Usa ka Listahan sa Magtutudlo

Pagtudlo Sumala sa Pamaagi sa Manluluwas uban ni Elder Uchtdorf

Elder Dieter F. Uchtdorf

Sa Korum sa Napulog Duha ka Apostoles

Hunyo 12, 2022

Ang Akong Paborito nga mga Katawhan!

Minahal kong mga kaigsoonan, akong mga minahal nga mga higala, pagkanindot nga higayon nga magkauban ug magtan-aw niining matahom nga video nga nagpakita nato kon giunsa sa mga miyembro sa Simbahan ug sa mga tawo sa kalibotan nga makatudlo sa matag edad, matag henerasyon diha sa pamaagi sa Manluluwas.

Nan, minahal kong kahigalaan, Ako mapasalamaton nga makauban sa akong paboritong katawhan: ang mga magtutudlo—sa nangagi, kasamtangan, ug sa umaabot! Gumikan kay ang tanan mga magtutudlo man sa usa ka paagi o sa lain, kinahanglan akong hunahunaon nga ang akong grupo sa paboritong mga tawo maabi-abihon. Ganahan ko sa mga magtutudlo. Ganahan ko nga maanaa sa ilang palibot. Ganahan ko ug utang kabubut-on ngadto sa akong mga magtutudlo diha sa akong kinabuhi.

Ang mga iskolar nanagtuon kon unsa ang gikinahanglan sa pagkahimong usa ka banggiitan nga magtutudlo sulod sa gatusan ka tuig ug dako kaayo ang pagsugyot, pagtuboy, ug pagmantala sa ilang mga teyoriya kon unsa ang makapahimo sa kasinatian sa pagkat-on nga magmalampuson.

Kitang tanan napanalanginan nga makat-on gikan sa labing bantugan nga magtutudlo sa tanang panahon, si Jesukristo. Sa daghang maanindot nga panghitabo sa milabayng duha ka libo ka tuig, dili ko motuo nga adunay milabay nga usa ka sigundo nga—sa usa ka dapit sa kalibotan—ang Iyang mga pagtulon-an wala gibahandi, gitun-an, gipamalandongan, gibalik-balik, ug gipanig-ingnan.

Ug dili ba kana ang tumong sa tanang magtutudlo? Aron makahimo og usa ka malungtaron nga kalainan alang sa kaayohan? Aron mapanalanginan ang mga kinabuhi sa uban sa usa ka paagi nga molabaw pa sa leksiyon o sa usa ka klasehanan?

Ug si Jesus sa Nazareth adunay eksakto nianang matang sa impluwensiya—diha sa nangagi, sa kasamtangan, ug sa umaabot. Busa si kinsa man ang mas angay natong ton-an? Kon kita magkat-on gikan Kaniya, kita molambo dili lang isip mga magtutudlo, dili igsapayan sa atong kahimtang sa kinabuhi, apan kita usab molambo og maayo isip mga katawhan.

Busa, akong prebiliheyo ug dungog sa pagpamulong kaninyo karon kabahin sa Manluluwas—tungod kay ang labing maayong paagi aron mahimong usa ka mas maayong magtutudlo mao ang pagkahimong mas maayo nga sumusunod ni Jesukristo.

Ang Kaimportante sa Preflight nga mga Pagsusi

Sa dihang usa pa ko ka piloto sa eroplano, sa matag higayon nga mopahimutang ko sa lingkoranan sa kapitan, aduna koy usa ka dakong tumong—ang pagdala sa akong kaugalingon, sa akong mga tripulante, ug mga pasahero nga luwas ngadto sa among distinasyon. Kini nga tumong gikinahanglan nga tutokan ug matngonan.

Aron mapatunhay kining pagtutok, ang mga piloto mopahigayon og sunod-sunod nga preflight nga mga pagsusi, i-ensayo ang mga luwas nga mga pamaagi ug sulayan ang pagtrabaho sa mga instrumento ug ang mekanikal nga kasarang. Matag butang diha sa listahan maoy butang nga gibuhat sa piloto sa gatosan (kon dili man liboan) ka higayon.

