Hugna 47: ‘Pagdayeg sa Tawo’: Mga Propeta sa Ulahing mga Adlaw Mihatag og pagsaksi ni Propeta Joseph Smith

Hugna 47

“Pagdayeg sa Tawo”: Mga Propeta sa Ulahing mga Adlaw Mihatag og pagsaksi ni Propeta Joseph Smith

“Si Propeta Joseph Smith … gitawag sa Dios, pinaagi sa Kaugalingong tingog sa Dios, aron pag-abli niini nga dispensasyon sa Ebanghelyo sa kalibutan alang sa katapusang higayon.” (Joseph F. Smith)

Gikan sa Kinabuhi ni Joseph Smith

Sunod sa kamatayon ni Propeta Joseph Smith ug sa iyang igsoon nga si Hyrum, ang mga sakop sa Korum sa Napulog Duha nga didto sa ilang misyonaryo nga mga panaw sa Estados Unidos midali og pamauli kutob sa mahimo ngadto sa Nauvoo. Ang mga sakop sa Napulog Duha mipatawag og miting sa mga Santos pagka Agosto 8, 1844, diin si Brigham Young, ang Presidente sa Korum sa Napulog Duha, namulong. Sa pagbuhat niya niini, usa ka dili kasarangan nga panghitabo ang nahitabo nga nasaksihan sa daghang mga Santos. Si Presidente Young gimilagrohan sa panagway ug tingog nga sama kang Joseph Smith. “Kon si Joseph nabuhi gikan sa pagkamatay ug namulong pag-usab kanila,” si George Q. Cannon miingon, “ang hitabo dili unta kaayo hilabihan nga ikatingala kay sa nahitabo ngadto sa daghan nga mitambong niadto nga miting. Tingog gayud kadto ni Joseph mismo; ug dili lang kadto nga tingog ni Joseph ang nadungog; apan daw sa mga panan-aw sa mga tawo ang tawo nga nagbarug sa ilang atubangan mao gayud si Joseph. Usa pa ka butang nga labihan ka talagsaon ug milagroso nga panghitabo nga gipakita nianang adlawa atubangan niadto nga kongregasyon nga wala gayud namo madungog. Ang Ginoo mihatag sa iyang katawhan og usa ka pagpamatuod diin walay luna nga gibilin alang sa pagduhaduha kon si kinsa ang tawo nga Iyang gipili nga mangulo kanila.”¹

Sa pagtapos niini nga miting, ang mga Santos nagkauyon nga ang Napulog Duha maoy mangulo kanila. Kapin og gamay sa tulo ka tuig human niadto, pagka Disyembre 1847, ang First Presidency naorganisar pag-usab, diin si Brigham Young gipaluyohan isip Presidente sa Simbahan.

Sukad sa panahon ni Brigham Young, ang matag propeta kinsa nangulo sa Simbahan mipamatuod sa dili kasarangan nga misyon ni Propeta Joseph Smith. Si Joseph Smith gipili didto sa Konseho sa Langit aron mahimong talagsaon nga propeta ug manalagna sa ulahing mga adlaw. Ang iya nga misyon labihan ka mahinungdanon nga kini gipanagna sa mga karaang propeta, lakip na ang propeta sa Daan nga Tugon nga si Jose, nga gibaligya ngadto sa Ehipto. Si Jose sa Egipto usa ka manalagna mismo, ug siya nanagna dugay na kabahin ni Joseph Smith:

“Usa ka manalagna ang pasanayon sa Ginoo nga akong Dios, kinsa mao ang usa ka pinili nga manalagna ngadto sa bunga sa akong mga kaliwat…. Ug ang iyang ngalan pagatawgon sama kanako; ug kini sama sa ngalan sa iyang amahan. Ug mahisama siya kanako; kay ang butang, nga ipagawas sa Ginoo diha sa iyang kamot, pinaagi sa gahum sa Ginoo modala sa akong mga katawhan ngadto sa kaluwasan” (2 Nephi 3:6, 15; tan-awa usab sa 2 Nephi 3:6–22).²

Pagka Disyembre 1834, si Joseph Smith Sr. mihatag sa Propeta og usa ka panalangin, pagmatuod nga siya ang manalagna kinsa gipanagna ni Jose nga karaan: “Ako manalangin kanimo uban sa panalangin sa imong mga amahan si Abraham, Isaac ug Jacob; ug bisan ang mga panalangin sa imong amahan nga si Joseph, ang anak ni Jacob. Tan-awa, nagatan-aw siya sa iyang mga kaliwatan sa ulahing mga adlaw … , makugihon sa iyang tinguha aron masayud kon kanus-a ang anak moanhi kinsa magdala sa pulong sa Ginoo, diin sila unta malamdagan ug mahibalik ngadto sa matuod nga panon, ug ang iyang mga mata makakita kanimo, akong anak, ang iyang kasingkasing malipay ug ang iyang kalag mabusog, ug siya miingon, … ‘Gikan sa akong kaliwat, nga nabungkag uban sa mga Hentil, usa ka pinili nga manalagna mobarug … , kansang kasingkasing mohatag sa hunahuna og dako nga kaalam, kansang kahibalo molapas pa ug makasabut sa lagwum nga mga butang sa Dios, ug kansang baba manulti sa balaod sa makiangayon.’ … Ikaw magahupot niini nga mga yawe niini nga pagpangalagad, bisan sa kapangulohan niini nga simbahan, niini nga panahon ug sa kahangturan.”³

