Kinatibuk-ang Komperensiya
Buhing Propeta alang sa Ulahing mga Adlaw
Abril 2023 nga kinatibuk-ang komperensiya


Buhing Propeta alang sa Ulahing mga Adlaw

Ang Amahan sa Langit nagpili sa sundanan sa pagpadayag sa kamatuoran ngadto sa Iyang mga anak pinaagi sa usa ka propeta.

Sa dihang bata pa ko, ganahan kaayo ko og Sabado tungod kay ang tanan nga akong gibuhat nianang adlaw maora og usa ka panimpalad. Apan bisan unsa pa ang akong gibuhat, kanunay kining giunhan sa labing importante sa tanan—ang pagtan-aw og salida nga karton sa telebisyon. Usa niana ka Sabado sa buntag, samtang nagbarog ko dapit sa telebisyon ug nagpilipili og mga tsanel, nabantayan nako nga ang salida nga karton nga akong gilaoman nga makita gipulihan sa usa ka sibya sa kinatibuk-ang komperensiya sa Ang Simbahan ni Jesukristo sa mga Santos sa Ulahing mga Adlaw. Samtang nagtan-aw sa telebisyon ug pirting hilaka kay walay salida nga karton, nakita nako ang usa ka tawo nga puti og buhok nga nagsul-ob og amerkana og korbata nga naglingkod sa nindot nga lingkoranan.

Adunay butang nga lahi mahitungod kaniya, mao nga nangutana ko sa akong kinamagulangang igsoong lalaki, “Kinsa na siya?”

Miingon siya, “Kana si President David O. McKay; propeta siya.”

Nakahinumdom ko nga mibati ug sa wala damhang paagi nasayod nga usa siya ka propeta. Dayon, tungod kay usa ako ka batang lalaki nga ganahan kaayo og karton nga salida, giusab nako ang tsanel. Apan wala gayod nako kalimti kon unsa ang akong gibati atol niadtong makadiyot, wala damha nga nakahatag og rebelasyon nga mubong panahon. Kabahin sa usa ka propeta, usahay nagkinahanglan lamang og mubong panahon aron masayod.1

Ang pagkahibalo pinaagi sa pagpadayag nga adunay buhing propeta sa kalibotan makausab sa tanan.2 Makapawala kini sa gana sa tawo nga makiglalis pa kon kanus-a mamulong ang propeta isip usa ka propeta o kon makataronganon ba nga ang usa ka tawo magpili kon hain sa mga tambag sa propeta ang iyang dawaton o supakon.3 Ang maong pinadayag nga kahibalo modapit sa tawo aron mosalig sa tambag sa usa ka buhing propeta, bisan kon wala kita makasabot niini sa hingpit.4 Hinuon, ang hingpit ug mahigugmaong Amahan sa Langit nagpili sa sundanan sa pagpadayag sa kamatuoran ngadto sa Iyang mga anak pinaagi sa usa ka propeta, ang tawo kinsa wala gayod magtinguha sa maong sagradong tawag ug kinsa wala magkinahanglan sa atong tabang aron makamatngon sa iyang kaugalingong mga kakulangan.5 Ang propeta mao ang usa ka tawo nga personal nga giandam sa Dios, gitawag, gikorehian, gidasig, gibadlong, gibalaan, ug gipaluyohan.6 Mao kana nga dili gayod kita mabutang sa espirituwal nga risgo diha sa pagsunod sa propetikanhon nga tambag.

