“Marso 20–26. Mateo 13; Lucas 8; 13: ‘Busa Kon Aduna Kamoy Dalunggan, Pamati,’” Dali, Sunod Kanako—Alang sa Primary: Bag-ong Tugon 2023 (2022)
“Marso 20–26. Mateo 13; Lucas 8; 13,” Dali, Sunod Kanako—Alang sa Primary: 2023
Marso 20–26
Mateo 13; Lucas 8; 13
“Busa Kon Aduna Kamoy Dalunggan, Pamati”
Ang mga sambingay mga yano nga mga istorya nga makapainteres sa mga bata. Kini nga latid ug ang Dali, Sunod Kanako—Alang sa mga Indibidwal ug mga Pamilya makatabang kanimo sa paggamit sa mga sambingay sa Manluluwas aron sa pagtudlo sa mga bata og importante nga mga kamatuoran.
Dapita ang Pagpaambit
Pagdala og pipila ka butang nga makatabang sa mga bata nga makahinumdom sa pipila sa mga sambingay diha sa Mateo 13, sama sa usa ka binhi, perlas, o kahon sa bahandi. Dapita ang mga bata sa pagpaambit kon unsa ang ilang nahinumdoman bahin sa mga sambingay.
Itudlo ang Doktrina: Mas Gagmay nga mga Bata
Kinahanglang mangandam ko sa pagkat-on sa mga pagtulon-an ni Jesus.
Ang mas gagmay nga mga bata tingali dili makasabot sa tanang simbolismo diha sa sambingay sa magpupugas, apan makakat-on sila sa yano nga mga kamatuoran sa ebanghelyo nga gitudlo niini. Unsaon nimo sila pagtabang nga mas makasabot kon sa unsang paagi nga kini nga sambingay adunay kalabotan kanila?
Posible nga mga Kalihokan
-
Ipakita ang lainlaing matang sa yuta (o mga litrato sa yuta) samtang imong i-summarize ang Mateo 13:3–8. Hatagi ang matag bata og binhi, ug pangutana kon unsay ilang mabuhat aron matabangan nga motubo ang mga binhi. Ipasabot nga ang atong mga pagpamatuod sama sa mga binhi. Sa unsang paagi nato matabangan nga motubo ang atong mga “binhi” sa pagpamatuod?
-
Gamita ang pahina sa kalihokan karong semanaha aron sa pagtabang sa mga bata nga makasabot kon unsa ang gitudlo sa matag matang sa yuta nga gihulagway diha sa Mateo 13 mahitungod sa atong mga kasingkasing. Pangutan-a ang mga bata kon unsa nga matang sa kasingkasing ang gusto ni Jesus nga ilang mabatonan aron makakat-on sa Iyang mga pagtulon-an.
-
Basaha ang Mateo 13:9, 15, ug dapita ang mga bata nga itudlo ang lainlaing parte sa ilang lawas kon makadungog sila nga masulti kini. Sa unsang paagi nato magamit kini nga mga parte sa lawas aron makakat-on sa mga pagtulon-an ni Jesus?
Gusto sa Langitnong Amahan nga mopili ko sa matarong.
Pipila sa mga sambingay ni Jesus nagtudlo nga sa kataposan nga adlaw, ibulag sa Dios ang daotan gikan sa mga matarong. Sa unsang paagi nimo magamit ang mga sambingay aron sa pagdasig sa mga bata nga mopili sa matarong?
Posible nga mga Kalihokan
-
Ipadrama-drama sa mga bata ang sambingay sa trigo ug mga sagbot (tan-awa sa Mateo 13:24–30). Ipasabot nga ang trigo nagrepresentar sa mga tawo kinsa mihimo og matarong nga mga pagpili, ug ang mga sagbot (makadaot nga mga sagbot) nagrepresentar sa mga tawo nga wala mohimo niini. Usa ka adlaw, ang Langitnong Amahan mopundok sa matarong nga mga tawo aron mopuyo uban Kaniya.
