Ang Tingog sa Kalipay!
Ang pagtukod og mga templo mao ang usa sa labing taas nga mga prayoridad sa tanang propeta sukad ni Propeta Joseph Smith.
“Karon, unsa ang atong nadungog mahitungod sa ebanghelyo diin kita nakadawat? Ang tingog sa kalipay! Ang tingog sa kaluoy gikan sa langit; ug tingog sa kamatuoran gikan sa yuta; … ang tingog sa kalipay alang sa mga buhi ug sa mga patay; malipayon nga mga balita sa hingpit nga kalipay.”1
Mga kaigsoonan, hapit imposible nga makadungog niini nga mga pulong gikan ni Propeta Joseph Smith ug nga dili dayon mopahiyom og dako!
Ang masadyaon nga pagpahayag ni Joseph tinud-anay nga nakakuha sa tibuok ug halangdon nga hingpit nga kalipay nga makita diha sa mahinungdanon nga plano sa kalipay sa Dios ang atong Langitnong Amahan, kay Siya mipasalig kanato, “ang mga tawo naingon, nga unta sila makabaton og hingpit nga kalipay.”2
Kitang tanan naninggit sa hingpit nga kalipay3 didto sa atong kinabuhi sa wala pa dinhi sa yuta sa dihang atong nadungog ang plano sa kalipay sa Dios, ug kita magpadayon sa pagsinggit sa hingpit nga kalipay dinhi samtang kita magpakabuhi sumala sa Iyang plano. Apan unsa man gayod ang konteksto alang niining malipayon nga pamahayag gikan sa Propeta? Unsa ang nakadasig niining lawom ug kinasingkasing nga mga pagbati?
Si Propeta Joseph nagatudlo kabahin sa bunyag alang sa mga patay. Kini sa pagkatinuod usa ka mahimayaon nga pagpadayag nga gidawat sa dakong hingpit nga kalipay. Sa dihang ang mga miyembro sa Simbahan unang nakahibalo nga mahimo sila bunyangan alang sa ilang namatay nga mga minahal, sila nagmaya. Si Wilford Woodruff miingon, “Sa higayon nga ako nakadungog kabahin niini, ang akong kalag hilabihan [sa] kalipay!”4
Ang bunyag alang sa atong namatay nga mga minahal dili lamang ang bugtong nga kamatuoran nga ipadayag ug ipahiuli sa Ginoo. Dihay daghang uban pa nga mga gasa, o mga pagtuga, nga mahinamon ang Dios nga ihatag sa Iyang mga anak nga lalaki ug mga anak nga babaye.
Kining uban nga mga gasa naglakip sa awtoridad sa pagkapari, mga pakigsaad ug mga ordinansa, mga kaminyoon nga mahimong molungtad sa kahangtoran, ang pagsilyo sa mga anak ngadto sa ilang mga ginikanan sulod sa pamilya sa Dios, ug sa kataposan ang panalangin sa pagpauli ngadto sa presensiya sa Dios, ang atong Langitnong Amahan ug sa Iyang Anak, si Jesukristo. Tanan niini nga mga panalangin nahimong posible pinaagi sa Pag-ula ni Jesukristo.
Tungod giisip kini sa Dios nga apil sa Iyang labing taas ug labing balaan nga mga panalangin,5 Siya misugo nga tukoron ang sagrado nga mga gambalay [building] diin Siya makatugyan niining bililhon nga mga gasa diha sa Iyang mga anak.6 Kini nga mga gambalay mao ang Iyang panimalay dinhi sa yuta. Kini nga mga gambalay mao ang mga templo diin kana nga gisilyo o gibugkos sa yuta sa Iyang ngalan, pinaagi sa Iyang pulong, ug uban sa Iyang awtoridad mahimong masilyo didto sa kalangitan.7
Isip mga miyembro sa Simbahan karon, mahimong sayon sa uban kanato nga ibaliwala kining mahimayaon nga mahangtoron nga mga kamatuoran. Kini nahimong naandan na nato. Usahay makatabang kon tan-awon nato ang mga templo pinaagi sa panglantaw niadtong kinsa nagkat-on mahitungod niini sa labing una nga higayon. Nahimo kining dayag kanako pinaagi sa usa ka bag-ohay nga kasinatian.
