Pag-angkon og Kahibalo sa Mahangturon nga mga Kamatuoran

“Ang usa ka tawo dili ingon kadali maluwas gawas kon siya may kahibalo.”

Gikan sa Kinabuhi ni Joseph Smith

Si Propeta Joseph Smith “mahigugmaon sa pagkat-on,” misulat si George Q. Cannon. “Siya nahigugma sa kahibalo aron makaangkon og gahum pinaagi sa matarung nga paggamit niini. Taliwala sa mga kalisdanan nga iyang nahiaguman sukad niadtong adlawa nga una niyang gibutyag ngadto sa madudahong kalibutan ang iyang pakigsandurot sa mga langit, siya sukad sa sinugdan nagtinguha sa pagbaton og taas nga kahibalo. Ang Ginoo nagsugo kaniya sa pagtuon, ug siya mituman…. Ang iyang hunahuna, gilamdagan sa Balaang Espiritu, mahinangpon nga midawat sa tanang mga prinsipyo sa kamatuoran, ug sa usag-usa nga mahanas sa daghan nga natad sa kahibalo ug nahimo nga magtutudlo niini nga natad.”¹

Niadtong 1833, ang Propeta ug usa ka pundok sa mga Santos sa Kirtland adunay talagsaon nga kahigayunan sa pagtuon sa ebanghelyo. Sa Enero niadtong tuiga aron pagsunod sa sugo sa Ginoo (tan-awa sa D&P 88:127–41), ang Propeta nag-organisar og School of the Prophets aron pagbansay sa mga naghupot sa priesthood alang sa ilang buluhaton sa pagpangalagad ug aron pag-andam kanila sa pagsangyaw sa ebanghelyo. Ang eskwelahan didto mahimutang sa kwarto sa ikaduhang andana sa tindahan ni Newel K. Whitney, diin magpuyo ang Propeta. Duol sa 25 ka kaigsoonan ang mitambong, ang uban mibiyahe og gatosan ka mga kilometro alang sa kahigayunan sa pagtuon sa ebanghelyo sulod sa kwarto nga dili mosubra sa gidak-on nga 11 por 14 ka pye. Kadaghanan niining mga tawhana sa ngadto-ngadto nangahimong mga Apostoles, mga Seventy, ug ang uban mga pangulo sa Simbahan. Bisan ang Propeta ug ang ubang kaigsoonan usahay magtuon og pinulungan, giuna nila pagpunting nga makakat-on sa mga doktrina sa ebanghelyo, makugihong nagpadayon sa ilang mga pagtuon gikan sa sayo sa buntag hangtud sa hapon na kaayo. Kini nga pag-eskwela milungtad og upat ka mga bulan, ug pareho nga mga eskwelahan sa wala madugay gihimo sa Kirtland ug mao usab sa Missouri, diin gatosan ka mga tawo ang mitambong.

Didto sa panagtigum sa eskwelahan nga gihimo niadtong Pebrero 27, 1833, ang Propeta nakadawat og importanting padayag. Sa unang mga adlaw sa Simbahan, ang paggamit og alkohol, tabako, kape, ug tsa komon kaayo sa katilingban ug sa mga miyembro sa Simbahan. Hangtud ang Propeta nakamatikod sa mga kaigsoonan nga nanabako didto sa eskwelahan, siya giabut og kabalaka. Si Brigham Young nahinumdum: “Dihang sila nagkapundok niining kwartoha inigkahuman og pamahaw, ang una nilang buhaton mao ang pagdagkot sa ilang mga pipa, ug, samtang manabako, maghisgot kabahin sa mga talagsaong mga butang sa gingharian…. Daghang higayon nga ang Propeta mosulod sa kwarto nga mohatag og pagpanudlo sa klase iyang nakita ang iyang kaugalingon nga naputos sa bagang aso sa tabako. Kini, ug ang reklamo sa iyang asawa nga makapanlimpyo sa luod nga salog [gikan sa inusap nga tabako], nakahimo sa Propeta sa paghunahuna niining hitaboa, ug siya nangutana sa Ginoo kabahin sa batasan sa mga elder nga mao ang pagpanabako, ug ang padayag nga gitawag isip Pulong sa Kaalam mao ang tubag sa iyang pangutana.”²

