“Marso 27–Abril 2. Mateo 14; Marcos 6; Juan 5–6: ‘Ayaw Kamo Kahadlok,’” Dali, Sunod Kanako—Alang sa Primary: Bag-ong Tugon 2023 (2022)
“Marso 27–Abril 2. Mateo 14; Marcos 6; Juan 5–6,” Dali, Sunod Kanako—Alang sa Primary: 2023
Marso 27–Abril 2
Mateo 14; Marcos 6; Juan 5–6
“Ayaw Kamo Kahadlok”
Samtang mangandam ka sa pagtudlo gikan sa Mateo 14; Marcos 6; ug Juan 5–6, pangita og mga mensahe nga mahinungdanon ngadto sa kinabuhi sa mga bata nga imong gitudloan. Unsa kaha ang makatabang kanila nga makasabot niini nga mga mensahe? Kini nga latid mahimong makahatag kanimo og mga ideya.
Dapita ang Pagpaambit
Ipakita ang hulagway ni Jesus nga naglakaw sa tubig (tan-awa ang latid karong semanaha diha sa Dali, Sunod Kanako—Alang sa mga Indibidwal ug mga Pamilya o Libro sa mga Hulagway sa Ebanghelyo, nu. 43), ug hangyoa ang mga bata sa pagpaambit sa unsay ilang nahibaloan mahitungod sa istorya.
Itudlo ang Doktrina: Mas Gagmay nga mga Bata
Si Jesukristo nasayod sa unsay akong gikinahanglan ug makatabang kanako.
Pamalandongi ang istorya ni Jesus nga miayo sa lalaki diha sa linaw sa Betsata. Unsaon nimo sa pagtabang ang mga bata nga makakita kon unsay gitudlo sa istorya mahitungod sa kamabination, gugma, ug ubang mga hiyas ni Jesus?
Posible nga mga Kalihokan
-
Gamita ang hulagway nga Kristo Nag-ayo sa Masakiton didto sa Betsata (Libro sa mga Hulagway sa Ebanghelyo, nu. 42) aron sa pagsugilon sa mga bata sa istorya diha sa Juan 5:1–9. Hangyoa ang mga bata sa paghanduraw nga sila ang tawo nga giayo ni Jesus. Unsa kaha ang ilang bation sa dihang giayo sila ni Jesus?
-
Hangyoa ang mga bata sa pagngalan og pipila ka butang nga lisod alang kanila o nga makapaguol kanila. Suginli sila mahitungod sa usa ka higayon sa imong kinabuhi sa dihang nakadawat ka og tabang gikan sa Manluluwas atol sa usa ka lisod nga pagsulay. Ipamatuod nga si Jesus nahibalo sa tanan natong mga problema ug gustong motabang kanato.
Nagsunod ako sa ehemplo ni Jesus kon magmabination ako sa uban.
Usa ka paagi nga mipakita si Jesus og gugma mao ang pagpakaon sa Iyang mga sumusunod sa dihang gigutom sila. Unsaon nimo sa pagtabang sa mga bata nga makakat-on sa pagserbisyo sa uban sama sa gibuhat ni Jesus?
Posible nga mga Kalihokan
-
Pakit-a ang mga bata og bukag ug pipila ka pan samtang imong isugilon ang istorya sa Mateo 14:13–21. Ipasabot nga bisan tuod si Jesus misulay sa pagpangita og dapit nga mag-inusara, ang mga tawo gusto nga magpaduol Kaniya. Ipaambit ang sumpay sa istorya ngadto sa mga bata, ug hangyoa sila sa pagpaminaw kon unsay gibuhat ni Jesus aron sa pagpakita og kamabination ug gugma alang sa mga tawo.