Pinaagi ni Joseph Smith, ang pinili nga manalagna sa ulahing mga adlaw, ang mga doktrina ug makaluwas nga mga ordinansa sa ebanghelyo gipadayag, ug ang matuod nga Simbahan ni Jesukristo sa makausa pa natukod dinhi sa yuta. Ang mga pagpamatuod sa karaan ug bag-ong mga propeta naghiusa sa pagpamahayag nga si Joseph Smith mao ang instrumento kinsa pinaagi kaniya ang Dios mipahiuli sa kinatibuk-an sa ebanghelyo alang pagpanalangin “sa kinatibuk-ang pamilya nga tawhanon, gikan sa kahangturan hangtud sa kahangturan.”⁴

Mga Pagpamatuod sa mga Propeta sa Ulahing mga Adlaw

Si Joseph Smith giordinahan nang daan sa iyang mapanagnaon nga tawag.

Presidente Brigham Young: “Gipamahayag na didto sa mga konseho sa kahangturan, dugay na sa wala pa matukod ang pundasyon sa kalibutan, nga si [Joseph Smith] mao gayud ang tawo, niini nga katapusang dispensasyon sa kalibutan, nga modala sa pulong sa Dios ngadto sa katawhan ug makadawat sa kinatibuk-an sa mga yawe ug gahum sa Priesthood sa Anak sa Dios. Ang panan-aw sa Dios anaa nganha kaniya, ug nganha sa iyang amahan, ug nganha sa amahan sa iyang amahan, ug ngadto sa ilang mga kagikan tin-aw kaayo balik kang Abraham, ug gikan ni Abraham ngadto sa baha, gikan sa baha ngadto ni Enoch ug gikan ni Enoch ngadto ni Adan. Iyang gibantayan kana nga pamilya ug kana nga dugo ingon nga kini nagatuyok gikan sa iyang tinubdan hangtud sa pagkahimugso nianang tawhana. Si [Joseph Smith] giordinahan nang daan diha sa kahangturan aron sa pagpangulo niining katapusan nga dispensasyon.”⁵

Presidente Joseph Fielding Smith: “Si Joseph Smith gipili nga mobarug diha sa may ulohan sa buluhaton sa Ginoo niini nga ulahing mga adlaw, ug ang buluhaton gihatag ngadto kaniya nga nahibaloan nang daan sa atong Mahangturon nga Amahan didto sa kahangturan sa wala pa siya matawo. Mianhi siya sa espiritu ni Elias aron pag-andam sa agianan alang sa pag-anhi sa Gnoo. Walay propeta sukad sa mga panahon ni Adan, gawas lamang, sa atong Manunubos, ang gihatagan og mas dako nga misyon.”⁶

Presidente Ezra Taft Benson: “Aron makakita og kon unsa ka dako ang yutan-ong misyon sa Propeta kinahanglang tan-awon nato kini uban sa panabut kon unsa ang kahangturan. Usa siya niadtong ‘mga halangdon ug bantugan’ kinsa gihulagway ni Abraham sa ingon niini nga mosunod:

“ ‘Karon ang Ginoo mipakita ngari kanako, Abraham, sa mga espiritu nga binuhat sa wala pa matukod ang kalibutan ug taliwala niining tanan dihay daghan sa mga halangdon ug bantugan; ug nakita sa Dios nga kini nga mga kalag mga maayo, ug siya mitindog diha sa taliwala kanila, ug siya miingon: Kini sila Ako mohimo nga akong mga magmamando, kay siya nagtindog uban niadto nga mga espiritu, ug siya nakaamgo nga sila maayo; ug siya miingon ngari kanako: Abraham, ikaw usa kanila; ikaw napili sa wala pa ikaw matawo.’ (Abraham 3:22–23.)

“Mao usab kadto kang Joseph Smith. Didto usab siya niadto. Siya usab milingkod didto sa konseho uban sa mga halangdon ug bantugan. Sa pag-angkon og usa ka prominente nga lugar sa kadungganan ug pagkalahi walay pangutana nga siya mitabang sa pagplano ug sa pagpatuman sa dako nga buluhaton sa Ginoo sa ‘pagpahinabo sa pagka-imortal ug sa kinabuhi nga dayon sa tawo,’ ang kaluwasan sa tanan nga anak sa atong Amahan [Moises 1:39]. Ang iya nga misyon aduna, ug kini moepekto sa tanan kinsa mianhi sa kalibutan, tanan nga nagpuyo sa kalibutan ug sa mga minilyon nga wala pa mahimugso….

“Si Propeta Joseph Smith dili lang kay ‘usa sa mga halangdon ug bantugan,’ apan siya mihatag ug padayon pa nga mohatag og pagtagad sa mga importante nga butang dinhi sa yuta bisan gani karon gikan sa gingharian sa itaas. Kay sa mga mata sa Ginoo … kining tanan usa ka mahinungdanon nga programa sa kahangturan diin si Propeta Joseph mihimo sa importante nga papel—ang tanan pinaagi sa walay katapusan nga priesthood ug katungod sa Dios.”⁷

Ang Unang Panan-awon ni Joseph Smith usa ka mahinungdanon nga bahin sa atong tagsa-tagsa ka pagpamatuod.

