Hugna 28: Misyonaryo nga Pangalagad: Usa ka Balaan nga Tawag, usa ka Mahimayaon nga Buhat

HUGNA 28

Misyonaryo nga Pangalagad: Usa ka Balaan nga Tawag, usa ka Mahimayaon nga Buhat

“Human sa tanan nga nasulti, ang pinakadako ug pinakaimportante nga katungdanan mao ang pagsangyaw sa Ebanghelyo.”

Gikan sa Kinabuhi ni Joseph Smith

Sulod sa katapusang pipila ka tuig nga ang mga Santos nagpuyo sa Kirtland, daghang mga miyembro ug gani ang ubang mga lider sa Simbahan ang mibiya sa kamatuoran [apostatized]. Ang Simbahan daw miagi og panahon sa krisis. “Niini nga kahimtang,” ang Propeta misulat, “ang Dios mipadayag ngari kanako og usa ka bag-o nga butang nga kinahanglan buhaton alang sa kaluwasan sa Iyang Simbahan.”¹ Kining “usa ka bag-o nga butang” usa ka pagpadayag nga magpadala og mga misyonaryo ngadto sa England aron pagsangyaw sa ebanghelyo.

Si Heber C. Kimball, usa ka miyembro sa Korum sa Napulog Duha, mihinumdum: “Unang mga adlaw kadto sa Hunyo 1837, si Propeta Joseph miduol kanako, samtang ako naglingkod sa … Templo, sa Kirtland, ug mihunghong siya kanako, miingon, ‘Brother Heber, ang Espiritu sa Ginoo mihunghong ngari kanako, “Himoa nga ang akong sulugoon moadto sa England ug mopahibalo sa akong ebanghelyo ug moabli sa pultahan sa kaluwasan niadto nga nasud.”² Si Elder Kimball nahinangop sa paghunahuna sa ingon nga buluhaton: “Gibati nako sa akong kaugalingon nga ako ang pinakahuyang nga sulugoon sa Dios. Gipangutana nako si Joseph unsa ang akong isulti kon moabut ako didto; miingon siya kanako nga moduol sa Ginoo ug Siya mogiya kanako, ug mosulti kanako pinaagi niadtong sama nga espiritu nga [misugo] kaniya.”³

Ang Propeta mihatag usab og balaang tawag ngadto ni Orson Hyde, ni Willard Richards, ug ni Joseph Fielding didto sa Kirtland, ug ni Isaac Russell, John Snyder, ug John Goodson didto sa Toronto, Canada. Kini nga mga kaigsoonan motipon ni Elder Kimball sa iyang misyon didto sa England. Nagpundok didto sa Siyudad sa New York, misakay sila sa barko nga Garrick paingon sa Great Britain niadtong Hulyo 1, 1837. Kining unang misyon gawas sa North America midala og mga 2,000 ka mga kinabig sa Simbahan sulod sa unang tuig sa mga misyonaryo didto sa England. Si Elder Kimball malipayong misulat ngadto sa Propeta: “Himaya sa Dios, Joseph, ang Ginoo anaa kanato taliwala sa mga nasud!”⁴

Ang ikaduhang apostolik nga misyon didto sa Britain, naglakip kadaghanan sa mga miyembro sa Napulog Duha ubos sa pagpangulo ni Brigham Young, gimandoan kadto pinaagi sa Propeta gikan sa Nauvoo. Mibiya nianang tinglarag niadtong 1839, ang Napulog Duha miabut sa England pagka 1840. Didto nagsugod pagtrabaho nga nianang pagka 1841 midala og labaw sa 6,000 ka mga kinabig sa Simbahan, nagtuman sa saad sa Ginoo nga Siya mohimo og “usa ka butang nga bag-o” alang sa kaluwasan sa Iyang Simbahan.

