Giya sa Pagtuon sa Ebanghelyo

Joseph Smith

Ang gipili sa Dios nga propeta sa pagpahiuli sa ebanghelyo ni Jesukristo

Si Propeta Joseph Smith nakahimo og talagsaong mga butang sa iyang mubo nga kinabuhi. Isip pinili sa Dios nga propeta gihubad niya ang Basahon ni Mormon “pinaagi sa gasa ug gahom sa Dios” (Pasiuna sa Basahon ni Mormon), nakadawat og mga panan-awon ug mga pagpadayag, ug miorganisar sa Simbahan ni Jesukristo dinhi sa yuta. Mora og imposible paminawon nga ang usa ka tawo makahimo og daghan kaayo. Apan si Joseph adunay balaan nga misyon sa pagpahiuli sa ebanghelyo ni Jesukristo, ug ang Ginoo miandam og paagi alang niya sa pagtuman sa Iyang buhat.

Tungod ni Propeta Joseph Smith, nasayod kita nga ang Dios nahigugma kanato ug nakigsulti gihapon kanato karon. Nasayod kita nga Siya adunay plano alang sa Iyang mga anak ug miandam og paagi alang kanila nga mopuyo uban Kaniya pag-usab. Ug nasayod kita nga kini mao ang “[Iyang] buhat ug ang [Iyang] himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).

Kinsa si Joseph Smith?

Si Joseph Smith Jr. natawo niadtong 1805 sa Vermont, USA. Gitawag sa Dios si Joseph nga mahimong usa ka propeta ug sa pagpahiuli sa ebanghelyo ni Jesukristo sa atong panahon. Siya ang unang Presidente sa Ang Simbahan ni Jesukristo sa mga Santos sa Ulahing mga Adlaw. Si Propeta Joseph Smith nakadawat og sagrado nga mga panan-awon ug mga pagpadayag. Ang Dios nga Amahan ug si Jesukristo nagpakita kang Joseph Smith. Nakadawat siya og awtoridad sa pagkapari gikan sa langitnong mga mensahero ug mihubad sa Basahon ni Mormon ug ubang karaang kasulatan pinaagi sa gasa ug gahom sa Dios. Si Joseph kasagaran gigukod tungod sa iyang pagpamatuod, apan nagpabilin siya nga matinud-anon niini hangtod sa kataposan sa iyang kinabbuhi, sa dihang siya ug ang igsoong lalaki nga si Hyrum gipatay sa manggugubot nga panon niadtong 1844.

Kinatibuk-ang pagpasabot sa hilisgotan: Joseph Smith

May kalabotan nga mga giya sa pagtuon sa ebanghelyo: Mga Propeta, Pagpahiuli sa Ebanghelyo, Unang Pananawon, Basahon ni Mormon, Pagpahiuli sa Pagkapari

Seksiyon 1

Si Joseph Smith usa ka Mahalaron nga Saksi sa Dios nga Amahan ug ni Jesukristo

Sa dihang si Joseph Smith nag-edad pa lang og 14 ka anyos, nakita niya ang Dios nga Amahan ug ang Iyang Anak nga si Jesukristo (tan-awa sa Joseph Smith—Kasaysayan 1:15–17). Kini nga kalihokan nailhan nga ang Unang Panan-awon ug nagtimaan sa sinugdanan sa Pagpahiuli sa ebanghelyo. Samtang nagpadayon ang Pagpahiuli sa paghikyad, si Joseph nakakita sa Langitnong Amahan ug ni Jesukristo sa ubang mga panan-awon ug mipamatuod bahin Kanila (tan-awa sa Doktrina ug mga Pakigsaad 76:19–24; 137:1–3).