Presidente Joseph F. Smith: “Ang pinakatalagsaon nga panghitabo nga sukad nahitabo dinhi sa kalibutan sukad sa pagkabanhaw sa Anak sa Dios gikan sa lubnganan, ug ang iyang pagkayab ngadto sa langit, mao ang pag-anhi sa Amahan ug sa Anak ngadto sa batang lalaki nga si Joseph Smith, aron maandam ang agianan alang sa katukuran sa pundasyon sa gingharian [sa Dios]—dili gingharian sa tawo—dili na gayud mahunong o maliso.

“Sa pagdawat niini nga kamatuoran, nakita nako nga mas sayon dawaton ang lain pang mga kamatuoran nga iyang gipamulong ug gipamahayag panahon sa iyang misyon … sa kalibutan. Wala gayud siya magtudlo og doktrina nga dili tinuod. Wala gayud siya mobuhat og usa ka doktrina nga wala imando kaniya nga buhaton. Wala gayud siya mosuportar og sayop. Wala siya malingla. Siya nakakita; siya nakadungog; iyang gibuhat ang mga butang nga gipabuhat kaniya; ug, busa, ang Dios maoy responsable sa mga butang nga nahuman ni Joseph Smith—dili si Joseph Smith. Ang Ginoo maoy responsable niini, ug dili ang tawo.”⁸

Presidente Heber J. Grant: “Bisan kon si Joseph Smith nakakita sa Dios ug nakigsulta gayud Kaniya, ug ang Dios mismo mipaila ni Jesukristo ngadto sa batang si Joseph Smith, ug si Jesukristo miingon gayud ni Joseph Smith nga siya maoy instrumento sa mga kamot sa Dios sa pagtukod og usab dinhi sa yuta sa matuod nga Ebanghelyo ni Jesukristo—o Mormonism, giingon nga, tinumo-tumo lang. Ug ang Mormonism dili usa ka tinumo-tumo! Kini ang gahum sa Dios ngadto sa kaluwasan; mao kini ang Simbahan ni Jesukristo, nga gitukod ubos sa Iyang pagdumala, ug ang tanan nga pagka dili matuohon sa kalibutan dili makausab sa nag-una nga mga kamatuoran nga nagdugtong sa Simbahan ni Jesukristo sa mga Santos sa Ulahing mga Adlaw.”⁹

Presidente Howard W. Hunter: “Mapasalamaton ako sa akong pagkamiyembro sa Simbahn, ug ang akong pagpamatuod sa kabalaan nagsukad diha sa yano nga sugilanon sa usa ka bata ilawom sa kakahoyan nga nagluhod ug midawat sa langitnon nga mga bisita—dili kay usa lamang ka Dios, apan duha ka lain-lain, nga indibidwal nga mga personahe, ang Amahan ug ang Anak, mipadayag og usab dinhi sa yuta sa mga personahe sa Dios nga Kapangulohan. Ang akong hugot nga pagtuo ug pagpamatuod nagsukad diha sa yano nga sugilanon, kay kon kini dili tinuod, malaglag ang Mormonismo. Kon kini tinuod—ug ako mopamatuod nga kini tinuod—usa kini ka pinakatalagsaon bugtong nga mga panghitabo sa tibuok kasaysayan.”¹⁰

Presidente David O. McKay: “Ang pagpakita sa Amahan ug sa Anak ngadto ni Joseph Smith mao ang pundasyon niini nga Simbahan. Diha nahimutang ang sekreto sa iyang kusog ug kalig-on. Tinuod kini, ug ako mopamatuod niini. Nga ang usa ka padayag mitubag sa tanang mga pangutana sa siyensya bahin sa Dios ug sa iyang balaan nga personalidad. Wala ba ninyo makita kon unsay gipasabut niana? Kon unsa ang Dios, natubag na kana. Ang iyang padayag ngadto sa Iyang mga anak tin-aw kaayo. Ang iyang interes diha sa tawo pinaagi sa awtoridad nga gihatag sa tawo kita kaayo. Ang kaugmaon sa buluhaton may kasiguruhan. Kini ug lain pang mahimayaon nga mga kamatuoran gihimong klaro pinaagi niadtong mahimayaon nga Unang Panan-awon.”¹¹

Presidente Ezra Taft Benson: “Ang Unang Panan-awon ni Propeta Joseph Smith usa ka sukaranan nga pagtulun-an sa Simbahan. Ang kaatbang nasayud niini ug giatake ang kredibilidad ni Joseph Smith sukad sa adlaw nga iyang gipahibalo ang pagbisita sa Amahan ug sa Anak…. Ikaw kinahanglan gayud nga mohatag sa imong pagpamatuod sa katinuod sa Unang Panan-awon. Si Joseph Smith nakakita gayud sa Amahan ug sa Anak. Nakigsulti sila kaniya sigun sa iyang giingon nga sila nakig-istorya. Usa kini sa labing mahimayaon nga hitabo sukad sa pagkabanhaw sa atong Ginoo. Bisan kinsa nga lider, sa walay pagdapig, dili makapahayag sa iyang pagpamatuod nga ang Dios ug si Jesukristo mipakita ngadto ni Joseph Smith dili gayud mahimong usa ka tinuod nga lider, usa ka tinuod nga tigbalantay sa karnero. Kon dili nato dawaton kini nga kamatuoran, … kon kita wala makadawat og pagsaksi kabahin niining talagsaon nga padayag, dili kita makadasig og hugot nga pagtuo ngadto sa atong atong gigiyahan.”¹²

Presidente George Albert Smith: “Sa dihang ang bata nga propeta, didto sa kakahoyan sa Palmyra, nakakita sa Amahan ug sa Anak, ug nakakita nga sila sa pagkatinuod mga personahe, nga sila makabati ug makatubag unsay iyang gisulti, dinhi gisugdan ang bag-ong panahon niini nga kalibutan, ug mitukod sa pundasyon alang sa hugot nga pagtuo sa mga anak sa tawo. Karon makaampo na sila ngadto sa atong Amahan sa langit ug makahibalo nga sila makabati ug motubag sa ilang mga pag-ampo, nga aduna diay koneksyon tali sa kalangitan ug sa kayutaan.”¹³

Si Propeta Joseph Smith gitudloan sa Dios ug sa mga anghel.

