“Abril 24–30. Juan 7–10: ‘Ako Mao ang Maayong Magbalantay sa mga Karnero,’” Dali, Sunod Kanako—Alang sa Primary: Bag-ong Tugon 2023 (2022)
“Abril 24–30. Juan 7–10,” Dali, Sunod Kanako—Alang sa Primary: 2023
Neither Do I Condemn Thee [Bisan Ako Dili Usab Mosilot Kanimo], ni Eva Koleva Timothy
Abril 24–30
Juan 7–10
“Ako Mao ang Maayong Magbalantay sa mga Karnero”
Samtang imong basahon ang Juan 7–10, hunahunaa ang mga bata nga imong gitudloan. Daghan sa mga ideya alang sa mas magulang mga bata niini nga latid mahimo usab nga mapahiangay alang sa mas gagmay nga mga bata, o vice versa.
Dapita ang Pagpaambit
Pahinumdomi ang mga bata sa butang nga gidapit nimo nga ilang buhaton sa miaging leksiyon. Hangyoa sila sa pagpaambit sa unsay ilang gihimo aron sa pagbuhat sa imbitasyon.
Itudlo ang Doktrina: Mas Gagmay nga mga Bata
Ang pagsunod sa mga sugo motabang kanako nga masayod nga kini tinuod.
Si Jesus mitudlo nga makaangkon kita og pagpamatuod sa mga kamatuoran nga Iyang gipaambit samtang mosunod kita niini. Ang kalinaw nga atong mabati kon kita mosunod sa mga sugo makatabang kanato nga masayod nga kini tinuod. Hunahunaa kon unsaon nimo sa pagtudlo sa mga bata niini nga kamatuoran.
Posible nga mga Kalihokan
-
I-summarize ang Juan 7:17 gamit ang mga pulong nga masabtan sa mga bata. Tabangi sila nga masayod nga ang pagsunod sa mga sugo makatabang kanato nga mobati nga mas duol kang Jesukristo. Sama pananglit, mahimo kamong manganta og dungan sa usa ka awit sama sa “Sunda ang Kasugoan” o “Pilia ang Matar[o]ng nga Paagi” (Songbook sa mga Bata, 68–69, 82). Hangyoa ang mga bata sa pagpaminaw kon sa unsang paagi kita mapanalanginan kon mosunod kita sa mga sugo.
-
Pagpaambit og kasinatian sa dihang nakabaton ka og pagpamatuod nga ang usa ka sugo gikan sa Dios tungod kay gisunod nimo kana nga sugo, sama sa pagbayad og ikapulo o sa pagpasaylo sa usa ka tawo nga dili mabination. Dapita ang mga bata sa paghunahuna og usa sa ilang kasinatian sa dihang misunod sila og usa ka sugo. Hangyoa sila sa pagpaambit kon unsay ilang gibati sa dihang misunod sila.
-
Hangyoa ang mga bata sa pagdrowing og mga hulagway sa ilang mga kaugalingon nga nagsunod sa usa ka sugo. (Tabangi sila sa paghunahuna og mga ehemplo.) Dapita sila sa pagpaambit sa ilang mga hulagway ngadto sa usag usa ug sa paghisgot mahitungod sa kalipay nga ilang makuha gikan sa pagsunod niana nga sugo.
Si Jesus misunod sa Iyang Amahan.
Si Jesukristo kanunay nga nagbuhat sa mga butang nga nakapahimuot sa Iyang Amahan sa Langit. Unsaon nimo pagtabang ang mga bata nga makakita og mga paagi sa pagsunod sa Iyang ehemplo?
Posible nga mga Kalihokan
-
Tabangi ang mga bata nga sublion ang unsay gisulti ni Jesus mahitungod sa Langitnong Amahan diha sa Juan 8:29: “Nagbuhat man ako kanunay sa makapahimuot kaniya.” Hangyoa sila sa pagpaambit og mga butang nga gibuhat ni Jesus nga nakalipay sa Langitnong Amahan. Pakit-a sila og pipila ka hulagway gikan sa Libro sa mga Hulagway sa Ebanghelyo aron sa paghatag kanila og mga ideya.