Ang usa ka batid nga piloto dili gayod moasumir nga tungod kay siya nakapalupad na sa gatosan ka higayon, dili na kinahanglan pa nga manumbaling sa preflight nga pagsusi o mohikutar niini panagsa.

Ang preflight nga pagsusi nagdisiplina sa mga piloto aron mapabilin ang ilang pagtutok diha sa mahinungdanon nga mga butang nga makapahimo sa paglupad nga malamposon.

Sama sa usa ka piloto adunay usa ka piho nga naggiya nga katuyoan, mao nga ingon usab kita isip mga magtutudlo sa Pulong: sa pagdala og mga kalag nga mas mapaduol ngadto kang Kristo. Sa higayon nga kita moatubang og usa ka oportunidad sa pagtudlo, kana nga tumong kinahanglan maoy una diha sa atong hunahuna.

Isip mga magtutudlo, kita aduna bay usa ka listahan aron sa pagtabang kanato nga matutokan ang atong sagradong tumong? Oo!

Pagtudlo sumala sa Pamaagi sa Manluluwas

Niining bulana, Ang Simbahan ni Jesukristo sa mga Santos sa Ulahing mga Adlaw momantala og usa ka giusab nga bersiyon sa Pagtudlo sumala sa Pamaagi sa Manluluwas. Kini mao ang usa ka giya alang sa tanang magtudlo sa ebanghelyo—sa panimalay ug sa Simbahan. Kini anaa sa 70 ka pinulongan diha sa Gospel Library app. Ang giimprinta nga mga kopya mosunod sa umaabot nga mga bulan.

Kini nga mga kapanguhaan gikuha diha sa kinabuhi ug mga pagtulon-an ni Jesukristo isip atong giya ug inspirasyon isip mga magtutudlo. Makatabang kini nato nga matutokan ang paagi nga Siya nagtudlo.

Ang Pagtudlo sumala sa Pamaagi sa Manluluwas motabang sa tanan nga nagtudlo. Makahatag kini og pagdasig ug instruksiyon alang sa mga ginikanan, mga silingan, mga tigpangalagad nga mga kaigsoonan, mga misyonaryo, ug sa tanang disipulo ni Jesukristo. Ang pagkadisipulo nagpasabot og pagmahal, pag-amuma, pagpanalangin, ug pagbayaw sa uban, ug kana nagpasabot og pagtudlo.

Sa laing pagkasulti, kon kamo naningkamot sa paghigugma ug pagserbisyo sama sa gibuhat ni Jesus, nan kamo mga magtutudlo, ug ang Pagtudlo Sumala sa Pamaagi sa Manluluwas alang ninyo ug nako. Manghinaot ko nga kini mahimong inyong bahandi, bag-o man kamo niining panaw o nagsubay na niini sulod sa daghang katuigan.

Diha sa ika-3 nga bahin sa Pagtudlo diha sumala sa Pamaagi sa Manluluwas, adunay pagtimbangtimbang sa kaugalingon—usa ka listahan sa flight, kon ganahan mo—makatabang kanato nga mahimong mas matutokan ang atong mga paningkamot sa pagtudlo. Kini mosangpot ngadto sa pagpamalandong, mobutyag sa dili makita, ug makaaghat og pagdasig mahitungod sa mga pamaagi nga kita molambo. Kini mahimong mapuslanon alang sa mga magtutudlo sama sa ang listahan sa flight maoy alang sa mga piloto.

Kon inyo akong tugotan nga makahigayon sa paglingkod tupad ninyo diha sa cockpit, ingnon ta lang, ganahan ko nga mohimo uban ninyo sa preflight nga pagsusi alang sa pagtudlo. Ako modapit kaninyo sa paggamit og usa ka simbolikanhong panig-ingnan ug mokonsiderar kon sa unsang paagi nga kamo motimbangtimbang sa inyong kaugalingon kabahin sa matag butang. Kini nga pagtimbangtimbang sa kaugalingon mahimong dakong panalangin—karon ug sa matag higayon nga kamo mag-andam sa pagtudlo sumala sa pamaagi sa Manluluwas.