Presidente John Taylor: “Kinsa si Joseph Smith? Ang Basahon ni Mormon nagsulti kanato nga siya usa ka kaliwat ni Jose nga gibaligya ngadto sa Ehipto, ug siya mao ang gipili sama kang Abraham sa paghimo og buluhaton dinhi sa kalibutan. Ang Dios mipili niini nga batan-on. Dili siya kahibalo og mga letra nga natun-an sa kalibutan, apan siya ang pinakamaalamon ug intelehente nga tawo nga sukad akong nahimamat sa akong kinabuhi, ug ako nakabiyahe og gatusan ka libo nga mga milya, nakaabut sa lainlaing mga kontinente ug nakig-uban sa nagkalain-laing pundok ug mga tinuhoan sa mga tawo, bisan pa wala gayud ako makahimamat og tawo nga labihan ka intelehente sama kaniya. Ug diin niya nakuha ang iyang kahibalo? Dili sa mga libro; dili sa mga pangatarungan o sa siyensya o pilosopiya nianang panahona, apan iya kining naangkon pinaagi sa mga padayag sa Dios nga gipaila ngadto kaniya pinaagi sa kahimanan sa walay katapusan nga ebanghelyo.”¹⁴

Presidente Wilford Woodruff: “Waka gayud ako makabasa bisan asa, nga akong nahibaloan, sa sama nga gahum nga gipakita sa bisan unsang dispensasyon ngadto sa mga anak sa katawhan, diin gipakita ngadto sa Propeta sa Dios sa organisasyon niini nga Simbahan, dihang ang Amahan ug ang Anak mipakita ngadto ni Propeta Joseph agi og tubag sa iyang pag-ampo, ug dihang ang Amahan miingon, ‘Kini mao ang Akong Hinigugmang Anak; tan-awa Siya; Paminaw Kaniya.’ Kini usa ka mahinungdanon nga padayag, nga wala pa gayud mapakita sa sama nga paagi sa bisan unsang dispensasyon sa kalibutan, nga gihatag sa Dios mahitungod sa Iyang buluhaton. Mao nga niini nga organisasyon, ang Propeta sa Dios gipangalagaran sa mga anghel sa kalangitan. Sila ang iyang mga magtutudlo, sila ang iyang mga instruktor, ug ang tanan nga iyang gibuhat, ug ang tanan nga iyang gihimo sukad sa sinugdanan, gikan nianang adlawa hangtud sa adlaw sa iyang pagkamartir, gihimo pinaagi sa padayag ni Jesukristo.”¹⁵

Presidente Lorenzo Snow: “Si Joseph Smith, kinsa gipili sa Dios nga moestablisar niini nga buluhaton, usa ka kabus ug walay edukasyon, ug nahisakop sa dili inila nga denominasyon sa mga Kristiyano. Usa lamang siya ka batang lalaki, matinud-anon, puno sa integridad…. Sama ni Moises gibati niya nga dili angayan ug dili kwalipikado alang sa buluhaton, nga mobarug isip tigreporma sa relihiyon, sa usa ka posisyon nga wala gayud mailhi, sa pakiggubat batok sa mga opinyon ug mga gituhoan nga diha na sa mga katuigan, nga adunay pagtugot sa katawhan, ang pinaka halawum nga diosnon nga pagtuman; apan ang Dios mitawag kaniya sa paghaw-as sa mga kabus ug matinud-anon nga kasingkasing sa tanang kanasuran gikan sa ilang espirituhanon ug temporal nga pagkaulipon [bondage]. Ug ang Dios misaad kaniya nga si kinsa man kadtong modawat ug mosunod sa iyang mensahe, ug si kinsa kadtong modawat sa bunyag alang sa kapasayloan sa mga sala, uban sa kamatinud-anon sa katuyoan, kinahanglan nga makadawat sa balaang pagpakita, kinahanglan nga makadawat sa Espiritu Santo, kinahanglan nga makadawat sa sama nga ebanghelyo ug mga panalangin nga gipanaad ug maangkon pinaagi sa ebanghelyo, sigun sa gisangyaw sa karaan nga mga apostoles, ug kini nga mensahe, kini nga saad, kinahanglan nga mahitabo bisan asa ug ngadto kang bisan kinsa kini dalhon sa mga Elder, mga mensahero sa Dios nga adunay katungod. Mao nga si Joseph Smith ginaingon, ang walay edukasyon, ang dili makalibutanon, simple, matinud-anon nga bata.”¹⁶