Ganahan man kita o dili, kitang tanan gipili sa usa ka paagi didto sa kinabuhi sa wala pa dinhi sa yuta aron matawo niining ulahing mga adlaw. Adunay duha ka tinuod nga hitabo nga may kalabotan sa ulahing mga adlaw. Ang unang tinuod nga hitabo mao nga ang Simbahan ni Kristo matukod pag-usab dinhi sa kalibotan. Ang ikaduhang tinuod nga hitabo mao nga ang kinabuhi mahimong hilabihan ka mahagiton. Ang mga kasulatan nagpadayag nga sa kataposang mga adlaw adunay moabot nga “dagko nga yelo nga ipadala aron sa paglaglag sa mga tanom sa yuta,”7 mga katalagman,8 mga gubat ug mga hungihong sa mga gubat, ug ang tibuok yuta magkaguliyang, … ug ang kadaotan modagsang.”9

Niadtong bata pa ko, kadtong mga panagna kabahin sa kataposang mga adlaw nakapahadlok nako ug nakaaghat kanako sa pag-ampo nga ang Ikaduhang Pag-anhi dili moabot sa akong panahon—medyo nagmalamposon ang akong pag-ampo sa pagkakaron. Apan karon sukwahi na ang akong pag-ampo, bisan kon ang gipanagna nga mga hagit seguro nga mahitabo,10 tungod kay kon moabot na si Kristo aron maghari, ang tanan Niya nga mga nilalang “magkinabuhi na sila nga layo sa kakuyaw.”11

Ang kasamtangang mga kondisyon sa kalibotan nakapakugang sa uban. Isip mga anak sa pakigsaad, dili kita kinahanglang mag-apas niini o nianang kawang nga mga butang aron mahibalo kon unsaon nga makalatas niining malisod nga mga panahon. Dili kita kinahanglang mahadlok.12 Ang doktrina ug mga baroganan nga kinahanglan atong sundon aron makasugakod sa espirituwal ug makalahutay sa pisikal nga paagi makita diha sa mga pulong sa usa ka buhi nga propeta.13 Mao kana ang hinungdan nga si Presidente M. Russell Ballard mipahayag nga “dili usa ka gamayng butang … nga adunay propeta sa Dios sa atong taliwala.”14

Si Presidente Russell M. Nelson mipamatuod nga: “Ang dugay nang naestablisar sa Dios nga sundanan sa pagtudlo sa Iyang mga anak pinaagi sa mga propeta nagpasalig kanato nga Siya manalangin sa matag propeta ug nga Siya manalangin niadtong mopatalinghog sa mapanagnaong tambag.”15 Busa ang labing mahinungdanon mao ang pagsunod sa buhing propeta.16 Mga kaigsoonan, dili sama sa karaang mga komiks ug klasiko nga mga sakyanan, ang propetikanhong mga panudlo dili mag-anam og kamahal kon magkadugay. Kana ang hinungdan nganong dili gayod kita magtinguha sa paggamit sa mga pulong sa nangaging mga propeta aron mabaliwala ang mga panudlo sa buhing mga propeta.17

Ganahan kaayo ko sa mga sambingay nga gigamit ni Jesukristo sa pagtudlo og lawom nga mga baroganan sa ebanghelyo. Gusto kong mopakigbahin kaninyo og tinuod nga hitabo sa kinabuhi nga mga sambingay karong buntaga.

Usa ka adlaw miadto ko sa kan-anan sa punoang buhatan sa Simbahan aron maniudto. Pagkahuman nakog kuha og pagkaon, misulod ko sa lawak kan-anan ug nakita nako ang usa ka lamisa diin naglingkod ang tanang tulo ka sakop sa Unang Kapangulohan, tapad sa usa ka bakante nga lingkoranan. Ang akong kaulaw miaghat nako sa paglikay gikan niana nga lamisa, ug dayon nadungog nako ang tingog sa atong propeta, si Presidente Russell M. Nelson, nag-ingon, “Allen, diay bakanteng lingkoranan diri. Dali lingkod diri uban namo.” Ug milingkod ko.

Sa hapit na matapos ang paniudto, nakugang ko sa pagkadungog og lanog nga laguto, ug dihang miyahat ko, nakita nako nga gipabarog ni Presidente Nelson ang iyang plastik nga botelya sa tubig ug dayon gipisat kini ug gipulihan ang tabon.

Nangutana dayon si Presidente Dallin H. Oaks sa pangutana nga gusto nakong isulti, “Presidente Nelson, nganong gipisat man nimo ang imong plastik nga botelya sa tubig?”

