Ang Basahon ni Mormon: Tukurang Bato sa Atong Relihiyon

“Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong relihiyon.”

Gikan sa Kinabuhi ni Joseph Smith

Kapin na sa tulo ka tuig ang milabay sukad sa kabuntagon niadtong 1820 sa dihang si Joseph Smith nag-ampo aron makahibalo hain nga simbahan ang iyang apilan. Ang batan-ong Propeta karon nag-edad na og 17 anyos, ug siya nagtinguha sa iyang pagkabutang sa atubangan sa Dios ug sa pagdawat og kapasayloan. Sa gabii sa Septyembre 21, 1823, si Joseph natulog didto sa iyang lawting nga kwarto sa kahoy nga balay sa iyang pamilya didto sa Palmyra, New York, apan siya nagmata pa samtang ang uban sa kwarto nakatulog na, matinguhaong nag-ampo nga masayud mahitungod sa mga katuyoan sa Dios alang kaniya. “Akong gidala ang akong kaugalingon ngadto sa pag-ampo ug pangamuyo ngadto sa Makagagahum nga Dios,” siya miingon, “alang sa kapasayloan sa akong tanan nga mga sala ug kahilayan, ug usab aron ipadayag ngari kanako, aron ako mahibalo sa akong kahimtang ug pagkabutang sa iyang atubangan; kay ako adunay hingpit nga pagsalig nga makabaton og balaan nga pagpadayag, ingon sa ako nang nabuhat” (Joseph Smith—Kasaysayan 1:29).

Agig tubag sa iyang pag-ampo, nakakita si Joseph og kahayag nga nagpakita sa iyang kwarto nga nagkahayag ug nagkahayag hangtud ang kwarto “mas hayag pa sa udtong tutok.” Usa ka langitnong mensahero ang nagpakita sa kilid sa iyang higdaanan, nagbarug sa hangin, nag-sul-ob og kupo nga “hilabihan ka puti.” (Joseph Smith—Kasaysayan 1:30–31.) Kini nga mensahero mao si Moroni, ang katapusang Nephite nga propeta, mga gatusan ka tuig na ang milabay milubong sa mga palid diin gisulat ang Basahon ni Mormon ug kinsa karon naghupot sa mga yawe kalabut niining sagrado nga rekord (tan-awa sa D&P 27:5). Siya gipadala sa pagsulti ni Joseph nga ang iyang mga sala gipasaylo na sa Dios ug adunay mahinungdanon nga buluhaton nga iyang pagabuhaton. Isip kabahin niini nga buhat, si Joseph kinahanglan nga moadto sa duol nga bungtod, diin ang sagrado nga rekord, gisulat diha sa bulawan nga mga palid, nga gilubong. Kini nga rekord gisulat sa mga propeta kinsa nagpuyo sa karaan diha sa kayutaan sa Amerika. Pinaagi sa gasa ug gahum sa Dios, si Joseph mohubad sa rekord ug gimantala sa kalibutan.

Pagkasunod adlaw, si Joseph miadto sa bungtod diin gilubong ang mga palid sa Basahon ni Mormon. Didto iyang gikatagbo si Moroni ug nakakita sa mga palid, pero giingnan nga dili pa niya madawat kini sulod sa upat ka mga tuig. Siya kinahanglang magsugod og importanting panahon sa pagpangandam nga maoy makapaandam niya sa sagrado nga buluhaton sa paghubad sa Basahon ni Mormon. Si Joseph mibalik ngadto sa bungtod sa matag Septyembre 22 sulod sa misunod nga upat ka tuig aron modawat og dugang mga instruksyon gikan ni Moroni. (Tan-awa sa Joseph Smith—Kasaysayan 1: 33–54.) Niining mga tuiga, nakadawat usab siya og “daghang pagbisita gikan sa mga anghel sa Dios nga nagpakita sa kaharianon ug himaya sa mga hitabo nga moabut sa ulahing mga adlaw.”²