Pagtutok kang Jesukristo

Ang unang butang anaa sa atong preflight nga pagsusi mao ang “Mo-focus diha ni Jesukristo.” Kini usa ka oportunidad sa pagpamalandong kon ang Manluluwas tinuod ba gayod nga anaa sa sentro sa atong pagtudlo. Palihog hunahunaa kini nga mga pangutana:

Nagtudlo ba ako kabahin ni Jesukristo bisan unsa man ang akong gitudlo?
Naghatag ba ako og gibug-aton sa ehemplo ni Jesukristo?
Nagtabang ba ako sa mga tinun-an sa pag-ila sa gugma, gahom, ug kalooy sa Ginoo diha sa ilang kinabuhi?
Nagtabang ba ako sa mga tinun-an nga tuyoon ang pagpaningkamot aron mas mahisama ni Jesukristo?

Kini mga tulugkaron nga mga pangutana!

Sa tinuod lang: Ang ebanghelyo halapad kaayo nga puwede mo mogahin sa tibuok kinabuhi sa pagtuon ug dili igo ang masabtan. Hunahunaa ang pagpintal og usa ka target nga sama ka taas ug halapad sa usa ka kilid sa higanting kahoy nga gambalay nga magrepresentar sa kalapad sa ebanghelyo.

Kitang tanan adunay atong paborito nga mga kinaham sa ebanghelyo—mga butang nga makapainteresado kanato. Mga panahon sa kasaysayan, mga programa sa Simbahan, mga hilisgotan sa doktrina, o binagsang bersikulo sa kasulatan. Ug kita tingali matintal sa pagfocus lang niining paboritong mga hilisgotan nga atong paborito.

Apan maingon man kadako ang gitarget sa pagtudlo sa ebanghelyo, ang bullseye—ang sentro sa target—dili gyod nato kalimtan ang pagfocus niini—gamay ra kini. Ug kini mao ang sentro nga nahatag nato dili ang komentaryo, dili sa opinyon, dili sa pakigdebate. Ang Manluluwas Mismo mihatag niini ngari kanato.

Unsa man kini?

Higugmaa ang Dios ug higugmaa ang uban.

Kana mao ang sentro.

Ang ubang mga butang mahimong makapainteresado kanato. Kini mahimong importante. Apan kini dili mao ang sentro.

Kini ang mga kaabag nga artista. Kini mao ang mga pakapin sa atong mga menu, ang mga abobot sa atong pagkaon. Kini ang mas makapainteresado o pagkadaiya, ug daghang mga bitamina tingali, apan dili kini mao ang nag-unang butang.

Nan, unsa man ang atong tumong, diha sa pagtudlo?

Ang atong tumong mao ang pagtabang niadtong atong gitudloan aron mas mapaduol ngadto ni Kristo, molambo diha sa ilang kahibalo ug gugma sa Dios, ug moserbisyo sa Dios pinaagi sa pagtabang agi og kalooy ngadto sa tanan Niyang mga anak.

Kana mao ang sentro.

Ug asa man kita makakita sa atong labing dakong ehemplo sa paghigugma sa Dios ug sa uban?

Sa kinabuhi ug sa pagtulun-an sa atong Manluluwas ug Manunubos.

Samtang kita modala og mga kalag ngadto ni Kristo, kita motabang nila nga molambo ang ilang hugot nga pagtuo ug gugma sa Dios. Ug kita motabang kanila nga molambo diha sa ilang kalooy ug gugma alang sa uban.

Sa higayon nga kita matintal sa pagtipas ug mabalda pinaagi sa uban nga mga hilisgotan nga daw makapainteresado nato, mangutana sa atong kaugalingon:

“Nag-focus ba ako diha sa Manluluwas, bisan unsa pa ang akong gitudlo?”

“Ang ako bang gitudlo nakatabang ba sa uban nga molambo ug ipakita kana nga gugma sa paghigugma ug pagserbisyo, ug sa paggamit sa pagtulun-an sa Manluluwas sa atong kinabuhi?”

