Librarya
Basahon ni Mormon

“Basahon ni Mormon,” Mga Hilisgotan ug mga Pangutana (2023)

batan-ong lalaki nga nagbasa sa Basahon ni Mormon

Giya sa Pagtuon sa Ebanghelyo

Basahon ni Mormon

Lain nga Tugon ni Jesukristo

Ang karaang mga propeta misulat sa Basahon ni Mormon alang sa katawhan sa atong panahon karon. Isip katambayayong sa Biblia, ang Basahon ni Mormon nagpamatuod kang Jesukristo. Kadtong sinsero nga magbasa ug magtuon sa basahon mobati sa Espiritu Santo ug makakaplag og mga tubag sa daghang labing importante nga mga pangutana sa kinabuhi. Pinaagi sa pagbasa sa Basahon ni Mormon, ang mga tawo makakat-on sa ilang mga kaugalingon nga ang Dios buhi, nga Siya nahigugma nila, ug nga ang ebanghelyo ni Jesukristo gipahiuli dinhi sa yuta.

Ang moderno nga mga propeta kanunay nga nagdapit sa mga miyembro sa Simbahan sa pagtuon sa Basahon ni Mormon kanunay. Pananglitan, si Presidente Russell M. Nelson namahayag: “Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga daotan niining panahona.”

Unsa ang Basahon ni Mormon?

Ang Basahon ni Mormon: Lain nga Tugon ni Jesukristo usa ka basahon sa balaan nga kasulatan. Naglangkob kini sa mga sinulat sa karaang mga propeta nga nagpuyo sa Kasadpang Bahin sa Kalibotan. Isip propeta sa Pagpahiuli, gihubad ni Joseph Smith ang Basahon ni Mormon pinaagi sa gasa ug gahom sa Dios (tan-awa sa Doktrina ug mga Pakigsaad 135:3). Kauban sa Biblia, ang Basahon ni Mormon nagpamatuod kang Jesukristo ug naglangkob sa kahingpitan sa ebanghelyo (tan-awa sa Ezequiel 37:15–17; Doktrina ug mga Pakigsaad 20:8–9). Ang Basahon ni Mormon nagsilbi usab nga ebidensya sa propetikanhong tawag ni Joseph Smith ug sa Pagpahiuli sa ebanghelyo.

Kinatibuk-ang pagpasabot sa hilisgotan: Basahon ni Mormon

May kalabotan nga mga giya sa pagtuon sa ebanghelyo: Mga Kasulatan, Biblia, Joseph Smith, Pagpahiuli sa Ebanghelyo

Seksiyon 1

Ang Basahon ni Mormon Nagpamatuod Nga si Jesukristo Mao ang Manunubos sa Kalibotan

Basahon ni Mormon

Ang mga miyembro sa Ang Simbahan ni Jesukristo sa mga Santos sa Ulahing mga Adlaw mikonsiderar sa Biblia isip balaang kasulatan. Ang Daang Tugon ug ang Bag-ong Tugon parehong nagsaksi ni Jesukristo ug sa Iyang buhat sa pagpahinabo sa kaluwasan sa mga anak sa Dios. Ang Basahon ni Mormon gisulat sa mga propeta sa Dios didto sa Amerika ug nagbarog isip lain nga tugon ni Jesukristo. Ang Basahon ni Mormon naglakip “sa kahingpitan sa ebanghelyo ni Jesukristo ngadto sa mga Hentil” ug nagmatuod ngadto sa kalibotan nga ang mga asoy bahin ni Jesukristo ug sa Iyang mga propeta sumala sa makita diha sa Biblia tinuod (tan-awa sa Doktrina ug mga Pakigsaad 20:8–12). Kauban sa Biblia, ang Basahon ni Mormon motabang sa mga tawo nga makabaton og mas klaro nga pagsabot bahin sa plano sa Dios ug moandam nila sa pagsunod ni Jesukristo (tan-awa sa Ezequiel 37:15–17; 2 Nephi 3:12).

