“Marso 6–12. Mateo 9–10; Marcos 5; Lucas 9: ‘Kining Napulo ug Duha Gipalakaw ni Jesus,’” Dali, Sunod Kanako—Alang sa Primary: Bag-ong Tugon 2023 (2022)
“Marso 6–12. Mateo 9–10; Marcos 5; Lucas 9,” Dali, Sunod Kanako—Alang sa Primary: 2023
Marso 6–12
Mateo 9–10; Marcos 5; Lucas 9
“Kining Napulo ug Duha Gipalakaw ni Jesus”
Samtang imong basahon ang Mateo 9–10; Marcos 5; ug Lucas 9, mahimong makadawat ka og mga pag-aghat gikan sa Espiritu Santo. Kini nga mga pag-aghat, lakip ang Dali, Sunod Kanako—Alang sa mga Indibidwal ug mga Pamilya ug kini nga latid, makatabang kanimo sa pagpangandam sa pagtudlo.
Dapita ang Pagpaambit
Dapita ang mga bata sa pagpaambit og usa ka butang nga ilang gihimo aron sa pagtabang sa usa ka tawo niini nga semana. Unsa ang gihimo sa Manluluwas aron sa pagtabang sa uban?
Itudlo ang Doktrina: Mas Gagmay nga mga Bata
Si Jesus adunay gahom sa pag-ayo kanako.
Balik-balik nga gipakita sa Manluluwas ang Iyang gahom sa pag-ayo niadtong adunay hugot nga pagtuo Kaniya. Matabangan nimo ang mga bata nga imong gitudloan sa pagpalig-on sa ilang hugot nga pagtuo diha sa Iyang makaayo nga gahom.
Posible nga mga Kalihokan
-
Sultihi ang mga bata sa istorya sa anak nga babaye ni Jairo (tan-awa sa Marcos 5:22–23, 35–43). Sa tukma nga higayon sa istorya, basaha ang mga pulong ni Jesus nga “ingnon ko ikaw, bangon” (bersikulo 41), ug dapita ang mga bata sa pagbarog. Tabangi ang mga bata nga makasabot nga si Jesus adunay gahom sa pag-ayo sa mga tawo ug sa paghatag kanato og kinabuhing dayon.
-
Ipakita ang usa ka hulagway sa istorya sa Mateo 9:20–22 samtang imong basahon kini nga mga bersikulo. Tabangi ang mga bata nga masag-ulo ang pulongan nga “Ang imong [hugot nga pagtuo] maoy nakaayo kanimo” (bersikulo 22). Aron sa pagbuhat niini, mahimo nimong i-assign ang matag bata sa usa ka pulong, ug dayon ipasulti sa mga bata ang ilang mga pulong sa tukma nga han-ay sa pipila ka higayon. Sa unsang paagi nga ang babaye nagpakita nga siya adunay hugot nga pagtuo ni Jesukristo? Unsa ang atong mahimo aron sa pagpakita nga kita adunay hugot nga pagtuo ni Kristo?
-
Hangyoa ang mga bata sa pagpiyong ug sa pagpaminaw samtang mobasa ka gikan sa Mateo 9:27–30. Inig basa nimo mahitungod ni Jesus nga miayo sa buta nga mga tawo, dapita ang mga bata sa pagbuka sa ilang mga mata. Dapita ang mga bata sa paghisgot kon unsa ang ilang bation kon si Jesus miayo kanila.
-
Gamita ang pahina sa kalihokan niini nga semana aron sa pagtabang sa mga bata nga makakat-on sa istorya sa Manluluwas nga mibuhi sa anak nga babaye ni Jairo gikan sa pagkamatay.
Trust in the Lord [Salig sa Ginoo], ni Liz Lemon Swindle
Mitawag si Jesus og Napulog Duha ka Apostoles ug mihatag kanila og gahom sa paghimo sa Iyang buhat.
Nasayod ba ang mga bata nga imong gitudloan nga aduna kitay napulog duha ka Apostoles karon? Unsaon nimo paggamit niini nga mga bersikulo sa pagtudlo kanila mahitungod sa kaimportante sa Apostoles sa modernong panahon ug sa unsay gipabuhat kanila?
