Pasiuna

Ang First Presidency ug ang Korum sa Napulog Duha ka mga Apostoles mi-establisar sa han-ay sa Mga Pagtulun-an sa mga Presidente sa Simbahan aron sa pagtabang kanato nga madugangan ang atong nasabtan sa gipahiuli nga ebanghelyo ug makapaduol ngadto sa Ginoo pinaagi sa mga pagtulun-an sa mga Presidente sa Simbahan sa ulahing mga adlaw. Samtang ang Simbahan magdugang og mga libro niini nga serye, makakolekta kamo og pakisayran [reference] nga mga libro sa ebanghelyo sa inyong balay. Ang mga libro niini nga serye gihimo aron gamiton alang sa personal nga pagtuon ug alang sa instruksyon sa korum ug klase.

Kining libroha naghisgot sa mga pagtulun-an ni Propeta Joseph Smith, kinsa gitawag sa Dios sa pagbukas sa dispensasyon sa kahingpitan sa mga panahon niining ulahing mga adlaw. Taliwala sa iyang panan-awon sa Amahan ug sa Anak niadtong tingpamulak sa 1820 ug sa iyang pagkamartir niadtong Hunyo 1844, iyang gitukod Ang Simbahan ni Jesukristo sa mga Santos sa Ulahing mga Adlaw ug midala sa kahingpitan sa ebanghelyo, dili na gayud pagakuhaon gikan sa yuta.

Personal nga Pagtuon

Samtang kamo magtuon sa mga pagtulun-an ni Presidente Joseph Smith, tinguhaa ang inspirasyon sa Espiritu. Hinumdumi ang saad ni Nephi: “Kay siya nga sa makugihon nga paagi mangita makakaplag; ug ang mga misteryo sa Dios ipadayag ngadto kanila, pinaagi sa gahum sa Espiritu Santo” (1 Nephi 10:19). Sugdi ang inyong pagtuon pinaagi sa pag-ampo, ug padayon sa pag-ampo ug pagpamalandong diha sa inyong kasingkasing samtang kamo magbasa.

Sa katapusan sa matag hugna, inyong makita ang mga pangutana ug mga pakisayran sa kasulatan nga makatabang kaninyo sa pagsabut ug sa paggamit sa mga pagtulun-an ni Joseph Smith. Hunahunaa ang pagribyu niini sa dili pa kamo mobasa sa hugna.

Hunahunaa usab ang mosunod nga mga sugyot:

Pangitaa ang importante nga mga pulong ug hugpong sa mga pulong. Kon makakita kamo og pulong nga wala ninyo masabti, paggamit og diksyonaryo o laing libro aron mas masabtan ang kahulugan niini. Isulat sa daplin sa pahina aron sa pagtabang kaninyo nga mahinumdom unsay inyong nakat-unan mahitungod sa pulong.
Hunahunaa ang kahulugan sa mga pagtulun-an ni Joseph Smith. Mahimo ninyong markahan ang mga pulong ug pundok sa mga pulong nga nagtudlo og mga baruganan sa ebanghelyo o nakapatandog sa inyong hunahuna ug kasingkasing, o isulat ang inyong mga hunahuna ug mga pagbati diha sa daplin sa pahina.
Palandonga ang mga kasinatian nga inyong nasinati kalabut sa mga pagtulun-an sa Propeta.
Palandonga kon sa unsa nga paagi nga ang mga pagtulun-an ni Joseph Smith magamit ninyo. Hunahunaa kon sa unsa nga paagi nga ang mga pagtulun-an molambigit sa inyong mga kabalaka ug mga pangutana. Desisyoni kon unsay inyong buhaton isip resulta sa unsay inyong nakat-unan.

Mga Pagtulun-an gikan Niining Libroha

Kining libroha mahimong gamiton sa panimalay o sa simbahan. Ang mosunod nga mga sugyot makatabang kaninyo.