Si Joseph nag-atubang og daghang pagsulay ug gigukod tungod sa unsay iyang nahibaloan nga tinuod. Apan bisan unsa pa ka dako ang iyang mga kasakit, dili niya ilimod ang iyang pagsaksi sa Dios ug ni Jesukristo o nga siya gitawag sa buhat sa Ginoo (tan-awa sa Joseph Smith—Kasaysayan 1:25). Sa kataposan sa iyang kinabuhi, ang Propeta miselyo sa iyang pagpamatuod sa iyang dugo sa dihang siya gimartir didto sa Bilanggoan sa Carthage (tan-awa sa Doktrina ug mga Pakigsaad 135:1–3; tan-awa usab sa Mga Santos, 1:615–27). Ang iyang pagkamatinud-anon sa buhat sa Ginoo nakatabang sa pagdala sa ebanghelyo ngadto sa mga anak sa Dios dinhi sa yuta sa makausa pa (tan-awa sa Doktrina ug mga Pakigsaad 136:37–38).

Mga butang nga angayang hunahunaon

• Ang gamhanan nga saksi ni Joseph Smith ni Jesukristo narekord diha sa mga kasulatan. Basaha ang iyang pagpamatuod sa Doktrina ug mga Pakigsaad 76:22–24 ug Doktrina ug mga Pakigsaad 110:1–4. Pamalandongi unsay inyong nakat-onan mahitungod ni Jesukristo niini nga mga bersikulo. Dayon pamalandongi ang inyong kaugalingong pagpamatuod sa Manluluwas (tan-awa sa 2 Nephi 31:18). Sa unsa nga paagi nga ang pagpamatuod ni Propeta Joseph Smith bahin ni Jesukristo nakaimpluwensya sa inyong pagpamatuod? Mahimo usab nga gusto ninyong irekord ang inyong pagpamatuod o ubang personal nga mga kasinatian nga mas nakapaduol ninyo ngadto sa Ginoo.

Kalihokan alang sa pagkat-on kauban ang laing mga tawo

• Sa edad nga 14 anyos, unang nakasaksi si Joseph Smith sa Langitnong Amahan ug ni Jesukristo. Kat-oni ang mahitungod niini nga pagsaksi pinaagi sa pagbasa og dungan sa Joseph Smith—Kasaysayan 1:14–20. Unsa ang atong makat-onan mahitungod sa Dios nga Amahan ug ni Jesukristo gikan niini nga asoy? Sa unsa nga paagi nga nausab ang kalibotan tungod sa pagsaksi ni Joseph? Ipakigbahin ang inyong mga hunahuna ug dayon tan-awa ang bidyo “#HearHim: Listen to the Voice of Jesus Christ” (1:47) isip usa ka grupo. Unsaon ninyo sa pagkadungog sa tingog sa Manluluwas? (tan-awa usab sa Doktrina ug mga Pakigsaad 6:22–24; 8:2–3; 9:8–9; 11:12–13). Hisgoti ang inyong mga hunahuna ug dayon paghisgot mahitungod sa epekto sa inyong pagpamatuod ngadto sa uban samtang kamo maminaw sa Manluluwas sama sa gibuhat ni Joseph.

• Ang pagsaksi ni Joseph sa Manluluwas anaa naapil sa “Ang Buhi nga Kristo: ang Pagpamatuod sa mga Apostoles.” Basaha pagdungan ang pagpamatuod sa Propeta sa pamahayag ug hisgoti ang makasaysayanong kaagi sa mga panan-awon nga iyang nadawat. Mahimo usab nga inyong trabahoon ang pagmemorya sa pagpamatuod sa Propeta isip usa ka grupo. Tingali inyong ma-recite og kusog ang mga pulong ug mogamit og mga litrato gikan sa Church’s Media Library o maghimo og ubang mga biswal sa pagtabang ninyo. Hisgoti kon sa unsa nga paagi nga ang pagmemorya sa pagsaksi sa Propeta makapadugang sa inyong kaugalingong hugot nga pagtuo ni Jesukristo ug mahimong usa ka tinubdan sa gahom, kadasig, inspirasyon, ug kahupayan.

