Librarya
Biblia

“Biblia,” Mga Hilisgotan ug mga Pangutana (2023)

batan-ong babaye nga nagbasa sa Biblia

Giya sa Pagtuon sa Ebanghelyo

Biblia

Pagtudlo og hugot nga pagtuo kang Jesukristo ngadto sa minilyon

Ang mga istorya sa Biblia liboan na ka tuig ang milabay. Naghulagway kini sa mga tawo, mga kultura, ug mga sitwasyon nga sa kasagaran lahi kaayo gikan sa atong panahon karon. Ug pero kon magtuon kita sa Biblia, makaplagan nato nga daghan niini ang pamilyar. Mabasa nato ang mahitungod sa mga pamilya nga nakasinati og hingpit nga kalipay ug panagbangi, mga indibidwal nga nagpabilin nga matinud-anon bisan og sila nahigawad, ug mga nasod nga nakasinati og mga gubat ug natural nga mga katalagman. Labaw sa tanan, mabasa nato ang mahitungod sa mga tawo nga nagtinguha nga adunay koneksyon sa Dios—ug kinsa nakakaplag niini pinaagi sa ilang hugot nga pagtuo ug paglaom diha ni Jesukristo.

Unsa ang Biblia?

Ang Biblia mao ang pulong sa Dios. Naglakip kini sa mga sinulat sa mga propeta ug sa ubang dinasig nga mga tagsulat gikan sa panahon ni Adan ug Eva ngadto sa mga adlaw sa Apostoles ni Jesukristo human sa Iyang Pagkabanhaw. Kini nga mga sinulat naglakip sa mga sugo sa Dios, sa Iyang mga pakigsaad, sa Iyang mga pagpadayag, ug sa Iyang mga inter-aksiyon sa Iyang mga anak. Ang Biblia adunay duha ka bahin: ang Daang Tugon ug ang Bag-ong Tugon. Diha sa Daang Tugon, ang mga propeta nagpamatuod sa pag-anhi sa Manluluwas. Ang Bag-ong Tugon mao ang usa ka rekord sa kinabuhi ug pangalagad ni Jesukristo.

May kalabotan nga mga giya sa pagtuon sa ebanghelyo: Mga Kasulatan, Basahon ni Mormon, Mga Propeta, Pagpadayag, Joseph Smith

Seksiyon 1

Ang Biblia Mao ang Pulong sa Dios ug Saksi ni Jesukristo

madaogong pagsulod ni Kristo

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, atong gibahandi ug gitahod ang Biblia isip ang pulong sa Dios. Diha sa Biblia, makat-onan nato ang mga baroganan sa ebanghelyo ni Jesukristo, nga naglakip sa Iyang mga sugo ug mga pagtulun-an (tan-awa sa Doktrina ug mga Pakigsaad 42:12).

Si Jesukristo mao ang gitutokan sa Biblia. Nailhan Siya pinaagi sa daghang ngalan diha sa mga pahina niini, sama sa Jehova, Ginoong Dios, Manunubos, ang Usa nga Balaan sa Israel, Emmanuel, ug Kordero sa Dios. Ang Iyang yutan-ong misyon gipanagna sa mga propeta sa Daang Tugon, ug ang Bag-ong Tugon naghatag og mga asoy sa mga saksi niana nga misyon (tan-awa sa Isaias 9:6; Juan 20:31). Ang Biblia nagpamatuod sa gugma sa Dios alang kanato, nga gipakita pinaagi ni Jesukristo, kinsa mihimo niini nga posible alang nato aron modawat og kapasayloan sa atong mga sala ug mobalik sa pagpuyo sa presensya sa Dios. Makakaplag kita og kahupayan ug giya pinaagi sa pagtuon sa Biblia kon kita maningkamot nga mahimong mga disipulo ni Kristo.