Gikan sa Nauvoo, si Joseph Smith mipadayon sa pagpadala og mga misyonaryo sa tibuok kalibutan. Si Elder Orson Hyde miabut didto sa England pagka 1841 ug wala madugay mipadayon sa iyang nadestinohan nga misyon didto sa Jerusalem. Nagdala siya og sulat isip rekomendasyon gikan ni Joseph Smith nagpaila nga “ang nagdala niini nga sulat, usa ka matinud-anon ug takus nga ministro ni Jesukristo, nga mahimong among ahente ug representante sa langyaw nga mga dapit, aron … makigsulti uban sa mga pari, mga tigmando ug mga Elder sa mga Judeo.”⁵ Pagka Oktubre 24, 1841, si Elder Hyde miluhod sa Bungtod sa Oliva didto sa Jerusalem ug nangamuyo sa Langitnong Amahan sa pagpahinungod ug paghalad sa yuta “alang sa pagpundok aron magkahiusa ang nakatag nga mga salin ni Judah, sumala sa mga panagna sa balaang mga propeta.”⁶ Si Elder Hyde dayon mipaingon sa Germany, diin siya mipahimutang sa unang pundasyon aron sa pagpalambo sa Simbahan didto.

Pagka Mayo 11, 1843, ang Propeta mitawag nila ni Elder Addison Pratt, Noah Rogers, Benjamin F. Grouard, ug Knowlton F. Hanks aron mopahigayon sa mga misyon didto sa mga isla sa South Pacific. Mao kini ang unang misyon sa Simbahan bisan asa nianang dakong rehiyon. Si Elder Hanks namatay didto sa dagat, apan si Elder Pratt mibiyahe sa Austral Islands, diin nagtudlo siya sa ebanghelyo sa isla sa Tubuai. Si Elder Rogers ug Grouard mipadayon sa Tahiti, diin gatusan ka mga tawo nabunyagan isip resulta sa ilang mga paghago.

Ubos sa direksyon ni Joseph Smith, ang mga Santos nagpadayon sa pagtuman sa sugo sa Ginoo: “Busa lakaw kamo ngadto sa tibuok kalibutan; ug ngadto sa bisan diin nga dapit nga kamo dili makaadto kamo mopadala, nga aron ang pagpamatuod magagikan kaninyo ngadto sa tibuok kalibutan diha sa matag linalang” (D&P 84:62).

Mga Pagtulun-an ni Joseph Smith

Ang Misyonaryo nga pangalagad usa ka balaan nga buhat; hugot nga pagtuo, kaayo, kakugi, ug ang gugma makahimo kanato sa paghimo niini nga buhat.

“Human sa tanan nga nasulti, ang pinakadako ug pinaka importante nga katungdanan mao ang pagsangyaw sa Ebanghelyo.”⁷

Pagka Disyembre 1840 si Joseph Smith misulat sa mga miyembro sa Korum sa Napulog Duha ug ubang lider sa priesthood kinsa nag-alagad og misyon sa Great Britain: “Akong ipaniguro, hinigugmang mga kaigsoonan, nga interesado akong tigpaniid sa mga butang nga nahitabo sa tibuok yuta; ug taliwala sa kinatibuk-ang kalamboan diin nagpadayon, walay mas importante kay sa mahimayaong buhat diin kamo karon naghimo; agi og sangputanan akong gibati ang kahigwaos sa inyong mga asoy, nga unta kamo uban sa inyong mga kaayo, hugot nga pagtuo, kakugi ug putling gugma modayeg sa inyong kaugalingon sa usag usa, sa Simbahan ni Kristo, ug sa inyong Amahan kinsa anaa sa langit; pinaagi kang kinsang grasya kamo gitawag sa ingon ka balaan nga tawag; ug makahimo sa pagpahigayon sa dako ug responsabling mga katungdanan nga anaa kaninyo. Ug ako makapasalig kaninyo, nga gikan sa impormasyon nga akong nadawat, gibati nako ang katagbaw nga kamo wala magbaliwala sa inyong katungdanan; unya nga ang inyong kakugi ug kamatinud-anon ingon ka siguro kaninyo sa mga pag-aprobar nianang Dios kinsang mga sulugoon kamo mao, ug usab ang maayong kabubut-on sa mga Santos sa tibuok kalibutan.

