Si Jesukristo Mao ang Kalig-on sa mga Ginikanan

Ni Elder Dieter F. Uchtdorf

Sa Korum sa Napulog Duha ka Apostoles

Tabangi ang inyong mga anak sa pag-ugmad og hugot nga pagtuo diha ni Jesukristo, sa paghigugma sa Iyang ebanghelyo ug sa Iyang Simbahan, ug sa pag-andam alang sa tibuok kinabuhi nga matarong nga mga pagpili.

Usa ka higayon kaniadto, ang usa ka amahan padulong nang mobiya alang sa gabii nga miting sa bishopric. Ang iyang kuwatro anyos nga anak nga babaye miali sa iyang atubangan, nagsul-ob og padyama ug naggunit og kopya sa Mga Sugilanon sa Basahon ni Mormon.

“Nganong moadto man ka sa imong miting?” siya nangutana.

“Kay magtatambag man ko sa bishopric,” siya mitubag.

“Pero papa man ka nako!” protesta sa iyang anak nga babaye.

Miluhod siya atubangan sa iyang anak. “Palangga,” siya miingon, “Kahibalo ko nga gusto nimo nga ako mobasa nimo ug motabang nimo aron makatulog, apan karong gabhiona kinahanglan nga akong tabangan ang bishop.”

Ang iyang anak nga babaye mitubag, “Di ba ang bishop may papa man nga motabang niya aron makatulog?”

Kami mahangtorong nagpasalamat sa dili maihap nga mga miyembro nga makugihong nagserbisyo sa Simbahan ni Jesukristo matag adlaw. Ang inyong sakripisyo sagrado gayod.

Apan sama sa nasabtan niining batang babaye, adunay butang nga sama ka sagrado—butang nga dili mapulihan—mahitungod sa usa ka ginikanan nga nag-amuma sa usa ka anak. Kini nagpakita sa sumbanan sa langit.¹ Ang atong Amahan sa Langit, atong Balaanong Ginikanan, malipay gayod kon ang Iyang mga anak matudloan ug maamumahan sa ilang mga ginikanan dinhi sa yuta.²

Mga ginikanan, salamat sa tanan nga inyong gihimo sa pag-atiman sa inyong mga anak. Ug mga anak, salamat sa tanan nga inyong gihimo sa pag-atiman sa inyong mga ginikanan, tungod kay sama sa nahibaloan sa matag ginikanan, kita sa kasagaran makakat-on og daghan gikan sa atong mga anak mahitungod sa hugot nga pagtuo, paglaom, ug gugmang putli ingon nga sila nakakat-on gikan kanato!³

[Ang] mga Ginikanan Adunay Sagrado nga Katungdanan

Nakahunahuna ba kamo mahitungod sa hilabihan ka risgo nga gihimo sa atong Langitnong Amahan sa matag higayon nga Siya mopadala og usa ka anak nganhi sa yuta? Kini Iyang espiritu nga mga anak nga lalaki ug babaye. Sila adunay potensiyal nga walay limitasyon. Sila adunay padulngan nga mahimong mahimayaon nga mga binuhat sa kaayo, grasya, ug kamatuoran. Ug bisan pa man sila mianhi sa yuta nga wala gayoy mahimo, dili kaayo makahimo og bisan unsa gawas sa paghilak alang sa panabang. Ang panumdoman sa ilang panahon didto sa presensya sa Dios nakalimtan, uban sa kahibalo kon si kinsa gayod sila ug kinsa sila mahimo sa umaabot. Gihulma nila ang ilang panabot bahin sa kinabuhi, sa gugma, sa Dios, ug sa Iyang plano sumala sa unsay ilang nakita gikan sa mga tawo sa ilang palibot—ilabi na sa ilang mga ginikanan, kinsa, sa tinuod lang, naningkamot pa gihapon sa pagsabot sa mga butang sa ilang kaugalingon mismo.

Bag-ong natawo nga bata

Ang Dios mihatag sa mga ginikanan og “sagrado nga katungdanan sa pag-amuma sa ilang mga anak sa paghigugma ug sa pagkamatarong, sa pagsangkap alang sa ilang pisikal ug espirituhanon nga mga panginahanglan, ug sa pagtudlo kanila sa … pagsunod sa mga sugo sa Dios.”⁴

Igo na kana gani sa labing maayo nga mga ginikanan nga magpabiling magmata sa gabii.

Ang akong mensahe sa tanang ginikanan mao kini:

Ang Ginoo nahigugma kaninyo.