Ang Basahon ni Mormon usa ka dakong panalangin sa katawhan sa Dios sa panahon karon. Naglangkob kini sa mga pulong ni Jesukristo (tan-awa sa 2 Nephi 33:10). Si Presidente Russell M. Nelson mipasabot:

“[Ang Basahon ni Mormon] naglangkob sa mga tubag sa labing importante nga mga pangutana sa kinabuhi. Nagtudlo kini sa doktrina ni Kristo. Mipalapad ug mipatin-aw kini sa daghang ‘yano ug bililhon’ [tan-awa sa 1 Nephi 13:29–33] nga mga kamatuoran nga nawagtang sa mga siglo ug sa daghang hubad sa Biblia.

“Ang Basahon ni Mormon naghatag sa kahingpitan ug sa labing masaligon nga pagsabot sa Pag-ula ni Jesukristo nga makaplagan bisan asa. … Ang hingpit nga gahom sa ebanghelyo ni Jesukristo anaa sa Basahon ni Mormon. Wala nay lain.”

Mga butang nga angayang hunahunaon

  • Si Propeta Joseph Smith nagtudlo nga ang Basahon ni Mormon mao ang “sukaranan sa atong tinuohan” (tan-awa sa Mga Pagtulun-an sa mga Presidente sa Simbahan: Joseph Smith (2011), 75). Sa arkitektura, ang sukaranang bato mao ang usa ka bangil nga bato nga anaa sa sentro sa arko, nga nagkupot sa ubang mga bato nga gipahimutang ug mopugong sa arko gikan sa pagkahugno. Sama sa sukaranang bato sa arkitektura, ang Basahon ni Mormon mao ang nakapalig-on sa atong pagtuo kang Jesukristo ug sa Iyang gipahiuli nga ebanghelyo. Sa unsang paagi nga ang inyong pagpamatuod sa Basahon ni Mormon nakaimpluwensya sa inyong pagpamatuod sa ubang mga aspeto sa ebanghelyo?

Kalihokan alang sa pagkat-on uban sa laing mga tawo

  • Ang sentro nga mensahe sa Basahon ni Mormon mao nga si Jesus mao ang Kristo. Dapita ang mga sakop sa inyong grupo sa pagbasa sa ulohan nga pahina sa Basahon ni Mormon, hatagan og espesyal nga pagtagad ang ikaduhang parapo. Sa unsang paagi nga ang ulohan nga pahina naghatag og gibug-aton sa kaimportante sa Basahon ni Mormon? Ang mosunod nga mga kasulatan mahimong makatabang usab: 1 Nephi 6:4; Jacob 1:7; Omni 1:26; 3 Nephi 11:13–17; Moroni 10:32–33. Nganong importante man nga motabang sa uban nga makasabot nga ang katuyoan sa Basahon ni Mormon mao ang pagpamatuod nga si Jesus mao ang Kristo?

Pagkat-on pa og dugang

Seksiyon 2

Ang Pagtungha sa Basahon ni Mormon Usa ka Milagro

bulawan nga mga palid

Ang Basahon ni Mormon miabot pinaagi sa gasa ug gahom sa Dios. Ang basahon orihinal nga girekord sa karaang mga propeta sa Amerika diha sa metal nga mga palid. Sulod sa mga siglo, gilubong kini duol sa panimalay ni Joseph Smith sa ibabawng bahin sa estado sa New York sa Estados Unidos, hangtod nga ang usa ka langitnong mensahero, si Moroni, mipakita kang Joseph Smith kon asa kini makit-an. Ang instrumento alang sa paghubad sa rekord, ang Urim ug Thummim, gitipigan usab kauban sa mga palid, uban sa lain pang karaang mga kagamitan (tan-awa sa Joseph Smith—Kasaysayan 1:30–35).