Kini nga panahon sa pagpangandam nakahatag usab sa mga panalangin sa kaminyoon sa kinabuhi sa Propeta. Niadtong Enero 1827, nakigminyo siya ni Emma Hale, nga iyang nahimamat samtang siya nagtrabaho sa Harmony, Pennsylvania. Si Emma nahimong dako nga tabang ngadto sa propeta sa iyang tibuok nga pangalagad. Niadtong Septyembre 22, 1827, miuban siya ngadto sa bungtod ug mihulat sa duol samtang si Moroni mitugyan sa mga palid ngadto sa mga kamot sa Propeta.

Sa diha na niya ang sagrado nga rekord, sa wala madugay nadiskobrehan ni Joseph ngano nga si Moroni mipasidaan kaniya sa pagpanalipod sa mga palid (tan-awa sa Joseph Smith—Kasaysayan 1:59–60). Ang lokal nga mga manggugubot [mob] nagsugod sa paghasi sa Propeta, nagsige og paningkamot sa pagkawat sa mga palid. Sa usa ka mabugnaw nga adlaw niadtong Disyembre 1827, naglaum nga makakita og lugar sa kalinaw, si Joseph ug si Emma mibiya sa panimalay sa Smith aron modangup sa mga ginikanan ni Emma sa Harmony. Didto ang Propeta nagsugod sa buhat sa paghubad. Pagkasunod Pebrero, si Martin Harris, usa sa mga higala sa mga Smith gikan sa Palmyra, nadasig sa pag-adto sa Palmyra aron sa pagtabang sa Propeta. Uban ni Martin Harris nga iyang tigsulat, si Joseph mipadayon sa paghubad sa sagrado nga rekord.

Ang mga resulta sa trabaho sa Propeta sa wala madugay gimantala nga ang Basahon ni Mormon. Kining talagsaon nga libro, naglakip sa kahingpitan sa ebanghelyo, nagbarug nga usa ka pagpamatuod sa katinuod sa Ang Simbahan ni Jesukristo sa mga Santos sa Ulahing mga Adlaw ug sa mapanagnaon nga misyon ni Joseph Smith.

Mga Pagtulun-an ni Joseph Smith

Ang Basahon ni Mormon nahubad pinaagi sa gasa ug gahum sa Dios.

Agig tubag sa pangutana, “Giunsa ug diin nimo makuha ang Basahon ni Mormon?” Si Joseph Smith mitubag: “Si Moroni, kinsa milubong sa mga palid sa usa ka bungtod sa Manchester, lalawigan sa Ontario, New York, nga patay na ug nabanhaw gikan sa mga patay, nagpakita kanako, ug misulti kanako hain kini, ug mihatag kanako og mga direksyon unsaon sa pagkuha niini. Nakuha nako kini, ug ang Urim ug Thummin uban niini, nga pinaagi niini akong nahubad ang mga palid; sa ingon miabut ang Basahon ni Mormon.”³

“Ako [gisultihan ni Moroni] diin gilubong ang mga palid diin gikulit ang minubo nga mga rekord sa karaang mga Propeta nga nabuhi niini nga yuta…. Kini nga mga rekord gikulit sa mga palid nga adunay hitsura nga bulawan; ang matag palid unom ka pulgada ang gilapdon ug walo ka pulgada ang gitas-on, ug dili kaayo baga sama sa kasagaran nga lata. Napuno kini sa mga kinulit, sa Ehiptohanon nga mga karakter, ug gitingub nga usa ka libro sama sa mga pahina sa usa ka basahon, nga adunay tulo ka mga argolya [ring] nga gisulod sa mga lungag. Ang libro hapit moabut og 6 ka pulgada ang gibag-on, nga ang bahin niini gisilyohan. Ang mga karakter sa wala silyohi nga bahin gagmay, ug nindot pagkakulit. Ang tibuok basahon nagpakita og daghan kaayong mga marka sa pagkaantik nga pagkabuhat niini, ug hilabihan nga pagkahanas sa arte sa pagkulit. Uban sa mga rekord ang katingalahan nga instrumento, nga gitawag sa karaan og ‘Urim ug Thummim,’ nga naglangkub sa duha ka sihag nga mga bato nga gipahimutang sa ngilit sa usa ka bayanan nga gipatapot sa panagang sa dughan. Pinaagi sa medyum sa Urim ug Thummim akong gihubad ang rekord pinaagi sa gasa ug gahum sa Dios.”⁴