“Ang pagkatap sa Ebanghelyo sa tibuok England makapalipay gayud; sa paghunahuna lang niini mosangput og labaw pa kay sa ordinaryong pagbati diha sa dughan niadtong kinsa nagtrabaho ug nag-agwanta sa kalisud aron pagpahinabo niini, ug kinsa ang ilang lig-on nga mga tigsuporta ug mainitong mga tigpasiugda nagsugod pa, samtang giliyokan sa mga kahimtang nga pinaka ngil-ad, ug ang pagkalaglag gikahadlokan sa tanang mga kamot— sama sa maisug nga barko [sakayan] nga miasdang sa unos nga wala maunsa, mibukhad sa iyang layag ngadto sa hangin, ug halangdon mibuak sa dagat pinaagi sa mahatagong balod, labawng nasayud sukad kaysa kalig-on sa iyang kahoy, ug sa kasinatian ug kapasidad sa iyang kapitan, piloto, ug tripulante ….

“Ang gugma mao ang usa sa pinakahalangdong kinaiya sa Dios, ug angay ipakita niadtong naninguha nga mamahimong mga anak sa Dios. Usa ka tawo nga puno sa gugma sa Dios, dili kontento nga mopanalangin sa iyang pamilya lamang, apan molakip sa tibuok kalibutan, naghinamhinam sa pagpanalangin sa tibuok kaliwatan sa tawo. Kini mao ang inyong mga gibati, ug mipasangput kaninyo nga sa pagbiya sa mga kalipay diha sa panimalay, nga kamo unta mahimong panalangin sa uban, kinsa mga pilionon alang sa imortalidad, apan langyaw sa kamatuoran; ug sa pagbuhat sa ingon, ako nag-ampo nga ang pinakapinili nga mga panalangin mahimong maanaa kaninyo.”⁸

Kita nagtudlo sa yanong mga kamatuoran sa ebanghelyo uban sa pagpaubos ug kaaghop ug likayan ang pakiglalis sa uban mahitungod sa ilang mga gituohan.

“O, kamo mga elder sa Israel, paminaw sa akong tingog; ug kon kamo gipadala sa kalibutan aron pagsangyaw, isulti kadtong mga butang diin kamo gipadala aron mosulti; mosangyaw ug mag-ampo og kusog, ‘Paghinulsol kamo, kay ang gingharian sa langit hapit na; paghinulsol ug pagtuo sa Ebanghelyo.’ Ipahayag ang unang mga baruganan, ug himoa ang mga misteryo lamang, kon dili kamo isalikway…. Isangyaw kadtong mga butang nga ang Ginoo misulti kaninyo nga isangyaw—paghinulsol ug bunyag alang sa kapasayloan sa mga sala.”⁹

“Ako misulti ug mipasabut kalabut sa pagkawalay gamit sa pagsangyaw sa kalibutan mahitungod sa mahinungdanong mga paghukom, hinunoa ang pagsangyaw sa yano nga Ebanghelyo.”¹⁰

“Ang mga Elder [kinahanglan] moadto … uban sa tanang kaaghup, kaligdong, ug isangyaw si Jesukristo ug nga Siya gilansang; dili sa pakiglalis sa uban mahitungod sa ilang pagtuo, o sistema sa relihiyon, apan padayon sa makanunayong dalan. Kini akong gihatag agi og sugo; ug ang tanan kinsa dili motuman niini, mopahamtang og panggukod ibabaw sa ilang mga ulo, samtang kadtong mobuhat, kanunay nga mapuno uban sa Espiritu Santo; kini akong gisulti isip panagna.”¹¹

