“Abril 3–9. Pasko sa Pagkabanhaw: ‘O Kamatayon, Hain Na Ang Imong Pagkamadaugon?,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Abril 3–9. Pasko sa Pagkabanhaw,” Dali, Sunod Kanako—Alang sa mga Indibidwal ug mga Pamilya: 2023
Abril 3–9
Pasko sa Pagkabanhaw
“O Kamatayon, Hain Na Ang Imong Pagkamadaugon?”
Samtang magbasa ka sa mga pagpamatuod sa Pagkabanhaw sa Manluluwas niini nga latid, timan-i ang mga pagbati ug mga panghunahuna nga moabot nganha kanimo gikan sa Espiritu Santo.
I-rekord ang Imong mga Panghunahuna
Atol sa katapusang semana sa kinabuhi sa Manluluwas, daghang mga Judeo nga naglibot Kaniya nag-apil sa mga tradisyon sa Pagpalabay. Nag-andam sila og mga pagkaon, nanganta, ug nagpundok aron sa paghinumdom sa pagkaluwas sa balay ni Israel gikan sa pagkaulipon ngadto sa mga Ehiptohanon. Ang mga pamilya naminaw sa istorya kabahin sa tiglaglag nga anghel nga milabay sa mga panimalay sa ilang mga katigulangan kinsa mimarka sa ilang mga pultahan og dugo sa nating karnero. Taliwala nining tanang mga kasaulogan nga buhong kaayo sa simbolismo sa pagkaluwas, kon itandi gamay ra ang nakahibalo nga si Jesukristo, ang Kordero sa Dios, hapit na moluwas nila gikan sa pagkaulipon sa sala ug kamatayon—pinaagi sa Iyang pag-antos, sa Iyang kamatayon, ug sa Iyang Pagkabanhaw. Gani, dihay nakaila ni Jesus isip ang ilang gisaad nga Mesiyas, ang ilang mahangturong Tigluwas. Sukad nianang adlawa, ang mga tinun-an ni Jesukristo misaksi ngadto sa tibuok kalibotan “nga si Kristo namatay tungod sa atong mga sala … ; nga siya gilubong, ug nga siya nabanhaw sa ikatulo nga adlaw” (1 Mga Taga-Corinto 15:3–4).
Mga Ideya alang sa Personal nga Pagtuon sa Kasulatan
Si Jesukristo nagluwas kanako gikan sa sala ug sa kamatayon, naglig-on kanako diha sa akong mga kahuyang, ug naghupay kanako diha sa akong mga pagsulay.
Usa ka paagi sa pagtutok sa mga panalangin sa Pag-ula sa Manluluwas niini nga semana mao ang paggahin og panahon matag adlaw sa pagbasa mahitungod sa kataposang semana sa kinabuhi ni Jesus (posible nga iskedyul sa pagbasa nagsunod). Unsa ang imong nakaplagan niini nga mga kapitulo nga nagtabang kanimo sa pagbati sa gugma sa Manluluwas? Palandonga kon unsa ang gitudlo niini nga mga kapitulo kanimo mahitungod kon giunsa nga Siya nakaluwas kanimo gikan sa sala, kamatayon, mga pagsulay, ug mga kahuyang. Sa unsa nga paagi ikaw naggamit sa hugot nga pagtuo sa Iyang gahom sa pagluwas?
-
Dominggo: Madaugong pagsulod ngadto sa Jerusalem (Mateo 21:6–11)
-
Lunes: Paglimpyo sa templo (Mateo 21:12–16)
-
Martes: Nagtudlo sa Jerusalem (Mateo 21–23)
-
Miyerkules: Mipadayon sa pagtudlo (Mateo 24–25)
-
Huwebes: Ang Pagpalabay ug ang pag-antos ni Kristo didto sa Tanaman sa Getsemani (Mateo 26)
-
Biyernes: Paghusay, Paglansang, ug paglubong (Mateo 27:1–61)
-
Sabado: Ang lawas ni Kristo gipahimutang sa lubnganan (Mateo 27:62–66) samtang siya nangalagad didto sa kalibotan sa espiritu (Doktrina ug mga Pakigsaad 138)
-
Dominggo: Pagkabanhaw ni Jesukristo ug pagpakita ngadto sa Iyang mga disipulo (Mateo 28:1–10)
Tan-awa usab sa Easter.ComeuntoChrist.org.
Crucifixion [Paglansang sa Krus], ni Louise Parker
Mateo 28:1–10; Lucas 24:13–35; Juan 20:19–29; 1 Mga Taga-Corinto 15:1–8, 55
Daghang mga saksi ang nagpamatuod sa Pagkabanhaw ni Jesukristo.
Hunahunaa kon sama kaha sa unsa alang sa mga disipulo sa pagtan-aw ni Jesus nga gibugal-bugalan, gidagmalan, ug gilansang. Sila nakasaksi sa Iyang gahom, mibati sa kamatuoran sa Iyang mga pagtulon-an, ug adunay hugot nga pagtuo nga Siya mao ang Anak sa Dios. Nagsaksi sa Iyang kamatayon tingali gayod nakahimo sa Iyang mga disipulo sa pagbati og kaguol ug kalibog. Apan wala magdugay nahimo silang mga saksi sa dakong milagro sa Iyang Pagkabanhaw.