“Pinaagi sa gahum sa Dios akong gihubad ang Basahon ni Mormon gikan sa sinulat sa karaang Ehipto [hieroglyphics], ang kahibalo nga nawala sa kalibutan, diin ang talagsaong hitabo nagbarug akong nag-inusara, usa ka batan-on nga walay kinaadman, sa pagpakig-away sa kaalam sa kalibutan ug gidugang sa pagkaignorante sa ikanapulog walo nga siglo, uban sa bag-ong pagpadayag.”⁵

“Gusto nakong hisgutan dinhi nga ang ulohang pahina sa Basahon ni Mormon usa ka literal nga paghubad, nga gikuha gikan mismo sa katapusang palid, sa wala nga bahin sa koleksyon o libro sa mga palid, nga naglangkub sa rekord nga gihubad, ang pinulongan sa kinatibuk-ang gisulat sama sa sinulat nga Hebreohanon [mao kana, gikan sa tuo ngadto sa wala]; ug kanang sama nga ulohang pahina dili usa ka moderno nga komposisyon, kanako o sa laing tawo kinsa nagpakabuhi o buhi pa niini nga henerasyon…. Akong gihatag sa ubos kana nga bahin sa ulohang pahina sa Iningles nga bersyon sa Basahon ni Mormon, nga mao ang tinuod ug literal nga hubad sa ulohang pahina sa orihinal nga Basahon ni Mormon sumala sa narekord sa mga palid.

Ang Basahon ni Mormon

“‘Usa ka asoy nga sinulat pinaagi sa kamot ni Mormon, diha sa mga Palid, kinuha gikan sa mga palid ni Nephi.

“‘Busa, kini mao ang usa ka minubo nga asoy sa talaan sa mga katawhan ni Nephi, ug ingon man sa mga Lamanite—Gisulat ngadto sa mga Lamanite, kinsa mao ang mga salin sa balay ni Israel; ug ingon man usab ngadto sa Judeo ug Hentil—Sinulat pinaagi sa sugo, ug usab sa espiritu sa pagpanagna ug sa pagpadayag—Gisulat ug gisilyohan, ug gitipigan ngadto sa Ginoo, aron unta sila dili malaglag—Motunga pinaagi sa gasa ug sa gahum sa Dios ngadto sa paghubad niini—Sinilyohan sa kamot ni Moroni, ug gitipigan ngadto sa Ginoo, motunga sa tukma nga higayon pinaagi sa Hentil—Ang kahubaran niini pinaagi sa gasa sa Dios.

“‘Usa usab ka minubo nga asoy nga kinuha gikan sa Basahon ni Ether, nga mao ang usa ka talaan sa mga katawhan ni Jared, kinsa nagkatibulaag sa diha nga gilibug sa Ginoo ang pinulongan sa mga katawhan, samtang sila mitukod sa tore aron pagkab-ut sa langit—diin mao ang pagpakita ngadto sa salin sa balay ni Israel unsa ang mahinungdanon nga mga butang nga ang Ginoo mihimo alang sa ilang mga amahan; ug nga sila unta mahibalo sa mga pakigsaad sa Ginoo, ug aron sila dili ipahimulag sa kahangturan—Ug ingon usab sa pagpamatuod ngadto sa Judeo ug sa Hentil nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud—Ug karon, kon adunay mga kasaypanan kini mao ang mga sayop sa mga tawo; busa, ayaw ipanghimaraut ang mga butang sa Dios, nga kamo unta makaplagan nga walay lama sa hukmanan ni Kristo.’”⁶

Ang kaalam sa Ginoo mas labaw pa kay sa kaigmat sa yawa.