Minilyon ka mga tawo ang mituman sa tambag niini nga padayag ug nakadawat og temporal ug espiritwal nga mga panalangin, lakip ang “kaalam ug dako nga mga bahandi sa kahibalo” nga gisaad ngadto kanila nga nagpuyo sa pagsunod sa mga kasugoan sa Dios (D&P 89:19).

Mga bahandi sa espiritwal nga kahibalo gibu-bu ngadto sa mga kaigsoonan nga nanambong sa School of the Prophets, ug sila nakahimo og talagsaong pagtubo sa ilang pagsabut sa ebanghelyo. Sa panagtigum sa eskuwela nga gihimo niadtong Marso 18, 1833, si Sidney Rigdon ug Frederick G. Williams gipang set apart isip mga counselor sa Propeta sa First Presidency. Human niadto, ang Propeta “nag-awhag sa mga kaigsoonan sa pagkamasinugtanon ug pagkamakugihon sa pagtuman sa mga kasugoan sa Dios, ug mihatag og daghang pagpanudlo alang sa kaayohan sa mga Santos, uban ang saad nga kadtong putli og kasingkasing makakita gayud sa langitnon nga panan-awon; ug human nagpabilin sa mubo nga panahon og walay timik nga pag-ampo, ang saad napamatud-an; sa kadaghan sa nanambong nga ang mga mata sa ilang panabut nabuksan pinaagi sa Espiritu sa Dios, ngadto sa pagkakita og daghang mga butang…. Daghan sa mga kaigsoonan nakakita og langitnong panan-awon sa Manluluwas, ug dili maihap nga hut-ong sa mga anghel, ug daghan pa nga ubang mga butang.”³

Ang Propeta mipasabut, “Dako nga kalipay ug katagbawan padayong anaa sa mga panagway sa School of the Prophets, ug sa mga Santos, kabahin sa mga butang nga gipadayag, ug sa among pag-uswag sa kahibalo sa Dios.”⁴

Mga Pagtulun-an ni Joseph Smith

Ang ebanghelyo ni Jesukristo naglangkob sa tanan nga kamatuoran; ang masinugtanon modawat sa tanang kamatuoran nga gipadayag sa Dios ug mosalikway sa mga sayop nga tradisyon.

“Ang Mormonism mao ang tinuod; ug ang matag tawo nga mohangop niini mobati sa iyang kaugalingon nga may kagawasan sa pagdawat sa matag kamatuoran; busa ang gapos sa pagkamatuo-tuohon, kamubo sa panghunahuna, ka ignorante ug pagpanapi sa pagkapari, matangtang gilayon sa iyang liog; ug ang iyang mga mata mabuka aron makakita sa kamatuoran, ug ang kamatuoran magmadaugon kaayo batok sa pagpanapi sa kaparian….

“… Ang Mormonism mao ang tinuod, sa ato pa ang doktrina sa Ulahing mga Santos, maoy tinuod…. Ang una ug orihinal nga prinsipyo sa atong balaan nga relihiyon, mao nga nagtuo kita nga kita adunay katungod sa pagdawat sa tanan, ug ang matag tipik sa kamatuoran, nga walay kinutuban o walay pagpugong o pagdili sa mga tinuhoan o mga patuo-tuo nga gituhoan sa katawhan, o pinaagi sa pagpamugos sa usag-usa, kanus-a ang kamatuoran tinaw nga gihatag nganha sa atong mga hunahuna, ug kita adunay labing taas nga matang sa ebidensya sa kamatuoran.”⁵