Siya nag-uban kaninyo.

Siya nagbarog tupad kaninyo.

Siya mao ang inyong kalig-on sa paggiya sa inyong mga anak aron makahimo og matarong nga mga pagpili.

Dawata kini nga pribilehiyo ug responsibilidad sa maisogon ug malipayong paagi. Ayaw idelegar kining tinubdan sa langitnong mga panalangin ngadto sa laing tawo. Sulod sa sumbanan sa mga mithi ug mga baroganan sa ebanghelyo, kamo ang mogiya sa inyong anak diha sa mga detalye sa inadlaw nga mga desisyon. Tabangi ang inyong mga anak sa pag-ugmad og hugot nga pagtuo diha ni Jesukristo, sa paghigugma sa Iyang ebanghelyo ug sa Iyang Simbahan, ug sa pag-andam alang sa tibuok kinabuhi nga matarong nga mga pagpili. Sa pagkatinuod, mao kana ang plano sa Dios alang sa mga ginikanan.

Si Satanas mosupak kaninyo, mobalda kaninyo, mosulay sa pagsagmuyo kaninyo.

Apan ang matag anak nakadawat og Kahayag ni Kristo isip direkta nga linya ngadto sa langit. Ug ang Manluluwas motabang kaninyo, mogiya kaninyo, ug moawhag kaninyo. Tinguhaa ang Iyang panabang. Pangutana sa Ginoo!

Si Ginoong Jesukristo

Ingon nga si Jesukristo mao ang kalig-on sa kabatan-onan, si Jesukristo mao usab ang kalig-on sa mga ginikanan.

Siya Mopalambo sa Gugma

Usahay tingali maghunahuna kita kon aduna bay laing tawo nga mas angayan nga mogiya ug motudlo sa atong mga anak. Apan bisan kon unsa pa ang inyong gibati nga dili angayan, kamo adunay butang nga talagsaon nga nakapahimo ninyong angayan: ang inyong gugma alang sa inyong anak.

Ang gugma sa ginikanan alang sa usa ka anak mao ang usa sa kinakusgan nga pwersa sa uniberso. Mao kini ang usa sa pipila ka butang dinhi sa yuta nga mahimo gayod nga mahangtoron.

Karon, tingali mibati kamo nga ang inyong relasyon sa inyong anak dili kaayo maayo. Kana ang higayon nga ang gahom sa Manluluwas mosulod. Siya miayo sa masakiton, ug Siya mahimong moayo sa mga relasyon. Siya mipadaghan sa pan ug isda, ug Siya mahimong mopadaghan sa gugma ug kalipay diha sa inyong panimalay.

Ang inyong gugma alang sa inyong mga anak makamugna og maanindot nga kahimtang alang sa pagtudlo sa kamatuoran ug pagpalig-on sa pagtuo. Himoa ang inyong panimalay nga usa ka balay sa pag-ampo, pagkat-on, ug hugot nga pagtuo; usa ka balay sa malipayong mga kasinatian; usa ka dapit sa pagkahisakop; usa ka balay sa Dios.⁵ Ug “pag-ampo ngadto sa Amahan uban sa tibuok kusog sa kasingkasing, nga [kamo] unta mapuno [sa Iyang] gugma, diin siya [mitugyan] diha sa … mga sumusunod sa iyang Anak, nga si Jesukristo.”⁶

Siya Mopalambo sa Gamay ug Yano nga mga Paningkamot

Ang laing kalig-on nga anaa kaninyo, isip ginikanan, mao ang oportunidad sa inadlaw, padayon nga impluwensya. Ang mga higala, mga magtutudlo, ug mga tig-impluwensya sa media moabot ug mawala. Apan kamo ang labing mapadayonon, makanunayon nga impluwensya sa kinabuhi sa inyong anak.