Pagka-Hunyo 14, 1828, ang buhat ni Joseph Smith sa paghubad sa mga palid sa Basahon ni Mormon miresulta sa 116 ka pahina sa manuskrito. Dayon ang usa ka insidente nahitabo nga nagtudlo sa Propeta og mahinungdanong leksyon mahitungod sa naggiya nga kamot sa Dios sa pagpagawas niining sagrado nga rekord. Ang Propeta misulat: “Pagkadugay-dugay sa pagsulat ni Mr. Harris alang kanako, nagsugod siya sa paghangyo kanako sa pagtugot kaniya nga dad-on ang mga sinulat sa ila ug ipakita kanila; ug nagtinguha nga ako mangutana sa Ginoo, pinaagi sa Urim ug Thummim, kon mahimo ba niyang buhaton. Nangutana ako, ug ang tubag mao nga dili mahimo. Bisan pa niana, wala siya matagbaw niini nga tubag, ug nagtinguha nga mangutana ako pag-usab. Gibuhat nako, ug ang tubag mao lang gihapon. Sa gihapon wala siya makontento, pero miinsister nga ako mangutana sa makausa pa.

“Human sa pagsige og hangyo nangutana na usab ako sa Ginoo, ug ang pagtugot gihatag kaniya nga madala ang mga sinulat sa piho nga mga kondisyon; nga mao, nga ipakita lamang niya ngadto sa iyang igsoong lalaki, ang gitagan-an nga si Harris, sa iyang kaugalingong asawa, iyang amahan, ug sa iyang inahan, ug sa usa ka Mrs. Cobb, igsoon sa iyang asawa. Sumala niining katapusang tubag, gihangyo nako siya nga kinahanglan nga siya makigsaad ngari kanako sa labing maligdong nga paagi nga dili siya mobuhat og lain gawas sa gihatag niya nga direksyon. Gibuhat niya. Nakigsaad siya sumala sa akong gihangyo kaniya, midala sa mga sinulat, ug milakaw. Hinoon, bisan pa niana, ang hilabihan nga pagdili nga gihatag ngadto kaniya, ug ang kaligdong sa pakigsaad nga iyang gihimo ngari kanako, iya gayud nga gipakita ngadto sa uban, ug pinaagi sa paglimbong nawala kini gikan kaniya, ug wala gayud kini makit-i pa hangtud niining adlawa.”⁷

