Ang Buhat sa Templo ug Family History––Usa ug Sama nga Buhat
Ang kinauyokan nga katuyoan sa plano sa atong Langitnong Amahan; hiusahon ang pamilya alang niini nga kinabuhi ug alang sa kahangtoran.
Ako mapasalamaton kaayo sa padayon nga pagtukod og mga templo niini nga “kapaigoan sa kahingpitan sa mga panahon” (Doktrina ug mga Pakigsaad 128:18). Sukad sa sayong mga adlaw sa Pagpahiuli, ang matinud-anon nga mga Santos mihimo og daghang mga sakripisyo aron makadawat sa mga ordinansa ug mga pakigsaad sa templo. Misunod sa ilang talagsaong ehemplo, niadtong 1975, human sa daghang ekonomikanhong mga sakripisyo sa pagbiyahe gikan sa Siyudad sa Mexico, ang akong pinangga nga asawa, si Evelia, ug ako, giubanan sa among minahal nga mga ginikanan, naselyo isip bana ug asawa diha sa Mesa Arizona Temple. Niadtong adlawa, samtang kami gihiusa pinaagi sa katungod sa pagkapari diha sa balay sa Ginoo, kami sa tinuod nakasinati og pag-aninaw sa langit.
Ang Buhat ug Katuyoan sa mga Templo
Kadto nga kasinatian nagtugot kanako nga mas magmapasalamaton kon giunsa, human sa tulo ka tuig nga pagpaningkamot ug dakong sakripisyo, ang mga Santos sa Kirtland, Ohio, sa kataposan mitapos sa ilang maanindot nga templo sa tingpamulak sa 1836––ang unang kapaigoan sa panahon. Sa Marso sa samang tuig, kapin sa usa ka libo ka mga tawo ang nagpundok diha sa templo ug sa mga ganghaan niini alang sa tulumanon sa pagpahinungod. Si Propeta Joseph Smith mibarog og mihalad sa pagpahinungod nga pag-ampo nga iyang nadawat pinaagi sa pagpadayag (tan-awa sa Doktrina ug mga Pakigsaad 109). Niini iyang gihulagway ang talagsaong mga panalangin nga itugyan niadtong kinsa takos nga mosulod sa mga templo sa Ginoo. Dayon ang choir mikanta sa himno nga “Ang Espiritu sa Dios” ug ang kongregasyon mibarog ug mihatag sa Pagsinggit og Hosanna “uban sa gahom nga ingon og … mopaisa sa atop sa bilding” (Mga Pagtulon-an sa mga Presidente sa Simbahan: Joseph Smith [2007], 371).
Usa ka semana ang milabay ang Propeta mihulagway sa pagpakita sa Ginoo diha sa templo, kinsa miingon:
“Kay tan-awa, Ako midawat niini nga balay, ug ang akong ngalan maania dinhi; ug Ako magpakita sa akong kaugalingon ngadto sa akong mga katawhan diha sa kalooy dinhi niini nga balay. …
“Ug ang pagkabantog niini nga balay mokaylap ngadto sa langyaw nga mga yuta; ug kini mao ang sinugdanan sa panalangin nga ibu-bu diha sa mga ulo sa akong mga katawhan.” (Doktrina ug mga Pakigsaad 110:7, 10).
Human niini ug sa ubang mga panan-awon, si Elijah ang propeta, kinsa gidala ngadto sa langit nga wala makatilaw og kamatayon, mipakita ni Propeta Joseph Smith ug ni Oliver Cowdery ug miingon:
“Tan-awa, ang panahon miabot na sa hingpit, nga gipamulong pinaagi sa ba-ba ni Malaquias—nga nagpamatuod nga siya [Elijah] [ang propeta] kinahanglan nga ipadala, sa dili pa moabot ang mahinungdanon ug makalilisang nga adlaw sa Ginoo—
“Sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon uban sa usa ka tunglo—
“Busa, ang mga yawe niini nga kapaigoan gitugyan ngadto sa inyong mga kamot; ug pinaagi niini kamo masayud nga ang mahinungdanon ug makalilisang nga adlaw sa Ginoo duol na, gani diha sa mga pultahan”(Doktrina ug mga Pakigsaad 110:14–16).
Ang Templo ug Family History
Human mapahiuli sa Ginoo ang mga yawe sa pagselyo ngadto kang Joseph Smith, ang buhat sa kaluwasan sa duha ka habig sa tabil nagsugod sa atong dispensasyon (tan-awa sa 1 Mga Taga-Corinto 15:22,29; Doktrina ug mga Pakigsaaad 128:8–18).
Si Presidente Boyd K. Packer mitudlo nga “Kining makahuluganon nga panghitabo milabay nga wala tagda sa kalibotan, apan kini moimpluwensya sa dangatan sa matag kalag kinsa sukad nabuhi o mabuhi. Mga butang nagsugod sa pagpanghitabo sa hilom nga paagi. Ang Simbahan nahimo nga usa ka simbahan nga tigtukod og templo.
“Sa kalibotan adunay motumaw dinhi ug didto, gihunahuna nga sa kabubut-on, mga katawhan ug mga kapunongan ug mga katilingban nga matinguhaon sa pagsiksik sa ilang mga kaliwatan. Kining tanan nahinabo sukad sa pagpakita ni Elijah diha sa Templo sa Kirtland” (The Holy Temple [Ang Balaang Templo] [1980], 141).