Presidente Harold B. Lee: “si Joseph Smith, ang batan-on wala magtuon og teyolohiya sa iyang panahon, wala makataak og mas taas nga edukasyon sa iyang pagtuon nianang panahona, … [siya] usa nga sayon modawat sa mga panudlo ug mga paghunghong sa Espiritu. Si Joseph Smith dili unta makaestablisar niini nga Simbahan. Dili unta niya matuman ang buluhaton sa Ginoo, ang Basahon ni Mormon. Mahimong ila nga tamayon si Propeta Joseph Smith isip usa ka tawo. Mahimong makapangutana sila giunsa pagsugod kini nga Simbahan, apan dinhi ang butang nagbarug isip usa ka monumento—ang Basahon ni Mormon mismo. si Joseph, ang tawo, dili unta makahimo niini, apan si Joseph, gidasig pinaagi sa gahum sa Makagagahum nga Dios, makahimo ug nahimo gayud ang milagroso nga serbisyo sa pagpaila sa gingharian gikan sa pagka dili inila pinaagi sa gipahiuli nga ebanghelyo ni Jesukristo.”¹⁷

Presidente David O. McKay: “Kini tungod ni Joseph Smith, dili lamang kay usa ka bantugan nga tawo, apan isip usa ka dinasig nga sulugoon sa Ginoo mao nga ako nagtinguha nga makapamulong niini nga okasyon. Sa pagkatinuod ang kabantugan ni Joseph Smith naglangkob sa balaanon nga inspirasyon….

“ ‘Naunsa bang may hingkat-unan man kining tawhana nga wala man unta siya makaiskuyla?’ nakapangutana ang mga Judeo samtang sila natingala sa kaalam ni Jesus [Juan 7:15]. Mahimong usbon nato ang pangutana kalabut ni Joseph Smith, samtang kita mokonsiderar sa iyang talagsaon nga mga nahimo sulod sa mubo nga panahon sa [katorse ka] tuig diha sa tunga-tunga sa pagkaorganisar sa Simbahan ug sa iyang pagkamartir; samtang mamalandong kita sa hingpit nga pagkapareho sa Gipahiuli nga Ebanghelyo ug niadtong karaan nga Simbahan nga giestablisar ni Jesus ug sa iyang mga Apostoles; kon atong hinumduman ang iyang makatandog nga hunahuna ngadto sa mga baruganan ug mga doktrina; ug samtang makita nato ang walay ikatandi nga plano ug kasarang sa Simbahan, nga giestablisar pinaagi sa inspirasyon sa usa ka Kristo kinsang pangalan gidala niini. Ang tubag sa pangutana ‘Diin man makakat-on og kaalam kining tawhana?’ gitubag niining makapatandog nga stanza:

“Pagdayeg sa nakigsulti kang Jehova!
Jesus midihug ana’ng Propeta.
Miabli niining kapaigoan,
Hari, nasud siya pasidunggan.”18

Presidente Howard W. Hunter: “Atong gidayeg si [Joseph Smith] tungod sa iyang kapasidad sa pakigsulti dili lang ngadto kang Jehova! apan ngadto usab sa uban pang mga personahe sa langit. Daghan kaayo ang mibisita, mihatag sa mga yawe, ug gitudloan kana nga ‘pinili nga manalagna’ nga gituboy sa ulahing mga adlaw…. Ato usab nga gidayeg si Joseph Smith, tungod sa iyang kakugi ug kapasidad sa paghubad ug sa pagkadawat sa gatusan nga mga pahina sa pinadayag nga kasulatan. Siya ang instrumento sa pagpadayag. Pinaagi kaniya, gibanabana nga, daghan pang kahibulongan nga mga pahina sa kasulatan ang miagi kay sa uban nga tawhanong kasaysayan.”¹⁹

Si Propeta Joseph Smith gitawag sa Dios aron ablihan ang katapusan nga dispensasyon ug ipahiuli ang kahingpitan sa ebanghelyo.

Presidente Spencer W. Kimball: “Ako mosaksi sa kalibutan karon nga kapin sa usa ug tunga ka siglo ang nakalabay ang puthaw nga kisame gibungkag; ang mga kalangitan sa makausa pa giablihan pag-usab, ug sukad nianang panahona ang mga padayag nagpadayon.

“Ang bag-o nga adlaw misubang dihang [usa] ka kalag nga adunay kinasing-kasing nga tinguha nag-ampo alang sa balaanon nga giya. Usa ka luna nga may tinagoan nga kahilum nakaplagan, mga tuhod gipiko, ang kasing-kasing napamainubsanon, ang mga pangamuyo gilitok, ug usa ka kahayag nga labaw sa kahayag sa udtong tutok mipasanag sa kalibutan—ang kurtina dili na gayud itabon pag-usab.

“Ang batan-ong lalaki … , si Joseph Smith, nga may dili ikatandi nga hugot nga pagtuo, mitapos sa huwaw sa padayag, gilumpag ang ‘langit nga puthaw’ ug gibalik pag-usab ang komunikasyon. Ang langit mipanalangin sa yuta, ang kahayag mitunaw gikan sa kangitngit, ug ang Dios namulong pag-usab ngadto sa tawo, mipadayag na usab ‘sa iyang mga tinago ngadto sa iyang mga alagad ang mga manalagna.’ (Amos 3:7.) Usa ka bag-o nga propeta ania na sa yuta ug pinaagi kaniya ang Dios motukod sa iyang gingharian, nga dili na gayud magun-ob pa o ihatag sa laing katawhan—usa ka gingharian nga magbarug hangtud sa kahangturan.