Bisan og si Joseph Smith 23 anyos pa lang ug gamay ra og pormal nga edukasyon, iyang gihubad ang Basahon ni Mormon ngadto sa Iningles sa gipaspason nga walo ka pahina kada adlaw. Wala siyay panabot bahin sa karaang mga pinulongan, ug wala siya mogamit og bisan unsang mubo nga mga sulat. Nakompleto niya ang tibuok nga paghubad sa basahon sulod sa mga 85 ka adlaw. Kon ang mga tawo mangutana kon giunsa niya paghubad, si Joseph moingon lamang nga nahimo kini “pinaagi sa gasa ug gahom sa Dios” (ulohan nga pahina sa Basahon ni Mormon; tan-awa usab sa Russell M. Nelson, “A Treasured Testament,” Ensign, July 1993).

Ang Basahon ni Mormon gimantala sa Iningles mga pipila lang ka adlaw sa wala pa maorganisar ang Simbahan niadtong 1830 (tan-awa sa Mga Hisgotanan sa Kasaysayan sa Simbahan, “Pag-imprinta ug Pagmantala sa Basahon ni Mormon,” Librarya sa Ebanghelyo). Karon, ang Basahon ni Mormon gihubad sa sobra sa 100 ka pinulongan ug gigamit sa tibuok kalibotan.

Mga butang nga angayang hunahunaon

  • Si Joseph Smith gimandoan nga bantayan og maayo ang mga palid. Atol sa proseso sa paghubad, pipila lang ka tawo ang aktuwal nga nakakita sa mga palid. Hinuon, si Joseph Smith gisultihan nga ipakita ang mga palid ngadto sa pipila sa iyang suod nga mga higala. Kini nga mga tawo nahimong pormal nga nailhan isip ang “Tulo ka Saksi” ug ang “Walo ka Saksi.” Mabasa ninyo ang ilang mga pagpamatuod diha sa “Ang Pagpamatuod sa Tulo ka Saksi” ug “Ang Pagpamatuod sa Walo ka Saksi.” Nganong importante man nga motabang sa uban nga mahibalo sa mga kasinatian sa Tulo ka Saksi ug sa Walo ka Saksi? Unsa ang mahimo ninyong buhaton aron ipakigbahin ang inyong kaugalingong pagsaksi sa Basahon ni Mormon ngadto sa uban?

Kalihokan alang sa pagkat-on uban sa laing mga tawo

  • Bisan og daghang tawo ang natingala kon sama sa unsa ang proseso sa paghubad sa Basahon ni Mormon, si Joseph Smith mihatag og gamayng piho nga impormasyon mahitungod niini gawas sa pag-ingon nga gihubad kini “pinaagi sa gasa ug gahom sa Dios” (pasiuna sa Basahon ni Mormon; Doktrina ug mga Pakigsaad 135:3). Dapita ang mga sakop sa imong grupo sa pagbasa sa “Hubad sa Basahon ni Mormon” diha sa Mga Hisgotanan sa Kasaysayan sa Simbahan (Librarya sa Ebanghelyo). Pangutan-a sila kon unsay mga hunahuna nga ilang naangkon gikan sa pagbasa. Sa inyong hunahuna nganong gihatagan man og gibug-aton ni Joseph Smith “ang gasa ug gahom sa Dios” kon maghisgot sa paghubad sa Basahon ni Mormon?

Pagkat-on pa og dugang

Seksiyon 3

Kamo Masayod sa Inyong Kaugalingon Nga ang Basahon ni Mormon Tinuod

mga tawo nga naghisgot mahitungod sa Basahon ni Mormon

Ang pagkahimong disipulo ni Jesukristo usa ka tibuok kinabuhi nga proseso. Matag usa nato anaa sa managlahi nga dapit sa espirituhanong dalan balik ngadto sa Langitnong Amahan ug ni Jesukristo. Apan bisan asa man kamo niana nga dalan, ang Basahon ni Mormon makatabang ninyo nga mas mapaduol ngadto Kanila. Ang pulong sa Dios puno sa makapakabig nga gahom (tan-awa sa Alma 5:7; 31:5). Ang Basahon ni Mormon makatabang ninyo nga makalikay sa kalibotanong pagpanglingla ug makagiya ninyo diha sa dalan paingon sa espirituhanong kaluwasan (tan-awa sa 1 Nephi 15:24; Helaman 3:29–30).