Pokus sa mga Pulong ni Joseph Smith ug sa mga Kasulatan

Ang Ginoo mimando nga kita motudlo og “walay lain nga mga butang gawas niana nga gisulat sa mga propeta ug sa mga apostoles, ug kana nga gitudlo kanila pinaagi sa Maghuhupay pinaagi sa pag-ampo diha sa hugot nga pagtuo” (D&P 52:9). Siya mipahayag usab nga ang “anciano, mga pari, ug mga magtutudlo niini nga simbahan magtudlo sa mga baruganan sa akong ebanghelyo, nga anaa sa Biblia ug sa Basahon ni Mormon, diin anaa ang kahingpitan sa ebanghelyo” (D&P 42:12)

Ang inyong buluhaton mao ang pagtabang sa uban nga makasabut sa mga pagtulun-an ni Propeta Joseph Smith ug sa mga kasulatan. Ayaw ibaliwala kining libroha o mag-andam og mga leksyon gikan sa laing mga materyal. Paggahin og taas-taas nga panahon sa leksyon sa pagbasa sa mga pagtulun-an ni Joseph Smith niining libroha ug sa paghisgot sa kahulugan ug kagamitan niini.

Awhaga ang mga partisipante sa pagdala niining libroha sa simbahan aron sila mas makaandam sa pag-apil sa mga panaghisgutan sa klase.

Tinguhaa ang Giya sa Espiritu Santo

Samtang kamo mag-ampo alang sa panabang ug magkugi sa pag-andam, ang Espiritu Santo mogiya sa inyong mga paningkamot. Motabang Siya nga inyong mapasabut og maayo ang mga bahin sa matag hugna nga makapaawhag sa uban nga makasabut ug mogamit sa ebanghelyo.

Kon kamo motudlo, pag-ampo sa inyong kasingkasing nga ang gahum sa Espiritu mag-uban sa inyong mga pulong ug sa mga panaghisgutan sa klase. Si Nephi miingon, “Kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan” (2 Nephi 33:1; tan-awa usab sa D&P 50:13–22).

Pag-andam sa Pagtudlo

Ang mga hugna niining libroha gi-organisar aron sa pagtabang kaninyo sa pag-andam sa pagtudlo. Ang seksyon nga “Gikan sa Kinabuhi ni Joseph Smith” sa matag hugna makahatag og impormasyon mahitungod sa kinabuhi ni Joseph Smith ug sa unang kasaysayan sa Simbahan nga mahimong magamit sa pagpaila ug pagtudlo sa leksyon. Ang seksyon sa “Mga Pagtulun-an ni Joseph Smith” gibahin ngadto sa daghang lain-lain nga seksyon [subsections], nga adunay mga ulohan nga naghatag og katingbanan [summarize] sa mahinungdanong mga punto sa hugna. Kini nga mga ulohan mahimong himoon nga latid [outline] diin kamo makatudlo. Ang katapusang seksyon, “Mga Sugyot alang sa Pagtuon ug Pagtudlo,” makahatag sa mga pangutana ug mga kasulatan nga may kalabutan sa mga pagtulun-an.

Mas epektibo kamo sa inyong pagtudlo kon inyong buhaton ang mosunod:

