Si Elijah ug ang Pagpahiuli sa mga Yawe sa Pag-seal

“Sa unsang paagi nga ang Dios moabut aron pagluwas niini nga henerasyon? Siya mopadala ni Elijah ang propeta.”

Gikan sa Kinabuhi ni Joseph Smith

Niadtong tingpamulak sa 1836, human sa tulo ka tuig nga pagtrabaho ug sakripisyo, ang mga Santos sa Kirtland sa katapusan nakakita sa ilang maanindot nga templo nga nahuman na, ang unang templo niadto nga dispensasyon. Pagka Domingo, Marso 27, labaw sa 900 ka mga tawo nagpundok sa kapilya sa templo ug sa pultahan alang sa tulumanon sa pagpahinungod. Daghan ang nagpundok nga mga inawas diha sa sesyon sa sikbit nga kwarto, samtang ang uban naminaw gihapon sa gawas sa may abli nga bintana sa templo. Ang Propeta mismo mitabang sa pagpalingkod sa nanambong.

Ang kongregasyon nakadungog sa pakigpulong ni Sidney Rigdon, magtatambag sa Unang Kapangulohan, ug dayon nagdungan pagpanganta sa “Now Let Us Rejoice” ug “Adam-ondi-Ahman,” sinulat ni William W. Phelps. Dayon si Joseph Smith mibarug aron paghatag sa pag-ampo sa pagpahinungod, nga iyang nadawat pinaagi sa pagpadayag. Diha sa pag-ampo, iyang gihulagway ang daghang talagsaong mga panalangin nga gibubo niadtong kinsa misulod nga takus sa mga templo sa Dios (tan-awa sa D&P 109). Ang koro mikanta sa “The Spirit of God,” ug dayon ang kongregasyon mibarug ug mihatag sa Singgit nga Hosanna “uban sa gahum nga ingon og igong mopaisa sa atop sa bilding.”¹

“Himoa ang imong balay,” ang Propeta miingon diha sa pagpahinungod nga pag-ampo, “ingon sa usa ka naghaguros nga kusog kaayo nga hangin, uban sa imong himaya” (D&P 109:37). Kadto tinuod gayud nga natuman, kay daghang mga Santos ang mipamatuod nga langitnong mga linalang mitambong didto atol sa tulumanon sa pagpahinungod. Si Eliza R. Snow mihandum: “Ang mga seremonya nianang pagpahinungod mahimong maa-soy pag-usab, apan walay mortal nga pinulongan nga makahulagway sa langitnong mga pagpakita niadtong halandumong adlaw. Ang mga anghel mipakita sa uban, samtang usa ka matang sa balaanong mga nanambong namatngonan sa tanan nga miadto, ug ang matag kasingkasing napuno sa dili matukib nga ‘kalipay ug napuno sa himaya’ [tan-awa sa 1 Pedro 1:8].”²

Niadtong gabhiona, samtang nagpundok ang Propeta uban sa mga 400 ka naghupot sa priesthood didto sa templo, “usa ka saba ang nadungog sama sa usa ka naghaguros nga hangin, diin mipuno sa Templo, ug ang tanan sa kongregasyon nagdungan pagpamarug, natandog sa dili makita nga gahum.” Sumala sa Propeta, “daghang nagsugod sa pagsulti og pinulongan ug pagpanagna; ang uban nakakita og mahimayaong mga panan-awon; ug nakakita ako sa Templo nga napuno uban sa mga anghel, diin sa tinuod akong gipahayag sa kongregasyon.”³

Didto sa miting nga gihimo sa templo usa ka semana human niadto, pagka Dominggo, Abril 3, mga pagpakita sa dili ordinaryong mga resulta nahitabo. Human ang Propeta mitabang sa ubang mga lider sa Simbahan sa pagpangalagad sa sakrament, siya ug si Oliver Cowdery miabot sa pulpito luyo sa gipaubos nga kurtina ug nangluhod sa solemno nga pag-ampo. Sa ilang pagpamarug human nga nag-ampo, ang Manluluwas Mismo mipakita ngadto kanila ug mihatag sa Iyang pag-uyon sa templo: “Tan-awa, Akong gidawat kini nga balay, ug ang akong ngalan anaa dinhi; ug Ako magpakita sa akong kaugalingon sa akong mga tawo agi og kalooy niini nga balay” (D&P 110:7).