“Sukad nianang mao nga adlaw, Abril 3, 1836, ang mga kasingkasing sa mga anak nagsugod na pagbalik ngadto sa ilang mga amahan. Human niana ang mga ordinansa dili lumalabay, apan malungtaron. Ang gahom sa pagbugkos ania na kanato. Walay lain nga pagtugot makalabaw niini sa bili. Kana nga gahom naghatag og kahulugan ug walay katapusan nga pagkamalungtaron ngadto sa tanang mga ordinansa nga gipahigayon uban sa tukma nga pagtugot alang sa mga buhi ug sa mga patay” (Pagpangandam sa Pagsulod sa Balaan nga Templo [2002], 34).
Minahal nga mga kaigsoonan, ang pagtukod ug tukma nga paggamit sa mga templo sa bisan hain nga dispensasyon nahimong simbolo sa tinuod nga Simbahan ni Jesukristo. Human sa pagpahinungod sa Templo sa Salt Lake niadtong 1893, si Presidente Wilford Woodruff miawhag sa mga miyembro sa simbahan sa pagpangita sa mga rekord sa ilang mga katigulangan ug sa pagrekord sa ilang kaliwatan pinaagi sa pagpadayon ngadto sa dugay na nga nag-una aron sa pagdala sa ilang mga ngalan ngadto sa templo ug magpahigayon sa mga ordinansa sa kaluwasan ug kahimayaan (tan-awa sa Mga Pagtulun-an sa mga Presidente sa Simbahan: Wilford Woodruff [2004], 092-193).
Family History ug Buhat sa Templo––Usa ra ka Buhat
Usa ka tuig ang milabay (1894), ang samang Presidente Woodruff midumala sa pagtukod sa Genealogical Society sa Utah. Usa ka gatos ka tuig ang milabay, sa 1994 si Elder Russell M. Nelson, niadto sakop sa Korum sa Napulog Duha ka Apostoles. miingon, “Ang mga panghitabo niadtong makasaysayanon nga tuig miestablisar sa pagsiksik sa family history ug sa pagserbisyo sa templo isip usa ka buhat diha sa Simbahan” (The Spirit of Elijah [Ang Espiritu ni Elijah],” Ensign, Nob. 1994, 85).
Buhat sa Family History
Minahal nga mga kaigsoonan, ang Ginoo nagdasig kanato isip mga miyembro sa Iyang Simbahan sa pagpreserbar sa atong kaugalingon nga family history, aron makakat-on gikan sa atong mga katigulangan, ug sa paghimo sa gikinahanglan nga mga paghan-ay aron sila makadawat sa mga ordinansa sa ebanghelyo diha sa mga templo aron sa pagtabang kanila sa paglambo subay sa dalan sa pakigsaad nga mopanalangin kanila ug mahangtoron nga pamilya. Mao kana ang kinauyokan nga katuyoan sa plano sa atong Langitnong Amahan; hiusahon ang pamilya alang niini nga kinabuhi ug alang sa kahangtoran.
Niadtong wala mobati nga makahimo niini nga buhat, kinahanglan kamo nga masayod nga wala kamo mag-inusara. Kitang tanan makadangop ngadto sa mga himan nga giandam sa Simbahan ug nga makit-an sa mga sentro sa FamilySearch nga sa kanhiay atong nailhan nga mga sentro sa family history. Kining mga sentro sa FamilySearch gidesinyo aron nga hapit ang tanan, uban sa gamay nga tabang, makakita sa impormasyon sa ilang katigulangan ug han-ayon kini og maayo aron ila kining madala ngadto sa Ginoo. Palihog kontaka ang inyong mga konsultant sa family history sa inyong ward o branch, kinsa mogiya kaninyo sa matag lakang.
Samtang kita mosunod sa giya sa mga propeta ug magkat-on unsaon sa pagbuhat ang atong family history ug magpahigayon sa mga ordinansa sa templo alang sa atong mga katigulangan, kita makasinati og dakong kalipay hangtod sa punto nga dili na kita mohunong sa pagbuhat sa ingon. Ang Espiritu mosanap sa atong mga kasingkasing, mopukaw sa atong mga galamhan sa pagbuhat niini, ug mogiya kanato samtang kita mangita sa mga ngalan sa atong mga katigulangan. Apan atong hinumdoman nga ang family history labaw pa kay sa mangita lang og mga ngalan, mga petsa, ug mga lugar. Naghiusa kini sa mga pamilya ug makapabati sa kalipay nga moabot gikan sa pagtanyag ngadto kanila sa mga ordinansa sa ebanghelyo.
Ganahan ko sa dinasig nga pagtulun-an sa atong minahal nga propeta nga si Presidente Russell M. Nelson, kinsa namahayag, “Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, samtang kita nagtuman sa atong mga pakigsaad, Siya mohatag kanato sa Iyang makaayo, makapalig-on nga gahom” (“Ang Templo ug ang Inyong Espirituwal nga Pundasyon,” Liahona, Nob. 2021, 93–94).
Sa pagkatinuod, ang buhat sa templo ug family history usa ra ug sama nga buhat diha sa Simbahan.
Ako mopamatuod niini nga mga kamatuoran. Ako nasayod nga mao kini ang Simbahan ni Jesukristo, ang atong Manluluwas ug Manunubos, kinsa atong gihinumdoman ug gitahod karong panahon sa Pasko sa Pagkabanhaw. Ako nasayod nga Siya nahigugma kanato, ug kon kita motuman sa atong mga pakigsaad ug mobutang sa atong pagsalig diha Kaniya, Siya mohatag kanato sa Iyang makaayo ug makapalig-on nga gahom. Sa ngalan ni Jesukristo, amen.