Tun-i ang hugna. Basaha ang hugna aron mahimong masaligon sa nasabtan sa mga pagtulun-an ni Joseph Smith. Kamo makatudlo nga adunay dako nga sinseridad ug gahum kon ang iyang mga pulong personal nga nakaimpluwensya kaninyo (tan-awa sa D&P 11:21). Samtang kamo magbasa, ibutang sa hunahuna ang mga panginahanglan niadtong inyong gitudloan. Mahimo ninyong markahan ang mga doktrina ug mga baruganan sa hugna nga sa inyong pamati makatabang kanila.
Desisyoni kon unsang mga bahin ang gamiton. Ang matag hugna naglakip og daghang ikatudlo kay sa inyong mahimong itudlo sa usa ka leksyon. Kay sa maningkamot nga hutdon sa pagtudlo ang tibuok hugna, pagmainampoon sa pagpili og mga doktrina ug mga baruganan nga inyong gibati nga labing makatabang niadtong inyong tudloan. Sama pananglit, kamo makapili sa paggamit sa usa o duha ka lain-lain nga mga seksyon ug pipila ka mga pangutana nga makatabang sa mga partisipante sa paghisgot sa mga baruganan sa mga seksyon nga inyong gipili.
Desisyoni kon unsaon sa pagpaila ang leksyon. Aron makabig ang interes sa sinugdanan sa leksyon, kamo mahimong mopakigbahin og personal nga kasinatian o mohangyo sa mga partisipante sa pagbasa og istorya sa sinugdanan sa leksyon o motan-aw og litrato sa hugna. Dayon kamo makapangutana, “Unsa ang gitudlo niini nga istorya (o litrato) mahitungod sa mahinungdanong hilisgutan sa hugna?” Laing mga kapilian sa pagsugod og leksyon naglakip sa pagbasa og usa ka kasulatan o usa ka kinutlo gikan sa kapitulo o pagkanta og himno. Laing makatabang nga ideya mao ang pagpahibalo sa mga partisipante unsa ang mahinungdanong punto sa leksyon. Mahimo usab nga inyong pahinumduman ang mga partisipante sa miaging leksyon gikan niining libroha pinaagi sa pagpangutana kanila sa paghinumdom sa mga hitabo, mga tawo, mga baruganan, o mga doktrina nga gihisgutan.
Desisyoni kon unsaon sa pag-awhag og panaghisgutan. Dinhi kinahanglan nga inyong igahin ang kadaghanan nga panahon sa leksyon tungod kay makat-on ang mga partisipante sa mga doktrina ug mga baruganan kon sila moapil sa paghisgot niini. Ribyuha ang mga sugyot sa pagpahigayon og makaayo nga mga panaghisgutan sa mga pahina xii–xiii niini nga libro. Mahimo ninyong gamiton ang mga pangutana gikan sa “Mga Sugyot alang sa Pagtuon ug Pagtudlo” sa katapusan sa hugna. Mahimo usab ninyong andamon ang inyong pipila ka mga pangutana ginamit ang mosunod nga mga sugyot:
- Gamit og pangutana nga makatabang sa mga partisipante nga mangita sa mga kamatuoran, mga hitabo, mga doktrina, ug mga baruganan. Kining matanga sa mga pangutana makatabang sa mga partisipante nga maghunahuna sa piho nga mga kamatuoran nga gusto ninyong ipasabut ug makasinati sa piho nga mga impormasyon sa mga pagtulun-an sa Propeta. Sama pananglit, human makakita og piho nga kinutlo, kamo mahimong mangutana, “Unsa ang mahinungdanon nga mga pulong o hugpong sa mga pulong niini nga kinutlo?” o “Unsa ang hilisgutan niini nga kinutlo?”
- Gamit og pangutana nga makatabang sa mga partisipante nga maghunahuna mahitungod sa tinuod nga mga doktrina ug mga baruganan nga gitudlo ni Joseph Smith. Kining matanga sa mga pangutana makapaawhag sa mga partisipante sa pagsusi ug pagpakigbahin sa ilang mga hunahuna ug mga pagbati mahitungod sa mga pagtulun-an ni Joseph Smith. Sama pananglit, “Ngano sa inyong hunahuna kini nga pagtulun- an importante?” o “Unsa ang inyong mga hunahuna o mga pagbati mahitungod niini nga kinutlo?” o “Unsa ang gipasabut niini nga pagtulun-an nganha kaninyo?”
- Gamit og pangutana nga makapaawhag sa mga partisipante sa pagtandi unsa ang ilang nakat-unan gikan sa mga pagtulun- an sa Propeta ngadto sa ilang kaugalingong mga hunahuna, mga pagbati, ug mga kasinatian. Sama pananglit, “Unsa nga mga kasinatian nga inyong nasinati nga may kalabutan sa unsay gisulti ni Propeta ni Joseph Smith?”
- Gamit og pangutana nga makatabang sa mga partisipante nga mogamit unsa ang gitudlo nganha sa ilang kaugalingong mga kinabuhi. Kini nga mga pangutana makatabang sa mga partisipante nga maghunahuna og mga paagi nga sila makasunod sa mga pagtulun-an ni Joseph Smith. Sama pananglit, “Unsa ang giawhag ni Joseph Smith nga atong buhaton? Sa unsa nga paagi nga kita makagamit sa unsay iyang gisulti?” Pahinumdumi ang mga partisipante nga dili lamang sila makat-on unsa ang gisulti, apan gikan usab sa pagpadayag nga alang kanila (tan-awa sa D&P 121:26).
Pagdesisyon unsaon sa pagtapos sa leksyon. Kamo makapili sa pag-summarize dayon sa leksyon o mohangyo og usa o duha ka mga partisipante sa pagbuhat sa ingon. Kon giaghat sa Espiritu, ipamatuod ang mga pagtulun-an nga inyong gihisgutan. Mahimo usab nga inyong dapiton ang uban sa pagpakigbahin sa ilang mga pagpamatuod. Awhaga kadtong inyong gitudloan sa pagsunod sa mga pag-aghat nga ilang nadawat gikan sa Espiritu Santo.