-
Hatagi ang mga bata og pipila ka ehemplo sa matarong ug sayop nga mga pagpili. Hangyoa ang mga bata sa pagsulti og “trigo nga pagpili” kon mohulagway ka og matarong nga pagpili ug “sagbot nga pagpili” kon mohulagway ka og sayop nga pagpili.
-
Pagdala og mga hulagway sa mga punoan sa trigo, ug padrowinga ang mga bata diha sa mga hulagway og pipila ka paagi nga mahimo silang matarong.
Ang akong pagkamiyembro sa Ang Simbahan ni Jesukristo sa mga Santos sa Ulahing mga Adlaw usa ka bahandi.
Unsaon nimo paggamit ang simbolismo sa bahandi ug bililhon nga mga perlas aron sa pagtabang sa mga bata nga makasabot sa bili sa pagkahimong sakop sa Simbahan ni Kristo?
Posible nga mga Kalihokan
-
Pagtago og mga hulagway sa kaban sa bahandi ug perlas diha sa lawak, ug ipapangita kini sa mga bata. Gamita ang mga hulagway aron sa pagtudlo mahitungod sa mga sambingay diha sa Mateo 13:44–46. Hisgoti kon nganong ang usa ka tawo tingali mosakripisyo sa tanan nga anaa nila alang sa usa ka matahom nga perlas o bahandi diha sa umahan. Ipasabot nga usahay kinahanglang isakripisyo nato ang usa ka butang nga maayo alang sa usa ka butang nga mas maayo. Sultihi ang mga bata kon nganong ang ebanghelyo bililhon alang kanimo.
-
Ibutang sulod sa usa ka kahon o kaban ang pipila ka butang o hulagway nga nagrepresentar sa “mga bahandi” sa Ang Simbahan ni Jesukristo sa mga Santos sa Ulahing mga Adlaw, sama sa Manluluwas, mga templo, o ang Basahon ni Mormon. Hangyoa ang matag bata sa pagpili og usa ka butang o hulagway ug sa paghisgot kon nganong usa kini ka bahandi.
-
Kantaha og dungan ang “Ang Simbahan ni Jesukristo” (Songbook sa mga Bata, 48), ug hangyoa ang mga bata sa paghisgot mahitungod sa mga rason nga mapasalamaton sila alang sa Simbahan sa Manluluwas. Pagpamatuod sa mga panalangin nga imong nasinati tungod sa imong pagkamiyembro sa Simbahan.
Itudlo ang Doktrina: Mas Magulang nga mga Bata
Kinahanglan nakong andamon ang akong kasingkasing aron sa pagdawat sa mga pagtulon-an ni Jesus.
Unsaon nimo pagtabang ang mga bata nga makaila sa importansiya sa pagbaton og malumo ug andam nga kasingkasing aron makatudlo si Jesus kanila?
Posible nga mga Kalihokan
-
I-assign ang matag bata sa pagbasa mahitungod sa usa sa upat ka matang sa yuta diha sa Mateo 13:4–8. Dapita sila sa pagpangita ug sa pagpaambit sa unsay mahitabo sa binhi diha sa matang sa yuta nga ilang gibasa. Sa unsang paagi ang atong mga kasingkasing sama sa lainlaing matang sa yuta? (tan-awa sa Mateo 13:19–23).
-
Pakit-a ang mga bata og hulagway sa usa ka tanaman. Unsa nga matang sa yuta ang gikinahanglan aron motubo ang mga tanom diha niini? Ipakita ang usa ka hulagway sa batoon o tunokon nga yuta. Nganong maglisod og tubo ang mga tanom niini nga matang sa yuta? Unsaon nato sa pagseguro nga ang atong mga kasingkasing sama sa maayo nga yuta aron makadawat kita sa mga pagtulon-an sa Manluluwas?