-
Hangyoa ang mga bata sa pagpaambit og mga paagi diin ang usa ka tawo nagmabination kanila. Dayon tabangi sila sa paghunahuna og mga butang nga ilang mabuhat niini nga semana aron magmabination sa uban. Alang sa matag tubag nga ilang ihatag, pagdrowing og usa ka piraso sa pan o isda diha sa pisara. Sultihi ang mga bata nga kon buhaton nila kining mga butanga, nagsunod sila sa ehemplo nga gipakita ni Jesus sa dihang gipakaon Niya ang lima ka libo ka tawo nga gigutom.
Ang hugot nga pagtuo diha ni Jesukristo makatabang kanako nga dili mahadlok.
Si Pedro mipakita og dakong hugot nga pagtuo sa dihang milakaw siya sa tubig padulong ngadto ni Jesus. Unsa nga mga leksiyon kaha ang anaa niini nga istorya alang sa mga bata?
Posible nga mga Kalihokan
-
Ipakita ang hulagway diha sa latid karong semanaha sa Dali, Sunod Kanako—Alang sa mga Indibidwal ug mga Pamilya (tan-awa usab sa Libro sa mga Hulagway sa Ebanghelyo, nu. 43), samtang isugilon nimo ang istorya gikan sa Mateo 14:22–33 gamit ang imong kaugalingon nga mga pulong. Ikonsiderar ang paggamit sa pahina sa kalihokan karong semanaha aron sa pagtabang sa mga bata sa pagsugilon sa istorya balik kanimo. Makadala usab ka og gamay nga panaksan sa tubig ug dapiton ang mga bata nga magpakaaron-ingnon nga “ilakaw” ang ilang mga tudlo sa ibabaw sa tubig.
-
Dayon hangyoa sila sa pagsugilon kabahin sa mga panahon sa dihang mibati sila og kahadlok ug sa pagpaambit kon unsay nakatabang kanila. Tabangi sila nga makakita nga ang hugot nga pagtuo kang Jesukristo makatabang kanato sa pagbuntog sa kahadlok.
Itudlo ang Doktrina: Mas Magulang nga mga Bata
Si Jesukristo nagtudlo kanako mahitungod sa Langitnong Amahan.
Sa unsang paagi ang mga pagtulon-an ni Jesus mahitungod sa Iyang Amahan makatabang sa mga bata nga makat-on mahitungod sa Langitnong Amahan?
Posible nga mga Kalihokan
-
Paghimo og duha ka hugpong sa magkapares nga mga kard nga gisulatan sa mga pulong nga gigamit ni Jesus sa pagtudlo mahitungod sa Langitnong Amahan diha sa Juan 5, sama sa gugma, kinabuhi, ug mga buhat (tan-awa sa Juan 5:20, 26, 36). Ikulob ang mga kard, ug hangyoa ang mga bata sa pagpangita sa mga magkapares nga kard pinaagi sa pagpahayang og duha ka kard sa matag higayon. Sa matag magkapares nga kard nga maukban, basaha ang bersikulo nga anaa ang pulong, ug pangutan-a ang mga bata kon unsa ang gitudlo sa pulong kanato mahitungod sa Langitnong Amahan.
-
Hangyoa ang mga bata sa pagbasa sa Juan 5:30 ug dayon sa pagkompleto niini nga kapahayag: “Wala man ako magtinguha pagbuhat sa akong kabubut-on kondili …” Giunsa pagbuhat ni Jesukristo ang kabubut-on sa Iyang Langitnong Amahan? Unsaon nato pagbuhat ang kabubut-on sa Langitnong Amahan?
Milagrosong gipakaon ni Jesus ang lima ka libo ka tawo pinaagi sa lima ka piraso nga tinapay ug duha ka isda.
Ang akong gagmay nga mga halad makahimo og kalainan.
Usa kadto ka gamayng bata kinsa mihatag sa pan ug isda nga gigamit ni Jesus sa pagpakaon sa lima ka libo. Unsaon nimo pagtabang ang mga bata nga imong gitudloan nga makakita kon sa unsang paagi sila makatampo ngadto sa buhat sa Ginoo?