Samtang mag-andam kamo sa pagtudlo, mahimo kamong mangita og mga ideya diha sa Pagtudlo, Walay Labaw Ka Mahinugndanon nga Tawag (36123), bahin B, kapitulo 14, 16, 28, ug 29; o sa Sumbanan nga Basahon sa Pagtudlo (34595).

Pagpahigayon og Makaayo nga mga Panaghisgutan

Ang mosunod nga mga sugyot makatabang kaninyo sa pagawhag ug pagpahigayon og makaayo nga mga panaghisgutan:

Tinguhaa ang giya sa Espiritu Santo. Mahimong moaghat Siya kaninyo sa pagpangutana o sa paglakip sa tino nga mga tawo sa panaghisgutan.
Tabangi ang mga partisipante nga mopukos sa mga pagtulun-an ni Joseph Smith. Ipabasa nila ang iyang mga pulong aron masugdan ang panaghisgutan ug sa pagtubag og mga pangutana. Kon ang panaghisgutan magsugod sa pagpalayo sa hilisgutan o mahimong pangagpas o panaglalis, usba ang panaghisgutan pinaagi sa paghisgot pag-usab sa usa ka hitabo, doktrina, o baruganan nga anaa sa hugna.
Kon angay, ipakigbahin ang mga kasinatian nga may kalabutan sa mga pagtulun-an sa hugna.
Awhaga ang mga partisipante sa pagpakigbahin sa ilang mga hunahuna, sa pagpangutana, ug sa pagtudlo sa usag usa (tan-awa sa D&P 88:122). Sama pananglit, mahimo kamong mangutana kanila sa pagkomentaryo unsa ang gisulti sa uban, o itumong ang usa ka pangutana ngadto sa daghang mga partisipante.
Ayaw kahadlok sa kahilom human makapangutana. Sa kasagaran kadtong inyong gitudloan nagkinahanglan og panahon sa paghunahuna o sa pagtan-aw sa ilang mga libro sa dili pa sila mopakigbahin og mga ideya, mga pagpamatuod, ug mga kasinatian.
Paminaw sa sinsero, ug paningkamuti ang pagsabut sa mga komentaryo sa uban. Ipahayag ang pasalamat alang sa ilang pag-apil.
Kon ang mga partisipante mopakigbahin og daghang mga ideya, ilista ang mga ideya sa pisara o mohangyo og lain sa pagbuhat niini.
Pangita og laing mga paagi nga makaapil ang mga partisipante sa panaghisgutan. Sama pananglit, mahimo ninyong pahisgutan nila ang mga pangutana diha sa gamay nga grupo o sa tawo nga naglingkod sunod kanila.
Kontaka ang usa o duha ka mga partisipante og sayo. Hangyoa sila sa pag-anha sa klase nga andam sa pagtubag sa mga pangutana nga inyong giandam.
Gamit og usa ka himno, ilabi na ang usa ka himno sa Pagpahiuli, sa pagdugang sa panaghisgutan sa usa ka kamatuoran sa ebanghelyo. Ang pagkanta og himno epektibo usab nga paagi sa pagtudlo o pagtapos sa usa ka leksyon.
Ayaw tapusa ang maayo nga panaghisgutan tungod lang kay gusto ninyong hutdon ang tanang mga materyal nga inyong giandam. Unsa ang mas mahinungdanon mao nga ang mga partisipante mobati sa impluwensya sa Espiritu ug motubo sa ilang pasalig sa pagsunod sa ebanghelyo.