Niadtong Enero 1843, si Joseph Smith nakigsulti sa pipila ka mga tawo nga dili mga miyembro sa Simbahan: “Akong giingon nga ang labing gibantog nga kalainan sa pagbati tali sa mga Santos sa Ulahing mga Adlaw ug sa laing pundok sa relihiyon mao, nga ang naulahi pinugngan sa pipila ka lahi nga tinuohan, nga naghikaw sa ilang mga miyembro sa kahigayunan sa pagtuo bisag unsa gawas sa nahibaloan na, samtang ang mga Santos sa Ulahing mga Adlaw … andam nga motuo sa tanang prinsipyo nga namatud-an, nga kini gipakita karon ug unya.”⁶

“Dili ako makatuo sa bisan hain niini nga mga gituohan sa nagkalain-laing mga tinuohan, tungod kay silang tanan adunay pipila ka mga butang nga dili nako madawat, bisan tuod ang tanan kanila may pipila ka kamatuoran. Ako buot moabut ngadto sa atubangan sa Dios, ug makakat-on sa tanang mga butang apan ang mga gituohan nagbutang og mga stake [mga kinutuban], ug moingon, ‘Dinhi ka ra gayud kutob, ug anhi ra kutob’ [Job 38:11]; kini dili gayud nako madawat.”⁷

“Ako moingon ngadto sa tanan nga mopahimutang sa pagtukod og mga stakes alang sa Makagagahum, kamo mapakyas pagkab-ot sa himaya sa Dios. Aron mahimong isigkamanununod sa mga gitagana ngadto sa Anak, ang tawo kinahanglang mosalikway sa tanan niyang hiwi nga mga tradisyon.”⁸

“Ang importante nga butang nga angay natong mahibaloan mao ang pagsabut kon unsa ang gitukod sa Dios sa wala pa buhata ang kalibutan. Kinsa ang nakahibalo niini? Kini ang namat-an nga kinaiya sa katawhan pagpahimutang ug mga stake ug pagpahimutang og mga mohon [stake] sa mga buluhaton ug mga pamaagi sa Makagagahum…. Nga kadtong gitagoan sa wala pa buhata ang kalibutan gipadayag ngadto sa mga bata ug mga masuso sa ulahing mga adlaw [tan-awa sa D&P 128:18].”⁹

“Sa higayon nga ang katawhan mobuka sa ilang mga ba-ba batok [sa kamatuoran] wala sila magbuhat og dautan ngari kanako, apan nagbuhat sila og dautan ngadto sa ilang kaugalingon. Kon ang mga butang nga bililhon kaayo baliwalaon sa mga tawo nga menos og pangutok nga wala gani maghunahuna, buot ako nga makakita sa kamatuoran sa iyang tanan nga mahimo ug gakson kini sa akong dughan. Ako mituo sa tanan nga gipadayag sa Dios, ug wala pa gayud ako makabalita nga may tawo nga gisilotan tungod sa iyang sobra nga pagtuo, apan hinoon sila gisilutan tungod sa pagkawalay pagtuo.”¹⁰

“Sa higayon nga ang Dios motanyag og panalangin o kahibalo ngadto sa usa ka tawo, ug siya modumili pagdawat niini, siya pagasilutan. Ang mga Israelita nag-ampo nga ang Dios makigsulti ngadto ni Moises ug dili ngadto kanila, tungod niini siya mitunglo kanila pinaagi sa kalibutanon nga balaod.”¹¹

“Ako kanunay may gibati nga kalipay nga makakita sa kamatuoran nga magmadaugon batok sa kasaypanan, ang kangitngit malupig sa kahayag.”¹²

Ang pagbaton og kahibalo sa mahangturong mga kamatuoran gikinahanglan aron makabaton og kaluwasan.