Pagkat-on pa og dugang

• Doktrina ug mga Pakigsaad 135:1–7

• M. Russell Ballard, “Pagdayeg sa Tawo,” Liahona, Nob. 2023, 74–75

• “Testimony of the Book of Mormon” (bidyo), Gospel Library

• “The First Vision,” “Tutored by Heaven,” “Strengthened by Trials,” “Sealed His Testimony with His Blood” (mga bidyo), Gospel Library

Seksiyon 2

Si Joseph Smith Gipili sa Dios sa Pagpahiuli sa Ebanghelyo ni Jesukristo

Ang Dios mipili sa Propeta nga si Prophet Joseph Smith sa pagpahiuli sa kahingpitan sa ebanghelyo ni Jesukristo dinhi sa yuta (tan-awa sa Doktrina ug mga Pakigsad 1:17; 27:13; “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibutan sa Ikaduhang Siglo nga Kasaulogan,” Librarya sa Ebanghelyo). Pinaagi sa gahom sa Dios, si Joseph mihubad sa Basahon ni Mormon ug nakadala og dugang nga mga kasulatan (tan-awa ang pasiuna sa Basahon ni Mormon; Doktrina ug mga Pakigsaad 135:3). Giorganisar niya Ang Simbahan ni Jesukristo sa mga Santos sa Ulahing mga Adlaw, nakadawat og awtoridad sa pagkapari, ug miandam sa mga Santos sa pagtukod sa Zion (tan-awa sa Doktrina ug mga Pakigsaad 20:1; Mga Santos, 1:123–29).

Tungod sa misyon ni Joseph Smith, nasayod kita nga ang Dios adunay plano alang sa Iyang mga anak ug makadawat kita og mga ordinansa ug mohimo og mga pakigsaad uban Kaniya diha sa balay sa Ginoo. Ang buhat ni Joseph mipahimutang sa pundasyon alang sa ebanghelyo ni Jesukristo sa ulahing mga adlaw, nagtugot sa Simbahan sa pagpadayon ubos sa dinasig nga direksyon sa mga propeta, mga manalagna, ug mga tigpadayag (tan-awa sa Mga Santos, 1:590–91).

Mga butang nga angayang hunahunaon

• Si Presidente Jeffrey R. Holland mipamatuod: “Nasayod ko nga si Joseph Smith, kinsa miila nga siya dili hingpit, bisan pa gipili siya nga instrumento sa Dios aron mapahiuli ang walay kataposang ebanghelyo dinhi sa yuta. Nasayod ko nga sa pagbuhat sa ingon—ilabi na sa paghubad sa Basahon ni Mormon—mitudlo siya kanako sa gugma sa Dios, sa kabalaan ni Kristo, ug sa gahum sa priesthood [gahom sa pagkapari] kay ni bisan kinsang propeta nga akong nabasahan, nadunggan, o nailhan sa tibuok kinabuhi nga pagpangita.” Unsa ang natudlo ni Propeta Joseph Smith kaninyo mahitungod sa gugma sa Dios, pagkabalaan ni Kristo, ug sa gahom sa pagkapari pinaagi sa Pagpahiuli sa ebanghelyo ni Jesukristo? Sa unsang paagi nga kadto nga mga pagtulun-an nagpamatuod ninyo nga si Joseph Smith gipili sa Dios? Irekord ang bisan unsang impresyon nga inyong madawat.

Kalihokan alang sa pagkat-on kauban ang laing mga tawo

• Nakatagamtan kita og daghang mga panalangin tungod kay gipahiuli sa Dios ang ebanghelyo pinaagi ni Joseph Smith. Isip usa ka grupo, sulayi ang paghimo og lista niadto nga mga panalangin. Mahimo ninyong sugdan niadtong gihisgotan na sa Doktrina ug mga Pakigsaad 135:3. Kini nga mga pulong gikan ni Presidente Russell M. Nelson makahatag ninyo og mga ideya: “[Ang Pagpahiuli sa ebanghelyo] nagpasabot nga kamo ug ang inyong pamilya mabugkos sa kahangtoran! Kini nagpasabot nga tungod kay kamo nabunyagan pinaagi sa dunay awtoridad gikan ni Jesukristo ug nakompirmahan nga miyembro sa Iyang Simbahan, kamo makatagamtam sa kanunay nga pakig-uban sa Espiritu Santo. Siya mogiya ug manalipod kaninyo. Kini nagpasabot nga kamo dili biyaan nga wala mahupay o walay magamit nga gahom sa Dios sa pagtabang ninyo. Kini nagpasabot nga ang gahom sa pagkapari makapanalangin ninyo sa inyong pagdawat sa importanting mga ordinansa ug paghimog mga pakigsaad uban sa Dios ug pagtuman niini.” Dayon hisgoti ang mahitungod sa unsang paagi nga kamo makapakita sa inyong pasalamat alang sa unsay gihatag sa Ginoo kaninyo pinaagi sa Iyang propeta nga si Joseph Smith.