Ang inyong mga paningkamot morag gamay ra kon itandi sa lanog nga mga tingog nga madungog sa inyong mga anak dinhi sa kalibotan. Usahay tingali mobati kamo nga morag walay daghang nahimo. Apan hinumdomi “pinaagi sa gagmay nga mga paagi ang Ginoo makapahinabo sa mahinungdanon nga mga butang.”⁷ Ang usa ka home evening, usa ka panagsultihanay bahin sa ebanghelyo, o usa ka maayo nga ehemplo tingali dili makapausab sa kinabuhi sa inyong anak dihadiha dayon, ingon nga ang usa ka tinulo sa uwan dili makapatubo sa tanom dihadiha dayon. Apan ang kamakanunayon sa gamay ug yano nga mga butang, matag adlaw, mas makapalambo sa inyong mga anak kaysa panagsa nga pagbaha.⁸

Mao kana ang paagi sa Ginoo. Siya makigsulti kaninyo ug sa inyong anak pinaagi sa usa ka hinay, hinagawhaw nga tingog, dili usa ka tingog sa dugdog.⁹ Giayo niya si Naaman dili pinaagi sa “dakong butang” apan pinaagi sa yano, balik-balik nga buhat sa pagpanghimasa.¹⁰ Ang mga anak sa Israel nalingaw sa pagpangaon sa mga buntog didto sa kamingawan, apan unsay nakapabilin nilang buhi mao ang gamay ug yano nga milagro sa manna—ilang inadlaw nga pan.¹¹

Mga kaigsoonan, ang inadlaw nga pan labing maayo nga maandam ug ipakaon diha sa panimalay. Ang hugot nga pagtuo ug pagpamatuod labing mapasiugdahan sa normal ug natural nga mga paagi, usa ka kitkit sa usa ka higayon, diha sa gamay ug yano nga mga higayon, sa padayon nga buluhaton sa inadlaw nga pagpakabuhi.¹²

Ang matag higayon usa ka higayon sa pagtudlo. Ang matag pulong ug binuhatan mahimong usa ka giya sa paghimo og mga pagpili.¹³

Tingali dili ninyo makita dihadiha dayon ang mga epekto sa inyong mga paningkamot. Apan ayaw paghunong. “Ang tanan nga mga butang kinahanglan gayod nga mahinabo diha sa ilang panahon,” miingon ang Ginoo. “Busa, ayaw pagluya diha sa maayo nga buhat, kay kamo nagpahimutang sa tukoranan sa usa ka mahinungdanon nga buhat.”¹⁴ Unsa nga buhat ang mas mahinungdanon kaysa pagtabang sa bililhon nga mga anak nga makakat-on kon kinsa gayod sila ug makaugmad sa ilang hugot nga pagtuo diha ni Jesukristo, sa Iyang ebanghelyo, ug sa Iyang Simbahan? Si Jesukristo mopanalangin ug mopalambo sa inyong makanunayon nga mga paningkamot.

Siya Mohatag og Pagpadayag

Ang laing gamhanang paagi nga ang Ginoo mosuporta sa mga ginikanan mao ang pinaagi sa gasa sa personal nga pagpadayag. Ang Dios matinguhaon sa pagbubo sa Iyang Espiritu aron magiyahan ang mga ginikanan.

Kon kamo mainampoon ug sensitibo sa Espiritu, Siya mopasidaan kaninyo sa nakatago nga mga kakuyaw.¹⁵ Siya mopadayag sa mga gasa, mga kalig-on, ug dili masulti nga mga kabalaka sa inyong mga anak.¹⁶ Ang Dios motabang kaninyo sa pagtan-aw sa inyong mga anak sama sa Iyang pagtan-aw kanila—lapas pa sa ilang panagway sa gawas ug sulod sa ilang mga kasingkasing.¹⁷

Uban sa tabang sa Dios, kamo makakat-on sa pag-ila sa inyong mga anak sa putli ug langitnong paagi. Ako modapit ninyo sa pagdawat sa gitanyag sa Dios nga mogiya sa inyong pamilya pinaagi sa personal nga pagpadayag. Tinguhaa ang Iyang giya diha sa inyong mga pag-ampo.¹⁸

Dako nga Kausaban

Tingali ang labing importante nga tabang nga matanyag ni Jesukristo sa mga ginikanan mao ang “dakong kausaban” sa kasingkasing.¹⁹ Mao kini ang milagro nga gikinahanglan sa matag usa kanato.

Sa daklit, hunahunaa kini nga sitwasyon: Anaa kamo sa simbahan, naminaw sa pakigpulong bahin sa mga pamilya. Ang mamumulong naghulagway og usa ka hingpit nga panimalay ug gani mas hingpit nga pamilya. Bana ug asawa nga dili gayod mag-away. Mga anak nga mohunong lang sa pagbasa sa ilang mga kasulatan kon oras na sa paghimo og homework. Ug ang musika nga “Maghigugmaay”²⁰ nagtugtog nga maoy background. Sa wala pa ang mamumulong moabot sa bahin mahitungod sa tanan nga malipayong miapil sa pagpanglimpyo sa lawak kaligoanan, naghunahuna na kamo, “Ang akong pamilya walay paglaom.”