Mitubag siya, “Makapasayon kini alang niadtong mag-atiman sa ma-recycle nga mga gamit kay dili kaayo kini magkinahanglan og dakong lugar sa pang-recycle nga sudlanan.”

Samtang namalandong niana nga tubag, nadungog na usab nako ang susama nga lanog nga laguto. Milingi ko sa akong tuo, ug gipisat ni Presidente Oaks ang iyang plastik nga sudlanan sa tubig sama sa gibuhat ni Presidente Nelson. Dayon nadungog nako ang susama nga kanaas sa akong wala, ug si Presidente Henry B. Eyring nagpisat sa iyang plastik nga sudlanan sa tubig, bisan tuod naggamit siya og laing estratehiya pinaagi sa paghimo niini nga naghigda ang botelya, nga migahin og dugang kahago kay sa pinatindog ang botelya. Nakamatikod niini, mabinationg gipakita ni Presidente Nelson ang pinatindog nga teknik aron dali ra nga mapisat ang botelya.

Niadtong puntoha, midap-ig ko ni Presidente Oaks ug hilom nga nangutana, “Ang pagpisat sa inyong plastik nga sudlanan sa tubig mao ba ang bag-ong palakad sa kapeterya sa pag-recycle?”

Si Presidente Oaks mitubag, nga nagpahiyom, “Kuan, Allen, kinahanglan kang mosunod sa propeta.”

Nakaseguro ko nga si Presidente Nelson wala magdeklarar og bag-ong doktrina sa pag-recycle didto sa kapeterya niadtong adlawa. Apan makakat-on kita gikan sa diha-diha nga pagsanong nila18 ni Presidente Oaks ug Presidente Eyring sa ehemplo ni Presidente Nelson ug sa kaabtik ni Presidente Nelson nga motabang sa pagtudlo og mas maayong paagi niadtong misanong.19

Pipila ka tuig na ang milabay, si Elder Neal A. Maxwell mipakigbahin og pipila ka mga obserbasyon ug tambag nga propetikanhong natukma sa atong panahon:

“Sa umaabot nga mga bulan ug mga tuig, ang mga panghitabo lagmit motulod sa matag miyembro sa paghukom kon siya mosunod ba o dili sa Unang Kapangulohan. Ang mga miyembro magduhaduha kon mosunod ba o dili. …

“… Magbilin kita og binuhatan aron ang mga pagpili klaro, tugotan ang uban nga mobuhat sumala sa ilang kagustohan kon makadawat og propetikanhong tambag. …

“Si Jesus miingon nga kon ang kahoyng igera magsugod na sa pagpangudlot, ‘duol na ang ting-init.’ … Ingon nga gipasidan-an nga moabot na ang ting-init, dili kita moreklamo sa kainit!”20

Ang nagtubo nga henerasyon nagdako sa panahon nga mas daghan ang mga dahon sa igera ug mas taas ang kainit. Kana nga reyalidad nagbutang og mas bug-at nga responsibilidad sa nagtubo na nga henerasyon, ilabi na gayod mahitungod sa pagsunod sa propetikanhon nga tambag. Kon ang mga ginikanan mobaliwala sa tambag sa buhing propeta, wala lamang nila mawala ang gisaad nga mga panalangin alang sa ilang kaugalingon apan sa mas dakong trahedya nagtudlo sila sa ilang mga anak nga kon unsa ang gisulti sa propeta walay bili o ang propetikanhong tambag mahimong pilian lamang nga dili mabalaka sa sangpotanan nga kakulang sa espirituwal nga kahimsog.

