Kristohanon nga Pamayhon sa Kaligdong
“Mibangon si Jesus, ug iyang gipahunong ang hangin ug ang mga balod iyang giingnan, “Hunong!” Ug mihunong ang hangin ug mibanos ang kalinaw” (Marcos 4:39).
Ang kataposan nga higayon nga ako namulong sa kinatibuk-ang komperensiya, ang akong umagad nga si Ryan mipakita nako og usa ka tweet nga nag-ingon, “Mao ba? Ang ngalan sa tawo Bragg”—pasabot “pagpanghambog” ug wala siya maghisgot og kamapainubsanon? Pagkasayang!” Subo kaayo, kay ang kasagmuyo mopadayon.
Ang akong buotan nga amahan usa ka basketbolista sa All-America alang sa UCLA ubos sa bantogan nga Coach nga si John Wooden. Nagpabilin sila nga suod sa akong amahan sa tibuok kinabuhi, ug sa panagsa nga higayon si Coach ug si Mrs. Wooden moadto sa among panimalay alang sa panihapon. Kanunay siya nga malipay nga makig-istorya nako mahitungod sa basketbol o bisan unsang butang nga naa sa akong hunahuna. Kausa nangutana ko niya kon unsa ang iyang ikatambag alang kanako kon mosulod nako sa akong senior year sa high school. Kanunayng hanas sa pagtudlo miingon siya, “Misulti nako si papa nimo nga miapil ka sa Simbahan ni Jesukristo, mao nga kahibalo ko nga ikaw adunay hugot nga pagtuo diha sa Ginoo. Uban niana nga hugot nga pagtuo seguroha ang pagbaton og pamayhon sa kaligdong sa matag sitwasyon. Pagbinuotan nga tawo bisan sa panahon sa pagsulay.”
Sa paglabay sa katuigan, kana nga panag-istoryahanay nagpabilin kanako. Kana nga tambag nga mahimong kalmado, pasensyoso, ug sa tanang sitwasyon dili matandog, ilabi na sa mga panahon sa kalisdanan ug sa kaapiki, gamhanang nakaapekto kanako. Akong nakita kon giunsa sa pagpakita sa pamayhon sa kaligdong diha sa dinulaan sa team ni Coach Wooden ug ang dakong kalamposan nga ilang nasinati sa pagdaog og 10 ka nasodnong kampyonato.
Apan ang pamayhon sa kaligdong wala na kaayo mahisgoti karong mga panahona ug minus na kaayong gibuhat sa masamok ug mga panahon sa pagkabahin-bahin. Kini kasagaran gihisgotan diha sa mga paugnat sa kusog—ang usa ka magdudula nga adunay pamayhon sa kaligdong kontrolado ang kaugalingon diha sa init nga duwa, o ang usa ka team mawad-an sa ilang abilidad sa pagpakita og kasegurohan tungod sa kakulang sa pamayhon sa kaligdong. Kining maanindot nga kalidad dili lang gikinahanglan sa paugnat sa kusog kondili sa ubang aspeto. Ang pamayhon sa kaligdong adunay mas halapad nga kagamitan sa kinabuhi ug makapanalangin sa mga ginikanan, mga lider, mga misyonaryo, mga magtutudlo, mga estudyante, ug sa tanan nga nag-atubang og mga pagsulay sa kinabuhi.