“Kon adunay bisan unsa nga pultahan nga maabli alang sa mga Elder aron pagsangyaw sa unang mga baruganan sa ebanghelyo, ayaw sila pahiluma. Ayaw pagtamay batok sa mga sekta; ni mosulti batok sa ilang mga pagtulun-an. Apan isangyaw si Kristo ug nga Siya gilansang, gugma sa Dios, ug gugma sa tawo;… sa ingon niana, kon mahimo, makapakunhod kita sa hunahuna nga dautan sa mga tawo. Pagmaaghup ug pagmapainubsanon sa kasingkasing, ug ang Ginoong Dios nga atong amahan magauban kaninyo hangtud sa kahangturan.”¹²

“Hinumdumi kining Yawe, ug pagmaalamon tungod ni Kristo, ug tungod sa imong kaugalingon nga kalag. Kamo wala ipadala aron tudloan, apan sa pagtudlo. Himoa nga ang tanang pulong makalukmay uban sa grasya. Pagmabinantayon; pagmaugdang. Kini mao ang adlaw sa pagpasidaan, ug dili adlaw sa daghang mga pulong. Pagbinuotan sa atubangan sa Dios ug sa tawo…. Pagbinuotan, madayganon, ug prangka sa tanan ninyong [mga pagtagad] uban sa katawhan. [Tan-awa sa D&P 43:15; 63:58.]”¹³

Sa wala pa si George A. Smith molarga paingon sa misyon niadtong 1835, mibisita siya ni Propeta Joseph Smith, kinsa iyang ig-agaw. Si George A. Smith mitala: “Miadto ako aron makigkita ni Agaw Joseph. Gihatagan niya ako og Basahon ni Mormon, nakiglamano siya kanako, ug miingon, ‘Pagsangyaw og mubong mga sermon, paghimo og mubong mga pag-ampo, ug hatag sa imong mga sermon uban sa mainampuon nga kasingkasing.’ ”¹⁴

Nagtudlo kita sa ebanghelyo ingon sa gisugo sa Espiritu.

“Ang tanan mosangyaw sa Ebanghelyo, pinaagi sa gahum ug sa impluwensya sa Espiritu Santo; ug walay tawo nga makasangyaw sa Ebanghelyo kon wala ang Espiritu Santo.”¹⁵

“Sa ginaingon ni Pablo mahimo siyang tanan nga mga butang ngadto sa tanang mga tawo, aron sa bisan unsang paagi maluwas ko unta ang pipila kanila [tan-awa sa 1 Mga Taga-Corinto 9:22], maingon man ang mga elder sa katapusang mga adlaw; ug, kay gipadala man aron pagsangyaw sa Ebanghelyo ug pagpasidaan sa kalibutan sa mga paghukom nga moabut, sigurado kita, kon kita motudlo ingon sa gisugo pinaagi sa Espritu, sumala sa mga pagpadayag ni Jesukristo, nga sila mosangyaw sa kamatuoran ug molambo nga walay pagbagulbol. Busa kita walay bag-ong sugo nga ihatag, apan sa pag-awhag sa mga elder ug mga miyembro sa pagpuyo sa matag pulong nga mogawas gikan sa ba-ba sa Dios [tan-awa sa Mateo 4:4], kon dili mapakyas sila sa pag-angkon sa himaya nga gitagana alang sa matinud-anon.”¹⁶

Ang Propeta misulti sa komperensya nga gihimo niadtong Oktubre 1839: “Si Presidente [Joseph Smith] mipadayon sa paghatag og mga pahimangno sa mga Elder mahitungod sa pagsangyaw sa Ebanghelyo, ug mipadayon ibabaw kanila sa panginahanglan sa pag-angkon sa Espiritu, aron sila unta mosangyaw uban sa Espiritu Santo nga gipadala gikan sa langit; mag-amping sa pagsulti niadtong mga hilisgutan diin wala gitudlo og klaro diha sa pulong sa Dios, diin modala ngadto sa pagpamasin ug panag-away.”¹⁷

