Tanaman nga Lubnganan

Abril 3–9

Pasko sa Pagkabanhaw

“O Kamatayon, Hain Na Ang Imong Kadaogan?”

Gamita ang imong panahon uban sa mga bata sa pagtabang kanila nga makakita sa Pasko sa Pagkabanhaw isip panahon sa pagmaya diha sa Manluluwas ug mapalawman ang ilang pasalamat alang sa Iyang sakripisyo. Ang mga ideya niini nga latid mahimong mapahiangay aron sa pagtabang kanimo sa pagtudlo sa mga bata sa bisan unsang edad.

pagpaambit nga icon

Dapita ang Pagpaambit

Ipakita ang mga hulagway sa Manluluwas diha sa Getsemani, diha sa krus, ug human sa Iyang Pagkabanhaw (tan-awa ang hulagway diha sa latid niini nga semana sa Dali, Sunod Kanako—Alang sa mga Indibidwal ug mga Pamilya ug sa Libro sa mga Hulagway sa Ebanghelyo, mga nu. 56–60). Hangyoa ang mga bata sa pagpaambit sa unsay ilang nahibaloan mahitungod sa mga panghitabo nga gipakita diha sa mga hulagway.

pagtudlo nga icon

Itudlo ang Doktrina: Mas Gagmay nga mga Bata

Si Jesukristo mao ang akong Manluluwas.

Samtang magbasa ka mahitungod sa Pag-ula ni Jesukristo, pamalandongi kon unsaon nimo sa pagtabang ang mga bata nga mobati sa ka dako sa paghigugma ni Jesus kanila.

Posible nga mga Kalihokan

• Ipakita ang hulagway ni Jesus, ug hangyoa ang mga bata sa pagpaambit sa unsay ilang nahibaloan mahitungod sa unsay Iyang gibuhat alang kanato. Ipaambit ang imong pagpamatuod bahin sa gugma sa Manluluwas ug sa Iyang gahom sa pagluwas kanato gikan sa sala. Pagkupot og salamin, ug papuli-puliha ang mga bata sa pagpanalamin. Samtang buhaton kini sa matag bata, isulti, “Si Jesus nahigugma ni [ngalan sa bata], ug Siya makatabang ni [ngalan sa bata] nga makapuyo pag-usab uban sa Langitnong Amahan.”

• Ipakita ang hulagway nga Jesus Nag-ampo sa Getsemani (Libro sa mga Hulagway sa Ebanghelyo, nu. 56) samtang imong isaysay ang istorya ni Jesus nga nag-antos sa Getsemani alang sa mga sala sa kalibotan (tan-awa sa Mateo 26:36–46; Lucas 22:39–44). Pagpamatuod nga tungod sa Iyang pag-antos, mahimo kitang mapasaylo kon makahimo kita og sayop nga pagpili. Mahimo usab nimong gamiton ang “Kapitulo 51: [Si] Jesus Nag-ant[o]s sa Tanaman sa Getsemani” (diha sa Mga Istorya sa Bag-ong Tugon, 129–32).

• Kantaha og dungan ang usa ka awit mahitungod sa gugma ni Jesus alang kanato, sama sa “Gibati Ko ang Gugma sa Akong Manluluwas” (Songbook sa mga Bata, 42–43). Tabangi ang mga bata sa pag-ila sa mga pulong diha sa awit nga naghulagway sa gugma sa Manluluwas. Unsay makatabang kanato nga mobati sa Iyang gugma? Unsaon nato sa pagtabang sa uban nga mobati sa Iyang gugma?

Si Kristo uban ni Maria didto sa walay sulod nga lubnganan

He is Risen [Nabanhaw Siya], ni Greg Olsen

Tungod kay si Jesus namatay ug nabanhaw, ako mabuhi pag-usab.

Unsaon nimo pagtabang ang mga bata nga makasabot nga tungod ni Jesukristo, kita ug ang atong mga minahal mabanhaw sa umaabot nga adlaw?

Posible nga mga Kalihokan

• Tudloi ang mga bata sa istorya sa Pasko sa Pagkabanhaw gamit ang mga hulagway ni Kristo diha sa Getsemani, diha sa krus, ug human sa Iyang Pagkabanhaw, (tan-awa sa Libro sa mga Hulagway sa Ebanghelyo, mga nu. 56–60 ug ang tibuok pahina nga hulagway diha sa latid niini nga semana sa Dali, Sunod Kanako—Alang sa mga Indibidwal ug mga Pamilya). Paguniti sa pipila ka bata ang mga hulagway samtang imong isaysay ang istorya. Sultihi ang mga bata kabahin sa pipila sa mga tawo nga nakakita ni Jesus human Siya nabanhaw, sama ni Maria (tan-awa sa Juan 20:1–18) o ni Tomas (tan-awa sa Juan 20:24–29).

• Pangutan-a ang mga bata kon nganong gisaulog nato ang Pasko sa Pagkabanhaw. Ipasabot nga sa Pasko sa Pagkabanhaw atong gisaulog ang adlaw nga nabanhaw si Jesukristo. Pangutana kon duna bay bata nga gustong mopaambit kon unsay buhaton sa ilang mga pamilya aron sa paghinumdom sa Pagkabanhaw ni Jesukristo.

• Ipasabot nga ang mabanhaw nagpasabot nga mabuhi pag-usab human kita mamatay. Ipaambit ang imong pagpamatuod nga tungod ni Jesukristo, mabanhaw kita—mabuhi kita pag-usab human sa atong kamatayon, ug dili na gayod kita mamatay pag-usab.