-
Dapita ang mga bata sa pagbasa sa Mateo 13:15–17. Pagdrowing og mata, dunggan, ug kasingkasing diha sa pisara. Unsaon nato sa paggamit ang matag usa niini nga mga butang aron sa pagkat-on sa mga pagtulon-an ni Jesus?
Makapili ako og matarong bisan kon ang nanaglibot kanako wala maghimo niini.
Sa imong pagbasa niini nga mga bersikulo nga naghunahuna sa mga bata, unsa nga mga impresyon ang miabot kanimo?
Posible nga mga Kalihokan
-
Dapita ang mga bata sa pagdrowing og lainlaing talan-awon gikan sa sambingay sa trigo ug mga sagbot, nga makita diha sa Mateo 13:24–30, ug ipaambit ang ilang mga drowing ngadto sa klase. Hangyoa sila nga sulatan ang ilang mga drowing gamit ang interpretasyon sa sambingay nga makita diha sa Mateo 13:36–43. Tingali kinahanglan nimong ipasabot nga ang mga sagbot makadaot.
-
Kon mahimo, ipakita ang usa ka hulagway sa trigo ug mga sagbot. Ipasabot nga ang trigo ug mga sagbot magdungan og tubo hangtod sa ting-ani (ang kataposan sa kalibotan). Nagtudlo kini kanato nga nagpuyo kita nga gilibotan sa maayo ug daotan, ug kinahanglang mag-amping gayod kita nga mopili sa matarong. Hangyoa ang mga bata sa pagpaambit kon unsaon nila sa pag-ila sa kalainan tali sa maayo ug daotan.
Ang akong pagkamiyembro sa Ang Simbahan ni Jesukristo sa mga Santos sa Ulahing mga Adlaw usa ka bahandi.
Nakita ba sa mga bata nga imong gitudloan nga ang ilang pagkamiyembro sa Simbahan usa ka bililhon nga bahandi? Tingali ang paghisgot sa mga sambingay diha sa Mateo 13:44–46 makatabang kanila sa pagpaambit sa ilang mga pagbati mahitungod sa Simbahan sa Manluluwas.
Posible nga mga Kalihokan
-
Dapita ang mga bata sa pagbasa sa Mateo 13:44–46 sa ilang mga kaugalingon ug sa pagpaambit sa mga sambingay gamit ang ilang kaugalingong mga pulong ngadto sa laing sakop sa klase.
-
Paggunting og pipila ka lingin nga morepresentar sa mga sensilyo, ug isulod kini sa kahon sa mga bahandi. Dapita ang mga bata sa pagkuha og usa ka sensilyo ug sa pagdrowing o pagsulat diha niini og usa ka butang nga ilang ganahan kaayo mahitungod sa pagkahimong miyembro sa Simbahan. Hangyoa ang mga bata sa pagpaambit kon unsay ilang gibutang sa ilang sensilyo.
-
Dapita ang usa ka miyembro sa ward sa pagpaambit ngadto sa mga bata sa iyang istorya sa pagkakabig ug sa pagsulti kon unsa ang iyang gisakripisyo aron mahisakop sa Ang Simbahan ni Jesukristo sa mga Santos sa Ulahing mga Adlaw. O hangyoa ang mga bata sa paghisgot mahitungod sa mga sakripisyo nga ilang gibuhat alang sa Ginoo ug sa Iyang Simbahan.
Awhaga ang Pagkat-on diha sa Panimalay
Dapita ang mga bata sa pagtudlo sa ilang mga pamilya mahitungod sa usa sa mga sambingay nga ilang nakat-onan sa Primary.
Pagpalambo sa Atong Pagtudlo
Ang mga bata ganahan nga mopaambit sa unsay ilang nakat-onan. Bisan og gagmay pa sila, ang mga bata makapalig-on sa mga sakop sa ilang pamilya. Awhaga sila sa pagpaambit ngadto sa ilang mga pamilya ang mga butang nga ilang nakat-onan sa Primary. (Tan-awa sa Pagtudlo sumala sa Pamaagi sa Manluluwas, 30.)