Minahal nga mga kaigsoonan, relaks! Ang tanan sa kongregasyon naghunahuna og sama nga butang! Sa pagkatinuod, ang tanang ginikanan nabalaka bahin sa pagkadili igo sa ilang pagkamaayo.

Maayo na lang, adunay usa ka balaanong tinubdan sa tabang alang sa mga ginikanan: Kini mao si Jesukristo. Siya mao ang tinubdan sa atong dako nga kausaban sa kasingkasing.

Samtang inyong buksan ang inyong kasingkasing ngadto sa Manluluwas ug sa Iyang mga pagtulon-an, ipakita Niya kaninyo ang inyong kahuyang. Kon kamo mosalig kang Jesukristo uban sa mapaubsanong kasingkasing, Siya mohimo sa mahuyang nga mga butang nga malig-on.²¹ Siya ang Dios sa mga milagro.

Nagpasabot ba kini nga kamo ug ang inyong pamilya mahimong hingpit? Dili. Apan kamo mahimong mas maayo. Pinaagi sa grasya sa Manluluwas, sa hinayhinay, mapalambo ninyo ang daghang kinaiya nga gikinahanglan sa mga ginikanan: gugma alang sa Dios ug sa Iyang mga anak, pailob, pagkadili hakog, hugot nga pagtuo diha ni Jesukristo, ug kaisog sa pagbuhat sa matarong nga mga pagpili.

Si Jesukristo Nagtanyag og Suporta pinaagi sa Iyang Simbahan

Ang atong paningkamot sa pag-ugmad og hugot nga pagtuo diha ni Jesukristo nakasentro sa panimalay, nakatutok sa indibidwal. Ug kini gisuportahan sa Simbahan. Gawas sa pagsangkap sa sagrado nga mga kasulatan ug sa mga pulong sa mga propeta, ang Simbahan sa Manluluwas nagtanyag og daghang kapanguhaan aron matabangan ang mga ginikanan ug ang mga anak sa paghimo og matarong nga mga pagpili:

Alang sa Kalig-on sa mga Kabatan-onan: Usa ka Giya sa Paghimo og mga Pagpili

• Ang Alang sa Kalig-on sa mga Kabatan-onan: Usa ka Giya sa Paghimo og mga Pagpili wala maghatag ninyo og lista sa mga angayng buhaton o mga dili angayng buhaton . Nagtudlo kini og mahangtorong mga kamatuoran aron matabangan sa paghimo og mga pagpili nga nakasentro sa kinabuhi ug mga pagtulon-an ni Jesukristo. Basaha kini uban sa inyong mga anak. Tugoti sila nga maghisgot kabahin niini. Tabangi sila nga kining mahangtoron ug balaanong mga kamatuoran mogiya sa ilang mga pagpili.²²

• Ang mga komperensiya sa AKK [FSY] laing maanindot nga tinubdan. Manghinaot ko nga ang matag batan-on motambong. Akong dapiton ang mga young single adult sa pag-apil niini nga mga komperensiya isip mga mentor ug mga magtatambag. Akong dapiton ang mga ginikanan nga ipadayon ang paglig-on sa ilang kabatan-onan sa espirituhanong paagi nga gidala nila sa ilang pagpauli gikan sa AKK [FSY] nga mga komperensiya.

• Ang kabataan ug kabatan-onan sa Ang Simbahan ni Jesukristo sa mga Santos sa Ulahing mga Adlaw adunay mga magtutudlo, mga tigtambag, ug mga mentor. Kasagaran mosulod kamo sa kinabuhi sa pagkabatan-on sa lisod nga higayon aron sa pag-ugmad ug pagsuporta sa hugot nga pagtuo ug pagpamatuod. Ang uban kaninyo mga single adult. Ang uban kaninyo walay kaugalingong mga anak. Ang inyong malipayong pagserbisyo sa mga anak sa Dios sagrado sa panan-aw sa Dios.²³

Ayaw Gayod Isalikway ang Milagro

Akong minahal nga mga higala, akong minahal nga mga kaigsoonan, ang pag-ugmad og hugot nga pagtuo diha sa usa ka anak daw sama sa pagtabang sa pagpatubo og usa ka bulak. Dili ninyo mahimong inaton ang lawas niini aron motaas. Dili ninyo mahimong pabukahon ang udlot aron mobuklad dayon. Ug dili ninyo mahimong pasagdan lang ang bulak ug magdahom niini nga motubo o sa kalit lang mamulak.