Sa miaging tuig, sa dili pa lang ang pagpahinungod og usab sa Tokyo Japan Temple, daghang bisita nga dili sa atong tinuohan ang milibot niana nga templo. Usa niana nga paglibot naglakip og usa ka mahunahunaon nga lider gikan sa laing relihiyon. Gitudloan namo ang among bisita mahitungod sa plano sa kalipay sa Langitnong Amahan, sa matubsanon nga tahas ni Jesukristo niana nga plano, ug sa doktrina nga ang mga pamilya mahimong mahiusa sa kahangtoran pinaagi sa ordinansa sa pagsilyo.
Sa pagtapos sa paglibot, gidapit nako ang among higala sa pagpakigbahin sa iyang mga pagbati. Nagpasabot sa paghiusa sa mga pamilya—sa miagi, sa kasamtangan, ug sa umaabot—kining maayo nga tawo sinsero kaayo nga nangutana, “Ang mga miyembro sa inyong tinuohan tinud-anay ba nga nakasabot kon unsa ka mahinungdanon kini nga doktrina?” Siya midugang, “Tingali kini ang usa sa bugtong nga mga pagtulon-an nga makahiusa niini nga kalibotan nga nabahin-bahin og maayo.”
Pagkagamhanan nga obserbasyon. Kini nga tawo wala lamang matandog sa maanindot nga pagkahimo sa templo apan hinuon sa makapahingangha ug mahinungdanon nga doktrina nga ang mga pamilya mahiusa ug masilyo ngadto sa Langitnong Amahan ug kang Jesukristo sa kahangtoran.8
Nan, kita dili kinahanglang masorpresa, kon bisan ang usa ka tawo nga dili sa atong tinuohan makaila sa kahalangdon sa unsay mahitabo diha sa templo. Unsay mahimong komon o naandan alang kanato usahay makita sa katahom ug kahalangdon niini niadtong kinsa makadungog niini o makabati niini alang sa labing una nga higayon.
Bisan ang mga templo anaa na sa karaang panahon, uban sa Pagpahiuli sa ebanghelyo ni Jesukristo, ang pagtukod og mga templo mao ang usa ka labing taas nga mga prayoridad sa tanang propeta sukad ni Propeta Joseph Smith. Ug sayon lang makasabot kon ngano.
Sa dihang si Propeta Joseph nagtudlo kabahin sa bunyag alang sa mga patay, siya mipadayag og laing mahinungdanon nga kamatuoran. Siya mitudlo: “Himoa nga ako mopasalig kaninyo nga kini mao ang mga baroganan kalabot sa mga patay ug sa mga buhi nga dili kahatagan og gamay lamang nga pagtagad, ingon kalabot sa atong kaluwasan. Kay ang ilang kaluwasan gikinahanglan ug mahinungdanon sa atong kaluwasan, … sila kon wala kita dili mahingpit—ni kita kon wala ang atong mga patay mahingpit.”9
Sama sa atong makita, ang panginahanglan alang sa mga templo ug ang buhat nga himoon alang sa mga buhi ug sa mga patay nahimong klaro kaayo.
Ang kaaway nakaalerto. Ang iyang gahom nahulga pinaagi sa mga ordinansa ug mga pakigsaad nga gihimo diha sa mga templo, ug buhaton niya ang bisan unsa nga iyang mabuhat aron sa pagpaningkamot sa paghunong sa buhat. Ngano? Tungod nasayod siya sa gahom nga moabot gikan niini nga sagrado nga buhat. Samtang ang matag bag-o nga templo gipahinungod, ang makaluwas nga gahom ni Jesukristo modako sa tibuok kalibotan aron sa pagbatok sa mga paningkamot sa kaaway ug sa pagtubos kanato samtang kita moduol ngadto Kaniya. Samtang ang mga templo ug ang mga tighupot sa pakigsaad magkadaghan, ang kaaway magkahuyang.