Ang espirituwal nga pamayhon sa kaligdong mopanalangin kanato aron nga magpabilin nga kalmado ug makatutok sa unsa ang labing importante, ilabi na kon kita maanaa sa kaapiki. Si Presidente Hugh B. Brown nagtudlo, “Ang hugot nga pagtuo diha sa Dios ug diha sa kinatas-ang kadaogan sa katarong, makatampo sa pamayhon sa kaligdong sa pangisip ug sa espirituwal diha sa atubangan sa kalisdanan.”1
Si Presidente Russell M. Nelson mao ang usa sa maanindot nga ehemplo sa espirituwal nga pamayhon sa kaligdong. Usa ka higayon niana, samtang kanhi-Dr. Nelson mipahigayon og usa ka usa ka quadruple coronary artery bypass, ang presyon sa dugo sa pasyente kalit nga miubos. Si Dr. Nelson kalmado nga misusi sa sitwasyon ug mitumbok nga usa ka lugpit nga aksidenting natangtang sa usa sa mga sakop sa team. Gibalik dayon kadto sa pagtaod, ug si Dr. Nelson mihupay sa sakop sa team, nag-ingon, “gimahal ka gihapon nako,” ug dayon midugang sa pagpasiaw, “mas gimahal ka nako labaw pa sa ubang higayon!” Iyang gipakita kon unsaon sa pagdala ang usa ka emerhensiya—may pamayhon sa kaligdong, nakatutok lang kon unsa ang labing importante—sa pagtubag sa emerhensiya. Si Presidente Nelson miingon, “nagkinahanglan lang kini og tumang disiplina sa kaugalingon. Ang inyong natural nga reaksiyon mao ang, ‘Kuhaa na ko diri, coach! Gusto na ko nga mopauli.’ Apan siyempre dili ka makapauli. Ang kinabuhi hingpit nga nagsalig sa tibuok team sa mag-opera. Busa kinahanglan gayod ka nga magpabilin nga ingon ka kalma ug relaks ug alisto kutob sa imong mahimo.”2
Siyempre, ang Manluluwas mao ang kinamaayohan nga ehemplo sa pamayhon sa kaligdong.
Didto sa Tanaman sa Getsemani, sa dili matukib nga paghingutas, samtang “iyang singot sama sa dagkong tulo sa dugo,”3 Siya mipakita sa ehemplo sa balaan nga pamayhon sa kaligdong nga may yano apan harianon nga pamahayag, “dili ang akong pagbuot kondili ang imo maoy matuman.”4 Ubos sa hilabihan kadako nga puwersa aron matuman ang kaluwasan sa tanang katawhan, si Jesus mipakita og tulo ka importante nga mga kondisyon nga makatabang kanato nga makasabot sa Iyang talagsaon nga pamayhon sa kaligdong. Una, Siya nasayod kinsa Siya ug nagmatinuoron sa Iyang balaan nga misyon. Sunod, Siya nasayod nga adunay usa ka talagsaon nga plano sa kalipay. Ug sa kataposan, Siya nasayod nga pinaagi sa Iyang walay kinutoban nga Pag-ula, ang tanan kinsa matinud-anong moyugo sa ilang kaugalingon ngadto Kaniya pinaagi sa paghimo ug pagtuman sa sagrado nga mga pakigsaad nga gidawat pinaagi sa mga ordinansa sa pagkapari maluwas, ingon katahom nga gitudlo ni Elder Dale G. Renlund karon.
Sa pagtandi sa kalainan tali sa pagkawala ug pagpabilin sa pamayhon sa kaligdong, hunahunaa kon unsa ang nahitabo samtang si Kristo ug ang Iyang mga Apostol mibiya sa Tanaman sa Getsemani. Sa dihang giatubang na sa mga sundalo nga nagtinguha sa pagdakop ni Jesus, ang reaksiyon ni Pedro mao ang pagkawala sa iyang pamayhon sa kaligdong ug bayolenting mitigbas sa dalunggan sa sulugoon sa halangdon nga pari, nga si Malchus. Ang reaksiyon ni Jesukristo, sa laing bahin, mao ang pagpabilin sa Iyang pamayhon sa kaligdong ug gipakalma ang tensiyonado nga kahimtang pinaagi sa pag-ayo ni Malchus.5
Ug alang kanato nga nanglimbasog sa pagpabilin sa atong pamayhon sa kaligdong ug tingali nawad-an sa kadasig, hunahunaa ang nahabilin sa istorya ni Pedro. Usa lang ka mubo nga panahon human niining panghitabo ug sa makasubo nga paglimod sa iyang pakig-uban ni Kristo,6 Si Pedro mibarog atubang sa samang mga lider sa relihiyon nga mihimaraot sa Manluluwas, ug sa talagsaong pamayhon sa kaligdong ubos sa grabing pagsukit-sukit siya mihatag sa iyang larino nga pagpamatuod sa pagkabalaan ni Jesukristo.7
Sayri kon si Kinsa Kamo ug Magmatinuoron sa Inyong Balaan nga Pagkatawo
Atong ikonsiderar ang mga elemento sa Kristohanon nga pamayhon sa kaligdong. Sa pagsugod, ang masayod kon si kinsa kita ug ang magmatinuoron sa atong balaan nga pagkatawo makapakalma. Ang Kristohanong pamayhon sa kaligdong nagkinahanglan nga atong likayan ang pagtandi sa atong kaugalingon ngadto sa uban o magpakaaron-ingnon nga mahimong usa ka tawo nga kita dili mao.8 Si Joseph Smith nagtudlo, “Kon ang mga tawo dili makasabot sa kinaiya sa Dios, sila wala makasabot sa ilang mga kaugalingon.”9 Kini dili lang gyod posible ang pagbaton og pamayhon sa kaligdong nga wala makahibalo nga kita mga balaan nga anak nga mga lalaki ug mga babaye sa mahigugmaon nga Langitnong Amahan.