• Gamita ang usa ka gwantis sa pagtudlo sa mga bata nga kitang tanan adunay lawas (girepresentar sa gwantis) ug usa ka espiritu (girepresentar sa kamot). Kon kita mamatay, ang atong mga espiritu ug ang atong mga lawas magbulag. Ang atong mga espiritu padayon nga mabuhi, apan ang atong mga lawas dili. Kon mabanhaw kita, ang atong mga espiritu ug mga lawas mahiusa pag-usab. Papuli-puliha ang mga bata sa pagsul-ob sa gwantis ug sa paghubo niini.

• Kantaha og dungan ang usa ka awit sa Pasko sa Pagkabanhaw, sama sa “Nabuhi ba Gay[o]d Pag-usab si Jesus?” o “Si Jesus Nabanhaw” (Songbook sa mga Bata, 45, 44), ug ipakita sa mga bata ang mga hulagway ni Jesus human Siya nabanhaw (tan-awa sa Libro sa mga Hulagway sa Ebanghelyo, mga nu. 59–61).

• Ipakita ang usa ka litrato sa tawo nga imong kaila nga namatay. Ipaambit ang imong pagpamatuod nga siya mabanhaw tungod sa Pag-ula ug Pagkabanhaw ni Jesukristo.

• O ipakita ang laing bidyo sa Pasko sa Pagkabanhaw nga makita sa Easter.ComeuntoChrist.org.

pagtudlo nga icon

Itudlo ang Doktrina: Mas Magulang nga mga Bata

Si Jesus nag-antos alang kanako sa Getsemani ug didto sa krus.

Samtang imong tun-an ang mga kasulatan niini nga semana, pamalandongi kon sa unsang paagi nimo matabangan ang mga bata sa pagpalambo sa ilang hugot nga pagtuo kang Jesukristo ug sa Iyang Pag-ula.

Posible nga mga Kalihokan

• Basaha uban sa mga bata ang Lucas 22:39–44 ug pinili nga mga bersikulo gikan sa Mateo 27:29–50. Dapita sila sa pagpangita sa mga pulong nga makatabang kanila nga makasabot sa unsay nasinati sa Manluluwas didto sa Getsemani ug didto sa krus.

• Tabangi ang mga bata nga makasag-ulo sa ikatulo nga artikulo sa hugot nga pagtuo. Ipaambit ang imong pagpamatuod nga si Jesukristo adunay gahom sa pagluwas kanato gikan sa sala ug gikan sa kamatayon.

• Tabangi ang mga bata sa pag-andam og mubo nga mga pakigpulong mahitungod sa Pag-ula ni Jesukristo nga mahimo nilang mapaambit sa uban. Awhaga sila sa paglakip og kasulatan ug sa ilang pagpamatuod diha sa ilang mga pakigpulong. Kon nagkinahanglan sila og dugang nga tabang, mahimo nilang basahon ang “Pag-ula, Pag-ula sa Dugo” diha sa Giya ngadto sa mga Kasulatan (scriptures.ChurchofJesusChrist.org).

Tungod kay si Jesus namatay ug nabanhaw, ako mabuhi pag-usab.

Ang mga bata nga imong gitudloan makasinati sa umaabot nga adlaw og kamatayon sa usa ka minahal kon wala pa man gani. Tabangi sila nga masayod nga tungod kay si Jesukristo nabanhaw, kitang tanan mabanhaw.

Posible nga mga Kalihokan

• Ipakita ang mga hulagway mga nu. 57–59 diha sa Libro sa mga Hulagway sa Ebanghelyo, ug hangyoa ang mga bata sa pagtugma sa mga hulagway ngadto sa mosunod nga mga tudling: Mateo 27:29–38, 59–60; Juan 20:10–18.

• Dapita ang mga bata nga tinagsang basahon ang “Pagkabanhaw” diha sa Giya ngadto sa mga Kasulatan (scriptures.ChurchofJesusChrist.org) ug mangita og usa ka butang nga ganahan nilang itudlo sa ilang mga pamilya. Hatagi ang mga bata og panahon sa pagpaambit sa unsay ilang nakit-an.

• Tabangi ang mga bata nga motan-aw diha sa indeks sa mga hilisg[o]tan sa Songbook sa mga Bata aron mangita og usa ka awit nga gusto nilang kantahon mahitungod ni Jesukristo o sa Pagkabanhaw. Kantaha og dungan ang awit, ug hangyoa ang mga bata kon unsay ilang nakat-onan gikan niini nga awit.

• Dapita ang pipila ka bata sa pagpaambit sa ilang mga pagpamatuod mahitungod sa Pag-ula ug Pagkabanhaw sa Manluluwas. (Mahimo nimong hangyoon ang mga bata sa pagbuhat niini pipila ka adlaw sa dili pa ang klase aron makapangandam sila.) Dapita ang mga bata sa pagsulat sa ilang mga pagpamatuod aron ipaambit sa panimalay.

pagkat-on nga icon

Awhaga ang Pagkat-on diha sa Panimalay

Aron matabangan ang mga bata sa pagpaambit sa unsay ilang nakat-onan ngadto sa ilang mga pamilya, awhaga sila sa pagkanta og awit mahitungod ni Jesukristo diha sa panimalay niining semanaha.

Pagpalambo sa Atong Pagtudlo

Ang mga bata makabenepisyo gikan sa pagbalik-balik. Ayaw kahadlok nga ibalik-balik ang mga kalihokan sa makadaghang higayon, ilabi na sa gagmayng mga bata. Ang pagbalik-balik makatabang sa mga bata nga mahinumdom sa unsay imong gitudlo.

pahina sa kalihokan: Mabuhi ako pag-usab