“Ang kahibalo gikinahanglan niini nga kinabuhi ug sa pagkadiosnon. Pagkaalaot ninyong mga pari ug mga nagpakadiosnon nga nagsangyaw nga ang kahibalo wala kinahanglana sa kinabuhi ug kaluwasan. Wagtanga ang mga Apostoles, ug uban pa, wagtanga ang kahibalo, ug unya imong makaplagan ang imong kaugalingon nga angay sa silot sa impyerno. Ang kahibalo usa ka padayag. Paminaw, kamong tanan nga kaigsoonan, niining talagsaong yawe: ang kahibalo mao ang gahum sa Dios ngadto sa kaluwasan.”¹³

“Ang kahibalo makapawagtang sa kangitngit, kabalaka ug pagduda; kay kini sila dili magpabilin kon anaa ang kahibalo…. Diha sa kahibalo adunay gahum. Ang Dios adunay labaw nga gahum kay sa ubang mga binuhat kay Siya labaw og kahibalo, ug busa Siya nahibalo unsaon sa pagmando ang tanang mga binuhat ngadto Kaniya. Siya adunay gahum labaw sa tanan.”¹⁴

“Kon ugaling kita mahilayo sa Dios, kita magkaduol sa yawa ug mawala ang kahibalo, ug kon walay kahibalo kita dili mahimong maluwas, ug samtang ang atong kasingkasing mapuno sa kadautan, ug kita magtuon sa pagkadautan, walay luna sa atong kasingkasing ang pagkabuotan, o pagtuon og kabuotan. Ang Ginoo dili ba buotan? Busa pagbinuotan kamo; kon Siya matinud-anon, busa kamo pagmatinud-anon. Sa inyong hugot nga pagtuo ipuno ang maligdong nga batasan, ug sa maligdong nga batasan ipuno ang kahibalo, ug pangitaa ang tanang maayo nga butang [tan-awa sa 2 Pedro 1:5].

“… Ang usa ka tawo dili ingon kadali maluwas gawas kon siya may kahibalo, kay kon siya wala makabaton og kahibalo, siya mahimong madala ngadto sa pagkabihag sa ubang dautan nga gahum sa lain nga kalibutan, kay ang dautan nga mga espiritu makabaton og labaw nga kahibalo, ug sa ngato-ngadto may labaw nga gahum kay sa uban nga tawo nga ania sa yuta. Busa gikinhanglan ang padayag aron pagtabang kanato, ug makahatag kanato og kahibalo sa mga butang sa Dios.”¹⁵

Si Joseph Smith nagtudlo niining mosumod niadtong Abril 1843, nga sa wala madugay gi-rekord sa Doktrina ug mga Pakigsaad 130:18–19: “Bisan unsa nga baruganan sa salabutan nga kita makakab-ot niini nga kinabuhi, kini madala uban kanato sa pagkabanhaw. Ug kon ang usa ka tawo makakab-ot og daghan pa nga kahibalo ug salabutan dinhi niini nga kinabuhi pinaagi sa iyang kakugi ug pagkamasulondon kay sa uban nga tawo, siya adunay daghan nga kahigayunan didto sa kalibutan nga umaabut.”¹⁶

Si Joseph Smith nagtudlo niining mosunod niadtong Mayo 1843, sa wala madugay gi-rekord sa Doktrina ug mga Pakigsaad 131:6: “Malisud alang sa usa ka tawo nga maluwas diha sa pagkawalay alamag.”¹⁷

Kita makabaton og kahibalo sa mahangturon nga mga kamatuoran pinaagi sa makugihon nga pagtuon ug pag-ampo.

Si George A. Smith, samtang nag-alagad sa First Presidency, mi-report: “Si Joseph Smith nagtudlo nga matag lalaki ug babaye kinahanglan nga mangayo sa Ginoo og kaalam, nga sila unta makabaton og kahibalo gikan Kaniya nga maoy tinubdan sa kahibalo ug sa mga nahisaad sa ebanghelyo, nga napadayag, kay isip maoy pagtugot kanato sa pagtuo, kay pinaagi sa pagtuon niini nga klase kita makabaton sa katuyoan nga buot natong kab-uton.”¹⁸

