sa mga pagtulun-an sa propeta. Tingali dili nato mabati dihadiha dayon ang espirituhanong kompirmasyon sa kaimportante niini. Mao kana ang hinungdan nga ang Ginoo nagpahinumdom nato sa pagbaton og pailob ug hugot nga pagtuo samtang maghulat kita alang sa mas klaro nga pagsabot. Ang Ginoo nagsaad og daghang panalangin niadtong mosalig sa Iyang mga propeta inubanan sa pailob ug hugot nga pagtuo (tan-awa sa Doktrina ug mga Pakigsaad 21:6).
Mga butang nga angayang hunahunaon
-
Diha sa Daang Tugon, mabasa nato ang mahitungod ni Naaman—pangulo sa kasundalohan sa hari sa Siria. Nag-antos siya sa usa ka sakit nga nailhan nga sanla. Iyang nahibaloan nga adunay usa ka propeta sa Israel nga adunay gahom sa pag-ayo, ug si Naaman mibiyahe aron makigkita niya (tan-awa sa 2 Mga Hari 5:1–9). Tun-i ang 2 Mga Hari 5:10–14. Nganong nasagmuyo man si Naaman sa mga instruksiyon nga gihatag sa propeta sa Ginoo? Unsa ang nahitabo nga maoy hinungdan nga sa kaulahian mipatalinghog si Naaman ngadto sa mga pulong sa propeta ug naayo? Sa unsang paagi nga magamit ninyo kini nga baroganan sa inyong kaugalingong kinabuhi?
Kalihokan alang sa pagkat-on uban sa laing mga tawo
-
Ang pagpili sa pagsunod sa tambag sa mga propeta sa Ginoo nagdala og kahilwasan. Uban sa mga sakop sa inyong grupo, basaha ang mosunod nga pamahayag ni Presidente Henry B. Eyring:
“Ang pagpili nga dili modawat sa propetikanhong tambag nag-usab sa mismong dapit nga atong gibarogan. Nahimo kining mas makuyaw. Ang kapakyas sa pagsunod sa propetikanhong tambag makapahuyang sa atong gahom sa pagdawat sa dinasig nga tambag sa umaabot. …
“Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o miingon nga ako walay labut, akong nahibaloan nga akong gibutang ang akong kaugalingon sa peligro. Sa matag higayon nga ako namati ngadto sa tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatngunan nga ako nagpaingon ngadto sa kahilwasan. Subay sa dalan, akong nakaplagan nga ang agianan giandam na alang kanako ug ang gansangon nga mga dapit nahimong hamis. Ang Dios migiya kanako subay sa dalan nga giandam na kanako uban sa mapinanggaon nga pag-amuma, usahay dugay na kaayo nga giandam.”
Dapita ang mga sakop sa grupo sa pagpakigbahin og mga paagi nga sila nakadawat og dugang nga kahilwasan ug proteksyon tungod kay mipili sila sa pagsunod sa tambag sa propeta.
Pagkat-on pa og dugang
-
Isaias 55:8–9; Mormon 9:7–9; Mga Artikulo sa Hugot nga Pagtuo 1:9
-
M. Russell Ballard, “Dios ang Nagtimon,” Liahona, Nob. 2015, 24–27
Ubang mga Kapanguhaan mahitungod sa mga Propeta
-
Mga kapanguhaan alang sa mga bata