Pagka-Mayo 14, 1840, si Joseph Smith misulat gikan sa Nauvoo ngadto nila ni Elder Orson Hyde ug John E. Page, mipaingon sa misyon didto sa Balaang Yuta: “Ayaw og kasagmuyo mahitungod sa kadako sa buhat; lamang pagmapainubsanon ug matinud-anon, ug dayon makaingon ikaw, ‘Kinsa ba ikaw, O dako nga bukid! sa atubangan ni Zerobabel ikaw mahimong patag.’ [Tan-awa sa Zecarias 4:7.] Siya motuga kanimo og gahum, kaalam, kusog, ug salabutan, ug tanan nga kasarang nga gikinahanglan; samtang ang imong panghunahuna magkadugang, hangtud ikaw makatugkad sa yuta ug sa mga langit, moabut ngadto sa kahangturan, ug mamalandong sa halangdong mga buhat ni Jehovah sa tanan nilang matang ug kahimayaan.”¹⁸

Nangita kita og kahigayunan sa pagtudlo sa ebanghelyo ug sa paghatag og pagpamatuod sa iyang pagkatinuod.

Sa tinglarag niadtong 1832 si Joseph Smith mibiyahe uban ni Bishop Newel K. Whitney gikan sa Kirtland, Ohio, silangang Estados Unidos. Pagka Oktubre 13, ang Propeta misulat ngadto ni Emma Smith gikan sa Siyudad sa New York: “Sa dihang namalandong ako niining dakong Siyudad sama sa Nineveh nga wala makamatikod sa ilang tuong kamot gikan sa wala, oo, labaw pa kaysa duha ka gatus ka libo nga mga kalag, ang akong kasingkasing napuno sa kapuangod diha kanila, ug ako determinado sa pagpataas sa akong tingog niini nga Siyudad ug motugyan sa mga resulta uban sa Dios, kinsa naggunit sa tanang mga butang sa iyang mga kamot ug dili motugot og usa ka buhok sa atong mga ulo nga dili mamatikdan nga matagak sa yuta….

“Nakig-istoryahanay ako uban sa pipila ka tawo, nga makapahimuot, ug usa ka ambungan nga batan-ong lalaki gikan sa Jersey, kansang hitsura hilabihan ka ligdong. Miduol siya ug nakigtupad kanako ug nagsugod og pakig-istorya kanako mahitungod sa kolera, ug nahibaloan nga nasakit diay siya niini ug hapit gyud mamatay. Miingon siya nga gipalingkawas siya sa Ginoo tungod sa pipila ka maalamon nga katuyoan. Gipahimuslan nako kini ug nagsugod ang dugay nga pag-istoryahanay. Midawat siya sa akong panudlo ug dayag kaayong nalipay ug nasuod pag-ayo siya kanako. Nag-istoryahanay kami hangtud sa lawum na ang kagabhion ug nakahukom nga motapos sa pag-istoryahanay hangtud sa sunod adlaw. Apan tungod kay daghang buhatonon, nagpabilin siya hangtud ang barko molarga na ug kinahanglang mobiya. Miduol siya ug nanamilit kanako, ug nagbulag kami nga kontra gusto.”¹⁹

Ang asawa ni Newel K. Whitney, nga si Elizabeth Ann, mihinumdum sa biyahe sa iyang bana niadtong 1832 paingon sa silangang Estados Unidos kuyog ni Joseph Smith: “Ang akong bana mibiyahe kuyog ni Joseph ang Propeta, lahus sa daghang mga Siyudad sa Silangan, naghatag sa ilang pagpamatuod ug naninguha og mga pamaagi aron makatukod og Templo didto sa Kirtland, ug aron usab makapalit og yuta didto sa Missouri…. Miingon siya sa akong bana, ‘Kon mosalikway sila kanato maanaa kanila ang atong pagpamatuod, tungod kay atong isulat ug ibilin diha sa ilang mga pultahan ug sa mga akboanan.’ ”²⁰