Unsay inyong mahimo ug kinahanglan nga buhaton sa bag-ong henerasyon mao ang pagsangkap og tambok, inatiman nga yuta, nga adunay nagdagayday nga langitnong tubig. Tangtanga ang mga sagbot ug bisan unsa nga makaali sa langitnong hayag sa adlaw. Pagmugna og labing maayo nga mga kahimtang alang sa pagtubo. Mapailobon nga motugot sa bag-ong henerasyon sa paghimo og dinasig nga mga pagpili, ug tugoti ang Dios nga mohimo sa Iyang milagro. Ang resulta mas matahom ug mas makapahingangha ug mas makapalipay kaysa bisan unsa nga inyong mahimo nga kamo lang.

Diha sa plano sa Langitnong Amahan, ang mga relasyon sa pamilya gitumong nga magmahangtoron. Mao nga, isip ginikanan, ayaw gayod paghunong, bisan kon wala kamo mahimuot sa unsay nahitabo sa miagi.

Pinaagi ni Jesukristo, ang Halangdon nga Tig-ayo ug Manluluwas, sa kanunay adunay bag-ong sinugdanan; Siya kanunay nga mohatag og paglaom.

Si Jesukristo mao ang kalig-on sa mga pamilya.

Si Jesukristo mao ang kalig-on sa kabatan-onan.

Si Jesukristo mao ang kalig-on sa mga ginikanan.

Niini ako mopamatuod sa ngalan ni Jesukristo, amen.

Mubo nga mga Sulat

1. “Hapit tanang ginikanan tinguha ang pagtudlo sa ilang mga anak sa moral nga mga hiyas. Kabahin kini sa milagro sa plano sa Langitnong Amahan. Gusto Niya nga moanhi sa yuta ang Iyang mga anak, subay sa mahangturong sundanan sa pamilya sa didto pa sa langit. Ang mga pamilya mao ang nag-unang yunit sa mahangturong mga gingharian, ug busa Iyang tuyo nga kini usab mahimong unang yunit dinhi sa kalibotan. Bisan og ang kalibotanong mga pamilya layo gikan sa pagkahingpit, kini naghatag sa mga anak sa Dios sa labing maayong higayon nga maabi-abi sa kalibotan uban sa bugtong gugma dinhi sa yuta nga hapit masusama sa unsay gibati nato didto sa langit—gugma sa ginikanan. Ang mga pamilya mao usab ang labing maayong paagi sa pagpreserbar ug sa pagpasa sa moral nga mga hiyas ug sa tinuod nga mga baroganan nga may dakong kalagmitan nga modala kanato balik ngadto sa presensya sa Dios” (Henry B. Eyring, “Pagpundok sa Pamilya sa Dios,” Liahona, Mayo 2017, 20).

2. Siyempre, kita nasayod nga ang kabubut-on sa Dios dili matuman sa kanunay “dinhi sa yuta maingon sa langit” (Mateo 6:10). Ang mortal nga pagkaginikanan dili ikatandi sa pagkaginikanan nga gusto sa Dios. Siya sigurado nga nakakita niana. Siya naghilak sa tanang kagul-anan ug kasakit diha sa mga relasyon sa pamilya. Ug bisan pa man Siya dili mosalikway sa pamilya. Ug Siya dili mobuhat niana, tungod kay ang Dios adunay mahimayaong plano alang sa mahangtorong destinasyon sa Iyang mga anak. Ug anaa sa sentro niana nga plano mao ang pamilya.

3. Tan-awa sa Mateo 18:1–5; Mosiah 3:19.

4. “Ang Pamilya: Usa ka Pamahayag ngadto sa Kalibotan,” ChurchofJesusChrist.org; tan-awa usab sa Doktrina ug mga Pakigsaad 68:25–28.

5. Tan-awa sa “Ang Pagkat-on sa Panimalay Gitukod diha sa mga Relasyon,” Pagtudlo Sumala sa Pamaagi sa Manluluwas: Alang sa Tanan Kinsa Nagtudlo diha sa Panimalay ug diha sa Simbahan (2022), 30–31; tan-awa usab sa Doktrina ug mga Pakigsaad 109:8.

6. Moroni 7:48.

7. 1 Nephi 16:29; tan-awa usab sa Alma 37:6–7.