Tungod sa kaimportante sa Basahon ni Mormon, ang mga sulugoon sa Ginoo mihatag og gibug-aton nga ang tanang miyembro sa Ang Simbahan ni Jesukristo sa mga Santos sa Ulahing mga Adlaw kinahanglang magtinguha nga masayod sa ilang kaugalingon nga ang Basahon ni Mormon tinuod. Ang pasiuna sa Basahon ni Mormon namahayag: “Nagdapit kami sa tanang katawhan sa tanang dapit sa pagbasa sa Basahon ni Mormon, sa pagpamalandong diha sa ilang mga kasingkasing sa mensahe nga anaa niini, ug dayon sa pagpangutana sa Dios, ang Amahan sa Kahangtoran, sa ngalan ni Kristo kon ang basahon tinuod ba. Kadtong mosunod niini nga pamaagi ug mangutana inubanan sa pagtuo makaangkon og pagpamatuod sa kamatuoran ug kabalaan niini pinaagi sa gahom sa Espiritu Santo. (Tan-awa sa Moroni 10:3–5.)”

Mga butang nga angayang hunahunaon

  • Basaha ang mosunod nga pamahayag ni Elder Jeffrey R. Holland: “Ako mopamatuod nga ang usa dili makaangkon sa kinahugtan nga pagtuo niining buluhaton sa ulahing mga adlaw—ug unya makakaplag sa kinatas-ang sukod sa kalinaw ug kahupayan alang sa atong panahon—gawas lang kon siya mohangop sa kabalaan sa Basahon ni Mormon ug ni Ginoong Jesukristo, kinsa mao ang gipamatud-an niini.” Sa unsang paagi nga ang Basahon ni Mormon nakaimpluwensya sa inyong pagpamatuod bahin sa Ang Simbahan ni Jesukristo sa mga Santos sa Ulahing mga Adlaw?

Kalihokan alang sa pagkat-on uban sa laing mga tawo

  • Ang Basahon ni Mormon usa ka balaanong giandam nga himan sa pagkabig nga adunay gahom sa pag-usab sa mga hunahuna, mga kasingkasing, ug mga kinabuhi kon atong ipahisubay ang atong kaugalingon ngadto kang Jesukristo ug sa Iyang mga pagtulun-an. Basaha ang mosunod nga pamahayag ni Presidente Ezra Taft Benson ngadto sa mga sakop sa imong grupo:

    “Ang Basahon ni Mormon mao ang instrumento nga gidisenyo sa Dios nga ‘mosilhig sa yuta ingon sa usa ka lunop, aron pagpundok sa [Iyang] pinili.’ (Moises 7:62.) Kining sagrado nga basahon sa kasulatan kinahanglan nga mahimong mas sentro sa atong pagsangyaw, sa atong pagtudlo, ug sa atong misyonaryo nga buhat. …

    “Naghagit ako kanatong tanan sa pagmainampoon sa paghunahuna og mga lakang nga kita personal nga makahimo sa pagdala niining bag-o nga saksi alang ni Kristo nga mas hingpit diha sa atong kaugalingong mga kinabuhi ug ngadto sa usa ka kalibotan nga dako kaayo og panginahanglan niini.”

    Unsa ang pipila ka paagi nga makatabang kita sa Ginoo sa Iyang buhat pinaagi sa pagpuno sa yuta sa Basahon ni Mormon?

Pagkat-on pa og dugang

Ubang mga Kapanguhaan mahitungod sa Basahon ni Mormon