Unsa ang imong makat-onan gikan sa mga istorya niadtong kinsa misaksi sa Nabanhaw nga Manluluwas? Markahi o isulat ang kasinatian sa matag tawo diha sa Mateo 28:1–10; Lucas 24:13–35; Juan 20:19–29; ug 1 Mga Taga-Corinto 15:1–8, 55. (Ang ubang mga saksi sa nabanhaw nga Kristo makita sa 3 Nephi 11; Mormon 1:15; Ether 12:38–39; Doktrina ug mga Pakigsaad 76:19–24; 110:1–10; ug Joseph Smith—Kasaysayan 1:15–17.) Unsa ang nagdani kanimo mahitungod sa mga pagpamatuod niini nga mga saksi? Human sa Pagkabanhaw sa Manluluwas, ang uban nabanhaw ug nagpakita ngadto sa kadaghanan (tan-awa sa Mateo 27:52–53; 3 Nephi 23:9). Giunsa sa imong hugot nga pagtuo diha sa Manluluwas ug sa saad sa pagkabanhaw pag-impluwensiya sa paagi sa imong pagpuyo?
Si Jesukristo naghatag kanako og paglaom ug hingpit nga kalipay.
Unsa nga mga pulong sa 1 Pedro 1:3–11 ang naghatag kanimo og paglaom tungod ni Jesukristo? Kanus-a nimo gibati kana nga paglaom?
Mipamatuod si Elder Gerrit W. Gong nga ang Pagkabanhaw “naghatag og paglaom niadtong nawad-an og mga bahin sa lawas; sa nawad-an sa panan-aw, pangdungog, o sa dili kalakaw; o nawad-an sa maayong pangisip tungod sa sakit, o ubang kakulangan sa kapasidad. Siya makakita kanato. Siya moayo kanato. … [Usab,] kay ang ‘Dios sa iyang kaugalingon miula sa iyang dugo alang sa mga sala sa kalibotan’ [Alma 42:15], … Siya makahimo, uban sa kalooy, sa pagtabang kanato sumala sa atong mga sakit. … Maghinulsol kita ug mobuhat kutob sa mahimo. Siya naglibot kanato sa kahangtoran ‘sa mga bukton sa iyang gugma’ [2 Nephi 1:15]” (“Hosana ug Aleluya—Ang Buhi nga si Jesukristo: Ang Pinakaimportanting Bahin sa Pagpahiuli ug sa Pasko sa Pagkabanhaw,” Liahona, Mayo 2020, 54).
Tan-awa usab sa Alma 27:28; 36:1–24; 3 Nephi 9:11–17; Moroni 7:40–41.
Mga Ideya alang sa Pamilya nga Pagtuon sa Kasulatan ug Home Evening
-
ComeuntoChrist.org.Ang Easter.ComeuntoChrist.org naglangkob og takda sa panahon ug paghulagway sa unsay mahitabo sa matag adlaw sa kataposang semana sa kinabuhi sa Manluluwas. Matag adlaw sa semana ang imong pamilya makaribyo niini nga mga paghulagway aron makahibalo kon unsay gibuhat sa Manluluwas niana nga adlaw, o mahimo kang makabasa sa Iyang kataposang semana diha sa mga kasulatan isip pamilya (tan-awa ang usa ka gisugyot nga lista sa “Mga Ideya alang sa Personal nga Pagtuon sa Kasulatan” sa ibabaw).
-
Mga Himno ug Songbook sa mga Bata.Hunahunaa ang pagdungan og kanta sa mga awit mahitungod sa Pag-ula sa Manluluwas ug sa Pagkabanhaw atol niini nga semana, lakip ang pipila nga dili kaayo sinati nganha kanimo. (Tan-awa ang indeks sa mga hisgotanan sa Mga Himno o Songbook sa mga Bata, ubos sa mga hisgotanan sama sa “Pag-ula,” “Pasko sa Pagkabanhaw,” or “Pagkabanhaw.”) Sa pagtabang sa mga sakop sa pamilya sa pagkat-on sa mga awit, mahimo kang makapakita og mga hulagway nga mobagay sa mga pulong.
-
“Jesus Christ” koleksiyon sa Gospel Library.Ang Gospel Library nga koleksiyon nga giulohan og “Jesukristo” naglakip og mga video, artwork, ug musika nga makatabang sa imong pamilya sa pagsaulog sa Pagkabanhaw sa Manluluwas niining Adlaw sa Pagkabanhaw.
-
“Ang Buhi nga Kristo: Ang Pagpamatuod sa mga Apostoles.”Isip usa ka pamilya, basaha ang “Ang Buhi nga Kristo: Ang Pagpamatuod sa Mga Apostoles” (ChurchofJesusChrist.org). Dapita ang matag sakop sa pamilya sa pagkuha og mensahe sa Adlaw sa Pagkabanhaw gikan niini nga pagpamatuod aron ipakigbahin ngadto sa uban. Sama pananglit, mahimo kang maghimo og mga poster nga i-display sa social media, diha sa imong atubangan nga pultahan, o sa inyong panimalay.
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Si Jesus Nabanhaw; Songbook sa mga Bata,, 44.
Pagpalambo sa Personal nga Pagtuon
Paghimo og makab-ot nga mga tumong. Ang paggahin og pipila ka minuto sa usa ka adlaw sa pagtuon sa mga kasulatan makapanalangin sa imong kinabuhi. Pasalig nga magtuon matag adlaw, pangita og paagi sa pagpahinumdom sa imong kaugalingon sa imong pasalig, ug buhata ang imong labing maayo sa pagsunod niini. Kon ikaw makalimot, ayaw pag-undang. Pagsugod lamang og balik.
Gethsemane [Getsemani], ni Adam Abram