Human natapos kadto nga panan-awon, si Joseph ug Oliver nakakita og tulo ka managlahi nga mga panan-awon diin ang karaang mga propeta mipakita kanila aron pagpahiuli sa mga yawe sa priesthood nga gikinahanglan alang sa buhat sa Ginoo sa ulahing mga adlaw. Si propeta Moises mipakita ug mihatag kanila “sa mga yawe sa pagpundok sa Israel gikan sa upat ka bahin sa yuta.” Si Elias miabut ug mihatag kanila “sa dispensasyon sa ebanghelyo ni Abraham.” (Tan-awa sa D&P 110:11–12.)

Dayon, sa laing mahimayaong panan-awon, si Joseph ug Oliver nakakita ni propeta Elijah (tan-awa sa D&P 110:13–16). Ang pag-abut ni Elijah importante kaayo nga ang karaang propeta nga si Malaquias nanagna niini sa una pang mga siglo, ug ang Manluluwas misubli sa panagna ngadto sa mga Nephite (tan-awa sa Malaquias 4:5–6; 3 Nephi 25:5–6; 26:1–2). Si Elijah miabut aron sa paghatag ni Joseph ug Oliver sa mga yawe sa pag-seal—ang gahum sa pagbugkos ug pagsuta sa mga langit sa tanang mga ordinansa nga gipahigayon sa yuta. Ang pagpahiuli sa gahum sa pag-seal gikinahanglan aron pag-andam sa kalibutan alang sa Ikaduhang Pag-anhi sa Manluluwas, kay kon wala kini, “ang tibuok kalibutan pagalaglagon sa hingpit sa iyang pag-abut” ( Joseph Smith–Kasaysayan 1:39).

Mga Pagtulun-an ni Joseph Smith

Ang karaang propeta nga si Malaquias misulti nang daan sa pag-abut ni Elijah.

Si Propeta Joseph Smith miingon sa mosunod mahitungod sa pagbisita ni Moroni kaniya sa gabii niadtong Septyembre 21, 1823, ingon sa gitala sa Joseph Smith–Kasaysayan 1:36–39: “Si [Moroni] mikutlo pag-una sa ikatulong kapitulo sa Malaquias; ug mikutlo usab siya sa ikaupat o sa katapusang kapitulo sa samang panagna, bisan og dunay gamay nga kausaban gikan sa paagi nga kini mabasa sa atong mga Biblia. Imbis sa pagkutlo sa unang bersikulo sama nga kini mabasa sa atong mga basahon, siya mikutlo sa ingon niini:

“Ug tan-awa, ang adlaw moabut nga mosunog sama sa usa ka hudno, ug ang tanan nga mapahitas-on, oo, ug ang tanan nga nagbuhat og dautan pagasunugon sama sa dagami; kay sila nga moabut mosunog kanila, miingon ang Ginoo sa mga Panon, nga walay ibilin kanila ni gamut o sanga.

“Ug usab, mikutlo siya sa ikalima nga bersikulo nga nag-ingon: Tan-awa, Ako mopadayag nganha kaninyo sa Pagkapari, pinaagi sa kamot ni Elijah ang propeta, sa dili pa moabut ang mahinungdanon ug makalilisang nga adlaw sa Ginoo.

“Siya usab mikutlo sa sunod nga bersikulo nga may pagkalahi: Ug siya motanom sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati ngadto sa ilang mga amahan. Kon dili pa ingon niini, ang tibuok kalibutan pagalaglagon sa hingpit sa iyang pag-abut.”⁴

Si Elijah mipakita ngadto nila ni Joseph Smith ug Oliver Cowdery sa Templo sa Kirtland.