Si Elder Richard L. Evans sa makausa miingon: “Ang ubang mga ginikanan mobati nga mahimo silang morelaks og gamay sa ilang gawi ug pagsunod … nga puwede silang magpabaya og gamay sa mga sukaranan nga dili maapektohan ang ilang pamilya o ang kaugmaon sa ilang pamilya. Apan, kon ang usa ka ginikanan motipas og gamay, ang ilang mga anak lagmit mas labaw pa nga motipas kay sa ilang mga ginikanan.”21

Isip ang henerasyon nga adunay sagradong katungdanan sa pag-andam sa nagtubo nga henerasyon alang sa gipanagna nga tahas niini sa ulahing mga adlaw,22 ang tahas nga kinahanglan matuman sa panahon nga ang kaaway anaa sa pinakagamhanan niya nga impluwensya,23 dili maayo nga mahimo kitang tinubdan sa kalibog mahitungod sa importansiya sa pagsunod sa propetikanhong tambag. Mao kana ang labing mahinungdanong tambag nga motugot sa nagtubo nga henerasyon nga makakita sa “kaaway samtang layo pa kini; ug unya [maka]pangandam [sila]” sa pagbarog batok sa pag-atake sa kaaway.24 Ang atong maingon tang ginagmay nga mga pagsimang, hilom nga pagbaliwala, o hinagawhaw nga pagsaway agig tubag sa propetikanhong tambag mahimong moresulta sa atong peligro nga paglakaw duol sa ngilit sa dalan sa pakigsaad; apan kon pasobrahan sa kaaway diha sa mga kinabuhi sa nagtubo nga henerasyon, ang maong mga buhat mahimong mo-impluwensiya nila aron hingpit nga mobiya niana nga dalan. Ang maong resulta maoy dako ra kaayo nga bugti alang sa usa ka henerasyon.25

Ang uban kaninyo tingali mobati nga napakyas kamo sa inyong mga paningkamot sa pagsunod sa tambag ni Presidente Russell M. Nelson. Kon mao kana ang nahitabo, paghinulsol dayon, sugdi pag-usab ang pagsunod sa tambag sa pinili nga propeta sa Dios. Ihiplig ang pagbanha sa pambata nga mga salida nga karton ug salig sa dinihogan sa Dios. Pagmaya kay sa makausa pa “may propeta dinhi sa Israel.”26

Bisan kon dili kamo segurado, mopamatuod ko nga makabarog kita batok sa kainit sa ulahing mga adlaw ug gani mouswag diha niini. Kita ang mga Santos sa ulahing mga adlaw, ug mahinungdanon kini nga mga adlaw. Matinguhaon kita nga moanhi sa kalibotan niining panahona, masaligon nga dili kita pasagdan nga madagma kon atubangon sa nagkadugang nga kangitngit ug makalibog nga panganod sa kaaway27 apan hinuon mopatalinghog sa tambag ug direksyon gikan kaniya kinsa mao ang gihatagan og katungod sa pagsulti kanato ug sa tibuok kalibotan nga, “Kini ang gisulti sa Ginoong Dios.”28 Sa sagradong ngalan sa propreta kinsa gipadala sa Dios, ang Balaan sa Israel,29 gani si Jesukristo, amen.

Mubo nga mga Sulat

  1. Si Presidente Russell M. Nelson bag-ohay lang midapit sa mga estudyante sa Brigham Young University sa pagsinati sa sama nga personal nga makahatag og pagpadayag nga kasinatian: “Pangutan-a ang inyong Langitnong Amahan kon kami tinuod ba nga mao ang apostoles ug mga propeta sa Ginoo. Pangutana kon kami nakadawat ba og pagpadayag kabahin niini ug sa ubang mga butang” (“The Love and Laws of God” [Brigham Young University nga debosyonal, Sept. 17, 2019], speeches.byu.edu). Tan-awa usab sa Neil L. Andersen, “Ang Propeta sa Dios,” Liahona, Mayo 2018, 26–27: “Kita adunay pribilehiyo isip mga Santos sa Ulahing mga Adlaw nga makadawat og personal nga pagsaksi nga ang tawag ni Presidente Nelson gikan sa Dios.” Ang istorya sa pagkakabig ni Alma gikan sa pagpaminaw ni propeta Abinadi naghatag og dugang ebidensiya nga ang pagpadayag mahitungod sa usa ka propeta mahimong maangkon kanatong tanan (tan-awa sa Mosiah 13:5; 17:2).