Posible nga mga Kalihokan
-
I-summarize ang Mateo 10:1–10 gamit ang yano nga mga pulong. Ipasabot nga si Jesus mitawag og Apostoles aron sa pagtabang Kaniya sa pagtukod sa Iyang Simbahan. Ipaihap sa mga bata ang Apostoles diha sa litrato nga Kristo Nag-orden sa mga Apostoles (Libro sa mga Hulagway sa Ebanghelyo, nu. 38) ug diha sa litrato sa kasamtangang Korum sa Napulog Duha ka Apostoles (tan-awa sa ChurchofJesusChrist.org o sa usa ka isyu sa kinatibuk-ang komperensiya sa Liahona). Ipasabot nga kita adunay Napulog Duha ka Apostoles karon, sama sa panahon ni Jesus. Ipaambit ang imong pagpamatuod bahin sa Apostoles sa Ginoo ug bahin sa usa ka butang nga bag-ohay nilang gitudlo.
-
Tagoi palibot sa lawak ang mga hulagway sa Apostoles sa modernong panahon (alang sa mga litrato, tan-awa ang bag-ong isyu sa kinatibuk-ang komperensiya sa Liahona). Dapita ang mga bata sa pagpangita sa mga hulagway, ug sultihi sila og gamay mahitungod sa matag Apostol.
-
Dapita ang usa ka bata sa pagkupot og litrato sa Unang Kapangulohan ug litrato sa Korum sa Napulog Duha ka Apostoles. Hangyoa ang bata nga giyahan ang ubang mga bata libot sa lawak padulong sa usa ka hulagway ni Jesus. Pagpamatuod nga ang mga propeta ug apostoles mogiya kanato ngadto ni Jesukristo.
Itudlo ang Doktrina: Mas Magulang nga mga Bata
Si Jesus adunay gahom sa pag-ayo kanako.
Ang pagbasa sa mga istorya bahin sa Manluluwas nga miayo sa mga tawo makatabang sa mga bata nga imong gitudloan nga mapalig-on ang ilang hugot nga pagtuo diha Kaniya. Kini nga mga istorya makatabang usab kanila nga mobati sa Iyang kamanggiloy-on ug gugma.
Posible nga mga Kalihokan
-
Basaha og dungan ang mga istorya ni Jesus nga miayo og mga tawo nga makita sa Mateo 9:20–22, 27–30 ug Marcos 5:22–23, 35–43. Sa unsa nga paagi nga ang mga tawo niini nga mga istorya nagpakita sa ilang hugot nga pagtuo ni Jesukristo? Unsa ang atong makat-onan mahitungod sa Manluluwas gikan niini nga mga istorya?
-
Dapita ang mga bata sa pagpaambit og mga kasinatian sa dihang sila o ang ilang kaila nakadawat og panalangin sa pagkapari alang sa pag-ayo sa masakiton. Sa unsang paagi sila naayo o napanalanginan? Ipasabot nga usahay dili kabubut-on sa Ginoo ang milagroso nga pagkaayo, apan mapanalanginan gihapon kita pinaagi sa Iyang gugma ug paghupay.
Ang Napulog Duha ka Apostoles makatudlo kanako mahitungod ni Jesus.
Sa unsang paagi nga ang pagkat-on mahitungod sa Napulog Duha ka Apostoles sa panahon ni Kristo makatabang sa mga bata nga mas makasabot sa unsay gibuhat sa Napulog Duha ka Apostoles karon?
Posible nga mga Kalihokan
-
Ipakita ang mga hulagway sa Apostoles sa panahon ni Jesus ug sa atong panahon (tan-awa sa Kristo Nag-orden sa mga Apostoles [Libro sa mga Hulagway sa Ebanghelyo, nu.38] ug sa usa ka bag-ong isyu sa komperensiya sa Liahona). Hangyoa ang mga bata sa pagbasa sa Mateo 10:7 aron makahibalo kon unsay buhaton sa Apostoles (tan-awa usab sa Lucas 9:1–2, 6; Doktrina ug mga Pakigsaad 107:23).