Sa pasiuna sa unang edisyon sa Basahon ni Mormon, ang Propeta mipahayag nga ang mga katuyoan sa Dios dili mapakyas pinaagi sa pagkawala sa 116 ka mga pahina: Tungod kay daghang mga bakak nga mga report ang mikaylap mahitungod sa [Basahon ni Mormon], ug usab sa daghang dili subay sa balaod nga mga pamaagi nga gihimo sa dautang maliputon nga mga tawo sa paglaglag kanako, ug usa ka buhat, mopahibalo ako kaninyo nga akong gihubad, pinaagi sa gasa ug gahum sa Dios, ug gipaningkamutan nga masulat, ang usa ka gatus ug napulog unom ka mga pahina, nga akong gikuha gikan sa Basahon ni Lehi, nga mao ang asoy nga gimubo gikan sa mga palid ni Lehi, pinaagi sa kamot ni Mormon; nga ang mao nga asoy, gikawat sa tawo o sa mga tawo ug gitago gikan kanako, bisan pa sa akong pagpaningkamot pag-ayo sa pagkuha niini pag-usab—ug nga gimandoan sa Ginoo nga kinahanglan nga dili nako hubaron pag-usab, kay si Satanas mibutang sa ilang mga kasingkasing sa pagtintal sa Ginoo nga ilang Dios, pinaagi sa pag-usab sa mga pulong, nga lahi ang ilang nabasa gikan niadtong akong gihubad ug sa akong gisulat; ug kon akong ipagawas ang sama nga mga pulong pag-usab, o, sa laing mga pulong, kon akong hubaron ang samang asoy pag-usab, ilang imantala kadtong ilang gikawat, ug si Satanas mokutaw sa mga kasingkasing niini nga henerasyon, aron sila makadawat niini nga buhat: pero tan-awa, ang Ginoo miingon ngari kanako, dili ako motugot nga si Satanas makatuman sa iyang dautang plano niining butanga: busa ikaw dili mohubad gikan sa mga palid ni Nephi, hangtud moabut ikaw nianang imong gihubad, nga imong gihuptan; ug tan-awa ikaw magmantala niini nga usa ka talaan ni Nephi; ug sa ingon ako molibug niadto kinsa nag-usab sa akong mga pulong. Ako dili motugot nga sila molaglag sa akong buhat; oo, Ako mopakita ngadto kanila nga ang akong kaalam labaw pa ka gamhanan kay sa kaigmat sa Yawa. [Tan-awa sa D&P 10:38–43.]

“Busa, pagmasulundon ngadto sa mga sugo sa Dios, ako pinaagi sa iyang grasya ug kalooy, nakatuman nianang iyang gimando kanako mahitungod niining mga butanga.”⁸

Ang Basahon ni Mormon mao ang pulong sa Dios.

“Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi pa nga maduol sa Dios pinaagi sa pagsunod sa iyang mga lagda, kay sa bisan hain nga basahon.”⁹

(Mga Artikulo sa Hugot nga Pagtuo 1:8:) “Kami nagtuo sa Biblia nga pulong Dios kon kini tukma nga pagkahubad; kami nagtuo usab sa Basahon ni Mormon nga pulong sa Dios.¹⁰

“[Ang Basahon ni Mormon] nagsulti kanato nga ang atong Manluluwas nagpakita niini nga yuta human sa Iyang pagkabanhaw; nga Siya misangyaw sa Ebanghelyo dinhi sa iyang kahingpitan, ug kabuhong, nga ang adlaw sa mga Apostoles, mga Propeta, mga Pastor, mga Magtutudlo, ug mga Ebanghelista, sa samang pagkahan-ay, sa samang priesthood, sa samang mga ordinansa, mga gasa, mga gahum, ug mga panalangin, nga natagamtaman sa silangang yuta, nga ang mga katawhan gipahimulag agig sangputanan sa ilang mga kalapasan; nga ang katapusan sa ilang mga propeta nga diha uban kanila nga gimandoan sa pagsulat og minubo sa ilang mga panagna, kasaysayan, uban pa, ug sa pagtago niini sa yuta, ug nga kini mogawas ug mahiiusa sa Biblia alang sa katumanan sa mga katuyoan sa Dios sa katapusang mga adlaw.”¹¹

Diha si David Osborn sa pagsangyaw ni Joseph Smith didto sa Far West, Missouri, niadtong 1837. Nahinumdom siya niini nga mga pulong sa Propeta: “Ang Basahon ni Mormon tinuod, sama sa unsay giangkon niini, ug niini nga pagpamatuod ako magpaabut nga mohatag og asoy sa adlaw sa paghukom.”¹²

Ang mga kasulatan makapalipay ug makapahupay kanato ug mohimo kanato nga maalamon ngadto sa kaluwasan.