Si Joseph Smith mihulagway sa pagpakita sa karaang propeta nga si Elijah ngadto kaniya ug ni Oliver Cowdery niadtong Abril 3, 1836, sa Templo sa Kirtland, sa kaulahian gitala sa Doktrina ug mga Pakigsaad 110:13–16: “Lain nga mahinungdanon ug mahimayaon nga panan-awon miabut diha kanamo; kay si Elijah ang propeta, kinsa gidala ngadto sa langit nga wala makatilaw og kamatayon, nagbarug diha sa among atubangan, ug miingon:

“Tan-awa, ang panahon miabut na sa hingpit, nga gipamulong pinaagi sa ba-ba ni Malaquias—nga nagpamatuod nga siya [Elijah] kinahanglan nga ipadala, sa dili pa moabut ang mahinungdanon ug makalilisang nga adlaw sa Ginoo—sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon uban sa usa ka tunglo–busa, ang mga yawe niini nga dispensasyon gitugyan ngadto sa inyong mga kamot; ug pinaagi niini kamo masayud nga ang mahinungdanon ug makalilisang nga adlaw sa Ginoo duol na, gani diha sa mga pultahan.”⁵

Si Elijah mipahiuli sa mga yawe sa pag-seal— ang gahum ug ang awtoridad sa pagbugkos sa langit sa tanang mga ordinansa nga gipahigayon sa yuta.

“‘Ug akong ipadala si Elijah ang Propeta sa dili pa ang daku ug makalilisang nga adlaw ni Jehova,’ ug uban pa,[tan-awa sa Malaquias 4:5]. Nganong ipadala si Elijah? Tungod kay siya naghupot sa mga yawe sa awtoridad sa pagpangalagad sa tanang mga ordiansa sa Priesthood; ug [gawas] ang awtoridad ihatag, ang mga ordinansa dili mapahigayon sa pagkamatarung.”⁶

Si Propeta Joseph Smith miingon sa mosunod diha sa sulat ngadto sa mga Santos, unya gitala sa Doktrina ug mga Pakigsaad 128:8–11: “Ang matang niini nga ordinansa [bunyag alang sa patay] gipasikad diha sa gahum sa pagkapari, pinaagi sa pagpadayag ni Jesukristo, diin kini gihatag nga bisan unsa ang inyong bugkuson dinhi sa yuta, pagabugkuson didto sa langit, ug bisan unsa ang inyong hubaron dinhi sa yuta pagahubaron didto sa langit….

“Kini tingali sa uban mahimong makahadlok kaayo nga doktrina ang atong giistoryahan—usa ka gahum diin nagtala o nagbugkos sa yuta ug nagbugkos sa langit. Bisan pa niana, sa tanang mga kapanahonan sa kalibutan, sa bisan unsang higayon nga ang Ginoo naghatag sa usa ka dispensasyon sa priesthood ngadto sa bisan unsang tawo pinaagi sa mismong pagpadayag, o bisan unsang pundok sa mga tawo, kini nga gahum gihatag gayud kanunay. Busa, bisan unsa ang gibuhat nga anaa sa awtoridad niadto nga mga tawo, diha sa ngalan sa Ginoo, ug nagbuhat niini sa tinuoray ug sa pagkamatinud-anon, ug naghupot og sakto ug matinud-anong tala niana, kini mahimong usa ka balaod sa yuta ug sa langit, ug dili mawagtang, sumala sa mga mando sa makagagahum nga si Jehova. Kini usa ka matinud-anong panultihon. Kinsa ang makadungog niini?

“Ug usab, alang sa nag-una niini nga doktrina, tan-awa sa Mateo 16:18, 19: Ug sultihan ko ikaw, Nga ikaw mao si Pedro, ug sa ibabaw niini nga bato pagatukoron ko ang akong iglesia; ug ang mga gahum sa kamatayon dili gayud makabuntog kaniya. Ug hatagan ko ikaw sa mga yawe sa gingharian sa langit: ug bisan unsay imong pagabugkoson sa yuta, didto sa langit pagailhon kini nga binugkos; ug bisan unsay imong pagaluagan dinhi sa yuta, didto sa langit pagailhon kini nga linuagan.