Sa nahaunang mga adlaw sa Simbahan, ang uban mabalaka kon mapahibalo ang usa ka bag-o nga templo, kay sila moingon, “Wala kita sukad makatukod og templo nga walay pagpakigbatok nga mahitabo.” Apan si Brigham Young maisogon nga mitubag, “Gusto akong makigbatok sila pag-usab.”10
Dinhi niining mortal nga kinabuhi, kita dili makaikyas sa gubat, apan kita makabaton og gahom batok sa kaaway. Kana nga gahom ug kalig-on maggikan kang Jesukristo samtang kita mohimo ug motuman sa mga pakigsaad sa templo.
Si Presidente Russell M. Nelson mitudlo: “Ang panahon moabot nga kadtong dili mosunod sa Ginoo ibulag gikan niadtong mosunod. Ang atong [labing] luwas nga paniguro mao ang pagpadayon nga mahimong takos nga makasulod sa Iyang balaan nga balay.”11
Ania ang pipila sa dugang nga mga panalangin nga gisaad sa Dios kanato pinaagi sa Iyang propeta:
Nagkinahanglan ba kamo og mga milagro? Ang atong propeta miingon: “Ako mosaad kaninyo nga ang Ginoo mohatag og mga milagro nga Siya nasayod nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”12
Nagkinahanglan ba kamo sa makaayo ug makapalig-on nga gahom sa Manluluwas nga si Jesukristo? Si Presidente Nelson mipasalig pag-usab kanato nga “tanan nga gitudlo diha sa templo … makadugang sa atong pagsabot ni Jesukristo. … Kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom. Ug o, unsa kadako sa atong panginahanglan sa Iyang gahom sa mga adlaw nga umaabot.”13
Sa unang Dominggo sa Lukay, samtang si Jesukristo madaogon nga misulod sa Jerusalem, usa ka panon sa mga disipulo ni Jesukristo ang “[n]agpasalamat ug [n]agdayeg sa Dios sa kusog nga tingog … [nga nag-ingon], Dalaygon ang Hari nga mianhi sa ngalan sa Ginoo!”14
Pagkatukma nga sa Dominggo sa Lukay niadtong 1836, gipahinungod ang Kirtland Temple. Diha niana nga okasyon ang mga disipulo ni Jesukristo nagmaya usab. Niana nga pagpahinungod nga pag-ampo, si Propeta Joseph Smith namahayag niini nga mga pulong sa pagdayeg:
“O Ginoo nga Dios nga Makagagahom sa tanan, dungga kami … ug tubaga kami gikan sa langit, … diin ikaw naglingkod sa trono, uban ang himaya, dungog, gahom, kaharianon, [ug] kusog. …
“… Tabangi kami pinaagi sa gahom sa imong Espiritu, nga kami motipon sa among mga tingog uban niadtong mahayag, ug masiga nga mga serapin sa palibot sa imong trono, uban sa mga pagdayeg sa pagsimba, manag-awit og Hosanna ngadto sa Dios ug sa Kordero!
“Ug himoa kini … ang imong mga santos mosinggit sa makusog tungod sa hingpit nga kalipay.”15
Mga kaigsoonan, karon niining Dominggo sa Lukay, kita isip mga disipulo ni Jesukristo modayeg sa atong balaan nga Dios ug magmaya sa Iyang kaayo kanato. “Unsa ang atong nadungog mahitungod sa ebanghelyo diin kita nakadawat?” Sa pagkatinuod “ang tingog sa kalipay!”16
Ako mosaksi nga mas mobati pa gayod kamo sa hingpit nga kalipay samtang kamo mosulod sa balaan nga mga templo sa Ginoo. Ako mosaksi nga kamo makasinati sa hingpit nga kalipay nga Siya anaa alang kaninyo, sa ngalan ni Jesukristo, amen.