-
Dapita ang mga bata sa pagsulat diha sa pisara og daghan nga ngalan sa orihinal nga Apostoles kutob sa ilang mahinumdoman. Dayon hangyoa sila sa paglista og daghan nga buhing Apostoles kutob sa ilang mahinumdoman. Ipatandi kanila ang ilang mga lista sa Mateo 10:2–4 ug sa usa ka bag-o nga isyu sa komperensiya sa Liahona. Makadula usab kamo og pagpares-pares nga dula diin ang mga bata mopares sa matag ngalan sa buhi nga Apostol ngadto sa iyang litrato. Ang mga litrato makita sa ChurchofJesusChrist.org.
-
Pipila ka adlaw sa dili pa ang klase, dapita ang pipila ka bata nga motambong nga andam nga mopaambit og istorya nga gisugilon sa usa sa buhi nga Apostoles (tan-awa ang mga isyu sa Liahona alang sa mga ideya). Sa unsang paagi nga gigamit niana nga Apostol ang istorya sa pagdasig kanato nga mahimong mas sama sa Manluluwas?
-
Ipaambit ang pipila ka ehemplo sa mga pagpamatuod sa Apostoles sa modernong panahon bahin ni Kristo ngadto sa mga bata (tan-awa ang mga mensahe sa bag-ong kinatibuk-ang komperensiya o “Ang Buhi nga Kristo: Ang Pagpamatuod sa mga Apostoles” [ChurchofJesusChrist.org]).
-
Tabangi ang mga bata nga makasag-ulo ug makasabot sa Mga Artikulo sa Hugot nga Pagtuo 1:6.
Ang pagsunod ni Jesus nagkinahanglan og sakripisyo.
Unsaon nimo pagtabang ang mga bata nga makasabot sa unsay buot ipasabot sa “kawad-an” sa ilang mga kinabuhi samtang mosunod sila sa Manluluwas?
Posible nga mga Kalihokan
-
Sultihi ang mga bata mahitungod sa usa ka higayon sa dihang gibiyaan nimo ang usa ka butang aron makakuha og mas maayong butang. Dapita ang mga bata sa pagpaambit og ilang kaugalingon nga mga ehemplo. Dayon basaha og dungan ang Lucas 9:23–25. Ipasabot nga gusto ni Jesus nga mahimo kitang andam nga mobiya sa bisan unsang butang aron mosunod Kaniya. Samtang Siya dili tingali mohangyo kanato nga literal nga biyaan ang atong mga kinabuhi, unsa man ang Iyang gihangyo nga atong ihatag? (tan-awa sa Hubad ni Joseph Smith, Mateo 16:26).
-
Isulat ang pipila ka Kristohanon nga mga kinaiya diha sa mga piraso sa papel ug ang mga sukwahi niana nga mga kinaiya sa laing mga piraso sa papel (sama sa gugma ug kahakog, pagkamapainubsanon ug garbo, ug uban pa). Isulat ang mga pulong luwason ug wad-on isip mga ulohan diha sa pisara, ug dapita ang mga bata sa pagbahig sa mga kinaiya ubos sa tukma nga mga ulohan. Hatagi ang mga bata og panahon sa pagpamalandong sa Kristohanon nga mga kinaiya diha sa pisara ug sa pagpili og usa nga mas palamboon pa.
Awhaga ang Pagkat-on diha sa Panimalay
Dapita ang mga bata sa paggamit sa pahina sa kalihokan niini nga semana aron sa pagtudlo sa ilang mga pamilya mahitungod sa pag-ayo ni Jesus sa anak nga babaye ni Jairo.
Pagpalambo sa Atong Pagtudlo
I-awhag ang balaang pagtahod. Tabangi ang mga bata nga makasabot nga ang usa ka importante nga aspeto sa balaan nga pagtahod mao ang paghunahuna mahitungod sa Langitnong Amahan ug ni Jesukristo. Mahimo nimong pahinumdoman ang mga bata nga magbaton og balaang pagtahod pinaagi sa hinay nga pagkanta o pag-hum og usa ka awit o sa pagpakita og hulagway ni Jesus.