Kinatibuk-ang Komperensiya
Ang Tubag sa Kanunay Mao si Jesukristo
Abril 2023 nga kinatibuk-ang komperensiya

Ang Tubag sa Kanunay Mao si Jesukristo

Ni Presidente Russell M. Nelson

Presidente sa Ang Simbahan ni Jesukristo sa mga Santos sa Ulahing mga Adlaw

Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo.

Akong minahal nga kaigsoonan, kita gipakaon sa espirituhanon nga paagi niining kataposang duha ka adlaw. Ang choir nindot kaayo. Kadtong namulong nahimong mga instrumento sa Ginoo. Ako nag-ampo nga kamo magtinguha alang sa paggiya sa Espiritu Santo kaninyo diha sa inyong pagtuon samtang kamo maghinuklog sa mga kamatuoran nga gitudlo gikan sa pulpito. Sa pagkatinuod lang kini gikan sa langit.

Usa ka semana gikan karon mao na ang Dominggo sa Pagkabanhaw. Kini mao ang labing importante nga relehiyoso nga kasaulogan alang sa mga sumusunod ni Jesukristo. Ang nag-unang rason nga kita magsaulog sa Pasko tungod sa Pasko sa Pagkabanhaw. Ang Dali, Sunod Kanako nga leksiyon karong semanaha mag-aghat kaninyo sa pagtuon sa madaugon nga pagsulod ni Jesukristo ngadto sa Jerusalem, Iyang paglimpyo sa templo, Iyang pag-antos sa Tanaman sa Getsemani, Iyang Paglansang, Iyang mahimayaon nga Pagkabanhaw, ug Iyang mosunod nga mga pagpakita ngadto sa Iyang nga sumusunod.1

Tagamtama kining sagrado nga mga bersikulo ug pangita og paagi nga kamo makapasalamat sa atong Langitnong Amahan tungod sa pagpadala sa Iyang Bugtong nga Anak.2 Tungod ni Jesukristo, kita makahinulsol ug mapasaylo sa atong mga sala. Tungod Kaniya, ang matag usa kanato mabanhaw.

Ako modapit usab kaninyo sa pagtuon og balik sa asoy sa pagpakita sa Manluluwas ngadto sa mga Nephite sa Amerika, sama sa gisulat diha sa 3 Nephi. Dili pa dugay sa wala pa kadtong pagpakita, ang Iyang tingog nadunggan sa katawhan, lakip niini nga mga pulong sa pagpangliyupo:

“Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?

“… Tan-awa, ang akong bukton sa kalooy gitunol nganha kaninyo, ug kinsa kadto nga moduol Ako modawat kaniya.”3

Minahal nga kaigsoonan, si Jesukristo mitanyag sa sama nga pagdapit nganha kaninyo karon. Ako mohangyo kaninyo sa pagduol ngadto Kaniya aron Siya makaayo kaninyo! Siya moayo kaninyo gikan sa sala samtang kamo naghinulsol. Siya moayo kaninyo gikan sa kaguol ug kahadlok. Siya moayo kaninyo gikan sa mga pag-antos dinhi niini nga kalibotan.

Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo. Pagkat-on pa og dugang bahin sa Iyang Pag-ula, sa Iyang gugma, sa Iyang kalooy, sa Iyang doktrina, ug sa Iyang gipahiuli nga ebanghelyo bahin sa pagkaayo ug paglambo. Dangop ngadto Kaniya! Sunod Kaniya!

Si Jesukristo mao ang rason nga kita nagtukod og mga templo. Ang matag usa Iyang balaan nga balay. Ang paghimo og mga pakigsaad ug pagdawat sa gikinahanglan nga mga ordinansa diha sa templo, ingon man ang pagtinguha sa pagpaduol ngadto Kaniya didto, makapanalangin sa inyong kinabuhi sa mga paagi nga walay bisan unsa nga matang sa pagsimba ang makahimo. Tungod niini nga rason, among gibuhat ang tanan namong mahimo aron sa paghimo sa mga panalangin sa templo nga mas sayon ngadto sa atong mga miyembro sa tibuok kalibotan. Karon, ako mapasalamaton nga mopahibalo sa among mga plano sa pagtukod og bag-o nga mga templo sa matag usa niining mosunod nga mga dapit:

  • Retalhuleu, Guatemala

  • Iquitos, Peru

  • Teresina, Brazil

  • Natal, Brazil

  • Tuguegarao City, Philippines

  • Iloilo, Philippines

  • Jakarta, Indonesia

  • Hamburg, Germany

  • Lethbridge, Alberta, Canada

  • San Jose, California

  • Bakersfield, California

  • Springfield, Missouri

  • Charlotte, North Carolina

  • Winchester, Virginia

  • Harrisburg, Pennsylvania

Akong minahal nga mga kaigsoonan, ako mopamatuod nga si Jesukristo nagdumala sa mga kalihokan sa Iyang Simbahan. Ako mopamatuod nga ang pagsunod Kaniya mao lamang ang nag-inusara nga paagi ngadto sa malahutayon nga kalipay. Ako nasayod nga ang iyang gahom modagayday ngadto sa Iyang naghupot sa pakigsaad nga katawhan, kinsa “gisangkapan sa katarong ug uban sa gahom sa Dios sa dako nga himaya.”4 Ako mopamatuod, uban sa akong gugma ug panalangin sa matag usa kaninyo, sa sagradong ngalan ni Jesukristo, amen.