“Karon ang mahinungdanon ug dakong sekreto sa tibuok nga kahimtang, ug ang binipisyo [summum bonum] sa tibuok hilisgutan nga anaa sa atong atubangan, naglangkob sa pag-angkon sa mga gahum sa Balaang Priesthood. Alang kaniya kinsa kini nga mga yawe gihatag walay kalisud ang pagbaton og kahibalo sa mga kamatuoran kalabut sa kaluwasan sa katawhan, ingon nga alang sa mga patay ug alang sa mga buhi.”⁷

Pinaagi sa gahum sa pag-seal, ang mga pamilya mahimong ma-seal sa karon ug sa tanang kahangturan, ug ang sagrado nga mga ordinansa mahimong mapahigayon alang sa mga patay.

“Ang espiritu, gahum, ug tawag ni Elijah mao, nga kamo adunay gahum sa paghupot sa yawe sa pagpadayag, mga ordinansa, mga orakulo, mga gahum ug mga tuga sa kahingpitan sa Melchizedek Priesthood ug sa gingharian sa Dios dinhi sa yuta; ug sa pagdawat, pag-angkon, ug pagpahigayon sa tanang mga ordinansa nga anaa sa gingharian sa Dios, gani ngadto sa pagbalik sa mga kasingkasing sa mga amahan ngadto sa mga anak, ug ang mga kasingkasing sa mga anak ngadto sa mga amahan, gani bisan kadtong didto sa langit.

“Si Malaquias miingon, ‘Akong ipadala kaninyo si Elijah ang manalagna sa dili pa maobut ang dako ug makalilisang nga adlaw sa Giinoo: ug iyang pabalikon ang kasingkasing sa mga amahan ngadto sa mga anak, ug ang kasingkasing sa mga anak ngadto sa ilang mga amahan; tingali unya ako moanhi ug samaran ko ang yuta pinaagi sa usa ka panghimaraut.’ [Malaquias 4:5–6.]

“Karon, unsa ang akong gustong maangkon mao ang kahibalo mahitungod sa Dios, ug ako naghimo sa akong kaugalingong paagi sa pag-angkon niini. Unsa ang atong angay masabtan niini nga kasulatan sa ulahing mga adlaw?

“Sa mga panahon ni Noah, ang Dios milaglag sa kalibutan uban sa baha, ug Siya misaad sa paglaglag niini uban sa kalayo sa ulahing mga adlaw: apan sa dili pa kini mahitabo, si Elijah kinahanglan mag-una ug mopabalik sa mga kasingkasing sa mga amahan ngadto sa mga anak, ug uban pa.

“Karon mao kini ang punto. Unsa kini nga katungdanan ug trabaho ni Elijah? Kini mao ang usa ka pinakadako ug pinaka importate nga hilisgutan nga ang Dios mipahayag. Mopadala siya ni Elijah aron pag-seal sa mga anak ngadto sa mga amahan, ug ang mga amahan ngadto sa mga anak.

“Karon kini kutob lang ba sa mga buhi, aron paghusay sa mga kalisdanan uban sa mga pamilya sa yuta? Dili gayud. Kadto mas dako kaayo nga buhat. Elijah! unsa ang imong buhaton kon anaa ka dinhi? Imo bang pugngan ang imong trabaho alang sa buhi lamang? Dili: Akong ipabasa ninyo ang mga Kasulatan, diin ang hilisgutan gipadayag: kana mao, nga kon wala kita, sila dili mahimong hingpit, ni kita nga wala sila; ang mga amahan nga wala ang mga anak, ni ang mga anak nga wala ang mga amahan [tan-awa sa Hebreohanon 11:40].

“Ako buot nga kamo makasabut niini nga hilisgutan, tungod kay kini importante; ug kon kamo modawat niini, kini mao ang espiritu ni Elijah, nga motubos kita sa atong mga patay, ug isumpay ang atong mga kaugalingon uban sa atong mga amahan didto sa langit, ug i-seal sa atong mga patay aron mobangon sa unang pagkabanhaw; ug dinhi gusto nato nga ang gahum ni Elijah mo-seal niadtong nagpuyo sa yuta ngadto niadtong kinsa nagpuyo sa langit. Kini mao ang gahum ni Elijah ug ang mga yawe sa gingharian ni Jehova….