Posible nga mga Kalihokan
-
Tabangi ang mga bata sa paghanduraw kon unsa ka dako ang lima ka libo nga pundok sa mga tawo. Sama sa unsa kaha ang pagpakaon sa ingon ka daghang tawo gamit ang lima ka tinapay ug duha ka isda lamang?
-
Dapita ang usa ka bata sa pagsaysay sa istorya sa pagpakaon sa lima ka libo gamit ang iyang kaugalingon nga mga pulong. Ipasabot og maayo nga usa kadto ka bata nga lalaki kinsa mihatag sa pan ug isda nga gigamit sa Ginoo sa paghimo niini nga milagro. Sa unsang paagi kita mamahimong sama sa batang lalaki nga gihulagway diha sa Juan 6:9? Dapita ang mga bata sa pagdrowing og mga tinapay ug isda diha sa papel ug sa pagsulat diha niini og pipila ka butang nga ilang ikahatag sa Ginoo aron sa pagtabang sa Iyang buhat.
-
Hatagi ang mga bata og gamay nga puzzle nga sulbaron. Unsa ang mahitabo kon ang usa sa mga piraso sa puzzle mawala? Ipasabot nga ang matag usa kanato sama sa usa ka piraso sa puzzle—kitang tanan importante, ug kitang tanan nagkinahanglan sa usag usa. Tabangi ang mga bata sa pagtino og mga rason nga sila importante sa ilang mga pamilya, sa ilang klase sa Primary, sa pamilya sa Dios, ug sa ubang mga grupo.
Ang hugot nga pagtuo diha ni Jesukristo makatabang kanako nga dili mahadlok.
Ang hugot nga pagtuo ug kahadlok adunay importanting mga parte diha sa istorya nila ni Jesus ug Pedro nga naglakaw sa dagat. Unsa ang makat-onan sa mga bata gikan niini nga istorya?
Posible nga mga Kalihokan
-
Ipakita ang hulagway diha sa latid karong semanaha sa Dali, Sunod Kanako—Alang sa mga Indibidwal ug mga Pamilya (tan-awa usab sa Libro sa mga Hulagway sa Ebanghelyo, nu. 43). Hangyoa ang mga bata sa pagpangita og mga pulongan diha sa Mateo 14:22–33 nga naghulagway sa litrato.
-
Hangyoa ang mga bata sa pagpangita og mga timailhan sa hugot nga pagtuo ug mga timailhan sa kahadlok samtang basahon nila ang Mateo 14:22–33. Unsa man ang buot ipasabot sa pagbaton og hugot nga pagtuo diha kang Jesukristo? Tabangi ang mga bata sa paghunahuna sa mga panahon sa dihang ang ilang hugot nga pagtuo mitabang kanila sa pagbuntog sa kahadlok.
-
Hangyoa ang mga bata sa paghanduraw nga anaa sila didto ug adunay kamera sa dihang si Jesus ug si Pedro milakaw sa dagat. Unsa nga gutlo ang pilion nila nga litratohan ug ngano? Isugyot nga siksikon nila ang Mateo 14:22–33 alang sa mga ideya. Dapita sila sa pagdrowing og hulagway sa gutlo nga ilang gipili, sa pagpaambit sa ilang mga hulagway, ug sa pagpasabot kon nganong gipili nila kadto nga gutlo.
Awhaga ang Pagkat-on diha sa Panimalay
Kon nakompleto sa mga bata ang pahina sa kalihokan karong semanaha, dapita sila sa paggamit niini aron sa pagtudlo sa ilang mga pamilya sa unsay ilang nakat-onan sa klase. O hatagi sila og kopya sa pahina aron kompletohon uban sa ilang mga pamilya sa panimalay.
Pagpalambo sa Atong Pagtudlo
Dapita ang pagpaambit. Pangutan-a ang mga bata mahitungod sa ilang mga hunahuna, mga pagbati, ug mga kasinatian. Imong makita nga kasagaran aduna silay yano apan mahinungdanon nga mga ideya.