Pagka 1834 si Joseph Smith misangyaw sa eskwelahan didto sa Pontiac, Michigan. Si Edward Stevenson anaa didto ug mihinumdum sa kasinatian: “Didto niadtong nataran sa eskwelahan nga ang duha ka Mormon nga mga Elder mipaila sa gipahiuli nga Ebanghelyo niadtong tuig 1833; ug pagka 1834 si Joseph Smith ang Propeta misangyaw uban sa hilabihang gahum ingon sa wala gayuy lain nga sukad nakasaksi niining ikanapulo ug siyam ka siglo…. Mahinumdum pa gayud ako pag-ayo og daghan sa mga pulong sa batang Propeta nga kadto gilitok uban sa kayano, apan uban sa usa ka gahum diin dili mapugngan sa tanan nga anaa….

“Uban sa gipataas nga kamot miingon siya: ‘Saksi ako nga adunay usa ka Dios, tungod kay ako nakakita Kaniya uban sa hayag nga adlaw, samtang nag-ampo sa hilum nga kakahoyan, sa tingpamulak niadtong 1820.’ Midugang pa siya sa pagpamatuod nga ang Dios, ang Mahangturong Amahan, nagtudlo ngadto sa laing personahe, nga susama Kaniya mismo, miingon: ‘Kini mao ang akong Hinigugmang Anak, paminaw Kaniya.’ O, pagkanindot sa mga pulong nga midulot sa akong tibuok kalawasan, ug mipuno kanako sa kalipay nga dili gayud mahulagway, sama ni apostol Pablo sa karaang panahon, nga maisugong mipamatuod nga siya nakasinati sa presensya ni Jesukristo!…

“… Sunod-sunod nga mga miting ang gipahigayon, diin ang Propeta niapil, ug ang nakanindot pa gayud kay diha ang tulo ka mga saksi sa Basahon ni Mormon. Sa iyang pagbisita niini nga branch ang Propeta mipamatuod nga gisugo siya nga mo-organisar og Simbahan sama sa sumbanan sa Simbahan nga gi-organisar ni Jesus, uban sa Napulog Duha ka mga Apostoles, Mga Seventy, mga Elder, mga gasa ug mga panalangin, uban sa timailhan nga mosunod, ingon sa makit-an nga gitala diha sa ikanapulog unom nga kapitulo sa Marcos…. ‘Isip sulugoon sa Dios,’ miingon si Joseph, ‘Ako mosaad kanimo, tungod kay kamo maghinulsol ug magpabunyag alang sa kapasayloan sa mga sala, kamo makadawat sa Espiritu Santo.’ ”²¹

Samtang gidala gikan sa Far West, Missouri, niadtong Nobyembre 1838, alang sa iyang pagkapriso didto sa Richmond, Missouri, ang Propeta mitudlo pag-usab sa ebanghelyo: “Gibisita kami sa pipila ka mga babaye ug mga lalaki. Usa sa mga babaye miduol, ug prangka kaayong nangutana sa mga tropa hain sa mga priso nga mao ang Ginoo nga gisimba sa mga ‘Mormons’? Usa sa gwardiya mitudlo ngari kanako uban sa dakong pahiyum, ug miingon, ‘Kini mao siya.’ Ang babaye milingi kanako nangutana kon ako moangkon ba nga mao ang Ginoo ug ang Manluluwas? Mitubag ko, nga ako miangkon sa akong pagka walay nada apan usa lamang ka tawo, ug usa ka ministro sa kaluwasan, gipadala ni Jesukrsito aron pagsangyaw sa Ebanghelyo.