8. Tan-awa sa “Pagkat-on diha sa Panimalay Naglangkob og Gamay, Yano, Makanunayong mga Paningkamot,” Pagtudlo Sumala sa Pamaagi sa Manluluwas, 31. Si Presidente David O. McKay nagtudlo: “Dili kita maghunahuna nga, tungod kay ang pipila ka [mga butang] … ingon og gamay lang ug dili mahinungdanon, [nga] dili importante. Ang kinabuhi, human sa tanan, hinimo gikan sa gagmay nga mga butang. Ang atong kinabuhi, ang atong pagkatawo, sa pisikal, gilangkoban sa ginagmay nga mga pinitik sa kasingkasing. Pahunonga sa pagpitik kanang gamay nga kasingkasing, ug ang kinabuhi niini nga kalibotan mohunong. Ang dako nga adlaw usa ka gamhanan kaayo nga pwersa sa kalibotan, pero nakadawat kita sa mga panalangin sa iyang mga kahayag tungod kay kini moabot kanato isip gamay nga mga bidlisiw, nga kon hugpongon, mopuno sa tibuok kalibotan sa kahayag sa adlaw. Ang mangitngit nga kagabhion nahimong maanindot tungod sa pagpangidlap sa gagmay nga mga bitoon; ug mao usab ang tinuod nga kinabuhi sa Kristiyano nga hinimo sa ginagmay nga mga buhat nga sama sa kang Kristo nga gihimo niining orasa, niining gutloa—diha sa panimalay” (Mga Pagtulon-an sa mga Presidente sa Simbahan: David O. McKay [2003], 266).

9. Tan-awa sa Helaman 5:30.

10. Tan-awa sa 2 Mga Hari 5:9–14.

11. Tan-awa sa Exodo 16.

12. Tan-awa sa “Pag-andam sa Inyong Mga Anak nga Maanaa sa Dalan sa Pakigsaad sa Dios sa Tibuok Kinabuhi,” Dali Sunod Kanako—Alang sa mga Indibidwal ug mga Pamilya: Bag-ong Tugon 2023, apendiks (digital lamang).

13. Tan-awa sa “Ang Pagkat-on diha sa Panimalay Maplano apan Dili Usab Pinugos,” Pagtudlo Sumala sa Pamaagi sa Manluluwas, 31; 1 Pedro 3:15.

14. Doktrina ug mga Pakigsaad 64:32–33.

15. Tan-awa sa Mateo 2:13.

16. Tan-awa sa Alma 40:1; 41:1; 42:1.

17. Tan-awa sa 1 Samuel 16:7.

18. Tan-awa sa 1 Nephi 15:8.

19. Alma 5:13.

20. Tan-awa sa “Maghigugmaay,” Mga Himno, nu. 196.

21. Tan-awa sa Ether 12:27.

22. “Sa sitwasyon sa mga anak, ang responsibilidad sa paghatag og moral nga giya anaa sa mga ginikanan. Sila nahibalo sa pamatasan, panabot, ug salabotan sa matag anak. Ang mga ginikanan mogahin sa tibuok kinabuhi nga magtinguha sa pag-establisar ug pagpabilin sa maayo nga komunikasyon ngadto sa matag usa sa ilang mga anak. Sila anaa sa labing maayo nga posisyon sa paghimo sa kataposang moral nga mga desisyon nga may kalabotan sa pagtabang ug sa kaayohan sa ilang mga anak” (James E. Faust, “The Weightier Matters of the Law: Judgment, Mercy, and Faith,” Ensign, Nob. 1997, 54).

23. Ang laing duha ka kapanguhaan nga angayng hisgotan: Ang digital nga bersiyon niining tuiga sa Dali, Sunod Kanako nga kapanguhaan naglakip sa bag-o nga seksiyon nga giulohan og “Pag-andam sa Inyong Mga Anak nga Maanaa sa Dalan sa Pakigsaad sa Dios sa Tibuok Kinabuhi.” Nagsugyot kini og yano, nakasentro sa panimalay nga mga ideya aron matabangan ang mga anak nga maandam alang sa bunyag ug ubang mga pakigsaad ug mga ordinansa. Ang bag-ong giusab nga Pagtudlo Sumala sa Pamaagi sa Manluluwas adunay seksiyon nga giulohan og “Panimalay ug Pamilya” nga naghulagway kon sa unsang paagi nga ang mga baroganan sa sama kang Kristo nga pagtudlo magamit diha sa panimalay (tan-awa sa mga pahina 30–31).