Isip mga magtutudlo, kita mahimong mamulong uban sa mga pinulongan sa mga anghel; kita mahimong molingaw, molipay, mopahimuot, ug mopahingangha. Apan kon kita napakyas diha sa pagpabilin sa atong pag-focus diha ni Jesukristo, wala nato maigo ang tumong¹ ug ang atong pagtulon-an mahimong anino lang sa unsay angay.

Kanunaya ang pag-focus diha sa atong Manluluwas ug Manunubos, si Jesukristo.

Higugmaa Kadtong Inyong Gitudloan

Ang ikaduha nga kategoriya nga listahan mao ang “Higugmaa Kadtong Inyong Gitudloan.” Kini nga listahan nga kategoriya makatugot kanato sa pagpamalandong sa atong kaugalingong motibo isip mga magtutudlo, ug kini nagpahinumdom kanato sa pagpabilin sa atong mga kasingkasing nga masentro diha sa paghigugma ug paghatag og bili niadtong atong gitudloan. Ania ang pipila ka pangutana nga ikonsiderar:

Naningkamot ba ako nga motan-aw sa mga tinun-an sama sa pagtan-aw sa Manluluwas kanila?
Nagtinguha ba ako nga makaila niadtong akong gitudloan—aron makasabot sa ilang mga kahimtang, mga panginahanglan, ug mga kalig-on?
Nag-ampo ba ako alang sa mga tinun-an gamit ilang ngalan?
Naghimo ba ako og luwas nga palibot diin ang tanan gitahod ug nahibalo nga ang ilang mga ikatampo gihatagan og bili?
Nangita ba ako og tukma nga paagi sa pagpahayag sa akong gugma?

Nakadungog ko mahitungod sa usa ka babaye kinsa usa ka hanas nga magtutudlo sa high school. Siya migahin og mga katuigan sa pagpalambo sa iyang pamaagi sa pagtudlo ug nakatampo og dako ngadto sa mga kinabuhi sa high school nga mga estudyante. Siya nasayod kon unsaon ang hingpit nga pagdala niini nga mga pangedaron.

Usa ka tuig, siya miapil sa usa ka summer nga programa sa eskwelahan diin siya nagtudlo og mas bata mas lahi nga mga estudyante bisan singko anyos nga mga bata. Siyempre, ang mga bata mahinamon ug puno sa kadasig samtang misulod ngadto sa klasehanan. Saba sila ug nagkinataw-anay, nagsinggit-singgit, nagdagan-dagan libot sa mga lingkoranan, ug nagginukdanay. Kini nga magtutudlo, aron mapahiluna ang klase, migamit sa iyang “tingog sa maestra” nga sayod siya nga magsilbi sa mga high school aron sila mopuyo ug manglingkod. Apan unsa ang nahitabo?

Ang kahilom milukop sa klasehanan. Ang mga bata mihunong diha-diha dayon sa ilang gibuhat ug, misiga ang mga mata, nagdali-dali sa pagpanglingkod. Ang tanan gawas sa duha.

Ang unang bata, usa ka gamay nga batang babaye, miyaka sa salog ug dayon misugod sa paghilak. Bisan og ang magtutudlo wala mobati og bisan gamay nga kasuko ngadto kaniya, ang batang babaye mibati nga nakahimo gyod siya og daotan kaayo ug misugod sa paghilak.

Ang ikaduha nga bata, usa ka gamayng batang lalaki, apan kusgan, mitan-aw sa magtutudlo nga dunay kahadlok ug mikalit og dagan sa pultahan, diin nawala lang siya diha sa hawanan nga kalit kaayo. Naghunahuna ang magtutudlo kon mobalik pa ba kaha siya.

Nianang adlawa, ang magtutudlo nakakat-on og usa ka importanteng leksiyon: ang tiknik nga iyang gigamit sa mga tinedyer dili magsilbi sa mga bata.

Ug mao kana ang leksiyon alang usab ninyo ug nako, usab.

Ang matag tawo nga atong gitudloan anak sa Dios, ug adunay personalidad.