  2. “Kita aduna bay usa ka propeta o kita walay bisan unsa; ug kay adunay propeta, anaa kanato ang tanan” (Gordon B. Hinckley, “We Thank Thee, O God, for a Prophet,” Ensign, Ene. 1974, 122).

  3. “Sila misugod sa dili pagtuo sa espiritu sa pagpanagna ug sa espiritu sa pagpadayag; ug ang mga paghukom sa Dios sa walay kalooy motan-aw kanila sa nawong.” (Helaman 4:23; tan-awa usab sa Doktrina ug mga Pakigsaad 11:25). “Kita mokanta ug kanunay nga naghimo niini, ‘Salamat, O Dios, sa Propeta nga mogiya namo karon.’ Adunay daghan kaayo kinsa [angay nga] modugang niana ug moingon: ‘Kana kon siya mogiya kanato pinasubay sa ato mismo nga mga gusto ug mga hunahuna’” (Mga Pagtulun-an sa mga Presidente sa Simbahan: Heber J. Grant [2002], 95).

  4. “Usahay makadawat kita og tambag nga dili nato masabtan o nga daw dili mapuslanon ngari kanato, bisan human sa mainampingong pag-ampo ug paghunahuna. Ayaw ibaliwala ang tambag, apan hupti kini pag-ayo. Kon ang usa ka tawo nga imong gisaligan mihatag kanimo og daw balas lamang uban ang saad nga kini adunay bulawan, maalamon tingali nga gunitan nimo kini diha sa imong kamot sa makadiyot, mouyog niini sa hinay. Sa matag higayon nga gibuhat ko kana uban ang tambag gikan sa usa ka propeta, sa wala madugay nakita nako ang bili niana nga panudlo ug nagmapasalamaton ko” (Henry B. Eyring, “Finding Safety in Counsel,” Ensign, Mayo 1997, 26; tan-awa usab sa 3 Nephi 1:13; Doktrina ug mga Pakigsaad 1:14).

  5. Tan-awa sa 2 Nephi 4:17–18. “Ayaw ako ipanghimaraot tungod sa akong pagkadili hingpit, ni ang akong amahan, tungod sa iyang pagkadili hingpit, ni sila nga misulat una pa kaniya; apan hinoon pasalamat ngadto sa Dios nga siya mipakita nganha kaninyo sa among pagkadili hingpit, nga kamo unta makakat-on nga magmaalamon labaw pa kay kanamo” (Mormon 9:31).

  6. Tan-awa sa Doktrina ug mga Pakigsaad 3:6–8; tan-awa usab sa Doktrina ug mga Pakigsaad 93:47.

  7. Doktrina ug mga Pakigsaad 29:16.

  8. Tan-awa sa Doktrina ug mga Pakigsaad 84:97; tan-awa usab sa Doktrina ug Pakigsaad 87:6.

  9. Doktrina ug mga Pakigsaad 45:26, 27.

  10. Tan-awa sa Doktrina ug mga Pakigsaad 1:38.

  11. Oseas 2:18. “Kay Ako mopadayag sa akong kaugalingon gikan sa langit uban sa gahom ug dako nga himaya, uban sa tanan nga mga panon niini, ug mopuyo diha sa pagkamatarong uban sa mga tawo diha sa yuta sa kaliboan ka mga tuig, ug ang mga daotan dili makabarog.” (Doktrina ug mga Pakigsaad 29:11).

  12. Tan-awa sa 1 Nephi 22:16–17; tan-awa usab sa Doktrina ug mga Pakigsaad 59:23.

  13. “Kay tan-awa, sila misalikway sa mga pulong sa mga propeta. “Busa, kon ang akong amahan mopuyo gihapon niini nga yuta human siya gisugo sa paglayas gikan sa yuta, tan-awa, siya usab mamatay” (1 Nephi 3:18; tan-awa usab sa 2 Nephi 26:3; Doktrina ug mga Pakigsaad 90:5).