Sa iyang pakigpulong nga “Mga Pagpili alang sa Kahangtoran,” si Presidente Nelson nagtudlo niining mahangtoron nga mga kamatuoran mahitungod kon si kinsa kita: kita mga anak sa Dios, kita mga anak sa pakigsaad, ug kita mga disipulo ni Kristo. Siya misaad dayon nga, “Samtang inyong hangopon kini nga mga kamatuoran, ang atong Langitnong Amahan motabang kaninyo nga makab-ot ang inyong kinatas-an nga tumong sa pagpuyo sa kahangtoran diha sa Iyang balaanon nga presensiya.”10 Kita tinuod nga mga balaan nga espirituhanong binuhat nga nakaangkon og mortal nga kasinatian. Ang masayod kon si kinsa kita ug magmatinuoron niana nga pagkatawo mao ang sukaranan sa pagpalambo sa Kristohanong pamayhon sa kaligdong.
Hibaloi Nga Adunay Usa ka Balaan nga Plano
Sunod, ang paghinumdom nga adunay usa ka labing dako nga plano makapagawas og kaisog ug pamayhon sa kaligdong sa mahagiton nga mga kahimtang. Si Nephi “moadto ug mobuhat”11 sumala sa gisugo sa Ginoo “wala masayod sa sinugdanan”12 sa mga butang nga iyang buhaton tungod kay siya nasayod nga siya gigiyahan pinaagi sa Espiritu, agig pagtuman sa mahangtoron nga plano sa mahigugmaon nga Langitnong Amahan. Moabot ang pamayhon sa kaligdong kon kita makakita sa mga butang nga gikan sa mahangtoron nga panglantaw. Ang Ginoo mitambag sa Iyang mga disipulo “tan-awa ninyo”13 ug “palandonga ang mga kaligdong sa kahangtoran diha sa inyong mga hunahuna.”14 Pinaagi sa paglantaw sa mahagiton nga mga panahon sulod sa usa ka mahangtoron nga plano, ang kaapiki mahimong usa ka pribilehiyo sa paghigugma, pagserbisyo, pagtudlo, ug sa pagpanalangin. Ang usa ka mahangtoron nga panglantaw makapahimo sa Kristohanon nga pamayhon sa kaligdong.
Hibaloi ang Makaabag nga Gahom ni Jesukristo ug ang Iyang Pag-ula
Ug sa kataposan, ang makaabag nga gahom ni Kristo, nahimong posible pinaagi sa Iyang maulaon nga sakripisyo, maghatag kanato og kalig-on nga molahutay ug mopatigbabaw. Tungod ni Jesukristo kita makahimo og pakigsaad sa Dios ug mapalig-on sa pagtuman niana nga pakigsaad. Kita mahimong ibugkos ngadto sa Manluluwas diha sa kalipay ug kakalma, dili igsapayan sa atong temporal nga mga sirkumstansiya.15 Ang Alma kapitulo 7 nagtudlo og maanindot mahitungod sa makaabag nga gahom ni Kristo. Agi og dugang sa pagtubos kanato gikan sa sala, ang Manluluwas makapalig-on kanato sa atong mga kahuyang, mga kahadlok, ug mga hagit niining kinabuhi.