Ato ba silang gitan-aw sama sa paagi nga ang Langitnong Amahan nagtan-aw kanila—isip lahi nga mga indibidwal nga adunay kaugalingong mga hunahuna, mga pagbati, mga pagsulay, ug mga panglimbasog? Naghimo ba kita og usa ka luwas nga kalikopan sa pagkat-on—usa ka dapit diin ang matag tawo mobati nga luwas ug gidawat?

Bisan unsa pa ang atong lumad nga pinulongan, ang ato bang mga estudyante nasayod nga kita namulong sa tibuok kalibotan nga pinulongan sa gugma? Nga kita mihatag og bili kanila, nga kita adunay kalooy nila ug nga kita mitahod nila?

Ang Manluluwas migahin og dako sa Iyang panahon uban sa sinalikway ug gibaliwala sa katilingban.

Siya mahimong makalektyor ug makahimaraot kanila. Hinoon, Siya mihangop, miayo, ug mihupay kanila.

Oo, Siya mitudlo kanila sa pag-ingon “Lakaw og ayaw na pagpakasala.”² Apan ngadto sa masakiton, sa mga makasasala, ug sa may kakulangan, Siya namulong ug mibuhat tungod sa gugma, kalooy, ug pagtahod.

Siya nagtan-aw sa matag usa kanato isip mga anak nga lalaki ug anak nga mga babaye sa Dios—dili ubos Kaniya, apan uban sa mahangturon nga potensiyal aron molakaw uban Kaniya diha sa himaya.

Ang bantogan nga Kristiyanong manunulat si C. S. Lewis mipalanog niining panglantaw sa dihang siya mitudlo, “Seryoso kining butang nga mopuyo sa katilingban sa posibleng mga dios ug mga diosa, nga mahinumdom nga ang bati kaayo ug walay lami ikasulti nga tawo usa ka adlaw niana mahimong usa ka linalang diin, kon imong makita karon, matintal gayud ikaw sa pagsimba.” Ug siya mipadayon, “Walay ordinaryo nga mga tawo. Kamo wala gayod nakaistorya og usa ka yanong mga mortal. … mga imortal kining atong gipasiawan, gikauban sa trabaho, giminyoan, giyam-iran, ug gigamit — imortal… walay katapusang katahom.”³

Kon kita motratar sa uban gamit niining matang sa pagtahod, atong gipakita ang ehemplo ni Jesukristo. Sama nga Siya mihigugma, kita mohigugma. Sama nga Siya mibayaw, kita mobayaw. Sama nga siya mitudlo, kita motudlo.

Karon, Atong hinumdoman ang paghigugma, pagtahod, ug pagbayaw niadtong atong gitudloan.

Pagtudlo pinaagi sa Espiritu

Ang ikatulo nga kategoriya nga listahan mao ang “Pagtudlo pinaagi sa Espiritu” Palihog hunahunaa kini nga mga pangutana:

Nangandam ba ako sa espirituhanon nga paagi sa pagtudlo?
Nagtubag ba ako sa espirituhanong mga pag-aghat bahin sa mga panginahanglan sa mga tinun-an?
Naghimo ba ako og mga sitwasyon ug mga oportunidad alang sa mga tinun-an nga matudloan pinaagi sa Espiritu Santo?
Nitabang ba ako sa mga tinun-an nga tinguhaon, ilhon, ug lihokon ang personal nga pagpadayag?
Nagpamatuod ba ako kanunay ug nag-awhag sa mga tinun-an sa pagbuhat sa samang butang?

Akong gipaningkamotan sa pagpahinumdom ang akong kaugalingon kanunay nga sa tanan nakong mga paningkamot sa pagtudlo sa ebanghelyo ug pagdala sa mga tawo ngadto ni Jesukristo, Ako dili makakabig ni bisan kinsa.

Ang Espiritu Santo lang ang makahimo niana.

Kita makapamulong sa mga pulong, apan ang pagkabig usa ka butang sa Espiritu. Mahitabo kini kon ang Espiritu Santo motandog sa kasingkasing ug ang usa ka tawo motubag ngadto sa Iyang impluwensiya pinaagi sa pagsunod sa Manluluwas.