“Ang pagkamahangturon niini nga gingharian ug ang mga padayag nga dala niini tim-os nga mga kamatuoran. Dili na gayud mosalop pag-usab ang adlaw; ang mga katawhan dili na gayud makaingon nga dili sila hingpit nga angayan sa pakigsulti sa ilang Magbubuhat. Dili na Gayud tago ang Dios gikan sa mga anak dinhi yuta. Ang padayag ania na dinhi kanunay.”²⁰

Presidente Gordon B. Hinckley: “Ang sugilanon sa kinabuhi ni Joseph maoy sugilanon sa usa ka milagro. Natawo siya diha sa kakabus. Gipadako siya diha sa kalisud. Gipalayas siya gikan sa usa ka lugar ngadto sa laing lugar, giakusahan og mga bakak, ug gibilanggo sa dili legal nga paagi. Gipatay siya sa edad nga 38. Bisan pa sa hamubo nga yugto sa 20 ka tuig sa wala pa siya mamatay, nahimo niya ang wala mahimo sa uban sa tibuok nga kinabuhi. Iyang gihubad ug gimantala ang Basahon ni Mormon, usa ka bolumin [volume] nga karon gihubad na sa daghang pinulongan ug diin kini gidawat sa minilyon sa tibuok yuta isip pulong sa Dios. Ang padayag nga iyang nadawat ang lain pang mga sinulat nga iyang gihimo nahimo gihapon nga kasulatan alang niining mga minilyon. Ang kinatibuk-an nga gidaghanon sa pahina niini nga libro mokabat sa gibana-anana nga doble ang gidaghanon sa kinatibuk-ang Bag-o nga Tugon diha sa Bibliya, ug tanan kini gumikan sa usa ka tawo sulod lamang sa pipila ka tuig. Sa samang panahon naka-establisar siya og usa ka organisasyon nga … nakasagubang sa tanang kalisdanan ug hagit ug mao gihapon kini ka epektibo karon sa pagdumala sa tibuok kalibutan nga kasakopan … sama sa pagdumala kaniadto sa gidaghanon nga 300 ka mga miyembro niadtong 1830. Adunay mga maduha-duhaon kinsa mamugos sa pagsangyaw nga kining talagsaon nga organisasyon usa lamang ka produkto sa kapanahonan diin kita nagpuyo. Kadto nga organisasyon, ako mouyon, ingon ka talagsaon, ingon ka lahi, ug ingon ka talagsaon kon unsa kini karon. Dili kini usa ka produkto lamang sa kapanahonan. Nahimo kini isip usa ka padayag gikan sa Dios….

“Sulod nianang panahona sa 20 ka tuig sa wala pa siya mamatay, si Joseph Smith mihimo og usa ka programa alang sa pagdala sa ebanghelyo ngadto sa mga kanasuran sa yuta. Natingala ako sa kadasig sa iyang paglihok. Bisan sa iyang kabata pa sa Simbahan, sa mga panahon sa naglagitom nga kalisdanan, ang mga tawo gitawag sa pagbiya sa ilang panimalay ug mga pamilya, paglabang sa kadagatan, aron pagsangyaw sa Gipahiuli nga ebanghelyo ni Jesukristo. Ang panghunahuna sa Propeta, ang iyang panan-awon milibut sa tibuok yuta.

“Alang sa atong kinatibuk-ang komperensya kaduha matag tuig, ang mga miyembro magpundok sa Amihanan, Central, ug Habagatang bahin sa Amerika; sa mga pulo sa Britanya ug Africa; sa mga nasud sa Europa; sa mga pulo ug mga kontinente sa Pasipiko; ug sa mga karaang kayutaan sa Asya. Mao kini ang lintunganay sa panan-awon ni Joseph Smith, propeta sa Dios. Siya sa pagkatinuod ang bantugan nga manalagna nga nakakita niining adlawa ug talagsaong mga adlaw moabut pa samtang ang buluhaton sa Ginoo nagauswag sa tibuok kayutaan.”²¹

Presidente Joseph F. Smith: “Bisan unsa pa ang nahimo ni Propeta Joseph Smith o nahitabo, kinahanglang dili nato hikalimtan ang kamatuoran nga siya ang tawo gikan sa minilyon nga mga katawhan nga mipuyo niining yuta niini nga panahon—ang bugtong tawo, nga gitawag sa Dios, pinaagi sa Kaugalingong tingog sa Dios mismo, aron pag-abli niini nga dispensasyon sa Ebanghelyo sa kalibutan alang sa katapusang higayon; ug mao kini ang mahinungdanon nga butang nga ibutang sa huna-huna, nga siya gitawag sa Dios aron ipaila ang Ebanghelyo sa kalibutan, sa pagpahiuli sa balaan nga priesthood ngadto sa mga anak sa katawhan, sa pag-organisar sa Simbahan ni Jesukristo sa mga Santos sa Ulahing mga Adlaw dinhi sa kalibutan, ug sa papahiuli sa tanang mga ordinansa sa Ebanghelyo, alang sa kaluwasan dili lamang sa mga buhi, apan usab sa mga patay, ug ang Dios mismo ang mitawag kaniya niini nga misyon….