Mga butang nga angayang hunahunaon

  • Si Propeta Joseph Smith miingon bahin sa Biblia nga “siya kinsa mibasa niini kanunay mas makagusto niini pag-ayo, ug siya nga nakasinati niini, makaila sa kamot sa [Dios] bisan asa siya makakita niini.” Sa unsang paagi nga ang Biblia mipalig-on sa inyong hugot nga pagtuo diha ni Jesukristo? Unsay inyong nakat-onan mahitungod sa Dios samtang nagbasa kamo niini? Ikonsiderar ang pagsulat sa unsa nga paagi nga kamo nakakita sa Iyang impluwensya sa mga kinabuhi niadtong nagpakabuhi sa karaang panahon ug sa unsa nga paagi nga inyong nakita ang Iyang impluwensya sa inyong kinabuhi karon.

  • Kon kamo magtinguha og kaalam o giya, makadawat kamo og direksyon pinaagi sa pulong sa Dios. Mabasa ninyo ang Mga Panultihon 3:5–6; Jeremias 29:12–13; Juan 14:23; Mga Taga-Colosas 3:16; ug Santiago 1:5 alang sa mga panig-ingnan kon giunsa sa Ginoo paghatag nato og giya pinaagi sa Biblia. Dayon isulat ang pipila ka bersikulo sa Biblia nga nakapanalangin ninyo sa paglaom ug direksyon.

Kalihokan alang sa pagkat-on kauban ang laing mga tawo

  • Kita makaila sa Manluluwas pinaagi sa pagtuon sa Biblia, nga nagsaksi ni Jesukristo. Ikonsiderar ang pagbasa og dungan sa Exodo 3:6–14; Mateo 3:13–17; ug Lucas 2:25–38 alang sa mga panig-ingnan kon sa unsa nga paagi nga ang Biblia nagpamatuod sa Manluluwas. Mahimo usab kamong motan-aw sa bidyo sa Biblia mahitungod sa mortal nga pangalagad sa Manluluwas. Hisgoti unsay inyong nakat-onan gikan niini nga mga asoy mahitungod sa balaang misyon ni Kristo. Sa unsang paagi nga ang Daang Tugon ug ang Bag-ong Tugon nagpamatuod nga si Jesus mao ang Manluluwas ug Manunubos?

  • Pipila sa labing importante nga mga panghitabo ug mga pagpadayag sa ulahing mga adlaw nahitabo sa dihang ang mga propeta nagtuon sa Biblia. Basaha ug hisgoti ang pipila niadtong mga higayon sa kasaysayan sa Simbahan nga narekord sa Joseph Smith—Kasaysayan 1:10–20; Doktrina ug mga Pakigsaad 76:11–20; ug Doktrina ug mga Pakigsaad 138:1–11. Isip usa ka grupo, mahimo kamong manganta og pipila ka himno mahitungod sa pagpahiuli, sama sa “Unang Pag-ampo ni Joseph Smith” o “Ang Espiritu sa Dios.”

Pagkat-on pa og dugang

Seksiyon 2

Gipreserbar sa Dios ang Balaan nga Biblia aron sa Pagpanalangin sa Iyang mga Anak

pamilya nga nagtuon sa mga kasulatan

Ang kamatuoran nga kita aduna sa Biblia aron tun-an ug kat-onan gikan karon usa gayod ka milagro. Salamat sa Ginoo ug sa maisogong mga indibidwal sa kasaysayan, makakat-on kita niining talagsaong rekord, “nga nakapabalik sa mga kasingkasing sa katawhan sulod sa gatosan ka mga tuig, naggiya kanila sa pag-ampo, sa pagpili og matarong nga mga dalan, ug sa pagsiksik aron makaplagan ang ilang Manluluwas.” Kining balaan nga basahon nagtabang nato nga mobati sa Espiritu sa Dios.

Sa orihinal, ang Biblia gisulat sa Hebreo, Griyego, ug Aramaic. Apan paglabay sa mga siglo ug daghang mga rebisyon sa basahon, ang pipila sa yano ug bililhon nga mga kamatuoran nawala (tan-awa sa 1 Nephi 13:26–29; Mga Artikulo sa Hugot nga Pagtuo 1:8). Tungod niini, ang Dios misugo ni Propeta Joseph Smith sa pagpahiuli sa pipila niadto nga mga kamatuoran nga unsay gitawag na karon nga Hubad ni Joseph Smith sa Biblia. Ang dinasig nga hubad sa Propeta nagpakita unsa ka importante ngadto sa Ginoo nga ang Iyang mga anak makasabot og sakto sa Biblia ug sa mga pagtulun-an niini.