Si Propeta Joseph Smith misulat niining mosunod ngadto sa usa ka tawo nga bag-o lang mipasakop sa Simbahan: “Hinumdumi ang pamatuod nga akong gipamatuod sa ngalan ni Ginoong Jesus, mahitungod sa dakong buluhaton nga Iyang gipadala niining ulahi nga mga adlaw. Kamo nahibalo sa akong kinaiya sa pagsulat, unsaon nga sa akong mga pagkulang ug pagkayano, ako nagpamatuod kaninyo unsa ang gipadayag sa Ginoo pinaagi sa pagpangalagad sa Iyang balaanong mga anghel ngari kanako niini nga henerasyon. Ako nag-ampo nga ang Ginoo unta motabang kaninyo nga palamboon kining mga butanga sa inyong hunahuna, kay ako nahibalo nga ang Iyang Espiritu mohatag og pamatuod ngadto sa tanan nga makugihon nga mangita og kahibalo gikan Kaniya.”¹⁹

Si Propeta Joseph Smith misulat niining mosunod ngadto sa usa ka tawo nga buot madugangan ang kahibalo mahitungod sa Simbahan: “Pagtuon sa Biblia, ug ingon ka daghan sa atong mga libro kutob sa imong mahimo, pag-ampo ngadto sa Amahan sa pangalan ni Jesukristo, pagbaton og hugot nga pagtuo sa mga gisaad nga gihimo ngadto sa mga katigulangan, ug ang imong hunahuna pagagiyahan ngadto sa kamatuoran.”²⁰

“Ang butang sa Dios adunay bug-at nga kahulugan; ug ang panahon, ug kasinatian, ug pagmabinantayon ug pagpamalandong ug matinud-anong mga hunahuna maoy bugtong paagi nga makakaplag niining tanan. Ang imong hunahuna, O tawo! kon ikaw mogiya sa usa ka kalag ngadto sa kaluwasan, kinahanglang mainat sa pagkab-ot hangtud sa kinatumyan sa mga langit ug didto pangitaon ug hinuktukan ang labing mangitngit nga dili matugkad, ug ang lapad nga wanang sa kahangturan—ikaw kinahanglan makigsandurot sa Dios. Pagkagamhanan ug pagkamadungganon sa hunahuna sa Dios, kay sa walay hinungdan nga imahinasyon sa tawhanong kasingkasing!

“… Himoa ang kamatinud-anon, ug kamabugnawon, ug walay pagminaot, ug pagkamainampoon, ug pagkaligdong og dungog, ug pagkalimpyo, ug pagkaaghop ug pagkayano nga ipurong-purong sa atong mga ulo sa matag dapit, ug sa katapusan, mahimong ingon sa usa ka bata, nga walay malisya, paglingla o pakaaron-ingnon. Ug karon, mga kaigsoonan, human sa inyong mga kalisdanan, kon buhaton ninyo kining tanan nga mga butang, ug mobuhat sa mainiton nga pag-ampo ug hugot nga pagtuo sa panan-aw sa Dios kanunay, Siya mohatag nganha kaninyo og kahibalo pinaagi sa Iyang Balaan nga Espiritu, oo, pinaagi sa dili mahulagway nga gasa sa Espiritu Santo [tan-awa sa D&P 121:26].”²¹

Kita makaangkon og kahibalo sa mahangturong mga kamatuoran sa inanay; kita makakat-on sa tanang mga butang sa labing madali kon kita makahimo sa pagkat-on.

“Dili maalam nga kita makabaton dayon sa tanang kahibalo sa higayon nga itudlo kini kanato; apan kita kinahanglan makabaton niini sa inanay; dayon kita mahimong makasabut niini.”²²

“Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtud ikaw moabut sa ibabaw, ug ingon usab niini ang mga prinsipyo sa ebanghelyo— kinahanglan nga ikaw magsugod sa sinugdanan, ug mopadayon hangtud nga ikaw makakat-on sa tanang mga prinsipyo sa kahimayaan. Apan mahimo nga madugay-dugay nga ikaw makaaninag sa luyo sa tabil sa dili pa ikaw makakat-on kanila. Dili ang tanan mahimong masabtan dinhi sa kalibutan, may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan.”²³