“… Aduna pay ubang mga propeta, ug usab mga bantugang mga propeta, kinsa gipangalagaran sila sa mga anghel, ug uban kinsa nakakita sa mga tudlo sa Dios, ug kinsa gipalabi labaw o menus pa; apan asa man ang sirkumstansya, ug si kinsa ang tawo diin ang Amahan ug ang Manluluwas mipakita ug dungan sa personal gayud, ug namahayag ngadto kaniya? Asa na kanang tawhana? Wala bisan asa nga rekord sa kasysayan, gawas lamang ni Propera Joseph Smith, ug nahitabo kana samtang batan-on pa siya. Siya usa lamang ka batan-on, nga sa pagkatinuod ikatandi, sa pagkamartir samtang 38 anyos pa lamang.

“… Si Propeta Joseph Smith … nakigsulti sa Amahan ug sa Anak ug nakigsulti sa mga anghel, ug sila mibisita kaniya, ug mitugyan sa mga panalangin ug mga gasa ug mga yawe ug gahum diha kaniya nga wala pa gayud sukad mahatag ngadto sa tawo gawas lamang sa Anak sa Dios sa Iyang kaugalingon. Wala pay tawo sukad nga nakapuyo sa yuta kinsa naghupot sa tanang yawe sa Ebanghelyo ug sa mga dispensasyon nga gihatag diha kaniya sama sa gitugyan ngadto ni Propeta Joseph Smith didto sa Templo sa Kirtland dihang gibisitahan siya siya didto sa Anak sa Dios, ni Moises ug ni Elias ug ni Elijah, ug sa dihang ang kalangitan miabli diha kaniya, ug siya nakadawat sa mga yawe ug gahum ug katungod, diin pinaagi niini iyang matukod ang pundasyon sa buluhaton sa Dios, lapad ug lawom, aron mapuno ang yuta sa kahibalo sa Dios, ug uban sa Iyang gahum ug himaya.”²²

Ang buluhaton ni Joseph Smith mipanalangin niadtong nakapuyo sa kalibutan, kinsa buhi pa sa karon, ug ngadto sa mahimugso pa.

Presidente Joseph F. Smith: “Ang buluhaton diin nahiskop si Joseph Smith dili lamang alang niini nga kinabuhi, apan labut usab niini ang kinabuhi nga moabut ug sa kinabuhi nga milabay. Sa laing pagkasulti, may kalabutan kini niadtong mga mipuyo dinhi sa yuta, niadtong karon buhi pa, ug niadtong mga moabut human kanato. Dili kini mga butang nga may kalabutan sa tawo lamang samtang ania siya dinhi sa lawasnong unod, apan sa tibuok tawhanong pamilya gikan sa kahangturan hangtud sa kahangturan. Sa lintunganay, sigun sa akong giingon, si Joseph Smith gihuptan diha sa pagtahud, ang iyang pangalan gipasidunggan, napulo ka liboan nga katawhan nagpasalamat sa Dios diha sa ilang mga kasingkasing ug gikan sa kinahiladman sa ilang mga kalag alang sa kahibalo gipahiuli sa Ginoo dinhi sa kalibutan pinaagi kaniya, ug busa sila namulong og nindot kaniya ug mipamatuod sa iyang kabililhon. Ug dili lamang kini kutob sa usa ka barangay, o sa nasud, apan kini moabut ngadto sa tanang kanasuran, kaliwatan, pinulongan ug katawhan diin ang ebanghelyo, hangtud niining kasamtangang panahon, padayon nga gisangyaw.”²³

Presidente Joseph Fielding Smith: “Sa sama nga paagi diin ako nasayud nga si Jesus mao ang Kristo—ug kadto pinaagi sa padayag gikan sa Espiritu Santo—nasayud ako nga si Joseph Smith propeta ug hangtud sa hangtud siya propeta sa Dios.

“Akong gibalaan ug gitahud ang iyang balaan nga ngalan. Uban sa iyang igsoon, akong apohan, nga si Patriarch Hyrum Smith, iyang gisilyohan ang iyang pagpamatuod pinaagi sa iyang dugo didto sa Bilanggoan sa Carthage. Ug usa ako, kinsa gusto nga mahimong instrumento sa mga kamot sa Ginoo sa pagpahibalo sa tibuok kayutaan nga ang kaluwasan ania na usab tungod kay ang Ginoo mibutang ug usa ka gamhanan nga manalagna niini nga adlaw sa pag-establisar ug usab sa iyang gingharian dinhi sa yuta.

“Diha sa espiritu sa pagpamatuod ug pagpasalamat, ako motapos niini pinaagi sa dinasig nga mga pulong gikan sa Doktrina ug mga Pakigsaad: ‘Si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi.’ (D&P 135:3.)”²⁴

Presidente Gordon B. Hinckley, namulong didto sa Carthage, Illinois, niadtong Hunyo 26, 1994, agi og pasidungog sa ika- 150 nga anibersaryo sa pagkamartir ni Propeta Joseph Smith: “Ang mahimayaon nga buluhaton, nagsugod diha kaniya kinsa gipatay didto sa Carthage, mitubo sa usa ka milagroso ug talagsaon nga paagi…. Kining kahibulungan nga buluhaton, nga miguwa gikan propetikanhon nga tawag sa batang lalaki sa Palmyra, ‘miguwa gikan sa kangitngit sa kamingawan, ug mosiga nga mahayag sama sa usa ka bulan, tin-aw sama sa adlaw, ug makalilisang sama sa usa ka kasundalohan uban sa mga bandila,’ ingon og kay kini giampo sa Propeta mahitabo gayud (D&P 109:73)….