“Usab: Ang doktrina o ang gahum sa pag-seal ni Elijah mao kining mosunod—kon kamo adunay gahum sa pag-seal sa yuta ug sa langit, nan kinahanglan kita magmaalamon. Ang unang butang nga inyong buhaton, moadto ug mo-seal sa yuta sa inyong mga anak nga lalaki ug mga anak nga babaye, ug sa inyong kaugalingon ngadto sa inyong amahan sa mahangturong himaya.”⁸

Ang pag-anhi ni Elijah maoy usa ka gikinahanglan nga pagpangandam alang sa Ikaduhang Pag-anhi sa Manluluwas.

“Ang mga kasingkasing sa mga anak sa mga tawo kinahanglan nga pabalikon ngadto sa mga amahan, ug ang mga amahan ngadto sa mga anak, buhi o patay, aron pag-andam kanila alang sa pag-anhi sa Anak sa Tawo. Kon wala pa moanhi si Elijah, ang tibuok yuta pagahampakon.”⁹

“Si Elias mao ang mag-una aron pag-andam sa dalan, ug ang espiritu ug gahum ni Elijah moabut human dayon, maghupot sa mga yawe sa gahum, magtukod sa Templo sa tukurang bato, magbutang sa mga silyo sa Melchizedek Priesthood ibabaw sa balay ni Israel, ug paghimo sa tanang butang nga maandam; dayon ang Mesiyas moabut sa Iyang Templo, diin mao ang katapusan sa tanan…. si Elijah moabut gayud ug mag-andam sa dalan ug motukod sa gingharian sa dili pa ang mahinungdanong adlaw sa Ginoo.”¹⁰

“Ang kalibutan gitagana aron pagasunogon sa katapusang mga adlaw. Siya mopadala ni Elijah ang propeta, ug iya gayud nga ipadayag ang mga pakigsaad sa mga amahan nga may kalabutan sa mga anak, ug ang mga pakigsaad sa mga anak nga may kalabutan sa mga amahan.”¹¹

“Sa unsang paagi nga ang Dios moabut aron pagtubos niini nga henerasyon? Siya mopadala ni Elijah ang propeta…. si Elijah mopadayag gayud sa mga pakigsaad aron pag-seal sa mga kasingkasing ngadto sa mga anak, ug ang mga anak ngadto sa mga amahan.”¹²

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Sa dihang ang Manluluwas mipakita didto sa Templo sa Kirtland, Siya misulti ni Joseph Smith ug Oliver Cowdery, “Ako mopakita sa akong kaugalingon sa akong mga tawo uban sa kalooy niini nga balay” (pahina 346). Sa unsang paagi nga ang pagpahiuli sa mga yawe sa pag-seal usa ka pagpakita sa kalooy sa Ginoo? Unsa ang ubang mga paagi nga Siya mipakita sa Iyang kaugalingon didto sa templo?
Tun-i ang ikatulo ug ikaupat nga mga paragrap sa (pahina 347). Unsa ang gitudlo niining duha ka mga paragrap mahitungod sa misyon ni Elijah nga wala nato makat-uni gikan sa Malaquias 4:5–6? Unsa ang importansya mahitungod niini nga mga kalainan?
Tun-i ang gipasabut sa gahum sa pag-seal nga makit-an sa (pahina 348). Unsa ang gahum sa pag-seal? Ngano nga kini nga gahum importante kaninyo ug sa inyong pamilya?
Basaha ang gipasabut ni Joseph Smith sa buhat ni Elijah (pahina 349). Unsa ang Espiritu ni Elijah? Ngano man kadto nga importante kaayo nga si Elijah moanhi ug motuman sa iyang buhat niining ulahing mga adlaw?
Unsa ang inyong mga kasinatian diin kamo mibalik sa inyong kasingkasing ngadto sa mga miyembro sa pamilya nga namatay? Unsa ang mabuhat sa mga ginikanan aron pagtabang sa ilang mga anak nga mobati ang ilang mga kasingkasing ngadto sa ilang mga kagikan?
Basaha ang paragrap nga nagsugod sa ubos sa (pahina 347) ug ang unang paragrap sa (pahina 350). Ngano sa inyong hunahuna nga ang yuta “pagahampakon uban sa tunglo” kon wala ang gahum sa pag-seal?

May kalabutan nga mga Kasulatan: Helaman 10:4–10; D&P 132:45–46; 138:47–48; Bible Dictionary, “Elijah,” p. 664