Si Joseph Smith ug ang iyang mga counselor sa Unang Kapangulohan mihatag nining mosunod nga mga panudlo ngadto sa mga Santos nga nanagtigum sa Nauvoo: “Ngadto niadtong kinsa … makatabang niining dako nga buluhaton, kami moingon, paanhia sila niining dapita, sa pagbuhat sa ingon sila dili lang makatabang sa padayon nga pagpalambo sa Gingharian, apan mahimutang diin sila may mga bintaha sa mga panudlo sa Kapangulohan ug sa ubang kadagkoan sa Simbahan, ug motubo og taas ug ngadto sa mas taas sa sukdanan sa salabutan hangtud nga sila makasabut uban sa tanang mga “Santos kon unsa ang gilapdon ug ang gitas-on, ug giladmon ug ang kahabugon; ug sa pag-ila sa gugma ni Kristo nga nagalabaw sa tanang kahibalo.’ [Mga Taga-Efeso 3:18–19.]”²⁴

“Ang Dios wala magpadayag bisag unsa ngadto ni Joseph, apan unsay Iyang buot nga mapahibalo ngadto sa Napulog-Duha, ug bisan sa pinakaubos nga Santos nga mahibalo sa tanang mga butang nga ingon ka dali kutob sa iyang mahimo sa pagdawat sa tanan, kay ang adlaw moabut nga dili na kinahanglan sa tawo nga motudlo ngadto sa iyang silingan, moila ka sa Ginoo; kay ang tanan makaila Kaniya … gikan sa labing timawa ngadto sa labing inila [tan-awa sa Jeremias 31:34].”²⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Basaha ang unang paragrap a pahina 318. Hunahunaa ang mahitungod sa mga kinaiya o mga ideya nga “pagpahimutang og mga utlanan sa mga buluhaton ug mga pamaagi sa Makagagahum” sa atong mga kinabuhi. Sa inyong hunahuna unsay angay nato nga buhaton aron makadawat sa tanang kamatuoran nga ihatag kanato sa Ginoo?
Ribyuha ang tibuok katapusang paragrap sa pahina 318. Kanus-a nahitabo nga ang kahibalo nakatukmod sa kangit-ngit ug pagduda palayo sa inyong kinabuhi? Nganong sa inyong pagtuo ang pagbaton og kahibalo sa kamatuoran kinahanglanon aron makadawat og kaluwasan? (Alang sa pipila ka mga ehemplo, tan-awa sa mga pahina 319–20.)
Pinaagi sa mga pagtulun-an ni Propeta Joseph, atong makita nga si Satanas buot nga kita mawad-an sa kahibalo (mga pahina 319–20 ug nga ang Ginoo buot mohatag kanato og kahibalo (mga pahina 320–22). Unsay atong makat-unan gikan niini nga kalainan?
Unsay atong mahimo sa pagpadako sa atong kahibalo sa kamatuoran? (Alang sa pipila ka mga ehemplo, tan-awa sa mga pahina 315–317.) Ribyuha ang paragrap nga nagsugod sa kinaubsan sa pahina 321. Pagpili og pipila sa mga nagkalain-laing kalidad nga nalista niini nga paragrap. Unsaon sa matag-usa niining mga nagkalain-laing kalidad sa pag-andam kanato aron makaangkon og kahibalo?
Basaha ang tibuok ikaduhang paragrap sa pahina 323. Unsay atong makat-unan gikan sa pagkumpara sa atong pagkat-on sa mga baruganan sa ebanghelyo ngadto sa pagsaka sa hagdanan? Unsay inyong gihimo aron padayong madugangan ang inyong kahibalo sa ebanghelyo?
Unsay inyong mga hunahuna o mga pagbati samtang kamo mamalandong sa katapusang paragrap niini nga hugna?

MayKalabutan nga mga Kasulatan: Mga Proverbio 1:7; 1 Timoteo 2:3–4; 2 Nephi 28:29–31; Alma 5:45–47; D&P 88:118