“Kalabut sa pagtukod sa Gingharian, mao ang pag-imprinta ug pag-apud-apod sa Basahon ni Mormon, Doktrina ug mga Pakigsaad, … ug ang bag-ong hubad sa [Biblia]. Wala kinahanglana nga mosulti pa og bisan unsa mahitungod niini nga buhat, kadtong nakabasa niini, ug nakainom sa bul-og sa kahibalo nga gipahayag niini, nakahibalo unsaon sa pagpasalamat niini; ug bisan ang mga buang motamay niini, apan kini gituyo aron sa paghimo sa mga tawo nga maalamon ngadto sa kaluwasan, ug mowagtang sa kalibug sa tomutuo nga diha na sa dugay nang panahon, sa pagpahibalo sa mga kahimoan ni Jehova nga natuman na, ug naghulagway sa umaabut sa tanan niining makalilisang ug mahimayaong kamatuoran. Kadtong kinsa nakatilaw sa kaayohan tungod sa pagtuon niadto nga mga buhat, sa walay duhaduha maningkamot sa usag usa sa ilang kasibot sa pagpadala niini sa laing mga nasud sa tibuok kalibutan, nga ang matag anak ni Adan makatagamtam sa samang mga kahigayunan, ug magmaya sa samang mga kamatuoran.”¹³

“[Ang mga kasulatan sa ulahing mga adlaw gimantala] aron nga ang matinuoron sa kasingkasing magmalipayon ug mahupay ug maglakaw nga magmaya, samtang ang ilang mga kalag makasinati ug ang ilang panabut mahayagan sa kahibalo sa buhat sa Dios pinaagi sa mga amahan sa unang mga adlaw, ingon man usab sa unsay iyang buhaton sa ulahing mga adlaw aron sa pagtuman sa mga pulong sa mga amahan.”¹⁴

“Atong gidala ang sagrado nga mga sinulat sa atong mga kamot, ug modawat nga kini gitugyan sa direkta nga inspirasyon alang sa kaayohan sa tawo. Kita nagtuo nga ang Dios mikunsad aron mamulong gikan sa kalangitan ug mopahayag sa Iyang kabubut-on mahitungod sa tawhanong pamilya, aron sa paghatag kanila sa makiangayon ug balaan nga mga balaod, sa pagpahimutang sa ilang pamatasan, ug sa paggiya kanila sa direkta nga paagi, nga sa tukma nga panahon Siya moangkon kanila sa Iyang kaugalingon, ug mohimo kanila nga isig ka manununod sa Iyang Anak.

“Apan kon kini nga kamatuoran dawaton, nga ang kabubut-on gayud sa langit anaa sa mga Kasulatan, wala ba kita kinahanglana isip kahibalong mohunahuna nga mga nilalang sa pagsunod sumala sa tanan niini nga mga lagda? Ang pagdawat ba lamang nga kini mao ang kabubut-on sa langit makahatag kanato og kaayohan bisan kon dili kita mosunod sa tanan nga mga pagtulunan niini? Wala ba kita makigbatok sa Labing Maalamon sa langit, kon kita modawat sa kamatuoran sa mga pagtulun-an niini, ug dili mosunod niini? Wala ba kita mopakanaog ubos sa atong kaugalingong kahibalo, ug sa mas maayong kaalam nga gituga sa langit kanato, pinaagi sa mao nga matang sa pamatasan? Tungod niini nga mga katarungan, kon kita adunay direkta nga mga pagpadayag nga gihatag kanato gikan sa langit, sa pagkatinuod kadto nga mga pagpadayag wala gihatag aron yagayagaan, nga dili makalikay ang tigyagayaga og kahasol ug panimalos….