“Kining tubaga misurprisa sa babaye nga siya nagsugod sa pagpangutana sa atong doktrina, ug akong gisangyaw ang usa ka pakigpulong, ngadto kaniya ug sa iyang mga kauban, ug sa natingalang mga sundalo, kinsa naminaw uban sa halos dili moginhawa nga atensyon samtang akong gihatag ang doktrina sa hugot nga pagtuo ni Jesukristo, ug paghinulsol, ug bunyag alang sa kapasayloan sa mga sala, uban sa saad sa Espiritu Santo, ingon nga gitala sa ikaduhang kapitulo sa Mga Buhat sa mga Apostoles [tan-awa sa Mga Buhat 2:38–39].

“Ang babaye natagbaw, ug midayeg sa Dios nga nadungog sa mga sundalo, unya milakaw, nag-ampo nga ang Dios manalipod ug moluwas kanamo.”²²

Si Dan Jones mihinumdum nga niadtong pagkagabii sa wala pa gi-martir ang Propeta didto sa Bilanggoan sa Carthage, nahitabo ang mosunod: “Si Joseph mihatag og gamhanan nga pagpamatuod sa mga gwardiya sa kabalaan ug katinuod sa Basahon ni Mormon, ang pagpahiuli sa Ebanghelyo, ang pagpangalagad sa mga anghel, ug nga ang gingharian sa Dios gi-establisar pag-usab sa ibabaw sa yuta, tungod niana siya gibalhog sa prisohan, ug dili tungod kay nakalapas siya og bisan unsang balaod sa Dios o sa tawo.”²³

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang mga pahina 397–99, hinumdumi ang mga paghago sa mga misyonaryo nga gi-organisar ubos sa direksyon ni Propeta Joseph Smith. Sa ubang paagi naimpluwensya ba kamo pinaagi sa buhat niadtong unang mga misyonaryo? Kon mao, sa unsang paagi?
Basaha ang paragrap nga nagsugod sa ubos sa pahina 399–400, ug hunahunaa ngano nga ang gugma mo-impluwensya kanato sa paagi nga ang Propeta mihulagway. Unsa ang pipila sa ubang mga kinaiya nga atong gikinahanglan aron mahimong epektibong mga misyonaryo? (Alang sa pipila ka mga ehemplo, tan-awa sa mga pahina 399–402.)
Ribyuha ang mga pulong ni Propeta Joseph Smith mahitungod sa mga misyonaryo kon unsa ang kinahanglang itudlo ug unsaon nila pagtudlo (mga pahina 400–04). Nganong kita gikinahanglan nga mosangyaw “sa unang mga baruganan” sa ebanghelyo? Unsa man kaha ang mga sangputanan sa pagpa-kiglalis sa uban sa hilisgutan sa relihiyon? Unsa ang inyong hunahuna ang gipasabut sa “himoa nga ang matag pulong makalukmay uban sa grasya” kon magsangyaw sa ebanghelyo?
Ribyuha ang tibuok ikaduhang paragrap sa pahina 402. Sa unsang mga paagi nga ang Espritu Santo migiya sa inyong mga paghago sa pagpaambit sa ebanghelyo? Nganong dili kita makasangyaw sa ebanghelyo kon wala ang Espiritu Santo?
Ribyuha ang mga kasinatian ni Joseph Smith nga giasoy pag-usab sa mga pahina 403–07. Unsa ang atong makat-unan mahitungod sa pagpaambit sa ebanghelyo gikan niini nga mga kasinatian?
Sa unsang mga paagi nga kita aktibong makapangita og mga kahigayunan sa pagpaambit sa ebanghelyo ngadto sa uban? Sa unsang paagi nga kita makaandam sa atong kaugalingon alang sa maong mga kahigayunan? Unsaon nato pagpaapil sa atong mga pamilya sa misyonaryo nga buhat?

May Kalabutan nga mga Kasulatan: Mateo 28:19–20; 2 Nephi 2:8; Alma 26:26–37; D&P 4:1–7; 31:3–5