Kon kita motutok kang Kristo, kita makapahilom sa atong mga kahadlok, sama sa gihimo sa katawhan ni Alma didto sa Helam.16 Samtang mipundok ang naghulga nga mga sundalo, kadtong mga matinud-anon nga mga disipulo ni Kristo mipakita og pamayhon sa kaligdong. Si Elder David A. Bednar nagtudlo: “Mitambag si Alma sa mga tumutuo sa paghinumdom sa Ginoo ug sa kaluwasan nga Siya lamang ang makahatag (tan-awa sa 2 Nephi 2:8). Ang kahibalo sa maamumahon nga pagpanalipod sa Manluluwas nakapahimo sa katawhan sa paghupay sa ilang kaugalingong mga kahadlok.”17 Kini nagpakita sa mga ehemplo sa pamayhon sa kaligdong.
Ang Bantogan nga Tawo diha sa Unos sa Pagsulay
Si Noe nagtudlo kanato og daghan kaayo mahitungod sa pailob diha sa usa ka unos, apan ang Manluluwas ang labing bantogan nga magtutudlo kon unsaon sa paglahutay sa usa ka unos. Siya mao ang bantogan nga tawo diha sa usa ka unos sa pagsulay. Human sa tibuok adlaw nga pagtudlo uban sa Iyang Apostoles, ang Manluluwas nagkinahanglan og pahulay ug misugyot nga sila motabok pinaagi sa sakayan ngadto sa pikas habig sa Dagat sa Galilea. Samtang mipahulay ang Manluluwas, usa ka grabing unos ang miabot. Sa dihang ang hangin ug ang mga balod mihulga sa pag-unlod sa sakayan, ang Apostoles misugod sa pagkahadlok alang sa ilang mga kinabuhi. Ug hinumdomi, pipila niadtong Apostoles mga mangingisda nga sinati na kaayo sa mga unos niana nga dagat! Apan, nabalaka,18 ilang gipukaw ang Ginoo ug mihangyo, “[Ginoo], wala ka ba mabalaka nga hapit na man kita malunod?” Dayon, uban sa ehemplo sa pamayhon sa kaligdong, ang Manluluwas “mibangon, ug iyang gipahunong ang hangin ug ang mga balod iyang giingnan, Hunong!” Ug mihunong ang hangin ug … mibanos ang kalinaw.”19
Ug dayon usa ka talagsaong leksiyon sa pamayhon sa kaligdong alang sa Iyang Apostoles. Siya nangutana, “Nganong nalisang man kamo? Wala ba kamoy pagsalig?”20 Siya nagpahinumdom kanila nga Siya mao ang Manluluwas sa kalibotan, ug nga Siya gipadala sa Amahan aron pagpahinabo sa imortalidad ug kinabuhing dayon sa mga anak sa Dios. Segurado, ang Anak sa Dios dili mahanaw diha sa usa ka sakayan. Siya mipakita og balaan nga pamayhon sa kaligdong tungod kay Siya nasayod sa Iyang pagkabalaan ug Siya nasayod nga adunay plano sa kaluwasan ug kahimayaan ug kon unsa ka mahinungdanon ang Iyang Pag-ula ngadto sa mahangtoron nga kalamposan niana nga plano.
Kini pinaagi ni Kristo ug sa Iyang Pag-ula nga ang tanang maayong butang moabot sa atong kinabuhi. Samtang atong hinumdoman kon si kinsa kita, nasayod nga adunay usa ka balaan nga plano sa kalooy, ug makakuha og kaisog diha sa kalig-on sa Ginoo, kita makahimo sa tanang butang. Kita makakaplag og kalinaw. Kita mahimong maayo nga kababayen-an ug kalalakin-an sa bisan unsa nga unos.
Hinaot nga atong tinguhaon ang mga panalangin sa Kristohanong pamayhon sa kaligdong, dili lang sa pagtabang sa atong kaugalingon diha sa mahagiton nga mga panahon, apan sa pagpanalangin sa uban ug motabang kanila latas sa mga unos sa ilang mga kinabuhi. Niining bespiras sa Dominggo sa Lukay, ako malipayon nga mopamatuod ni Jesukristo. Siya nabanhaw. Ako mopamatuod sa kalinaw, kakalma, ug sa langitnong pamayhon sa kaligdong nga Siya lamang ang makahatag sa atong mga kinabuhi ug mobuhat sa ingyon sa Balaan nga ngalan ni Jesukristo, amen.