Kon, tungod sa pag-agni sa mga pulong o maayong pagkarason sa mga argumento, ang usa ka tawo “nakombinser” sa pagsunod ni Jesukristo, kana nga pagtuo mahimong sama ka lumalabay sa liso nga nahulog diha sa batoon nga mga dapit.⁴

Ang atong trabaho dili ang pagkabig. Dili kana ang atong responsibilidad.

Apan unsa man ang atong trabaho? Ang pagtudlo sa maayo nga balita ni Jesukristo ug sa Iyang ebanghelyo nga napahiuli sa atong panahon! Ug kini atong trabaho ang pagmatuod ug pagsuporta sa atong mga pulong uban sa atong matinuoron ug sinsero nga mga buhat! Sa atong kinabuhi, giunsa nato sa pagpakabuhi ug paglihok.

Kon adunay tawo nga motubag ngadto sa unsay atong gitudlo tali kini kanila ug sa Dios. Apan kita mahimong taytayan nga mosumpay kanila uban sa Espiritu Santo. Kita mahimong bintana diin ang Espiritu Santo mosulod ngadto sa ilang mga kinabuhi. Ang atong mga pulong ug ang atong mga aksiyon makatudlo sa doktrina ni Kristo sa paagi nga makatabang sa mga estudyante nga makasinati sa pagsulod sa Espiritu Santo.

Sama sa gitudlo ni Elder Dallin H. Oaks kaniadto, “Ang pagtuon ug rason makakita sa kamatuoran, … apan ang pagpadayag lamang ang makakompirmar niini.”⁵

Balikon ko kana nga hugpulong: “Ang pagtuon ug rason makakita sa kamatuoran, … apan ang pagpadayag lamang ang makakompirmar niini.”

Dunay higayon nga kita daw gidaman lang sa kinabuhi. Kita makakita sa mga butang apan talagsa ra kaayong mohinumdom niini. Ang mga pahinumdom, mga kinutlo sa Pinterest, bisan mga timailhan sa kadalanan. Kadaghanan niini mahanaw ra sa atong mga hunahuna nga walay pagtuhop ngadto sa kasingkasing.

Apan kon ang Balaang Espiritu mamulong ngadto sa inyong kalag sa akong kalag, kamo ug ako dili makalimot niini, tungod kay kini mousab kanato. Hinumdomi unsa ang gisulti ni Joseph Smith human sa pagbasa sa Santiago 1:5: “wala pay bisan unsa nga tudling sa kasulatan nga mituhop uban sa labaw nga gahom ngadto sa kasingkasing sa tawo kay sa nahimo niini nga panahon ngari kanako.”⁶

Ang Espiritu makadala og ordinaryo nga hunahuna nga ipamulong sa usa ka ordinaryo nga paagi ug mohimo niini nga mosilaob sama sa kalayo.

Laing pagkabig sa tawo mao ang dili pagdepende sa atong pagkalarino o kamaayo sa kasulatan. Wala kini nagdepende kon unsa kita kamaayong motudlo o modepensa sa doktrina. Wala kini nagdepende sa atong kalantip, karisma, o kamaayo sa pinulongan.

Ang kinahanglan lang natong buhaton mao ang pagkahibalo alang sa atong kaugalingon. Dayon ang atong Langitnong Amahan modapit kanato sa “pagbukas sa [atong] [mga] baba sa tanang higayon, mosangyaw sa [Iyang] ebanghelyo uban sa tingog sa pagmaya.”⁷ Kon kita mobuhat niana, ang Balaang Espiritu mopamatuod sa kamatuoran.

Kita dili kinahanglan nga “mahimong” bisan unsang labaw o minus pa kay sa kinsa kita, mga anak sa Dios ug mga sumusunod ni Jesukristo.

Makahimo ba kamo nga may pagmaya, nga mopadayag sa inyong gugma alang sa Manluluwas, sa Iyang ebanghelyo, ug sa Iyang Simbahan?

Kon atong buhaton ang atong bahin, ang Ginoo mobuhat sa Iyaha. Kana mao ang paagi nga kita “motudlo pinaagi sa Espiritu.”