• Nasayod ba kamo nga laing propeta nga ginganlan og Jose, kinsa nagpuyo sa karaan, nakakita nang daan sa misyon ni Joseph Smith? Basaha ang 2 Nephi 3:6–15 aron mahibaloan unsa ang gipanagna ni Jose sa Ehipto mahitungod ni Joseph Smith ug sa iyang importante nga trabaho. Unsa nga mga pulong ang gigamit sa paghulagway ni Joseph Smith niini nga mga bersikulo? Unsa ang giandam sa Dios nga buhaton ni Joseph? Pakigsulti sa usag usa mahitungod unsay inyong nakaplagan. Mahimo usab nga inyong hisgotan ang mga panalangin nga gisaad niini nga panagna ug sa unsa nga paagi kini moabot pinaagi sa Pagpahiuli.

Pagkat-on pa og dugang

• Doktrina ug mga Pakigsaad 21:1–5

• Dallin H. Oaks, “Joseph, the Man and the Prophet,” Ensign, May 1996, 71–73

• Tad R. Callister, “Joseph Smith—Propeta sa Pagpahiuli,” Liahona, Nob. 2009, 35–37

• “Ministry of Joseph Smith: The Book of Mormon,” “Ministry of Joseph Smith: The Restoration of Priesthood Authority” (mga bidyo), Gospel Library

• “Teachings of Joseph Smith: The Organization of the Church” (bidyo), Gospel Library

Seksiyon 3

Makaangkon Kamo sa Inyong Kaugalingong Pagsaksi Nga si Joseph Smith Mao ang Propeta sa Dios

Makapadasig sa paghunahuna nga isip usa ka 14 anyos nga batang lalaki, si Joseph nakakita sa Langitnong Amahan ug ni Jesukristo. Apan unsa ang nahitabo sa wala pa madawat ni Joseph ang Unang Panan-awon? Namalandong siya sa mga kasulatan, nagtinguha og kaalam gikan sa Dios, ug nag-ampo alang sa Iyang giya (tan-awa sa Joseph Smith—Kasaysayan 1:10–19). Ang istorya ni Joseph nagpahinumdom nato nga kita, usab, makaangkon og personal nga saksi sa Manluluwas ug sa Iyang ebanghelyo—lakip nga si Joseph Smith gitawag sa pagpahiuli niini. Samtang kini nga saksi mahimong moabot sa hinayhinay imbes sa usa ka talagsaong hitabo, pinaagi sa Espiritu Santo kita makahibalo sa samang kaseguoran sa kamatuoran sa tanang butang (tan-awa sa Moroni 10:5).

Mga butang nga angayang hunahunaon

• Adunay daghang paagi nga maangkon kita og personal nga saksi nga si Joseph Smith usa ka propeta. Miingon si Elder Neil L. Andersen: “Mahimong moabot kini samtang nagluhod kamo sa pag-ampo, naghangyo sa Dios sa pagmatuod nga siya tinuod nga propeta. Mahimong moabot kini samtang nagbasa kamo sa asoy sa Propeta bahin sa Unang Panan-awon. Usa ka pagpamatuod mahimong motuhop diha sa inyong kalag samtang magbalik-balik kamo og basa sa Basahon ni Mormon. Mahimong moabot kini samtang magpamatuod kamo bahin sa Propeta o samtang magbarog kamo sa templo ug makaamgo nga pinaagi ni Joseph Smith ang balaang gahom sa pagselyo gipahiuli sa yuta.” Hunahunaa ang inyong pagpamatuod sa tahas ni Joseph Smith isip propeta sa Dios. Unsa ang nakatabang kaninyo nga motuo sa iyang balaan nga kalag? Unsa pa ang mahimong ninyong buhaton aron makaangkon o makapalig-on sa inyong pagpamatuod nga siya usa ka propeta?