Mga Pagtulun-an alang sa Atong Panahon

Kining libroha naghisgot sa mga pagtulun-an ni Propeta Joseph Smith nga adunay kagamitan sa atong panahon. Sama pananglit, kining libroha wala maghisgot sa maong hilisgutan nga mga pagtulun- an sa Propeta mahitungod sa balaod sa pagpahinungod kabahin sa pagkatinugyanan sa kabtangan. Ang Ginoo mikuha niini nga balaod gikan sa Simbahan tungod kay ang mga Santos dili andam sa pagsunod niini (tan-awa sa D&P 119, ulohan sa seksyon). Kining libroha wala usab maghisgot sa dinaghan nga kaminyoon. Ang mga doktrina ug mga baruganan kalabut sa dinaghan nga kaminyoon gipadayag ngadto ni Joseph Smith niadtong sayo sa 1831. Ang Propeta mitudlo sa doktrina sa dinaghan nga kaminyoon, ug pipila sa maong mga kaminyoon gipahigayon panahon sa iyang tibuok kinabuhi. Sa misunod nga daghang mga dekada, ubos sa direksyon sa mga Presidente sa Simbahan kinsa mipuli ni Joseph Smith, ubayubay nga mga miyembro sa Simbahan misulod ngadto sa dinaghan nga mga kaminyoon. Niadtong 1890, si Presidente Wilford Woodruff miisyu og Manipisto, nga nakapahunong sa dinaghan nga kaminyoon sa Simbahan (tan-awa sa Opisyal nga Deklarasyon 1). Ang Simbahan ni Jesukristo sa mga Santos sa Ulahing mga Adlaw wala na maghimo og dinaghan nga kaminyoon.

Impormasyon mahitungod sa mga Tinubdan [sources] nga Gikutloan Niining Libroha

Ang mga pagtulun-an ni Propeta Joseph Smith nga gi-presentar niining libroha gikuha gikan sa daghang mga kategoriya sa tinubdan nga mga materyal: ang mga sermon sa Propeta, ang mga artikulo nga giandam alang sa pagmantala sa Propeta o ubos sa iyang direksyon, ang mga sulat ug mga journal sa Propeta, girekord nga mga rekoleksyon niadtong kinsa nakadungog sa Propeta nga namulong, ug sa ubang mga pagtulun-an ug mga sinulat sa Propeta nga sa wala madugay giapil diha sa mga kasulatan. Daghan sa mga pagtulun-an ni Joseph Smith gikutlo diha sa History of the Church. Alang sa dugang impormasyon mahitungod niini nga mga tinubdan, tan-awa sa apendiks.

Pipila ka wala mamantala nga mga tinubdan gikutlo niini nga libro. Ang spelling, ang punctuation, pag-capital, ug grammar gihimo nga sumbanan diin gikinahanglan aron mas mabasa kini. Ang pagkabahin sa paragrap giusab aron mas mabasa kini. Kon ang mga kinutlo nagagikan sa gimantala nga tinubdan nga mga materyal, ang mga tinubdan gikutlo nga walay kausaban, gawas kon gipahibalo. Ang tanang mga materyal nga anaa sa sulod sa eskwala nga mga bracket gidugang sa mga editor niining libroha, gawas kon gipahibalo.