  14. M. Russell Ballard, “His Word Ye Shall Receive,” Liahona, Hulyo 2001, 65.

  15. Russell M. Nelson, “Pangayo, Pangita, Panuktok,” Liahona, Nob. 2009, 82. “Walay tawo nga labaw pang malipay kay sa pagsunod sa tambag sa buhing propeta” (The Teachings of Lorenzo Snow, ed. Clyde J. Williams [1996], 86).

  16. “Ipunting ang inyong mga mata niadtong kinsa nagdumala sa Simbahan karon, o sa umaabot, ug ipahaom ang inyong mga kinabuhi ngadto kanila kay sa maghunahuna kanunay kon unsa kaha ang hunahuna ug gisulti sa karaang mga propeta ” (The Teachings of Harold B. Lee [1996], 525).

  17. Si Presidente Spencer W. Kimball sa makausa miingon nga “sila nga nagpanindot sa mga lubnganan sa mga propeta sa unang panahon nagsugod na karon sa pagbato sa buhing mga propeta” (The Teachings of Spencer W. Kimball, ed. Edward L. Kimball [1982], 462). “Ang labing importanting mga pulong nga atong madungog, mapamalandongan, ug masunod mao kadtong mga gipadayag pinaagi sa atong buhi nga propeta.” (Ronald A. Rasband, “Ang mga Butang sa Akong Kalag,” Liahona, Nob 2021, 40).

  18. “Kon makadungog kita og tambag sa Ginoo nga gipahayag pinaagi sa mga pulong sa Presidente sa Simbahan, kinahanglan nga positibo ang atong pagsanong ug dali” (M. Russell Ballard, His Word Ye Shall Receive,” Liahona, Hulyo 2001, 65).

  19. “Ang Simbahan ni Jesukristo kanunayng gipangulohan sa buhing mga propeta ug mga apostol. Bisan mortal ug ubos sa tawhanong imperpeksyon, ang mga sulugoon sa Ginoo gidasig sa pagtabang nato nga malikay sa mga kalisdanan nga makapameligro sa espirituhanong kinabuhi ug motabang nga luwas kitang makaagi sa mortalidad padulong sa atong kinatas-an, langitnong destinasyon” (M. Russell Ballard, “Dios ang Nagtimon,” Liahona, Nob. 2015, 24).

  20. Neal A. Maxwell, “A More Determined Discipleship,” Ensign, Peb. 1979, 69, 70.

  21. Richard L. Evans, “Foundations of a Happy Home,” sa Conference Report, Okt. 1964, 135–36.

  22. Tan-awa sa Doktrina ug mga Pakigsaad 123:11tan-awa usab sa Robert D. Hales, “Ang Atong Katungdanan ngadto sa Dios: Ang Misyon sa mga Ginikanan ug mga Lider ngadto sa Bag-o nga Kaliwatan,Liahona, Mayo 2010, 95–98.

  23. Tan-awa sa Doktrina ug mga Pakigsaad 52:14.

  24. Doktrina ug mga Pakigsaad 101:54.

  25. Tan-awa sa Mosiah 26:1–4.

  26. 2 Mga Hari 5:8.

  27. “Ikaw maminaw ngadto sa tanan niya nga mga pulong ug mga sugo diin siya mihatag nganha kanimo ingon nga siya nakadawat [niini], … Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahom sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (Doktrina ug mga Pakigsaad 21:4, 6). “Wala pay tawo sukad nga misunod sa mga pagtulun-an o midawat sa tambag gikan sa tawo kinsa nagbarog isip representante sa Ginoo nga nahisalaag” (Doctrines of Salvation: Sermons and Writings of Joseph Fielding Smith, ed. Bruce R. McConkie [1998], 243).

  28. Ezequiel 3:27. “Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailob ug hugot nga pagtuo” (Doktrina ug mga Pakigsaad 21:5).

  29. Tan-awa sa 1 Nephi 22:20–21; tan-awa usab sa 3 Nephi 20:23.