Kalihokan alang sa pagkat-on kauban ang laing mga tawo

• Usa ka personal nga saksi nga si Joseph Smith usa ka propeta sa Dios dili lang mahitabo kanato—butang kini nga atong trabahoan. Malig-on ninyo ang inyong personal nga pagsaksi sa tawag ni Joseph pinaagi sa pagpakigbahin og kasulatan gikan sa Basahon ni Mormon uban sa inyong grupo ug maghisgot kon sa unsang paagi nga si Joseph usa ka instrumento sa mga kamot sa Dios aron kana nga kasulatan maanaa kanato. Tingali mahimo kamong magpulipuli sa pagrekord sa pagpamatuod sa Propeta gikan sa ang Perlas nga Labing Bilihon nga dungan ug dayon maminaw niini o ipakigbahin kini ngadto sa uban. Sa unsang paagi nga ang Basahon ni Mormon ug ang pagpamatuod ni Joseph nakapalig-on sa inyong pagtuo nga si Joseph gitawag sa Dios?

• Mapalambo nato ang atong pagpamatuod sa balaang tawag ni Joseph Smith sa atong tibuok nga kinabuhi. Tingali ang inyong pagpamatuod sa iyang tahas ingon og mas lig-on sa piho nga mga panahon kay sa uban. Mahimo ninyong basahon kini nga tambag ni Presidente Dieter F. Uchtdorf: “Ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo.” Ikonsiderar ang pagsuhid kon sa unsang paagi nga ang tambag ni Presidente Uchtdorf magamit sa inyong pagpamatuod nga si Joseph propeta sa Dios pinaagi sa pagtan-aw sa usa ka litrato nga gipadak-an ang usa ka detalye. Hisgoti pagdungan unsa ang susama og panagway sa imahe. Dayon tan-awa ang samang litrato nga gipagamyan aron makita ang tibuok imahe. Sa unsang paagi ang litrato nga lahi tan-awon kay sa kaniadto? Unsa ang gitudlo niini nga ehemplo kaninyo mahitungod unsaon sa pag-angkon og saksi sa balaan nga tawag ni Propeta Joseph Smith?

Pagkat-on pa og dugang

• Pasiuna sa Basahon ni Mormon

• Neil L. Andersen, “Joseph Smith,” Liahona, Nob. 2014, 28–31

• “Ang Kinabuhi ug Pangalagad ni Joseph Smith,” Mga Pagtulun-an sa mga Presidente sa Simbahan: Joseph Smith (2011), 1–28

• Joseph Smith: The Prophet of the Restoration (bidyo), Gospel Library

Uban pang mga Kapanguhaan mahitungod ni Joseph Smith

• Mga Kasulatan

• Mga mensahe gikan sa mga lider sa Simbahan

• Mga himno ug mga awit sa mga bata

• Mga Bidyo

• Mga kapanguhaan alang sa mga bata

Mubo nga mga Sulat

1. Tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 438–44.

2. Tan-awa sa Russell M. Nelson, “Paminaw Kaniya,” Liahona, Mayo 2020, 88.

3. Jeffrey R. Holland, “Nagatuo Ako,” Liahona, Mayo 2013, 95.

4. Russell M. Nelson, “Paminaw Kaniya,” 88.

5. Neil L. Andersen, “Joseph Smith,” Liahona, Nob. 2014, 30.

6. Tan-awa sa L. Whitney Clayton, “Pagpili nga Motuo,” Liahona, Mayo 2015, 38.

7. Tan-awa sa Neil L. Andersen, “Joseph Smith,” 30.

8. Dieter F. Uchtdorf, “Nakabenepisyo Kaayo Kini!,” Liahona, Nob. 2015, 22.