-
Pangutan-a ang mga bata kon unsa ang makapalipay kanila. O dapita ang usa ka ginikanan sa usa sa mga bata sa pagpaambit og kasinatian sa dihang ang bata adunay gihimong butang nga nakapahimuot, o nakapalipay sa ginikanan. Unsay atong mabuhat aron mahimong malipayon ang Langitnong Amahan? Dapita ang mga bata sa pagdrowing og mga hulagway sa ilang mga kaugalingon nga nagbuhat niadto nga mga kalihokan aron madala sa panimalay ug mopahinumdom kanila.
Si Jesus nakaila kanako ug nahigugma kanako.
Ang sambingay sa maayong magbalantay sa mga karnero makatabang sa mga bata nga makasabot nga si Jesus nahigugma kanila ug nakaila kinsa sila.
Posible nga mga Kalihokan
-
Hatagi ang mga bata og mga hulagway nga nagrepresentar og usa ka butang diha sa sambingay sa maayong magbalantay sa mga karnero, sama sa karnero, magbalantay sa mga karnero, o lobo. Pagpili og pipila ka bersikulo gikan sa Juan 10:1–16 nga basahon ngadto sa mga bata, ug hangyoa sila sa pag-isa sa ilang mga hulagway kon makadungog sila nimo nga mobasa mahitungod sa mga butang diha sa ilang mga hulagway. Tabangi ang mga bata nga maghunahuna og mga paagi nga si Jesus sama sa usa ka magbalantay sa mga karnero alang kanato. Ipaambit ang imong pagpamatuod nga ang Manluluwas nahigugma kanato ug mogiya kanato balik ngadto Kaniya.
-
Ipakita ang hulagway ni Jesus ug sa mga nating karnero diha sa latid niini nga semana diha sa Dali, Sunod Kanako—Alang sa mga Indibidwal ug mga Pamilya. Unsaon nato pagkahibalo nga gihigugma ni Jesus ang mga nating karnero? Unsaon nato pagtino nga ang mga nating karnero nahigugma kang Jesus? Unsaon nato pagpakita kang Jesus nga gihigugma nato Siya?
Itudlo ang Doktrina: Mas Magulang nga mga Bata
Ang pagsunod sa mga sugo motabang kanako nga masayod nga kini tinuod.
Ikaw ug ang mga bata nga imong gitudloan tingali adunay mga kasinatian sa pagsunod sa mga kamatuoran sa ebanghelyo ug pagkat-on nga kini mga tinuod. Sa unsang paagi nimo magamit kadto nga mga kasinatian samtang ikaw magtudlo?
Posible nga mga Kalihokan
-
Isulat ang matag bersikulo sa Juan 7:14–17 sa managlahi nga mga piraso sa papel, ug ipakita kini nga dili magsunod. Hangyoa ang mga bata sa pagbutang niini sa husto nga han-ay ug susiha ang Juan 7:14–17 aron sa pagsuta kon husto kini. Dapita ang mga bata nga magpares-pares ug ipaambit unsay ilang pagsabot sa matag bersikulo ngadto sa ilang pares. Sa unsang paagi ang pagsunod sa mga sugo sa Dios nakatabang kanila nga mahibalo nga ang mga sugo tinuod?
-
Pagpaambit og mga ehemplo gikan sa mga kasulatan nga nagpakita kon sa unsang paagi nga ang mga tawo napanalanginan tungod sa pagsunod sa mga kamatuoran sa ebanghelyo, sama ni Daniel (tan-awa sa Daniel 6) o ni Elisabet (tan-awa sa Lucas 1:5–14). Unsa nga mga panalangin ang gihatag kanato tungod sa pagsunod sa mga sugo?
-
Pipila ka adlaw sa dili pa magklase, dapita ang usa sa mga bata sa pagsulat mahitungod sa usa ka higayon nga nakaangkon siya og pagpamatuod mahitungod sa usa ka sugo pinaagi sa pagsunod niini. Atol sa klase, hangyoa ang bata sa pagpaambit sa unsay iyang gisulat.