Mga butang nga angayang hunahunaon

  • Ang pulong sa Dios nakalahutay sa kapanahonan sa pagpanalangin sa Iyang mga anak, ug ang Iyang pulong mahangtoron. Mabasa ninyo ang Isaias 40:8; Juan 1:1; ug 1 Pedro 1:25 aron makahibalo mahitungod sa mahangtorong kinaiyahan sa Iyang pulong. Unsa ang gitudlo niini nga mga bersikulo kaninyo mahitungod sa ebanghelyo ni Jesukristo? Sa unsa nga paagi kini nagdasig ninyo aron madugangan ang inyong pasalig sa pagtuon sa Biblia?

  • Gibati ni Joseph Smith nga ang paghimo og dinasig nga mga rebisyon sa Biblia kabahin sa balaang tawag isip usa ka propeta. Samtang nakompleto niya ang kadaghanan sa iyang hubad sa Biblia pagka 1833, giusab niya ang iyang trabaho alang sa pagmantala hangtod sa iyang kamatayon niadtong 1844. Ikonsiderar ang pagbasa sa Hubad ni Joseph Smith alang sa Mateo 4:1–11; Mateo 18:11; ug Marcos 16:3–6. Sa unsa nga paagi nga kini nga mga rebisyon nakapausab sa inyong pagsabot sa matag tudling? Nganong importante kaninyo nga kini nga mga kamatuoran napahiuli?

Kalihokan alang sa pagkat-on uban sa laing mga tawo

  • Tungod sa Biblia, “minilyon ka tawo ang nakaangkon og hugot nga pagtuo sa Dios ug ni Jesukristo.” Unsa ang nakapadani sa daghan kaayong tawo sa Biblia? Sa pakigpulong ni Presidente M. Russell Ballard “Ang Milagro sa Balaang Biblia,” makat-onan ninyo ang mahitungod sa mga sakripisyo niadtong mibuhis sa ilang mga kinabuhi aron maangkon nato kining sagrado nga basahon sa kasulatan. O mahimo ninyong pilion ang pagtan-aw sa bidyo mahitungod sa Biblia nga gihatag sa mosunod nga mga pinulongan:

Human sa bidyo, mahimo kamong mopakigbahin sa inyong mga pagbati mahitungod niadtong mitabang sa paghimo sa Biblia nga atong magamit karon. Sa unsa nga paagi nga ang ilang mga istorya makaapekto sa paagi sa inyong paghunahuna ug pagtuon sa Biblia?

Pagkat-on pa og dugang

  • 2 Timoteo 3:15–17; Alma 37:6–10

  • Tan-awa sa Robert D. Hales, “Mga Pagpangandam alang sa Pagpahiuli ug sa Ikaduhang Pag-anhi: ‘Ang Akong Kamot Anaa Ibabaw Kanimo,’” Liahona, Nob. 2005, 89-90

  • Ang Giya ngadto sa mga Kasulatan, “Ang Hubad ni Joseph Smith (HJS),” Librarya sa Ebanghelyo

  • Mga Hilisgotan sa Kasaysayan sa Simbahan, “Ang Hubad ni Joseph Smith sa Bibliya,” Librarya sa Ebanghelyo

Mubo nga mga Sulat

  1. Mga Pagtulun-an sa mga Presidente sa Simbahan: Joseph Smith (2011), 77.

  2. M. Russell Ballard, “Ang Milagro sa Balaang Biblia,” Liahona, Mayo 2007, 80.

  3. Tan-awa sa Ang Giya ngadto sa mga Kasulatan, “Hubad ni Joseph Smith (HJS),” Librarya sa Ebanghelyo.

  4. M. Russell Ballard, “Ang Milagro sa Balaang Biblia,” 81.