Itudlo ang Doktrina

Ang ikaupat nga butang sa atong preflight nga listahan mao ang “Motudlo sa Doktrina”—dili lang bisan unsa nga doktrina, siyempre, apan ang doktrina nga nadawat ni Jesukristo gikan sa Iyang Amahan. Ang Manluluwas nag-ingon: “Ang gitudlo ko dili akong kaugalingon, kondili iya sa nagpadala kanako.”⁸ Sa pagtimbangtimbang kon unsa ka maayo ang imong pagsunod sa Iyang ehemplo, ikonsiderar kini nga mga pangutana:

Nagkat-on ba ko sa doktrina alang sa akong kaugalingon?
Nagtudlo ba ko gikan sa mga kasulatan ug sa mga pulong sa mga propeta sa ulahing mga adlaw?
Nagtabang ba ko sa mga tinun-an sa pagtinguha, pag-ila, ug pagsabot sa mga kamatuoran diha sa mga kasulatan?
Nagtutok ba ko sa mga kamatuoran nga mosangpot ngadto sa pagkakabig ug makapalig-on sa hugot nga pagtuo diha ni Jesukristo?
Nagtabang ba ko sa mga tinun-an sa pagkaplag og personal nga kamahinungdanon sa doktrina?

Sa atong dispensasyon ang Ginoo nag-ingon: “Ako mohatag nganha kaninyo og usa ka sugo nga kamo motudlo sa usag usa sa doktrina sa gingharian. Pagtudlo kamo nga makugihon ug ang akong grasya mouban kaninyo.”⁹

Unsa ang doktrina nga atong itudlo?

Kini mao ang pulong nga mogawas gikan sa balaan nga mga kasulatan ug sa mga baba sa apostoles ug mga propeta. Sila kinsa adunay katungod ug awtoridad sa pagpasabot ug paghatag og katin-awan sa doktrina. Ug pinaagi kanila nga ang Dios kanunay mamahayag sa Iyang pulong, maghatag og giya ug salabotan ngadto sa Iyang mga anak.

Ang sentro ug makaluwas nga doktrina sa Ang Simbahan ni Jesukristo sa mga Santos sa Ulahing mga Adlaw mao nga si Jesukristo mao ang Manluluwas ug Manunubos sa tanan. Ang Apostol nga si Pablo, nga nakakita ug nakaistorya sa nabanhaw nga Manluluwas misulat ngadto sa Mga Taga-Corinto, “pahinumdoman ko kamo sa Maayong Balita nga giwali ko kaninyo … kini mao nga si [Jesus ang Kristo] namatay alang sa atong mga sala … Gilubong siya ug sa ikatulo ka adlaw gibanhaw… ug nagpakita siya kang Cefas ug unya ngadto sa napulog duha ka mga apostoles.”¹⁰

Kita gimandoan nga “bisan kinsa ang motinguha nga mosagop diha sa pulong sa Dios, diin buhi ug gamhanan … ug [mo] dala sa tawo ni Kristo diha sa higpit ug pig-ot nga agianan … ug magpahimutang sa ilang mga kalag, oo, ang ilang mga imortal nga mga kalag sa tuo nga kamot sa Dios sa gingharian sa langit.”¹¹

Isip mga magtutudlo, kita kinahanglan gayod nga dili maulaw sa ebanghelyo ni Jesukristo.¹² Hinoon, kita kinahanglan gayod nga malipayong mopasaka sa atong mga tingog sa pagtudlo sa Iyang doktrina bisan kon kini ingon og usa ka babag ngadto sa pipila ug binuang ngadto sa uban.¹³ “Kay kini mao ang gahom sa Dios aron pagluwas sa tanan nga motuo.”¹⁴

Pagdapit og Makugihon nga Pagkat-on

Ang kataposan nga butang sa atong preflight nga listahan mao ang “Pagdapit og Makugihon nga Pagtuon” Kini nga butang usa ka pahinumdom nga ang makugihon nga pagtudlo nga atong buhaton mao lang ang katunga nga bahin sa atong tahas. Ang laing katunga—sa kadugayan, tingali mas importante kay sa katunga—mao ang pagkugi sa pagkat-on nga buhaton sa atong mga estudyante. Ania ang pipila ka mga pangutana aron makatabang kanato sa pagtimbangtimbang sa atong makugihon nga pagtudlo nga mosangpot ngadto sa makugihon nga pagkat-on:

Nagtabang ba ako sa mga tinun-an nga maako ang responsibilidad sa ilang pagkat-on?
Nag-awhag ba ako sa mga estudyante sa pagtuon sa mga kasulatan kada adlaw?
Nag-awhag ba ako sa mga tinun-an sa pagpakigbahin sa mga kamatuoran nga ilang nakat-onan?
Nagdapit ba ako sa mga tinun-an nga puy-an ang ilang mga nakat-onan?

Ang atong mga espiritu nagkinahanglan og makanunayon nga pag-amoma aron kita mahimong mga binuhat sa kahayag ug himaya diin ang Dios milalang kanato aron kita mahimo. Kon kita magtuon ug mamalandong sa mga pulong sa mga propeta sa Dios, kita moinom sa buhi nga tubig ug magbusog sa pulong ni Kristo.

Dili igo nga basta lang makabasa sa mga pulong. Kita kinahanglan mopatalinghog niini; kita kinahanglan mamalandong ug mosabot niini.¹⁵

Sa pag-usab sa panultihon, “Tudloi ang usa ka tawo sa ebanghelyo ug ikaw mipanalangin kaniya sulod sa usa ka adlaw. Tudloi ang usa ka tawo sa pagbusog sa pulong sa Dios ug pagkonektar sa Balaang Espiritu, ug ikaw mopanalangin kaniya sa tibuok nga kinabuhi.”

Pinaagi niining proseso sa pagdasig ug personal nga pagpadayag nga kita motukod sa atong mga kinabuhi diha sa bato sa atong Manunubos.¹⁶ Mao kini ang higayon nga ang ebanghelyo ni Jesukristo mahimong “kinabuhi sa kalag.”¹⁷

Ang pagtudlo sa ebanghelyo importante. Ang pagtudlo sa uban sa pagsubsob sa ilang kaugalingon diha sa pag-ampo, pagtinguha sa Espiritu, ug paggamit sa unsay ilang nakat-onan sama ra kaimportante.

Saad ug Panalangin

Minahal kong mga kaigsoonan, minahal nga kahigalaan, minahal ug bililhon nga mga magtutudlo—ug kamong tanang magtutudlo;—salamat sa inyong kamatinud-anon ug sa inyong mga tinguha sa pagbuhat og maayo. Salamat alang sa daghang mga oras nga inyong gigahin sa pagpangandam, pagpangalagad, ug pagtudlo sa uban mahitungod sa ebanghelyo nga malipayon.

Dapiton ko kamo sa pagtuon sa bag-ong giya Pagtudlo sumala sa Pamaagi sa Manluluwas ug gamita ang pagtimbangtimbang sa kaugalingon aron mahinumdom kamo sa inyong katuyoan.

Pinaagi sa paghupot sa pulong sa Dios ug sa pagtudlo sa uban sa pagbuhat sa samang butang—pinaagi sa pagtudlo sumala sa pamaagi sa Manluluwas—kita mopakita sa atong gugma sa Dios ug sa atong isig ka tawo. Ug samtang kita molakaw nianang tul-id og pig-ot nga dalan, kita moapil nianang labing balaan nga tawag nga mogiya sa atong imortal nga mga kalag ug sa mga kalag sa uban ngadto sa “tuo nga kamot sa Dios sa Gingharian sa langit, aron sa paglingkod uban kang Abraham, ug kang Isaac, ug uban kang Jacob, ug uban sa atong tanan nga balaan nga mga amahan, sa dili na pagbiya.”¹⁸

Hinaot ang Dios mopanalangin kaninyo, akong isig ka magtutudlo, minahal kong kahigalaan, akong isig ka sulugoon, alang sa inyong sinsero nga mga paghago sa pagtudlo sa ngalan sa Manluluwas. Diha sa balaan nga ngalan sa bantugang magtutudlo sa tanang panahon, diha sa ngalan sa atong Agalon, ug sa ngalan ni Jesus ang Kristo, amen.