“Mihunong kami alang sa pagtahud niining gabhiona. Among gipamalandungan ang milagro sa kinabuhi nga nagsugod sa berde nga kabungturan sa Vermont ug nga natapos didto sa bilanggoan sa Carthage. Kadto nga kinabuhi dili taas. Apan ang mga bunga niadto nga kinabuhi nahimong usa ka butang nga ingon og taas ra kaayo sa panabut.

“Kining mahinungdanon nga katuyoan sa Ang Simbahan ni Jusukristo sa mga Santos sa Ulahing mga Adlaw nahimo nga labing bililhon kay sa kinabuhi mismo ngadto sa liboan ka mga kaliboan kinsa namatay sa pagserbisyo niini. Ang mga saksi mianhi dinhi sa kalibutan aron sa pagpamatuod sa tawag ni Joseph Smith isip Propeta sa Dios. Ang balaan nga priesthood gipahiuli pinaagi kaniya gitugyan ngadto sa wala maihap nga gidaghanon nga mga lalaki nga may integridad ug hiyas kinsa gisul-uban sa balaanon nga gahum. Ang Basahon ni Mormon milibut tadlas sa tibuok kalibutan isip usa ka testamento sa Ginoo nga si Jesukristo.

“Sa pagkutlo og usa ka tin-aw nga kamatuoran nga gipamulong sa dugay nang panahon ug sa lain-lain nga mga kahimtang, ‘nga ang dugo sa mga martir sa pagkatinuod maoy nahimo nga binhi sa Simbahan.’ Ang mga pagpamatuod nga nasilyo dinhi niini gayud nga mga presinto, niini nga luna diin kita nagkatigum karong gabhiona, mainit ug masalimuot nga adlaw 150 ka tuig na ang nakalabay, sa pagkakaron mialima sa hugot nga pagtuo sa mga katawhan sa tibuok nga kalibutan.”²⁵

Mga Sugyot alang sa Pagtuon ug sa Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Basaha ang mga kasinatian nga gihulagway diha sa mga pahina 658–59. Hunahunaa kon unsa kaha ang gibati sa mga tawo dihang nadawat nila ang pagsaksi nga si Brigham Young mao ang sumusunod ni Joseph Smith isip lider sa Simbahan. Unsaon man nato sa pagkadawat og pagsaksi nga ang Ginoo mitawag sa Presidente sa Simbahan karon?
Si Jose sa Ehipto ug uban nga mga karaang propeta nanagna bahin ni Joseph Smith ug sa iyang misyon (pahina 658). Sa gipakita diha sa hugna, ang mga propeta sa ulahing mga adlaw padayon nga nagpasabut sa ka-importante ni Joseph Smith. Ngano man kaha sa inyong hunahuna nga si Joseph Smith nakadawat man sa ingon nga pagtagad, sa wala pa ang yutan-ong pangalagad ug sa pagkahuman niana nga pangalagad?
Tun-i ang mga pagpamatuod diha sa mga pahina 659–61 kabahin sa pag-orden nang daan ni Joseph Smith. Unsaon man sa pagkausab sa atong panabut sa yutan-ong misyon ni Joseph Smith kon kita “motan-aw niini uban sa panabut kon unsa ang kahangturan”?
Basaha ang mga pagpamatuod diha sa mga pahina 661–63 kabahin sa Unang Panan-awon. Giunsa man niining hitaboa nga mahimong “pinakatalagsaon nga hitabo nga sukad nahitabo sa kalibutan sukad sa pagkabanhaw sa Anak sa Dios”? Giunsa man sa Unang Panan-awon pagkahimo nga “pundasyon sa Simbahan” ug ang sekreto sa kusog ug kalig-on”? Unsay nakatabang kaninyo nga makaangkon og pagpamatuod sa Unang Panan-awon?
Si Presidente Joseph F. Smith namahayag, “ang Dios maoy responsable sa mga buluhaton nga nahimo ni Joseph Smith—dili si Joseph Smith” (pahina 661). Sa inyong hunahuna nganong importante man kining puntoha nga buhaton kalabut sa misyon ni Joseph Smith?
Alang kang Joseph Smith, si Presidente John Taylor miingon, “Wala pa gayud ako makahimamat og tawo nga labihan ka intelehente sama kaniya” (pahina 664). Hinoon, si Presidente Taylor ug ang ubang mga Presidente sa Simbahan mipasabut nga si Joseph Smith wala kaayo’y daghang kahigayunan sa pag-eskuwela. Nganong si Propeta Joseph milambo man pag-ayo sa iyang kahibalo? (Alang sa pipila ka mga ehemplo, tan-awa sa mga pahina 663–67.) Samtang kita mangita og espirituhanon nga kahibalo, unsaon man nato sa pagsunod ang mga ehemplo ni Joseph Smith?
Ribyuha ang mga pahina 668–73, pagpangita sa mga kamatuoran ug mga ordinansa nga gipahiuli sa Ginoo pinaagi ni Joseph Smith. Hunahunaa kon unsay mahimong kalainan sa inyong kinabuhi kon kamo wala pa kahibalo sa gipahiuli nga ebanghelyo. Nganong mapasalamaton ka man kang Joseph Smith ug sa iyang misyon?

May Kalabutan nga mga Kasulatan: 2 Nephi 3:6–19; 27:6–26; 3 Nephi 21:9–11; D&P 1:17; 5:9–10; 21:1–6