Ang kamatuoran makahatag kanako og kagawasan.
Ang ubang mga tawo naghunahuna nga ang pagsunod sa ebanghelyo nagpugong kanila. Sa unsang paagi nimo magamit ang Juan 8:31–36 aron sa pagtabang sa mga bata nga makasabot nga ang pagsunod sa ebanghelyo sa pagkatinuod makahatag kanato og kagawasan?
Posible nga mga Kalihokan
-
Dapita ang mga bata sa pagbasa sa Juan 8:31–36 ug sa pagpaambit kon unsay ilang hunahuna nga gipasabot nga mahimong ulipon sa sala. Sa unsang paagi nga ang mga pagtulon-an ni Jesus makatabang kanato nga mahimong gawasnon?
-
Pagpakita og kandado nga magrepresentar sa sala ug usa ka yawe nga magrepresentar kon sa unsang paagi ang mga kamatuoran sa ebanghelyo makahimo kanato nga gawasnon. Sama pananglit, ang pagkasayod kabahin sa Pag-ula sa Manluluwas makahatag kanato og kagawasan sa paghinulsol ug mapasaylo sa atong mga sala. O ang pagkasayod mahitungod sa Pulong sa Kaalam makahatag kanato og kagawasan nga malikay sa pagkaadik.
Si Jesus mitudlo, “Ang kamatuoran maghatag kaninyog kagawasan” (Juan 8:32).
Si Jesus sama sa usa ka magbalantay sa mga karnero alang kanako.
Samtang magtuon ka sa sambingay sa maayo nga magbalantay sa mga karnero, pangita og mga kamatuoran nga gitudlo niini mahitungod sa atong relasyon ngadto sa Manluluwas. Sa unsang paagi ang pagkahibalo niini nga mga kamatuoran mopanalangin sa mga bata?
Posible nga mga Kalihokan
-
Isulat ang maayong magbalantay sa mga karnero ug sinuholan diha sa pisara. Ipasabot nga ang sinuholan mao ang usa ka tawo nga gipatrabaho bugti sa kwarta. Hangyoa ang mga bata sa paglista sa mga kalainan nga ilang makita diha sa Juan 10:1–18 tali sa usa ka maayong magbalantay sa mga karnero ug sa usa ka sinuholan. Nganong gusto man ninyong sundon ang maayong magbalantay sa mga karnero kay sa sinuholan? Sa unsang paagi si Jesus sama sa usa ka magbalantay sa mga karnero ngari kanato?
-
Pagdrowing o pagpakita og usa ka hulagway sa pultahan. Basaha og dungan ang Juan 10:7–9, ug pangutan-a ang mga bata kon sa unsang paagi si Jesus sama sa usa ka pultahan. Sumala sa bersikulo 9, unsa nga mga panalangin ang moabot niadtong “mosulod” sa pultahan? Unsaon nato sa pagsulod sa pultahan nga giandam ni Jesukristo kanato?
Awhaga ang Pagkat-on diha sa Panimalay
Tabangi ang mga bata sa paghunahuna og usa ka sugo nga mas hingpit nilang masunod. Hangyoa sila nga maningkamot sa pagsunod niana nga sugo atol sa umaabot nga semana.
Pagpalambo sa Atong Pagtudlo
Mangutana og dinasig nga mga pangutana. Mohatag og mga pangutana nga makadapit sa mga bata nga imong gitudloan nga mohimo og labaw pa kay sa pag-report lang sa mga panghitabo. Hinuon, awhaga sila sa pagpaambit sa ilang mga pagpamatuod bahin sa mga kamatuoran sa ebanghelyo. Sama pananglit, kon naghisgot ka sa mga sugo, mahimo nimong hangyoon ang mga bata sa pagpaambit kon sa unsang paagi nga ang pagsunod sa mga sugo nakapanalangin kanila.