“… Siya nga makaila sa gahum sa Makagagahum, nga gisulat sa kalangitan, makakita usab sa kaugalingong sinulat sa Dios sa sagrado nga libro: ug siya kinsa mibasa niini kanunay mas makagusto niini pag-ayo, ug siya nga nakasinati niini, makaila sa kamot bisan asa siya makakita niini, ug kon madiskobrehan na, dili lamang makadawat og pasalamat, apan ang pagkamasulundon sa tanan niining langitnong mga lagda.”¹⁵

“O kamo nga Napulog Duha! ug ang tanang mga Santos! nakaangkon niining mahinungdanong Kaayohan—nga sa inyong tanang mga pagsulay, mga kasamok, mga tintasyon, mga kasakit, mga pagkaulipon, pagkabilanggo ug kamatayon, siguroha, nga dili kamo magluib sa langit; nga kamo dili moluib ni Jesukristo; nga kamo dili moluib sa mga kaigsoonan; nga kamo dili moluib sa mga pagpadayag sa Dios, nga anaa sa Biblia, Basahon ni Mormon, o sa Doktrina ug mga Pakigsaad, o sa bisan unsa nga gihatag na o ihatag pa ug gipadayag ngadto sa tawo niini nga kalibutan o nga kana nga moabut.”¹⁶

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang mga kasinatian ni Joseph Smith nga nasinati niadtong mga Septyembre 21, 1823, ug Septyembre 22, 1827 (mga pahina 67–70). Unsa sa inyong pagtuo nga kini nga mga kasinatian nakapaandam kaniya sa paghubad sa bulawan nga mga palid? Sa unsa nga mga paagi nga kamo naandam alang sa mga katungdanan gikan sa Ginoo?
Ribyuha ang katapusang tibuok nga paragrap sa pahina 72, mangita sa mga katuyoan sa Basahon ni Mormon. Sa unsa nga mga paagi sa inyong pagkakita niini nga mga katuyoan natuman sa inyong kinabuhi ug sa mga kinabuhi sa uban?
Samtang kamo mamalandong sa asoy sa Propeta sa pagkawala sa 116 ka mga pahina ug dayon gimandoan sa dili paghubad sa mga pahina 73–74, unsa ang inyong nakat-unan mahitungod sa Dios? Sa unsa kaha nga paagi nga ang pagsabut niini nga asoy makaimpluwensya sa mga desisyon nga atong himoon?
Basaha ang unang paragrap sa pahina 75. Hibaloi nga ang arko hinimo gikan sa mga bato, ang tukurang bato nga gibutang sa ibabaw, naggunit sa laing tanang mga bato sa lugar. Sa unsa nga paagi nga ang Basahon ni Mormon mao “ang tukurang bato sa atong relihiyon”? Sa unsa nga paagi nga ang Basahon ni Mormon nakatabang kaninyo “nga mahiduol sa Dios”?
Si Joseph Smith naghisgot sa mga panalangin nga moabut kon kita “makainom sa bul-og sa kahibalo” diha sa mga kasulatan ug “nakatilaw sa kaayohan” sa pulong sa Dios (mga pahina 75–77). Unsa ang gisugyot niini nga mga panultihon nganha kaninyo mahitungod sa pagtuon sa kasulatan? Unsa ang atong mabuhat aron sa paghimo sa atong pagtuon sa kasulatan nga mas labaw nga makahuluganon?
Basaha ang paragrap nga nagsugod sa ubos sa pahina 75. Ngano sa inyong hunahuna nga kadtong nagtuon sa mga kasulatan makapalambo og kadasig sa pagpakigbahin niini ngadto sa uban? Unsay atong mahimo sa pagpakigbahin sa Basahon ni Mormon? Unsa nga mga kasinatian nga inyong nasinati sa dihang inyong gipakigbahin ang Basahon ni Mormon o sa diha nga adunay tawo nga mipakigbahin niini kaninyo?
Basaha ang katapusang paragrap sa pahina 76. Unsa ang pipila ka mga tudling gikan sa Basahon ni Mormon nga “nakapalipay ug nakahupay” kaninyo? Sa unsa nga mga paagi nga ang Basahon ni Mormon nakalamdag sa inyong panabut?

May Kalabutan nga mga Kasulatan:Ezequiel 37:15–17; pasiuna sa basahon ni Mormon; 1 Nephi 13:31–42; 2 Nephi 27:6–26; D&P 20:6–15; Joseph Smith—Kasaysayan 1:29–54